Biiyaʼ guiraʼ ni nuu lu sitiu riʼ

guyé lu índice

Gadxepeʼ nga cani runi ni ná Jiobá de cani qué runi ni nabe

Gadxepeʼ nga cani runi ni ná Jiobá de cani qué runi ni nabe

«Ne [...] zuuyatu maʼ gadxé nga ti binni runi ni jneza ne maʼ gadxé nga ti binni malu» (MAL. 3:18).

DIIDXAʼ RIUUNDAʼ: 29 NE 53

1, 2. Laanu ca xpinni Dios, ¿xiñee naquiiñeʼ gápanu laanu tiempu riʼ? (Biiyaʼ ca foto ni zeeda ra ruzulú tema riʼ).

STALE doctor ne enfermera runi tendercaʼ binni ni napa xiixa guendahuará ni ricá. Rúnicabe ni purtiʼ racaláʼdxicabe gacanécabe laacaʼ. Peru pa qué racaláʼdxicabe guicá guendahuará ca laacabe la? naquiiñeʼ gápacabe laacabe. Cásica ejemplu riʼ, laanu ca xpinni Jiobá laaca nabáninu ne rúninu dxiiñaʼ lade binni ni napa gadxé gadxé xpiaʼ ne gadxepeʼ laacaʼ de ca cualidad stiʼ Dios. Pa qué racaláʼdxinu guicá modo laacabe laanu, naquiiñeʼ gápanu laanu.

2 Lu ca últimu dxi riʼ, qué runi respetar binni ca ley stiʼ Dios ni caníʼ xi nga jneza ne ni cadi jneza. Lu guiropa carta ni bicaa apóstol Pablo ra nuu Timoteo guniʼbe ximodo zaca ca binni ni nuu zitu de Dios. Jma zahuinni zaca xpiaʼ binni zacá ra mayaca guinitilú sistema riʼ (biindaʼ 2 Timoteo 3:1-5, 13). Neca qué riuuláʼdxinu modo naca binni yanna riʼ, zanda guzulú guiníʼ íquenu, guininu ne gúninu casi runi ca binni ni nuu gaxha de laanu (Prov. 13:20). Nga runi, lu tema riʼ zadúʼyanu ximodo nga gadxepeʼ modo naca binni lu ca últimu dxi riʼ de ca cualidad ni napa ca xpinni Dios. Laaca zadúʼyanu xi zanda gúninu para cadi guicá xpiaʼ ca binni ca laanu ne ximodo gacanenu xcaadxi binni gunibiáʼ Dios.

3. ¿Tuu nga cani zusihuinni zaca xpiaʼ casi riete lu 2 Timoteo 3:2-5?

 3 Casi maʼ bidúʼyanu ca, apóstol Pablo guníʼ «jma nagana zaca ni» lu ca últimu dxi riʼ. Despué bíʼnibe ti lista ra bicaabe 19 modo zaca xpiaʼ binni lu ca últimu dxi riʼ ne cadi galán diʼ cani. Lu Romanos 1:29-31 zeeda ti lista zacagá, peru carta ni bicaabe ra nuu Timoteo neni caadxi diidxaʼ ni qué riete nin sti lugar lu Escrituras Griegas Cristianas. Lu lista ni bizéʼtenu últimu riʼ, bizulú Pablo guníʼ ca diidxaʼ riʼ «zuyubi binni». Né ca diidxaʼ guniʼbe riʼ, caniʼbe de hombre ne gunaa, purtiʼ guiráʼ tu zanda gusihuinni napa xpiaʼ ni cadi galán. Peru cadi guiráʼ diʼ binni zaca zacá. Ca xpinni Cristu gadxé modo zácacaʼ (biindaʼ Malaquías 3:18).

MODO RIDÚʼYANU LACA LAANU

4. ¿Ximodo niniʼluʼ naca ti binni ni rudxiibaʼ laca laa?

4 Guníʼ si Pablo stale tu laa zuyubi para laa si ne nisi bueltu zacá ique la? laaca guniʼbe stale tu laa zuni laa nandxóʼ ne zaca ca nayáʼ ne zudxiibacaʼ laca laacaʼ. Clase binni riʼ riníʼ íquecaʼ jma risácacaʼ que xcaadxi pur ca cosa ni rúnicaʼ, pur modo rihuínnicaʼ, pur bueltu sticaʼ, ne racaláʼdxicaʼ gusisaca xcaadxi laacaʼ ne guni adorárcabe laacaʼ. Ti hombre ni nanna stale bicaa sicaríʼ de ca binni rudxiibaʼ laca laa: «Nuu ti altarhuiiniʼ ndaaniʼ ladxidóʼcabe ne laca laacabe ruzuxíbicabe nezalúcabe». Nuu binni ná guizáʼ feu nga gudxiibaʼ tuuxa laca laa dede ca binni ni rudxiibaʼ laca laa qué riuuláʼdxicaʼ ni ora gúʼyacaʼ naca sti binni zacá.

5. ¿Xi bizaaca caadxi xpinni Dios ni ruzuubaʼ diidxaʼ?

5 Nanna dxíchinu nanalaʼdxiʼ Jiobá gudxiibaʼ tobi laca laa. Biblia ná nanaláʼdxibe «bizalú cani rudxiibaʼ laca laa» (Prov. 6:16, 17). Ora rudxiibaʼ tobi laca laa ruxheleʼ ni laa de Dios (Sal. 10:4). Ne laani nga tobi de ca modo naca Binidxabaʼ (1 Tim. 3:6). Triste guininu ni, dede né caadxi xpinni Dios ni qué nusaana laa gucuá ni laacaʼ ne bidxiibacaʼ laacaʼ. Tobi de laacabe nga Uzías. Laabe gúcabe rey de Judá, stale iza bizuubabe stiidxaʼ Dios, peru Biblia ná cásipeʼ «gurí dxiichibe casi rey bichabe bi yánnibe para si bidxélabe guendananá stibe, ne bicheenebe Jiobá, Dios stibe, ne guyuube ndaaniʼ yuʼduʼ stiʼ Jiobá para guzaaquibe guʼxhuʼ lu altar ra riaʼquiʼ guʼxhuʼ». Gudiʼdiʼ si iza, rey Ezequías laaca bidxiibaʼ laca laa, peru ti tiempu si bíʼnibe ni (2 Crón. 26:16; 32:25, 26).

6. a) ¿Xi ñándaca nucaa David nudxiibaʼ laca laa? b) ¿Xi gucané laabe para cadi nusaana de ñácabe humilde?

6 Nuu tu laa rudxiibaʼ laca laa pur modo rihuinni, pur nabé runibiáʼ binni laa, pur nanna guxhidxi xiixa o galán modo ruundaʼ, pur stipa stiʼ o purtiʼ riuulaʼdxiʼ xcaadxi modo laa. Gupa David guiráʼ ni bizéʼtenu riʼ, peru qué nusaana de ñaca humilde. Guzéʼtenu ti ejemplu, dxi biitibe Goliat, gudxi rey Saúl laabe zanda guichaganabe xiiñidxaapaʼ. Peru David bicabi: «¿Tu nacaʼ naa ne tu naca familia stinneʼ, tu naca familia stiʼ bixhozeʼ ndaaniʼ guidxi Israel para gueeda gacaʼ xpigudxi rey yaʼ?» (1 Sam. 18:18). ¿Xi gucané David para cadi nusaana de ñaca humilde yaʼ? Qué ñaandaʼ laabe nápabe ca cualidad que, nánnabe gúnibe ca cosa que ne nápabe ca privilegiu que purtiʼ guca Dios humilde né laabe ne biiyadxí laabe (Sal. 113:5-8). Biénebe Jiobá nga bidii laabe guiráʼ ni galán ni nápabe (bichaaga ni né 1 Corintios 4:7).

7. ¿Xi zacané laanu gácanu humilde?

7 Tiempu riʼ, ca xpinni Jiobá rúninu stipa pur gácanu humilde casi guca David. Ridxagayaanu ora gánnanu naca Jiobá humilde neca laa nga Rey lu guidubi universu (Sal. 18:35). Qué ridúʼyanu conseju stiʼ Dios riʼ casi guendariguite: «Nga runi laguiá binni ne lagaca nachaʼhui ne laacaʼ. Cadi udxiiba tu laca laatu, lagaca nadóʼ, cadi idxiichi tu neca uyubi  cabe uchiichi cabe laatu» (Col. 3:12). Ne laaca nánnanu ora nadxii ti binni qué ruchá naróʼ stiʼ lú xcaadxi, ne qué runi laa nandxóʼ (1 Cor. 13:4). Ne qué riaandaʼ laanu, cásica zanda iguudxi xheelaʼ ca hermana pa guʼyaʼ xheelacaʼ ruzuubacaʼ diidxaʼ, zacaca zanda chuulaʼdxiʼ stale binni guidxiña Jiobá pa gúʼyacaʼ humilde laanu, ca xpínnibe (1 Ped. 3:1).

XIMODO RUNI TRATARNU XCAADXI BINNI

8. a) ¿Ximodo ruuyaʼ caadxi binni ora qué ruzuubaʼ tuuxa stiidxaʼ bixhoze ne jñaa? b) ¿Xi runi mandar Stiidxaʼ Dios xiiñiʼ binni guni?

8 Laaca bisiene Pablo ximodo zuni tratarsaa binni laa lu ca últimu dxi riʼ. Casi ora guniʼbe maʼ qué zuzuubaʼ binni stiidxaʼ jñaa ne bixhoze. Tiempu ni nabáninu riʼ, ca libru, ca película ne ca programa ni ridiʼdiʼ lu televisión rusihuínnicaʼ normal nga gaca binni zacá ne cadi malu ni. Peru ni dxandíʼ nga ora qué ruzuubaʼ tuuxa diidxaʼ runiná ni familia, ni racané para chuʼ guiráʼ binni tobi si. Maʼ xadxí bidiicabe cuenta dxandíʼ ni bizéʼtenu riʼ. Risaca gánnanu pa quiñe ti hombre bixhoze o jñaa dxiqué ndaaniʼ guidxi Grecia la? runiti guiráʼ derechu ni napa ndaaniʼ guidxi que. Ne ley stiʼ Roma que ná nabé malu nga quiñe tuuxa bixhoze o jñaa purtiʼ casi ñaca ñuutibe tuuxa pa gúnibe ni. Cásica Escrituras Hebreas ne Escrituras Griegas Cristianas runi mandar cani ca baʼduʼ ca gusisácacaʼ bixhózecaʼ ne jñaacaʼ (Éx. 20:12; Efes. 6:1-3).

9. ¿Xi zacané ca joven ca para guzuubacaʼ stiidxaʼ bixhózecaʼ ne jñaacaʼ?

9 ¿Xi zanda guni ca baʼduʼ ca para cadi guicá xpiaʼ cani qué ruzuubaʼ diidxaʼ ni nuu yanna riʼ laacaʼ yaʼ? Guiníʼ íquecabe ni maʼ huayuni bixhózecabe ne jñaacabe pur laacabe. Ne pa guiénecabe racalaʼdxiʼ Dios, Bixhózenu, guzúʼbanu diidxaʼ la? dede zudiicabe xquíxepeʼ pur laani. Ora riníʼ ca joven ca cosa galán de bixhózecaʼ ne jñaacaʼ, racanécabe xcaadxi joven guni respetarcaʼ bixhózecaʼ ne jñaacaʼ jma. Dxandíʼ, pa qué gannaxhii binni ca xiiñiʼ, zándaca zaca nagana para laacabe guzuubacabe diidxaʼ de guidubi ladxidóʼcabe. Peru, pa runi sentir ca baʼduʼ ca dxandíʼ nadxii bixhózecaʼ ne jñaacaʼ laacaʼ, zacaláʼdxicaʼ gusiéchecaʼ laacabe dede né ora chuʼ xiixa ni gucaa laacaʼ cadi guzuubacaʼ diidxaʼ. Ti joven ni naca Testigu láʼ Austin ná: «Dxandíʼ, nuu biaje rudii gana naa guneʼ cosa ni cadi jneza, peru bixhozeʼ ne jñaaʼ riguíxhecaʼ xi guneʼ ne jneza cani, rusiénecabe naa xiñee riguíxhecabe cani ne qué rusaanacabe de guiniʼnécabe naa. Guiráʼ ndiʼ gucané naa para guzuubaʼ diidxaʼ. Biiyaʼ bizaaláʼdxicabe naa guiráʼ ora, ne ngue bicaa naa gusiecheʼ laacabe».

10, 11. a) ¿Xi xcaadxi modo cadi galán zaca xpiaʼ binni ni zusihuinni cadi nadxiicaʼ stobi? b) ¿Dede pabiáʼ nga zannaxhii cani dxandíʼ xpinni Cristu xcaadxi binni?

10 Pablo bizeeteʼ xcaadxi modo cadi galán zaca xpiaʼ binni ni zusihuinni cadi nadxiicaʼ xcaadxi. Despué de guniʼbe «qué zuzuuba ca stiidxa jñaa ca ne bixhoze caʼ ne qué zulabi ca laacabe», bizeetebe zabani binni modo ná ique, purtiʼ zacá nga cani qué rudii xquíxepeʼ pur ca cosa galán ni runi xcaadxi pur laacaʼ. Laaca guniʼbe stale binni maʼ nin zanna pa nuu Dios ne qué ziacaʼ guirutiʼ o qué zanacaʼ guni perdonarcaʼ guirutiʼ. Zaguiñeyucaʼ stiidxaʼ Dios ne zutoocaʼ ca xhamígucaʼ, purtiʼ zaniʼcaʼ cosa feu ne diidxaʼ ni guniná xcaadxi binni, dede né de Dios zaniʼcaʼ. Ne laaca zazacaʼ zaniʼcaʼ binni purtiʼ zaniʼcaʼ ni cadi dxandíʼ para si gusaanacaʼ mal xcaadxi binni. *

11 Cani runi adorar Jiobá dxandipeʼ rusihuínnicaʼ nadxiicaʼ xcaadxi binni ne nga runi laacabe gadxé de ca binni ni qué rusihuinni guendarannaxhii. Ne zacá huayaca ni dede dxiqué. Jesús guníʼ ca mandamientu ni jma  risaca de lu ley stiʼ Moisés que nga primé gannaxhiinu Dios ne guiropa gannaxhiinu xcaadxi binni. Últimu ni bizeetebe riʼ nga ti modo rusihuínninu guendarannaxhii ni láʼ agápe (Mat. 22:38, 39). Laaca guniʼbe zunibiáʼcabe cani dxandíʼ xpinni Cristu pur guendarannaxhii ni zusihuínnicaʼ ládecaʼ (biindaʼ Juan 13:34, 35). Dede zannaxhiicabe ca enemigu stícabe (Mat. 5:43, 44).

12. ¿Ximodo bisihuinni Jesús nadxii xcaadxi binni?

12 Nabé naroʼbaʼ guendarannaxhii bisihuinni Jesús napa xcaadxi binni. Guyebe ndaaniʼ guiráʼ guidxi que para guni predicarbe ca diidxaʼ nacubi ne galán stiʼ Reinu stiʼ Dios. Bisiándabe lú cani qué ruuyaʼ, cani nachiitaʼ ñee, cani napa lepra ne cani qué runadiaga, ne laaca gundísabe gueʼtuʼ (Luc. 7:22). Dede gunabe bidiibe xquendanabánibe pur binni guidxilayú, neca stale tu gucananalaʼdxiʼ laabe. Bisihuinni dxíchibe ximodo rannaxhii Bixhózebe. Tiempu riʼ, ca testigu stiʼ Jiobá ni nuu lu guidubi Guidxilayú rinándacaʼ ejemplu stiʼ Jesús ne rusihuínnicaʼ nadxiicaʼ xcaadxi binni.

13. ¿Xi zanda cueendunu pa guluinu nadxiinu xcaadxi?

13 Pa gusihuínninu nadxiinu la? zanda gucaa ni xcaadxi binni chuulaʼdxiʼ gunibiáʼ Bixhózenu ni nuu guibáʼ. Casi ti hombre de Tailandia, guyebe ti asamblea regional ne nabé bidxagayaabe ora bíʼyabe modo nadxii ca hermanu que. Ora biguétabe ra lídxibe, gunábabe gudiicabe estudiu laabe chupa biaje lu ti semana. Biʼniʼ predicarbe xfamiliabe ne xhoopaʼ beeu si de guca asamblea que bidiibe primé discursu stibe ra bíʼndabe Biblia ndaaniʼ Yoo stiʼ Reinu. Pa racaláʼdxinu gánnanu pa nadxiinu xcaadxi binni la? guinabadiidxanu: «¿Ñee runeʼ stipa pur gacaniáʼ xcaadxi ndaaniʼ familia stinneʼ, ndaaniʼ congregación ne ora maʼ ziguneʼ predicar la? ¿Ñee runeʼ stipa pur guuyaʼ xcaadxi casi ruuyaʼ Jiobá laacaʼ la?».

GUEUʼ NE DENDXUʼ

14, 15. a) ¿Ximodo rusihuinni binni napa xpiaʼ casi maniʼ? b) ¿Ximodo maʼ bichaa caadxi binni?

14 Lu ca últimu dxi riʼ, zuni binni xcaadxi cosa ni zusihuinni feu xpiaʼ ne pur nga naquiiñeʼ guixélenu de laacaʼ. Casi stale binni ni  qué runi biaʼ Dios zaca nanaláʼdxicaʼ guiráʼ ni jneza. Xcaadxi traducción ná «qué zannaxhiicaʼ ni jneza» o zácacaʼ «enemigu stiʼ guiráʼ cosa galán». Zácacabe binni ni qué zanda gucueeza de guni ni ná ique ne zuninácabe binni. Ne xcaadxi qué zunilucaʼ xi gúnicaʼ lu diidxaʼ griegu original biquiiñecabe diidxaʼ riʼ para guiníʼcabe de ca binni ni qué rucueeza laca laa ne qué zaníʼ íquecaʼ pa zuninacaʼ xcaadxi pur ni gúnicaʼ.

15 Tiempu riʼ cayaca cumplir ti profecía nabé sicarú zeeda lu Biblia ni maca bizeeteʼ ziuu stale binni ni napa xpiaʼ casi maniʼ zuchaa modo laa (biindaʼ Isaías 11:6, 7). Profecía riʼ ná ca maniʼ duxhuʼ casi gueuʼ ne lión ziuucaʼ tobi si né ca maniʼ ni randa rapa binni casi dendxuhuiiniʼ ne yuzehuiiniʼ. Ne laaca ruzeeteʼ ni ziuu guendariuudxi riʼ guiráʼ ladu «purtiʼ Guidxilayú riʼ zadxá típani de guiráʼ ni rusiidiʼ Jiobá» (Is. 11:9). Ca maniʼ ca qué zanda guiziidicaʼ de Jiobá, nga runi de ni caníʼ profecía riʼ nga ximodo zuchaa binni xpiaʼ.

Zanda guchaa ca principiu stiʼ Biblia xquendanabani binni. (Biiyaʼ párrafo 16).

16. ¿Ximodo huayacané Biblia caadxi binni para guchaacaʼ xpiaʼcaʼ?

16 Nuu stale binni ni guca naduxhuʼ casi ti gueuʼ dxiqué, peru yanna maʼ nuucaʼ tobi si né xcaadxi binni. Zanda guidúʼndanu chupa chonna de ca historia stícabe lu sección ni láʼ «La Biblia les cambió la vida», ni zeeda lu jw.org. Ca binni ni maʼ binibiaʼcaʼ Jiobá ne cayuni sevircaʼ laabe cadi nácacaʼ casi cani ná runi cré Dios peru qué rusihuínnicaʼ guendanandxóʼ stibe. Ca binni riʼ zaniʼcaʼ runi crecaʼ Dios peru pur modo nabánicaʼ zusihuínnicaʼ cadi dxandíʼ ni. Caadxi xpinni Jiobá ni gúcacaʼ naduxhuʼ maʼ nabánicaʼ modo naguixhe Dios ne rusihuínnicaʼ maʼ gadxé laacaʼ purtiʼ maʼ nayá xpídacaʼ ne rúnicaʼ ni jneza (Efes. 4:23, 24). Ra maʼ ziziidiʼ ca binni riʼ de Dios, riénecabe caquiiñeʼ gúnicabe ni ná ca norma stibe. Ndiʼ racané laacabe guchaacabe cani runi crécabe, modo riníʼ íquecabe ne cani rúnicabe. Nagana nga guchaa binni ca cosa riʼ, peru zanda gúnicabe ni purtiʼ racané espíritu santu cani racalaʼdxiʼ guni ni ná Dios de guidubi ladxidóʼ.

«QUÉ CHI IDXAAGU CASI LAACABE»

17. ¿Xi zanda gúninu para cadi guicá xpiaʼ xcaadxi binni laanu?

17 Zeʼ dxi jma zihuinni gadxepeʼ nga cani runi ni ná Dios de cani qué runi ni nabe. Laanu cani rúninu ni nabe, naquiiñeʼ gápanu laanu ti cadi guicá xpiaʼ xcaadxi binni laanu, purtiʼ cadi galán cani. Racaláʼdxinu chinándanu conseju stiʼ Jiobá ra ná cadi guidxaaganu clase binni ni riete lu 2 Timoteo 3:2-5. Dxandíʼ, qué zanda guixélepenu de laacabe, purtiʼ zándaca zuninenu laacabe dxiiñaʼ, zinenu laacabe scuela o tobi si ra zabezanenu laacabe. Ni zanda gúninu nga cadi guiníʼ íquenu ne cadi gúninu casi rúnicabe. ¿Ximodo zanda gúninu ni yaʼ? Para gaca amistad ni napanenu Jiobá jma naguidxi la? naquiiñeʼ guidúʼndanu Biblia ne cuinu binni ni naguixhe ique guni ni nabe para gaca xhamígunu.

18. ¿Ximodo zanda gacanenu xcaadxi binni en sentidu espiritual pur modo rininu ne pur cani rúninu?

18 Laaca naquiiñeʼ gúninu stipa pur gacanenu binni en sentidu espiritual. Guyúbinu oportunidad para guni predicarnu ne guinábanu Jiobá gacané laanu para guininu ni caquiiñeʼ guininu ne órapeʼ caquiiñeʼ gúninu ni. Gábinu binni testigu stiʼ Jiobá laanu. Pa gúninu zacá la? zusisácanu Dios ne cadi laca laanu, purtiʼ galán xpiaʼnu. Maʼ bisiidibe laanu «usaana nu irá ni bini nu dxi caʼru gunibiáʼ nu laabe, ne irá ni riulaʼdxi binni guidxilayú guni, ti ma cadi ibani nu ndaani guidxilayú ri modo na ique nu, sínuque modo riulaʼdxi be» (Tito 2:11-14). Pa chinándanu ejemplu stiʼ Jiobá ne gúninu ni nabe, zuuyaʼ binni laanu ne zándaca guiníʼ caadxi de laacaʼ: «Zinedu laatu, purtiʼ huayunadiágadu nuuné Dios laatu» (Zac. 8:23).

^ párrafo 10 Diidxaʼ griegu ni biquiiñeʼ para «tuuxa ni riníʼ mal de stobi» o tuuxa ni rucaalú nga diábolos. Riquiiñeʼ Biblia diidxaʼ riʼ casi ti título stiʼ Binidxabaʼ, ni rizá riníʼ mal de Dios.