Biiyaʼ guiraʼ ni nuu lu sitiu riʼ

guyé lu índice

 HISTORIA STINNEʼ

Gastiʼ ni nagana para Jiobá

Gastiʼ ni nagana para Jiobá

NI MÁLASI binadiaga xheelaʼ, Mairambubu, ca diidxaʼ riʼ ndaaniʼ autobús: «Maʼ qué ziuu guendaguti ne zabani ca gueʼtuʼ sti biaje». Guyuuláʼdxibe ni binadiágabe que ne gucaláʼdxibe gánnabe jma. Ngue runi ora gulezadxí autobús que ne biete ca binni que yeugaandabe gunaa ni guníʼ ca diidxaʼ que. Gunaa que láʼ Apun Mambetsadykova ne testigu stiʼ Jiobá laa. Tiempu que, ti peligru nga guiniʼné tuuxa ti Testigu, peru ni bisiidiʼ Apun laadu que bichaa ni xquendanabánidu.

TI DXIIÑAʼ NI RUZULÚ SIADOʼROʼ HASTA ORA GUIAAZIʼ GUBIDXA

Guleʼ lu iza 1937 ndaaniʼ ti koljós o granja ra runi guiráʼ binni dxiiñaʼ, gaxha de Tokmak (Kirguistán). Naca familia stinneʼ de raza kirguís, ne rinidu idioma kirguís. Campesinu bixhozeʼ ne jñaaʼ ne bíʼnicabe dxiiñaʼ ndaaniʼ granja ni binibiáʼcabe casi koljós dede siadóʼ hasta ora guiaaziʼ Gubidxa. Rudiicabe guendaró cani runi dxiiñaʼ raqué, peru ti biaje si riáxacabe lu ti iza. Nagana guca para jñaaʼ gusiniisi laadu, naa ne bizanaʼ jma nahuiiniʼ. Gaayuʼ si iza guyaaʼ scuela, purtiʼ despué bizuluáʼ bineʼ dxiiñaʼ ndaaniʼ koljós que guidubi dxi.

Ca dani ni nuu Teskey Ala-Too

Nabé pobre binni ladu gulézadu que, ne para ugaanda bueltu stidu la? napa xidé gúnidu dxiiñaʼ nadipaʼ ne nabé rusidxaga ni laadu. Nga runi, dxi gucaʼ joven qué lica niníʼ iqueʼ xi pur nabáninu nin xi cabeza laanu lu ca dxi ni zeeda ca. Qué ñuu dxi niníʼ iqueʼ pa nuchaa cani dxandíʼ biziideʼ de Jiobá xquendanabaneʼ nin ni cá íquebe gúnibe para binni guidxilayú. Ñuuladxeʼ ñueniáʼ laatu ximodo bedandá cani dxandíʼ riʼ guidxi Kirguistán ne ximodo bireeche ni lu guidubi territorio stiʼ guidxi riʼ. Bizulú ni ladu guiaʼ, lu región ra biniiseʼ.

BIREECABE DE ESCLAVU NE BEEDANÉCABE NI DXANDÍʼ NDAANIʼ GUIDXI RIʼ

Lu iza 1956 nga bizulú gunna binni ni dxandíʼ de Jiobá ndaaniʼ guidxi Kirguistán. Peru para ganda guicaa xcu ni dxandíʼ que la? napa xidé guchaa ni modo riníʼ ique ca binni que ne nabé nagana ngue. Tiempu que, guyuu guidxi Kirguistán lu Unión Soviética, ne ca testigu stiʼ Jiobá gúcacaʼ neutral ne qué ñuucaʼ lu política stiʼ guiráʼ guidxi ni guyuu lu Unión que (Juan  18:36). Ngue runi, biiyacabe laacaʼ casi enemigu stiʼ Estado comunista ne guzanándacabe laacaʼ. Peru nin ti modo riníʼ ique binni qué zanda gucueeza Stiidxaʼ Dios para chindá ndaaniʼ ladxidóʼ binni ni dxandíʼ racalaʼdxiʼ guiziidiʼ. Ne ti cosa nabé risaca maʼ biziideʼ biaʼ tiempu ni maʼ bibaneʼ riʼ nga «gasti ni nagana» para Jiobá (Mar. 10:27).

Emil Yantzen

Modo guzanándacabe ca Testigu que gucané ni para guireeche mensaje stícabe guidubi Kirguistán. ¿Ximodo yaʼ? Guidxi Siberia laaca guyuu lu Unión Soviética, ne raqué ruseendacabe ca binni ni ruuyacabe casi enemigu stiʼ guidxi que. Ora rundaacabe ca binni que, stale de laacaʼ reedacaʼ Kirguistán. Caadxi de laacabe nga beedanécabe cani dxandíʼ rusiidiʼ Biblia, casi Emil Yantzen, gúlebe Kirguistán lu iza 1919 ne biseendacabe laabe lu ti layú ra raca dxiiñaʼ nadipaʼ ne raqué binibiaʼbe ca Testigu. Biziidiʼ Emil ni dxandíʼ ne biguétabe ndaaniʼ guidxi riʼ lu iza 1956 ne gulézabe gaxha de Sokuluk, lugar ra gulezaʼ. Lu iza 1958 bizulú primé congregación ni nuu Kirguistán.

Victor Vinter

Biaʼ ti iza despué, Victor Vinter, ti hermanu ni bizuubaʼ diidxaʼ ne gudiʼdiʼ lu stale guendanagana, yendeza Sokuluk. Pur gúcabe neutral biteguyoocabe laabe chupa biaje, ne cada biaje que bieguyoobe chonna iza, ne despué bieguyoobe xhii iza ne yenécabe laabe casi esclavu xcaayuʼ iza. Neca guzanándacabe laabe guiráʼ iza riʼ, gastiʼ qué nucueeza de nidale binni ndaaniʼ religión ni dxandíʼ.

BEDANDÁ NI DXANDÍʼ RUSIIDIʼ BIBLIA RA LIDXEʼ

Eduard Warter

Lu iza 1963 maʼ nuu biaʼ 160 Testigu ndaaniʼ guidxi Kirguistán. Stale de laacabe nácacabe de Alemania, Ucrania ne Rusia. Ládecabe nuu Eduard Warter, ti hombre ni guyuu de esclavu ne guyuunisa ndaaniʼ guidxi Alemania lu iza 1924. Lu década stiʼ iza 1940, biseendaʼ ca nazi laabe lu ti campu de concentración, ne caadxi iza despué biseendaʼ ca comunista ni nuu lu Unión Soviética laabe de esclavu sti guidxi. Qué nusaana hermanu riʼ Jiobá ne lu iza 1961 yendézabe ti guidxihuiiniʼ láʼ Kant, gaxha de xquidxeʼ.

Elizabeth Fot; Aksamai Sultanalieva

Laaca guleza ti gunaa Testigu ni bizuubaʼ diidxaʼ láʼ Elizabeth Fot ndaaniʼ guidxi Kant, para gápabe ni guibaninebe la? riguíbabe lari. Cumu nabé galán xhiiñabe la? lade ca cliente stibe nuu doctor, maestru ne xcaadxi binni napa xiixa dxiiñaʼ risaca. Tobi de ca cliente stibe nga ti gunaa láʼ Aksamai Sultanalieva, xheelaʼ ti funcionariu ni runi dxiiñaʼ ra Ministerio Público. Ti biaje yeguuya Aksamai Elizabeth, biʼniʼ Aksamai laabe stale pregunta de xi pur nabáninu ne ximodo nuu ca gueʼtuʼ. Bicabi Elizabeth laabe né Biblia. Ra gudiʼdiʼ tiempu, beeda gaca Aksamai ti gunaa ni biʼniʼ predicar né stale gana.

Nikolai Chimpoesh

Guca nombrar Nikolai Chimpoesh, de guidxi Moldavia, superintendente de circuito tiempu que. Ne biʼniʼ cumplirbe né asignación que casi treinta iza. Cadi riganna si Nikolai ca congregación que, laaca ruuyabe gaca copia stiʼ ca publicación que ne guireeche cani ra nuu binni. Cumu maʼ bidii ca autoridad que cuenta de dxiiñaʼ rúnibe que la? bidii Eduard Warter conseju riʼ laabe: «Ora guinabadiidxacabe lii la? gudxi laacabe reeda ca publicación ca de ra oficina central ni nuu Brooklyn. Biiyadxí lú puliciá stiʼ KGB ca. Qué gápaluʼ xi pur guidxíbiluʼ» (Mat. 10:19).

Gudiʼdiʼ si tiempuhuiiniʼ de guníʼcabe diidxaʼ que, gunábacabe Nikolai guidxiñaʼ ra oficina stiʼ ca puliciá stiʼ KGB ni nuu Kant. Laabe rietenaláʼdxibe: «Gunabadiidxaʼ puliciá que naa paraa ricaadu ca publicación que. Ne naa bicabeʼ laabe reeda cani de Brooklyn. Qué nidxélabe  xi niniʼbe. Bidiibe lugar naa chaaʼ ne maʼ qué ñuu dxi nusendacaabe naa». Nadxibalú guca ca Testigu que ne nagaʼchiʼ bisiidicabe ca noticia stiʼ Reinu ladu guiaʼ de Kirguistán, gaxha de ra nabezaʼ. Ne lu década stiʼ iza 1980, maʼ binadiaga familia stinneʼ ni dxandíʼ rusiidiʼ Biblia. Xheelaʼ, Mairambubu, nga bicaadiaga ni primé.

GUYUULAʼDXIʼ XHEELAʼ GUIZIIDIʼ NI DXANDÍʼ

Ti región stiʼ Kirguistán nga Naryn, de racá nga Mairambubu. Binebiaʼyaʼ laabe lu beeu agosto iza 1974 ra lidxi bizanaʼ. Cásipeʼ biiyaʼ laabe guyuuladxeʼ laabe, ne dxi queca bichaganadu.

Apun Mambetsadykova

Lu beeu enero iza 1981, binadiaga Mairambubu ca diidxaʼ ni bizeeteʼ ra bizulunu que ora biguétabe de luguiaa laga zeedabe ndaaniʼ autobús. Cumu nuu xheelaʼ ganna jma la? gunabadiidxabe gunaa que tu láʼ ne paraa nabeza. Gunaa que gudxi laabe láʼ Apun, peru cumu tiempu que nagaʼchiʼ raca dxiiñaʼ stiʼ ca Testigu la? naquiiñeʼ gápacabe stale cuidadu, lugar de ñábibe xheelaʼ paraa nabézabe la? laabe gunabadiidxabe laa para nabézadu. Guizáʼ nayecheʼ biguetaʼ xheelaʼ ra lídxidu.

«Guizáʼ galán ni binadiaʼgaʼ, ná Mairambubu rabi naa, gudxi ti gunaa naa huidxe si maʼ qué zati binni. Dede ca maniʼ naduxhuʼ maʼ zácacaʼ nadóʼ». Guiráʼ ni gúdxibe naa que, binadiagaʼ cani casi ti cuentu guizáʼ galán ne óraque rabeʼ laabe: «Cuézanu gueedabe ne gusiénebe laanu jma».

Bedaganna Apun laadu chonna beeu despué. Ne gudiʼdiʼ si ti tiempu maʼ yeganna caadxi Testigu de raza Kirguís laadu. Bidxagayaadu guiráʼ cani dxandíʼ bisiidiʼ ca hermana riʼ laadu de Jiobá ne de ni naguixhe ique guni para binni guidxilayú. Para gusiidicabe laadu la? biquiiñecabe libru ni láʼ De paraíso perdido a paraíso recobrado. * Cumu ti libru si riʼ nuu guidxi Tokmak la? bínidu ti copia stini lu nadu.

Tobi de ca cosa bisiidicabe laadu primé nga ni ná profecía ni zeeda lu Génesis 3:15, ni chigaca cumplir pur Rey Mesiánicu ni biʼniʼ nombrar Dios: Jesucristu. Laani nga tobi de cani dxandíʼ rusiidiʼ Biblia ni naquiiñeʼ gunadiaga guiráʼ binni. ¡Ne laani nga razón ni gúpadu para quixhe íquedu guni predicardu! (Mat. 24:14). Qué nindaa, cani bizíʼdidu lu Biblia que bizulú bichaa cani xquendanabánidu.

GUCA REUNIÓN NE GUYUUNÍSACABE NAGAʼCHIʼ

Dxi biʼniʼ invitar ti Testigu de Tokmak laadu ti guendaxheelaʼ, naa ne xheelaʼ nagueendaca bidiʼdu  cuenta maʼ gadxé ca Testigu. Galán guca guendaxheelaʼ que ne maca nexheʼ chaahuiʼ guiráʼ modo guca ni, ne qué ñuu nisadxuʼniʼ luni. Gadxé si ni de xcaadxi guendaxheelaʼ ni huayuudu, ra rixudxi binni, maʼ qué ránnacaʼ xi rúnicaʼ ne riniʼcaʼ diidxaʼ guidxa.

Laaca guyuudu reunión congregación ni nuu Tokmak chupa chonna biaje. Ndaaniʼ guiʼxhiʼ raca ca reunión que pa gudii clima que lugar. Nanna ca hermanu que nanda ca puliciá que laadu, ngue runi guiráʼ biaje rusaanacabe tobi gapa. Ora ganda invierno ridagulisaadu ndaaniʼ ti yoo, ne guyé ca puliciá raqué chupa chonna biaje para gúʼyacaʼ xi rúnidu. Lu beeu julio iza 1982 guyuunísadu ndaaniʼ guiiguʼ Chu ne gupa xidé bínidu ni né stale cuidadu (Mat. 10:16). Guyuudu pur grupuhuiiniʼ ndaaniʼ guiʼxhiʼ que, bíʼndadu diidxaʼ riuundaʼ para gusisácadu Dios ne bicaadiágadu discursu para cani chichuunisa que.

BIʼNIʼ APROVECHARDU OPORTUNIDAD NI GÚPADU PARA GÚNIDU JMA LU XHIIÑAʼ DIOS

Lu iza 1987, gunabaʼ ti hermanu naa chigannaʼ ti binni guyuulaʼdxiʼ guiziidiʼ jma de cani dxandíʼ rusiidiʼ Biblia ne nabeza guidxi Balykchy. Para chindadu raqué la? napa xidé gúnidu ti viaje de tapa hora lu tren. Despué de guyuudu stale biaje yeguni predicardu guidxi Balykchy, bidiʼdu cuenta stale binni riuulaʼdxiʼ ganna jma de mensaje que. Gucané ngue laadu para ganda gúnidu jma lu xhiiñaʼ Dios.

Naa ne Mairambubu nabé guyuudu Balykchy. Casi guiráʼ fin de semana riuudu raqué, riguni predicardu ne rúnidu ca reunión. Cada biaje chuudu que riquiiñedu jma publicación ne rinedu cani ndaaniʼ ti mishok, o ti sacu ra ridxá papa. Purtiʼ apena ti beeu rugaanda chupa mishok ni dxátipa de publicación para gudiʼdu ca binni ni rinabaʼ ca publicación que. Dede lu ca viaje ora maʼ ziuudu ndaaniʼ tren que ne ora maʼ ziúpadu randa runi predicardu binni.

Lu iza 1995 guca ti congregación guidxi Balykchy, xhono iza despué de guyuudu raqué primé biaje. Bínidu stale gastu pur guiráʼ biaje ni bínidu para guni predicardu raqué. ¿Ximodo bínidu ni pa qué gápadu stale bueltu yaʼ? Ti hermanu gucané laadu ra bidii laadu bueltu. Cumu nanna Jiobá racaláʼdxidu gúnidu jma lu xhiiñaʼ la? bixhélebe «ca compuerta stiʼ guibáʼ» para laadu (Mal. 3:10). Ni dxandíʼ nga gastiʼ cosa ni nagana para Jiobá.

GÚPADU DE FAMILIA STIDU NE BIʼNIʼ PREDICARDU JMA

Biʼniʼ nombrárcabe naa ancianu de congregación lu iza 1992. Naa nga gucaʼ primé ancianu de raza kirguís ndaaniʼ guidxi riʼ. Guyuu jma oportunidad para guni servirdu Jiobá ndaaniʼ congregación stidu ni nuu Tokmak. Guzéʼtenu ti ejemplu, gunda bidiʼdu estudiu stale joven de raza kirguís ndaaniʼ caadxi scuela nuu lugar que. Tobi de ca joven que yanna maʼ naca tobi de cani nuu lu Comité de Sucursal ne xhupa de laacabe nácacaʼ precursor especial. Laaca rúnidu stipa pur gacanedu xcaadxi lu ca reunión. Ra bizulú década stiʼ iza 1990, publicación si lu diidxaʼ ruso gúpadu, ne ca reunión que guca cani lu diidxaʼ que. Peru zeʼ dxi jma stale hermanu ni riníʼ diidxaʼ kirguís que guyuu, ngue runi gucaʼ intérprete para laacabe. Ngue gucané laacabe para jma guiénecabe cani dxandíʼ rusiidiʼ Biblia.

Naa né xheelaʼ ne xhono de ca xiiñidu lu iza 1989

Naa ne Mairambubu laaca nabé guyuu xhiiñadu ra  biʼniʼ tenderdu ca xiiñidu. Yeguni predicarnedu laacabe ne yenedu laacabe guiráʼ reunión. Dxi napa Gulsayra, dxaapahuiiniʼ stidu 12 iza, nabé riuuláʼdxibe guiníʼnebe guiráʼ binni zidiʼdiʼ lu calle de Biblia. Guiráʼ xiiñidu riuuláʼdxicaʼ guiziidicaʼ textu stiʼ Biblia de memoria. Nabé huayuu xhiiñaʼ ca xiiñidu ndaaniʼ congregación, ne ngaca huayuni ca xhiágadu despué. De lade 9 xiiñidu ne 11 xhiágadu ni nabániruʼ, 16 de laacabe nácacaʼ xpinni Jiobá o riecaʼ ca reunión ca né bixhózecaʼ ne jñaacaʼ.

MAʼ BIDXAA STALE COSA

Guizáʼ nidxagayaa ca hermanu ni biʼniʼ predicar lugar riʼ lu década stiʼ iza 1950 pa ñuuyacaʼ guiráʼ ni huadxaa dede dxiqué. Ti ejemplu de laani nga dede lu década stiʼ iza 1990 jma maʼ libre laadu para guni predicardu ne para guidagulisaadu pur grupu jma naroʼbaʼ.

Naa né xheelaʼ canayuni predicardu

Lu iza 1991, naa ne xheelaʼ guyuudu Kazajistán, ndaaniʼ guidxi Alma-Atá (yanna lani Almaty), para chuudu ti asamblea naroʼbaʼ ne ngue nga primé biaje chuudu tobi. Ne lu iza 1993 gúpadu primé asamblea stidu ndaaniʼ guidxi Kirguistán ndaaniʼ Estadio Spartak ni nuu guidxi Biskek. Bindaa ca publicador que ti semana para bisiacaʼ estadiu que ante ganda asamblea que. Nabé bidxagayaa encargadu que dede bidii lugar iquiiñedu ni sin niguíxedu.

Sti cosa nabé risaca bizaaca nga lu iza 1994 guca imprimir primé publicación stidu lu diidxaʼ kirguís. Yanna riʼ ndaaniʼ sucursal ni nuu Biskek raca traducir ca publicación ca lu diidxaʼ kirguís. Ne dede iza 1988, maʼ bidii gobiernu derechu laadu para guni predicardu ndaaniʼ guidxi Kirguistán. Maʼ nácadu jma de 5,000 publicador ne nuu 83 congregación ne 25 grupu lu xcaadxi diidxaʼ casi chino, inglés, kirguís, ruso ne lenguaje de señas ruso, turco, uigur ne uzbeko. Ca hermanu riʼ zeedacaʼ de gadxé gadxé ladu, peru cayúnicaʼ ni ná Jiobá juntu. Nanna dxíchinu laabe nga gucanebe para bichaa guiráʼ ni.

Bichaa Jiobá xquendanabaneʼ. Biniiseʼ ndaaniʼ ti familia pobre ni guca campesinu ne gaayuʼ si iza guyaaʼ scuela. Neca zacá, maʼ bidii Jiobá lugar naa gacaʼ ancianu ndaaniʼ congregación ne gusiideʼ cani dxandíʼ ni zeeda lu Biblia xcaadxi binni ni jma guyé scuela que naa. Peru, nánnanu runi Jiobá dede cani qué randa riníʼ íquenu. Guiráʼ ni maʼ gudideʼ maʼ bicaa ni naa cadi gusaanaʼ de gusiideʼ xcaadxi binni de Jiobá, ti Dios ni «gasti ni nagana» para laa (Mat. 19:26).

^ párrafo 21 Ni gulee ca testigu stiʼ Jiobá. Maʼ qué riree ni.