Biiyaʼ guiraʼ ni nuu lu sitiu riʼ

guyé lu índice

Gusisácanu libertad bidii Dios laanu para cuinu xi gúninu

Gusisácanu libertad bidii Dios laanu para cuinu xi gúninu

«Ra ma nuu Espíritu [stiʼ Jiobá] la? ma cadi cá cabe yaga lu ná ley» (2 CORINTIOS 3:17).

DIIDXAʼ RIUUNDAʼ: 31 NE 32

1, 2. a) Xi riníʼ caadxi binni de libertad ni nápanu para cuinu xi gúninu. b) Xi rusiidiʼ Biblia de libertad ni nápanu para cuinu xi gúninu. c) Xi zacábinu lu tema riʼ.

TI GUNAA ni caquiiñeʼ ganna xi guni gúdxibe ti xhamígube: «Maʼ cadi gucaaluʼ naa guiníʼ iqueʼ, gudxi si naa xi naquiiñeʼ guneʼ. Nga jma nagueenda». Laabe jma guyuuláʼdxibe gábicabe laabe xi gúnibe lugar de niquiiñebe libertad ni nápabe para cuibe xi gúnibe, ni zeeda gaca ti regalu risaca bidii Dios laanu. Yanna laanu yaʼ. Ñee riuuláʼdxinu laasinu guyúbinu ni gúninu la? o ruyúbinu gabi xcaadxi binni laanu xi gúninu. Xi riníʼ íquenu ora gánnanu libre binni cuí xi guni.

2 Gadxé gadxé modo ruuyaʼ binni libertad ni nápanu para cuinu xi gúninu. Nuu binni ná gastiʼ diʼ libertad ca, purtiʼ Dios maʼ gudixhe xi gúninu. Xcaadxi ná para ganda quixhe ique binni guni ni gacalaʼdxiʼ la? guirutiʼ cadi naquiiñeʼ gabi laa xi guni. Peru Biblia rusiidiʼ ora bizáʼ Jiobá laanu bidiibe laanu capacidad ne libertad para quixhe íquenu gúninu ni jneza. Biblia ná: «Yanna, pa cadi jneza para laatu gúnitu ni na Jiobá la? lacuí yannadxí tu racaláʼdxitu gúnitu ni na, pa zúnitu ni na ca dios casi biʼniʼ ca bixhozególatu dxi nuurucaʼ chericaʼ Guiiguʼ ca la? o ni na ca dios stiʼ ca amorreu ra nabézatu yanna.  Peru naa ne binnilidxeʼ la? zúnidu ni na Jiobá» (Josué 24:15). Ne Biblia ricabi ca guendarinabadiidxaʼ riʼ: Ñee maca nuu pabiáʼ nga zanda iquiiñenu libertad ni nápanu para cuinu xi gúninu la? Ximodo nga iquiiñenu libertad ni nápanu para cuinu xi gúninu yaʼ. Ximodo rusihuinni cani riguixhe íquenu gúninu dxandíʼ nadxiinu Jiobá. Ximodo rusihuínninu runi respetarnu ni quixhe ique xcaadxi binni guni. Zacábinu ca guendarinabadiidxaʼ riʼ lu tema riʼ.

XI RIZÍʼDINU DE JIOBÁ NE DE JESÚS

3. Ximodo riquiiñeʼ Jiobá libertad ni napa para guni guiráʼ cosa.

3 Jiobá si nga napa libertad para guni guiráʼ cosa, peru zanda guizíʼdinu stale pur modo riquiiñebe ni. Guzéʼtenu ti ejemplu, biquiiñeʼ Jiobá libertad stiʼ para gulí guidxi Israel ne zaqué gaca «ti guidxi ni jma risaca» para laa (Deuteronomio 7:6-8). Gulibe guidxi riʼ purtiʼ racaláʼdxibe gúnibe ni bidii stiidxabe Abrahán, xhamígube (Génesis 22:15-18). Ne cada biaje iquiiñeʼ Jiobá libertad stiʼ la? rusihuinni guendarannaxhii ne runi ni jneza. Ne bihuinni zacá ni dxi guluu jnézabe ca israelita ni qué nuzuubaʼ stiidxabe. Ora raca arrepentírcabe de guidubi ladxidóʼcabe pur cani maʼ bíʼnicabe, rusihuinni Jiobá nadxii laacabe ne riá laacabe. Laabe guniʼbe: «Zusiandaʼ laacabe ne maʼ qué ziuuruʼ dxi gusaanacabe naa. Zannaxhieeʼ laacabe purtiʼ racalaʼdxeʼ» (Oseas 14:4). Casi maʼ bidúʼyanu ca, riquiiñeʼ Jiobá libertad stiʼ para gacané xcaadxi binni. ¡Nabé galán ejemplu ca para laanu!

4, 5. a) Tuu nga primé gucuaa libertad para cuí xi guni, ne ximodo biquiiñebe ni. b) Xi guendarinabadiidxaʼ naquiiñeʼ gúninu.

4 Gudixhe ique Jiobá guzáʼ ca ángel ne binni guidxilayú né gápacaʼ libertad de cuicaʼ xi gúnicaʼ. Jesús nga bizáʼ Dios primé ne bizaʼbe laa casi laabe. Laa nga primé ni gucuaa libertad para cuí xi guni, ni zeeda gaca casi ti regalu ni bidii Dios (Colosenses 1:15). Ximodo biquiiñeʼ Jesús libertad stiʼ yaʼ. Ante gueedabe lu Guidxilayú, gudixhe íquebe cadi gusaanabe Dios ne cadi gúnibe ni ná Binidxabaʼ ne gucaalube Dios casi biʼniʼ. Ne ora guyuube lu Guidxilayú gudixhe íquebe gucaanabe cani biquiinde Binidxabaʼ laabe ñúnibe (Mateo 4:10). Ne gueelaʼ ante gátibe, biʼniʼ orarbe Bixhózebe ne gúdxibe laa racaláʼdxibe gúnibe ni ná. Gúdxibe laa: «Bixhozeʼ, pa racalaʼdxu la? bilá naa de enda naná ni cabeza naa riʼ. Peru cadi gaca ni rabeʼ, sínuque ni na luʼ» (Lucas 22:42). Laanu ca binni guidxilayú, ñee zanda gúninu cásica biʼniʼ Jesús ne iquiiñenu libertad ni nápanu para cuinu xi gúninu ti gusisácanu Jiobá ne gúninu ni ná la?

5 Zanda gúninu cásica biʼniʼ Jesús purtiʼ laanu laaca guyanu casi Dios (Génesis 1:26). Peru laanu qué gápanu libertad para gúninu guiráʼ cosa. Biblia ná maʼ gudíxhebe pabiaʼtiʼ nga zanda gácanu libre ne ribézabe guni respetarnu ni. Casi ca gunaa ni napa xheelaʼ la? naquiiñeʼ guni respetarcaʼ autoridad stiʼ xheelacaʼ, ne ca xiiñicabe naquiiñeʼ guzuubacaʼ stiidxacabe (Efesios 5:22; 6:1). Nga runi, guiranu naquiiñeʼ guinabadiidxanu: «Ñee runeʼ respetar biaʼ libertad bidii Dios naa la?». Pur modo guicábinu guendarinabadiidxaʼ riʼ zusihuínninu pa riuuláʼdxinu guibáninu sin gátinu despué.

ORA RIQUIIÑENU LIBERTAD STINU JNEZA NE ORA QUÉ RIQUIIÑENU NI JNEZA

6. Xiñee risaca nga gata pabiáʼ si zanda iquiiñenu libertad stinu, bisiene ni né ti ejemplu.

6 Yanna, ñee zanda guininu dxandíʼ libre laanu pa maca nexheʼ pabiáʼ si zanda iquiiñenu libertad stinu la? Zanda pue. Xiñee yaʼ. Purtiʼ ora gúninu biaʼ nexheʼ gúninu la? rapa ni laanu. Guidúʼyanu ejemplu riʼ. Guiníʼ íquenu ziuunu de viaje lu carretera para chuunu ti guidxi zitu peru raqué gastiʼ nin ti ley de tránsitu. Ladu tiisi rié binni lu carretera que ne biaʼ gapa binni gana rusá xcarru luni. Ñee zuni viajarnu sin guidxíbinu lu carretera  que la? Coʼ njaʼ. Ejemplu riʼ rusihuinni caquiiñeʼ gata pabiáʼ iquiiñenu libertad stinu para guni sentirnu libre laanu. Guidúʼyanu caadxi ejemplu ni zeeda lu Biblia ni rusihuinni ribáninu galán ora runi respetarnu cani maʼ gudixhe Jiobá gúninu.

7. a) Bizeeteʼ xi rusihuinni maʼ gadxé Adán de ca maniʼ. b) Ximodo biquiiñeʼ Adán libertad stiʼ jneza.

7 Primé binni ni bizáʼ Jiobá nga Adán. Jiobá bidii laabe libertad para cuibe xi gúnibe, cásica bidiibe ni ca ángel. Peru ca maniʼ qué nudiibe laacaʼ libertad ca. Ximodo biquiiñeʼ Adán libertad stiʼ jneza yaʼ. Gunabe gucuaabe dxiiñaʼ sicarú para quíxhebe lá ca maniʼ que. Biblia ná bidii Dios ca maniʼ que Adán para guʼyaʼ chaahuiʼ laacame ne gudii ti lá biáʼsipeʼ para laacame. Ne qué nuchaa Jiobá nin ti lá ni gulí Adán para laacame. Lugar de nga, biʼniʼ respetarbe ni gudixhe Adán (Génesis 2:19).

8. Ximodo bisihuinni Adán qué niquiiñeʼ libertad stiʼ jneza pur ni gudixhe ique guni, ne xi bizaaca pur ni bíʼnibe.

8 Bidii Jiobá ti dxiiñaʼ Adán, guni Guidxilayú riʼ ti paraísu. Dios guníʼ: «Lagapa xiiñitu ne lagaca stale, laguchá guidxilayú riʼ ne laguni dxiiñaʼ luni, ne lagapa ca benda nuu ndaaniʼ nisadóʼ ne ca maniʼ ripapa guibáʼ ne guiráʼ maniʼ nuu lu guidxilayú» (Génesis 1:28). Peru Adán qué ñuni respetar biaʼ libertad bidii Jiobá laa. Ngue runi, gudobe cuananaxhi ni gudxi Dios laabe cadi gobe. Cumu cadi jneza biquiiñebe libertad stibe pur ni gudixhe íquebe gúnibe la? maʼ raca mil iza de cayacaná binni guidxilayú (Romanos 5:12). Cadi guiaandaʼ laanu pabiáʼ feu cani bizaaca Adán pur ni gudixhe ique guni. Nga zacané laanu iquiiñenu libertad stinu jneza ne guni respetarnu biaʼ maʼ gudixhe Jiobá gúninu.

9. Xi bidii Jiobá lugar guni ca israelita, ne xi bidii stiidxacaʼ.

9 Bisaanané Adán ne Eva guiráʼ binni guidxilayú guendaruchee ne guendaguti. Peru náparunu derechu cuinu xi gúninu. Ne rihuinni ni pur modo biʼniʼ tratar Jiobá guidxi Israel. Bidii Jiobá lugar ca israelita que guiniʼcaʼ pa racaláʼdxicaʼ gácacaʼ guidxi ni jma risaca stibe o pa coʼ (Éxodo 19:3-6). Laacabe gunácabe gácacabe xquidxi Dios ne guni respetárcabe biaʼ nexheʼ gúnicabe. Bidii stiidxacabe Dios: «Guiráʼ ni maʼ guníʼ Jiobá, zúnidu cani» (Éxodo 19:8). Peru despué maʼ qué ñúnicabe ni bidii stiidxacabe. Ejemplu stícabe rusiidiʼ laanu ti cosa nabé risaca. Xi laani yaʼ. Cadi gusaana de gusisácanu libertad ni nápanu para cuinu xi gúninu, chuʼnu gaxha de Jiobá ne guzúʼbanu stiidxaʼ (1 Corintios 10:11).

10. Xi ejemplu zeeda lu capítulo 11 stiʼ Hebreos rusihuinni zanda iquiiñeʼ ca binni ruchee libertad ni nápacaʼ para cuicaʼ xi gúnicaʼ ti gusisácacaʼ Jiobá. (Biiyaʼ dibuju ni zeeda ra ruzulú tema riʼ).

10 Lu capítulo 11 ni zeeda lu carta stiʼ Hebreos rieeteʼ lá 16 hombre ne gunaa ni bizuubaʼ diidxaʼ ne biʼniʼ respetarcaʼ biaʼ gudixhe Jiobá gúnicaʼ. Gucuaacabe stale ndaayaʼ ne ti esperanza sicarú para ca dxi ni gueedaruʼ, purtiʼ gudixhe íquecabe gúnicabe ni jneza. Casi Noé la? gupa stale fe ne gudixhe ique chinanda ca instrucción stiʼ Dios para guzáʼ ti arca ra guilá familia stiʼ ne cani gale despué (Hebreos 11:7). Abrahán ne Sara bizuubacaʼ stiidxaʼ Dios né stale gana ne guyecaʼ lu layú ni bidii stiidxabe gudiibe laacaʼ. Neca ñándaca «nibigueta cabe» guidxi Ur, jma bicaa íquecabe lu cani bidii stiidxaʼ Dios chiguni. Biblia ná bíʼnicabe stipa pur guicaacabe «ti guidxi ni jma galán» (Hebreos 11:8, 9, 13, 15, 16). Gudixhe ique Moisés gucaanáʼ ca cosa risaca stiʼ Egipto ni nusiecheʼ laa chupa chonna si gubidxa ne «ulí be acaná né be ca binni xquidxi be» (Hebreos 11:24-26). Gúninu stipa pur gápanu fe casi gupa ca xpinni Dios riʼ ne gusihuínninu rusisácanu libertad ni nápanu para cuinu xi gúninu ra iquiiñenu ni para gúninu ni ná Dios.

11. a) Xi zanda gúninu pa iquiiñenu libertad stinu jneza. b) Xi rucaa laanu iquiiñenu libertad stinu jneza.

11 Zándaca para laanu jma fácil nga gabi sti binni laanu xi naquiiñeʼ gúninu. Peru pa gúninu  nga, zunítinu ti cosa nabé risaca. Xi laani yaʼ. Biblia rusiene ni lu Deuteronomio 30:19, 20 ra ná: «Caquiiñeʼ guibáʼ ne guidxilayú casi testigu para laatu yannadxí, maʼ gudixheʼ guendanabani ne guendaguti nezaluluʼ, ndaayaʼ ne guendananá; ne nápaluʼ xidé cuiluʼ guendanabani ti cadi gátiluʼ, lii ne ca xiiñiluʼ, gannaxhiiluʼ Jiobá Dios stiluʼ, gucaadiágaluʼ stídxibe ne cadi guixéleluʼ de laabe; purtiʼ laabe nga guendanabani stiluʼ ne pur laabe zabániluʼ jma xadxí, para cuézaluʼ lu layú ni bidii stiidxaʼ Jiobá gudii ca bixhozególaluʼ Abrahán, Isaac ne Jacob». Lu versículo 19 ca ná bisaana Dios lu náʼ ca israelita que cuicaʼ xi gúnicaʼ. Ne lu versículo 20 ná zanda gusihuínnicabe pabiáʼ nadxiicabe Jiobá pur cani quixhe íquecabe gúnicabe. Laanu laaca zanda cuinu pa racaláʼdxinu guni adorarnu Jiobá. Pa cuinu gúninu ni la? zusihuínninu caquiiñenu libertad stinu para gusisácanu Jiobá ne gusihuínninu pabiáʼ nadxiinu laabe.

IQUIIÑENU LIBERTAD STINU JNEZA

12. Xii nga qué lica racaláʼdxinu gúninu né libertad ni bidii Jiobá laanu.

12 Guiníʼ íquenu bidiʼnu ti regalu nabé risaca ti xhamígunu. Ximodo ñuni sentirnu pa nusáʼbibe ni lade guixi o dede niquiiñebe ni para ñuninabe xcaadxi binni yaʼ. Cadi dxandíʼ ñacananu la? Cumu bisigaʼdeʼ Jiobá laanu libertad ni nápanu ca la? nánnanu racanabe ora gúʼyabe riquiiñeʼ binni ni para guni xiixa ni cadi jneza o dede iquiiñeʼ ni para guniná xcaadxi binni. Biblia ná zabani binni modo ná ique «ora mayaca izaa xhi guidxilayú» (2 Timoteo 3:1, 2). Peru laanu qué racaláʼdxinu iquiiñenu libertad stinu zacá nin guibáninu modo ná íquenu. Yanna, ximodo zanda gusihuínninu rudiʼnu xquíxepeʼ Jiobá pur libertad ni maʼ bidii laanu yaʼ. Ne ximodo iquiiñenu regalu ni bidiibe laanu riʼ jneza yaʼ.

13. Ximodo zanda iquiiñenu libertad ni nápanu casi xpinni Cristo.

13 Guiranu nápanu libertad de cuinu tuu nga gaca xhamígunu, ximodo gácunu lari ne guzuchaahuinu ne ximodo chuʼnu nayecheʼ ora gaca entretenernu. Peru naquiiñeʼ gápanu cuidadu ne cadi guiníʼ íquenu tiisi libre laanu, zanda gúninu xiixa ni qué riuulaʼdxiʼ Dios o gúninu ni runi binni guidxilayú (biindaʼ 1 Pedro 2:16). Lugar de iquiiñenu libertad stinu para gúninu ni cadi jneza la? iquiiñenu ni para gusisácanu Dios (1 Corintios 10:31; Gálatas 5:13).

14. Xiñee naquiiñeʼ gápanu confianza Jiobá ora iquiiñenu libertad stinu.

 14 Jiobá cayabi laanu: «Naa, Jiobá, naa nga Dios stiluʼ, ni cusiidiʼ lii para cueenduluʼ ni galán. Ni cayabi lii gunáʼ nga neza ra naquiiñeʼ saluʼ» (Isaías 48:17). Pa gápanu confianza Jiobá la? zuni respetarnu biaʼ libertad bidiibe laanu ne zaguixhe íquenu gúninu ni jneza. Né stale humildad zaninu «cadi lu náʼ diʼ binni nuu neza stiʼ. Cadi lu náʼ diʼ binni nuu guni mandar ra guzuhuaa ñee» (Jeremías 10:23). Nin Adán nin ca israelita ni qué nuzuubaʼ diidxaʼ que, qué ñuni respetarcaʼ biaʼ libertad bidii Jiobá laacaʼ. Lugar de ñúnicabe nga la? gudixhe íquecabe gápacabe confianza ni ná xpiaanicabe. Cadi chinándanu ejemplu malu stícabe. Gápanu confianza Jiobá de guidubi ladxidoʼno lugar de gápanu confianza laca laanu (Proverbios 3:5).

NAQUIIÑEʼ GUNI RESPETARNU LIBERTAD NAPA XCAADXI BINNI

15. Xi rusiidiʼ principiu ni zeeda lu Gálatas 6:5 laanu.

15 Laaca naquiiñeʼ guni respetarnu libertad ni napa xcaadxi binni ora cuicaʼ xi gúnicaʼ. Xiñee yaʼ. Purtiʼ guiranu libre laanu cuinu xi gúninu. Nga runi, zándaca nuu biaje zadúʼyanu gadxé ni quixhe ique xcaadxi xpinni Cristo guni que cani quixhe íquenu gúninu. Dede zándaca gadxé modo gaca xpiáʼcabe ne gadxé modo guni adorárcabe Dios. Guietenaláʼdxinu principiu ni zeeda lu Gálatas 6:5 (biindaʼ ni). Principiu riʼ rusiidiʼ laanu cada xpinni Cristo zuaʼ donda stiʼ pur cani quixhe ique guni. Pa riénenu ni la? zuni respetarnu derechu ni napa xcaadxi binni ora quixhe íquecaʼ gúnicaʼ xiixa.

Zanda quixhe íquenu gúninu xiixa, peru naquiiñeʼ guni respetarnu ni quixhe ique xcaadxi binni guni. (Biiyaʼ párrafo 15).

16, 17. a) Xiñee beeda gaca libertad stiʼ ca xpinni Cristo de Corinto ti guendanagana. b) Ximodo gucané Pablo ca xpinni Cristo que. c) Xi rizíʼdinu de laani.

16 Guidúʼyanu ti ejemplu de ndaaniʼ Biblia ni rusihuinni xiñee naquiiñeʼ guni respetarnu ni quixhe ique xcaadxi hermanu guni. Ca xpinni Cristo de Corinto qué ganda guiénecaʼ pa zanda gocaʼ beela ni riguixhe binni lu bidóʼ ne despué rigutoocaʼ ni luguiaa. Guyuu chupa chonna de laacabe gudó beela que ne qué nuchiiñaʼ xquendabiaanicaʼ laacaʼ, purtiʼ nánnacaʼ qué risaca ca bidóʼ que. Peru cani biʼniʼ adorar bidóʼ ante gácacaʼ xpinni Cristo la? guníʼ íquecaʼ casi ñaca ñuni adorarcaʼ ca bidóʼ que nga gocaʼ beela que (1 Corintios 8:4, 7). Beeda gaca ni ti guendanagana naroʼbaʼ ne ñándaca pur laani maʼ qué ñuu congregación que tobi si. Xi biʼniʼ Pablo para gucané ca hermanu que guni chaahuicaʼ guendanagana que yaʼ.

17 Primé la? bisietenalaʼdxiʼ Pablo ca xpinni Cristo de Corinto cadi pur guendaró que nga jma zaca xhamígucabe Dios (1 Corintios 8:8). De raqué gudxi laacabe naquiiñeʼ chúʼcabe cuidadu para cadi guninácabe xquendabiaaniʼ cani huaxiéʼ riene, neca libre laacabe para cuícabe xi gúnicabe (1 Corintios 8:9). Despué gúdxibe cani huaxieʼruʼ riene cadi guni juzgarcaʼ ca hermanu ni gó beela que (1 Corintios 10:25, 29, 30). Casi maʼ bidúʼyanu ca, cada tobi de ca xpinni Cristo que naquiiñeʼ gúʼyacaʼ cadi chuʼ xi guchiiñaʼ laacaʼ ora guni adorarcaʼ Dios pur ni gúnicaʼ. Ñee cadi laaca naquiiñeʼ guni respetarnu libertad ni napa ca hermanu stinu ora quixhe íquecaʼ xi gúnicaʼ dede lu ca cosa ni huaxiéʼ risaca la? (1 Corintios 10:32, 33).

18. Ximodo rusihuínninu rusisácanu libertad ni nápanu para cuinu xi gúninu.

18 Libertad ni nápanu para cuinu xi gúninu, nácani ti regalu ni bidii Jiobá laanu para guni sentirnu dxandíʼ libre laanu (2 Corintios 3:17). Gusisácanu regalu bidii Dios laanu riʼ purtiʼ racané ni laanu gusihuínninu pabiáʼ nadxiinu Jiobá pur cani gúninu. Quixhe íquenu gusisácanu Dios lu cani gúninu ne guni respetarnu derechu ni napa xcaadxi binni para gúnicaʼ ni gudixhe íquecaʼ. Zacá rusihuínninu rusisácanu regalu sicarú ni bidii Jiobá laanu.