Biiyaʼ guiraʼ ni nuu lu sitiu riʼ

guyé lu índice

Guirutiʼ riene ximodo riguixhedxí Dios ladxidoʼno

Guirutiʼ riene ximodo riguixhedxí Dios ladxidoʼno

«Zaguixhe dxí [Dios] ladxidóʼ to dede iruti zanda guiene ximodo ni» (FILIP. 4:7).

DIIDXAʼ RIUUNDAʼ: 39 NE 141

1, 2. ¿Xi bizaaca Pablo ne Silas ndaaniʼ guidxi Filipos? (Biiyaʼ dibuju ni zeeda ra ruzulú tema riʼ).

GUINÍʼ íquenu ni bizaaca ndaaniʼ guidxi Filipos biaʼ galaa gueelaʼ. Pablo ne Silas, chupa misioneru, nuucaʼ ndaaniʼ últimu celda stiʼ ti cárcel. Nuu ñeecabe ndaaniʼ ti cepu ne guizáʼ cayuubaʼ déchecabe pur guiráʼ golpe gudócabe (Hech. 16:23, 24). Nabé nagueenda bizaaca stale cosa dxi riʼ. Ni málasi, guxubiyú stale binni laacabe ra luguiaa que ne nagueendaca bisendacaacaʼ tu guni juzgar laacabe. Guxha ca binni que lari ládicabe ne nabé naná modo guluucaʼ palu laacabe (Hech. 16:16-22). ¡Cadi jneza ni biʼniʼ ca binni que! Napa Pablo ciudadanía stiʼ Roma ne naquiiñeʼ ñaca juzgarbe jneza. *

2 Zándaca guníʼ ique Pablo xi guiráʼ bizaaca dxi que laga nuu ndaaniʼ celda cahui que. Laaca zándaca guníʼ íquebe ca binni de Filipos. Ndaaniʼ stale de ca guidxi ra yegánnabe nuu ti sinagoga, ti lugar ra runi adorar ca judíu Dios. Peru ndaaniʼ guidxi Filipos gastiʼ nin tobi. Ngue runi, ridagulisaa ca judíu que ruaa ti guiiguʼ ni nuu fuera de ca puertaʼ stiʼ guidxi que  (Hech. 16:13, 14). ¿Xiñee gastiʼ sinagoga raqué yaʼ? Zándaca purtiʼ gastiʼ chii hombre judíu lugar que, biaʼ que nga últimu rinábacabe para ganda gaca tobi ni. Rihuinni dxíchica dede ruchá ca binni de Filipos que bi yánnicaʼ purtiʼ nápacaʼ ciudadanía stiʼ Roma, neca de segunda clase (Hech. 16:21). Zándaca pur ngue qué ñuni crécabe pa napa guiropaʼ judíu riʼ ciudadanía stiʼ Roma. Peru intiicapeʼ guníʼ íquecabe, ni dxandíʼ nga biseguyoocabe Pablo ne Silas neca qué ñúnicaʼ xiixa ni cadi jneza.

3. a) ¿Xiñee zándaca huaxiéʼ biene Pablo xi cazaaca ora guluucabe laa ndaaniʼ cárcel que? b) ¿Xi bíʼnibe yaʼ?

3 Zándaca laaca guníʼ ique Pablo ximodo yendá Filipos. Chupa chonna beeu ante nuube Asia Menor, sti ladu nisadóʼ Egeo. Raqué bicueeza espíritu santu laabe stale biaje para cadi guni predicarbe caadxi lugar. Casi ora niné laabe sti ladu (Hech. 16:6, 7). ¿Paraa yené laabe yaʼ? Gunna Pablo paraa ni dxi nuu ndaaniʼ guidxi Troas. Lu ti visión gudxi ti hombre laabe tiidibe «Macedonia». Biiyadxichi Pablo xii ngue racalaʼdxiʼ Dios, ngue runi nagueendaca guyebe Macedonia (biindaʼ Hechos 16:8-10). Peru qué nindaa de yendabe raqué guluucabe laabe cárcel. ¿Xiñee bidii Jiobá lugar guizaaca ndiʼ yaʼ? ¿Pabiáʼ tiempu zieguyoobe raqué yaʼ? Neca cadi cayene Pablo xi cazaaca, qué nudii lugar nirá fe ne guendarannaxhii stiʼ. Biblia ná bizulú Pablo ne Silas biʼniʼ orarcaʼ ne biindacaʼ para Jiobá ndaaniʼ celda que (Hech. 16:25). Biʼniʼ sentírcabe gucané Dios laacabe ra gudixhedxí ladxidóʼcabe.

4, 5. a) ¿Xiñee zanda guininu ruluíʼ cadídinu lu guendanagana cásica gudiʼdiʼ Pablo? b) ¿Ximodo bichaa ni cadiʼdiʼ Pablo nagueendaca?

4 ¿Ñee huayuu dxi guni sentirnu casi biʼniʼ sentir Pablo la? Zándaca gunábanu Dios gacané laanu gánnanu xi jma jneza gúninu ne ruluíʼ zinándanu ni ná espíritu santu. Peru zándaca qué niree ca cosa ca cásipeʼ modo racaláʼdxinu. Zándaca bidxagalunu guendanagana o bizaacanu xiixa ni bicaa laanu guchaʼnu stale cosa lu xquendanabáninu (Ecl. 9:11). Ne zándaca yanna guinabadiidxanu xiñee bidii Jiobá lugar guizaaca caadxi cosa. ¿Xi zacané laanu guni huantarnu sin gunítinu confianza nápanu Jiobá yaʼ? Para gánnanu ni la? guibiguétanu lu historia stiʼ Pablo ne Silas.

5 Laga cayuundacabe bizulú bizaaca caadxi cosa ni cadi cabézacabe. Primé guca ti xu roʼ. De raqué bixeleʼ ca puertaʼ stiʼ cárcel que ne bindaa cadena stiʼ ca binni ni deguyoo que. Ora biʼyaʼ hombre cayapa ra cárcel que ni bizaaca riʼ, gucalaʼdxiʼ ñuuti laa, peru bicueeza Pablo laabe. Pur ngue, guyuunisa hombre que ne familia stiʼ. Cásipeʼ birá gueelaʼ, biseendaʼ ca juez que caadxi oficial chigundaacaʼ Pablo ne Silas ne gábicaʼ laacabe chécabe dxidóʼ de guidxi Filipos. Ora gunna ca juez que cadi jneza ni bíʼnicaʼ né ca binni de Roma riʼ, laapecaʼ guyecaʼ para cueecaʼ laacabe. Peru ante cheʼ Pablo ne Silas de guidxi que gunábacaʼ laacabe gudiicabe lugar chiguuyacaʼ Lidia primeru, ti xpinni Cristu ni nacubi guyuunisa. Laaca biquiiñecabe tiempu que para gacanécabe xcaadxi hermanu de Filipos gaca fe sticaʼ naguidxi (Hech. 16:26-40). ¡Aque nagueenda bichaa ca cosa que!

«IRUTI ZANDA GUIENE XIMODO NI»

6. ¿Xi zadúʼyanu lu tema riʼ?

6 ¿Xi rizíʼdinu de historia riʼ yaʼ? Rizíʼdinu zanda guni Jiobá xiixa ni cadi cabézanu, nga runi cadi naquiiñeʼ chuʼnu xizaa ora tiidinu lu guendanagana. Nuunu  seguru qué ñuu dxi nusiaandaʼ Pablo ndiʼ. Gudiʼdiʼ si tiempu, bihuinni zacá ni pur ni bicaabe ra nuu ca hermanu de Filipos ra bizeetebe de ca cosa ni riguu xizaa laanu ne modo riguixhedxí Dios ladxidoʼno. Lu tema riʼ primeru zazíʼdinu de ni guníʼ Pablo lu Filipenses 4:6, 7, (biindaʼ ni). Despué zadúʼyanu stale relatu ni zeeda lu Biblia ra rihuinni biʼniʼ Jiobá cosa ni cadi cabeza binni. Últimu zadúʼyanu ximodo zanda guni huantarnu sin gusaana de gápanu confianza Jiobá, Dios ni riguixhedxí ladxidoʼno.

7. a) ¿Xi nuu Pablo gusiidiʼ ca hermanu de Filipos? b) ¿Xi rusiidiʼ ndiʼ laanu yaʼ?

7 ¿Xi guníʼ ique ca hermanu de Filipos ora bíʼndacaʼ carta biseendaʼ Pablo ra nuucaʼ yaʼ? Nanna dxíchinu bietenaláʼdxicabe xi bizaaca Pablo ne Silas, ne ra gucané Jiobá laacaʼ de ti modo cadi cabézacaʼ. ¿Xi nuu Pablo gusiidiʼ laacabe yaʼ? Cadi naquiiñeʼ chúʼcabe xizaa ne zaguixhedxí Dios ladxidóʼcabe pa guni orárcabe. Peru, cadi guiaandaʼ laanu guniʼbe «iruti zanda guiene ximodo» riguixhedxí Dios ladxidoʼno. ¿Xi riníʼ nga yaʼ? Nuu caadxi versión de Biblia rutiixhi ca diidxaʼ ca casi «jma que biaʼ ruxuíʼ lunu» ne «guirutiʼ zanda guiníʼ ique ximodo ni». Ni caníʼ Pablo nga jma sicarú modo riguixhedxí Dios ladxidoʼno que biaʼ ruxuíʼlunu. ¿Xi rusiidiʼ ndiʼ laanu yaʼ? Rizíʼdinu neca nuu tiru ruluíʼ qué zaca chaahuiʼ guendanagana stinu, peru Jiobá nanna zanda gaca chaahuiʼ ni. Ne laabe zanda gúnibe xiixa dede zadxagayaanu (biindaʼ 2 Pedro 2:9).

8, 9. a) Neca bíʼnicabe Pablo ni cadi jneza ndaaniʼ guidxi Filipos, ¿xi gunda guca pur laani? b) ¿Xiñee zanda gapa ca hermanu de Filipos confianza ca diidxaʼ bicaa Pablo ra nuucaʼ?

8 Nuunu seguru guyuu ca hermanu de Filipos nayecheʼ ora guníʼ íquecaʼ de cani bizaaca lu chii iza ni maʼ gudiʼdiʼ que. Dxandíʼ ni bicaa Pablo ra nuucabe. Neca bidii Jiobá lugar gaca xiixa ni cadi jneza, peru pur ngue gunda guyebe nezalú justicia para guiniʼbe «dxandí ni na stiidxa Cristu, ne jneza chi nanda binni ni» (Filip. 1:7). Maʼ zaníʼ ique chaahuiʼ ca juez de Filipos que ante gúnicaʼ xiixa para gucaalucaʼ congregación stiʼ ca xpinni Cristu ni nacubi guca guidxi que. Zándaca pur guníʼ Pablo napa ciudadanía stiʼ Roma que nga gunda biaana Lucas, xcompañérube ni rinebe viaje, ndaaniʼ guidxi Filipos para gacané cani nacubi guca xpinni Cristu dxi zeʼ Pablo ne Silas de lugar que.

9 Ora biʼndaʼ ca hermanu de Filipos carta stiʼ Pablo, nánnacaʼ cadi tutiisi bicaa ni, sínuque tuuxa ni maʼ gudiʼdiʼ lu guendanagana. Laaca gudiʼdiʼ Pablo ra naxoo ne bisihuinni dxandíʼ gudixhedxí Dios ladxidóʼ. Ne dxi bicaabe ni, deguyoobe ra lídxibe ndaaniʼ guidxi Roma. Neca zaqué qué nusaanabe de nusihuínnibe riguixhedxí Dios ladxidoʼbe (Filip. 1:12-14; 4:7, 11, 22).

«CADI CHUʼ TU XIZAA DE GASTIʼ»

10, 11. ¿Xi naquiiñeʼ gúninu ora nabé nuunu xizaa ne xi zanda cuézanu?

10 ¿Xi naquiiñeʼ gúninu para cadi chuʼnu xizaa ne quixhedxí Dios ladxidoʼno yaʼ? Ni gudxi Pablo ca xpinni Cristu de Filipos que rusiidiʼ ni laanu oración ca nga ti remediu para cadi chuʼ binni xizaa. Nga runi, guni orarnu cada biaje chuʼnu xizaa (biindaʼ 1 Pedro 5:6, 7). Ne gusihuínninu nápanu fe ora gúninu ni ne gápanu confianza rizaalaʼdxiʼ Jiobá laanu. Laaca naquiiñeʼ gudiʼnu xquíxepeʼ laabe pur ca ndaayaʼ ni rudiibe laanu. Ne zápanu jma confianza Jiobá ora guietenaláʼdxinu «zanda guni jma que biaʼ iníʼ ique nu inaba nu laa» (Efes. 3:20).

 11 Cásica bizaaca Pablo ne Silas dxi guyuucaʼ Filipos, zándaca zadxagayaanu ora guidúʼyanu ni runi Jiobá para gacané cada tobi de laanu. Zándaca qué zúnibe xiixa ni guidxagayaanu, peru zúnibe xiixa para gacanebe laanu lu ni caquiiñenu (1 Cor. 10:13). Ya, peru cadi pur nga qué zúninu gastiʼ ne cuézanu dede ora maʼ guni chaahuibe guendanagana stinu. Naquiiñeʼ gúninu ni guinábanu lu oración stinu (Rom. 12:11). Zacá zusihuínninu de ndaaniʼ ladxidoʼno caree ni caninu ne zaguu Jiobá ndaayaʼ stipa gúninu. Peru laaca cadi guiaandaʼ laanu zanda guni Jiobá jma que biaʼ rinábanu laa o jma que biaʼ ribézanu de laa. Nuu tiru ridxagayaanu cani rúnibe ne rúnibe cosa ni cadi cabézanu. Guidúʼyanu caadxi relatu stiʼ Biblia ni zanda gacané laanu gápanu confianza zanda guni Jiobá stale cosa pur laanu.

BIʼNIʼ JIOBÁ COSA NI GUIRUTIʼ CABEZA

12. a) ¿Xi biʼniʼ Ezequías dxi guníʼ Senaquerib, rey stiʼ Asiria, zucaalú laacaʼ? b) ¿Xi rizíʼdinu pur modo biʼniʼ chaahuiʼ Jiobá guendanagana que?

12 Lu Biblia zeeda stale ejemplu ra rihuinni biʼniʼ Jiobá cosa ni guirutiʼ cabeza. Casi dxi cayuni mandar Ezequías, guluu Senaquerib, rey stiʼ Asiria, leʼ Judá ne biʼniʼ ganar guiráʼ guidxi stini menu si Jerusalén (2 Rey. 18:1-3, 13). Despué laaca guníʼ Senaquerib zucaalú guidxi riʼ. ¿Xi biʼniʼ Ezequías yaʼ? Biʼniʼ orarbe Jiobá ne gunábabe conseju profeta Isaías (2 Rey. 19:5, 15-20). Laaca biyúbibe modo gusihuínnibe riuube razón ne gudíxebe Senaquerib ni canabaʼ laabe (2 Rey. 18:14, 15). Despué guluu Ezequías guidxi que listu para guni huantar ni neca cúʼcabe leʼ ni xadxí (2 Crón. 32:2-4). ¿Ximodo biluxe guiráʼ ni yaʼ? Biseendaʼ Jiobá ti ángel ni biiti 185,000 soldadu stiʼ Senaquerib ti gueelaʼ si. Nin Ezequías cadi cabeza guizaaca ni zaqué (2 Rey. 19:35).

¿Xi rizíʼdinu de ni bizaaca José? (Gén. 41:42). (Biiyaʼ párrafo 13).

13. a) ¿Xi rizíʼdinu de ni bizaaca José? b) ¿Xi bizaaca Sara neca cadi cabeza ni?

13 Yanna guidúʼyanu xi bizaaca José, xiiñiʼ Jacob, dxi guca nahuiiniʼ. Dxi deguyoobe ndaaniʼ guidxi Egipto qué lica niníʼ íquebe pa laabe ñeeda gácabe guiropa binni jma risaca stiʼ guidxi riʼ. Laaca qué niníʼ íquebe pa niquiiñeʼ Jiobá laabe para ñacanebe familia stibe ti cadi ñáticaʼ de hambre (Gén. 40:15; 41:39-43; 50:20). Peru gucané Jiobá José jma que biaʼ cabeza. Guiníʼ íquenu de Sara, bisabuela stibe. ¿Ñee guleza Sara nudii Jiobá lugar laa ñapa ti xiiñipeʼ biaʼ iza napa que la? Rihuinni dxíchica, ra gule Isaac que biiyaʼ Sara bidii Dios laa jma qué biaʼ ni guníʼ ique (Gén. 21:1-3, 6, 7).

14. ¿Xi naquiiñeʼ ganna dxíchinu?

14 Dxandíʼ, qué ribézanu guni Jiobá ti milagru para cuee guiráʼ guendanagana stinu ante gueeda guidxilayú cubi ca. Ne laaca qué rinábanu laabe gúnibe xiixa lu xquendanabáninu para guidxagayaanu.  Peru laaca nánnanu nabé bidxagayaa binni pur modo gucané Dios ca xpinni ni bibani dxiqué. Ne caʼruʼ guchaabe modo laabe (biindaʼ Isaías 43:10-13). Nga racané gápanu jma confianza laabe. Nanna dxíchinu zanda gúnibe ni caquiiñeʼ para gudiibe stipa laanu ti gúninu ni nabe (2 Cor. 4:7-9). ¿Xi zanda guizíʼdinu de ejemplu stiʼ Ezequías, José ne Sara yaʼ? Zanda gacané Jiobá laanu gudxíʼlunu ca guendanagana jma naroʼbaʼ gápanu pa qué gusaana de guzúʼbanu diidxaʼ.

Zanda gacané Jiobá laanu gudxíʼlunu ca guendanagana jma naroʼbaʼ gápanu pa qué gusaana de guzúʼbanu diidxaʼ

15. a) ¿Xi zanda gúninu para ganda quixhedxí Dios ladxidoʼno ora guidxaagalunu guendanagana yaʼ? b) ¿Xi racané laanu para gaca xhamígunu Dios?

15 ¿Xi zanda gúninu para ganda quixhedxí Dios ladxidoʼno ora guidxaagalunu guendanagana yaʼ? Caquiiñeʼ gápanu amistad ni napanenu Jiobá. Ne «pur Cristu Jesús» si zanda gápanu amistad ca, purtiʼ laabe bidiibe laanu xquendanabánibe para gulabe laanu de lu náʼ guendaruchee. Sacrificiu stiʼ Jesús ca nga stobi de ca cosa ni maʼ biʼniʼ Jiobá para guidxagayaanu. Riquiiñebe sacrificiu riʼ para guni perdonarbe donda stinu ne pur laani randa rápanu ti conciencia nayá ne raca xhamígunu laacabe (Juan 14:6; Sant. 4:8; 1 Ped. 3:21).

«MA QUÉ ZADXIBI LADXIDÓʼ TO, NE ZATA DXÍ XQUENDA BIAANI TU»

16. Bisiene xi ribeendunu ora riguixhedxí Dios ladxidóʼ no.

16 ¿Xi ribeendunu ora riguixhedxí Dios ladxidoʼno yaʼ? Biblia ná: «Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Filip. 4:7). Lu idioma ni gucuá Biblia, biquiiñeʼ ti diidxaʼ ni rusiene modo rapa ca soldadu que ca guidxi de tiempu que. Casi ca binni de guidxi Filipos la? rásicaʼ sin chuʼ xi guchiiñaʼ laacaʼ purtiʼ nánnacaʼ nuu tu cayapa guidxi que. Nga runi Stiidxa Dios Didxazá riquiiñeʼ diidxaʼ «ma qué zadxibi ladxidóʼ to». Zacaca nga ora riguixhedxí Dios ladxidoʼno, gastiʼ qué ruchiiñaʼ xquendabiaaninu ne ladxidoʼno. Nanna dxíchinu zapa Jiobá laanu ne racaláʼdxibe guibáninu galán (1 Ped. 5:10). Ra gánnanu ndiʼ zapa ni laanu. ¿Ximodo yaʼ? Ra cadi chuʼnu xizaa ne cadi guidxíbinu.

17. Ora guiníʼ íquenu xi chiguizaaca despué, ¿xi zacané laanu cadi gusaana de gápanu confianza Jiobá?

17 Maʼ cadi candaa zadxaagalú binni guidxilayú ti guendananá nabé naroʼbaʼ ni qué huayuu dxi gaca ne maʼ qué ziuuruʼ dxi gaca ni lu Guidxilayú (Mat. 24:21, 22). Qué gánnanu xipeʼ chiguizaaca cada tobi de laanu, peru cadi naquiiñeʼ chuʼ xhaatanu xizaa. Ne neca qué gánnanu xi guiráʼ chiguni Jiobá, peru nánnanu ximodo laabe. Ra bidúʼndanu de cani biʼniʼ Jiobá pur ca xpinni ni bibani dxiqué, bidúʼyanu runi cumplirbe ni riniʼbe, intiicapeʼ gaca. Ne nuu tiru cadi cabézanu gaca ni modo gúnibe ni. Cada biaje guni Jiobá xiixa para gacané laanu, laani nga sti oportunidad ni nápanu para guni sentirnu «zaguixhe dxí [Dios ladxidoʼno] dede iruti zanda guiene ximodo ni».

^ párrafo 1 Ruluíʼ si laaca napa Silas ciudadanía stiʼ Roma (Hech. 16:37).