Biiyaʼ guiraʼ ni nuu lu sitiu riʼ

guyé lu índice

Gacanenu ca biʼchiʼ Cristu

Gacanenu ca biʼchiʼ Cristu

«Ora biʼni tu ni ti hermanu stinne neca huaxiéʼ laa la? casi ñaca biʼni tu ni naa.» (MATEO 25:40)

1, 2. 1) Xi historia guniʼné Jesús ca xhamigu (Biiyaʼ dibuju ni zeeda ra ruzulú tema riʼ.) 2) Xii nga ni naquiiñeʼ gánnanu de historia ra rieeteʼ de dendxuʼ ne chiva.

TI DXI gudxi Jesús ca xhamigu, Pedru, Andrés, Santiagu ne Juan, ti cosa nabé risaca. Guníʼnebe laacaʼ historia stiʼ mozo ni nuu xpiaaniʼ, chii binnidxaapaʼ ne ca talentu. Despué guníʼnebe laacaʼ sti historia. Luni rieeteʼ de «Hombre Biseenda Dios» ne de ora gueeda guni juzgarbe binni. Lu historia riʼ, «Hombre Biseenda Dios» zabeechú binni «de irá guidxi» ne zúnibe laacaʼ chupa grupu. Cani nuu lu primé grupu riʼ ribee labe laacaʼ «dendxuʼ» ne guiropa grupu ca ribee labe laacaʼ «chiba». Lu historia riʼ laaca rieeteʼ nuu sti grupu nabé risaca: ca biʼchiʼ rey (biindaʼ Mateo 25:31-46).

2 Laanu laaca racaláʼdxinu gánnanu de historia riʼ. Xiñee yaʼ. Purtiʼ Jesús guníʼ ziuu binni zapa guendanabani ni qué zaluxe, peru ziuu xcaadxi ni zanitilú. Nga runi nabé risaca nga gánnanu xi riníʼ historia riʼ ne xi naquiiñeʼ gúninu para gápanu guendanabani ni qué zaluxe. Ne laaca naquiiñeʼ gánnanu ximodo guicabi tema riʼ ca guendarinabadiidxaʼ  riʼ: Ximodo huayacané Jiobá laanu guiénenu historia riʼ. Ximodo nánnanu cusihuinni historia riʼ risaca nga gucheechenu diidxaʼ. Tuu nga cani naquiiñeʼ gucheeche diidxaʼ. Xiñee risaca nga guzúʼbanu diidxaʼ ne gacanenu rey riʼ ne ca biʼchiʼ.

XIMODO HUAYACANÉ JIOBÁ LAANU GUIÉNENU HISTORIA RIʼ

3, 4. 1) Xi chonna cosa naquiiñeʼ gánnanu para guiénenu historia ra rieeteʼ de dendxuʼ ne chiva. 2) Ximodo bisiene revista riʼ historia ra rieeteʼ de dendxuʼ ne chiva lu iza 1881.

3 Para guiénenu xi riníʼ historia ra rieeteʼ dendxuʼ ne chiva naquiiñeʼ gánnanu chonna cosa. Primé, tuu nga zeeda gaca «Hombre Biseenda Dios», rey ni rieeteʼ lu historia riʼ, ca biʼchiʼ rey, dendxuʼ ne chiva yaʼ. Guiropa, padxí nga guuyaʼ Hombre biseendaʼ Dios tuu nga dendxuʼ ne tuu nga chiva yaʼ. Guionna, Xiñee riniʼbe nuu binni zeeda gaca casi dendxuʼ ne nuu tu zeeda gaca casi chiva yaʼ.

4 Lu iza 1881, bisiene revista riʼ Jesús nga «Hombre Biseenda Dios» ne rey que. Tuu nga cani zeeda gaca ca bíʼchibe yaʼ. Revista que bisiene ca biʼchiʼ rey que zeeda gácacaʼ ca binni ni chiguni mandarné Jesús guibáʼ ne laaca zeeda gácacaʼ ca binni ni chiguibani lu Guidxilayú riʼ ora gácacaʼ binni sin donda. Padxí nga guuyaʼ Jesús tuu nga dendxuʼ ne tuu nga chiva yaʼ. Zácani lu 1,000 iza guni mandar Cristu. Ne xiñee zaniʼbe nuu binni zeeda gaca casi dendxuʼ yaʼ. Purtiʼ ca binni ca bisihuínnicaʼ lu guiráʼ ni bíʼnicaʼ gunnaxhiicaʼ cásica rannaxhii Dios.

5. Ximodo bisiene revista riʼ historia ra rieeteʼ de dendxuʼ ne chiva lu iza 1923.

5 Chupa chonna iza despué, gucané Jiobá ca xpinni para guiene chaahuicaʼ historia riʼ. Lu iza 1923, revista 15 stiʼ octubre biquiiñeʼ chupa chonna versículo stiʼ Biblia para bisiene ti cosa nacubi. Tuu nga zeeda gaca «Hombre Biseenda Dios». Laabe nga Jesús. Tuu nga cani zeeda gaca ca biʼchiʼ rey yaʼ. Laacabe nga cani chiguni mandarné Jesús guibáʼ. Tuu nga cani zeeda gaca ca dendxuʼ ca yaʼ. Laacabe nga ca binni ni chiguibani lu Guidxilayú riʼ ora guni mandar Reinu stiʼ Dios. Padxí guiníʼ Jesús laacabe nga ca dendxuʼ ca yaʼ. Zazaaca ni laga nabani ca bíʼchibe lu Guidxilayú, ante guzulú guni mandar rey ca 1,000 iza. Xiñee yaʼ. Purtiʼ lu historia riʼ rieeteʼ zacané ca binni ni guibani lu Guidxilayú ca biʼchiʼ rey, ne nga zazaaca laga nabani ca biʼchiʼ rey ca lu Guidxilayú riʼ. Xiñee zeeda gaca ca binni ni chiguibani lu Guidxilayú riʼ casi dendxuʼ yaʼ. Revista que bisiene zácacabe casi dendxuʼ purtiʼ runi crécabe Jesús ne runi crécabe zacané Reinu stiʼ Dios laacabe para guibánicabe jma galán.

6. Ximodo bidxaa modo riénenu historia riʼ lu iza 1995.

6 Stale iza guníʼ íquenu ca binni ni gucaadiaga stiidxaʼ Dios ora rucheechenu diidxaʼ lu ca últimu dxi riʼ nga ca dendxuʼ ne cani qué gucaadiaga nga ca chiva. Peru lu iza 1995 bidxaa modo riénenu historia riʼ. Revista riʼ bichaaga ni na Mateo 24:29-31Mateo 25:31, 32 (biindaʼ cani). Ne bisiene ni ora gueedabe casi rey zuni juzgarbe binni lu gran tribulación. *

7. Bisiene historia ra rieeteʼ de dendxuʼ ne chiva.

 7 Ca dxi riʼ, nabé nayaʼniʼ nga modo riénenu historia riʼ. Tuu nga zeeda gaca «Hombre Biseenda Dios» ne rey ni rieeteʼ lu historia riʼ yaʼ. Laabe nga Jesús. Tuu nga zeeda gaca ca biʼchiʼ rey ca yaʼ. Laacabe nga cani maʼ gulí Jiobá né espíritu santu stiʼ. Zuni mandarnécabe Jesús guibáʼ (Romanos 8:16, 17). Tuu nga cani zeeda gaca casi dendxuʼ ne casi chiva yaʼ. Laacabe nga ca binni de guiráʼ xixé guidxi. Padxí gaca juzgárcabe yaʼ. Ra maʼ ziluxe gran tribulación, ni mayaca guzulú. Xiñee zeeda gácacabe casi dendxuʼ ne chiva yaʼ. Pur modo guni tratárcabe cani bibí né espíritu santu cani nuuruʼ lu Guidxilayú. Rudiʼnu xquíxepeʼ Jiobá pur racané laanu guiénenu historia riʼ ne xcaadxi historia ni rieeteʼ lu Mateo 24 ne 25.

HISTORIA RIʼ RUSIIDIʼ LAANU RISACA NGA GUCHEECHENU DIIDXAʼ

8, 9. Xiñee guníʼ Jesús naca ca dendxuʼ binni «nachaʼhui» yaʼ.

8 Jesús qué lica nuzeeteʼ de guireeche diidxaʼ lu historia ra rieeteʼ de dendxuʼ ne chiva. Peru nánnanu rusiidiʼ historia riʼ laanu pabiáʼ risaca nga guireeche diidxaʼ. Xiñee rininu zacá yaʼ.

9 Para guiénenu ni, naquiiñeʼ gánnanu ti ejemplu si nga historia riʼ. Jesús cadi caníʼ diʼ de maniʼ ora bizeeteʼ de dendxuʼ ne chiva. Zaqueca cadi caniʼbe ca binni ni zeeda gaca casi dendxuʼ naquiiñeʼ gudiicaʼ lari ne ni gó ca xpínnibe ni bibí né espíritu santu, gápacabe laacaʼ ora gaca huaracaʼ o chigánnacabe laacaʼ ora guideguyoocaʼ. Yanna, xii nga gucalaʼdxiʼ Jesús niníʼ yaʼ. Gucaláʼdxibe niniʼbe ca binni si ni guuyaʼ ca xpínnibe ni bibí né espíritu santu casi bíʼchibe ne gacanecaʼ laacabe lu ca últimu dxi riʼ nga cani guiniʼbe nácacaʼ casi dendxuʼ. Jesús laaca guníʼ nácacabe binni «nachaʼhui» (Mateo 10:40-42; 25:40, 46; 2 Timoteo 3:1-5).

10. Ximodo zanda gacané ca dendxuʼ ca biʼchiʼ Cristu.

10 Peru xiñee caquiiñeʼ ca biʼchiʼ Jesús chuʼ tu gacané laacaʼ yaʼ. Guidúʼyanu. Ante guiniʼbe historia ra rieeteʼ de dendxuʼ ne chiva, caníʼnebe ca discípulo stibe xi zazaaca lu ca últimu dxi riʼ (Mateo 24:3). Maca gúdxibe laacaʼ zareeche stiidxaʼ Reinu lu guidubi Guidxilayú lu ca últimu dxi riʼ (Mateo 24:14). Ne laaca maʼ guníʼnebe laacaʼ historia de ca talentu. Ora guniʼbe historia riʼ casi ora ñábibe ca xpínnibe ni bibí né espíritu santu naquiiñeʼ gúnicaʼ stipa pur gucheechecaʼ diidxaʼ. Peru ximodo zanda gucheeche ca xpínnibe ni bibí diidxaʼ lu guidubi Guidxilayú ante gueeda fin pa maʼ xhupa xhonna sicaʼ yaʼ. Lu historia ra rieeteʼ de ca dendxuʼ ne ca chiva, Jesús guníʼ zacané ca dendxuʼ riʼ cani bibí né espíritu santu. Ximodo yaʼ. Tobi de ca modo jma zanda gacanécabe nga gucheechecabe diidxaʼ. Yanna, ñee naquiiñeʼ si uguucabe gana laacaʼ o gudiicabe bueltu para guireeche diidxaʼ la?

TUU NGA CANI NAQUIIÑEʼ GUCHEECHE DIIDXAʼ

11. Xi zándaca guinabadiidxanu laca laanu.

11 Ca dxi stinu riʼ nuu xhono millón de discípulo stiʼ Jesús. Ne huaxiéʼ si de laacaʼ nácacaʼ ni bibí. Cadi ca binni ni chiguibani lu Guidxilayú nga bidii Jesús ca talentu que, o dxiiñaʼ de gucheechecaʼ diidxaʼ, sínuque cani bibí né espíritu santu nga gucuaa ca talentu que  (Mateo 25:14-18). Nga runi, zándaca guinabadiidxanu laca laanu: «Pa cani bibí né espíritu santu nga bidii Jesús ca talentu riʼ, ñee naquiiñeʼ gucheeche ca dendxuʼ diidxaʼ la?». Naquiiñeʼ. Guidúʼyanu tapa razón ni rusihuinni zacá ni.

12. Xi rizíʼdinu de ni guníʼ Jesús lu Mateo 28:19, 20.

12 Primé, biʼniʼ mandar Jesús ca discípulo stiʼ gucheechecaʼ diidxaʼ. Despué de biasa Jesús lade gueʼtuʼ, gúdxibe ca discípulo stibe gucheechecaʼ diidxaʼ ne gusiidicaʼ binni guiráʼ ni maʼ biʼniʼ mandarbe laacaʼ. Nga runi, cani gaca discípulo stibe laaca naquiiñeʼ gucheechecaʼ diidxaʼ (biindaʼ Mateo 28:19, 20). Xi rusiidiʼ ndiʼ laanu yaʼ. Pa nácanu de cani bibí né espíritu santu o coʼ, guiranu nápanu xidé gucheechenu diidxaʼ (Hechos 10:42).

13. Xi rizíʼdinu lu libru stiʼ Apocalipsis.

13 Guiropa, lu libru stiʼ Apocalipsis rihuinni cadi cani bibí né espíritu santu si nga naquiiñeʼ gucheeche diidxaʼ. Lu ti visión biiyaʼ apóstol Juan «xheela Dendxu huiini» cayuni invitar binni gueeda gueʼ «nisa ni rudii enda nabani». Xheelaʼ Dendxuʼ huiiniʼ ca zeeda gaca 144,000 xpinni Cristu ni bibí ni chiguni mandarné Cristu guibáʼ (Apocalipsis 14:1, 3; 22:17). Nisa que zeeda gaca guendaguti stiʼ Jesús, ni chigulá binni de lu náʼ guendaruchee ne de guendaguti (Mateo 20:28; Juan 3:16; 1 Juan 4:9, 10). Cani bibí né espíritu santu rusiidicaʼ binni ximodo zanda gacané guendaguti stiʼ Jesús laacaʼ (1 Corintios 1:23). Peru lu visión riʼ laaca rihuinni sti grupu ni cadi naca de cani bibí né espíritu santu ne zabánicaʼ lu Guidxilayú riʼ. Ne laaca biʼniʼ mandárcabe grupu riʼ guni invitar xcaadxi binni gueʼ nisa ni rudii guendanabani. Ximodo rúnicabe ndiʼ yaʼ. Rúnicabe ni ora rucheechecabe  diidxaʼ. Casi maʼ bidúʼyanu ca, visión riʼ rusihuinni guiráʼ cani gaca xpínnibe naquiiñeʼ gucheechecaʼ diidxaʼ.

14. Xi naquiiñeʼ gúninu para chinándanu ley ni «gudixhe Cristu».

14 Guionna, guiráʼ cani chinanda ca ley ni «gudixhe Cristu» naquiiñeʼ gucheechecaʼ diidxaʼ (Gálatas 6:2). Ribeza Jiobá chinanda guiráʼ cani guni adorar laa ca ley riʼ. Dxiqué, guleza Jiobá ninanda ca israelita ne ca binni ni nabeza ládecaʼ ni na ca ley stibe (Éxodo 12:49; Levítico 24:22). Dxandíʼ, tiempu riʼ cadi naquiiñeʼ diʼ chinándanu ca ley ni bidii Jiobá ca israelita. Peru naquiiñeʼ chinándanu ley ni «gudixhe Cristu», gácanu de cani bibí né espíritu santu o coʼ. Tobi de ca ley ni jma risaca ni bisiidiʼ Jesús laanu nga gannaxhiisaanu (Juan 13:35; Santiago 2:8). Naquiiñeʼ gannaxhiinu Jiobá, Jesús ne binni. Ne modo jma risaca gusihuínninu nadxiinu laacabe nga guinínenu laacabe de Reinu stiʼ Dios (Juan 15:10; Hechos 1:8).

15. Xiñee nánnanu racalaʼdxiʼ Jesús gucheeche guiráʼ ca discípulo stiʼ diidxaʼ.

15 Guidapa, caadxi de ca cosa ni gudxi Jesús chupa chonna de ca discípulo stiʼ laaca guniʼbe cani para xcaadxi binni. Casi pactu ni bíʼninebe ca 11 discípulo stibe para guni mandárnecaʼ laabe guibáʼ. Peru biaʼsi 144,000 binni nga cani chiguni mandarnebe (Lucas 22:29, 30; Apocalipsis 5:10; 7:4-8). Despué de biasa Jesús lade gueʼtuʼ, chupa chonna si de ca discípulo stibe nga gúdxibe naquiiñeʼ gucheechecaʼ diidxaʼ (Hechos 10:40-42; 1 Corintios 15:6). Peru guiráʼ ca discípulo ni bibani lu primé siglu que bicheechecaʼ diidxaʼ (Hechos 8:4; 1 Pedro 1:8). Nga runi, laaca naquiiñeʼ gucheechenu diidxaʼ neca qué ñuunu ora guníʼ Jesús ca diidxaʼ riʼ. Ca dxi riʼ, nácanu biaʼ xhono millón de Testigu ne rucheechenu diidxaʼ, zacá rusihuínninu nápanu fe laabe (Santiago 2:18).

GACANENU CA BIʼCHIʼ CRISTU YANNA

16-18. 1) Ximodo zanda gacanenu cani bibí né espíritu santu. 2) Xiñee naquiiñeʼ gacanenu cani bibí né espíritu santu.

16 Zeʼ dxi jma cucaalú Binidxabaʼ ca xpinni Cristu ni bibí ni nabániruʼ lu Guidxilayú. Ne laaca nánnabe maʼ huaxiéʼ dxi riaana laabe (Apocalipsis 12:9, 12, 17). Peru qué ganda diʼ gucueezabe cani bibí né espíritu santu de gucheechecaʼ diidxaʼ. Ne yánnapeʼ nga jma careeche diidxaʼ. Rihuinni dxíchica Jesús nga zaniruʼ lu dxiiñaʼ riʼ ne cayacané cani bibí né espíritu santu (Mateo 28:20).

17 Ti ndaayaʼ nga gacanenu ca xpinni Cristu ni bibí para guireeche diidxaʼ. Peru, xiruʼ zanda gúninu para gacanenu laacabe yaʼ. Zanda gudiʼnu bueltu ne gúninu dxiiñaʼ para cuí Yoo stiʼ Reinu ne yoo Betel. Ne laaca racanenu cani bibí né espíritu santu ora ruzúʼbanu stiidxaʼ ca binnigola ne xcaadxi hermanu ni ma gulí «mozo ni nuu xpiaani ne ni runi jneza» (Mateo 24:45-47; Hebreos 13:17).

Stale modo zanda gacanenu cani bibí né espíritu santu (Biiyaʼ párrafo 17)

18 Maʼ cadi candaa, zié cani bibí né espíritu santu ni riaanaruʼ lu Guidxilayú riʼ guibáʼ. De racá, zuzulú gran tribulación (Apocalipsis 7:1-3). Ne ante guzulú Armagedón, ziné Jesús ca xpinni ni bibí né espíritu santu guibáʼ (Mateo 13:41-43). Nga runi, pa racaláʼdxinu guiníʼ Jesús nácanu dendxuʼ, naquiiñeʼ gacanenu ca bíʼchibe.

^ párrafo 6 Bisiénecabe ni lu tema «¿En qué condición se hallará usted cuando esté de pie delante del trono de juicio?» ne «¿Qué les depara el futuro a las ovejas y las cabras?» zeedacani lu revista Torre stiʼ ni rapa 15 stiʼ octubre 1995.