Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 44

Gúninu stipa para gannaxhiinu ca xhamígunu jma ante gueeda fin

Gúninu stipa para gannaxhiinu ca xhamígunu jma ante gueeda fin

«Ni dxandíʼ xhamígunu la? guiráʼ ora nadxii laanu» (PROV. 17:17).

CANCIÓN sjj 101 Gúninu xhiiñaʼ Jiobá tobi si

NI ZAZÍʼDINU *

1, 2. Casi ná 1 Pedro 4:7, 8, ¿xi zacané laanu gudxíʼlunu ca guendanagana gápanu?

ZÁNDACA zadxaagalunu stale guendanagana ra mayaca guiluxe «ca últimu dxi» riʼ (2 Tim. 3:1). Guzéʼtenu ni bizaaca ndaaniʼ ti guidxi stiʼ África, despué de biʼniʼ votar binni lugar que guizáʼ gudíndecaʼ. Ca hermanu ni nabeza lugar que guyuucaʼ lu peligru jma de xhoopaʼ beeu. ¿Xi gucané laacabe para bidxiilúcabe guendanagana riʼ yaʼ? Caadxi de ca hermanu riʼ yendézacaʼ ra lidxi xcaadxi hermanu ni nabeza ti lugar ra cadi cadíndecabe. Sicaríʼ guníʼ ti hermanu: «Guizáʼ biecheʼ purtiʼ napaʼ xhamiguaʼ ni gucané naa. Rigúʼsaadu gana laadu».

2 Ora guzulú «gran tribulación», ziéchenu purtiʼ nápanu xhamígunu ni nadxii laanu (Apoc. 7:14). Nga runi, risaca gúninu stipa yanna para gannaxhiinu ca xhamígunu jma (biindaʼ 1 Pedro 4:7, 8). Zanda guizíʼdinu stale de ni bizaaca Jeremías, purtiʼ gucané ca xhamigu laa ante guinitilú Jerusalén. * ¿Ximodo zanda chinándanu ejemplu stibe yaʼ?

XI RUSIIDIʼ EJEMPLU STIʼ JEREMÍAS LAANU

3. a) ¿Xi ñándaca nucaa Jeremías cadi ñapa xhamigu? b) ¿Xi gudxi Jeremías secretariu stiʼ, ne xi guleenducaʼ?

3 Biaʼ cuarenta iza bibani Jeremías lade binni ni qué  runi ni ná Dios, ládecabe nuu ca vecinu stibe ne caadxi de ca familia stibe de guidxi ra gúlebe, Anatot (Jer. 11:21; 12:6). Peru biyúbibe tu gaca xhamígube. Gúdxibe Baruc, secretariu stibe guiráʼ ni runi sentirbe, ne nánnanu ni purtiʼ cá ni lu Biblia (Jer. 8:21; 9:1; 20:14-18; 45:1). Nanna dxíchinu biaʼ tiempu bicaa Baruc historia stiʼ Jeremías, nabé gunnaxhiisaacaʼ ne gupasaacaʼ respetu (Jer. 20:1, 2; 26:7-11).

4. ¿Xi gudxi Jehová Jeremías guni, ne xiñee jma guca xhamigu Jeremías ne Baruc?

4 Guca Jeremías nadxibalú ne gúdxibe ca israelita xi chiguizaaca Jerusalén (Jer. 25:3). Gudxi Jehová Jeremías gucaa lu ti rollo xi guiráʼ chiguizaaca ca israelita ti gacanebe laacaʼ gaca arrepentircaʼ (Jer. 36:1-4). Biʼniʼ Jeremías ne Baruc dxiiñaʼ juntu para gúnicaʼ ni gunabaʼ Dios laacaʼ. Nanna dxíchinu, biaʼ tiempu bíʼnicabe dxiiñaʼ juntu guniʼcaʼ diidxaʼ ni biquidxi fe sticaʼ.

5. ¿Xiñee nánnanu dxandíʼ guca xhamigu Baruc Jeremías?

5 Biluxe gucuá si rollo que gunabaʼ Jeremías Baruc, xhamigu, guʼndaʼ ni cá luni (Jer. 36:5, 6). Neca nagana dxiiñaʼ que, guca Baruc nadxibalú ne biindaʼ ni cá luni. ¿Ruxuíʼlunu pabiáʼ biecheʼ Jeremías ora gunna guyé xhamigu lu patiu stiʼ templu que ne biindaʼ rollo que nezalú guidxi que la? (Jer. 36:8-10). Ora gunna ca príncipe stiʼ Judá ni biʼniʼ Baruc, gúdxicabe laa guʼndaʼ rollo que sti biaje (Jer. 36:14, 15). Despué, gúdxicabe rey Jehoiaquim ni guníʼ Jeremías. Para cadi guniná rey que Baruc ne Jeremías la? sicaríʼ gudxi ca príncipe que Baruc: «Laché, lagucaachilú, lii ne Jeremías; cadi ganna guirutiʼ paraa nuutu» (Jer. 36:16-19).

6. ¿Xi biʼniʼ Jeremías ne Baruc dxi bicaalúcabe laacaʼ?

 6 Ora binadiaga rey Jehoiaquim ni bicaa Jeremías, guizáʼ bidxiichi dede bizaaquiʼ rollo que ne biʼniʼ mandar guinaazecabe profeta que ne secretariu stiʼ. Peru qué nidxibi Jeremías. Gucuaabe sti rollo, bidiibe ni Baruc ne biʼniʼ dictarbe laa mensaje stiʼ Jehová. Ngue runi, bicaa Baruc «guiráʼ ni cá lu primé rollo que, ni bizaaquiʼ Jehoiaquim rey stiʼ Judá» (Jer. 36:26-28, 32).

7. ¿Xi bizaaca Jeremías ne Baruc pur bíʼnicaʼ dxiiñaʼ juntu?

7 Ora ridxaagalú binni xiixa guendanagana juntu, jma raca xhamígucaʼ. Ngue runi, ora bibiguetaʼ bicaa Jeremías ne Baruc rollo ni bizaaquiʼ rey Jehoiaquim, jma guca xhamígucaʼ. ¿Xi rizíʼdinu de guiropaʼ hombre ni biʼniʼ ni ná Dios riʼ yaʼ?

GUININU NI RUNI SENTIRNU

8. ¿Xi zanda gucueeza laanu de gannaxhiinu ca xhamígunu jma, ne xiñee cadi naquiiñeʼ guiníʼ íquenu zacá?

8 Pa bíʼnicabe laanu xiixa cosa ni bininá laanu, zándaca gaca nagana para laanu gápanu confianza sti binni (Prov. 18:19, 24). Zándaca guiníʼ íquenu qué gápanu tiempu ne stipa para jma gaca xhamígunu tuuxa. Peru cadi naquiiñeʼ guiníʼ íquenu zacá. Purtiʼ pa racaláʼdxinu gacané ca hermanu laanu ora guidxaagalunu xiixa guendanagana la? caquiiñeʼ gápanu confianza laacabe yanna, gábinu laacabe xi riníʼ íquenu ne xi runi sentirnu. Zacá zanda gaca xhamígunu laacabe jma (1 Ped. 1:22).

9. a) Ximodo bisihuinni Jesús napa confianza ca xhamigu? b) ¿Ximodo zanda gannaxhiinu ca xhamígunu jma ora rinínenu laacaʼ diidxaʼ? Bizeeteʼ ti ejemplu.

9 Jesús bisihuinni napa confianza ca xhamigu purtiʼ qué nucaachiʼ gastiʼ ora guniʼné laacabe (Juan 15:15). Zanda chinándanu ejemplu stibe pa gábinu ca xhamígunu ni rusiecheʼ laanu, ni riguu laanu xizaa ne ni riguu laanu triste. Laaca naquiiñeʼ gucaʼdiáganu ora guiniʼné tuuxa laanu, purtiʼ zacá zanda gánnanu pa modo riníʼ íquenu riníʼ íquebe ne pa runi sentirbe ni runi sentirnu, ne pa tobi si ni riuuláʼdxinu gúninu. Guidúʼyanu ni bizaaca Cindy, ti hermana ni napa 29 iza. Laa guca xhamiga ti precursora, Marie-Louise de jma de 60 iza. Runi predicárcabe guiráʼ jueves siadóʼ ne riníʼcabe de gadxé gadxé tema. Cindy ná: «Riuuladxeʼ guinieniáʼ ca xhamiguaʼ de cosa nabé risaca, purtiʼ racané ni naa gunebiaʼyaʼ  laacabe ne guieneʼ laacabe jma». Ora riníʼneluʼ ca xhamíguluʼ diidxaʼ jma raca xhamígutu. Nga runi, galán gúninu casi runi Cindy ne guinínenu ca xhamígunu diidxaʼ ti gacanésaanu (Prov. 27:9).

GUNI PREDICARNU JUNTU

10. Casi ná Hebreos 10:24, ¿xi zanda guizaaca ora runi predicarnu né ca hermanu stinu?

10 Casi bizaaca né Jeremías ne Baruc, ora runi predicarnu né ca hermanu stinu ne ridúʼyanu ca cualidad galán nápacabe la? rizíʼdinu de laacabe ne jma raca xhamígunu laacabe (biindaʼ Hebreos 10:24). Guzéʼtenu ti ejemplu, ora riréʼnenu ti hermanu predicación ne ridúʼyanu pabiáʼ nadxibalú ora runi defender ni runi cré ne guiníʼ de ca promesa stiʼ Jehová, zándaca zannaxhiinu laabe jma.

11, 12. ¿Xi ribeendú chupa xpinni Cristu ora runi predicarcaʼ juntu? Bizeeteʼ ti ejemplu.

11 Guidúʼyanu chupa ejemplu ni zacané laanu gudiʼnu cuenta pabiáʼ racané guni predicar chupa xpinni Cristu juntu. Adeline nga ti hermana de 23 iza, gunábabe xhamígabe Candice chiguni predicárcabe ti territorio ra huaxiéʼ raca predicar. Sicaríʼ guníʼ Adeline: «Racaláʼdxidu guni predicardu né stale gana ne gúnidu jma lu predicación. Ne bidiʼdu cuenta caquiiñedu tu uguu gana laadu para gúnidu jma lu xhiiñaʼ Jehová». ¿Xi guleendúcabe ora biʼniʼ predicárcabe juntu yaʼ? Adeline guníʼ: «Ora riluxe ti dxi la? rinidu ximodo runi sentirdu, pabiáʼ guyuʼdu gana ora gunínedu binni ne ximodo gucané Jehová laadu. Guirópadu riuuláʼdxidu guinidu de cosa risaca, ne zacá jma guca xhamígadu».

12 Laïla ne Marianne, chupa hermana soltera de Francia, yeguni predicarcaʼ gaayuʼ semana ndaaniʼ guidxi Bangui, capital stiʼ República Centroafricana ra rié stale binni. Sicaríʼ guníʼ Laïla: «Naa ne Marianne gúpadu caadxi guendanagana, peru cumu siempre gunidu diidxaʼ ne nadxiisaadu la? gunda guca xhamígadu  jma. Guyuuladxeʼ modo laabe purtiʼ nagueenda riaabe xiixa lugar, pabiáʼ nadxiibe binni ne runi predicarbe né stale gana». Cadi caquiiñeʼ chuunu sti guidxi para cueendunu ni guleendú ca hermana riʼ. Cada biaje guiréʼnenu ti hermanu o hermana stinu predicación, nápanu oportunidad de gunibiáʼ chaahuinu laa ne gaca xhamígunu laa jma.

GUIDÚʼYANU CA COSA GALÁN NI RUNI CA HERMANU NE GUNI PERDONARNU

13. ¿Xi zanda guizaaca ora runi predicarnu né ca hermanu stinu?

13 Nuu biaje, ora runi predicarnu né ca hermanu stinu, qué ridúʼyasinu ca cualidad stícabe, sínuque laaca ridúʼyanu ra rucheecabe. ¿Xi zanda gacané laanu para cadi gúninu ni bizéʼtenu riʼ yaʼ? Guzéʼtenu ejemplu stiʼ Jeremías sti biaje. ¿Xi gucané laabe gúʼyabe ca cosa galán ni runi binni ne guni perdonarbe laacaʼ?

14. ¿Xi biziidiʼ Jeremías de Jehová, ne ximodo gucané ni laabe?

14 Bicaa Jeremías libru ni ziné lá ne zándaca laaca laabe bicaabe 1 ne 2 Reyes. Ra gucuaabe dxiiñaʼ riʼ, bidiibe cuenta riá Jehová binni ruchee. Gúnnabe ora guca arrepentir rey Acab de guiráʼ cosa malu ni biʼniʼ, guníʼ Jehová qué zuuyaʼ Acab ora guiabanáʼ familia stiʼ (1 Rey. 21:27-29). Laaca gunna Jeremías, neca biʼniʼ Manasés stale cosa malu jma que Acab, biʼniʼ perdonar Jehová laa ora guca arrepentir (2 Rey. 21:16, 17; 2 Crón. 33:10-13). Gucané relatu riʼ Jeremías gapa paciencia ne guiá ca xhamigu casi modo biʼniʼ Dios ni (Sal. 103:8, 9).

15. ¿Ximodo bisihuinni Jeremías napa paciencia casi Jehová ora bisaana Baruc dxiiñaʼ stiʼ ti tiempu?

15 Guiníʼ íquenu ni biʼniʼ Jeremías dxi bisaana Baruc dxiiñaʼ stiʼ ti tiempu. Qué niníʼ ique Jeremías maʼ qué zuchaa Baruc, sínuque bidii laabe mensaje galán stiʼ Jehová (Jer. 45:1-5). ¿Xi rizíʼdinu de ni bizaaca riʼ yaʼ?

16. Casi ná Proverbios 17:9, ¿xi caquiiñeʼ gúninu para gannaxhiinu ca xhamígunu jma?

16 Ni nánnanu nga qué zanda cuézanu gaca ca hermanu stinu perfectu. Nga runi, gúninu stipa para gannaxhiinu ca xhamígunu jma. Pa ti xhamígunu guchee, galán guinínenu laabe peru gúninu ni né cariñu ne gudiʼnu laabe ti conseju ni zeeda de lu Biblia (Sal. 141:5). Ne pa guninabe laanu, caquiiñeʼ guni perdonarnu laabe. Ne ora maʼ biʼniʼ perdonarnu laabe, cadi caquiiñeʼ guzéʼtenu ni (biindaʼ Proverbios 17:9). Nabé risaca guidúʼyanu ca cualidad galán stiʼ ca hermanu stinu né cadi ra rucheecaʼ, purtiʼ nabé nagana ca dxi riʼ. Zacá zanda gaca xhamígunu jma. Ne caquiiñeʼ gúninu ni purtiʼ zaquiiñenu de ca xhamígunu lu gran tribulación.

GUSIHUÍNNINU DXANDÍʼ NADXIINU

17. ¿Xiñee nánnanu dxandíʼ gunnaxhii Jeremías ca xhamigu ora gudíʼdicaʼ ra nagana?

17 Dxandíʼ gunnaxhii Jeremías ca xhamigu ora gudíʼdicaʼ ra nagana. Guzéʼtenu ximodo gucanebe Ébed-Mélec. Laa guca ti funcionariu ni gulee Jeremías de ndaaniʼ ti bizé ra daʼ beñe para cadi ñati. Peru despué de bilá Ébed-Mélec laabe bidxibi pa ñuniná ca príncipe de Judá laa. Ora gunna Jeremías ni cayaca xhamigu, qué nusaanabe laa stubi ne maʼ laa ñuuyaʼ xi ñuni. Neca deguyoo Jeremías, gucané laabe ne gudxi laabe ca promesa stiʼ Jehová ni gudixhedxí ladxidoʼbe (Jer. 38:7-13; 39:15-18).

18. Casi ná Proverbios 17:17, ¿xi zanda gúninu ora cayacaná ti hermanu stinu?

 18 Tiempu riʼ, stale hermanu cudxiilucaʼ stale guendanagana. Stale tu cayacaná pur desastre natural o guerra ne contaminación. Ora guizaaca ndiʼ, zanda guidxaagalunu ca hermanu stinu ra lídxinu. Xcaadxi zanda gacané ra gudii bueltu para laacabe. Peru ni zanda gúninu nga guinábanu Jehová gacané laacabe. Pa gánnanu caree ti hermanu gana, zándaca qué gánnanu xi gábinu laabe o qué gánnanu xi gúninu. Peru nuu xi zanda gúninu. Zanda chigánnanu laabe, gucaʼdiáganu laabe ne guidúʼndanenu laabe ti textu ni riguixhedxí ladxidoʼno (Is. 50:4). Ni jma risaca nga chuʼnu gaxha de ca xhamígunu ora maʼ caquiiñecaʼ laanu (biindaʼ Proverbios 17:17).

19. Tiempu riʼ, ¿xiñee caquiiñeʼ chuʼnu tobi si né ca xhamígunu ne gannaxhiisaanu jma?

19 Tiempu riʼ, ¿xiñee caquiiñeʼ chuʼnu tobi si né ca xhamígunu ne gannaxhiisaanu jma? Purtiʼ zacalaʼdxiʼ ca xhenemígunu guxhélecaʼ laanu de ca xhamígunu né guiráʼ ni riniʼcaʼ. Zuyúbicabe modo gusaana de gacanésaanu ne de gápanu confianza laanu. Peru qué zabeendúcabe gastiʼ. Qué zanda gucaacabe laanu gusaana de gannaxhiisaanu ne chuʼnu tobi si. Neca gúnicabe intiica cosa, qué zanda guchiácabe amistad ni maʼ nápanu. Ne qué ziuu dxi gusaana de gannaxhiinu ca xhamígunu.

CANCIÓN sjj 24 Quíbanu lu dani stiʼ Jiobá

^ párrafo 5 Cumu maʼ zedadxiña fin la? jma caquiiñeʼ gaca xhamígunu ca hermanu stinu. Lu artículo riʼ zadúʼyanu xi zanda guizíʼdinu de ejemplu stiʼ Jeremías. Laaca zazíʼdinu xiñee risaca gannaxhiinu ca xhamígunu jma ti ganda gudxíʼlunu ca dxi nagana zeeda ca.

^ párrafo 2 Cadi orden bizaaca ca cosa ca nga riete ni lu libru stiʼ Jeremías.

^ párrafo 57 NI RIHUINNI LU FOTO CA: Lu foto riʼ rihuinni xi zándaca gueeda guizaaca lu «gran tribulación». Nuu ti grupu de hermanu ndaaniʼ ti yoo. Ratadxí ladxidóʼ ca hermanu ora dagulisaacaʼ neca cadxagalucaʼ xiixa guendanagana. Guionna foto ri rusihuinni biʼniʼ ca hermanu riʼ stipa para gannaxhiicaʼ ca xhamígucaʼ jma ante guzulú gran tribulación.