1, 2. a) ¿Ximodo nga zeeda gaca guidxilayú malu riʼ casi tuuxa ni maʼ nexheʼ gatiʼ? (Biiyaʼ dibuju ni zeeda ra ruzulú tema riʼ). b) Ora guinitilú guidxilayú malu riʼ, ¿xi zuni sentir cani nuu guibáʼ ne lu Guidxilayú?

GUNÍʼ ique ndiʼ. Zizá ti hombre nabé malu ndaaniʼ ti pasillu stiʼ ti cárcel ziné caadxi guardia laa ne cucaacaʼ ridxi: «¡Zedazá ti hombre ni maʼ guti!». ¿Xiñee cucaacabe ridxi zaqué pa nabani hombre ni deguyoo riʼ ne ruluíʼ nazaacabe yaʼ? Purtiʼ maʼ gudíxhecabe gátibe ne zátibe. Zaqué nga casi ñaca maʼ gútibe. *

² Guidxilayú malu riʼ zeeda gaca ni casi hombre ni deguyoo ni maʼ gastiʼ cayaadxaʼ para gatiʼ que. Biblia ná zanitilú guidxilayú stiʼ Binidxabaʼ riʼ (1 Juan 2:17). Maʼ gudixhe ique Jiobá gunitilú guidxilayú stiʼ Binidxabaʼ ne maʼ cadi candaa ni, ne zaca ni cásipeʼ guniʼbe. Peru maʼ gadxé modo chiguinitilú guidxilayú malu riʼ de modo gudíxhecabe gatiʼ hombre malu que. Zándaca nuu tu guiníʼ ique cadi jneza modo biʼniʼ juzgárcabe laabe ne gucaalucaʼ para cadi guuticabe laabe. Peru Jiobá naca ti juez ni runi ni jneza, ne cadi cucheebe né decisión ni maʼ gucuaabe de gunitilube guidxilayú malu riʼ  ne jneza ni (Deuteronomio 32:4). Maʼ cadi candaa diʼ para guedandá fin stini. Ora guedandá ni, guiráʼ cani nuu guibáʼ ne cani nuu ndaaniʼ Guidxilayú zaniʼcaʼ jneza modo biʼniʼ juzgar Jiobá. ¡Guiráʼ tu ziuu nayecheʼ!

3. ¿Xi tapa guendanagana chiguiree ora gueeda Reinu stiʼ Dios?

³ ¿Xi guiráʼ zaree ora guinitilú guidxilayú malu riʼ yaʼ? Maʼ qué zandaa zaree guiráʼ ca cosa malu ni ridxaagalunu cada dxi. Noticia riʼ zeeda ni lade «ca diidxaʼ nacubi ne galán stiʼ Reinu» (Mateo 24:14, TNM). Tiempu riʼ nabé nuu binni malu, nuu organización ni qué runi ni jneza, nuu stale cosa malu ne nabé triste modo nabani binni. Laacani nga guidapaʼ cosa ni zaree ora maʼ gueeda Reinu stiʼ Dios ne lu tema riʼ zazíʼdinu de laacani. Ra gusiénenu cada tobi de ca guendanagana riʼ, zadúʼyanu ximodo runiná cani laanu, xi chiguni Jiobá para guni chaahuiʼ cani ne xi chichuu lugar stícani.

4. ¿Ximodo runiná ni runi ca binni malu laanu?

⁴ ¿Ximodo runinácabe laanu? Apóstol Pablo guníʼ «jma nagana zaca ni» lu ca últimu dxi. Ne bizeetebe jma malu zaca binni cada dxi tiidiʼ (2 Timoteo 3:1-5, 13). ¿Cadi dxandíʼ maʼ cadúʼyanu modo cayaca cumplir profecía riʼ la? Stale de laanu huadídinu yuubaʼ pur ca binni nabé malu ni nuu o pur ca binni ni runiná stobi o cani riziñe binni dede cueecaʼ gana laacabe, o cani nanalaʼdxiʼ binni de sti raza. Nuu de ca binni riʼ maʼ qué lica rucaachicaʼ ca cosa malu ni rúnicaʼ. Nuu xcaadxi ruluíʼ dxandíʼ racaláʼdxicaʼ gacanecaʼ binni, peru gadxé ni nuu ndaaniʼ ladxidoʼcaʼ. Ne neca cadi laapenu nga huazaacanu xiixa cosa malu, peru ni runi ca binni malu ca laaca runiná cani laanu. ¿Cadi dxandíʼ nabé feu runi sentirnu ora guidúʼyanu pabiáʼ naná modo runi tratárcabe caadxi baʼduhuiiniʼ, binnigola ne binni ni qué zanda gucaalú laacabe la? Nuu binni malu ni naca xpiaʼ casi maniʼ duxhuʼ o casi ca demonio (Santiago 3:15). Peru Biblia rudii laanu esperanza.

5. a) ¿Xi oportunidad napa ca binni malu yanna? b) ¿Xi zazaaca ca binni malu ni qué náʼ guchaa?

⁵ ¿Xi chiguni Jiobá? Yanna riʼ, cudii Jiobá oportunidad ca binni malu para guchaacaʼ (Isaías 55:7). Neca mayaca guinitilú guidxilayú malu riʼ, caʼruʼ diʼ gaca juzgar ca binni malu ca. Peru, ¿xi zazaaca né ca binni ni qué náʼ guchaa ne qué náʼ gusaana guidxilayú stiʼ Binidxabaʼ riʼ dede ora guzulú gran tribulación yaʼ? Maʼ bidii stiidxaʼ Dios cuee laacabe de lu Guidxilayú. Biblia ná: «Maʼ xcaadxi si tiempu cayaadxaʼ, ne maʼ qué ziuu binni malu; neca guyúbiluʼ laacaʼ maʼ qué zadxeʼluʼ laacaʼ» (Salmo 37:10). Stale binni maʼ biziidicaʼ gucaachicaʼ ca cosa malu ni rúnicaʼ ne stale biaje rireenecaʼ xtémacaʼ (Job 21:7, 9). Peru Biblia rusietenalaʼdxiʼ laanu cayuuyaʼ ca guielú Dios «guiráʼ neza stiʼ binni, ne cayuuyabe guiráʼ ni cayúnicaʼ. Gastiʼ guelacahui nin bandáʼ ra ganda gucaachilú ca binni malu» (Job 34:21, 22). Nga runi, guirutiʼ zanda gucaachilú para qué guʼyaʼ Dios laa. Laabe ruuyabe guiráʼ ni runi ca binni malu. Tiidiʼ si Armagedón maʼ qué ziuucabe. Maʼ qué ziuuruʼ dxi guidúʼyanu laacabe (Salmo 37:12-15).

6. ¿Tuu nga cani zabániruʼ ora guinitilú ca binni malu ne xiñee nácani ti noticia galán?

⁶ ¿Tuu nga cani zabániruʼ ora guinitilú ca binni malu? Maʼ bidii stiidxaʼ  Jiobá: «Peru cani nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale guendariuudxi». De raqué laaca guniʼbe: «Cani runi jneza zudii Dios laacaʼ guidxilayú, ne qué ziuu dxi gusaana de guibánicaʼ lu ni» (Salmo 37:11, 29). ¿Tuu nga «cani nadóʼ» ne «cani runi jneza» ca yaʼ? Ca binni nadóʼ nga ca binni ni naca humilde ni riná guiziidiʼ de Jiobá ne ni riná guzuubaʼ stiidxabe. Laaca ribee lá Biblia ca binni riʼ cani runi ni jneza purtiʼ riuuláʼdxicaʼ gúnicaʼ ni riuulaʼdxiʼ Dios. Lu guidxilayú stiʼ Binidxabaʼ riʼ jma stale binni malu nuu que binni nachaʼhuiʼ. Peru lu guidxilayú cubi maʼ guníʼ Dios chigaca, ziuu puru binni nadóʼ ne ni runi ni jneza. Zúnicabe guidubi Guidxilayú ti paraísu.

7. ¿Ximodo runiná ni runi ca organización ni qué runi ni jneza laanu yanna?

⁷ ¿Ximodo runiná cani laanu? Stale de ca cosa malu ni cazaaca yanna riʼ cadi binni diʼ napa donda pur laacani, sínuque ca organización ni qué runi ni jneza. Nuu organización stiʼ ca religión ca riguítecaʼ millón binni. Qué rusiidicabe laacaʼ ni dxandíʼ, casi tuu nga Dios ne xi chigaca lu Guidxilayú riʼ ne ca binni ni nuu luni. Rusiidicabe laacaʼ qué zanda diʼ gapa binni confianza ni rusiidiʼ Biblia. Laaca nuu gobiernu ni qué runi ni jneza ni rucaa binni guni guerra ne tíndecaʼ para gucaalucaʼ binni de gadxé gadxé raza. Ca gobiernu riʼ ruquichinacaʼ binni pobre ni qué zanda gucaalú laacaʼ. Nga runi, cada dxi tiidiʼ rácacabe jma ricu ne ruzuhuaacabe jma dxiichiʼ purtiʼ chupa chonna si binni racanécabe ne nuu tu laa rugadxe lu nácabe. Yanna riʼ nuu stale empresa naroʼbaʼ ni rachelú gapa jma ni runi biidiʼ Guidxilayú ne runitilucaʼ cani nuu luni ne riguítecaʼ binni para ganda gaca chupa chonna de laacaʼ ricu. Rihuinni dxíchica, ca organización ni qué runi ni jneza nga napa donda pur cayacaná stale binni yanna.

8. Casi ná Biblia, ¿xi zazaaca né ca organización ni ná binni zuhuaadxiichiʼ?

⁸ ¿Xi chiguni Jiobá? Zuzulú gran tribulación ora gucaalú ca gobiernu guiráʼ religión ni qué rusiidiʼ ni dxandíʼ, cani ruzeeteʼ Biblia naca casi ti gunaa dxabaʼ ni láʼ Babilonia guidxi roʼ (Apocalipsis 17:1, 2, 16; 18:1-4). Zanitilú ca organización stiʼ ca religión riʼ. Peru, ¿xi zazaaca né xcaadxi organización ni qué runi ni jneza yaʼ? Biblia ná zeeda gaca cani casi dani ngola ne casi isla purtiʼ ruluíʼ nadipaʼ cani ne ruluíʼ guirutiʼ zuniibi cani (biindaʼ Apocalipsis 6:14). Peru laaca cuzeeteʼ ni zanitilú ca gobiernu ne intiica organización ni qué náʼ chuʼ pur Reinu stiʼ Dios. Ndiʼ zazaaca ni ra mayaca guiluxe gran tribulación (Jeremías 25:31-33). Maʼ qué ziuu nin sti organización ni qué runi ni jneza.

9. ¿Xiñee nuunu seguru zatachaahuiʼ ni guni ca binni ni zeeda gaca guidxilayú cubi ca?

⁹ ¿Xi chichuu lugar stiʼ ca organización ni qué runi ni jneza yaʼ? ¿Ñee ziuu xiixa organización lu Guidxilayú riʼ tiidiʼ si Armagedón la? Biblia ná: «Peru laanu cabeza nu, casi bidii stiidxa be, ti guidxilayú cubi ne ti ibáʼ cubi ra gasti enda nadxabaʼ» (2 Pedro 3:13). Guibáʼ yooxhoʼ ca nga ca gobiernu ni qué runi ni jneza. Ne guidxilayú yooxhoʼ ca nga ca binni ni nuu lu nácabe. ¿Xi chichuu lugar stícani ora maʼ guinitilú cani yaʼ? Ti «guidxilayú cubi ne ti ibáʼ cubi». Guibáʼ cubi ca nga ti gobiernu nacubi. Gobiernu riʼ nga Reinu stiʼ Dios ne luni nuu  Jesucristu ne 144,000 rey ni chiguni mandarné laa. Guidxilayú cubi ca nga ca binni ni chiguni mandar Reinu stiʼ Dios. Jesús ne cani chiguni mandarné laa zusihuínnicaʼ ximódopeʼ naca Jiobá, ti Dios ni riuulaʼdxiʼ gatachaahuiʼ guiráʼ xixé cosa (1 Corintios 14:33). Nga runi, zatachaahuiʼ guiráʼ xixé cosa lu «guidxilayú cubi» ca. Ca hombre ni guiaana lu náʼ guʼyaʼ gaca guiráʼ cosa, zácacaʼ binni nachaʼhuiʼ ne zinándacaʼ instrucción ni gudii Jesús ne 144,000 laacaʼ (Salmo 45:16). Guxuíʼlunu ximodo zabani binni ora maʼ qué chuʼ ca organización ni qué runi ni jneza, ne maʼ chuʼ ti organización si lugar stiʼ cani, ni qué zadinde ne ni qué ziuu dxi guni ni cadi jneza.

10. a) ¿Xii nga ca cosa malu maʼ bidale neza ra nabézaluʼ? b) ¿Ximodo runiná ca cosa malu ca lii ne familia stiluʼ?

¹⁰ ¿Ximodo runiná cani laanu? Ca dxi riʼ nabé maʼ bidale binni riuuné ni cadi xheelaʼ, ni cadi honradu ne ni ridinde casi ridinde maniʼ. Guiráʼ entretenimientu nuu yanna riʼ, rucaa cani binni chuulaʼdxiʼ guni ca cosa ca, ne laaca runi burla cani ca ley stiʼ Jiobá ra caníʼ guná nga ni jneza ne ni cadi jneza (Isaías 5:20). Cani napa xiiñiʼ nga jma naquiiñeʼ gápacaʼ ca xiiñicaʼ de ca cosa malu riʼ. De guiranu, cani dxandíʼ xpinni Cristu, naquiiñeʼ gúninu stipa pur gápanu amistad ni napanenu Jiobá purtiʼ nabezanenu binni ni qué runi respetar ca ley stiʼ Dios.

11. ¿Xi rizíʼdinu pur modo binitilú Jiobá Sodoma ne Gomorra?

¹¹ ¿Xi chiguni Jiobá? Guidúʼyanu xi biʼniʼ Jiobá né cosa malu guca Sodoma ne Gomorra (biindaʼ 2 Pedro 2:6-8). Lot guca ti hombre nachaʼhuiʼ, laabe né familia stibe nabé gudíʼdicabe yuubaʼ pur ca cosa malu ni biʼniʼ ca binni nabeza lugar que. Binitilú Dios región que para gunduuxeʼ guiráʼ cosa malu que. Peru laaca bíʼnibe ni para ganna guiráʼ binni malu ni nabani yanna «xi cabeza laacaʼ». Cásica binduuxeʼ Jiobá guiráʼ cosa feu biʼniʼ ca binni que ora gutanecaʼ tutiisi, zacaca zúnibe ni tiempu nabáninu riʼ ora gunduuxebe guidxilayú malu riʼ.

12. ¿Xi ñuuláʼdxiluʼ ñúniluʼ ora maʼ qué chuʼ cosa malu?

¹² ¿Xi ziuu lugar stiʼ ca cosa malu? Ndaaniʼ Paraísu ca zúninu stale cosa galán. Casi gúninu Guidxilayú riʼ ti paraísu ne gucuinu lídxinu ne lidxi ca binni ni nadxiinu. Laaca zadxaagalunu millón binni ni chiguiasa de lade gueʼtuʼ ne zusíʼdinu laacaʼ de Jiobá ne de guiráʼ ni maʼ bíʼnibe pur binni (Isaías 65:21, 22; Hechos 24:15). Guizáʼ ziuu xhiiñanu, ne ca dxiiñaʼ ni gúninu zuni cani laanu binni nayecheʼ ne zusisaca cani Jiobá.

13. ¿Xi guiráʼ cazaaca pur qué niná Binidxabaʼ, Adán ne Eva nuzuubacaʼ diidxaʼ ndaaniʼ jardín ni guyuu Edén?

¹³ ¿Ximodo runiná cani laanu? Nabé triste modo nabáninu yanna pur ca cosa malu ni cayaca ne pur ca organización ni qué runi ni jneza. Guiranu nga runiná ca guendanagana casi guerra, guendapobre, rusisaca binni raza stiʼ, guendahuará ne guendaguti. Guyuu ca guendanagana riʼ purtiʼ qué niná Binidxabaʼ, Adán ne Eva nuzuubacaʼ stiidxaʼ Jiobá. Nga runi guiranu runiná ni bíʼnicabe ca.

14. ¿Xi zuni Jiobá para guni chaahuiʼ modo nabani binni yanna?

¹⁴ ¿Xi chiguni Jiobá? Maʼ bidii stiidxaʼ Jiobá cuee caadxi cosa para guibani binni galán. ¿Xi laacani yaʼ? Zabeebe  guerra. Biblia ná: «Latáʼ ne laguuyaʼ guiráʼ ni maʼ biʼniʼ Jiobá, ximodo maʼ bíʼnibe cosa para guidxagayaa binni lu guidxilayú. Runduuxebe guendaridinde lu guidubi guidxilayú. Rigúzabe arcu ne rugabe lanza; rucaaguibe carru de guerra lu guí» (Salmo 46:8, 9). Zabeebe guendahuará (Isaías 33:24). Zabeebe guendaguti ne maʼ qué ziuu dxi chuʼ ni (Isaías 25:8). Zabeebe guendapobre (Salmo 72:12-16). Zabee Jiobá guiráʼ ni cayuniná laanu yanna. Dede zabeebe guiráʼ cosa malu ni rucaa Binidxabaʼ ne ca demonio stiʼ laanu gúninu (Efesios 2:2).

15. ¿Xi guiráʼ maʼ qué ziuu tiidiʼ si Armagedón?

¹⁵ Bixuiʼlú ximodo guibani binni ora maʼ qué chuʼ guerra, guendahuará ne guendaguti. Qué ziuu ejércitu de soldadu, guiibaʼ nin monumentu de guerra. Qué zaquiiñenu hospital, doctor, enfermeru, ca yoo ra rápacabe gueʼtuʼ, nin pantión. Ne cumu maʼ qué ziuu gubaanaʼ la? maʼ cadi caquiiñeʼ diʼ chuʼ puliciá nin alarma. Zándaca laaca nin qué zaquiiñeʼ chapa ne llave. Guiráʼ ni runi huará laanu de ansiedad zaree cani ne maʼ qué ziuuruʼ dxi guihuinni cani.

16, 17. a) ¿Ximodo zuni sentir cani guilá dxi gueeda Armagedón? Bidii ti ejemplu. b) ¿Xi naquiiñeʼ gúninu para ganda guilanu ra guinitilú guidxilayú yooxhoʼ stiʼ Binidxabaʼ riʼ?

¹⁶ ¿Ximodo zuni sentirnu ora guchaa modo nabani binni? Nagana guiníʼ íquenu ximodo. Nabé triste modo nabáninu maʼ xadxí ne zándaca dede maʼ qué rudiʼnu cuenta pabiáʼ estrés nápanu pur laani. Zándaca nuu binni nabeza gaxha de estación stiʼ tren maʼ biaacaʼ gunadiágacaʼ stale ruidu. Ne ca binni ni nabeza gaxha de ti basureru zándaca laaca maʼ biaacaʼ xhoʼ yuudxuʼ. Peru pa maʼ qué ñaca ruidu ne qué ñuu xhoʼ yuudxuʼ la? jma galán ñuni sentir binni. Zacaca nga zuni sentirnu ora cuee Jiobá guiráʼ cosa malu ni nabaninenu.

¹⁷ ¿Xi chichuu lugar stiʼ estrés ni runiná laanu yaʼ? Salmo 37:11 ná lu ca dxi ni zeeda ca zabani binni nayecheʼ purtiʼ «ziuu stale guendariuudxi». ¿Cadi dxandíʼ ratadxí ladxidoʼno gánnanu ndiʼ nga ni racalaʼdxiʼ Jiobá para laanu la? Ca dxi ra nabé raca estresar binni riʼ, gúninu guiráʼ ni gándatiʼ pur chuʼnu gaxha de Jiobá ne de organización stiʼ. Nabé risaca ni cabézanu gaca lu ca dxi ni zeeda ca, nga runi naquiiñeʼ guiníʼ íquenu de laani gatigá. Gúninu stipa pur guiénenu dxandíʼ zaca ni ne güínenu sti binni de laani (1 Timoteo 4:15, 16; 1 Pedro 3:15). Pa gúninu ni la? zalanu dxi guinitilú guidxilayú malu stiʼ Binidxabaʼ riʼ ne qué ziuu dxi gusaana de chuʼnu nayecheʼ.