Biiyaʼ guiraʼ ni nuu lu sitiu riʼ

guyé lu índice

Guendarannaxhii: ti cualidad risaca

Guendarannaxhii: ti cualidad risaca

DIOS gudxi apóstol Pablo gucaa gaʼ cualidad sicarú ni rudii espíritu santu (Gál. 5:22, 23, TNM). Pa nuséʼgunu guiráʼ ca cualidad riʼ la? ñaca cani casi ti cuananaxhi (o ti fruto) ni rudii espíritu santu, * ne laaca riquiiñeʼ gapa ti xpinni Cristu cani para guihuinni maʼ gadxé laa (Col. 3:10). Cásica rudii ti yaga cuananaxhi stiʼ ora guizaaláʼdxicabe laa, zacaca nga zusihuinni tuuxa fruto ni rudii espíritu ora gudii lugar guni espíritu santu dxiiñaʼ lu xquendanabani (Sal. 1:1-3).

Primé cualidad ni bizeeteʼ Pablo nga guendarannaxhii. ¿Pabiaʼtiʼ risaca cualidad riʼ yaʼ? Pablo guníʼ pa qué gusihuinni guendarannaxhii la? guirutiʼ naca (1 Cor. 13:2). Peru ¿xii nga guendarannaxhii, ne ximodo zanda gápanu ni ne gusihuínninu ni guiráʼ dxi yaʼ?

¿XII NGA GUENDARANNAXHII?

Neca raca nagana para binni gusiene ni, peru Biblia ruzeeteʼ ximodo rusihuinni binni cualidad riʼ. Laani nani, pa nadxiinu stobi la? qué zadxiichinenu laa ne zácanu nachaʼhuiʼ né laa, ziechenenu binni ora guni ni jneza ne zuni huantarnu guiráʼ ni gúnicabe laanu, zuni crenu sti binni. «Intiica gueeda» ziúʼnenu laacabe tobi si ne qué zareʼnu gana. Ne ti binni ni nadxii rusihuinni napa cariñu binni de guidubi ladxidóʼ, rizaalaʼdxiʼ xcaadxi binni ne naca ti amigu ni qué rixeleʼ. Peru ti binni ni cadi nadxii la? celoso laa, ruchá bi yanni, feu xpiaʼ, ruyubi puru para laasi, ridaa xiana ne qué runi perdonar. Lugar de gaca xpiaʼnu casi maʼ bizéʼtenu ca ne pur laacani guninanu stobi la? gúninu stipa pur gápanu guendarannaxhii ni qué zucaa laanu guyúbinu puru para laasinu (1 Cor. 13:4-8).

JIOBÁ NE JESÚS NÁCACAʼ TI EJEMPLU PARA LAANU

«De Dios nga reeda enda ranaxhii». Jiobá peʼ nga guendarannaxhii (1 Juan 4:8). Ne rihuinni zacá ni pur cani bizaʼbe ne pur cani rúnibe. Ra jma bisihuínnibe guendarannaxhii stibe nga ra biseendabe Jesús lu Guidxilayú para tiidiʼ yuubaʼ ne gatiʼ pur laanu. Apóstol Juan bicaa: «Biluíʼ [Dios] laanu pabiáʼ nadxii laanu ra biseenda tobi lucha Xiiñi ndaani guidxilayú, beda udii laanu enda nabani ni qué zaluxe. Ne sicarí rihuinni xi pe nga enda ranaxhii: cadi laanu gunaxhii nu laabe, sínuque laabe gunaxhii be laanu ne biseenda be Xiiñi be beda tixe irá ni huachéʼ né nu laabe» (1 Juan 4:9, 10). Pur guendarannaxhii stiʼ Dios, zanda gaca perdonar ca donda stinu, nápanu ti esperanza ne zanda guibáninu sin gátinu.

Bisihuinni Jesús nadxii binni guidxilayú ra guyuu dispuestu gueeda para guni ni ná Dios. Pablo bisiene: «Ne yanna ma uca ni gudixhe Dios que, purti ma bidii Jesucristu xpida para guiaxa stonda nu tobi si tiru, ne pur ni biʼni be que ma bia ladxidóʼ no» (Heb. 10:9, 10). Ninruʼ sti binni guidxilayú qué zanda gusihuinni nadxii zacá. Jesús guníʼ: «Iruti zanda ganaxhii jma que biaʼ nadxii tobi ni udii xpida pur ca xhamigu» (Juan 15:13). ¿Ñee zanda gusihuínninu guendarannaxhii casi runi Jiobá ne Jesús neca nácanu imperfectu la? Zanda pue. Guidúʼyanu ximodo gúninu ni.

 «INTIICA GUNI TU LAUSIHUINNI NADXII SAA TU»

Pablo riguu gana laanu: «Ma xiiñi Dios laatu ne nadxii laatu. Yanna laucaalaʼdxi gaca tu casi laa. lntiica guni tu lausihuinni nadxii saa tu casi nadxii Cristu laanu. Gunaxhii be laanu dede uná be bisigaʼde be xpida be Dios para biaxa stonda nu» (Efes. 5:1, 2). Para cadi gusaananu de gannaxhiisaanu la? naquiiñeʼ gusihuínninu cualidad riʼ lu guidubi xquendanabáninu. Cadi caquiiñeʼ si guiníʼ binni napa guendarannaxhii, sínuque caquiiñeʼ gusihuinni ni né cani runi. Juan bicaa: «Xiiñe huiine caʼ, cadi gabi si nu nadxii nu binni sínuque ganaxhii nu laaca de idubi ladxidóʼ no ne usihuinni nu ni ra acané nu laacaʼ» (1 Juan 3:18). Casi guendarannaxhii ni nápanu Jiobá ne ni nápanu binni la? rucaa ni laanu guni predicarnu «ca diidxaʼ nacubi ne galán stiʼ Reinu» (Mat. 24:14TNM; Luc. 10:27). Laaca rusihuínninu guendarannaxhii ora rápanu paciencia, ora rácanu nachaʼhuiʼ ne ora runi perdonarnu. Nga runi, Biblia rudii laanu conseju riʼ: «Cásica biʼniʼ perdonar Jiobá guiráʼ xixetu, zacaca laguni» (Col. 3:13TNM).

Peru cadi guiníʼ íquenu nácanu ti binni ni nabé nadxii nga ora gudiʼnu lugar gaca intiica cosa. Casi nuu binni la? rudii lugar guni xiiñiʼ intiica cosa, zándaca rúnicaʼ guiráʼ ni racaláʼdxibe para cadi gúʼnabe. Peru binni ni dxandíʼ nadxii xiiñiʼ la? raca naguidxi né laacabe ora caquiiñecabe ni. Zacaca nga Jiobá, rusihuínnibe guendarannaxhii peru riguu jnézabe o «ridinde né be cani nadxii be» (Heb. 12:6). Nga runi, ni uguu jneza tuuxa ora caquiiñeʼ guni ni, cusihuinni nadxii binni ca (Prov. 3:11, 12). Peru cadi guiaandaʼ laanu imperfectu guiranu ne cadi guiráʼ ora rusihuínninu guendarannaxhii lu ni gúninu. Nga runi, nuu paraa caquiiñeʼ guni mejorarnu. Guidúʼyanu chonna modo zanda gúninu ni.

XIMODO ZANDA GÁPANU GUENDARANNAXHII

Primé. Guinábanu Dios gudii espíritu santu stiʼ laanu. Jesús guníʼ rudii Jiobá «Espíritu Santu ni inaba [ni] laa» (Luc. 11:13). Pa guinábanu lu ca oración stinu guicaanu espíritu santu ne gúninu stipa pur sanu «modo rusiidi» ni, cada dxi zusihuínninu jma guendarannaxhii (Gál. 5:16). Casi ca ancianu de congregación, zanda guinábacaʼ Jiobá gudii laacaʼ espíritu santu para gacané laacaʼ gusihuínnicaʼ guendarannaxhii ora gudiicaʼ conseju zeeda lu Biblia. Ne cani napa xiiñiʼ, zanda guni orarcaʼ para gacané espíritu stiʼ Dios laacaʼ uguu jnézacaʼ ca xiiñicaʼ né cariñu ne cadi gácacaʼ naguidxi ora gúnicaʼ ni.

Guiropa. Guiníʼ íquenu modo bisihuinni Jesús guendarannaxhii dede ora cayuninácabe laa (1 Ped. 2:21, 23). Ne jma zacané ejemplu stibe laanu ora chuʼ tu guchiichi laanu o gúnicaʼ laanu xiixa ni cadi jneza. Ora gúnicabe laanu zacá, galán guinabadiidxanu: «¿Nouʼ xi ñuni Jesús pue?». Gucané pregunta ca ti hermana láʼ Leigh, para guníʼ ique ante guni xiixa. Laabe bisiénebe: «Ti biaje biseendaʼ ti gunaa runeniáʼ dxiiñaʼ ti correu electrónicu ra nuu xcaadxi xcompañérudu ne luni caniʼbe mal de naa ne de dxiiñaʼ stinneʼ. Guizáʼ bisiuubaʼ ngue ladxiduáʼ. Peru gunabadiidxaʼ laca naa: “¿Xi ñuni Jesús pa ñaca laa nizaaca ndiʼ yaʼ?”. Despué de guníʼ iqueʼ xi ñúnibe, gudixheʼ iqueʼ gusiaandaʼ ni ne maʼ qué nulabeʼ ni guca que. Despué gunnaʼ napa xcompañeraʼ que ti guendahuará malu ne ruchiichi ngue laa. Óraque bieneʼ zándaca cadi cá íquebe guninabe naa né ni bíʼnibe que. Ora guníʼ iqueʼ bisihuinni Jesús guendarannaxhii dede ora cayuninácabe laa gucané ngue naa guneʼ casi bíʼnibe ne gusihuinneʼ nadxieeʼ xcompañeraʼ». Pa chinándanu ejemplu stiʼ Jesús zusihuínninu guendarannaxhii lu guiráʼ ni gúninu.

Guionna. Guizíʼdinu gúninu sacrificiu pur xcaadxi. Clase guendarannaxhii ca nga rusihuinni tuu nga cani dxandíʼ xpinni Cristu (Juan 13:34, 35). Biblia cayabi laanu guiníʼ íquenu casi riníʼ ique Jesús. Dxi bisaanabe guibáʼ, pur laanu gunabe bisaanabe guiráʼ ni gúpabe ne dede gunabe gútibe (Filip. 2:5-8). Pa chinándanu ejemplu stibe ra bíʼnibe sacrificiu pur xcaadxi ne bisihuínnibe  guendarannaxhii, zaníʼ íquenu casi riníʼ íquebe ne zápanu sentimientu casi ni gúpabe ne zúninu jma pur xcaadxi que pur laanu. ¿Xi zabeendunu ora gápanu guendarannaxhii yaʼ?

¿XI ZABEENDUNU YAʼ?

Guizáʼ stale ni ribeendunu ora rusihuínninu guendarannaxhii. Guidúʼyanu chupa si de laacani.

¿Xi guiráʼ ribeendunu ora rusihuínninu guendarannaxhii?

  • NUU CA HERMANU NDAANIʼ STALE GUIDXI ROʼ. Cumu nadxiisaanu la? nánnanu zadxaagalú ca hermanu stinu laanu né stale cariñu ndaaniʼ intiica si congregación. Dxandipeʼ, ti ndaayaʼ nga gannaxhii ca hermanu stinu laanu lu guidubi Guidxilayú (1 Ped. 5:9). Ndaaniʼ si xquidxi Jiobá nga rannaxhiicabe zacá.

  • GUENDARIUUDXI. Ora runi huantársaanu laanu né guendarannaxhii qué riuʼdíndenenu ca hermanu ne riuʼnu tobi si (Efes. 4:2, 3). Guiranu ridúʼyanu zacá ni lu ca reunión ne lu ca asamblea ni rápanu, ca lugar riʼ si nga zanda chuʼ binni tobi si lu guidxilayú nuudinde riʼ (Sal. 119:165; Is. 54:13). Ora rúninu stipa pur chuʼnu galán né xcaadxi, rusihuínninu pabiáʼ nadxiinu laacabe ne laaca rusiéchenu Bixhózenu ni nuu guibáʼ (Sal. 133:1-3; Mat. 5:9).

ORA GANAXHIINU BINNI ZACANENU GUINIISICAʼ LU STIIDXA DIOS

Pablo guníʼ: «Pa ganaxhii nu ca hermanu stinu, zacané saa nu inisi nu lu stiidxa Dios» (1 Cor. 8:1). ¿Xi riníʼ ca diidxaʼ riʼ yaʼ? Lu capítulo 13 stiʼ primé carta bicaa Pablo ra nuu ca hermanu de Corinto, bisiénebe xi riníʼ ca diidxaʼ ca. Primé ni guniʼbe nga ti binni ni nadxii ruyubi modo chuʼ xcaadxi binni galán (1 Cor. 10:24; 13:5). Ne sti cosa ni bizeetebe nga, ti binni ni nadxii rapa paciencia, riene, nachaʼhuiʼ, ne cualidad riʼ nga caquiiñeʼ para chuʼ binni ni rusihuinni cariñu ndaaniʼ ca familia ne ngaca caquiiñeʼ para chuʼ ca congregación tobi si (Col. 3:14).

Guendarannaxhii si ni runi sentirnu pur Dios ca nga ni jma galán ne ni racané laanu. Pur guendarannaxhii ca randa riuu ca binni de guiráʼ cultura, raza ne de guiráʼ idioma «tobi si» ne nayecheʼ para guni adorarcaʼ Jiobá ne gúnicaʼ ni nabe (Sof. 3:9). Gúninu stipa pur gusihuínninu cualidad risaca riʼ guiráʼ dxi, tobi de ca cualidad ni rudii espíritu santu.

^ párrafo 2 Chiguiree ti serie de gaʼ tema ni zusiene cada tobi de ca cualidad ni rudii espíritu santu ne ndiʼ nga primé ca.