Biiyaʼ guiraʼ ni nuu lu sitiu riʼ

guyé lu índice

Ximodo gucané Gayo ca hermanu stiʼ

Ximodo gucané Gayo ca hermanu stiʼ

RA MAʼ ziluxe primé siglu, gupa Gayo ne xcaadxi xpinni Cristu stale guendanagana. Guyuu chupa chonna binni ndaaniʼ congregación ni bisiidiʼ ni cadi jneza, ne zaqué gucaláʼdxicaʼ nusiracaʼ fe stiʼ ca hermanu ne nuxhélecaʼ laacabe (1 Juan 2:18, 19; 2 Juan 7). Ti hombre láʼ Diótrefes guníʼ diidxaʼ ni cadi jneza o guníʼ mal de apóstol Juan ne de xcaadxi xpinni Cristu; qué niná nidxaagalú ca hermanu ni riganna ca congregación que, ne gucalaʼdxiʼ nucuudxi xcaadxi ñuni zaqueca (3 Juan 9, 10). Zacá nga nuu ca hermanu dxi bicaa Juan carta ra nuu Gayo. Bicaabe carta riʼ biaʼ lu iza 98, ne lu Escrituras Griegas lani «Tercera de Juan».

Qué nusaana Gayo de ñuni ni ná Jiobá neca bidxagalú guendanagana. ¿Ximodo bisihuínnibe qué zusaanabe Jiobá yaʼ? ¿Xiñee naquiiñeʼ gácanu casi laabe? ¿Ximodo zanda gacané carta ni bicaa Juan laanu para gácanu casi laabe yaʼ?

TI CARTA PARA TI XHAMÍGUBE NI NADXIIBE

Hombre ni bicaa Tercera de Juan ná naca «ti hermanu gola». Ndiʼ si nga caquiiñeʼ Gayo ganna para gudii cuenta apóstol Juan nga bicaa carta riʼ para laa, biiyaʼ Juan laabe casi ti xiiñiʼ ni nadxii, ngue runi rabi laabe: «xhamigua ni dxandí nadxieeʼ». De raqué rábibe laa ribézabe nuu nazaaca ne galán cásica nuu fe stiʼ. Rihuinni dxíchica galán modo ruuyaʼ Juan laabe ne pur nga bicaa carta riʼ ra nuube (3 Juan 1, 2, 4).

Zándaca guca Gayo ti ancianu ndaaniʼ congregación, neca qué rieeteʼ ni lu carta riʼ. Gudxi Juan laabe galán rúnibe ora ridxaagalube ca hermanu ra lídxibe neca qué runibiaʼbe laacaʼ. Ni runi Gayo riʼ biiyabe ni casi ti modo para gusihuinni runi ni jneza, purtiʼ ca xpinni Dios nabé runibiáʼcabe laacaʼ pur ridxaagalucaʼ binni galán (Génesis 18:1-8; 1 Timoteo 3:2; 3 Juan 5).

Ni guníʼ Juan de modo ridxaagalú Gayo ca hermanu rusihuinni ni guyuu xpinni Cristu ni biʼniʼ viajar gatigá de ra nuu apóstol que hasta ra nuu ca congregación que. Rihuinni dxíchica rabi ca xpinni Cristu riʼ Juan guiráʼ ni ruuyacaʼ. Zándaca zacá nga ránnabe modo nuu ca congregación que.

Raríʼ ridúʼyanu jma nga riuulaʼdxiʼ ca xpinni Cristu riʼ guiaanacaʼ ra nuu ca hermanu sticaʼ. Nabé feu ruuyacabe ca lugar ra riete binni ni zeeda de viaje, cadi galán diʼ runi tratárcabe laacaʼ ne ca binni nuu raqué riuunecaʼ tutiica. Nga runi ca binni ni qué racalaʼdxiʼ gapa guendanagana ora maʼ zeʼ  de viaje la? jma nga riaanacaʼ ra nuu ca xhamígucaʼ, ne ca xpinni Cristu la? riaanacaʼ ra nuu xcaadxi xpinni Cristu.

«LU LABE NGA BIREECAʼ»

Gunabaʼ Juan Gayo gaca nachaʼhuiʼ sti biaje né ca hermanu ni zeʼ de viaje, purtiʼ gúdxibe laa guseendaʼ laacabe «casi na Dios». Ndiʼ riníʼ gudiibe guiráʼ ni caquiiñecaʼ para chindacaʼ ra zecaʼ. Nanna dxíchinu huayaca Gayo nachaʼhuiʼ né xcaadxi hermanu, purtiʼ rábicaʼ Juan nadxiibe laacaʼ ne nápabe fe (3 Juan 3, 6).

¿Tuu nga cani ridxaagalube ra lídxibe yaʼ? Zándaca ca misioneru, ca superintendente o ca xpinni Cristu ni ruseendaʼ Juan. Tutiica laacabe, riécabe de viaje para guiníʼcabe ca diidxaʼ nacubi ne galán. Juan guníʼ: «Purtiʼ lu labe nga bireecaʼ» (3 Juan 7TNM). Lu versículo 6 que caníʼ ni de Dios, nga runi ora riete «lu labe nga bireecaʼ» zándaca caníʼ ni de lá Jiobá. Ngue runi, naquiiñeʼ guidxagalube ca xpinni Cristu que galán purtiʼ hermanu stibe laacaʼ. Sicaríʼ bicaa apóstol que: «Nga runi naquiiñe gua nu [o guidxaagalunu] laacabe ti acané nu laacabe güi cabe stiidxa Dios» (3 Juan 8).

NI ZANDA GACANÉ LAANU ORA GUIDXAAGALUNU XIIXA GUENDANAGANA

Cadi bicaa si Juan ra nuu Gayo para gudiibe xquíxepeʼ laa, sínuque para gacanebe laa né ti guendanagana. Tobi de cani nuu ndaaniʼ congregación que nga Diótrefes, laa qué náʼ guidxaagalú ca hermanu ni zeeda de sti ladu ne dede nuu gucueeza xcaadxi ti cadi gúnicaʼ ni (3 Juan 9, 10).

Nánnanu, qué ñuulaʼdxiʼ ca hermanu que niguiaanacaʼ ra nuu Diótrefes, ne pa ñaca nidxaagalube ca hermanu que laaca qué ninacaʼ ñecaʼ ra nuube. Laabe nabé riuuláʼdxibe guisácabe ndaaniʼ congregación, qué rusihuínnibe nápabe respetu guiráʼ ni gueeda de Juan ne riniʼbe cosa ni cadi jneza de laa ne de xcaadxi xpinni Cristu maca para gusaanabe laacaʼ mal. Qué rinabe guni respetarbe autoridad stiʼ apóstol que, neca qué ñuu dxi niníʼ nácabe ti maestru falsu. Deseu ni nápabe de guisácabe ne actitud ni cadi naquiiñeʼ gapa ti xpinni Cristu ni biluiʼbe que, bisihuinni cani pa leal laabe. Ejemplu riʼ rusihuinni ora tuuxa riníʼ ique puru para laasi ne rudxiibaʼ laca laa zanda guindaa ti congregación. Nga runi, gudxi Juan Gayo ca diidxaʼ riʼ ne dede né laanu racané cani: «Cadi chi nandu ni cadi cayuni jneza» (3 Juan 11).

TI RAZÓN RISACA PARA GÚNINU NI JNEZA

Bizeeteʼ Juan de sti xpinni Cristu ni naca ti ejemplu galán, gadxepeʼ laa de Diótrefes, labe Demetrio. Bicaabe galán riníʼ ca hermanu de laa. Ne laaca bicaabe: «Laadu laca rui né du ni binni, ne nanna tu qué rusiguii du» (3 Juan 12). Zándaca caquiiñeʼ Demetrio gacané Gayo laa, ne carta que biquiiñeʼ ni para guni presentar Juan laabe ne para guni recomendar laabe. Laaca zándaca Demetrio peʼ bidii laabe carta que. Pa apóstol Juan biseendaʼ Demetrio o pa naca superintendente viajante, zándaca biluiʼbe dxandíʼ guiráʼ ni bicaa Juan que.

¿Xiñee gunabaʼ Juan Gayo cadi gusaana de guidxaagalú binni pa maca runi ni yaʼ? ¿Ñee guníʼ íquebe caquiiñeʼ cuʼbe gana laa para cadi gusaana de gaca nadxibalú la? ¿Guyuube xizaa pa gusaana de guni ni purtiʼ nuu Diótrefes cuee ca hermanu ni ridxaagalú binni que de ndaaniʼ congregación la? Intiica si laani, gudixhedxí Juan ladxidoʼbe né ca diidxaʼ riʼ: «Ni cayuni jneza la? xpinni Dios laa» (3 Juan 11). Ndiʼ nga tobi de ca razón ni risaca para cadi gusaana de gúninu ni jneza.

¿Ñee bicaa carta riʼ Gayo cadi gusaana de guidxaagalú ca hermanu la? Ra gucuá ni lu Biblia para cuʼni gana ca xpinni Cristu ti gúnicaʼ  casi cani «cayuni jneza» la? rusihuinni qué nusaana de ñúnibe ni.

CANI RIZÍʼDINU DE TERCERA DE JUAN

Qué gánnarunu jma de hermanu Gayo. Peru caadxi ni nánnanu de xquendanabánibe ca rusiidiʼ ni laanu caadxi cosa.

¿Xi naquiiñeʼ gúninu para cadi gusaana de guidxaagalunu xcaadxi binni?

Primé la? ni nánnanu de cani dxandíʼ rusiidiʼ Biblia, nánnanu cani purtiʼ guyuu caadxi hermanu ni ruzuubaʼ diidxaʼ ni guyuu dispuestu guni viajarcaʼ para gusiidicaʼ ni laanu. Dxandíʼ, cadi guiráʼ ca xpinni Cristu de yanna riecaʼ zitu para chiguni predicarcaʼ ca diidxaʼ nacubi ne galán. Peru cani rúnicaʼ ni, casi ca superintendente de circuito ne xheelacaʼ, zanda gacanenu laacabe ne cuʼnu gana laacabe casi biʼniʼ Gayo. Laaca zanda gacanenu cani rindeza sti lugar ra caquiiñeʼ jma publicador, cásica ndaaniʼ xquidxi zaqueca cani rié sti guidxi. Nga runi, cadi gusaana de guidxaagalunu cani zeeda de sti guidxi (Romanos 12:13; 1 Timoteo 5:9, 10).

Guiropa, cadi naquiiñeʼ guidxagayaanu pa tuuxa gucaalú autoridad ndaaniʼ congregación. Bicaalúcabe autoridad ni gupa Juan ne zaqueca autoridad ni gupa Pablo (2 Corintios 10:7-12; 12:11-13). ¿Xi naquiiñeʼ gúninu pa guizaaca nga ndaaniʼ congregación stinu yaʼ? Bidii Pablo conseju riʼ Timoteo: «Biʼni casi naquiiñe guni cani cayuni xhiiña Señor: cadi uyubu diidxaʼ, sínuque guca nachaʼhui ne irá binni, bisiidi laacabe jneza ne cadi iree lu gana. Uníʼ ne diidxa nadóʼ ora culidxe lu cani qué na icaa stiidxa Dios». Pa laanu guuyadxísinu, cadi gúninu xiixa, dede né ora gucaalúcabe laanu la? zándaca guchaa ca binni ni riníʼ mal de ca hermanu actitud sticaʼ. Ne pur nga «Zanda ca ucuudxi [Jiobá] ladxidóʼ caʼ, inaba ca perdón laabe, ne ganna ca xii nga dxandíʼ» (2 Timoteo 2:24, 25).

Guionna, naquiiñeʼ guni felicitarnu ca hermanu ni qué huasaana de guzuubacaʼ diidxaʼ neca huacaalúcabe laacaʼ ne gábinu laacabe pabiáʼ naroʼbaʼ stipa cayúnicabe. Guluu Juan gana Gayo ne gudixhedxí ladxidoʼbe ora gudxi laabe jneza ni cayúnibe. Naquiiñeʼ chinanda ca ancianu ejemplu stibe ne cuʼcaʼ gana ca xpinni Cristu ti cadi guidxágacaʼ (Isaías 40:31; 1 Tesalonicenses 5:11).

Lu textu griegu stiʼ carta ni bicaa Juan ra nuu Gayo, nápani 219 diidxaʼ. Nga runi laani nga libru jma nachucu stiʼ Biblia. Peru nannadxíchinu nabé risaca ni para ca xpinni Cristu de yanna.