Biiyaʼ guiraʼ ni nuu lu sitiu riʼ

guyé lu índice

¡Chuʼnu nayecheʼ purtiʼ chiguichaganáʼ Dendxuhuiiniʼ!

¡Chuʼnu nayecheʼ purtiʼ chiguichaganáʼ Dendxuhuiiniʼ!

«Guieche nu dede idxá ladxidóʼ no de enda nayecheʼ, [...] purti ma bidxiña dxi ichaganá Dendxu huiini que.» (APOC. 19:7)

1, 2. 1) Xiñee ziuu cani nuu guibáʼ nayecheʼ. 2) Xi guendarinabadiidxaʼ zacábinu.

STALE tiempu nga riné binni para quixhe chaahuiʼ dxi guichaganáʼ. Peru yanna riʼ zazíʼdinu de ti guendaxheelaʼ nabé risaca stiʼ ti Rey, ne guendaxheelaʼ riʼ maʼ ziné chupa mil iza de cayaʼtaʼ chaahuiʼ. Ne yanna maʼ cadi candaa para guichaganáʼ ca novio ca. Maʼ cadi candaa ziuucabe nayecheʼ ndaaniʼ palaciu stiʼ Rey, ne cani nuu guibáʼ zuundacaʼ sicaríʼ: «Usisaca nu [Jiobá,] Dios stinu ni jma nandxóʼ, purti ma bizulú cayuni mandar. Guieche nu dede idxá ladxidóʼ no de enda nayecheʼ, ne usisaca nu laabe, purti ma bidxiña dxi ichaganá Dendxu huiini que, ma zuchaahui ni chi chaganáʼ» (Apoc. 19:6, 7).

2 Jesucristu nga «Dendxu huiini» ni chiguichaganáʼ ne pur laabe nga ziuucabe nayecheʼ guibáʼ (Juan 1:29). Ximodo zuchaahuibe. Tuu nga novia ca. Ximodo cayuu novia ca listu para guendaxheelaʼ riʼ. Padxí gaca guendaxheelaʼ riʼ. Nánnanu nayecheʼ ziuu cani nuu guibáʼ, peru, ñee laaca nayecheʼ ziuu cani chiguibani lu Guidxilayú sin qué chuʼ dxi gáticaʼ la? Cadi dxandíʼ riuuláʼdxinu gánnanu cani gunabadiidxanu ca la? pa zacá ni, guidúʼndanu xcaadxi versículo stiʼ Salmo 45.

 LARI RINDÁʼ NAXHI

3, 4. 1) Xi zanda guininu de xhaba Novio ni chiguichaganáʼ ca. 2) Xi rucaa Novio ca chuʼ nayecheʼ. 3) Tuu nga «ca xiiñidxaapaʼ rey» ne tuu nga «reina» ca.

3 Biblia na: «Guiráʼ xhábaluʼ rindáʼ naxhi mirra, áloe ne casia; ne dede ra palaciu sicarú de marfil rusiecheʼ ca instrumentu de cuerda lii. Nuu ca xiiñidxaapaʼ rey lade ca gunaa sicarú stiluʼ. Maʼ gurí reina cueeluʼ ladu derechu ne naze oro ni beeda de Ofir» (Salmo 45:8, 9). Jesucristu, ni naca novio riʼ, nacu lari ni racu novio ora guichaganáʼ. Rindáʼ naxhi xhaba novio riʼ, casi rindáʼ naxhi mirra ne casia, ne laacani nga ruguuchacabe para gúnicabe aceite ni biquiiñecabe ndaaniʼ guidxi Israel dxiqué (Éx. 30:23-25).

4 Cani nuu guibáʼ cuxhídxicaʼ saa sicarú ndaaniʼ palaciu stiʼ Novio ne rucaani laa chuʼ nayecheʼ purtiʼ maʼ zedadxiña ora guichaganáʼ. Ne laaca nayecheʼ nuu «reina», ni zeeda gaca xquidxi Jiobá ni nuu guibáʼ ne laaca reina ca nga «ca xiiñidxaapaʼ rey», o ca ángel stiʼ Dios. Nabé sicarú modo cayuundaʼ cani nuu guibáʼ: «Guieche nu dede idxá ladxidóʼ no de enda nayecheʼ, [...] purti ma bidxiña dxi ichaganá Dendxu huiini que».

CAGUUCABE NOVIA CA LISTU PARA GUICHAGANÁʼ

5. Tuu nga «xheela Dendxú huiiniʼ».

5 Biblia na: «Bicaadiaga, xiiñedxaapaʼ, ne biiyaʼ, ne bicaadiaga chaahuiʼ; ne bisiaandaʼ xquídxiluʼ ne lidxi bixhózeluʼ. Ne ziuulaʼdxiʼ rey ca guendasicarú stiluʼ, purtiʼ laabe nga señor stiluʼ, nga runi, gundeteʼ ique nezalube» (Salmo 45:10, 11). Maʼ nánnanu tuu nga Novio ca, peru, tuu nga novia ca yaʼ. Novia ca zeeda gaca ca xpinni Cristu ni bibí né espíritu santu ne Jesucristu nga xaíque stícabe (biindaʼ Efesios 5:23, 24). Laacabe zuni mandarnécabe Cristu lu Reinu stiʼ (Luc. 12:32). Ne 144,000 xpinni Cristu riʼ «canananda ca Dendxu huiini que ladu tiica cheʼ» (Apoc. 14:1-4). Reeda gácacabe «xheela Dendxú huiiniʼ» ne ziuunécabe laabe guibáʼ (Apoc. 21:9; Juan 14:2, 3).

6. 1) Xiñee rábicabe ca xpinni Cristu ni bibí «xiiñidxaapaʼ rey». 2) Xiñee gúdxicabe cani bibí gusiaandacaʼ xquídxicaʼ.

6 Novia riʼ qué rabisícabe laa «xiiñidxaapaʼ» binni, sínuque laaca rábicabe laa «xiiñidxaapaʼ rey» (Sal. 45:13). Tuu nga «rey» ca yaʼ. Laabe nga Jiobá, purtiʼ ricaabe ca xpinni Cristu ni bibí né espíritu santu casi «xiiñi be» (Rom. 8:15-17). Cumu chigácacabe novia guibáʼ la? guyuu tu gudxi laacabe: «Bisiaandaʼ xquídxiluʼ ne lidxi bixhózeluʼ [ni nuu lu Guidxilayú]». Naquiiñeʼ gucaa íquecabe «ni nuu ibáʼ, ne cadi ni nuu ndaani guidxilayú» (Col. 3:1-4).

7. 1) Ximodo caguu Jesús listu novia ni chiguichaganáʼ. 2) Ximodo ruuyaʼ novia ca Novio ni chiguichaganáʼ.

7 Maʼ raca gayuaa iza caguu Jesús listu ni chigaca xheelaʼ para guichaganácabe. Apóstol Pablu guníʼ «gunaxhii Cristu ca xpinni, dede bidii xpida pur laacaʼ. Ne zacá ulee chu laacabe de ni nadxabaʼ, ne bisiá ladxidóʼ cabe ra uyuu nisa cabe, purti bini cre cabe stiidxaʼ. Ne zadxiña dxi uchiña laacabe ra nuu, ma bia ladxidóʼ cabe, ma gasti donda luguiá cabe, casi ti lari ni nayá guieʼ ni qué gapa nin ti guisi huiini ra nacuuxhuʼ, nin tindaa ra cadi galán» (Efes. 5:25-27). Gudxi Pablu ca xpinni Cristu ni bibí de Corinto ca diidxaʼ riʼ: «Celoso naa ne laatu, casi celoso Dios ne laatu, purti napa laatu casi ti binni dxaapa ni ma bidiee para ichaganá Cristu, ne racaladxe uchiña laatu ra nuu be nayá» (2 Cor. 11:2). Novio ca nga Rey Jesucristu, ne laa rusisaca guendasicarú stiʼ novia ni chiguichaganáʼ, purtiʼ runi adorar novia ca Dios jneza ne riuulaʼdxiʼ Jiobá modo runi adorarbe laa. Ne novia ca nanna laabe nga «señor» stiʼ, nga runi, rindeteʼ «ique nezalube» purtiʼ laabe nga chiguichaganáʼ.

ZINÉCABE NOVIA RIʼ «NEZALU REY»

8. Xiñee zanda guininu nabé «zuchaahuiʼ» novia ca.

8 Biblia na: «Zuchaahuiʼ xiiñidxaapaʼ rey  ndaaniʼ yoo; cá oro lu xhaba. Nácube lari ni bidiibaʼ para chebe nezalú rey» (Salmo 45:13, 14a). Novia ca «zuchaahuiʼ» para guichaganáʼ Rey ca. Lu Apocalipsis 21:2 na zeeda gaca novia ca casi ti guidxi, ne guidxi ca nga Jerusalén Cubi ni «zuchaahui casi ti gunaa ora chi chaganáʼ». Ne «dede riaʼqui biaani guidxi que de enda nandxó sti Dios» ne ruzaaniʼ ni, laaca «zeda aca xpiaani ni casi ti guie ni nabé risaca. Ruluíʼ ni jaspe, rihuinni biaani ni casi vidriu» (Apoc. 21:10, 11). ¡Nabé sicarú modo ruzeeteʼ libru stiʼ Apocalipsis Jerusalén Cubi! (Apoc. 21:18-21.) Nga runi salmista que guníʼ «zuchaahuiʼ» novia ca. Ne zanda guininu zacá ni purtiʼ guibáʼ nga chigaca guendaxheelaʼ riʼ.

9. 1) Tuu nga «rey» ni zinécabe novia ca nezalú. b) Ximodo xhaba novia ca.

9 Zinécabe novia ca ra nuu Novio ca, ne Novio ca nga Rey ni maʼ gulí Dios. Laabe caguube laa listu, ne bisiabe laa, «purti bini cre [...] stiidxaʼ» Novio ca. Nga runi, nayá guieʼ novia ca ne «ma gasti donda luguiá» (Efes. 5:26, 27). Yanna, ximodo xhaba novia riʼ yaʼ. Biblia na: «Cá oro lu xhaba. Nácube lari ni bidiibaʼ para chebe nezalú rey». Lu guendaxheelaʼ stiʼ Dendxuhuiiniʼ nacu novia «lari chaʼhuiʼ, nayá ne ruzaaniʼ. Laa zanda gacu ni purti zeda gaca lari que casi enda nachaʼhui ni biʼni ca xpinni Dios» (Apoc. 19:8).

«MA BIDXIÑA DXI ICHAGANÁ DENDXU HUIINI»

10. Padxí nga guichaganáʼ Dendxuhuiiniʼ.

10 (Biindaʼ Apocalipsis 19:7.) Padxí nga guichaganáʼ Dendxuhuiiniʼ riʼ yaʼ. Neca Apocalipsis 19:7 ruzeeteʼ «ma zuchaahui» novia riʼ para dxi guichaganáʼ, peru ca versículo ni zeeda ca qué ruzeeteʼ cani de guendaxheelaʼ ca, sínuque xi zazaaca ra guiluxe ca dxi jma nagana (Apoc. 19:11-21). Ñee riníʼ ca diidxaʼ riʼ zachaganáʼ Jesucristu, Novio riʼ, ante quixhedxí ca xhenemigu la? Coʼ, cadi zacá diʼ ni. Ca visión ni rieeteʼ lu libru stiʼ Apocalipsis cadi cá diʼ xi zazaaca primé ne xi zazaaca de últimu. Salmo 45 ruzeeteʼ zaca guendaxheelaʼ riʼ despué de ugaanda Rey riʼ espada stiʼ lu xcoʼreʼ ne zuni «seguir dede ra guni ganar» ca xhenemigu (Sal. 45:3, 4).

11. Xi zazaaca ante guichaganáʼ Dendxuhuiiniʼ.

11 Nga runi zanda guininu sicaríʼ nga chiguizaaca cani zeeda lu Biblia. Primé, zanitilú «gunaa dxaba», Babilonia guidxi roʼ, xaíque stiʼ guiráʼ religión ni cadi dxandíʼ (Apoc. 17:1, 5, 16, 17; 19:1, 2). Despué zunitilú Cristu xcaadxi binni ni cayuni ni na Binidxabaʼ lu Armagedón, «dxi uzulú [Dios ni jma nandxóʼ] cuidxi cuenta binni» (Apoc. 16:14-16; 19:19-21). Ne últimu la? Rey ni nanna tinde riʼ zusaba Binidxabaʼ ne ca demonio stiʼ ndaaniʼ ti bizé roʼ, ne racá maʼ qué zanda gúnicaʼ gastiʼ casi ñaca maʼ gúticaʼ (Apoc. 20:1-3).

12, 13. 1) Padxí nga guichaganáʼ Dendxuhuiiniʼ. 2) Tu guiráʼ nga ziuu nayecheʼ guibáʼ pur guendaxheelaʼ stiʼ Dendxuhuiiniʼ.

12 Ca xpinni Cristu ni bibí né espíritu santu ni gatiʼ lu ca últimu dxi riʼ, ziásacaʼ de lade gueʼtuʼ para guibánicaʼ guibáʼ. Despué de guinitilú Babilonia guidxi roʼ, zucasaa Jesús xcaadxi de ca xpinni ni bibí né espíritu santu para chúʼnebe guiracaʼ guibáʼ (1 Tes. 4:16, 17). Nga runi, guiráʼ ca xpinni Cristu ni bibí ni zeeda gaca casi novia ca naquiiñeʼ chuʼcaʼ guibáʼ ante guzulú Armagedón. Guiluxe si guendaridinde riʼ, maʼ zanda guichaganáʼ Dendxuhuiiniʼ. ¡Nabé nayecheʼ ziuucabe dxi ca! Apocalipsis 19:9 na: «Dichoso cani ma nexhe che enda xheela sti Dendxu huiiniʼ». Nabé nayecheʼ ziuu ca xpinni Cristu ni zeeda gaca casi novia ca. Ne Novio ca ziuu nayecheʼ purtiʼ maʼ nuu guiráʼ cani chiguni mandarné guibáʼ, casi ora cayócabe ne cayéʼcabe lu mexaʼ stibe (Luc. 22:18, 28-30). Peru cadi Novio ne novia ca si nga ziuu nayecheʼ dxi ca.

13 Casi maca bidúʼyanu que, ziuu stale ángel  guibáʼ ne zuundacaʼ sicaríʼ: «Guieche nu dede idxá ladxidóʼ no de enda nayecheʼ, ne usisaca nu laabe, purti ma bidxiña dxi ichaganá Dendxu huiini que, ma zuchaahui ni chi chaganáʼ» (Apoc. 19:6, 7). Peru xi gaca xa de ca xpinni Jiobá ni nuu lu Guidxilayú yaʼ. Ñee laaca ziuucabe nayecheʼ la?

«ZEEDACABE NAYECHEʼ»

14. Tuu nga «ca binnidxaapaʼ» ni rieeteʼ lu Salmo 45.

14 Biblia na: «Xiiñidxaapaʼ Tiro laaca yené xiixa ni gusigaʼdeʼ... ca binni napa bidxichi zucuudxicaʼ luluʼ. Ca binnidxaapaʼ ni ziné reina riʼ casi xcompañera ziyuucaʼ ra nuuluʼ. Zeedacabe nayecheʼ; ziuucabe ndaaniʼ palaciu stiʼ rey» (Salmo 45:12, 14b, 15). Zacarías ni riguixhená que maca guníʼ lu ca últimu dxi riʼ ziuu stale binni de guiráʼ guidxi nayecheʼ ra gacanecaʼ cani bibí né espíritu santu. Laa bicaa: «Ca dxi que zanaaze chii hombre ni riníʼ guiráʼ diidxaʼ stiʼ ca guidxi ca xhaba ti hombre judíu, ya, zanaazecabe xhábabe ne zaníʼcabe: “Dxandipeʼ zinedu laatu, purtiʼ huayunadiágadu nuuné Dios laatu”» (Zac. 8:23). «Chii hombre» ni cayeeteʼ lu textu riʼ la? laca laacabe nga «xiiñidxaapaʼ Tiro» ne «ca binni napa bidxichi» ni rieeteʼ lu Salmo 45:12. Racanécabe ca xpinni Cristu ni bibí, ne laacaʼ racanecaʼ laacabe para gúnicabe ni na Jiobá. Dede lu iza 1935, cani bibí né espíritu santu huayacanecaʼ millón de binni guiziidiʼ de Dios (Dan. 12:3). Cani zeeda gaca «chii hombre» riʼ qué huasaana de gacanécabe cani bibí né espíritu santu ne maʼ bisiacaʼ xquendanabánicaʼ, purtiʼ maʼ qué runi adorarcaʼ sti dios, zacá nga zeeda gácacabe casi binnidxaapaʼ. «Ca binnidxaapaʼ» ni ziné novia riʼ casi xcompañera maʼ bidiicaʼ xquendanabánicaʼ Jiobá ne qué huasaanacaʼ Rey Jesucritu, Novio ca.

15. Ximodo cayacané «ca binnidxaapaʼ» ca xpinni Cristu ni bibí ni nuu lu Guidxilayú.

 15 Xcaadxi de cani bibí ni nabániruʼ ndaaniʼ Guidxilayú ni zeeda gaca novia ca cayechenecaʼ «ca binnidxaapaʼ» ni zeeda gaca xcompañeracabe, purtiʼ cayacanecaʼ laacabe guireeche «stiidxa Dios» lu guidubi Guidxilayú (Mat. 24:14). Cadi «Espíritu Santu ne xheela Dendxu huiini que» si nga caníʼ «gudáʼ», sínuque cani cucaadiaga laaca caniʼcaʼ «gudáʼ» (Apoc. 22:17). Dxandíʼ, laaca cayunadiaga ca «xcaadxi dendxu» ora riníʼ ca xpinni Cristu ni bibí «gudáʼ» ne racanecaʼ laacabe para guireeche diidxaʼ lu guidubi Guidxilayú (Juan 10:16).

16. Xi ndaayaʼ maʼ bidii Jiobá cani naca xcaadxi dendxuʼ.

16 Ca xpinni Cristu ni bibí né espíritu santu nadxiicaʼ ca «xcaadxi dendxu» ne riéchecaʼ gánnacaʼ racalaʼdxiʼ Jiobá, Bixhoze Novio ca, chuʼnécabe laacaʼ nayecheʼ pur guendaxheelaʼ stiʼ Dendxuhuiiniʼ. Maca bieeteʼ ziuu «ca binnidxaapaʼ» ni ziné novia riʼ «nayecheʼ». Xcaadxi dendxuʼ ni zabani ndaaniʼ Guidxilayú riʼ, ziuucaʼ nayecheʼ ora guiráʼ cani nuu guibáʼ chuʼcaʼ nayecheʼ pur guendaxheelaʼ stiʼ Dendxuhuiiniʼ ni chigaca guibáʼ. Nga runi, libru stiʼ Apocalipsis na «zuhuaa jma binni nezalú trono ne nezalú Dendxu huiini». Laacabe cayuni adorárcabe Dios modo riuulaʼdxiʼ gaca adorar ndaaniʼ Guidxilayú riʼ (Apoc. 7:9, 15).

Nabé ziecheʼ «ca binnidxaapaʼ» ni ziné novia ca pur guendaxheelaʼ stiʼ Dendxuhuiiniʼ (Biiyaʼ párrafo 16)

«ZIUU CA XIIÑILUʼ LUGAR STIʼ CA BIXHOZEGÓLALUʼ»

17, 18. 1) Xi zazaaca lu Guidxilayú riʼ pur guendaxheelaʼ stiʼ Dendxuhuiiniʼ. 2) Tuu nga cani gueeda gaca xiiñiʼ Cristu lu ti mil iza ni guni mandar.

17 Biblia na: «Ziuu ca xiiñiluʼ lugar stiʼ ca bixhozególaluʼ, ne zúniluʼ laacaʼ príncipe lu guidubi guidxilayú» (Salmo 45:16). «Ca binnidxaapaʼ» ni ziné novia ni chiguichaganáʼ Cristu nápacaʼ stale razón para guiéchecaʼ ora gúʼyacaʼ xi guiráʼ zabeendú guendaxheelaʼ riʼ lu Guidxilayú. Novio, Rey Jesucristu, zuni chaahuiʼ Guidxilayú riʼ ne zandísabe guiráʼ cani gutiʼ dxiqué ne zácacaʼ xiiñibe (Juan 5:25-29; Heb. 11:35). Ne zabibe chupa chonna de laacaʼ para gácacaʼ «príncipe lu guidubi guidxilayú». Ne laaca zabibe chupa chonna de ca binnigola ni nuu yanna para gúʼyacaʼ gaca xhiiñaʼ Jiobá lu guidxilayú cubi ca (Is. 32:1).

18 Lu ti mil iza ni guni mandar Cristu, zeeda gácabe bixhoze xcaadxi binni. Xiñee yaʼ. Purtiʼ guiráʼ cani gapa fe lu guendaguti stiʼ Cristu, zacaacaʼ guendanabani ni qué zaluxe lu Guidxilayú (Juan 3:16). Zacá zeeda gácabe «Bixhózenu ne qué zusaana de gácabe ni» (Is. 9:6, 7).

NI RUCAA LAANU GUZÉʼTENU LÁ REY CA

19, 20. Xiñee risaca para guiráʼ xpinni Cristu ni rieeteʼ lu Salmo 45.

19 Biblia na: «Cadi nuudxí ladxiduáʼ pur ti cosa nabé sicarú. Caniéʼ: “Lu ca canción stinneʼ ruzeeteʼ de ti rey”. Gaca ludxeʼ casi ti pluma stiʼ ti hombre ni nabé nanna gucaa. Dxandipeʼ zuzeeteʼ laluʼ nezalú ca generación ni gueeda. Nga runi, zusisaca stale guidxi lii, ne qué ziuu dxi gusaana de gúnicabe ni» (Salmo 45:1, 17). Casi maʼ bidúʼyanu ca, nabé risaca cani cayeeteʼ lu Salmo 45 para guiráʼ ca xpinni Cristu. Ca xpinni Cristu ni bibí ni nuuruʼ lu Guidxilayú riʼ nuucaʼ nayecheʼ, purtiʼ maʼ cadi candaa ziuucaʼ tobi si né xcaadxi xpinni Cristu ni maʼ nuu guibáʼ ne laaca ziuucaʼ tobi si né Novio ca. Ca xpinni Cristu ni zeeda gaca xcaadxi dendxuʼ riuuláʼdxicaʼ guzuubacaʼ stiidxaʼ Rey riʼ né stale gana ne riuuláʼdxicaʼ gacanecaʼ xcaadxi de ca xpinni Cristu ni bibí ni nabániruʼ lu Guidxilayú riʼ. Despué de guendaxheelaʼ ca, Cristu ne cani chiguni mandarné laa zudiicaʼ stale ndaayaʼ ca binni ni nuu lu Guidxilayú, dede qué zanda guiníʼ íquenu pabiáʼ (Apoc. 7:17; 21:1-4).

20 Ora riníʼ íquenu pabiáʼ «sicarú» cani chiguni Rey ni maʼ gulí Dios riʼ, cadi dxandíʼ rucaa ni laanu guininu de labe o xlabe la? Nga runi, ¡cadi gusaana de gusisácanu Rey riʼ biaʼ dxi guibáninu!