Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 42

¿Xi zanda guni Jiobá para iquiiñeʼ laanu?

¿Xi zanda guni Jiobá para iquiiñeʼ laanu?

«Dios nga cudii stipa laatu, ne cayacané laatu para gápatu deseu ne poder para gúnitu guiráʼ ni riuuláʼdxibe» (FILIP. 2:13TNM).

CANCIÓN sjj 104 Ti regalu stiʼ Dios nga espíritu santu

NI ZAZÍʼDINU *

1. ¿Xi zanda guni Jiobá para gaca ni racalaʼdxiʼ?

ZANDA guni Jiobá intiica cosa para guni ni racalaʼdxiʼ. Naca Jiobá ti maestru, ti padre ni riguixhedxí ladxidóʼ binni ne evangelizador (Is. 48:17; 2 Cor. 7:6; Gál. 3:8). Peru neca zacá, riquiiñebe binni para gúnibe ni racaláʼdxibe (Mat. 24:14; 28:19, 20; 2 Cor. 1:3, 4). Tutiica de laanu zanda gudiibe guendabiaaniʼ ne poder ti gúninu intiica cosa para gaca ni racaláʼdxibe. Guiráʼ ni bizéʼtenu riʼ laaca raca significar cani lá Jiobá, casi ná caadxi hombre ni nanna stale de lu Biblia.

2. a) ¿Xiñee zándaca nuu tu laa riníʼ ique cadi caquiiñeʼ Jiobá laa? b) ¿Xi zazíʼdinu lu artículo riʼ?

2 Guiranu racaláʼdxinu iquiiñeʼ Jiobá laanu, peru zándaca nuu tu laa riníʼ ique cadi caquiiñeʼ Jiobá laa. ¿Xiñee yaʼ? Purtiʼ riníʼ íquecaʼ maʼ huaniisicaʼ ne maʼ qué zanda gúnicaʼ jma. Ne zándaca nuu tu laa riníʼ ique biaʼsi ni cayuni ne maʼ cadi caquiiñeʼ guni jma. Lu artículo riʼ zazíʼdinu zanda gusiidiʼ Jiobá laanu para gúninu ni racalaʼdxiʼ. Laaca zadúʼyanu ejemplu stiʼ caadxi hombre ne gunaa de dxiqué ni bidii Jiobá laacaʼ deseu ne poder para gúnicaʼ ni riuuláʼdxibe. Ne últimu, zadúʼyanu xi zanda gúninu para iquiiñeʼ Jiobá laanu.

XIMODO CUSIIDIʼ JIOBÁ LAANU

3. Casi ná Filipenses 2:13, ¿xi zanda uguu Jiobá ndaaniʼ ladxidoʼno?

3 (Biindaʼ Filipenses 2:13TNM). * Zanda uguu Jiobá deseu de gúninu guiráʼ ni riuuláʼdxibe ndaaniʼ ladxidoʼno. ¿Ximodo zanda gúnibe ni yaʼ? Zándaca gánnanu  nuu xiixa necesidad ndaaniʼ congregación stinu o guʼndaʼ ca ancianu ti carta stiʼ sucursal ra ná caquiiñecabe tu chigacané sti lugar. Ne óraca guiníʼ íquenu xi zanda gúninu para gacanenu. O zándaca bidiicabe laanu ti asignación nabé nagana ne riníʼ íquenu pa zanda gúninu ni jneza. O zándaca despué de gúʼndanu ti parte de lu Biblia, guiníʼ íquenu ximodo zanda iquiiñenu ni bizíʼdinu para gacanenu xcaadxi binni. Qué runi obligar Jiobá laanu gúninu xiixa. Peru pa gúʼyabe racaláʼdxinu gúninu jma lu xhiiñabe, zacanebe laanu gúninu ni.

4. ¿Ximodo zanda gudii Jiobá laanu poder para gúninu ni riuulaʼdxiʼ?

4 Laaca zanda gudii Jiobá laanu poder para gúninu ni riuulaʼdxiʼ (Is. 40:29). Zudiibe laanu espíritu stibe para ganda gúninu ni nabe (Éx. 35:30-35). Ne laaca riquiiñebe xquídxibe para gusiidibe laanu ximodo gúninu caadxi dxiiñaʼ. Pa qué gánnanu ximodo gúninu xiixa dxiiñaʼ la? guinábanu tuuxa gacané laanu. Laaca galán guidxíñanu Bixhózenu ni nuu guibáʼ ne guinábanu laa «poder» stiʼ, purtiʼ jma nadipaʼ ni que stipa stinu (2 Cor. 4:7; Luc. 11:13). Lu Biblia riete ximodo bisiidiʼ Jiobá stale hombre ne gunaa ne laaca bidiibe laacaʼ deseu ne poder para gúnicaʼ guiráʼ ni riuuláʼdxibe. Guidúʼyanu caadxi ejemplu ne guiníʼ íquenu ximodo zanda iquiiñenu ni lu xquendanabáninu.

XIMODO HUAQUIIÑEʼ JIOBÁ CAADXI HOMBRE

5. ¿Pora ne ximodo biquiiñeʼ Jiobá Moisés para gulá xquidxi, ne xi rizíʼdinu de laani?

5 Biquiiñeʼ Jiobá Moisés para gulabe guidxi Israel. Peru ¿pora bíʼnibe ni yaʼ? ¿Ñee ora guníʼ ique Moisés maʼ nuu listu purtiʼ maʼ guca educar «lu guiráʼ guendabiaaniʼ stiʼ Egipto» la? (Hech. 7:22-25). Coʼ, biquiiñeʼ Jiobá laabe despué de bisiidiʼ laabe gácabe nadóʼ ne humilde (Hech. 7:30, 34-36). Ne gucané Jiobá laabe para gácabe nadxibalú ne chebe ra nuu gobernador ni jma risaca nuu ndaaniʼ guidxi Egipto (Éx. 9:13-19). ¿Pora ne ximodo biquiiñeʼ Jiobá Moisés para gulá xquidxi, ne xi rizíʼdinu de laani? Ni rizíʼdinu nga riquiiñeʼ Jiobá binni espiritual ne ni napa confianza zanda gudiibe poder laa (Filip. 4:13).

6. ¿Ximodo biquiiñeʼ Jiobá Barzilái para gacané rey David, ne xi rizíʼdinu de laani?

6 Stale iza despué, biquiiñeʼ Jiobá Barzilái para gacané rey David. Dxi canaucachilú rey David ne ca xpinni de Absalón, xiiñiʼ, maʼ bidxágacaʼ, candaanacaʼ ne cayáticaʼ nisa. Neca maʼ huaniisi Barzilái, laa ne xcaadxi hombre guluucaʼ xquendanabánicaʼ ra naxoo para gacanecaʼ David ne ca xpinni. Qué niníʼ ique Barzilái maʼ huaniisi ne maʼ qué zanda iquiiñeʼ Jiobá laa. Lugar de nga gúcabe nachaʼhuiʼ ne bidiibe guiráʼ ni nápabe para gacanebe ca xpinni Dios purtiʼ caquiiñecaʼ tu gacané laacaʼ (2 Sam. 17:27-29). ¿Xi rusiidiʼ ejemplu stiʼ Barzilái laanu yaʼ? Gastiʼ naca panda iza nápanu, zanda iquiiñeʼ Jiobá laanu para gacanenu ca hermanu ni qué gapa ni caquiiñeʼ, ra tiica si nabézacaʼ (Prov. 3:27, 28; 19:17). Ne pa qué zanda chigacanenu ca hermanu riʼ, zanda gusábanu donación para obra mundial ne zacá gacanenu ca hermanu stinu ora caquiiñecani ne ra tiica si nuucaʼ (2 Cor. 8:14, 15; 9:11).

7. a) ¿Xi rizíʼdinu de ejemplu stiʼ Simeón? b) ¿Xiñee riguu ejemplu stiʼ Simeón gana laanu?

7 Simeón nga ti binnigola ni guleza ndaaniʼ guidxi Jerusalén, ne biʼniʼ ni ná  Jiobá. Maca gudxi Jiobá laabe zuuyabe Mesías ante gátibe. Nanna dxíchinu guizáʼ guluu promesa riʼ gana laabe, purtiʼ maʼ raca stale iza de cabézabe guedandá dxi ca. Guluu Jiobá ndaayaʼ laabe purtiʼ gúpabe fe ne biʼniʼ huantarbe. Ti dxi, «bicaa espíritu santu» Simeón cheʼ ndaaniʼ templu, ne raqué biiyabe Jesús. Óraque biquiiñeʼ Jiobá laabe para guiniʼbe ti profecía ni ná zeeda gaca hombrehuiiniʼ que Cristu (Luc. 2:25-35). Neca zándaca qué ñuuyaʼ Simeón dxiiñaʼ ni biʼniʼ Jesús, bidiibe xquíxepeʼ Jiobá pur privilegiu ni bidii laabe. Ne zudiiruʼ Jiobá laabe stale cosa galán ndaaniʼ Guidxilayú cubi ne zuuyabe ximodo zaguu reinu stiʼ Jesús ndaayaʼ guiráʼ ca familia ni guibani ndaaniʼ Guidxilayú (Gén. 22:18). Laanu laaca caquiiñeʼ gudiʼnu xquíxepeʼ Jiobá purtiʼ cudii lugar gúninu ni ná.

8. ¿Ximodo zanda iquiiñeʼ Jiobá laanu?

8 Lu primé siglu, ti hombre nabé nachaʼhuiʼ ni biree lá José bidii lugar iquiiñeʼ Jiobá laa (Hech. 4:36, 37). Gulee lá ca apóstol que laabe Bernabé, ni raca significar «ni riguixhedxí ladxidóʼ binni», purtiʼ nánnabe quixhedxibe ladxidóʼ binni. Guzéʼtenu ti ejemplu, ora guca Saulo xpinni Cristu, stale hermanu ridxibi guidxiñaʼ laabe, purtiʼ nánnacaʼ guzanándabe ca xpinni Cristu. Peru yegacané Bernabé laabe. Nanna dxíchinu bidii Pablo xquíxepeʼ laabe purtiʼ gúcabe nachaʼhuiʼ né laa (Hech. 9:21, 26-28). Gudiʼdiʼ si ti tiempu, gunna ca ancianu de Jerusalén caquiiñeʼ ca hermanu de Antioquía de Siria, ti guidxi ni nuu zitu, tu uguu gana laacaʼ. ¿Tu biseendacabe yaʼ? Bernabé. Galán ni bíʼnicabe que. Purtiʼ Biblia ná guluu Bernabé gana ca hermanu para «cadi guixélecaʼ de Señor ne guzuhuaacaʼ dxiichiʼ ne gúnicaʼ ni de guidubi ladxidoʼcaʼ» (Hech. 11:22-24). Tiempu riʼ, laaca zanda gacané Jiobá laanu para quixhedxinu ladxidóʼ ca hermanu stinu, jmaruʼ si ca hermanu ni guti ti familia stiʼ. O zándaca gacanebe laanu chigánnanu o guinínenu tuuxa hermanu ni huará o nuu deprimidu ne uguʼnu gana laa. ¿Ñee zudiʼnu lugar iquiiñeʼ Jiobá laanu cásica biquiiñebe Bernabé la? (1 Tes. 5:14).

9. ¿Xi rizíʼdinu de modo gucané Jiobá ti hermanu láʼ Vasily?

9 Gucané Jiobá ti hermanu láʼ Vasily para gaca ti ancianu ni nanna guni xhiiñaʼ jneza. Ora biʼniʼ nombrarcaʼ laabe ancianu, dxi nápabe 26 iza, biʼniʼ sentirbe cadi nuube listu para gacanebe ca hermanu de congregación, jmaruʼ ca hermanu ni napa stale guendanagana. Peru bisiidiʼ ca xcaadxi ancianu ni napa experiencia laabe ne guyebe Escuela del Ministerio del Reino. Bíʼnibe stipa para gúnibe xhiiñabe jneza. Bíʼnibe ti lista ne bicaabe xi guiráʼ racaláʼdxibe gúnibe. Ra bíʼnibe ni gudixhe íquebe, maʼ qué nidxíbibe. Sicaríʼ guniʼbe: «Ca cosa ni bichibi naa dxiqué, yanna riʼ maʼ rusiecheʼ cani naa. Ora racané Jiobá naa guidxelaʼ ca textu ni peʼ caquiiñeʼ guundaniáʼ tuuxa hermanu o hermana riuaaʼ nayecheʼ». Hermanu caʼ, pa gúnitu casi biʼniʼ hermanu Vasily ne gudiitu lugar iquiiñeʼ Jiobá laatu para gúnitu ni racalaʼdxiʼ la? zusiidibe laatu guni tendertu xcaadxi responsabilidad nuu ndaaniʼ congregación stitu.

XIMODO HUAQUIIÑEʼ JIOBÁ CAADXI GUNAA

10. ¿Xi biʼniʼ Abigaíl, ne xi rizíʼdinu de ejemplu stibe?

10 Tiempu guzananda Saúl rey David ne ca xpinni, biquiiñecaʼ tu gacané laacaʼ.  Ti biaje gunabaʼ ca xpinni David guendaró ti hombre israelita láʼ Nabal ni napa stale bueltu. Gunábacabe hombre riʼ ni gócabe purtiʼ gúpacabe ca dendxuʼ stiʼ lu desiertu. Peru nabé malu Nabal ne qué niná nudii laacabe gastiʼ. Guizáʼ bidxiichi David, ne gudixhe ique guuti Nabal ne ca hombre ni runi dxiiñaʼ ra lidxi (1 Sam. 25:3-13, 22). Xheelaʼ Nabal nga Abigaíl, ti gunaa nabé sicarú. Nabé nuu xpiaaniʼ gunaa riʼ ne nadxibalú, purtiʼ guyé dede ra nuu David, bizuxibi xañeebe ne gunabaʼ laabe cadi guutibe Nabal ne cadi guxhiibe rini. Né diidxaʼ nadóʼ gúdxibe David gusaana ni lu náʼ Jiobá. Ca diidxaʼ guníʼ Abigaíl ne ni biʼniʼ bicaa ni David guiníʼ ique cadi jneza ni chiguni ne gudii cuenta Jiobá nga biseendaʼ laabe (1 Sam. 25:23-28, 32-34). Cumu galán ca cualidad gupa Abigaíl la? biquiiñeʼ Jiobá laabe. Cásica laabe, zanda iquiiñe Jiobá ca gunaa ni naca nadóʼ ne nuu xpiaaniʼ para uguu gana familia stiʼ ne ca hermanu de congregación (Prov. 24:3; Tito 2:3-5).

11. ¿Xi dxiiñaʼ biʼniʼ ca xiiñiʼ Salum, ne tuu nga rinanda ejemplu stícabe tiempu riʼ?

11 Caadxi iza despué, ca xiiñidxaapaʼ Salum nga caadxi de ca gunaa ni biquiiñeʼ Jiobá para gaca chaahuiʼ ca muru stiʼ Jerusalén (Neh. 2:20; 3:12). Neca príncipe Salum, guyuu ca xiiñibe dispuesta gúnicaʼ dxiiñaʼ nadipaʼ ne nabé nagana que (Neh. 4:15-18). Maʼ gadxé gúcacabe de ca hombre risaca stiʼ ca tecoíta, purtiʼ laacaʼ qué ninacaʼ ñúnicaʼ dxiiñaʼ riʼ (Neh. 3:5). Guxuíʼlunu pabiáʼ biéchecabe ora bíʼyacabe biluxe dxiiñaʼ que cincuenta y dos dxi despué (Neh. 6:15). Tiempu riʼ, nuu stale hermana ni riuulaʼdxiʼ guni jma lu xhiiñaʼ Jiobá, racanécabe lu construcción ne rudiicabe mantenimientu ca yoo ra raca adorar Jiobá. Raca ca dxiiñaʼ riʼ galán purtiʼ runi ca hermana riʼ cani né stale gana, nápacaʼ habilidad galán ne leal laacaʼ.

12. Cásica biʼniʼ Tabita, ¿ximodo zanda iquiiñeʼ Jiobá laanu?

12 Gucané Jiobá Tabita para guni «stale cosa galán» ne gacané «ca pobre», jmaruʼ si ca viuda (Hech. 9:36). Cumu rudiibe ni caquiiñeʼ stobi ne nabé nacháʼhuibe la? stale tu biʼnaʼ dxi gútibe. Peru guizáʼ biéchecabe ora bisibani apóstol Pedro laabe (Hech. 9:39-41). ¿Xi rizíʼdinu de ejemplu stiʼ Tabita? Gastiʼ naca pa joven laanu o maʼ huaniisinu, pa hombre o gunaa laanu, guiranu zanda gúninu xiixa para gacanenu ca hermanu stinu (Heb. 13:16).

13. ¿Ximodo biquiiñeʼ Jiobá hermana Ruth ni nabé natuí, ne xi guníʼ hermana riʼ?

13 Guzéʼtenu ni bizaaca ti hermana láʼ Ruth. Nabé natuibe ne racaláʼdxibe gácabe misionera. Dxi nahuiinibe la? riebe de yoo pur yoo ne rusaanasibe tratadu ra lidxi binni. Sicaríʼ guniʼbe: «Guizáʼ riuuladxeʼ dxiiñaʼ que». Peru guca nagana para laabe guiníʼnebe binni de Reinu stiʼ Dios ra puertaʼ lidxi. Neca natuí Ruth, guca precursora regular dxi napa 18 iza. Lu iza 1946, guyebe Escuela Bíblica de Galaad de la Watchtower ne gucanebe ndaaniʼ guidxi Hawái ne Japón. Biquiiñeʼ Jiobá laabe para chinebe ca noticia galán ra nuu stale binni ni nabeza ndaaniʼ ca guidxi que. Casi ochenta iza despué de cayuni Ruth xhiiñaʼ Jiobá, guniʼbe ca diidxaʼ riʼ: «Jiobá nga rudii stipa naa. Huayacanebe naa cadi gacaʼ natuí. Ne nanna dxiicheʼ zanda iquiiñeʼ Jiobá tutiica xpinni ni napa confianza laabe».

 XI GÚNINU PARA IQUIIÑEʼ JIOBÁ LAANU

14. Casi ná Colosenses 1:29, ¿xi caquiiñeʼ gúninu pa racaláʼdxinu iquiiñeʼ Jiobá laanu?

14 Lu ca iza ni maʼ gudiʼdiʼ ca, gadxé gadxé modo huaquiiñeʼ Jiobá ca xpinni. Zaquiiñeʼ Jiobá laanu pa gusihuínninu racaláʼdxinu gúninu jma lu xhiiñabe (biindaʼ Colosenses 1:29TNM). Pa nuunu dispuestu iquiiñeʼ Jiobá laanu la? zúnibe intiica cosa para guni predicarnu né stale gana, gácanu maestru ni nanna gusiidiʼ, gánnanu ximodo quixhedxinu ladxidóʼ binni, gúninu dxiiñaʼ jneza, guiénenu ca xhamígunu o gúninu xcaadxi cosa ni caquiiñeʼ para gaca ni racaláʼdxibe.

15. Casi ná 1 Timoteo 4:12, 15, ¿xi caquiiñeʼ guinabaʼ ca joven Jiobá?

15 ¿Ñee jovenhuiiniʼ lii ne maʼ ziniisiluʼ la? Caquiiñeʼ stale hombre ni napa stipa ne racalaʼdxiʼ guicaa jma responsabilidad ndaaniʼ xquidxi Dios ne gaca siervu ministerial. Ndaaniʼ stale congregación nuu jma ancianu que ministerial. ¿Ñee zanda gúniluʼ stipa para gacaneluʼ jma ndaaniʼ congregación la? Nuu caadxi hermanu riníʼ sicaríʼ: «Publicador si zanda gacaʼ». Pa zacá riníʼ íqueluʼ la? gunabaʼ Jiobá uguu deseu de gácaluʼ siervu ministerial ndaaniʼ ladxidoʼloʼ ne gudiibe lii poder ni caquiiñeluʼ para gúniluʼ jma lu xhiiñabe (Ecl. 12:1). Caquiiñedu gacaneluʼ laadu (biindaʼ 1 Timoteo 4:12, 15TNM).

16. ¿Xi zanda guinábanu Jiobá ne xiñee?

16 Zanda gacané Jiobá laanu gúninu intiica cosa para gaca ni racaláʼdxibe. Nga runi, guinábanu Jiobá uguu deseu de gúninu xhiiñabe ndaaniʼ ladxidoʼno ne guinábanu laabe poder para gúninu ni. Pa joven laanu o maʼ huaniisinu, iquiiñenu tiempu stinu, stipa stinu, ca habilidad nápanu ne guiráʼ ni nápanu para gusisácanu Jiobá tiempu riʼ (Ecl. 9:10). Pa guidxíbinu ne guiníʼ íquenu qué zanda gúninu xhiiñaʼ Dios la? zunítinu oportunidad de gúninu jma lu xhiiñabe. Pa rúninu stale o huaxiéʼ lu xhiiñaʼ Dios, guiranu nápanu privilegiu de gusisácanu Bixhózenu ni nadxii laanu.

CANCIÓN sjj 127 Ximodo naquiiñeʼ gacaʼ

^ párrafo 5 ¿Ñuuláʼdxinu ñúninu jma lu xhiiñaʼ Jiobá la? ¿Ñee riníʼ íquenu pa zándaruʼ iquiiñeʼ Jiobá laanu para gúninu xhiiñaʼ la? ¿O riníʼ íquenu cadi caquiiñeʼ gúninu jma lu xhiiñabe? Lu artículo riʼ zazíʼdinu ximodo zanda gudii Jiobá laanu deseu ne poder ni caquiiñenu para gúninu guiráʼ ni riuulaʼdxiʼ.

^ párrafo 3 Neca bicaa Pablo carta riʼ para ca xpinni Cristu ni bibani lu primé siglu que la? laaca racané ni guiráʼ xpinni Jiobá de tiempu riʼ.