Biiyaʼ guiraʼ ni nuu lu sitiu riʼ

guyé lu índice

 MODO BIBANEʼ

Qué nixeleʼ Jiobá de naa ora guyuaaʼ galán ne ora gudideʼ lu guendanagana

Qué nixeleʼ Jiobá de naa ora guyuaaʼ galán ne ora gudideʼ lu guendanagana

GULEʼ ndaaniʼ ti guidxihuiiniʼ ni láʼ Namkumba (Malaui), lu beeu marzo, iza 1930. Guiráʼ binnilidxeʼ testigu stiʼ Jiobá laacaʼ. Lu iza 1942 bidieeʼ naa Jiobá ne guyuaanisaʼ ndaaniʼ ti guiiguʼ nabé sicarú. Maʼ ziniáʼ 70 iza de zinandaʼ conseju bidii apóstol Pablu Timoteu ora gúdxibe laa cadi gusaana de gucheeche diidxaʼ, cásica ora gucaadiaga binni zaqueca ora qué nacaʼ gucaadiágacaʼ (2 Timoteo 4:2).

Lu iza 1948, yeganna hermanu Nathan Knorr ne Milton Henschel guidxi Malaui. Cani guníʼcabe que gucané cani naa quixhe iqueʼ gacaʼ precursor. Despué binebiaʼyaʼ Lidasi, ti hermana ni guyuuladxeʼ modo laa. Laabe laaca naguixhe íquebe gácabe precursora. Lu iza 1950 bichaganadu ne para iza 1953 maʼ nápadu ti hombrehuiiniʼ ne ti dxaapahuiiniʼ. Neca napa xidé gudiʼdu ni caquiiñeʼ binnilídxidu, gunidu zanda gacaʼ precursor regular. Chupa iza despué gucaʼ precursor especial.

Gucané ca asamblea que laadu guidxaagaludu guendanagana gúpadu

Qué nindaa gúdxicabe naa chigannaʼ ca neza binni ridagulisaa para uguaaʼ gana laacaʼ. Cumu nabé gucané Lidasi naa la? gunda bidieeʼ ni caquiiñeʼ binnilidxeʼ ne qué nusaanaʼ de nigannaʼ ca neza binni ridagulisaa. * Peru guirópadu nga riuuláʼdxidu gácadu precursor. Ngue runi, byuidu diidxaʼ ne cumu gucané ca gaayuʼ xiiñidu laadu gunda guca Lidasi precursora lu iza 1960.

Lu iza 1962 guyuudu ti asamblea ni biree lá: «Cani nadxibalú para gucheeche diidxaʼ». Ti iza despué, biguetaʼ hermanu Henschel Malaui dxi guca ti asamblea nabé risaca gaxha de guidxi Blantyre ra guyé jma de 10,000 binni. Ora guietenaladxeʼ ca libana ni gudiʼdiʼ ra asamblea que rudieeʼ cuenta gucané cani laadu ganda gudxíʼludu ca guendanagana chiguidxaagaludu.

DXI MAʼ GUYUU GUENDANAGANA

Zinécabe ca hermanu ndaaniʼ cárcel despué de guca juzgarcaʼ

Lu iza 1964 guzananda gobiernu ca Testigu purtiʼ qué riuucaʼ lu política. Binidécabe jma de 100 Yoo stiʼ Reinu ne jma de ti mil  yoo stiʼ ca hermanu. Naa ne Lidasi yegánnarudu ca neza binni ridagulisaa dede dxi bicueeza gobiernu ca Testigu lu iza 1967. Bitagunáʼ gobiernu Betel, guladxi guiráʼ misioneru ni nuu ndaaniʼ guidxi que ne biseguyoocabe stale hermanu dede né naa ne Lidasi. Dxi bireʼdu cárcel, yegánnarudu neza binni ridagulisaa, peru gúpadu cuidadu.

Ti dxi, lu beeu octubre iza 1972, málasi guyuu ti hombrehuiiniʼ ra lídxidu. Nuube lade ti grupu de hombrehuiiniʼ ni nuu lu política. Bedatídxibe laadu zeeda caadxi xcompañérube ra lídxidu para guuticaʼ naa. Oraqueca gudxeʼ xheelaʼ ne ca xiiñeʼ ucachilucaʼ lade caadxi yaga biduaa. Naa gudxibaʼ lu ti yaga ne biiyaʼ modo binitilúcabe lidxeʼ ne guiráʼ ni nápadu.

Bicaaguícabe lidxi ca hermanu que purtiʼ qué ñuucaʼ lu política

Ra zidiʼdiʼ dxi jmaruʼ si guzanándacabe ca Testigu ne stale tu bixooñeʼ ndaaniʼ guidxi Malaui. Guyuudu Mozambique ne yendézadu ra guyé binni ni cuxooñelú pur ni cazaaca que ne raqué biaanadu dede beeu junio, iza 1974. Lu beeu que biʼniʼ invitárcabe naa ne Lidasi gácadu precursor especial Dómue, Mozambique. Peru lu iza 1975 bisaanadu de gácadu precursor especial, purtiʼ bidxiguetaʼ gobiernu laadu Malaui ra cucaalúcabe ca Testigu.

Dxi yendadu Malaui biʼniʼ invitárcabe naa chigannaʼ ca neza binni ridagulisaa ni nuu Lilongüe. Neca guzananda binni ca Testigu de raqué ne gúpacaʼ guendanagana, bidale neza binni ridagulisaa ladu rigánnadu que.

GUCANÉ JIOBÁ LAADU PURTIʼ NADXII LAADU

Ti dxi yendadu ndaaniʼ ti guidxihuiiniʼ ra cayaca ti mitin stiʼ ca políticu. Gunna caadxi binni Testigu laadu, ngue runi bicuícabe laadu lade sti grupu de hombrehuiiniʼ ni nuu lu política. Biʼniʼ orardu Jiobá para gacané laadu ne guluíʼ laadu xi gúnidu. Ora biluxe mitin que, bizulú ca binni que gudíñecaʼ laadu. Málasi bicaa ti gunaa huaniisi ridxi cadi guninácabe laadu. Gúdxibe ca binni que xiiñiʼ ti bizáʼnabe naa. Qué gánnadidu xiñee guniʼbe zaqué purtiʼ cadi binnilidxeʼ laabe. De raqué biʼniʼ mandar ni caníʼ raqué gundaacabe laadu. Nanna dxíchidu bicabi Jiobá oración stidu.

Tarjeta stiʼ partidu ni biʼniʼ mandar Malaui

Lu iza 1981, bidxela ca binni ni nuu lu política que laadu. Biaje riʼ zinécabe guiráʼ ni nápadu: bicicleta, ca maleta stidu, ca libru stidu dede né ca guiʼchiʼ risaca stiʼ ca neza  binni ridagulisaa yegánnadu. Gunda bixóʼñedu ne yeguiaanadu ra lidxi ti binnigola. Guizáʼ guyuʼdu xizaa pur guiráʼ ni cá lu ca guiʼchiʼ zinécabe. Biiyaʼ ca binni que guiráʼ carta biseendaʼ ca binnigola ni nuu ndaaniʼ guidxi que ra nuaaʼ. Bidxíbicabe purtiʼ zacaxácabe nacaʼ ti binni risaca ni runiné gobiernu dxiiñaʼ. Ngue runi, bidxiguétacabe ca guiʼchiʼ que ca binnigola de guidxi que.

Ti dxi gudxíbadu lu ti barcu para tiididu ti guiiguʼ. Peru xpixuaanaʼ barcu que naca xaíque lade ca políticu. Bizulú hombre que canabaʼ cuee ca binni que tarjeta stiʼ partidu ni cayuni mandar guidxi que. Ora mayaca guidxíñabe ra nuudu biiyabe zeʼ ti gubaanaʼ ni canayubi pulicía lu barcu que. Guca ti yaya raqué ne pur ngue maʼ qué ninábaruʼ hombre que tarjeta laadu. Sti biaje bidiʼdu cuenta cayapa Jiobá laadu.

BISEGUYOOCABE NAA

Ti dxi, lu beeu febrero de iza 1984, ziaaʼ Lilongüe para guseendaʼ informe Betel ni nuu Zambia. Bicueeza ti pulicía naa ne bidxieenáʼ cani ziniáʼ. Cumu biiyabe ziniáʼ caadxi libru ne revista ni caníʼ de Biblia, yenebe naa ra cuartel stiʼ ca pulicía ne raqué gudíñebe naa. Despué bindiibibe naa ne guluube naa ra deguyoo caadxi gubaanaʼ.

Sti dxi que, yené xaíque stiʼ ca pulicía que naa ndaaniʼ ti cuartu ne bidii naa ti guiʼchiʼ para guneʼ firmar. Lu guiʼchiʼ que na zudiicabe lugar guireeʼ ndaaniʼ cárcel pa guneʼ firmar maʼ qué racaladxeʼ gacaʼ Testigu. Qué ñuneʼ firmar guiʼchiʼ que ne gudxeʼ pulicía que zanda guseguyoo naa o guuti naa peru qué ziuu dxi gusaanaʼ de gacaʼ testigu stiʼ Jiobá. Nabé bidxiichi hombre que ne guizáʼ reciu gudapa lu escritorio dede beeda sti pulicía beeda guuya xi cayaca. Óraque gudxi xaíque stiʼ ca pulicía que naa guneʼ firmar ti guiʼchiʼ ni caníʼ nácaruaʼ Testigu. Ne gúdxibe pulicía que zinécabe naa Lilongüe para guseguyoocabe naa. Laga cayaca guiráʼ ndiʼ qué ganna xheelaʼ paraa nuaaʼ. Tapa gubidxa despué gudxi ca hermanu que laabe xi guiráʼ bizaacaʼ.

Nabé galán guiráʼ ni biʼniʼ ca binni que ora yendadu ra cuartel stiʼ ca pulicía. Bidii xaíque stiʼ ca pulicía que naa ti bladuʼ arroz. Ne nabe biteguyoocabe naa purtiʼ rusiideʼ ni na Biblia ne cadi pur nacaʼ gubaanaʼ, casi cani deguyoo raqué. Despué biseendacabe naa  ndaaniʼ cárcel ni nuu Kachere. Raqué guyuaaʼ gaayuʼ beeu.

Nabé biecheʼ director stiʼ cárcel que pur nuaaʼ raqué. Nuube gacaʼ pastor ndaaniʼ cárcel que. Neca nuu ti pastor raqué, peru director que na maʼ qué zácarube pastor purtiʼ guláʼnabe ndaaniʼ yuʼduʼ stibe. Ngue runi, bineʼ guendaridagulisaa ndaaniʼ cárcel que guiráʼ semana para gusiideʼ ca binni que de Biblia.

Peru despué, maʼ guca ni nagana. Bizulú ca guardia que gunabadiidxacaʼ naa panda testigu stiʼ Jiobá nuu Malaui. Cumu qué niniéʼ la? gudíñecabe naa dede zeʼ xpiaaneʼ. Sti biaje gunabadiidxacabe naa paraa nuu oficina stiʼ religión stinneʼ. Óraque gudxeʼ laacabe cadi nagana ni canabadiidxacabe purtiʼ Biblia cuzeeteʼ ni. Bidxagayaacabe ora guniéʼ ngue ne nácabe paraa zeeda ni.

Gudxeʼ laacabe zeeda ni lu Isaías 43:12, ra na Dios: «Laatu nga testigu stinneʼ». Chonna biaje biindacabe ni ne gunabadiidxacabe naa: «Ximodo nga naluʼ ndaaniʼ Biblia nuu ni ne cadi América yaʼ». Gudxeʼ laacabe laaca riníʼ ique ca Testigu ni nuu América textu riʼ nga cusiene paraa nu oficina stidu. Cumu qué ñabeʼ laacabe ni gunabadiidxacabe naa la? biseendacabe naa ndaaniʼ cárcel nuu Dzaleka, ladu guiáʼ de guidxi Lilongüe.

BISISACA BINNI JIOBÁ NDAANIʼ CÁRCEL

Dxi yendayaʼ ndaaniʼ cárcel ni nuu Dzaleka lu beeu julio de iza 1984 maʼ nuu 81 Testigu raqué. Nabé stale binni deguyoo raqué, ngue runi biaʼ 300 de laadu luguiaʼlisaa rásidu. Despué, bínidu grupuhuiiniʼ para guidúʼndadu ti textu ni zeeda lu Biblia guiráʼ dxi. Ngue racané laadu cadi guireʼdu gana.

Zinécabe ca hermanu ndaaniʼ cárcel despué de guca juzgarcaʼ

Lu beeu octubre de iza 1984, biʼniʼ juzgárcabe guiráʼ ca Testigu ni nuu ndaaniʼ cárcel que ne gudíxhecabe guieeguyoodo xhupa iza. Ne casi huazaaca ante, biteguyoocabe laadu lade ca binni ni cadi naca Testigu. Peru director stiʼ cárcel que gudxi guiráʼ cani nuu raqué qué riguʼbaʼ ca Testigu gueza. Ne gúdxibe ca guardia nuu raqué cadi guinábacaʼ laadu gueza ne nin gucaacaʼ laadu gucáʼguidu gueza sticaʼ. Guniʼbe nácadu xquidxi Dios ngue runi naquiiñeʼ gudiicabe ni guidoʼdo chupa biaje lu ti dxi, purtiʼ nuudu raqué pur ni runi credu ne cadi pur nácadu gubaanaʼ.

 Cumu rúnidu ni jneza la? bidiicabe lugar gúnidu caadxi cosa ni qué runi cani deguyoo raqué. Ora guiaba nisaguié ne ora nacahui nuu qué rudii ca guardia que lugar guiree cani deguyoo lu patiu stiʼ cárcel que. Peru laadu rudiicabe lugar guireʼdu lu patiu purtiʼ nánnacabe que zúnidu pur guireʼdu ndaaniʼ cárcel. Ti biaje cayúnidu dxiiñaʼ lu layú málasi guca huará ti guardia nuu raqué. Ngue runi, bibiguetanedu laabe ra cárcel. Cumu bínidu ni jneza la? bisisaca ca guardia que lá Jiobá (1 Pedro 2:12). *

BIREʼDU NDAANIʼ CÁRCEL

Bireʼdu ndaaniʼ cárcel ni nuu Dzaleka 11 stiʼ mayo de iza 1985. ¡Guizáʼ biecheʼ purtiʼ guyuuaniáʼ binnilidxeʼ sti biaje! Cumu gucané Jiobá laadu la? gunda biʼniʼ huantardu ora bidxaagaludu guendanagana. Biénedu xi biʼniʼ sentir apóstol Pablu ora guníʼ: «Zácaxa du ma qué ñanda ñuni huantar ru du. Rabi du raqué ñati du. Para laadu ruluíʼ ma nexhe gati du. Peru guca ni zacá ti cadi icá lú du zanda ulá du laca laadu sínuque icá lú du Dios si zanda ulá laadu, purti laa dede gueʼtu rusibani». Laaca guníʼ Pablu stale biaje bilá Jiobá laa de lu náʼ guendaguti ne gunna dxichi qué zusaana Jiobá laa (2 Corintios 1:8-10).

Zuhuaa hermanu Nsomba ne Lidasi ra Yoo stiʼ Reinu lu iza 2004

Guyuu ora guníʼ íquedu zátidu. Peru qué nusaana de ninábadu Jiobá nudii stipa laadu, guendabiaaniʼ ne gacané laadu cadi gudxíʼbadu laadu ti guisaca labe.

Qué nixeleʼ Jiobá de laadu ora guyuʼdu galán ne ora gudídidu lu guendanagana. Yanna, riéchedu purtiʼ nápadu ti Betel sicarú ndaaniʼ guidxi Lilongüe ne maʼ nuu jma de 1,000 Yoo stiʼ Reinu ndaaniʼ guidxi Malaui. Qué ñuu dxi niníʼ iqueʼ ne ninca Lidasi pa ñaca guiráʼ ndiʼ, ngue runi zeeda gaca cani casi ti regalu stiʼ Jiobá para laadu. *

^ párrafo 6 Yanna riʼ, ca hermanu ni cusinisiiruʼ xiiñiʼ qué zanda gácacaʼ superintendente de circuito.

^ párrafo 27 Zadxélaluʼ jma ni cusiene ximodo guzanándacabe ca xpinni Cristu de Malaui lu Anuario de los testigos de Jehová 1999, yaza 171 dede 223.

^ párrafo 31 Guti hermanu Nsomba laga cacá historia riʼ dxi napa 83 iza.