Biiyaʼ guiraʼ ni nuu lu sitiu riʼ

guyé lu índice

Gusihuínninu nápanu fe ne guicaanu decisión jneza

Gusihuínninu nápanu fe ne guicaanu decisión jneza

«Peru ora inaba be la? naquiiñe guni cre be zacaa be ni canaba be que, ne cadi cuʼ xa ique be pa zudii Dios ni o pa coʼ» (SANTIAGO 1:6).

DIIDXAʼ RIUUNDAʼ: 54 NE 42

1. Xi bicaa Caín guicaa ti decisión ni cadi jneza, ne xi bizaaca pur ni bíʼnibe que.

NAQUIIÑEʼ guicaa Caín ti decisión nabé risaca. Nuu chupa cosa ni zanda gúnibe. Zanda gucueezabe ca cosa malu riale de laabe gúnibe, para cueendube ni galán. O gudiibe lugar guni controlar cani laabe, peru zápabe stale guendanagana. Biblia rabi laanu cadi jneza decisión gucuaa Caín. Ngue runi biitibe bíʼchibe Abel ne binítibe amistad ni gupanebe Jiobá, Dios ni bizáʼ laabe (Génesis 4:3-16).

2. Xiñee nabé risaca nga guicaanu decisión jneza.

2 Guiranu riuu ora ricaanu decisión lu xquendanabáninu. Nuu de laacani nabé risaca ne nuu de laacani qué risaca. Neca zacá, stale de ca decisión ni ricaanu ca ruchaa cani xquendanabáninu. Pa guicaanu decisión jneza la? zanda gacané cani para cadi gápanu stale guendanagana ne guibáninu jma galán. Peru pa guicaanu decisión ni cadi jneza la? zándaca zápanu stale guendanagana lu xquendanabáninu ne guizaacanu cosa ni cadi cabézanu pur laacani (Proverbios 14:8).

3. a) Xi naquiiñeʼ gúninu pa racaláʼdxinu guicaanu decisión jneza. b) Xi guendarinabadiidxaʼ zacábinu.

3 Xi zacané laanu guicaanu decisión jneza yaʼ. Gápanu fe Dios.  Naquiiñeʼ gápanu confianza racaláʼdxibe gacanebe laanu ne zudiibe laanu guendabiaaniʼ ni caquiiñenu. Sti cosa ni zacané laanu nga gápanu fe Stiidxaʼ Dios ne gápanu confianza ca conseju ni rudiibe laanu (biindaʼ Santiago 1:5-8). Pa guyúbinu modo gaca xhamígunu Jiobá jma ne gannaxhiinu Stiidxabe jma la? zápanu confianza nánnabe xii nga ni jma galán para laanu. Ndiʼ zucaa laanu guyúbinu xi ná Stiidxabe ante guicaanu ti decisión. Peru, ximodo zanda guizíʼdinu guicaanu decisión jneza yaʼ. Ne pa maʼ gucuaanu ti decisión, ñee riníʼ nga maʼ qué zanda guchaʼnu ni la?

GUIRANU NAQUIIÑEʼ GUICAANU DECISIÓN

4. Xi decisión gucuaa Adán, ne xi bizaaca pur laani.

4 Dede dxi bizáʼ Dios primé hombre, Adán, qué huasaana binni de guicaa decisión. Casi Adán la? gupa xidé gulí pa zuzuubaʼ stiidxaʼ Dios o pa zuni ni ná xheelaʼ, Eva. Gucuaabe decisión de gúnibe ni ná Eva, ne bicaa laabe guicaabe ti decisión ni cadi jneza. Pur ngue, gulee Jiobá Adán de ndaaniʼ jardín de Edén, ne gudiʼdiʼ si tiempu beeda gati. Dede ca dxi nabáninu riʼ cayacanárunu pur decisión ni cadi jneza gucuaa Adán.

5. Xiñee galán iquiiñenu capacidad ni nápanu para guicaanu decisión.

5 Nuu binni zándaca guiníʼ ique jma galán nibánicaʼ pa ñaca qué nicaacaʼ decisión. Yanna laanu yaʼ, ñee zacaca riníʼ íquenu la? Galán gánnanu cadi bizáʼ diʼ Jiobá laanu casi robot, ni qué zanda guiníʼ ique nin guicaa decisión. Laabe maʼ bidiibe laanu Stiidxabe, ni rusiidiʼ laanu guicaanu decisión jneza. Ne racalaʼdxiʼ Dios iquiiñenu capacidad ni nápanu para guicaanu decisión, ne nabé nagana ni. Guidúʼyanu ti ejemplu de laani.

6, 7. a) Xi decisión gucuaa ca israelita. (Biiyaʼ dibuju ni zeeda ra ruzulú tema riʼ). b) Xiñee guca nagana para laacabe guicaacabe decisión que.

6 Dxi maʼ nabeza ca israelita que lu layú ni bidii stiidxaʼ Dios gudii laacaʼ, gupa xidé gulícabe pa zuni adorárcabe Jiobá o pa zuni adorárcabe xcaadxi dios. Biblia ná: «Yanna, pa cadi jneza para laatu gúnitu ni na Jiobá la? lacuí yannadxí tu racaláʼdxitu gúnitu ni na, pa zúnitu ni na ca dios casi biʼniʼ ca bixhozególatu dxi nuurucaʼ chericaʼ Guiiguʼ ca la? o ni na ca dios stiʼ ca amorreu ra nabézatu yanna. Peru naa ne binnilidxeʼ la? zúnidu ni na Jiobá» (Josué 24:15). Ñándaca niníʼ íquecabe qué risaca decisión riʼ. Peru zanda guibánicabe o gáticabe pur ni cuícabe gúnicabe. Biaʼ tiempu guzániruʼ ca juez que nezalú ca israelita, stale biaje gucuaacaʼ decisión ni cadi jneza. Bisaana de guni adorarcaʼ Jiobá ne bizulú biʼniʼ adorarcaʼ ca dios falsu (Jueces 2:3, 11-23). Despué, maʼ tiempu bibani profeta Elías, gupa xidé gulí ca israelita que pa zúnicaʼ ni ná Jiobá o ni ná dios falsu, Baal (1 Reyes 18:21). Zándaca para laanu cadi nagana decisión riʼ, purtiʼ nánnanu gástiruʼ sti cosa jma galán que gúninu ni ná Jiobá. Ti binni nuu xpiaaniʼ la? qué zaná guni ni ná ti dios ni cadi nabani. Peru nabé nagana guca para ca israelita que guicaacaʼ ti decisión. Biblia ruzeeteʼ qué guidxela ca binni de guidxi que tupeʼ gúnicaʼ ni ná. Bisihuinni Elías nuu xpiaaniʼ ne gucané ca binni que guni adorarcaʼ, Jiobá, tobi lucha Dios ni dxandíʼ.

7 Xiñee nagana guca para ca israelita que guicaacaʼ ti decisión jneza yaʼ. Primé la? purtiʼ qué ñápacabe fe Jiobá ne qué ninácabe nucaadiágacabe laabe. Qué ñápacabe confianza laabe ne qué nibeecabe tiempu para ñunibiáʼcabe laabe nin para niziidicabe de ca conseju stibe. Pa ñúnicabe ni, niziidicabe nicaacabe decisión jneza (Salmo 25:12). Guiropa, qué nicaacabe decisión jneza purtiʼ bidiicabe lugar gucuá modo riníʼ ique ca binni de xcaadxi guidxi laacabe. Dede bidiicabe lugar guicaa ca binni riʼ decisión pur laacabe. Pur ngue, bizulú biʼniʼ ca israelita  que casi runi ca binni que ne biʼniʼ adorarcaʼ ca dios falsu stícabe. Maca gudxi Jiobá laacabe stale iza ante zanda guizaacacabe zaqué (Éxodo 23:2).

ÑEE NAQUIIÑEʼ GUDIʼNU LUGAR GUICAA XCAADXI DECISIÓN PUR LAANU LA?

8. Xi ti cosa risaca rizíʼdinu de ejemplu stiʼ ca israelita.

8 Ejemplu stiʼ ca israelita rusiidiʼ ni laanu caquiiñeʼ guluíʼ Stiidxaʼ Dios laanu xi gúninu para guicaanu decisión jneza. Gálatas 6:5 rusietenalaʼdxiʼ laanu cada tobi zuaʼ donda stiʼ pur decisión ni guicaa. Nga runi cadi naquiiñeʼ gudiʼnu lugar guicaa xcaadxi binni decisión pur laanu. Naquiiñeʼ gánnanu xii nga ni jneza para Dios ne gúninu ni.

9. Xiñee zándaca chuʼnu ra naxoo pa gudiʼnu lugar xcaadxi binni guicaa decisión pur laanu.

9 Xi zanda gucaa laanu gudiʼnu lugar guicaa xcaadxi decisión pur laanu yaʼ. Ora gucaacabe laanu guicaanu ti decisión ni cadi jneza (Proverbios 1:10, 15). Zándaca chuʼnu ra naxoo pa gudiʼnu lugar guicaa xcaadxi binni decisión pur laanu. Naquiiñeʼ gúninu ni gabi conciencia stinu laanu purtiʼ maʼ bisíʼdinu ni casi ná Biblia. Peru pa gudiʼnu lugar xcaadxi binni guicaa decisión pur laanu la? cudiʼnu lugar laacabe gábicabe laanu xi gúninu. Ne zándaca zápanu guendanagana pur laani.

10. Xidé gudixhená Pablo ca xpinni Cristu de Galacia.

10 Apóstol Pablo gudixhená ca xpinni Cristu ni nuu ndaaniʼ congregación de Galacia cadi gudiicaʼ lugar guicaa xcaadxi binni decisión pur laacaʼ (biindaʼ Gálatas 4:17). Guyuu caadxi xpinni Cristu de congregación que maʼ laacaʼ nuucaʼ guicaacaʼ decisión pur xcaadxi hermanu. Ca hombre ni ruyubi puru si para laa riʼ gucaláʼdxicaʼ ninanda ca hermanu que ni riniʼcaʼ ne cadi ni ná ca apóstol que. Bichácabe bi yánnicabe ne qué ñuni respetárcabe derechu ni napa ca hermanu que de guicaacaʼ decisión sticaʼ.

11. Ximodo zanda gacanenu xcaadxi ora chicaacaʼ ti decisión.

11 Guiranu zanda guizíʼdinu de ejemplu stiʼ apóstol Pablo. Laabe biʼniʼ respetarbe derechu ni napa ca hermanu para guicaacaʼ decisión sticaʼ (biindaʼ 2 Corintios 1:24).  Yanna riʼ, zanda chinanda ca ancianu ni nuu ndaaniʼ ca congregación ejemplu stibe ora gudiicaʼ conseju ti xpinni Cristu ni chicaa xiixa decisión. Né stale gustu ruluiʼcaʼ laabe xi ná Stiidxaʼ Dios. Peru riuucabe cuidadu para cadi gábicabe laabe xipeʼ naquiiñeʼ gúnibe purtiʼ nánnacabe laabe nga guidxagalube intiica si pur decisión ni guicaabe. Xi ti cosa nabé risaca rizíʼdinu de ndiʼ yaʼ. Zanda guluinu ca hermanu stinu xi conseju rudii Biblia de ni cadíʼdicaʼ. Peru laasicabe nga naquiiñeʼ gúʼyacabe xi decisión guicaacabe. Ora gúnicabe ndiʼ la? ribeendúcabe stale cosa galán. Que chuʼ dxi guiníʼ íquenu nápanu derechu para guicaanu decisión pur ca hermanu stinu.

Né stale guendarannaxhii racané ca ancianu guiráʼ hermanu guicaacaʼ decisión sticaʼ. (Biiyaʼ párrafo 11).

CADI GUNINU XIIXA PUR NI CAYUNI SENTIRNU

12, 13. Xiñee zándaca ziuʼnu ra naxoo pa guicaanu decisión ora cadxiichinu o pa huaxiéʼ nápanu gana.

12 Ca dxi riʼ, stale binni runi ni ná ladxidóʼ ora chicaa ti decisión. Peru zanda chuʼnu ra naxoo pa gúninu zacá. Biblia cayabi laanu cadi naquiiñeʼ chinándanu ni ná ladxidoʼno nin ni cayuni sentirnu ora guicaanu decisión, purtiʼ imperfectu laanu (Proverbios 28:26). Cadi gápanu confianza ladxidoʼno purtiʼ laani nga «ni jma riguite laa[nu] que intiica cosa, ne qué ridxela ni xi guni ni» (Jeremías 17:9). Biblia ruzeeteʼ guyuu stale binni biʼniʼ ni ná ladxidóʼ ne pur ngue gúpacaʼ stale guendanagana (1 Reyes 11:9; Jeremías 3:17; 13:10). Yanna, xi zándaca guizaaca pa chinándanu ni ná ladxidoʼno ora guicaanu xiixa decisión yaʼ.

13 Nabé risaca ladxidoʼno purtiʼ Jiobá peʼ cayuni mandar laanu gannaxhiinu laa de guidubi ladxidoʼno ne gannaxhiinu stiʼ binni cásica nadxiinu laanu (Mateo 22:37-39). Peru naquiiñeʼ gápanu cuidadu. Ca textu stiʼ Biblia ni zeeda lu párrafo gudídinu ca rusihuinni cani zándaca ziuʼnu ra naxoo pa gudiʼnu lugar guni controlar ladxidoʼno ca cosa ni riníʼ íquenu ne cani rúninu. Guzéʼtenu ti ejemplu, zándaca qué zacaanu xiixa decisión jneza pa cadxiichinu (Proverbios 14:17; 29:22). Ne zándaca laaca qué zacaanu ti decisión galán pa huaxiéʼ nápanu gana pur cadídinu lu xiixa guendanagana (Números 32:6-12; Proverbios 24:10). Naquiiñeʼ gudiʼnu lugar gusiidiʼ ley stiʼ Dios xquendabiaaninu (Romanos 7:24, 25). Nga runi, ora chicaanu ti decisión risaca la? cadi gúninu ni pur ni cayuni sentirnu.

PORA NAQUIIÑEʼ GUCHAʼNU XIIXA DECISIÓN

14. Xiñee nánnanu gastiʼ naca guchaʼnu xiixa decisión stinu.

14 Guiranu nga naquiiñeʼ guicaanu decisión jneza. Neca zacá, ti binni ni riuu razón la? nanna nuu biaje naquiiñeʼ guiníʼ ique chaahuiʼ lu ti decisión ni maʼ gucuaa ne guʼyaʼ pa naquiiñeʼ guchaa ni. Guidúʼyanu ejemplu ni jma galán bisaana Jiobá para laanu ora biʼniʼ tratar ca binni de Nínive ni bibani tiempu stiʼ Jonás. Biblia ná: «Ora biiyaʼ Dios ni dxandíʼ maʼ cadi cayúnicabe ca cosa malu que; bichaa ni cá ique guni ne maʼ qué ñeedané guendananá ni maca guníʼ guedané luguiácabe» (Jonás 3:10). Bichaa Jiobá decisión stiʼ ora biʼyaʼ maʼ bichaa ca binni de Nínive que ne maʼ bisaanacaʼ de gúnicaʼ ca cosa malu bíʼnicaʼ. Zaqué bisihuínnibe riuube razón, qué rudxiibabe laca laabe ne riabe binni. Gadxepeʼ Jiobá de stale binni, laa qué ricaa decisión sin guiníʼ ique, ninca ora cadxiichi.

15. Pora zanda guchaʼnu ti decisión stinu.

15 Nuu tiru naquiiñeʼ guiníʼ íquenu sti biaje pa jneza xiixa decisión ni gucuaanu. Zándaca gúninu ni ora guchaa xiixa lu xquendanabáninu. Guietenaláʼdxinu guyuu biaje bichaa Jiobá ca decisión ni gucuaa (1 Reyes  21:20, 21, 27-29; 2 Reyes 20:1-5). Laaca zándaca naquiiñeʼ guchaʼnu xiixa decisión ora ganna chaahuinu de laani. Guidúʼyanu xi biʼniʼ rey David. Ti biaje gúdxicabe laabe xiixa ni cadi dxandíʼ de ti nietu stiʼ Saúl ne bicaa ngue laabe guicaabe ti decisión. Peru ora gúnnabe xipeʼ ngue bizaaca la? bichaabe decisión stibe (2 Samuel 19:24-29). Nuu biaje, laaca galán gúninu zacá.

16. a) Xi zacané laanu ora chicaanu ti decisión. b) Xiñee naquiiñeʼ guiníʼ íquenu sti biaje xiixa decisión ni maʼ gucuaanu, ne xi naquiiñeʼ chuʼnu dispuestu gúninu.

16 Biblia ná cadi naquiiñeʼ guicaanu ti decisión risaca nagueendaca (Proverbios 21:5). Naquiiñeʼ guicaanu tiempu para guiníʼ ique chaahuinu ni. Zacá zanda guicaanu ti decisión jneza (1 Tesalonicenses 5:21). Casi cani naca xaíque ndaaniʼ ti familia la? naquiiñeʼ cueecaʼ tiempu para gúʼyacaʼ xi ná Biblia ne ca publicación ni ribee xquidxi Dios ante guicaacaʼ ti decisión. Laaca galán gucaadiágabe ni gabi xcaadxi binnilídxibe laabe. Cadi guiaandaʼ laanu bidii Dios conseju Abrahán gucaadiaga xheelaʼ (Génesis 21:9-12). Ca ancianu laaca naquiiñeʼ cueecaʼ tiempu para guni estudiarcaʼ. Ora guidxélacabe xiixa información nacubi ni gucaa laacabe guchaacabe ti decisión la? rúnicabe ni sin chúʼcabe xizaa pa zuniti xcaadxi binni respetu laacabe. Ca ancianu ni riuu razón ne napa modestia la? naquiiñeʼ chuʼcaʼ dispuestu guchaacaʼ modo riníʼ íquecaʼ ne decisión ni maʼ gucuaacaʼ pa caquiiñeʼ gúnicaʼ ni. Galán pa guiranu ninanda ejemplu stícabe, purtiʼ zacá zanda gacanenu chuʼ guendariuudxi ndaaniʼ congregación ne chuʼcaʼ tobi si (Hechos 6:1-4).

GÚNINU NI MAʼ GUDIXHE ÍQUENU

17. Xi zacané laanu guicaanu decisión jneza.

17 Nuu decisión jma risaca que xcaadxi. Casi guiníʼ íquenu pa zachagananu ne tu guichagananu la? cadi guendariguite cani. Laaca cadi guendariguite nga guiníʼ íquenu padxí guzulunu serviciu de tiempu completu stinu. Ante guicaanu decisión casi ca ndiʼ la? naquiiñeʼ guiníʼ ique chaahuinu ne guinábanu Jiobá guluíʼ laanu xi gúninu. Zándaca iquiiñenu stale tiempu para guiníʼ íquenu ca ndiʼ. Peru pa racaláʼdxinu guicaanu ti decisión jneza la? naquiiñeʼ gápanu confianza Jiobá, gucaʼdiáganu ni gábibe laanu ne chinándanu cani (Proverbios 1:5). Rudii Jiobá laanu ca conseju jma jneza ni zeeda lu Stiidxaʼ. Nga runi risaca nga guni estudiarnu ni ne guinábanu Jiobá gacané laanu guiénenu ni. Laabe zanda gudiibe laanu ca cualidad ni caquiiñeʼ gápanu para guicaanu decisión casi racaláʼdxibe gaca cani. Ante guicaanu ti decisión ni risaca, naquiiñeʼ guinabadiidxanu: «Ñee rusihuinni decisión riʼ nadxieeʼ Jiobá la? Ñee zacané ni para chuʼ familia stinneʼ nayecheʼ ne gápacaʼ guendariuudxi la? Ñee rusihuinni decisión riʼ napaʼ paciencia ne nadxieeʼ binni la?».

18. Xiñee ribeza Jiobá laanu guicaanu ca decisión stinu.

18 Qué rucaa diʼ Jiobá laanu gannaxhiinu laa ne gúninu ni ná. Ni bíʼnibe nga bidiibe laanu libertad de cuinu pa zúninu ni. Runi respetarbe derechu ni nápanu para guicaanu decisión pa zúninu ni nabe o pa coʼ (Josué 24:15; Eclesiastés 5:4). Peru laabe ribézabe gúninu ni maʼ gudixhe íquenu gúninu ne chinándanu ni gabi Stiidxabe laanu. Pa gápanu fe cani gabi Jiobá laanu gúninu ne gúninu ni ná ca principiu ni rusiidibe laanu la? zacaanu decisión jneza. Ne laaca zusihuínninu cadi nácanu binni ni racalaʼdxiʼ gannaxhii Dios ne gannaxhiica guidxilayú, sínuque rusihuínninu maʼ nánnanu xipeʼ nga racaláʼdxinu gúninu (Santiago 1:5-8; 4:8).