Biiyaʼ guiraʼ ni nuu lu sitiu riʼ

guyé lu índice

Ni rinabadiidxaʼ cani ruundaʼ

Ni rinabadiidxaʼ cani ruundaʼ

¿Xiñee gadxé relatu stiʼ Mateo ne stiʼ Lucas ni caníʼ de ca primé iza bibani Jesús?

Gadxé relatu stiʼ Mateo ne stiʼ Lucas ni caníʼ de ca primé iza bibani Jesús, purtiʼ relatu stiʼ Mateo jma cuzeeteʼ ni de José ne relatu stiʼ Lucas jma cuzeeteʼ ni de María.

Relatu stiʼ Mateo ruzeeteʼ xi biʼniʼ José ora gunna nacaxiiñiʼ María, de bacaandaʼ ni gúpabe ra gudxi ti ángel laabe xii ngue cazaaca, ne ximodo bíʼnibe guiráʼ ni gudxi ángel que laabe (Mat. 1:19-25). Laaca cusiene Mateo gudxi ti ángel José lu sti bacaandaʼ guxooñelú guidxi Egipto laa né familia stiʼ ne bizuubabe diidxaʼ. Laaca cusiénebe lu sti bacaandaʼ biʼniʼ mandar ti ángel José guibiguetaʼ Israel ne bibiguétabe ne gudixhe íquebe cuézabe Nazaret (Mat. 2:13, 14, 19-23). Lu primé ne guiropa capítulo stiʼ Evangeliu stiʼ Mateo, riete lá José gadxe biaje, peru lá María riete tapa si biaje.

Relatu stiʼ Lucas ruzeeteʼ ni de dxi yeganna ángel Gabriel María ne laa yeganna Elisabet ne bisisaca Jiobá né caadxi diidxaʼ guníʼ (Luc. 1:26-56). Laaca ruzeeteʼ ni de ni gudxi Simeón María de xi guiráʼ yuubaʼ chitiidiʼ Jesús despué. Ne ora bizeeteʼ Lucas ni bizaaca dxi napa Jesús 12 iza ne yené familia stiʼ ndaaniʼ yuʼduʼ, bicaabe ca diidxaʼ guníʼ María ne cadi cani guníʼ José. Ne laaca bizeetebe nabé guníʼ ique María guiráʼ ni bizaaca que (Luc. 2:19, 34, 35, 48, 51). Lu primé ne guiropa capítulo stiʼ Evangeliu stiʼ Lucas rieeteʼ lá María 12 biaje, peru José chonna si biaje riete lá. Nga rusihuinni, jma bizeeteʼ Mateo de cani guníʼ ique José ne de cani biʼniʼ, peru Lucas jma bizeeteʼ de cani guníʼ ique María ne de cani biʼniʼ.

Laaca gadxé gadxé genealogía o lista ra zeeda lá ca bixhozególacabe biquiiñeʼ cani bicaa ca relatu riʼ. Mateo bicaa lá guiráʼ ca bixhozegola José ne cudii prueba Jesús nga napa derechu legal para cuí lu trono stiʼ rey David purtiʼ gucuaa José laabe casi xiiñiʼ. ¿Xiñee yaʼ? Purtiʼ zá José de Salomón, tobi de ca xiiñiʼ rey David (Mat. 1:6, 16). Peru Lucas bicaa lá ca bixhozegola María ne cudii prueba Jesús nga napa derechu casi familia para cuí lu trono stiʼ rey David (Rom. 1:3). ¿Xiñee yaʼ? Purtiʼ zá María de Natán, stobi de ca xiiñiʼ rey David (Luc. 3:31). Yanna, pa María nga xiiñiʼ Helí, ¿xiñee ná Lucas José nga xiiñibe yaʼ? Purtiʼ casi lu guiráʼ ca registru ni biquiiñeʼ binni dxiqué lá si ca hombre ricá lú cani. Nga runi, ora guníʼ Lucas xiiñiʼ Helí nga José la? caniʼbe de xpigudxi (Luc. 3:23).

Ca lista genealógica ni biquiiñeʼ Mateo ne Lucas cusihuinni dxichi cani Jesús nga Mesías ni nexheʼ gueeda que. Cumu zá Jesús de David la? nabé binibiáʼ binni laabe dede né ca fariseu ne ca saduceu nánnacaʼ ni. Yanna riʼ, riquiiñeruʼ guiropaʼ genealogía riʼ para gacané laanu iguidxi fe stinu ne gápanu confianza zuni cumplir Dios ca promesa stiʼ.