Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 48

«Galán gunduuxetu dxiiñaʼ ni bizulutu»

«Galán gunduuxetu dxiiñaʼ ni bizulutu»

«Galán gunduuxetu dxiiñaʼ ni bizulutu» (2 COR. 8:10).

CANCIÓN sjj 35 Gúninu ca cosa jma risaca

NI ZAZÍʼDINU *

1. ¿Xi rudii Jehová lugar gúninu?

RUDII JEHOVÁ lugar laanu cuinu xi gúninu lu xquendanabáninu. Rusiidibe laanu cuinu gúninu ni jneza ne racanebe laanu cueendunu ni galán ora riuuláʼdxibe ca ni riguixhe íquenu gúninu (Sal. 119:173). Pa chinándanu ca conseju ni zeeda lu Stiidxaʼ Dios zacané ni laanu quixhe íquenu gúninu ni jneza (Heb. 5:14).

2. ¿Xi zándaca guizaaca despué de maʼ gudixhe íquenu gúninu xiixa?

2 Pa maʼ gudixhe íquenu gúninu xiixa, zándaca caquiiñeʼ gúninu stipa para gunduuxenu ni bizulunu. Guzéʼtenu caadxi ejemplu. Gudixhe ique ti joven guʼndaʼ guidubi Biblia. Bizulú bíʼnibe ni chupa chonna semana si, peru despué maʼ qué ñúnibe ni. Ti hermana gudixhe ique gaca precursora, peru siempre rusaanabe ni para despué. Ti grupu de ancianu gudixhe íquecaʼ gúnicaʼ jma visita de pastoreu, peru gudiʼdiʼ beeu ne qué nigánnacaʼ guirutiʼ. Neca gadxé gadxé ni gudixhe ique ca hermanu riʼ gúnicaʼ la? qué ñúnicaʼ gastiʼ. Zacaca bizaaca ca xpinni Cristu de Corinto ni bibani lu primé siglu. Guidúʼyanu xi zanda guizíʼdinu de ni bíʼnicabe.

3. ¿Xi gudixhe ique ca hermanu de Corinto, ne xi bizaaca?

3 Lu iza 55, biaana ca hermanu de Corinto gúnicaʼ ti cosa nabé risaca. Gúnnacabe nabé pobre ca hermanu de Jerusalén ne Judea, ne cutopa ca xcaadxi congregación bueltu para gacanecaʼ laacabe. Cumu nachaʼhuiʼ ca hermanu de Corinto ne riuuláʼdxicaʼ gudiicaʼ la? gudixhe íquecaʼ gacanecaʼ ne gunabadiidxacaʼ apóstol Pablo ximodo gúnicaʼ ni. Gudxi Pablo laacabe xi gúnicabe ne biseendaʼ Tito ra nuucabe para gacané laacabe gutópacabe bueltu que (1 Cor. 16:1; 2 Cor. 8:6). Peru chupa chonna beeu despué gunna Pablo caʼruʼ gúnicabe gastiʼ. Ne pur nga zándaca qué zuseendacabe bueltu stícabe dxi ca guseendaʼ ca xcaadxi congregación cani ra nuu ca hermanu de Jerusalén (2 Cor. 9:4, 5).

4. Casi ná 2 Corintios 8:7, 10, 11, ¿xi gudxi Pablo ca hermanu de Corinto gúnicaʼ?

 4 Jneza ni gudixhe ique ca hermanu de Corinto guni, ne biʼniʼ felicitar Pablo laacaʼ pur fe sticaʼ ne deseu nápacaʼ de gacanecaʼ. Peru laaca gúdxibe laacaʼ gunduuxecaʼ ni bizulucaʼ (biindaʼ 2 Corintios 8:7, 10, 11). Ni bizaaca ca hermanu riʼ rusiidiʼ ni laanu dede ca xpinni Cristu caquiiñeʼ gúnicaʼ stipa para gunduuxecaʼ ni bizulucaʼ.

5. ¿Xi pregunta chiguicábinu lu artículo riʼ?

5 Cásica bizaaca ca hermanu de Corinto que, laaca zándaca gaca nagana para laanu gúninu ni maʼ gudixhe íquenu purtiʼ binni ruchee laanu ne rusaananu ca cosa ca para despué. Laaca zanda gusaana de gúninu ni maʼ gudixhe íquenu para despué ora guizaaca xiixa ni cadi cabézanu (Ecl. 9:11; Rom. 7:18). Lu artículo riʼ, zacábinu ca pregunta riʼ: ¿xi zanda gúninu para quixhe íquenu gúninu ni jneza?, ¿xi zanda gúninu para guidúʼyanu pa biaʼsi ni maʼ gudixhe íquenu gúninu ne pa caquiiñeʼ guchaʼnu ni? ne ¿xi zacané laanu gunduuxenu ni bizulunu?

ANTE QUIXHE ÍQUENU GÚNINU XIIXA

6. ¿Pora nga zándaca caquiiñeʼ guchaʼnu ni maʼ gudixhe íquenu?

6 Nuu cosa ni maʼ gudixhe íquenu gúninu ni qué ziuu dxi guchaʼnu. Guzéʼtenu chupa de laacani. Maʼ gudixhe íquenu gúninu ni ná Jehová ne gácanu fiel xheelanu (Mat. 16:24; 19:6). Peru zándaca nuu caadxi cosa ni caquiiñeʼ guchaʼnu, ¿pora yaʼ? Ora guchaa xiixa cosa lu xquendanabáninu. Peru ¿xi zacané laanu quixhe íquenu gúninu ni jneza yaʼ?

7. ¿Xi caquiiñeʼ guinábanu Dios ora guni orarnu, ne xiñee?

7 Guinábanu Jehová gudii laanu sabiduría. Gudxi Jehová Santiago gucaa ca diidxaʼ riʼ: «Pa cayaadxaʼ sabiduría tuuxa de laatu la? guinabaʼ ni Dios, purtiʼ rudii Dios de guidubi ladxidóʼ» (Sant. 1:5). Nuu biaje qué ridxélanu xi gúninu, nga runi, gápanu confianza Jehová ora quixhe íquenu gúninu xiixa ne ora guidúʼyanu pa biaʼsi ni. Oracaruʼ zacané Jehová laanu cuinu gúninu ni jneza.

8. ¿Xi caquiiñeʼ gúninu ante quixhe íquenu gúninu xiixa?

8 Guni investigar chaahuinu. Guidúʼyanu ni rusiidiʼ Stiidxaʼ Dios laanu, gúʼndanu ca publicación rudii organización stiʼ Jehová ne güinu diidxaʼ né ti binni ni nápanu confianza (Prov. 20:18). Nabé risaca gúninu ca ni bizéʼtenu riʼ ora caníʼ íquenu guchaʼnu de dxiiñaʼ, chindézanu sti lugar o guni estudiarnu ti carrera para gápanu ni guibaninenu ne cadi gusaana de gúninu ni ná Jehová.

9. ¿Xi zazaaca pa cadi honradu laanu?

9 Guiníʼ íquenu xiñee cayúninu xiixa. Guizáʼ risaca para Jehová ca razón nápanu para gúninu xiixa cosa (Prov. 16:2). Ribézabe gácanu honradu lu guiráʼ ni gúninu. Nga runi, caquiiñeʼ gácanu honradu né laca laanu ne laaca caquiiñeʼ gácanu honradu né xcaadxi binni ora quixhe íquenu gúninu xiixa. Pa qué gúninu ni, zaca nagana para laanu gunduuxenu ni bizulunu. Guzéʼtenu ti ejemplu. Guxuíʼlunu gudixhe ique ti joven gaca precursor, peru ra gudiʼdiʼ tiempu qué nusaabe hora stibe ne cadi cayuni sentirbe nayecheʼ lu serviciu stibe. Zándaca guníʼ íquebe gácabe precursor para chuulaʼdxiʼ Jehová ni rúnibe. Peru zándaca bíʼnibe ni para chuulaʼdxiʼ bixhózebe o sti binni ni cayúnibe.

10. ¿Xiñee caquiiñeʼ guchaʼnu modo laanu?

10 Guidúʼyanu sti ejemplu. Maʼ gudixhe  ique ti binni ni cayuundaʼ Biblia gusaana de cubaʼ gueza. Primeru la? rúnibe stipa para gusaanabe ni, ridiʼdiʼ ti semana o chupa semana sin cúbabe gueza, peru rigúʼbabe ni sti biaje. Últimu la? rusaanabe ni. Cumu nadxiibe Jehová ne racaláʼdxibe chuulaʼdxiʼ ni rúnibe la? bisaanabe viciu que (Col. 1:10; 3:23).

11. ¿Xiñee naquiiñeʼ gucaʼnu ni naguixhe íquenu gúninu ne chinándanu ni?

11 Gucaʼnu ni naguixhe íquenu gúninu ne chinándanu ni. Pa gúninu ni, zanda gunduuxenu ni bizulunu. Guzéʼtenu ti ejemplu, pa maʼ gudixhe íquenu guidúʼndanu Biblia guiráʼ dxi peru qué gápanu ti programa la? zándaca qué zúninu ni. * Guzéʼtenu sti ejemplu, zándaca quixhe ique caadxi ancianu de ti congregación gúnicaʼ jma visita de pastoreu, peru gudiʼdiʼ tiempu ne qué ñúnicabe ni. Ti cosa ni zacané laacabe gúnicabe ni nga guiníʼ íquecabe ca pregunta riʼ: «¿Ñee maʼ bidúʼyadu tuu nga ca hermanu ni caquiiñeʼ chigánnadu la?» ¿Ñee maʼ bicaʼdu padxí ne pora chigánnadu laacabe la?

12. ¿Xi zándaca caquiiñeʼ gúninu ne xiñee?

12 Naquiiñeʼ gánnanu nuu cosa ni zanda ne ni qué zanda gúninu. Guirutiʼ qué gapa tiempu, bueltu ne stipa para guni guiráʼ ni racalaʼdxiʼ. Nga runi, cadi naquiiñeʼ guiaandaʼ laanu ne guiénenu nuu cosa ni zanda ne ni qué zanda gúninu. Zándaca nuu biaje napa xidé guchaʼnu ni maʼ gudixhe íquenu gúninu purtiʼ maʼ qué zanda gúninu ni (Ecl. 3:6). Pa gudixhe íquenu gúninu xiixa, peru ridúʼyanu caquiiñeʼ guchaʼnu caadxi de laani ne despué guiníʼ íquenu maʼ zanda gúninu ni, ¿xi zacané laanu gunduuxenu ni maʼ bizulunu yaʼ? Guidúʼyanu gaayuʼ cosa ni zacané laanu.

CAADXI COSA NI ZACANÉ LAANU GÚNINU NI MAʼ GUDIXHE ÍQUENU

13. ¿Xi caquiiñeʼ gúninu para gápanu stipa ti gúninu ni maʼ gudixhe íquenu?

13 Guinábanu Dios gudii stipa laanu para gúninu ni maʼ gudixhe íquenu. Zanda gudii Jehová «poder» laanu para gúninu guiráʼ ni riuulaʼdxiʼ ne guni cumplirnu guiráʼ ni maʼ gudixhe íquenu gúninu (Filip. 2:13). Nga runi, guinábanu laabe espíritu santu para gápanu stipa ni caquiiñenu. Cadi gusaana de guni orarnu neca ruluíʼ cadi cacabi Dios laanu. Sicaríʼ guníʼ Jesús: «Laguinabaʼ ne zacaatu [espíritu santu]» (Luc. 11:9, 13).

14. ¿Ximodo zacané Proverbios 21:5 laanu gúninu ni maʼ gudixhe íquenu?

14 Quíxhenu xi gúninu (biindaʼ Proverbios 21:5). Para gúninu ti dxiiñaʼ, caquiiñeʼ quíxhenu xi gúninu ne chinándanu ni. Zacaca nga ora quixhe íquenu gúninu xiixa, gúninu ti lista ne gucaʼnu guiráʼ ca cosa ni chigúninu. Ora gúninu ti dxiiñaʼ nabé nagana, jma galán nga guzulunenu né ca ni cadi nagana peʼ, ne despué zadúʼyanu pabiáʼ maʼ bíninu. Gudxi Pablo ca xpinni Cristu de Corinto cueecaʼ ti ndaa bueltu sticaʼ «primé dxi stiʼ cada semana», lugar de cuézacaʼ ne gutópacaʼ ni de ora chebe ra nuucaʼ (1 Cor. 16:2). Sti cosa ni zabeendunu pa guzulunu né ca dxiiñaʼ ni cadi nagana peʼ nga qué zaníʼ íquenu qué zanda gúninu ni.

15. ¿Xiruʼ caquiiñeʼ gúninu despué de maʼ bicaʼnu xi chigúninu?

15 Pa gucaʼnu ca cosa ni maʼ gudíxhenu gúninu la? zacaneni laanu guni cumplirnu ca cosa riʼ (1 Cor. 14:40). Guzéʼtenu ti ejemplu, rábicabe ca ancianu cuicaʼ tobi  de laacaʼ para gucaa guiráʼ ni chigúnicaʼ, tu chigúnini ne padxí caquiiñeʼ guilúxeni. Ca ancianu ni rinanda instrucción riʼ qué raca nagana para laacaʼ gúnicaʼ ni maʼ gudixhe íquecaʼ (1 Cor. 9:26). Laanu laaca zanda gúninu ni rúnicabe. Guzéʼtenu sti ejemplu, zanda gúninu ti lista ra gucaʼnu xi chigúninu guiráʼ dxi ne orden racaláʼdxinu gúninu ni. Zacané ndiʼ laanu gunduuxenu ni bizulunu, peru laaca zacané ni laanu gúninu ni jma nagueenda.

16. Casi ná Romanos 12:11, ¿xi caquiiñeʼ gúninu para guni cumplirnu ni maʼ gudixhe íquenu?

16 Gúninu stipa. Caquiiñeʼ gúninu stipa para chinándanu ca ni maʼ gudíxhenu gúninu ne gunduuxenu ni maʼ bizulunu (biindaʼ Romanos 12:11). Gudxi Pablo Timoteo cadi gusaana de guni stipa para gaca ti maestru ni nanna gusiidiʼ. Racané conseju riʼ laanu lu intiica meta gápanu (1 Tim. 4:13, 16).

17. ¿Ximodo racané Efesios 5:15, 16 laanu para guni cumplirnu ni maʼ gudixhe íquenu?

17 Iquiiñenu tiempu stinu jneza (biindaʼ Efesios 5:15, 16). Quíxhenu pora chigúninu xiixa ne cadi gusaananu ni para despué. Cadi cuézanu guedandá tiempu galán para gúninu ni maʼ gudixhe íquenu, purtiʼ zándaca qué zedandá ni (Ecl. 11:4). Caquiiñeʼ chuʼnu cuidadu cadi gunítinu tiempu stinu lu ca cosa ni huaxiéʼ risaca ne gusirá ni stipa ni caquiiñenu para gúninu ni jma risaca (Filip. 1:10). Pa ganda la? guyúbinu ti lugar ra gastiʼ guchiiñaʼ laanu. Gábinu xcaadxi caquiiñenu tiempu para gaca concentrarnu. Laaca zanda gusuinu teléfono stinu ne guséʼgunu correu o red social stinu. *

18, 19. Despué de maʼ gudixhe íquenu gúninu xiixa cosa jneza, ¿xi zanda gacané laanu cadi guireʼnu gana neca guidxaagalunu guendanagana?

18 Guiníʼ íquenu xi zabeendunu. Zanda guchaaganu ni zabeendunu né ora rindá ti binni lugar ra zeʼ de viaje. Pa racaláʼdxinu chindanu ti lugar la? caquiiñeʼ gúninu stipa para chindanu ra ziuʼnu neca daʼguʼ carretera ne caquiiñeʼ guicaanu sti neza. Zacaca nga caquiiñeʼ gúninu né ni maʼ gudixhe íquenu, caquiiñeʼ guiníʼ íquenu guiráʼ ca cosa galán ni zabeendunu ne cadi guireʼnu gana neca guidxaagalunu guendanagana (Gál. 6:9).

19 Cadi fácil nga quixhe ique binni guni ti cosa jneza ne guni cumplir ni. Peru zanda gacané Jehová laanu para gápanu sabiduría ne stipa ni caquiiñenu para gunduuxenu ni bizulunu.

CANCIÓN sjj 65 ¡Cadi cuísaluʼ atrá!

^ párrafo 5 ¿Ñee huayaca arrepentirnu de xiixa cosa ni maʼ gudixhe íquenu gúninu la? ¿Ñee raca nagana para laanu quixhe íquenu gúninu xiixa ne gunduuxenu ni maʼ bizulunu la? Zacané artículo riʼ laanu gudxíʼlunu ca guendanagana riʼ ne gunduuxenu ni bizulunu.

^ párrafo 11 «Programa de lectura de la Biblia», nuu ni lu sitiu jw.org®, zacaneni laanu guidúʼndanu Biblia (guyé ra ná PUBLICACIONES > OTRAS PUBLICACIONES, nuu ni lu diidxastiá).

^ párrafo 17 Lu artículo ni láʼ «Veinte consejos para que el tiempo le rinda», ni biree lu revista ¡Despertad! abril de 2010, zadxélanu xcaadxi sugerencia para iquiiñenu tiempu stinu jneza.