Biiyaʼ guiraʼ ni nuu lu sitiu riʼ

guyé lu índice

Cadi gusaana de guiniisinu en sentidu espiritual

Cadi gusaana de guiniisinu en sentidu espiritual

«Lasá modo rusiidi Espíritu Santu laatu» (GÁL. 5:16).

DIIDXAʼ RIUUNDAʼ: 136 NE 10

1, 2. a) ¿Xi bidii ti hermanu cuenta? b) ¿Xi bíʼnibe para biʼniʼ chaahuibe guendanagana ni bidxaagalube?

GUYUUNISA Robert dxi naca ti jovenhuiiniʼ, peru huaxiéʼ bisisácabe cani dxandíʼ rusiidiʼ Biblia. Laabe guniʼbe: «Qué ñuu dxi ñuneʼ cosa malu, peru bineʼ xhiiñaʼ Jiobá purtiʼ si maʼ biaaʼ guneʼ ni. Ruluíʼ si naguidxi nuaaʼ en sentidu espiritual, purtiʼ qué ñaadxaʼ ca reunión que ne stale biaje bineʼ de precursor auxiliar lu ti iza. Peru bineʼ sentir cayaadxaʼ xiixa naa».

2 Dxiruʼ bichaganabe bienebe xiñee nuube zaqué. Nuu biaje riguitenebe xheelabe ra rúnicabe pregunta de cani rusiidiʼ Biblia. Peru xheelabe naca ti gunaa espiritual ne nanna ca respuesta que. Peru laabe guiráʼ biaje que rituí lube purtiʼ nin cadi biaʼsi ricábibe ne biʼniʼ sentirbe casi ora qué gánnabe gastiʼ. Ngue runi guníʼ íquebe: «Pa naa nga chigacaʼ xaíque stiʼ xheelaʼ en sentidu espiritual la? caquiiñeʼ guneʼ xiixa». Ne zaqué bíʼnibe ni. Laabe guníʼbe: «Bineʼ estudiar Biblia ne qué nusaanaʼ de ñuneʼ ni, ne oraqueruʼ chaahuiʼ chaahuiʼ bieneʼ xi ná ni». Pur biʼniʼ estudiarbe Biblia, biénebe cani dxandíʼ rusiidiʼ ni, ne ni jma risaca nga, jmaruʼ si guca xhamígube Jiobá.

3. a) ¿Xi rizíʼdinu pur ni bizaaca Robert? b) ¿Xi ca pregunta zacábinu lu tema riʼ?

3 Ni bizaaca Robert ca rusiidiʼ ni laanu caadxi cosa nabé risaca. Zándaca maʼ nánnanu caadxi cosa de lu Biblia, o qué riáʼdxanu  nin ti reunión ne runi predicarnenu congregación. Peru cadi caníʼ diʼ nga nácanu ti binni espiritual. Laaca zándaca maʼ biniisinu caadxi en sentidu espiritual, peru ora guiduʼyaʼ chaahuinu ximodo nuunu la? rudiʼnu cuenta caquiiñeruʼ guni mejorarnu (Filip. 3:16). Lu tema riʼ zacábinu chonna pregunta ni zacané laanu cadi gusaananu de guiniisinu en sentidu espiritual. Primé, ¿xi zacané laanu gánnanu ximodo nuunu en sentidu espiritual? Guiropa, ¿xi caquiiñeʼ gúninu para gácanu ti binni jma espiritual? Ne guionna, pa gácanu ti binni espiritual, ¿ximodo zacané ni laanu lu xquendanabáninu?

GUIDÚʼYANU XIMODO NUUNU EN SENTIDU ESPIRITUAL

4. ¿Tuu nga cani naquiiñeʼ chinanda ni ná conseju ni zeeda lu Efesios 4:23, 24?

4 Para gúcanu xpinni Dios la? bichaʼnu stale cosa lu xquendanabáninu. Ne qué nusaana de nuchaʼnu neca maʼ guyuunísanu. Biblia ná: «Naquiiñe usihuinni tu ma nacubi tu dede ndaani ladxidóʼ to ne idubi xquenda biaani tu» (Efes. 4:23, 24). Lu diidxaʼ griegu ni gucuá Biblia, ca diidxaʼ «naquiiñe usihuinni tu ma nacubi tu» riníʼ cani cadi naquiiñeʼ gusaana de gúnicabe ni. Cumu nácanu binni ruchee la? guiranu nuu paraa caquiiñeʼ guchaʼnu. Dede cani maʼ ziné stale iza de cayuni ni ná Jiobá caquiiñeʼ gapa laa en sentidu espiritual (Filip. 3:12, 13).

5. ¿Xi pregunta zacané laanu gánnanu ximodo nuunu en sentidu espiritual?

5 Para cadi gusaana de gácanu ti binni espiritual ne guni mejorarnu la? naquiiñeʼ guiduʼyaʼ chaahuinu ximódopeʼ nuunu. Pa nahuiininu o pa maʼ huaniisinu, guiranu zanda guinabadiidxanu laca laanu: «¿Ñee zeʼ dxi jma naguidxi nuaaʼ en sentidu espiritual la? ¿Ñee cusihuinneʼ nacaʼ casi naca Cristu la? Pur modo nacaʼ ne pur cani runeʼ ra reunión, ¿xi riníʼ cani de naa pue? Ora maʼ cayuéʼ diidxaʼ, ¿ximodo rusihuinni cani xipeʼ nga racalaʼdxeʼ guneʼ lu xquendanabaneʼ? Cani ruundaʼ, modo racuaʼ lari ne modo ruzuchaahueʼ, ne modo ricaaʼ conseju gudiicabe naa, ¿xi rusihuinni cani de naa? ¿Xi runeʼ ora ruquiinde xiixa naa gucheeʼ? ¿Ñee nacaʼ ti xpinni Cristu ni maʼ biniisi lu stiidxaʼ Dios la?» (Efes. 4:13). Ra guicábinu ca pregunta riʼ zacané cani laanu gánnanu pabiáʼ maʼ biniisinu en sentidu espiritual.

6. ¿Xiruʼ caquiiñeʼ gúninu para gánnanu ximodo nuunu en sentidu espiritual?

6 Para gánnanu ximodo nuunu en sentidu espiritual la? nuu biaje caquiiñeʼ gacané xcaadxi xpinni Cristu laanu. Apóstol Pablo guníʼ: ti binni ni qué gapa espíritu santu la? qué rudii cuenta pa qué riuulaʼdxiʼ Dios cani runi. Peru, ti binni espiritual la? ruuyaʼ ca cosa ca casi ruuyaʼ Dios cani ne nanna qué riuuláʼdxibe modo nabani ca binni ni runi ni ná ique (1 Cor. 2:14-16; 3:1-3) Cumu ca ancianu ca riníʼ íquecaʼ casi riníʼ ique Cristu la? nagueendaca rudiicabe cuenta ora tuuxa maʼ qué riníʼ ique casi riníʼ ique ti binni espiritual. Pa guizaacanu ni bizéʼtenu riʼ ne gacalaʼdxiʼ ca ancianu gacanecaʼ laanu, ¿ñee zinándanu conseju ni gudiicabe laanu la? Pa chinándanu cani, zusihuínninu racaláʼdxinu gácanu ti binni jma espiritual (Ecl. 7:5, 9).

XIMODO CHUʼNU NAGUIDXI EN SENTIDU ESPIRITUAL

7. ¿Xiñee cadi caquiiñeʼ si gánnanu cani zeeda lu Biblia para gácanu ti binni espiritual?

7 Cadi guiaandaʼ laanu cadi caquiiñeʼ si gánnanu de lu Biblia para gácanu ti binni espiritual. Rey Salomón gunna stale cosa de Jiobá. Dede gucuá caadxi cosa ni guniʼbe que ndaaniʼ Biblia. Peru bicheenebe Jiobá (1 Rey. 4:29, 30; 11:4-6). Nga runi cadi caquiiñeʼ si gánnanu cani zeeda lu Biblia, sínuque cadi gusaana de gácanu ti binni espiritual (Col. 2:6, 7). ¿Ximodo zanda gúninu ni yaʼ?

8, 9. a) ¿Xi zacané laanu para cadi gusaana de chuʼnu naguidxi en sentidu espiritual? b) ¿Xi jma naquiiñeʼ guicá íquenu ora guni estudiarnu ne ora guiníʼ íquenu cani ridúʼndanu? (Biiyaʼ ca foto ni zeeda ra ruzulú tema riʼ).

 8 Bizeeteʼ Pablo lú ca xpinni Cristu de primé siglu que naquiiñeʼ gúnicaʼ stipa pur guiniisicaʼ lu stiidxaʼ Dios (Heb. 6:1). Tiempu riʼ, laaca naquiiñeʼ gúninu ni guníʼ Pablo riʼ. Para ganda gúninu ni la? nabé risaca guni estudiarnu libru «Cadi guixélenu de Dios ni nadxii laanu». Ra guni estudiarnu ni zacané ni laanu gúninu ni ná ca principiu ni zeeda lu Biblia lu xquendanabáninu. Pa maʼ biluxe bidúʼndanu ni la? zanda guidúʼndanu xcaadxi publicación ni gacané laanu chuʼ fe stinu naguidxi (Col. 1:23). Ne laaca naquiiñeʼ guni orarnu ne guiníʼ íquenu ximodo gúninu cani maʼ bizíʼdinu.

9 Ora guni estudiarnu ne ora guiníʼ íquenu cani zeeda lu Biblia, ni jma guicá íquenu nga guiale de ladxidoʼno gusiéchenu Jiobá ne guzúʼbanu stiidxaʼ (Sal. 40:8; 119:97). Ne guizíʼdinu gucáʼnanu ca cosa ni zanda gucueeza laanu de guiniisinu en sentidu espiritual (Tito 2:11, 12).

10. ¿Xi zanda guni ca joven para gácacaʼ ti binni espiritual?

10 Pa ti joven lii, ¿ñee maʼ nápaluʼ xiixa meta espiritual la? Ti hermanu ni runi dxiiñaʼ Betel, ora cheʼ asamblea de circuito ruiʼné ca joven ni chichuunisa diidxaʼ. Rinabadiidxabe laacaʼ xi meta espiritual nápacaʼ. Ni ricabi stale de laacabe rusihuinni ni maʼ nánnacabe xi racaláʼdxicabe: gúnicabe jma lu xhiiñaʼ Jiobá. Caadxi de laacabe racalaʼdxiʼ guni xhiiñaʼ Dios de tiempu completu o chigacané ti lugar ra jma caquiiñeʼ tu guni predicar. Peru nuu biaje, chupa chonna de ca joven ni riniʼné hermanu riʼ qué ridxélacaʼ xi guicábicaʼ laabe. Zándaca purtiʼ riníʼ íquecabe cadi caquiiñeʼ gápacabe meta espiritual. Nga runi naquiiñeʼ guinabadiidxaʼ ca joven ca laca laacaʼ: «¿Ñee riaaʼ reunión ne riguneʼ predicar purtiʼ rabi bixhozeʼ ne jñaa naa guneʼ ni la? ¿O runeʼ ni purtiʼ xhamiguaʼ Jiobá?». Guiranu naquiiñeʼ gápanu meta espiritual, biaʼ tiica iza nápanu, pa joven laanu o pa maʼ huaniisinu. Ndiʼ zacané laanu chuʼnu naguidxi en sentidu espiritual (Ecl. 12:1, 13).

11. a) ¿Xi caquiiñeʼ gúninu para guiniisinu en sentidu espiritual? b) ¿Xi ejemplu zeeda lu Biblia zanda chinándanu?

11 Ora maʼ bidiʼnu cuenta paraa caquiiñeʼ guni mejorarnu la? caquiiñeʼ guchaʼnu. Nabé risaca gúninu ni. Purtiʼ pur laani zanda gápanu guendanabani ni qué zaluxe o gátinu (Rom. 8:6-8). Guiniisinu en sentidu espiritual la? qué riníʼ diʼ ni gácanu perfectu. Ne Jiobá rudii laanu espíritu stiʼ para gacané laanu. Peru neca zacá naquiiñeʼ gúninu stipa. Raca caadxi iza, John Barr, ti hermanu ni guyuu lu Grupu ni Zániruʼ, guniʼbe de ca diidxaʼ ni zeeda lu Lucas 13:24 ne bizeetebe stale xpinni Cristu nagueenda rireecaʼ gana «purtiʼ qué rúnicaʼ stipa pur guiniisicaʼ en sentidu espiritual». Naquiiñeʼ gúninu casi biʼniʼ Jacob, laa qué nusaana de nidxelasaané ti ángel dede ora guluu ndaayaʼ laabe (Gén. 32:26-28). Nabé galán ora guni estudiarnu Biblia. Peru cadi naquiiñeʼ guidúʼndanu ni casi ti historia ni gucuá para si gaca entretenernu. Caquiiñeʼ guiduʼndaʼ chaahuinu ni para guidxélanu perla espiritual ni gacané laanu guiniisinu lu stiidxaʼ Dios.

12, 13. a) ¿Xi zacané laanu guiníʼ íquenu casi riníʼ ique Cristu? b) ¿Ximodo racané ejemplu ne conseju ni bidii Pedro laanu? c) ¿Xi caquiiñeʼ gúninu para gácanu ti binni jma espiritual? (Biiyaʼ cuadru ni láʼ « Xi naquiiñeʼ gúninu para guiniisinu en sentidu espiritual»).

12 Ora rúninu stipa pur gácanu ti binni espiritual la? rudii espíritu santu stiʼ Dios laanu stipa para guchaʼnu modo riníʼ íquenu. Zacá chaahuiʼ chaahuiʼ maʼ zaníʼ íquenu casi riníʼ ique Cristu (Rom. 15:5). Ne racané espíritu ca laanu cadi guiníʼ íquenu puru para laanu ne para gápanu ca cualidad ni riuulaʼdxiʼ Dios (Gál. 5:16, 22, 23). Pa gudiʼnu cuenta  riuuláʼdxinu gápanu cosa risaca o gúninu ni ná íquenu la? cadi guireʼnu gana. Cadi gusaana de guinábanu espíritu santu ne Jiobá zacané laanu para guiníʼ íquenu puru si ni jneza (Luc. 11:13). Cadi guiaandaʼ laanu ni bizaaca apóstol Pedro. Stale biaje qué nusihuínnibe nácabe ti binni espiritual (Mat. 16:22, 23; Luc. 22:34, 54-62; Gál. 2:11-14). Peru qué nireebe gana. Cumu gucané Dios laabe la? chaahuiʼ chaahuiʼ maʼ guníʼ íquebe casi riníʼ ique Cristu. Laanu laaca zanda gúninu zacá.

13 Ne gudiʼdiʼ si tiempu, bizeeteʼ Pedro xi cualidad naquiiñeʼ gápanu, casi gucueezanu laca laanu, cadi guireʼnu gana ne gácanu nachaʼhuiʼ (biindaʼ 2 Pedro 1:5-8). Pa guicá íquenu gápanu ca cualidad riʼ zacané ni laanu cadi gusaana de guiniisinu en sentidu espiritual. Galán pa ninabadiidxanu laanu guiráʼ dxi: «¿Xi caquiiñeʼ guneʼ yannadxí para gacaʼ ti binni jma espiritual?».

GÚNINU NI NÁ CA PRINCIPIU STIʼ BIBLIA LU XQUENDANABÁNINU

14. Pa gácanu ti binni espiritual, ¿ximodo zacané ni laanu lu xquendanabáninu?

14 Pa guiníʼ íquenu casi riníʼ ique Cristu la? zahuinni ni pur modo gaca xpiaʼnu ra dxiiñaʼ o ra scuela, modo guininu ne lu ca decisión ni ricaanu guiráʼ dxi. Ndiʼ zusihuinni cayúninu stipa pur gácanu xpinni Cristu. Pa nácanu ti binni espiritual la? qué zudiʼnu lugar chuʼ xiixa ni gucueeza laanu de gaca xhamígunu Jiobá. Ora chuʼ ni guquiinde laanu gucheʼnu la? zucáʼnanu cani. Ne ora guicaanu xiixa decisión la? zanabadiidxanu laca laanu: «¿Xi principiu zeeda lu Biblia zacané naa gannaʼ xi naquiiñeʼ guneʼ yaʼ? ¿Xi ñuni Cristu pa ñuu lugar stinneʼ yaʼ? ¿Ñee ziuulaʼdxiʼ Jiobá decisión ni guicaaʼ la?». Naquiiñeʼ guiaʼnu guiníʼ íquenu zacá. Guidúʼyanu caadxi ejemplu ni zanda gacané laanu. Ra guidúʼyanu cada tobi de laacani, zuzéʼtenu ti principiu ni zeeda lu Biblia ni zacané laanu guicaanu ti decisión jneza.

15, 16. Ora guiníʼ íquenu casi riníʼ ique Cristu, ximodo racané ni laanu ora: a) cuinu tu guichagananu; b) cuinu tu gaca xhamígunu.

15 Ora cuinu tu guichagananu. Ridxélanu principiu ca lu 2 Corintios 6:14, 15 (biindaʼ ni). Ni guníʼ Pablo riʼ rusihuinni dxichi ni qué zanda diʼ chuʼ ti binni ni napa espíritu santu tobi si né ti binni ni qué gapa espíritu santu. ¿Ximodo zanda gúninu ni ná principiu riʼ ora cuinu tu guichagananu yaʼ?

16 Ora cuinu tu gaca xhamígunu. Guidúʼyanu principiu ni zeeda lu 1 Corintios 15:33 (biindaʼ ni). Ti binni espiritual la? qué zaca xhamigu tuuxa ni zanda gucaa laa gusaana de gaca ti binni espiritual. Guiníʼ íquenu ximodo gúninu ni ná principiu riʼ lu gadxé gadxé situación. Guzéʼtenu ti ejemplu: «¿Ximodo racané ni naa para gannaʼ ximodo iquiiñenu ca red social ca yaʼ? ¿Xi guneʼ ora guni invitar tuuxa naa ni qué runebiaʼyaʼ para quiteniáʼ laa xiixa pur Internet?».

¿Ñee zacané ca decisión ni guicaanu laanu para guiniisinu en sentidu espiritual la? (Biiyaʼ párrafo 17)

17-19. a) ¿Xi ca cosa qué zúninu pa nácanu ti binni espiritual? b) Pa nácanu ti binni espiritual, ¿xi ca meta zaguixhe íquenu ugaandanu? c) Ora nácanu ti binni espiritual, ¿ximodo racané ni laanu ora nápanu guendanagana né sti binni?

17 Cani rucueeza laanu de guiniisinu en sentidu espiritual. Ridxélanu caadxi diidxaʼ ni riguixhená laanu lu Hebreos 6:1 (biindaʼ ni). Ora bizeeteʼ Pablo ca diidxaʼ «usaana nu  modo bibani nu dxi caʼru gunibiáʼ nu stiidxaʼ [Dios]», caniʼbe de cosa ni qué risaca ni rúninu ni qué racané laanu para gácanu jma espiritual. Ca diidxaʼ riʼ zanda gacané cani laanu guicábinu stale pregunta ni zándaca gúninu lu xquendanabáninu. Casi: «¿Ñee nuu xi zabeenduáʼ né ni cayuneʼ riʼ la? o qué lica zaquiiñeʼ ni? ¿Ñee zacaaʼ dxiiñaʼ riʼ para guneʼ ganar jma bueltu la? ¿Xiñee cadi naquiiñeʼ guieeguaʼ xiixa grupu ni racalaʼdxiʼ guni chaahuiʼ guidxilayú riʼ?».

¿Ñee zacané ca decisión ni guicaanu laanu para gápanu meta espiritual la? (Biiyaʼ párrafo 18)

18 Meta espiritual. Lu ti discursu ni bidii Jesús lu ti dani, bisiidibe laanu xi meta zanda quixhe íquenu ugaandanu (Mat. 6:33TNM). Ti binni espiritual la? runi ni ná Reinu stiʼ Dios primé lu xquendanabani. Pa gúninu ni ná principiu riʼ zacané ni laanu gánnanu xi decisión guicaanu ora guinabadiidxanu laca laanu: «¿Ñee ziaaʼ universidad la? o coʼ? ¿Ñee zacaaʼ xiixa dxiiñaʼ ni cudiicabe naa la?».

¿Ñee zacané ca decisión ni guicaanu laanu para guyúbinu chuʼnu galán né xcaadxi la? (Biiyaʼ párrafo 19)

19 Guendanagana. Ti cosa ni zacané laanu ora nápanu xiixa guendanagana né sti binni nga chinándanu conseju ni bidii Pablo congregación ni guyuu Roma (Rom. 12:18). Laanu ca xpinni Cristu, rúninu stipa pur cadi chuʼdindenenu guirutiʼ. ¿Xi rúninu ora nápanu xiixa guendanagana né tuuxa? ¿Ñee raca nagana para laanu gucaʼdiáganu ni gábicabe laanu la? o runibiáʼcabe laanu casi ti binni ni ruyubi chuʼ galán né xcaadxi? (Sant. 3:18).

20. ¿Xiñee racaláʼdxiluʼ guiniisiluʼ en sentidu espiritual?

20 Casi rusihuinni ca ejemplu riʼ, ora riníʼ íquenu ca principiu zeeda lu Biblia racané cani laanu guicaanu decisión ni gusihuinni nácanu binni espiritual. Nga racané para guibáninu jma nayecheʼ. Robert, ni bizéʼtenu ora bizulunu que, ná: «Ora dxandipeʼ beeda gapaʼ ti amistad né Jiobá, jma jneza bineʼ dxiiñaʼ casi xaíque ndaaniʼ familia stinneʼ. Bineʼ sentir bidxá tipa ladxiduáʼ ne guyuaaʼ jma nayecheʼ». Zabeendunu ni galán cásica laabe pa ni jma guisaca para laanu nga guiniisinu en sentidu espiritual. Pa gúninu ni la? jma galán zabáninu yanna ne lu ca dxi ni zeeda ca zacaanu ti «enda nabani ni qué zaluxe» (1 Tim. 6:19).