Biiyaʼ guiraʼ ni nuu lu sitiu riʼ

guyé lu índice

Tuu nga zániru nezalú xquidxi Dios yanna riʼ

Tuu nga zániru nezalú xquidxi Dios yanna riʼ

«Laguietenalaʼdxiʼ cani zániru ládetu» (HEBREOS 13:7TNM).

DIIDXAʼ RIUUNDAʼ: 34 NE 43

1, 2. Xi zándaca gunabadiidxaʼ ca apóstol que zeʼ si Jesús guibáʼ.

TI DXI nuuné ca apóstol que Jesús, xhamígucaʼ ne maestru sticaʼ, lu dani olivo. Málasi biiyacabe bizulú biasa Jesús zeʼ guibáʼ ne chahuidugá zinitilú lade za (Hechos 1:9, 10). Biaʼ chupa iza bisiidiʼ Jesús laacabe stale cosa, guluu gana laacabe ne biluíʼ laacabe xi gúnicabe. Peru, xi gúnicabe yanna ra maʼ qué guínnibe yaʼ.

2 Ante cheʼ Jesús guibáʼ, gúdxibe ca discípulo stibe: «Chi güi tu stiidxa ndaani guidxi Jerusalén ne idubi Judea ne Samaria ne idubi naca guidxilayú» (Hechos 1:8). Ximodo gúnicabe nga yaʼ. Maca bidii stiidxaʼ Jesús laacabe zacané espíritu santu stiʼ Dios laacabe (Hechos 1:5). Peru, tuu nga sániru ne quixheʼ chaahuiʼ modo gucheechecabe diidxaʼ lu guidubi Guidxilayú yaʼ. Nanna ca apóstol que biquiiñeʼ Jiobá hombre para gabi ca israelita que xi gúnicaʼ dxiqué. Ngue runi zándaca gunabadiidxacabe pa zabí Jiobá sti binni ni gaca xaíque.

3. a) Xi gudixhe ique ca apóstol ni bizuubaʼ diidxaʼ gúnicaʼ zeʼ si Jesús guibáʼ. b) Xi guendarinabadiidxaʼ zacábinu lu tema riʼ.

3 Cadi tan xadxí de zeʼ Jesús guibáʼ, biyubi ca discípulo stibe  gánnacaʼ xiná Stiidxaʼ Dios ne gunábacaʼ gacané Dios laacaʼ para gunda gulicaʼ Matías para chuʼ lugar stiʼ Judas Iscariote. Zaqué nga bizaacabe 12 apóstol (Hechos 1:15-26). Xiñee nabé risaca ni gudixhe íquecabe gúnicabe riʼ para laacabe ne para Jiobá yaʼ. Bidii ca discípulo que cuenta caquiiñeʼ chuʼ 12 apóstol. * Gulí Jesús ca apóstol que ne bisiidibe laacaʼ ximodo gúnicaʼ ti dxiiñaʼ nabé risaca ndaaniʼ xquidxi Dios. Xi dxiiñaʼ ca yaʼ. Ximodo gucané Jiobá ne Jesús laacabe gúnicabe ni yaʼ. Ñee nuu ti grupu de binni yanna riʼ ni guni ti dxiiñaʼ zacaca la? Ne, ximodo zanda guietenaláʼdxinu de ca binni ni zániru ndaaniʼ xquidxi Dios, peru jma nga de «mozo ni nuu xpiaani ne ni runi jneza» yaʼ. (Mateo 24:45; Hebreos 13:7). Guidúʼyanu.

JESÚS RABI GRUPU NI ZANIRUʼ XI GUNI

4. Xi dxiiñaʼ biaana lu náʼ ca apóstol ne xcaadxi binnigola de Jerusalén.

4 Lu Pentecostés stiʼ iza 33, bizulú ca apóstol guzanírucaʼ nezalú congregación stiʼ ca xpinni Cristu. Biblia ná «biasa Pedru bizuhuaa, laa ne sti once apóstol que» ne bisiidibe ti grupu naroʼbaʼ de binni cani dxandíʼ rusiidiʼ Stiidxaʼ Dios, ni zanda gacané laacaʼ guilacaʼ (Hechos 2:14, 15). Stale de ca binni que gúcacaʼ xpinni Cristu. Guca si ngue, cani nacubi guca xpinni Cristu riʼ yenándacaʼ «ni bisiidi ca apóstol» que (Hechos 2:42). Ca apóstol que nga biʼyaʼ modo iquiiñeʼ bueltu stiʼ congregación (Hechos 4:34, 35). Ne laaca laacabe nga bisiidicabe xquidxi Dios ne biʼniʼ orárcabe pur laa. Laacabe guníʼcabe: «Laadu qué ziaana dxí du de iní né du Dios ne de güi du stiidxaʼ» (Hechos 6:4). Ca apóstol que laaca ruseendacaʼ xcaadxi xpinni Cristu ni nanna para chiguni predicar ca lugar ra qué huayuu dxi gunadiágacabe stiidxaʼ Dios (Hechos 8:14, 15). Gudiʼdiʼ si tiempu maʼ gucané xcaadxi binnigola ni bibí pur espíritu santu ca apóstol que para gápacaʼ ca congregación. Guirácabe guyuucabe lu grupu ni zaniruʼ, ni gudixhe xi guni guiráʼ congregación guyuu dxiqué (Hechos 15:2).

5, 6. a) Ximodo bidii espíritu santu poder grupu ni zaniruʼ. (Biiyaʼ dibuju ni zeeda ra ruzulú tema riʼ). b) Ximodo gucané ca ángel grupu ni zaniruʼ. c) Ximodo biluíʼ Stiidxaʼ Dios grupu ni zaniruʼ xi guni.

5 Nanna dxichi ca xpinni Cristu ni bibani lu primé siglu caquiiñeʼ Jiobá Jesús para gabi grupu ni zaniruʼ que xi guni. Xiñee nanna dxíchicabe ni yaʼ. Primé la? purtiʼ espíritu santu nga rudii poder grupu ni zaniruʼ (Juan 16:13). Dxandíʼ, guiráʼ xpinni Cristu ni bibí gucuaacaʼ espíritu santu, peru jma nga bidii espíritu riʼ poder ca apóstol ne ca ancianu de Jerusalén para gúnicaʼ xhiiñacaʼ jneza ora guluiʼcaʼ ca congregación que xi guni. Casi lu iza 49 que la? gucané espíritu santu grupu ni zaniruʼ que para gánnacaʼ xi gúnicaʼ né circuncisión. Cumu yenanda ca congregación que ni gudixhe grupu ni zaniruʼ que gúnicaʼ la? «jma bizuhuaa chaahui ca xpinni Cristu, ne ze dxi jma zidale caʼ» (Hechos 16:4, 5). Carta ni caníʼ de circunsición ni yendá ndaaniʼ ca congregación que bisihuinni ni napa grupu ni zaniruʼ que espíritu stiʼ Dios ne nápacabe ca cualidad casi guendarannaxhii ne fe (Hechos 15:11, 25-29; Gálatas 5:22, 23).

6 Guiropa razón ni napa ca xpinni Cristu que para chuʼcaʼ seguru Jiobá culuíʼ grupu ni zaniruʼ que xi guni nga purtiʼ cayacané ca ángel laacabe. Casi ti biaje, gudxi ti ángel ti hombre láʼ Cornelio guyubi apóstol Pedro. Cadi judíu Cornelio ne qué ñaca circuncidar. Biʼniʼ predicar si Pedro Cornelio ne familia stiʼ, gucuaacabe espíritu santu neca caʼruʼ gaca circuncidar ca hombre que. Zaqué  beeda gaca Cornelio primé hombre ni guca xpinni Cristu neca cadi naca judíu ne caʼruʼ gaca circuncidar. Ora gunna ca apóstol ne xcaadxi hermanu ni guca riʼ, yenándacabe ni nuu Dios gúnicabe ne bidxaagalúcabe ca binni ni cadi judíu ne ni caʼruʼ gaca circuncidar que né stale guendanayecheʼ (Hechos 11:13-18). Ndiʼ rusihuinni gucané ca ángel guireeche diidxaʼ, dxiiñaʼ ni cayuuyaʼ grupu ni zaniruʼ que gacaʼ (Hechos 5:19, 20). Guionna razón ni napa ca xpinni Cristu que para chuʼcaʼ seguru Jiobá culuíʼ grupu ni zaniruʼ que xi guni nga ruluíʼ Stiidxaʼ Dios laacaʼ xi gúnicaʼ. Guiráʼ biaje chitixhe ique ca hermanu riʼ gúnicaʼ xiixa cosa nabé risaca de xiixa ni runi cré ca xpinni Cristu o ximodo guluíʼcabe ca congregación que xi gúnicaʼ la? ruyúbicabe gánnacabe xiná Stiidxaʼ Dios (Hechos 1:20-22; 15:15-20).

7. Xiñee zanda guininu Jesús nga biluíʼ ca xpinni Cristu de primé siglu que xi gúnicaʼ.

7 Nécapeʼ gupa cani guyuu lu grupu ni zaniruʼ que autoridad luguiáʼ congregación, biénecabe Jesucristu nga Xaíque stícabe. Xiñee nánnanu ni yaʼ. Apóstol Pablo guníʼ Cristu nga runi nombrar caadxi hombre «para gaca apóstol». Laaca guniʼbe Cristu nga Xaíque stiʼ congregación (Efesios 4:11, 15). Ne Dios gudixhe guiree lá ca discípulo stiʼ Jesús xpinni Cristu lugar de gunibiáʼ binni laacabe né lá tuuxa apóstol (Hechos 11:26). Gunna Pablo risaca nga chinanda tuuxa ni rusiidiʼ ca apóstol ne ca binnigola ni zániru ndaaniʼ congregación, purtiʼ laacaʼ rusiidicaʼ ni ná lu Stiidxaʼ Dios. Neca zacá, guníʼ Pablo: «Peru racaladxe ganna tu, Cristu nga xaíque sti irá hombre». Ca diidxaʼ riʼ laaca gucuá cani para cada tobi de cani nuu lu grupu ni zaniruʼ que. Ne despué guníʼ Pablo: «Dios nga xaíque sti Cristu» (1 Corintios 11:2, 3). Rihuinni dxíchica maʼ biʼniʼ nombrar Jiobá Xiiñiʼ, Jesucristu, para guluíʼ ca congregación xi gúnicaʼ.

«CADI STIʼ DIʼ HOMBRE DXIIÑAʼ RIʼ»

8, 9. Xi dxiiñaʼ nabé risaca biʼniʼ hermanu Russell.

8 De lu iza 1870, Charles Taze Russell ne caadxi de ca xhamigu bizulú bíʼnicaʼ stipa pur guni adorarcaʼ Dios casi rusiidiʼ Biblia. Guyuuláʼdxicabe gacanécabe xcaadxi binni guni cásica cayúnicabe, dede né xcaadxi binni ni riníʼ sti diidxaʼ. Para nga la? lu iza 1884 bizáʼcabe corporación legal Zionʼs Watch Tower Tract Society. Hermanu Russell nga beeda gaca presidente stiʼ corporación riʼ. * Cumu ruundabe Biblia né stale cuidadu la? qué nidxíbibe ora gúdxibe xcaadxi binni cadi lu Biblia zeeda cani rusiidicabe ndaaniʼ ca yuʼduʼ que, casi Trinidad ne nápanu ti alma ni qué rati. Laaca biene hermanu Russell guirutiʼ zuuyaʼ Cristu ora guibiguetaʼ sti biaje ne zaluxe ca «dxi udii Dios lugar» ca guidxi roʼ lu iza 1914 (Lucas 21:24). Biquiiñebe stipa stibe, tiempu stibe ne xpuéltube para gusiidibe cani dxandíʼ riʼ guiráʼ binni. Nánnanu biquiiñeʼ Jiobá ne Jesús laabe para guluiʼbe congregación que xi guni lu ti tiempu nabé risaca.

9 Qué niná hermanu Russell nusisácacabe laa. Lu iza 1896, bicaabe cadi naquiiñeʼ gusisaca binni laabe nin xcaadxi hermanu ni napa xiixa privilegiu. Laaca qué ninácabe ñunibiáʼ binni laacabe né xiixa título especial ninca qué ninabe ñuu ti grupu de binni ni niné labe. Despué guníʼ hermanu Russell: «Cadi stiʼ diʼ hombre dxiiñaʼ riʼ».

10. a) Padxí biʼniʼ nombrar Jesús «mozo ni nuu xpiaani ne ni runi jneza». b) Bizeeteʼ ximodo bisiénecabe cadi ngueca diʼ nga Grupu ni Zaniruʼ né Sociedad Watch Tower.

10 Biʼniʼ nombrar Jesús «mozo ni nuu xpiaani ne ni runi jneza» lu iza 1919, chonna iza despué de guti hermanu Russell. Xi para biʼniʼ nombrarbe mozo riʼ yaʼ. Para «gudii ni iquiiñe» ca xpínnibe órapeʼ caquiiñecaʼ ni  (Mateo 24:45). Lu ca iza que, maʼ nuu ti grupuhuiiniʼ de xpinni Cristu ni bibí pur espíritu santu ndaaniʼ ca oficina central stiʼ Brooklyn (Nueva York), para gudii guendaró espiritual ca xpinni Jesús. Diidxaʼ «grupu ni zaniruʼ» ca, bizulú biquiiñeʼ ni lu ca publicación stinu lu ca iza 40. Tiempu que, ca director stiʼ Watch Tower Bible and Tract Society nga binibiáʼcabe casi cani nuu lu «grupu ni zaniruʼ». Peru lu iza 1971 bisiene chaahuicabe gadxé nga Grupu ni Zaniruʼ ne gadxé nga Sociedad Watch Tower, purtiʼ Sociedad riʼ ruuyaʼ ca asuntu legal si. Dede iza que, maʼ zanda chuʼ caadxi hermanu ni bibí ni cadi naca director stiʼ Sociedad que lu Grupu ni Zaniruʼ. Lu ca últimu iza riʼ, huaquiiñecabe ca hermanu ni zeeda gaca de «xcaadxi dendxu» para gácacaʼ director stiʼ Sociedad ne xcaadxi corporación ni riquiiñeʼ xquidxi Dios. Ndiʼ racané Grupu ni Zaniruʼ ca guni xhiiñaʼ jma jneza: gabi xquidxi Dios xi guni ne gudii guendaró espiritual laacabe (Juan 10:16; Hechos 6:4). Revista Torre stiʼ ni rapa 15 de julio 2013 bisiene «mozo ni nuu xpiaani ne ni runi jneza» ca nga ti grupuhuiiniʼ de hermanu ni bibí né espíritu santu ne laacabe nga nácacabe Grupu ni Zaniruʼ.

Grupu ni zaniruʼ lu ca iza 50.

11. Ximodo runi Grupu ni Zaniruʼ ora chigúnicaʼ xiixa.

11 Cada semana ridagulisaa ca hermanu ni nuu lu Grupu ni Zaniruʼ para gúʼyacaʼ xi jma jneza gacaʼ ora chigúnicaʼ xiixa cosa risaca. Cumu gatigá nga ridagulisaacabe la? racané ni laacabe chúʼcabe tobi si ne ganda güícabe diidxaʼ de cani chigúnicabe (Proverbios 20:18). Nin tobi de cani nuu lu Grupu ni Zaniruʼ ca qué risaca jma qué xcaadxi de laacaʼ. Nga runi, cada iza riquiiñecabe gadxé gadxé hermanu ni nuu lu Grupu ni Zaniruʼ para guni reunión ni rápacabe guiráʼ semana (1 Pedro 5:1). Ne laaca zacá nga runi xhoopaʼ comité stiʼ Grupu ni Zaniruʼ dxiiñaʼ. Nin tobi de cani nuu lu Grupu ni Zaniruʼ ca qué riníʼ ique laa nga xaíque stiʼ ca biʼchiʼ. Cada tobi de laacabe laaca nuu lu grupu de ca domésticu. Nga runi cada tobi de laacabe ricaa guendaró espiritual ni rudii mozo ni nuu xpiaaniʼ ne rinándacabe ni gabi laacabe gúnicabe.

Dede dxi guca nombrar mozo ni nuu xpiaaniʼ, lu iza 1919, qué huayaanadxí de gudii guendaró espiritual xquidxi Dios. (Biiyaʼ párrafo 10 ne 11).

TUU NGA MOZO NI NUU XPIAANIʼ NE NI RUNI JNEZA

12. Xi guendarinabadiidxaʼ zacábinu.

12 Qué riquiiñeʼ diʼ Dios visión para gabi cani nuu lu Grupu ni Zaniruʼ xi gúnicaʼ ne cadi perfectu laacabe. Zándaca zucheecabe ora gusiénecabe xiixa ni zeeda lu Biblia o zándaca cadi biaʼsi xiixa instrucción gudiicabe. Casi lu Índice de las publicaciones Watch Tower zeeda ti tema ni láʼ «Aclaración de creencias». Lu tema riʼ zeeda ti lista de cani huachaacabe modo biénecabe cani rusiidiʼ Biblia dede lu iza 1870. Qué niníʼ diʼ Jesús zudii mozo ni nuu xpiaaniʼ ca laanu guendaró espiritual perfectu. Yanna, tuu nga «mozo ni nuu xpiaani ne ni runi jneza» ni bizeeteʼ Jesús que yaʼ. (Mateo 24:45). Xi guiráʼ rusihuinni grupu ni zaniruʼ ca nga mozo ni nuu xpiaaniʼ yaʼ. Guidúʼyanu xi chonna cosa huayacané laacabe ne laaca laacani nga gucané cani grupu ni zaniruʼ ni guyuu lu primé siglu.

13. Ximodo huayacané espíritu santu Grupu ni Zaniruʼ.

13 Racané espíritu santu Grupu ni Zaniruʼ. Huayacané espíritu santu Grupu ni Zaniruʼ para guiene cani rusiidiʼ Biblia ni qué ñene chaahuicabe ante. Guiníʼ íquesinu lista ra zeeda caadxi de cani huasiénecabe ni rieeteʼ lu párrafo gudídinu ca. Nin ti binni guidxilayú qué ñanda ñene ne nusiene ca cosa «ni jma nagana» de Dios riʼ stubi si (biindaʼ 1 Corintios 2:10). Laaca casi guníʼ apóstol Pablo dxiqué, zaqueca riníʼ Grupu ni Zaniruʼ yanna: «Rui du ni, peru cadi de  xquenda biaani si du biziʼdi du ni, sínuque bisiidi Espíritu Santu laadu xi iní du» (1 Corintios 2:13). Gayuaa iza guyuu binni lu náʼ religión ni cadi dxandíʼ ne qué nuluíʼ laacabe xipeʼ nga caquiiñeʼ gúnicabe. Yanna, xiñee jma maʼ biénecabe ni rusiidiʼ Biblia dede lu iza 1919 yaʼ. Nuu ti razón si: huaquiiñeʼ Jiobá espíritu santu stiʼ para gacané laacabe.

14. Casi ná Apocalipsis 14:6, 7, ximodo racané ca ángel Grupu ni Zaniruʼ ne xquidxi Dios yanna riʼ.

14 Racané ca ángel Grupu ni Zaniruʼ. Grupu ni Zaniruʼ napa ti dxiiñaʼ naroʼbaʼ: quixhe chaahuiʼ modo guni predicar jma de xhono millón publicador ni nuu lu guidubi Guidxilayú. Xiñee huabeendunu stale cosa galán lu dxiiñaʼ riʼ yaʼ. Purtiʼ racané ca ángel para gácani (biindaʼ Apocalipsis 14:6, 7). Stale biaje huayacané ca ángel ca publicador para ganda chindacaʼ ra nuu tuuxa binni ni gunabaʼ gacané Dios laa. * Jma maʼ careeche diidxaʼ ndaaniʼ stale lugar ra nabé rucaalú binni laacabe ne jma maʼ stale binni caziidiʼ de Biblia ca lugar ca. Cayanda cayaca ca dxiiñaʼ riʼ purtiʼ cayacané ca ángel ca gaca ni.

15. Biquiiñeʼ ti ejemplu para gusihuínniluʼ xiñee gadxepeʼ Grupu ni Zaniruʼ de ca xaíque stiʼ ca religión ni ná zinanda Cristu.

15 Ruluíʼ Stiidxaʼ Dios Grupu ni Zaniruʼ xi guni (biindaʼ Juan 17:17). Guiníʼ íquenu ni bizaaca lu iza 1973. Lu revista La Atalaya 15 de octubre de iza ca beeda ti guendarinabadiidxaʼ: «Ñee zanda chúʼnisa tuuxa ni caʼruʼ gusaana de cubaʼ gueza la?». Revista que ná qué zanda diʼ, ne biquiiñeʼ ni Biblia para bisiene ni xiñee. Biquiiñeʼ revista que caadxi versículo stiʼ Biblia para bisiene xiñee caquiiñeʼ  guni expulsárcabe tuuxa de ndaaniʼ congregación pa qué náʼ gusaana de cubaʼ gueza (1 Corintios 5:7; 2 Corintios 7:1). Laaca bisiene revista La Atalaya riʼ cadi binni diʼ gudixhe gaca ni zacá, sínuque Dios, casi zeeda ni lu Stiidxabe. Organización si stiʼ ca testigu stiʼ Jiobá huayuni stipa pur chinanda cani rusiidiʼ Stiidxaʼ Dios lu guiráʼ ni guni. Ne huayúnicabe ni neca gaca nagana para tuuxa de laacabe chinándacaʼ ni. Cadi tan xadxí, ti libru ni caníʼ de religión ndaaniʼ guidxi Estados Unidos bizeeteʼ ca diidxaʼ riʼ: «Gatigá ruuyaʼ ca xaíque yuʼduʼ que ni rusiidicaʼ para gúʼyacaʼ paraa zanda guchaacaʼ ti chinándacaʼ ni runi cré ne modo riníʼ ique ca xpínnicaʼ o modo riníʼ ique xcaadxi binni». Peru Grupu ni Zaniruʼ qué runi xiixa purtiʼ si jma stale binni riuulaʼdxiʼ ni. Ni rúnicabe nga rinándacabe ni ná Stiidxaʼ Dios. Ndiʼ rusihuinni Jiobá nga rabi xquidxi xi guni.

«LAGUIETENALAʼDXIʼ CANI ZÁNIRU»

16. Gunáʼ nga ti modo guietenaláʼdxinu de Grupu ni Zaniruʼ.

16 Biblia ná: «Laguietenalaʼdxiʼ cani zániru ládetu, cani huayuiʼné laatu stiidxaʼ Dios, ne ora guʼyaʼ chaahuitu xi guleendúcabe pur xpiáʼcabe la? lagapa fe casi nápacabe» (Hebreos 13:7TNM). Laani ná ni guietenaláʼdxinu de cani zániru ládenu o cani ruluíʼ laanu xi gúninu. Ti modo zanda gúninu ni nga guni orarnu pur ca hermanu ni nuu lu Grupu ni Zaniruʼ (Efesios 6:18). Nápacabe stale dxiiñaʼ ni rúnicabe. Casi gudiicabe laanu guendaró espiritual, gúʼyacabe modo guireeche diidxaʼ lu guidubi Guidxilayú ne gúʼyacabe modo iquiiñeʼ bueltu rudii binni para organización stinu. Nga runi, cadi naquiiñeʼ gusaana de guni orarnu pur ca hermanu riʼ.

17, 18. a) Ximodo racanenu Grupu ni Zaniruʼ. b) Xiñee naquiiñeʼ gúninu guiráʼ ni ganda ora guni predicarnu.

17 Laaca rusihuínninu rietenaláʼdxinu de Grupu ni Zaniruʼ ora rinándanu ca instrucción stícabe ne ni gábicabe laanu gúninu. Riquiiñeʼ Grupu ni Zaniruʼ riʼ ca publicación, ca reunión ne ca asamblea ca para gabi laanu xi gúninu. Ne laacabe runi nombrárcabe ca superintendente de circuito, ne maʼ laacaʼ runi nombrarcaʼ binnigola ndaaniʼ ca congregación ca. Ca superintendente de circuito ne ca binnigola rusihuínnicaʼ rietenaláʼdxicaʼ de Grupu ni Zaniruʼ ora rinándacaʼ ca instrucción stícabe né stale cuidadu. Ne laanu rusihuínninu nápanu respetu Xaíque stinu, Jesucristu, ora ruzúʼbanu stiidxaʼ ca hermanu ni caquiiñebe tiempu riʼ (Hebreos 13:17).

18 Sti modo zanda guietenaláʼdxinu de Grupu ni Zaniruʼ nga gúninu guiráʼ ni gándatiʼ ora guni predicarnu. Hebreos 13:7 caguu gana laanu gápanu fe cásica ca hermanu ni zániru lu dxiiñaʼ rúninu riʼ. Maʼ bisihuinni Grupu ni Zaniruʼ pabiáʼ naroʼbaʼ fe nápacaʼ ora runi predicarcaʼ né stale gana ne ora racanecaʼ gaca predicar ca diidxaʼ nacubi ne galán. Ñee racanenu laacabe lu dxiiñaʼ risaca riʼ la? Pa gúninu ni, ziuʼnu nayecheʼ ora gabi Jesús laanu: «Ora biʼni tu ni ti hermanu stinne neca huaxiéʼ laa la? casi ñaca biʼni tu ni naa» (Mateo 25:34-40).

19. Xiñee maʼ gudixhe íquenu chinándanu Jesús, Xaíque stinu.

19 Dxi biguetaʼ Jesús guibáʼ qué nusaanabe ca discípulo stibe stúbicaʼ (Mateo 28:20). Nánnabe gucané espíritu santu, ca ángel ne Stiidxaʼ Dios laabe para biluiʼbe ca discípulo stibe xi gúnicaʼ biaʼ dxi guyuube lu Guidxilayú. Ne yanna riʼ laaca laacani nga riquiiñebe para gacanebe mozo ni nuu xpiaaniʼ. Grupu ni Zaniruʼ «canananda ca Dendxu huiini [...] ladu tiica cheʼ» (Apocalipsis 14:4). Nga runi, ora rinándanu Grupu ni Zaniruʼ, rinándanu Jesús, Xaíque stinu. Maʼ qué zandaa zuluiʼbe laanu «ra candani nisa» ne zabáninu sin gátinu (Apocalipsis 7:14-17). De lade guiráʼ binni ni naca xaíque guirutiʼ napa poder para gudii stiidxaʼ zudii ca ndiʼ laanu.

^ párrafo 3 Rihuínnica racalaʼdxiʼ Jiobá chuʼ 12 apóstol para gácacaʼ «doce guie» ni cuiné Jerusalén Cubi (Apocalipsis 21:14). Ngue runi cadi caquiiñeʼ diʼ chuʼ tuuxa lugar stiʼ nin tobi de ca apóstol ni bizuubaʼ diidxaʼ que despué de gúticaʼ.

^ párrafo 8 Dede iza 1955, corporación riʼ láʼ ni Watch Tower Bible and Tract Society of Pennsylvania.

^ párrafo 14 Biiyaʼ libru «Testimonio cabal» del Reino de Dios, yaza 58 ne 59.