Biiyaʼ guiraʼ ni nuu lu sitiu riʼ

guyé lu índice

Zanda gusihuínninu modestia ora tiidinu lu xiixa prueba

Zanda gusihuínninu modestia ora tiidinu lu xiixa prueba

«Ne xii ndiʼ ni canabaʼ Jiobá de lii yaʼ. [ . . .] Gápaluʼ modestia ora sáneluʼ Dios stiluʼ» (MIQUEAS 6:8).

DIIDXAʼ RIUUNDAʼ: 48 NE 1

1-3. a) Xi qué ñuni ti profeta de Judá. b) Xi bizaacabe pur ni bíʼnibe. (Biiyaʼ dibuju ni zeeda ra ruzulú tema riʼ).

TI REY de Israel láʼ Jeroboán, biʼniʼ ti altar para guni adorar caadxi dios ni cadi dxandíʼ ndaaniʼ guidxi Betel. Ngue runi biseendaʼ Jiobá ti profeta de Judá ra nuube para gabi laabe xi zazaacabe pur ni bíʼnibe que. Qué nudxiibaʼ profeta que laca laa ne gudxi laabe xiná Jiobá. Nabé bidxiichi rey que ora binadiaga ca diidxaʼ que, peru gupa Jiobá profeta que (1 Reyes 13:1-10).

2 Maca gudxi Jiobá profeta que cadi gó nin gueʼ gastiʼ ndaaniʼ guidxi Israel ne gadxé neza gueeda ora guibiguetaʼ ra lidxi. Ora biguetaʼ profeta que ra lidxi, bidxaagabe ti hombre maʼ huaniisi ni bisiguii laabe ne gudxi laabe napa caadxi diidxaʼ stiʼ Jiobá para laabe. Biʼniʼ invitar hombre que profeta riʼ ra lidxi para gó ne gueʼ. Peru biaje riʼ qué nuzuubaʼ profeta de Judá que stiidxaʼ Jiobá ne gucuaa invitación stiʼ hombre que. Qué ñuulaʼdxiʼ Jiobá ni bíʼnibe riʼ. Ora zibiʼbe ra lídxibe, biaaxha ti lión luguiabe ne biiti laabe (1 Reyes 13:11-24).

3 Qué gánnanu xiñee biʼniʼ profeta riʼ ni gudxi binnigola riʼ laa lugar de ñuni ni ná Jiobá. Ni nánnanu nga qué nusihuínnibe modestia ora guzanebe Dios. Biblia ná: «Laabe maʼ gúdxibe lii, hombre de lu guidxilayú,  xii nga galán. Ne xii ndiʼ ni canabaʼ Jiobá lii yaʼ. Guʼnuʼ ni jneza ne cadi gusaana de gannaxhiiluʼ ne gápaluʼ modestia ora sáneluʼ Dios stiluʼ» (Miqueas 6:8). Ora ruzeeteʼ Biblia sánenu Jiobá, caníʼ ni naquiiñeʼ gápanu confianza laabe, chinándanu cani ruluiʼbe laanu ne guzúʼbanu stiidxabe. Ti binni ni napa modestia nanna caquiiñeʼ guinabaʼ gacané Jiobá laa gatigá. Pa ñapa profeta que modestia la? ninabadiidxabe Jiobá pa bichaa cani gunabaʼ laabe gúnibe. Nuu biaje raca para laanu gúninu xiixa cosa ni naguixhe íquenu ne zándaca qué ganna chaahuinu xipeʼ racalaʼdxiʼ Jiobá gúninu. Peru pa nápanu modestia la? zanábanu Jiobá guluíʼ laanu xi gúninu para cadi gucheʼnu.

4. Xi zadúʼyanu lu tema riʼ.

4 Lu tema gudídinu que bizíʼdinu xii nga modestia ne xiñee risaca nga gapa ca xpinni Cristo cualidad riʼ. Peru, xi caquiiñeʼ gúninu para gusihuínninu cualidad riʼ jma yaʼ. Ne, pora nga zahuinni pa dxandíʼ nápanu modestia yaʼ. Nuu stale ora zanda gusihuínninu pa nápanu modestia o pa coʼ. Guidúʼyanu chonna de laacani (Proverbios 11:2).

ORA GUCHAA MODO NABÁNINU

5, 6. Ximodo bisihuinni Barzilai napa modestia.

5 Ora guchaa xiixa lu xquendanabáninu o ti asignación ni nápanu, zahuinni pa nápanu modestia o pa coʼ. Zanda guizíʼdinu de ejemplu stiʼ Barzilai, ti xhamigu rey David ni qué nusaana laa. Dxi napa Barzilai 80 iza, biʼniʼ invitar David laabe para gácabe tobi de ca hombre ni guni dxiiñaʼ ndaaniʼ palaciu stiʼ rey que. Nanna Barzilai ti ndaayaʼ naroʼbaʼ ngue. Peru lugar de ñebe la? guniʼbe jma galán cheʼ sti hombre láʼ Kimham lugar stibe, zándaca xiiñibe laa (2 Samuel 19:31-37).

6 Xiñee qué niná Barzilai nicaa invitación stiʼ David que yaʼ. Ñee purtiʼ qué nabe guicaabe jma dxiiñaʼ o purtiʼ maʼ racaláʼdxibe guiziiláʼdxibe la? Coʼ. Qué niná Barzilai nicaa invitación que purtiʼ napa modestia. Nánnabe maʼ bichaa xquendanabánibe ne guniʼbe maʼ qué zanda gúnibe biaʼ bíʼnibe ante (biindaʼ Gálatas 6:4, 5). Laanu laaca naquiiñeʼ gápanu modestia casi Barzilai. Lugar de guiníʼ íquenu cani racaláʼdxinu ugaandanu o guchaaganu laanu né xcaadxi binni la? rucáʼ íquenu gudiʼnu ni jma galán Jiobá. Ndiʼ nga ni jma risaca que gápanu ti asignación especial o gácanu tuuxa ni nabé runibiáʼ binni (Gálatas 5:26). Pa nápanu modestia la? zuninenu ca hermanu stinu dxiiñaʼ juntu para gusisácanu Jiobá ne gacanenu xcaadxi binni (1 Corintios 10:31).

7, 8. Pa nápanu modestia, ximodo racané ni laanu cadi gápanu confianza laca laanu.

7 Zándaca gaca nagana para laanu gusihuínninu nápanu modestia ora guicaanu jma dxiiñaʼ o ti privilegiu especial. Ora guizaacanu zacá la? ejemplu stiʼ Nehemías zanda gacané laanu. Ora gúnnabe napa ca binni de Jerusalén stale guendanagana, gunábabe Jiobá gacané laabe (Nehemías 1:4, 11). Ne Jiobá bicabi oración stibe. Ximodo yaʼ. Biʼniʼ nombrar rey Artajerjes Nehemías gaca gobernador stiʼ guidxi Jerusalén. Neca guca Nehemías ti hombre ricu ne bisaca stiidxaʼ, qué ñuu dxi ñápabe confianza laca laabe. Biyúbibe guluíʼ Jiobá laabe xi gúnibe ne qué nusaanabe de ñuundabe Ley stiʼ (Nehemías 8:1, 8, 9). Neca nápabe derechu para ñuni mandarbe xcaadxi binni, peru qué niquiiñebe derechu ca para ñúnibe xiixa pur laabe o para ñuninabe xcaadxi binni (Nehemías 5:14-19).

8 Pa guicaanu jma dxiiñaʼ o guchaacabe laanu de asignación la? naquiiñeʼ gápanu modestia casi gupa Nehemías. Modestia ca racané ni laanu cadi gápanu confianza laca laanu purtiʼ si nánnanu gúninu xiixa o pur cani huadídinu lu xquendanabáninu. Ximodo zanda guihuinni maʼ cayapa ti xpinni Cristo confianza laca laa yaʼ. Guzéʼtenu ti ejemplu. Ti binnigola zanda guni tender caadxi cosa stiʼ congregación sin guinabaʼ Jiobá gacané laa primeru. O tuuxa de laanu zanda quixhe ique guni xiixa primeru ne despué guinabaʼ Dios cuʼ ndaayaʼ ni gudixhe ique guni. Peru ti xpinni  Cristo ni napa modestia la? qué rapa confianza laca laa dede né ora guni xiixa ni maʼ biʼniʼ stale biaje. Nanna dxíchibe qué zanda guchaagabe biaʼ nánnabe ne biaʼ nanna Jiobá. Biblia ná: «Gupa confianza Jiobá de guidubi ladxidoʼloʼ, ne cadi chinándaluʼ ni na xpiaaniluʼ. Lu guiráʼ ni gúniluʼ biiyaʼ xi nabe, ne laabe zúnibe ca neza stiluʼ derechu» (Proverbios 3:5, 6). Lu Guidxilayú riʼ nuu stale binni ni riníʼ ique puru para laasi ne nisi maʼ cuyúbicaʼ guisácacaʼ jma que xcaadxi binni. Peru laanu ca xpinni Jiobá, cadi zacá laanu. Qué riníʼ íquenu jma risácanu que xcaadxi hermanu de congregación o ndaaniʼ familia stinu pur xiixa privilegiu ni nápanu. Ni rúninu nga riuʼnu conforme né lugar ni nápanu ndaaniʼ xquidxi Dios ne runinenu ca hermanu stinu dxiiñaʼ tobi si (1 Timoteo 3:15).

ORA GUINÍʼ BINNI MAL DE LAANU O GUSISÁCACAʼ LAANU

9, 10. Pa nápanu modestia, ximodo zacané ni laanu ora guiníʼ binni mal de laanu o gacaláʼdxicaʼ gusisácacaʼ laanu.

9 Ora guiníʼ xcaadxi mal de laanu neca cadi dxandíʼ ni, zándaca guniná ni laanu stale. Zacá nga bizaaca ti gunaa láʼ Ana. Neca nabé nadxii xheelabe laabe, guyuube triste purtiʼ racaláʼdxibe gápabe xiiñibe peru qué ganda. Ne cadi ngasi, sti xheelaʼ xheelabe runi burla laabe guiráʼ ora. Ti dxi guizáʼ triste nuu Ana, guyebe yeguni orarbe ndaaniʼ tabernáculo que. Raqué biiyaʼ Elí, xaíque stiʼ ca sacerdote, laabe cayuunabe ne guníʼ naxúdxibe. Ñándaca nidxiichi Ana stale, peru bicábibe Elí né stale respetu. De raqué, bíʼnibe ti oración ra bisihuínnibe pabiáʼ fe nápabe Jiobá ne pabiáʼ nadxiibe laa (1 Samuel 1:5-7, 12-16; 2:1-10).

10 Pa nápanu modestia laaca zanda gacané ni laanu quixhedxinu «ni nadxaba pur ni nachaʼhuiʼ» (Romanos 12:21). Nabé dxaʼ guendaquéiquiiñeʼ ndaaniʼ Guidxilayú ni cayuni mandar Binidxabaʼ riʼ. Nga runi cadi guidxagayaanu ora cadi jneza modo guni tratar xcaadxi binni laanu. Dxandíʼ, zándaca guchiichi ndiʼ laanu stale, peru cadi naquiiñeʼ gudiʼnu lugar gucaa ni cayuni sentirnu ca laanu gúninu xiixa óraca (Salmo 37:1). Ne zándaca jma feu zuni sentirnu pa tuuxa de congregación stinu nga gapanenu guendanagana. Pa guizaacanu ndiʼ la? chinándanu ejemplu stiʼ Jesús. Biblia ná ora guluu dí ca xhenemígube  laabe, qué niguudibe laacaʼ. Lugar de ngue la? «bisaana be irá ni lu ná Dios ti laa ruuya irá cosa jneza» (1 Pedro 2:23). Qué nudxiibaʼ Jesús laca laa ne gúpabe confianza zuni chaahuiʼ Jiobá intiica cosa cadi jneza ni gúnicabe laabe (Romanos 12:19). Laanu laaca cadi naquiiñeʼ gudxíʼbanu laca laanu ne cadi guquíxenu ni gúnicabe laanu (1 Pedro 3:8, 9).

11, 12. a) Xi zanda gúninu para cadi gusaana de gápanu modestia ora gusisaca xcaadxi binni laanu. b) Pa nápanu modestia, ximodo zácunu lari ne ximodo zaca xpiaʼnu.

11 Laaca zahuinni pa nápanu modestia ora nabé rusisaca binni laanu. Ngapeʼ nga ni bizaaca Ester. Laabe nga tobi de ca gunaa jma galán de Persia. Lu guidubi ti iza nabé especial modo gúpacabe laabe ne bidiicabe laabe tratamientu de belleza, laabe né xcaadxi baʼdudxaapaʼ ni nuu raqué ni racalaʼdxiʼ chuulaʼdxiʼ rey que laa. Peru Ester nga gulí rey que para gaca reina. Nabé galán modo biʼniʼ tendércabe Ester, peru qué ñácabe ti gunaa ni niníʼ ique puru para laasi. Bisihuínnibe nápabe modestia, nacháʼhuibe ne nápabe respetu (Ester 2:9, 12, 15, 17).

Ñee rusihuínninu runi respetarnu Jiobá ne xcaadxi hermanu pur modo rácunu lari, o rusihuínninu nápanu modestia la? (Biiyaʼ párrafo 12).

12 Pa nápanu modestia la? zácunu lari ni gusihuinni nápanu respetu laanu ne xcaadxi binni ne laaca zaca xpiaʼnu galán. Lugar de guchanu bi yánninu ne gucaʼnu xcaadxi guidxagayaa laanu la? naquiiñeʼ gucaʼ íquenu gácanu nachaʼhuiʼ ne nadóʼ (biindaʼ 1 Pedro 3:3, 4; Jeremías 9:23, 24). Pa qué gápanu modestia la? qué zandaa zahuinni xi riníʼ íquenu de laanu pur modo rininu ne modo naca xpiaʼnu. Guzéʼtenu ti ejemplu. Ñee rucaʼnu xcaadxi guiníʼ íquecaʼ especial laanu pur ni rúninu, ni nánnanu o pur ca binni ni runibiaʼnu la? O rucaʼnu xcaadxi guiníʼ íquecaʼ bíninu xiixa risaca stúbisinu, neca guyuu tu gucané laanu la? Guiníʼ íquenu ejemplu stiʼ Jesús. Laabe ñándaca nucaabe binni nidxagayaa laabe né guiráʼ ni nánnabe. Peru qué ñúnibe ni. Ni biʼniʼ Jesús nga gatigá ruzeeteʼ de Stiidxaʼ Dios purtiʼ qué niná nusisaca binni laa. Jma nga gucuá íquebe gusisaca binni Jiobá (Juan 8:28).

ORA QUIXHE ÍQUENU GÚNINU XIIXA

13, 14. Pa nápanu modestia, ximodo racané ni laanu quixhe íquenu gúninu ni jneza.

13 Laanu laaca naquiiñeʼ gusihuínninu nápanu modestia ora quixhe íquenu gúninu xiixa dede né ora quixhe ique sti binni guni xiixa ni zándaca guniná laanu despué. Dxi zeʼ apóstol Pablo Jerusalén para guni ti dxiiñaʼ ni bidii Jiobá laa, biaanabe chupa chonna gubidxa ndaaniʼ guidxi Cesarea. Raqué gudxi ti profeta láʼ Ágabo laabe pa chebe Jerusalén zanaazecabe laabe. Ne zándaca dede zuuticabe laabe. Neca gucuá ca hermanu que lú Pablo cadi cheʼ Jerusalén, gudixhe íquebe chebe. Cadi bíʼnidibe ndiʼ purtiʼ si nápabe confianza laca laabe. Nabé gupa Pablo modestia ne gupa confianza Jiobá de guidubi ladxidóʼ. Ne ca hermanu que laaca gúpacaʼ modestia. Ngue runi biʼniʼ respetárcabe ni gudixhe ique Pablo guni ne bidiicabe lugar cheʼ (Hechos 21:10-14).

14 Neca qué gánnanu xi chiguizaaca despué o qué zanda gucueezanu guiráʼ cani, pa nápanu modestia la? zacané ni laanu quixhe íquenu gúninu ni jneza. Guzéʼtenu ti ejemplu. Zándaca caníʼ íquenu gúninu xhiiñaʼ Jiobá de tiempu completu. Zándaca guinabadiidxanu xi zazaaca pa gaca huaranu o pa gaca huará bixhózenu ne jñaanu ne caquiiñecabe chuʼ tu gacané laacabe. Laaca zándaca chuʼnu xizaa pur ni guibaninenu ora maʼ guióxhonu. Neca guni orarnu pur ca cosa riʼ ne guiníʼ íquenu stale de laacani, qué zanda diʼ gánnanu ximodo guni chaahuinu guiráʼ cani (Eclesiastés 8:16, 17). Pa nápanu modestia ne nápanu confianza Jiobá la? ziuʼnu conforme nuu cosa ni qué zanda gúninu, zuuyaʼ chaahuinu ximodo nuunu ne zanábanu conseju. Ne ni jma risaca nga zanábanu Jiobá guluíʼ laanu xi gúninu. De racá maʼ nápanu xidé chinándanu ni gabi espíritu santu laanu. Biblia ná: «Tu cabeza si guiete bi la? qué zudxiibaʼ diʼ; ne tu cayuuyadxí si za la? qué zutopa diʼ. Cásica qué gánnaluʼ ximodo racané espíritu guiniisi dxita ladi ti  baʼduhuiiniʼ ndaaniʼ ti gunaa ni nacaxiiñiʼ, zaqueca qué runibiaʼluʼ cani biʼniʼ Dios ni dxandíʼ, purtiʼ laa runi guiráʼ xixé cosa. Bidxiibaʼ biidxiʼ stiluʼ siadóʼ, ne cadi gusaanadxiluʼ naluʼ dede ora gaca huadxí; purtiʼ qué gánnaluʼ paraa guindani ni, pa raríʼ o pa raricaʼ, o pa guiropaʼ lugar ca» (Eclesiastés 11:4-6). Zanda uguu Jiobá ndaayaʼ cani quixhe íquenu gúninu o zanda gacanebe laanu para guchaʼnu cani quixhe íquenu (Proverbios 16:3, 9).

XIMODO ZANDA GÁPANU JMA MODESTIA

15. Ora guiníʼ íquenu modo naca Jiobá, ximodo racané ni laanu para cadi gudxíʼbanu laca laanu.

15 Ximodo zanda gápanu jma modestia, laanu ca xpinni Dios, yaʼ. Guidúʼyanu tapa cosa ni zanda gúninu. Primé, naquiiñeʼ guiníʼ íquenu Jiobá. Guiníʼ íquenu pabiáʼ nandxoʼbe ne pabiáʼ nuu xpiaanibe. Ora guchaaganu laanu né laabe, rudiʼnu cuenta guizáʼ nahuiininu ne huaxiéʼ ni nánnanu (Isaías 8:13). Cadi guiaandaʼ laanu cayúninu xhiiñaʼ Dios ni jma nandxóʼ, cadi stiʼ ti ángel o ti binni. Ora guiníʼ íquenu ndiʼ zacané ni laanu cadi gudxíʼbanu laca laanu ne guni respetarnu modo runi mandar Dios (1 Pedro 5:6).

16. Ora guiníʼ íquenu pabiáʼ nadxii Jiobá laanu, ximodo racané ni laanu gusihuínninu modestia.

16 Guiropa cosa ni zanda gúninu para gápanu modestia nga guiníʼ íquenu pabiáʼ nadxii Jiobá laanu. Pablo guníʼ guiráʼ hermanu ni nuu ndaaniʼ ti congregación zeeda gácacaʼ casi ca parte stiʼ xcuérpunu. Cada parte de cuerpu stinu bidii Jiobá guni cani ti dxiiñaʼ risaca (1 Corintios 12:23, 24). Para Jiobá la? nabé risaca cada tobi de laanu. Qué ruchaaga diʼ Jiobá laanu né stobi ne qué rucaanádibe laanu ora gúninu xiixa ni cadi jneza. Ora gánnanu nadxii Jiobá laanu rucaa ni laanu chuʼnu seguru.

17. Ora guidúʼyanu ni galán runi xcaadxi binni, xiñee racané ni laanu.

17 Guionna cosa ni zanda gúninu para gápanu modestia nga guidúʼyanu ni galán runi xcaadxi binni, casi runi Jiobá. Xiñee galán gúninu nga yaʼ. Purtiʼ lugar de guyúbinu guyadxí binni laanu o gábinu xcaadxi binni xi naquiiñeʼ guni, zanábanu conseju laacaʼ ne zucaʼdiáganu ni gábicaʼ laanu (Proverbios 13:10). Ne ora guidúʼyanu ca cosa galán runi ca hermanu ca zacaneni laanu para chuʼnu nayecheʼ ora guicaacabe ti asignación especial. Ne laaca zudiʼnu xquíxepeʼ Jiobá purtiʼ rudiibe lugar guninenu xcaadxi hermanu xhiiñabe juntu (1 Pedro 5:9).

18. Xi zacané laanu para gusíʼdinu conciencia stinu ne gápanu modestia.

18 Guidapa cosa ni zanda gúninu para gápanu modestia nga iquiiñenu ca principiu zeeda lu Biblia para gusiidiʼ chaahuinu xquendabiaaninu. Ca principiu riʼ rusiidiʼ cani laanu xi runi sentir Jiobá ne xi riníʼ ique. Ora guidúʼyanu ca cosa ca casi ruuyaʼ Jiobá cani, zaguixhe íquenu gúninu cani rusiecheʼ laabe. Pa guni estudiarnu, guni orarnu ne gúninu ni cazíʼdinu lu xquendanabáninu la? zaquiiñenu conciencia stinu jma jneza ne zaníʼ íquenu xcaadxi binni primeru ante gúninu xiixa (1 Timoteo 1:5). Pa gúninu ca cosa riʼ la? maʼ bidii stiidxaʼ Jiobá laanu zacané laanu gácanu ti xpinni Cristo ni runi ni jneza ne cadi gusaananu de gápanu modestia (1 Pedro 5:10).

19. Xi zacané laanu gápanu modestia yanna ne lu ca dxi ni gueeda.

19 Guietenaláʼdxinu profeta de Judá ni bizéʼtenu ra bizulú tema riʼ. Gútibe ne bisaana de ñaca xhamigu Jiobá laabe purtiʼ maʼ qué ñápabe modestia. Peru ora guidúʼndanu ejemplu stiʼ stale de ca xpinni Jiobá ni bizuubaʼ diidxaʼ zacané cani laanu cadi gusaana de gápanu modestia neca nuu tiru gaca nagana para laanu gusihuínninu ni. Ra jma maʼ ziyápanu tiempu de cayúninu xhiiñaʼ Jiobá la? jma naquiiñeʼ gápanu confianza laabe (Proverbios 8:13). Pa guchaa modo nabáninu o pa coʼ, cadi naquiiñeʼ gusaana de sánenu Dios. Laani nga ndaayaʼ jma naroʼbaʼ ni zanda gápanu. Nga runi, gúninu stipa pur chinándanu guiráʼ ni maʼ bizíʼdinu lu tema riʼ. Zacatiʼ nga zanda gápanu modestia ne qué zusaana de sánenu Jiobá.