Biiyaʼ guiraʼ ni nuu lu sitiu riʼ

guyé lu índice

Guianu binni cásica biʼniʼ Jesús ne cadi gudxíʼbanu laca laanu

Guianu binni cásica biʼniʼ Jesús ne cadi gudxíʼbanu laca laanu

«Purti laca ucaná Cristu pur laatu. Yanna laguni casi biʼni Cristu.» (1 PEDRO 2:21)

1. Xiñee riuʼnu jma gaxha de Jiobá ora rinándanu ejemplu stiʼ Jesús.

ORA ridxagayaanu modo naca tuuxa, racaláʼdxinu gácanu casi laa. Binni ni jma naquiiñeʼ chinándanu ejemplu stiʼ nga Jesús. Xiñee yaʼ. Purtiʼ laabe guniʼbe: «Ni ma biiya naa la? ma biiya Bixhozeʼ» (Juan 14:9). Guníʼ Jesús ca diidxaʼ riʼ purtiʼ jnézapeʼ modo bisihuínnibe ca guenda stiʼ Jiobá. Ora rizíʼdinu ximodo nga Jesús, laaca rizíʼdinu ximodo nga Jiobá. Nga runi, ora rinándanu ejemplu stiʼ Jesús riuʼnu jma gaxha de Jiobá, binni ni jma risaca guibáʼ ne Guidxilayú. ¡Ti ndaayaʼ naroʼbaʼ nga!

2, 3. 1) Xiñee ruzeeteʼ Biblia stale de ca cosa ni biʼniʼ Jesús. 2) Xi ribeza Jiobá gúninu. 3) Xi zadúʼyanu lu tema riʼ ne lu stobi ca.

2 Lu Biblia rieeteʼ stale cosa de modo bibani Jesús. Xiñee yaʼ. Purtiʼ Jiobá racalaʼdxiʼ gunibiáʼ chaahuinu Jesús ti chinándanu ejemplu stiʼ (biindaʼ 1 Pedro 2:21). Biblia cayabi laanu naquiiñeʼ gúninu cásica biʼniʼ Jesús. Xi riníʼ nga yaʼ. Riníʼ ni naquiiñeʼ gúninu guiráʼ ni biʼniʼ Jesús. Nánnanu qué ñalené Jesús donda. Peru Jiobá qué racalaʼdxiʼ gúninu cásipeʼ modo biʼniʼ Jesús. Ni ribeza Jiobá nga gúninu biaʼ gándatiʼ pur chinándanu ejemplu stiʼ Jesús.

 3 Guidúʼyanu chupa chonna guenda ni gupa Jesús ni naquiiñeʼ gápanu. Lu tema riʼ zadúʼyanu ximodo naca Jesús ti binni ni qué rudxiibaʼ laca laa ne riá binni. Ne lu sti tema ca zadúʼyanu ximodo nácabe nadxibalú ne nánnabe quixhe íquebe gúnibe ni jneza. Lu cada tobi de ca guenda riʼ zacábinu chonna guendarinabadiidxaʼ: Xi riníʼ ni. Ximodo bisihuinni Jesús ni. Ne ximodo zanda gusihuínninu ni.

JESÚS QUÉ RUDXIIBAʼ LACA LAA

4. Xi riníʼ cadi gudxiibaʼ binni laca laa.

4 Ximodo ruuyaʼ ca binni ni ruchá bi yanni ca binni ni qué rudxiibaʼ laca laa yaʼ. Ruuyacabe laacaʼ casi binni ni qué risaca ne qué ridxélacaʼ xi gúnicaʼ. Ñee dxandíʼ nga la? Coʼ. Purtiʼ para gaca tuuxa ti binni ni qué rudxiibaʼ laca laa naquiiñeʼ gaca nadipaʼ ne nadxibalú. Xi riníʼ cadi gudxiibaʼ tuuxa laca laa yaʼ. Riníʼ ni cadi guchá tuuxa bi yanni ne cadi guni cré jma risaca que xcaadxi. Para gácanu ti binni ni qué rudxiibaʼ laca laa, cadi naquiiñeʼ guiníʼ íquenu jma risácanu que xcaadxi. Ti diccionariu ni riníʼ de Biblia na pa guchaaganu laanu né Dios, biaritiʼ nga laanu (Romanos 12:3; Filipenses 2:3). Dxandíʼ, nuu biaje raca nagana para laanu cadi gudxíʼbanu laca laanu purtiʼ nácanu binni gulené donda. Peru zanda gúninu ni. Ne para nga naquiiñeʼ guiníʼ íquenu pabiáʼ nandxóʼ Jiobá ne guiníʼ íquenu ejemplu stiʼ Jesús.

5, 6. 1) Tuu nga arcángel Miguel. 2) Ximodo bisihuinni Miguel qué rudxiibaʼ laca laa.

5 Qué huayuu dxi gudxiibaʼ Xiiñiʼ Dios laca laa. Dxi gúcabe ti ángel ni napa poder guibáʼ, qué nudxiibabe laca laabe. Ne dxi guyuube lu Guidxilayú casi ti binni sin donda laaca qué nudxiibabe laca laabe. Ximodo bisihuínnibe qué nudxiibabe laca laabe yaʼ. Guidúʼyanu chupa chonna ejemplu.

6 Pur modo naca Jesús bisihuinni qué rudxiibaʼ laca laa. Ante gueeda Jesús lu Guidxilayú guca arcángel, xaíque stiʼ guiráʼ ángel. Ne Biblia ribee lá laabe Miguel. Lu libru stiʼ Judas rieeteʼ gudinde diidxaʼ Miguel ne Binidxabaʼ (biindaʼ Judas 9). Xiñee gudinde diidxacabe yaʼ. Bicaachiʼ Jiobá xcuerpu Moisés ti lugar ra qué zanda guidxela nin ti binni ni (Deuteronomio 34:5, 6). Peru gucalaʼdxiʼ Binidxabaʼ niné cuerpu que, zándaca para gucaabe ca israelita guni adorar ni. Ti libru cusiene zándaca gudxi Jesús Binidxabaʼ qué gapa derechu chiné cuerpu stiʼ Moisés. Neca guca Jesús nadxibalú ora bicueeza Binidxabaʼ, qué nudxiibabe laca laabe ne bidiibe lugar Jiobá guni juzgar Binidxabaʼ, purtiʼ nánnabe laa si zanda gúnini.

7. 1) Ximodo bisihuinni Jesús qué rudxiibaʼ laca laa pur modo guníʼ. 2) Ximodo bisihuinni Jesús qué rudxiibaʼ laca laa pur ca cosa ni biʼniʼ.

7 Dxi guyuu Jesús lu Guidxilayú, bisihuinni qué rudxiibaʼ laca laa pur modo guníʼ. Qué ninabe nusisaca binni laabe. Ni gucaláʼdxibe nga nusisaca binni Jiobá (Marcos 10:17, 18; Juan 7:16). Qué ñuu dxi ñábibe ca discípulo stibe xiixa ni nusituí lucaʼ o ñuni sentircaʼ biaritiʼ. Nabé biʼniʼ respetarbe laacaʼ ne guluube gana laacaʼ pur ca guenda sicarú gúpacaʼ. Zacá bisihuínnibe nápabe confianza laacaʼ (Lucas 22:31, 32; Juan 1:47). Laaca bisihuinni Jesús qué nudxiibaʼ laca laa pur ca cosa ni biʼniʼ. Gudixhe íquebe guibánibe sin stale cosa (Mateo 8:20). Ne bíʼnibe caadxi dxiiñaʼ ni qué riuulaʼdxiʼ  binni guni (Juan 13:3-15). Ne laaca bizuubabe diidxaʼ (biindaʼ Filipenses 2:5-8). Binni ni ruchá bi yanni qué riuulaʼdxiʼ guzuubaʼ stiidxaʼ sti binni. Peru Jesús cadi zacá diʼ guca. Qué nudxiibaʼ laca laa ne biʼniʼ guiráʼ ni gudxi Jiobá laa. ¡Dede bidiibe lugar biiticabe laabe! Rihuinni dxíchica de guidubi ladxidóʼ Jesús bisihuinni qué nudxiibaʼ laca laa (Mateo 11:29).

GÁCANU BINNI NI QUÉ RUDXIIBAʼ LACA LAA CASI JESÚS

8, 9. Ximodo rusihuínninu qué rudxíʼbanu laca laanu.

8 Pur modo nácanu, ximodo zanda gusihuínninu qué rudxíʼbanu laca laanu cásica biʼniʼ Jesús. Pa qué gudxíʼbanu laca laanu, zusihuínninu nuu cosa ni cadi naquiiñeʼ gúninu. Qué gápanu derechu de guni juzgarnu binni. Nga runi qué rininu mal de laacaʼ ne qué riníʼ íquenu cayúnicabe xiixa cosa malu (Lucas 6:37; Santiago 4:12). Laaca qué riníʼ íquenu jma risácanu que xcaadxi purtiʼ si randa rúninu stale cosa o nápanu jma dxiiñaʼ ra ridagulisaanu (Eclesiastés 7:16). Ca binnigola ni qué rudxiibaʼ laca laa qué riníʼ íquecaʼ jma risácacaʼ que xcaadxi hermanu. Ni riníʼ íquecabe nga jma risaca xcaadxi hermanu que laacabe (Lucas 9:48; Filipenses 2:3).

9 Guidúʼyanu ejemplu stiʼ ti hermanu láʼ Walter Thorn. Lu iza 1894, bizulú bíʼnibe dxiiñaʼ casi superintendente de circuito. Peru gudiʼdiʼ si stale iza, bidiicabe laabe dxiiñaʼ de gápabe bere ndaaniʼ granja ni gupa ca Testigu ndaaniʼ guidxi Nueva York. Ora riníʼ íquebe naquiiñeʼ gúnibe sti dxiiñaʼ jma risaca que gápabe bere, sicaríʼ ga rábibe laca laabe: «Xi rácaluʼ pue yudé». Biblia na: «¡Biiyaʼ! Ca guidxi ca zeeda gácacaʼ casi ti gota [nisa] ndaaniʼ ti cubeta; casi ti capa yu dé nexheʼ lu balanza. ¡Biiyaʼ! Laabe rindísabe ca isla ca casi yu dé» (Isaías 40:15). ¡Qué liica nudxiibabe laca laabe!

10. 1) Ximodo rusihuínninu qué rudxíʼbanu laca laanu pur modo rininu. 2) Ximodo rusihuínninu qué rudxíʼbanu laca laanu pur ca cosa ni rúninu.

10 Pa nácanu ti binni ni qué rudxiibaʼ laca laa, laaca zusihuínninu ni pur modo rininu (Lucas 6:45). Ora rinínenu ca xpinni Cristu, qué rininu de ca cosa galán ni maʼ bíninu (Proverbios 27:2). Ni naquiiñeʼ gúninu nga gábinu laacabe galán ca cosa ni cayúnicabe ne cuʼnu gana laacabe pur ca guenda galán ni nápacabe (Proverbios 15:23). Laaca rusihuínninu qué rudxíʼbanu laca laanu pur ca cosa ni rúninu. Qué ruyúbinu gusisaca binni laanu lu Guidxilayú riʼ. Jma nga riguixhe íquenu cadi gápanu stale cosa risaca ti ganda gúninu jma lu xhiiñaʼ Jiobá. Dede rúninu dxiiñaʼ ni qué risácapeʼ (1 Timoteo 6:6, 8). Ne rusihuínninu qué rudxíʼbanu laca laanu ora ruzúʼbanu diidxaʼ. Nga runi rúninu guiráʼ ni rabi xquidxi Dios laanu ne ruzúʼbanu stiidxaʼ ca binnigola (Hebreos 13:17).

RIÁ JESÚS BINNI

11. Xi riníʼ guianu binni.

11 Xi riníʼ guiá binni stobi yaʼ. Pa nácanu ti binni ni riá stobi la? zannaxhiinu laacaʼ ne zazaláʼdxinu laacaʼ. Pa nadxiinu sti binni zianu laa. Biblia na «nadxii» Jiobá ne Jesús binni ne «riá[cabe]» laacaʼ (Lucas 1:78; 2 Corintios 1:3; Filipenses 1:8). Ti libru na ora rieeteʼ lu Biblia guianu tuuxa, cadi caníʼ si ni guianu ca binni ni cayacaná. Libru riʼ  cusiene pa dxandíʼ rianu tuuxa zucaani laanu guizaaláʼdxinu laacaʼ ne gúninu xiixa pur laacaʼ. Nga runi, pa dxandíʼ rianu binni zúninu stipa pur gacanenu laacaʼ ti guibánicaʼ jma galán.

12. 1) Pur ni biʼniʼ sentir Jesús, ximodo bisihuínnibe riabe binni. 2) Ximodo bisihuinni Jesús riá binni pur ca cosa ni biʼniʼ.

12 Ximodo bisihuinni Jesús riá binni yaʼ. Guidúʼyanu chonna modo. Primé, bisihuínnibe ni pur ni biʼniʼ sentirbe. Ora biiyabe cayuunaʼ María xhamígabe ne xcaadxi binni pur guti Lázaro, biinanebe laacaʼ (biindaʼ Juan 11:32-35). Lu Biblia laaca rieeteʼ biá Jesús ti grupu de binni ni guyé ra nuube (Marcos 6:34). Guiropa, bisihuinni Jesús riá binni pur ca cosa ni biʼniʼ. Cumu biabe binni la? bicaani laabe gacanebe laacaʼ. Nga runi bisibánibe xiiñiʼ ti viuda ne laaca bisibánibe Lázaro (Lucas 7:11-15; Juan 11:38-44). Pur ni bíʼnibe ca, despué gunda guyé Lázaro guibáʼ. Ne ora guyé ti grupu de binni que ra nuu Jesús, biabe laacaʼ ne bicaani laabe gusiidibe laacaʼ «stale cosa». Ngue bichaa xquendanabani ca binni ni bicaadiaga laabe. Racá ridúʼyanu cadi biá si Jesús ca binni que, sínuque bicaani laabe gacanebe cani caquiiñeʼ chuʼ tu gacané laacaʼ (Mateo 15:32-38; 20:29-34; Marcos 1:40-42).

13. Ximodo bisihuinni Jesús riá binni pur cani guníʼ. (Biiyaʼ dibuju ni zeeda ra ruzulú tema riʼ.)

13 Guionna modo bisihuinni Jesús riá binni nga pur cani guníʼ. Cumu riá Jesús binni la? bicaa ni laa guiniʼné laacabe né diidxaʼ nadóʼ, jmaruʼ si cani cayuniná sti binni laacaʼ. Ora guníʼ Mateo de Jesús, bizeetebe ca diidxaʼ ni bicaa profeta Isaías: «Qué zusaba chaahui be cani ziyaba, cani ruluíʼ ti gueere ni ma caluuza, ne qué zadinde né be cani ruluíʼ ti mecha ni ma qué ganda gudii biaaniʼ» (Isaías 42:3; Mateo 12:20). Xi riníʼ ca diidxaʼ riʼ yaʼ. Riníʼ ni qué ñuu dxi ñuni tratar Jesús mal guirutiʼ. Ora guniʼbe, bicaabe binni guni sentir galán. Ne guníʼnebe «cani cayuubaʼ ladxidóʼ» de ti cosa galán ni cabeza laacaʼ (Isaías 61:1). Gucanebe cani cayacaná (Mateo 11:28-30). Gúdxibe ca discípulo stibe rizaalaʼdxiʼ Jiobá laacaʼ, dede né cani huaxiéʼ risaca para binni (Mateo 18:12-14; Lucas 12:6, 7).

GUIANU BINNI CÁSICA RIÁ JESÚS

14. Pur ni runi sentirnu, ximodo zanda gusihuínninu rianu binni.

14 Pa racaláʼdxinu guianu binni cásica biá Jesús, zusihuínninu ni pur ni runi sentirnu pur laacaʼ. Zándaca gaca nagana para laanu gusihuínninu nadxiinu tuuxa, peru Biblia cayabi laanu naquiiñeʼ gúninu stipa pur gusihuínninu ni. Guendarannaxhii ca nga tobi de ca guenda ni naquiiñeʼ gapa guiráʼ ca xpinni Cristu (biindaʼ Colosenses 3:9, 10, 12). Ximodo zanda gusihuínninu nadxiinu binni yaʼ. Biblia na naquiiñeʼ gábinu binni ni runi sentirnu pur laacaʼ (2 Corintios 6:11-13). Ora gabi tuuxa laanu xi runi sentir ne xi naguu xizaa laa, naquiiñeʼ gucaadiaga chaahuinu laa (Santiago 1:19). Despué, galán guinabadiidxanu laca laanu: «Ximodo ñuneʼ sentir pa ñaca naa nga cadideʼ cani cadíʼdibe ca yaʼ, xi ñuuladxeʼ ñúnicabe pur naa yaʼ» (1 Pedro 3:8).

15. Xi zanda gúninu para gacanenu ca binni ni cayacaná o ca binni ni guti ti binnilidxi.

15 Laaca rusihuínninu rianu binni pur cani rúninu. Pa rianu binni zucaani  laanu gacanenu laacaʼ, jmaruʼ si cani cayacaná o cani guti ti binnilidxi. Ximodo zanda gacanenu laacabe yaʼ. Romanos 12:15 na: «Laguuna né cani cayuunaʼ». Stale biaje ni caquiiñeʼ binni nga quixhedxinu ladxidóʼ ne cadi gábinu laa ximodo guni chaahuiʼ guendanagana stiʼ. Caquiiñecabe chuʼ tu guizaalaʼdxiʼ laacabe ne gucaadiaga laacabe. Ti hermana guníʼ ora guti ti dxaapahuiiniʼ stiʼ, guyé ca hermanu ra lidxi ne biinanecaʼ laabe. Nabé nayecheʼ guyuube purtiʼ gudixhedxícabe ladxidoʼbe. Sti modo rusihuínninu rianu binni nga ora rúninu xiixa para gacanenu laacaʼ. Zándaca iquiiñeʼ ti viuda gacanenu laa ora gaca chaahuiʼ xiixa ndaaniʼ lidxi. O zándaca ti hermanu maʼ nagola caquiiñeʼ chinécabe laa ca guendaridagulisaa, chigucheeche diidxaʼ o chinécabe laa ra nuu doctor. Zanda gacanenu laacabe stale neca ti cosa nahuiiniʼ si nga gúninu pur laacabe (1 Juan 3:17, 18). Peru jma nga rusihuínninu rianu binni ora rucheechenu diidxaʼ biaʼ gándatiʼ. Nga nga ti cosa jma galán zanda gúninu para gacanenu ca binni ni nayá ladxidóʼ.

Ñee dxandíʼ rizaaláʼdxinu ca hermanu stinu la? (Biiyaʼ párrafo 15)

16. Xi zanda gábinu ca binni ni nuu triste ne cani raca deprimir.

16 Laaca rusihuínninu rianu binni pur cani guininu. Biblia na naquiiñeʼ quixhedxinu ladxidóʼ ca binni ni nuu triste ne cani raca deprimir (1 Tesalonicenses 5:14). Xi zanda gábinu laacabe yaʼ. Zanda gábinu laacabe rizaaláʼdxinu laacabe. Laaca zanda gacanenu laacabe gúʼyacabe ca guenda galán nápacabe ne cuʼnu gana laacabe pur ca cosa ni rúnicabe jneza. Zanda gusietenaláʼdxinu laacabe nuucabe ndaaniʼ xquidxi Dios purtiʼ risácacabe para Jiobá (Juan 6:44). Zanda gábinu laacabe rizaalaʼdxiʼ Jiobá ca xpinni ni cayacaná ne cani maʼ caree gana (Salmo 34:18). Ca diidxaʼ gábinu laacabe zacaneni laacabe para gatadxí ladxidóʼcabe (Proverbios 16:24).

17, 18. 1) Ximodo racalaʼdxiʼ Jiobá guni tratar ca binnigola ni nuu ra ridagulisaanu ca hermanu. 2) Xi zadúʼyanu lu sti tema ca.

17 Jiobá racalaʼdxiʼ guiá ca binnigola ni nuu ra ridagulisaanu ca hermanu (Hechos 20:28, 29). Dxiiñaʼ stiʼ ti binnigola nga gusiidiʼ laacabe, cuʼ gana laacabe ne guquidxi fe stícabe (Isaías 32:1, 2; 1 Pedro 5:2-4). Qué rucaa ca binnigola laacabe gúnicabe xiixa ni riuuláʼdxicaʼ. Ne laaca qué rucaa ca binnigola laacabe guni sentírcabe mal purtiʼ qué randa rúnicabe jma lu xhiiñaʼ Dios. Ni racalaʼdxiʼ ca binnigola nga chuʼ ca hermanu nayecheʼ. Nanna ca binnigola nadxiicabe Jiobá ne rúnicabe biaʼ gándatiʼ lu xhiiñaʼ (Mateo 22:37).

18 Ora riníʼ íquenu qué nudxiibaʼ Jesús laca laa ne biá binni rucaa nga laanu chinándanu ejemplu stibe. Lu sti tema ca zadúʼyanu ximodo gácanu nadxibalú ne quixhe íquenu gúninu ni jneza cásica biʼniʼ Jesús.