Biiyaʼ guiraʼ ni nuu lu sitiu riʼ

guyé lu índice

Chupa precursor, George Rollston ne Arthur Willis, cagaacaʼ nisa radiador stiʼ xcárrucaʼ (Ladu guiaʼ stiʼ territorio, 1933).

 CANI NAGUU CHAAHUIʼ XQUIDXI DIOS

«Gastiʼ neza nagana»

«Gastiʼ neza nagana»

MAʼ BIDXAGA Arthur Willis ne Bill Newlands, zeedacaʼ de ti viaje zitu ni bíʼnicaʼ. Chaahuiʼ zeeda gusácabe ti camioneta ndaaniʼ ti neza guizáʼ napa yudé. Bedandácabe guidxi Sidney (Australia), guca ndiʼ 26 de marzo iza 1937. Raca ti iza bireecabe de guidxi riʼ ne guzácabe jma de 19,300 kilómetru neza riaana caadxi región ra gástipeʼ binni ne nabé feu ca neza stiʼ. Cadi explorador ni qué ridxibi ca hombre riʼ. Nácacabe chupa precursor ni biale de ndaaniʼ ladxidóʼ chiné ca diidxaʼ nacubi ne galán stiʼ Reinu stiʼ Dios dede ndaaniʼ guidxi nuu galahuiʼ de Australia.

Ra maʼ ziluxe década stiʼ 1920, grupuhuiiniʼ de ca Binni Ruundaʼ Biblia ni nuu Australia maʼ biʼniʼ predicarcaʼ ca guidxi nuu guriá nisadóʼ ne cani nuu gaxha de raqué. * Peru huaxiéʼ huayaca predicar ca guidxi nuu galahuiʼ de Australia, ti región de puru desiertu ne huaxiéʼ binni, naroʼbaʼ ni jma que galaa guidxi Estados Unidos. Neca zaqué, nanna dxíchicabe cabeza Jesús guni cumplírcabe mandatu de gácacabe testigu stiʼ lu «idubi naca guidxilayú», dede né ndaaniʼ ca guidxi nuu galahuiʼ de Australia (Hechos 1:8). Peru guizáʼ naroʼbaʼ dxiiñaʼ que. Ñee zanda gúnicabe ni la? Ca hermanu que bíʼnicaʼ guiráʼ ni nuu lu nacaʼ, ne gúpacaʼ confianza zaguu Jiobá ndaayaʼ stipa gúnicaʼ.

BIXHELEʼ CA PRECURSOR TI NEZA

Lu iza 1929, chupa chonna congregación ni nuu Queensland ne Australia Occidental biʼniʼ chaahuicaʼ caadxi camioneta ne bidxiibacaʼ guiráʼ ni zaquiiñeʼ para ganda checaʼ ndaaniʼ ca guidxi nuu galahuiʼ de Australia. Gulícabe precursor ni zanda guni huantar ca guendanagana gápacaʼ lu viaje que ne guni chaahuicaʼ ca carru que ora gaca feu cani. Guyé ca hermanu riʼ stale lugar ra qué huayuu dxi gaca predicar.

Chupa chonna precursor ni qué ñanda nizíʼ ti camioneta, gudixhe íquecaʼ checaʼ lu bicicleta. Guzéʼtenu ti ejemplu, lu iza 1932, Bennett Brickell, ti joven ni napa 23 iza, biree de Rockhampton (Queensland) ne yegucheeche diidxaʼ gaayuʼ beeu ca lugar jma zitu ni nuu ladu guiaʼ stiʼ estadu riʼ. Guizáʼ stale cosa guyuáʼ bicicleta stibe casi manta, xhábabe, guendaró ne stale libru. Ne qué nireebe gana ora bidubi ca llanta stibe, sínuque guyebe neca zaqué, gúpabe confianza zacané Jiobá laabe. Gupa xidé bicaanabe bicicleta stibe biaʼ 300 kilómetru de ra chindabe que, gudíʼdibe ca lugar ra guti binni pur qué ñeʼ nisa. Lu treinta iza ni gudiʼdiʼ despué, biquiiñebe bicicleta,  motocicleta ne carru para biʼniʼ viajarbe gayuaa mil kilómetru guidubi Australia. Laabe nga primé binni yené ni dxandíʼ rusiidiʼ Biblia ra nuu ca binni ni naca de Australia ne gucanebe para guca stale congregación. Nabé binibiáʼ binni laabe ne biʼniʼ respetarcaʼ laabe ndaaniʼ guidxi que.

BIDXIILÚCABE CA GUENDANAGANA GÚPACABE

Australia nga tobi de ca guidxi nuu lu Guidxilayú ra huaxiéʼ nabeza binni, ne ca guidxi nuu galahuiʼ de laani nga ra jma gastiʼ binni. Nga runi, cadi caree ca testigu stiʼ Jiobá gana para ganda guidxélacaʼ binni lugar ca.

Chupa precursor, Stuart Keltie ne William Torrington, qué lica nireecaʼ gana. Lu iza 1933, gudíʼdicabe ca loma yú nuu lu desiertu stiʼ Simpson para chindácabe Alice Springs, ti guidxihuiiniʼ ni nuu galahuiʼ guidxi que. Dxi bixiiñeʼ carru stícabe, bisaanacabe ni raqué, hermanu Keltie, ni riquiiñeʼ ti prótesis para sáʼ, biʼniʼ viajar deche camellu. Guleendúcabe ni galán pur ca stipa bíʼnicabe purtiʼ raqué binibiáʼcabe Charles Bernhardt, dueñu stiʼ ti hotel ni nuu William Creek, ti lugar zitu ra nuu ti estación stiʼ tren. Biziidiʼ Charles ni dxandíʼ rusiidiʼ Biblia, bitoo hotel que ne bizulú de precursor. Bicheechebe diidxaʼ quince iza laasibe ca lugar jma nabidxi ne zitu ni nuu Australia.

Cayaca preparar Arthur Willis para guni ti viaje de predicación ndaaniʼ ca guidxi nuu galahuiʼ de Australia (Perth, Australia Occidental, 1936).

Nanna dxíchinu, naquiiñeʼ gaca ca precursor que nadxibalú ne guni huantarcaʼ para ganda gudxiilucaʼ guendanagana ni cadxagalucaʼ. Casi Arthur Willis ne Bill Newlands, ni bizéʼtenu nagasi que, biʼniʼ viajarcaʼ chupa semana para yendacaʼ ndaaniʼ ca guidxi nuu galahuiʼ de Australia, biaʼsi guzácabe biaʼ 30 kilómetru, purtiʼ guizáʼ nadipaʼ riaba nisaguié raqué ne runi ni desiertu que casi ti nisadóʼ de beñe. Guyuu biaje gupa xidé bizunísacabe ra bicaanácabe camioneta stícabe lu ca loma yú que lu gubidxa ndaʼ, o tiidicabe ca valle ra nuu stale guié o ndaaniʼ guiiguʼ ni qué gapa nisa ne nuu puru yuxi. Ora rixiiñeʼ camioneta stícabe, ti cosa ni raca gatigá, riécabe a pie o lu bicicleta ndaaniʼ guidxihuiiniʼ ni nuu jma gaxha para chigucaabicabe ca pieza ni caquiiñecabe. Zándaca guindaa viaje riʼ chupa chonna gubidxa, ne ora maʼ nuucabe raqué, naquiiñeʼ cuézacabe chupa chonna semana dede ora guedandá cani. Neca gudíʼdicabe guiráʼ ngue, guyuucabe nayecheʼ. Guininu caadxi de ni zeeda lu revista The Golden Age (yanna riʼ lani ¡Despertad!), Arthur Willis guníʼ: «Gastiʼ neza nagana para ca Testigu stibe».

Charles Harris, ti hermanu ni guca precursor stale iza, bisiene neca guyuu stubi ne bidxaagalú stale cosa nagana lu desiertu stiʼ Australia la? gucané cani laa para chuʼ jma gaxha de Jiobá. Laabe guniʼbe: «Jma galán runi viajar binni ora ziné huaxiéʼ cosa. Pa guná Jesús gusi ra napampa ora biquiiñeʼ guni ni, laanu laaca naquiiñeʼ chuʼnu nayecheʼ ora gúninu zaqueca pa caquiiñeʼ gúninu ni lu asignación stinu». Ne nga nga ni biʼniʼ stale precursor. Cumu qué nireecabe gana la? gunda yendá ca diidxaʼ nacubi ne galán riʼ ca lugar jma zitu de Australia ne stale binni de guidxi ca beeda gácacaʼ xpinni Reinu stiʼ Dios.

^ párrafo 4 Ca Binni Ruundaʼ Biblia biree lacaʼ testigu stiʼ Jiobá lu iza 1931 (Isaías 43:10).