Biiyaʼ guiraʼ ni nuu lu sitiu riʼ

guyé lu índice

Dxandíʼ zaca cani maʼ gudixhe ique Dios guni

Dxandíʼ zaca cani maʼ gudixhe ique Dios guni

«Maʼ guniéʼ ni ne zuneʼ ni. Maʼ guníʼ iqueʼ ni ne laaca zuneʼ ni» (ISAÍAS 46:11).

DIIDXAʼ RIUUNDAʼ: 147 NE 149

1, 2. a) Xi maʼ bisiene Jiobá laanu. b) Xi maʼ bidii stiidxaʼ Jiobá laanu lu Isaías 46:10, 11 ne 55:11.

CADI nagana diʼ ca diidxaʼ ni cá ra ruzulú Biblia, peru risaca cani stale. Nani sicaríʼ: «Primé bizáʼ Dios guibáʼ ne guidxilayú» (Génesis 1:1). Stale cosa nga bizáʼ Dios lu universu, peru caadxi si de laacani runibiáʼ binni. Huaxieʼruʼ nánnanu de cani nuu lu espaciu, biaaniʼ ne gravedad (Eclesiastés 3:11). Peru maʼ bisiene Jiobá laanu xi naguixhe ique guni né Guidxilayú ne xi racalaʼdxiʼ para binni. Cásipeʼ laabe nga bizaʼbe binni ne gucaláʼdxibe nibánicaʼ nayecheʼ lu Guidxilayú (Génesis 1:26). Ñaca binni xiiñibe ne laabe ñácabe Bixhózecaʼ.

2 Lu capítulo 3 stiʼ Génesis ridúʼndanu guyuu ti guendanagana ni bicueeza de ñaca cumplir cani maca gudixhe ique Dios guni (Génesis 3:1-7). Peru zanda guni chaahuiʼ Jiobá intiica guendanagana. Guirutiʼ zanda gucueeza laabe para gúnibe ni racaláʼdxibe (Isaías 46:10, 11; 55:11). Zanda chuʼnu seguru zaca cumplir cani maca gudixhe ique Jiobá guni dxiqué órapeʼ maʼ caquiiñeʼ gaca cani.

3. a) Xi ca cosa risaca nga maʼ bizíʼdinu ni racané laanu guiénenu cani rusiidiʼ Biblia. b) Xiñee chigusiénenu cani yanna. c) Xi pregunta chigusiénenu.

3 Nanna dxíchinu xi naguixhe ique Dios guni né Guidxilayú ne xi racalaʼdxiʼ para binni. Laaca nánnanu ximodo racané Jesús  para ganda gaca cani maʼ gudixhe ique Dios guni. Laacani nga ca cosa ni jma risaca rusiidiʼ Biblia. Ne dxi bizulú biʼndanécabe laanu de Stiidxaʼ Dios laacani nga bizíʼdinu primé. Cadi dxandíʼ racaláʼdxinu gacanenu xcaadxi binni ganna cani la? Ca dxi riʼ nápanu oportunidad para gúninu ni purtiʼ cayuni invitarnu binni cheʼ dxi chiguietenaláʼdxinu guendaguti stiʼ Cristu (Lucas 22:19, 20). Pa chuʼnécabe laanu dxi risaca riʼ la? zaziidirúcabe de ca cosa sicarú ni naguixhe ique Dios guni. Nga runi, yanna nga naquiiñeʼ guiníʼ íquenu xi pregunta gúninu binni para chuuláʼdxicaʼ checaʼ. Tema riʼ zusiene chonna pregunta: Xi gudixhe ique Dios guni né Guidxilayú ne xi gucalaʼdxiʼ para binni. Xi qué ñaca jneza. Ne, xiñee caquiiñeʼ sacrificiu stiʼ Jesús para gaca cumplir ni gudixhe ique Dios guni.

XI GUDIXHE IQUE DIOS GUNI

4. Xiñee ná Biblia caníʼ guiráʼ ni bizáʼ Dios «pabiáʼ nandxóʼ».

4 Jiobá nga ni jma nanna guzáʼ guiráʼ xixé cosa. Guiráʼ ni huayúnibe biáʼsipeʼ cani (Génesis 1:31; Jeremías 10:12). Xi rizíʼdinu ora ridúʼyanu pabiáʼ sicarú cani bizáʼ Dios ne modo nexhechaahuiʼ cani yaʼ. Ribeendunu ni galán lu guiráʼ ni bizáʼ Jiobá, dede lu ca cosa jma nahuiiniʼ hasta cani jma naroʼbaʼ. Cadi dxandíʼ ridxagayaanu ora guiníʼ íquenu modo runi ca célula stiʼ binni dxiiñaʼ, ora guidúʼyanu ti baʼduhuiiniʼ ni deruʼ gule, o guidúʼyanu pabiáʼ sicarú rihuinni ora maʼ ziyaaziʼ Gubidxa la? Laanu, ca binni guidxilayú zanda guidxagayaanu ca cosa galán ni bizáʼ Jiobá purtiʼ bidiibe laanu capacidad ca. Biblia ná: «Guibáʼ caníʼ pabiáʼ nandxóʼ Dios; ne de guiráʼ ni bizaʼbe né nabe guibáʼ caníʼ de laacani. Pabiáʼ stale nga cani maʼ bíʼniluʼ Jiobá. Ne guendabiaaniʼ nga bíʼniluʼ de guirani. Guidxilayú riʼ dxaʼ de guiráʼ ni bizaʼluʼ» (Salmo 19:1 ne 104:24).

5. Xi biʼniʼ Jiobá para ganda guni guiráʼ ni bizaʼbe dxiiñaʼ jneza ne tobi si.

5 Né stale cuidadu gudixhe Jiobá límite stiʼ guiráʼ xixé cosa ni bizáʼ. Gudíxhebe ley stiʼ naturaleza ne gudíxhebe ley ni gacané binni ganna ximodo guibani, ti ganda guni guiráʼ ni nuu lu universu dxiiñaʼ jneza ne tobi si (Salmo 19:7-9) Guiráʼ xixé cosa nuu lu universu gudixhe Jiobá chuʼ ti lugar para laacani ne ximodo guni cani dxiiñaʼ. Casi ley stiʼ gravedad la? runi controlar ni ca oceáno ne ca marea ni riasa lu nisadóʼ, ne racané ni para cadi guixeleʼ atmósfera de Guidxilayú. Pa ñaca qué ñuu gravedad la? qué nibani binni lu Guidxilayú. Guiráʼ ni nuu lu universu ca jneza modo runi cani dxiiñaʼ purtiʼ gudixhe Jiobá límite stiʼ cani. Ndiʼ rusihuinni maca nuu xi para bizáʼ Jiobá Guidxilayú ne binni. Ora guni predicarnu zanda gacanenu binni gunibiáʼ ni Bizáʼ universu sicarú riʼ (Apocalipsis 4:11).

6, 7. Gunáʼ nga caadxi cosa bisigaʼdeʼ Jiobá Adán ne Eva.

6 Gudixhe ique Jiobá nibani binni lu Guidxilayú sin ñati (Génesis 1:28; Salmo 37:29). Cumu riuuláʼdxibe gudiibe de ni nápabe la? bisigáʼdebe stale cosa risaca Adán ne Eva (biindaʼ Santiago 1:17). Bidiibe binni libertad para cuí xi guni ne capacidad para guiníʼ ique, gannaxhii ne gapa xhamigu. Guniʼné Jiobá Adán ne bisiénebe laa ximodo guni ni jneza. Laaca bisiidibe laa ximodo gapaʼ laa ne ximodo guni dxiiñaʼ layú ne gapaʼ ca maniʼ (Génesis 2:15-17, 19, 20). Bidii Jiobá capacidad Adán ne Eva para cánacaʼ, gúʼyacaʼ, chuuláʼdxicaʼ, gunadiágacaʼ ne chuʼ xiicaʼ guiráʼ cosa galán bizaʼbe para laacaʼ. Ti ganda guibánicaʼ nayecheʼ lugar sicarú bidiibe laacaʼ para cuézacaʼ. Laaca bidii Jiobá laacabe gúnicabe dxiiñaʼ ni ziuuláʼdxicabe. Qué ziuu dxi gusaana de guiziidicabe ne de gunibiáʼcabe xcaadxi cosa nacubi para laacabe.

 7 Xiruʼ gudixhe ique Dios ñaca. Bidii Jiobá capacidad Adán ne Eva para gápacaʼ xiiñicaʼ ni qué gapa donda. Ne ca xiiñicabe laaca ñápacaʼ xiiñicaʼ. Ne zaqué nga nidxá Guidxilayú riʼ de binni. Ni gucalaʼdxiʼ Dios nga ñannaxhii binni xiiñiʼ cásica gunnaxhiibe Adán ne Eva, ca primé xiiñibe gúpabe lu Guidxilayú. Bizáʼ Dios familia ne bisigáʼdebe laacaʼ Guidxilayú riʼ ne ca cosa galán ne risaca ni nuu luni. Ne raríʼ nga nibézacaʼ biaʼ dxi nibánicaʼ (Salmo 115:16).

XI QUÉ ÑACA JNEZA

8. Xiñee bidii Jiobá Adán ne Eva ley ni zeeda lu Génesis 2:16, 17.

8 Qué niree diʼ ca cosa que modo guleza Jiobá ñaca cani dxiqué. Xi bizaaca yaʼ. Guidúʼyanu. Jiobá bidii ti ley ni cadi nagana Adán ne Eva para ñánnacaʼ pabiaʼtiʼ libre laacaʼ. Dios guníʼ: «Zanda goloʼ cuananaxhi stiʼ guiráʼ yaga ni nuu ndaaniʼ jardín riʼ dede guidxá ndaaniluʼ. Peru cuananaxhi stiʼ yaga stiʼ guendananna ni jneza ne ni cadi jneza, cadi naquiiñeʼ goloʼ ni, purtiʼ dxi goloʼ ni, dxandipeʼ zátiluʼ» (Génesis 2:16, 17). Cadi nagana para ñénecabe ley riʼ. Laaca cadi nagana ñúnicabe ni nani purtiʼ nuuruʼ stale cuananaxhi nanixe ni ñanda ñócabe.

9, 10. a) Xi guníʼ Binidxabaʼ de Jiobá. b) Xi gudixhe ique Adán ne Eva gúnicaʼ. (Biiyaʼ dibuju ni zeeda ra ruzulú tema riʼ).

9 Biquiiñeʼ Binidxabaʼ ti beendaʼ para quiteʼ Eva ti gucheené Jiobá, Bixhoze. Biblia ná: «Guca beendaʼ que maniʼ ni jma nexhená lade guiráʼ maniʼ guiʼxhiʼ bizáʼ Jiobá Dios. Ngue runi, gúdxime gunaa que: “Ñee dxandíʼ gudxi Dios laatu cadi naquiiñeʼ goto cuananaxhi stiʼ guiráʼ yaga nuu ndaaniʼ jardín riʼ la?”. Óraque na gunaa que rabi beendaʼ que: “Zanda guidoʼdo cuananaxhi stiʼ ca yaga nuu ndaaniʼ jardín riʼ. Peru cuananaxhi stiʼ yaga zuhuaa galahuiʼ jardín ca la? maʼ guníʼ Dios: «Cadi naquiiñeʼ goto cuananaxhi stini, coʼ, cadi cánatu ni ti cadi gátitu»”. Beendaʼ que bicabi gunaa que: “Dxandipeʼ qué zátitu. Purtiʼ nanna Dios zaxeleʼ lutu dxi goto cuananaxhi stini ne zácatu casi Dios ne zánnatu xii nga jneza ne ni cadi jneza”» (Génesis 3:1-5; Apocalipsis 12:9). Biyúbibe modo guihuinni malu Dios purtiʼ cadi cudii lugar gó ca xiiñiʼ ni nuu lu Guidxilayú guiráʼ «cuananaxhi stiʼ ca yaga nuu ndaaniʼ jardín». Casi ora niniʼbe «Ximodo ndiʼ qué zanda gúnitu ni racaláʼdxitu». De raqué bisiguiibe Eva ora gúdxibe laa: «Dxandipeʼ qué zátitu». Despué gucaláʼdxibe nucaabe laa niníʼ ique cadi caquiiñeʼ guzuubaʼ stiidxaʼ Dios. Gúdxibe laa: «Purtiʼ nanna Dios zaxeleʼ lutu dxi goto cuananaxhi stini». Ne ca diidxaʼ riʼ, guníʼ Binidxabaʼ qué náʼ Jiobá gó Adán ne Eva cuananaxhi que purtiʼ pa gúnicabe ni, zánnacabe xiixa nabé risaca. Ne últimu la? bisiguii Binidxabaʼ ora guníʼ: «Zácatu casi Dios ne zánnatu xii nga jneza ne ni cadi jneza».

10 Adán ne Eva naquiiñeʼ cuicaʼ pa zuzuubacaʼ stiidxaʼ Dios o pa zúnicaʼ ni ná beendaʼ que. Triste guininu ni, peru qué ninácabe nuzuubacabe stiidxaʼ Dios. Bidxiidéchecabe Jiobá ne maʼ qué ninácabe ñácaruʼ Bixhózecabe. Ra bíʼnicabe ndiʼ la? guyuucabe pur Binidxabaʼ. Dede dxiqué, biaanacabe stúbicabe ne maʼ qué ñáparuʼ Jiobá laacabe (Génesis 3:6-13).

11. Xiñee qué zanda gutiidiʼ Jiobá ra bichee Adán ne Eva que zacasi.

11 Dxi maʼ qué nuzuubaʼ Adán ne Eva stiidxaʼ Dios, maʼ qué ñácacabe perfectu. Beeda gácacabe enemigu stiʼ Dios, purtiʼ laa nanalaʼdxi cosa malu. Biblia ná nabé nayá bizalú Dios para guyadxí cosa malu (Habacuc 1:13). Pa ñaca zacasi nutiidiʼ Jiobá ra bichee Adán ne Eva, maʼ qué ñanda diʼ ñuu guiráʼ ni bizaʼbe galán. Cásica ca ángel ne zaqueca binni ninabadiidxacaʼ pa ñanda ñápacaʼ confianza zaca cani riniʼbe. Peru qué rucheené Jiobá ca ley stiʼ, runi respetarbe cani  (Salmo 119:142). Neca napa Adán ne Eva libertad para cuicaʼ xi gúnicaʼ, napa xidé gudxiilucaʼ cani gueeda luguiacaʼ pur bicaalucaʼ Jiobá. Despué gúticabe ne bibiguetaʼ gúcacabe yú ni guyaʼnécabe (Génesis 3:19).

12. Xi guca né ca xiiñiʼ Adán.

12 Ora gudó Adán ne Eva cuananaxhi que, maʼ qué nudii Jiobá lugar ñácacabe de familia stiʼ. Ngue runi gulee laacabe ndaaniʼ jardín ni guyuu Edén ne maʼ qué niná nibiguétacabe raqué (Génesis 3:23, 24). Bidii Jiobá lugar gudxiilúcabe cani gueeda luguiácabe pur ni gudixhe íquecabe gúnicabe. Biblia ná: «Laabe nga Guié, ca dxiiñaʼ stibe biaʼsi cani, purtiʼ guiráʼ neza stibe jneza cani. Dios ni runi ni riníʼ, ne qué runi ni malu; Dios ni runi ni jneza ne qué ruchee. Laacabe rúnicabe ni qué iquiiñeʼ; cadi xiiñidibe laacaʼ; ca cosa ni cadi jneza ca zeeda cani de laacaʼ. ¡Ti generación de binni qué iquiiñeʼ!» (Deuteronomio 32:4, 5). Pur ni bíʼnicabe que maʼ qué ñanda nusihuínnicabe ca cualidad stiʼ Jiobá cásipeʼ laacani. Binitilú Adán modo sicarú naguixhe Jiobá nibánicaʼ ne zaqueca ca xiiñicaʼ. Ni bisaananésibe laacaʼ nga donda, guendaruchee ne guendaguti (Romanos 5:12). Pur ni biʼniʼ Adán que maʼ qué ñanda nibani ca xiiñibe sin ñáticaʼ. Maʼ qué ñanda ñapa Adán ne Eva xiiñicaʼ sin donda, ninca ca xiiñicabe. Dede dxi bicaa Binidxabaʼ Adán ne Eva gucaalucaʼ Dios, qué huayanadxibe de gucaabe guiráʼ binni gúninu zaqueca (Juan 8:44).

ZANDA GÁCANU XHAMIGU DIOS PUR SACRIFICIU STIʼ JESÚS

13. Xii nga ni racaláʼdxiruʼ Jiobá para binni.

13 Neca bisaana Adán ne Eva Jiobá, laabe nadxiirube guiráʼ binni. Racaláʼdxiruʼ Dios gaca xhamigu binni ne qué racaláʼdxibe gatiʼ nin tobi de laacaʼ (2 Pedro 3:9). Nga runi nagueendaca bíʼnibe ni caquiiñeʼ para ganda gaca xhamigu binni laabe sti biaje. Ximodo gunda bíʼnibe ni sin nucheenebe ca ley stibe yaʼ. Guidúʼyanu.

14. a) Casi ná Juan 3:16, xi biʼniʼ Dios para gulá laanu de guendaruchee ne guendaguti. b) Xi pregunta zanda gusiénenu binni.

14 (Biindaʼ Juan 3:16). Zándaca lade ca binni ni guni invitarnu Conmemoración nuu tu nanna versículo riʼ de memoria. Peru, ñee nanna ca binni ca xiñee zanda gudii sacrificiu stiʼ Cristu laanu ti guendanabani ni qué zaluxe la? Zanda gacanenu ca binni ca para gánnacaʼ respuesta stiʼ pregunta riʼ. Pora yaʼ. Ora guni invitarnu laacabe Conmemoración, ora maʼ cayaca ni ne ora chigánnanu laacabe sti biaje tiidiʼ si ni. Pa guiene chaahuicabe xipeʼ nga riníʼ sacrificiu stiʼ Cristu la? ziénecabe pabiáʼ nadxii Jiobá laanu ne pabiáʼ nuu xpiaanibe. Xi zanda gusíʼdinu laacabe de sacrificiu stiʼ Jesús yaʼ.

15. Xiñee gadxé guca Jesús de Adán.

15 Bidii Jiobá guendanabani stiʼ ti hombre sin donda para gulá laanu. Hombre sin donda riʼ cadi naquiiñeʼ gusaanabe Jiobá ne chuʼbe dispuestu gudiibe xquendanabánibe pur binni guidxilayú (Romanos 5:17-19). Para gaca nga la? gulí Jiobá Jesús, ni bizaʼbe primé. Bitiidibe xquendanabani xiiñibe lu Guidxilayú riʼ (Juan 1:14). Zacá nga beeda gaca Jesús ti hombre sin donda, cásica guca Adán. Peru gadxé guca Jesús de Adán. Xiñee yaʼ. Purtiʼ laabe bíʼnibe ni ná ca ley ni racalaʼdxiʼ Dios guni ti hombre sin donda. Neca gudiʼdiʼ Jesús lu ca prueba jma nagana, qué nusaanabe de ñúnibe ni ná ca ley stiʼ Dios.

16. Xiñee ti regalu nabé risaca nga sacrificiu stiʼ Jesús.

16 Ra bidii Jesús guendanabani sin donda stiʼ pur binni, gunda bilabe laanu de guendaruchee ne guendaguti. Laabe gúcabe casi naquiiñeʼ ñaca Adán. Gúcabe ti hombre sin donda ni qué nusaana Dios ne  bizuubabe stiidxaʼ (1 Timoteo 2:6). Guiráʼ binni, hombre, gunaa ne xcuidi nápanu oportunidad de guibáninu sin gátinu pur sacrificiu stiʼ Jesús (Mateo 20:28). Casi maʼ bidúʼyanu, nabé riquiiñeʼ sacrificiu stiʼ Jesús para gaca ni gudixhe ique Dios (2 Corintios 1:19, 20).

CUDII JIOBÁ LUGAR GUIBIGUETAʼ GÁCANU FAMILIA STIʼ

17. Xi guiráʼ zaca pur sacrificiu stiʼ Jesús.

17 Nabé naroʼbaʼ gudixe Jiobá para gulá laanu (1 Pedro 1:19). Laabe rusisácabe laanu stale dede guyuube dispuestu gudiibe lugar gueeda Xiiñibe ni jma nadxiibe para gatiʼ pur laanu (1 Juan 4:9, 10). Casi ñaca nicaa Jesús lugar stiʼ Adán ne maʼ laa beeda gaca bixhózenu (1 Corintios 15:45). Cadi guendanabani ni qué zaluxe si nga zanda guicaanu pur sacrificiu stiʼ Jesús, sínuque laaca zanda guibiguetaʼ gácanu de familia stiʼ Dios despué. Pur sacrificiu stibe zácanu binni sin donda, ne zacaa Jiobá laanu sti biaje ndaaniʼ familia stiʼ sin gucheené ca ley stiʼ. Guxuíʼlunu pabiáʼ galán ora gaca guiráʼ binni ni qué nusaana Dios sin donda. Dxicaruʼ nga ziuu guiráʼ ni nuu guibáʼ ne lu Guidxilayú tobi si casi ti familia. Guiranu zácanu xiiñiʼ Dios (Romanos 8:21).

18. Padxí nga gaca Jiobá «xaíque sti irá ni».

18 Neca bidxiideche primé bixhózenu ne jñaanu Jiobá, laabe qué nusaanabe de ñannaxhiibe binni. Nga runi bidiibe xquendanabani Xiiñibe para gulabe laanu. Neca gulenenu donda, qué zanda diʼ gucaa Binidxabaʼ laanu gusaananu Jiobá. Pur sacrificiu stiʼ Jesús zacané Jiobá laanu para gácanu binni runi ni jneza. Guizáʼ sicarú dxi guicaa guiráʼ ni guni cré ne gapa fe Jesús guendanabani ni qué zaluxe (Juan 6:40). Jiobá, Bixhózenu ni nadxii laanu ne ni nuu xpiaaniʼ, zuni guiráʼ ni maʼ gudixhe ique ne zacanebe binni gácacaʼ sin donda. Oracaruʼ zácabe «xaíque sti irá ni» (1 Corintios 15:28).

19. a) Xi zúninu pa dxandíʼ rudiʼnu xquíxepeʼ pur sacrificiu stiʼ Jesús. (Biiyaʼ cuadru ni láʼ « Cadi gusaana de guyúbinu cani riuulaʼdxiʼ guiziidiʼ de stiidxaʼ Dios»). b) Xi chiguizíʼdinu lu sti tema ca.

19 Para gusihuínninu rudiʼnu xquíxepeʼ pur sacrificiu stiʼ Jesús, naquiiñeʼ güínenu xcaadxi binni de regalu nabé risaca riʼ. Caquiiñeʼ ganna binni né stale guendarannaxhii cudii Jiobá ti guendanabani ni qué zaluxe laacaʼ pur sacrificiu stiʼ Jesús. Peru cadi para guibánisinu sin gátinu nga racané ni laanu. Laaca racané ni ganna binni cadi dxandíʼ guiráʼ ni guníʼ Binidxabaʼ de Jiobá ndaaniʼ jardín ni guyuu Edén. Lu sti tema ca zadúʼyanu ximodo racané sacrificiu stiʼ Jesús para ganda guiene binni cani.