Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 20

Quixhedxinu ladxidóʼ ca ni maʼ biʼniʼ sufrir abuso sexual

Quixhedxinu ladxidóʼ ca ni maʼ biʼniʼ sufrir abuso sexual

«Laabe nga Dios stinu ne riguixhe dxí be ladxidóʼ no [...] ora tiica acaná ladxidóʼ no» (2 COR. 1:3, 4).

CANCIÓN sjj 134 Ca xiiñinu, ti regalu ni zeeda de Dios

NI ZAZÍʼDINU *

1, 2. a) ¿Xi ejemplu rusihuinni ralenenu necesidad de quixhedxícabe ladxidoʼno ne quixhedxinu ladxidóʼ xcaadxi? b) ¿Xi runiná stale xcuidihuiiniʼ?

GUIRANU ralenenu necesidad de quixhedxícabe ladxidoʼno ne quixhedxinu ladxidóʼ xcaadxi. Guzéʼtenu ti ejemplu, ora riaba ti xcuidihuiiniʼ ne riraa lu xibi laga caguite la? nagueendaca ruxooñeʼ ra nuu jñaa o bixhoze. Qué zanda gusiándacabe laabe, peru zanda quixhedxícabe ladxidoʼbe. Rinabadiidxacabe laabe xi gúcabe, ruchaacabe lube, riguiidxicabe laabe, riniʼnécabe laabe né diidxaʼ nadóʼ, ne zándaca riguiibicabe ñeebe ne rundiibicabe ni ti benda. Rusaana xcuidihuiiniʼ ca de guʼnaʼ ne zándaca richite sti biaje. Ne ra tiidiʼ tiempu rianda herida stiʼ.

2 Stale xcuidihuiiniʼ napa herida jma feu. Caadxi de laacabe maʼ biʼniʼ sufrir abuso sexual, zándaca ti biaje si o pur stale iza. Peru guizáʼ racanácabe. Caadxi de ca ni runi cometer ca abuso riʼ rigaacaʼ ne raca castigarcaʼ, peru nuu xcaadxi randa rucaachicaʼ ni ne qué raca castigarcaʼ. Ne neca gaca castigar ni biʼniʼ cometer abuso ca nagueendaca la? qué rusaana de gacaná ni biʼniʼ sufrir abuso ca neca maʼ huaniisi.

3. a) Casi ná 2 Corintios 1:3, 4, ¿xi racalaʼdxiʼ Jiobá? b) ¿Xi chonna pregunta chiguicábinu?

3 ¿Xi zanda gacané ti xpinni Cristu ni biʼniʼ sufrir abuso sexual dxi nahuiiniʼ ne dede yanna cayacaná? (Biindaʼ 2 Corintios 1:3, 4). Racalaʼdxiʼ Jiobá gannaxhiicabe ca dendxuʼ stiʼ ne quixhedxícabe ladxidoʼcaʼ ora caquiiñecani. Nga runi, chiguicábinu guionnaʼ pregunta riʼ: ¿Xiñee caquiiñeʼ chuʼ tu quixhedxí ladxidóʼ ca ni maʼ biʼniʼ sufrir abuso sexual dxi nahuiiniʼ? ¿Tu laa zanda quixhedxí ladxidóʼcabe?  Ne ¿xi zanda gúninu para quixhedxinu ladxidóʼcabe?

XIÑEE CAQUIIÑECABE CHUʼ TU QUIXHEDXÍ LADXIDÓʼCABE

4, 5. a) ¿Xiñee cadi naquiiñeʼ guiaandaʼ laanu maʼ gadxé ca xcuidihuiiniʼ ca de ca ni maʼ huaniisi? b) ¿Xi rizaaca né confianza napa ti xcuidihuiiniʼ xcaadxi binni despué de guni abusárcabe de laa?

4 Caadxi binni ni biʼniʼ sufrir abuso sexual dxi nahuiiniʼ la? dede yanna caquiiñecaʼ tu quixhedxí ladxidoʼcaʼ neca maʼ gudiʼdiʼ stale iza. Para guiénenu xiñee runi sentírcabe zacá la? cadi guiaandaʼ laanu maʼ gadxé ca xcuidihuiiniʼ ca de ca ni maʼ huaniisi ne gadxé gadxé modo runiná ca abuso ca laacabe. Guzéʼtenu caadxi razón.

5 Caquiiñeʼ gapa ca xcuidihuiiniʼ ca confianza ca binni ni cusiniisi ne ni cayapa laacaʼ. Racané confianza ca laacabe guni sentírcabe seguru ne laaca racaneni laacabe gápacabe confianza ca binni ni nadxii laacabe (Sal. 22:9). Triste guininu ni, peru stale de ca abuso ca laaca ndaaniʼ lídxicabe raca cani, ne ca ni runi cometer ca abuso ca nga familia stícabe o tuuxa ni nápacabe confianza. Ora tuuxa ni napa xcuidihuiiniʼ riʼ confianza guni abusar de laa la? raca nagana para laabe gápabe confianza xcaadxi binni neca tiidiʼ stale iza

6. ¿Xiñee guizáʼ malu ne guizáʼ runiná abuso sexual ca xcuidihuiiniʼ?

6 Ca xcuidihuiiniʼ nga ca ni jma nagueenda runi abusárcabe de laacaʼ. Guizáʼ malu ne guizáʼ runiná abuso sexual. Racaná ca xcuidihuiiniʼ ca stale ora rucaacabe laacaʼ gápacaʼ relación sexual ante chuʼcaʼ listu para laani, ne laaca caʼruʼ chuʼcaʼ listu para guichaganacaʼ ne gápacaʼ relación sexual. Ora runi abusárcabe de ti xcuidihuiiniʼ ruchaani modo ruuyabe sexo, riníʼ íquebe qué risácabe ne maʼ qué rápabe confianza xcaadxi binni.

7. a) ¿Xiñee qué raca nagana para ca ni runi abusar de ti xcuidihuiiniʼ gusiguiicaʼ laacabe, ne ximodo zanda gúnicabe ni? b) ¿Xi zándaca guizaaca pur ca guendarusiguii ca?

7 Caʼruʼ diʼ guiníʼ ique chaahuiʼ ca xcuidihuiiniʼ ca, caʼruʼ ganna chaahuicaʼ guicaacaʼ decisión ne qué gánnacaʼ pa ziábacaʼ lu xiixa peligru (1 Cor. 13:11). Nga runi qué raca nagana para tuuxa ni runi abusar de ti xcuidihuiiniʼ gusiguii laabe. Ne rábibe xcuidihuiiniʼ ca laa napa donda pur cayuni abusarbe de laa, cadi naquiiñeʼ guiníʼ gastiʼ, guirutiʼ tu zuni cré laa pa guiníʼ xi cazaaca, o zándaca gábibe laa rapa tuuxa ni maʼ huaniisi relación sexual né ti xcuidihuiiniʼ purtiʼ dxandíʼ nadxiibe laa. Pur guiráʼ ni maʼ bizéʼtenu riʼ, zanda tiidiʼ stale iza ne qué ziene xcuidihuiiniʼ riʼ pa cusiguiibe laa. Zándaca zaniisi xcuidihuiiniʼ riʼ ne zaníʼ ique nabiidiʼ, qué iquiiñeʼ para gastiʼ ne cadi lica caquiiñeʼ guni tratárcabe laa né cariñu.

8. ¿Xiñee zanda chuʼnu seguru zanda quixhedxí Jiobá ladxidóʼ ca ni maʼ biʼniʼ sufrir abuso sexual?

8 Racané ni maʼ bidúʼyanu riʼ laanu guiénenu xiñee dede yanna cayacaná ca ni maʼ biʼniʼ sufrir abuso sexual neca maʼ gudiʼdiʼ stale tiempu. Guizáʼ naxoo ne runiná delito riʼ binni. Rihuinni dxíchica maʼ nabáninu lu ca últimu dxi riʼ pur guiráʼ casu de abuso ni cahuinni yanna riʼ, ne maca cá lu Biblia stale tu laa maʼ «qué zanaxhii ca binni ne qué ziá ca irutiʼ» ne jmaruʼ si feu zuni «cani canauchee ne canausiguii» (2 Tim. 3:1-5, 13). Guizáʼ malu guiráʼ trampa riquiiñeʼ Binidxabaʼ para guniná binni ne guizáʼ feu nga guni binni ni riuuláʼdxibe. Peru jma nadipaʼ Jiobá que Binidxabaʼ ne ca binni ni runi ni riuulaʼdxiʼ enemigu riʼ. Laaca nanna Jiobá ximodo runi Binidxabaʼ dxiiñaʼ. Nga runi, zanda chuʼnu seguru nanna Jiobá ora cayuni sentirnu xiixa yuubaʼ ne zanda quixhedxibe ladxidoʼno ora caquiiñenu ni. Guizáʼ riéchenu cayuni servirnu Dios  stinu purtiʼ «riguixhe dxí be ladxidóʼ no. Rusieche be laanu ora tiica acaná ladxidóʼ no, ne zacá riziʼdi nu usieche nu stobi ni cayacaná ladxidóʼ, cásica bisieche be laanu» (2 Cor. 1:3, 4). Peru ¿tu riquiiñeʼ Jiobá para quixhedxí ladxidoʼno yaʼ?

TU LAA ZANDA QUIXHEDXÍ LADXIDÓʼ XCAADXI

9. Casi bicaa rey David lu Salmo 27:10, ¿xi zuni Jiobá pur ca ni rusaana familia stiʼ laa?

9 Ca binni ni jma caquiiñeʼ quixhedxinu ladxidoʼcaʼ nga ca ni qué ñuni proteger bixhoze ne jñaa laa de xiixa abuso o ca ni biʼniʼ sufrir xiixa abuso de tuuxa ni gúpacaʼ confianza. Gunna dxichi rey David Jiobá si nga zanda quixhedxí ladxidoʼno (biindaʼ Salmo 27:10). Gupa David fe racané Jiobá né stale cariñu ca binni ni runi rechazar familia stiʼ laa. ¿Ximodo runi Jiobá ni yaʼ? Riquiiñebe ca siervu fiel stibe, ca hermanu ni nuu ndaaniʼ ca congregación ca purtiʼ laacaʼ nga familia stinu. Ne Jesús peʼ guníʼ naca ca ni runi adorar Dios biʼchiʼ, bizaʼnaʼ ne jñaa (Mat. 12:48-50).

10. Dxi guca Pablo ancianu, ¿xi gúdxibe ca hermanu de dxiiñaʼ cayúnibe?

10 Guidúʼyanu ti ejemplu de ni maʼ bizéʼtenu riʼ ndaaniʼ congregación. Guca apóstol Pablo ti ancianu fiel ne biʼniʼ stale dxiiñaʼ, bisaanabe ti ejemplu guizáʼ galán. Gudxi Dios laabe gábibe xcaadxi cristianu chinándacaʼ ejemplu stibe cásica yenándabe ejemplu stiʼ Cristu (1 Cor. 11:1). Dxi guca Pablo ancianu, sicaríʼ gúdxibe ca hermanu de dxiiñaʼ cayúnibe: «Biʼniʼ tratardu laatu né cariñu casi runi ti gunaa ora maʼ cugadxi xiiñiʼ, rapa xiiñiʼ né stale cariñu» (1 Tes. 2:7TNM). Ca ancianu nuu yanna riʼ, laaca riniʼcaʼ né diidxaʼ nadóʼ ne cariñu ora riquiiñecaʼ Biblia para quixhedxicaʼ ladxidóʼ ca binni ni cayuni sufrir.

Nanna ca hermana ni maʼ huaniisi quixhedxicaʼ ladxidóʼ tuuxa ni cayacaná. (Biiyaʼ párrafo 11). *

11. ¿Xiñee zanda guininu cadi ca ancianu si nga zanda quixhedxí ladxidóʼ xcaadxi?

11 Cadi ca ancianu si nga zanda quixhedxí ladxidóʼ ca ni maʼ biʼniʼ sufrir abuso sexual. Guiranu nápanu xidé chinándanu conseju ni ná quixhedxísaanu ladxidoʼno (1 Tes. 4:18). Zanda gacané ca hermana ni maʼ huaniisi nuu ndaaniʼ congregación  xcaadxi hermana ni caquiiñeʼ tu quixhedxí ladxidóʼ. Nga runi, zeeda gaca Jiobá casi ti gunaa ni riguixhedxí ladxidóʼ xiiñiʼ (Is. 66:13). Ndaaniʼ Biblia zeeda ejemplu stiʼ caadxi gunaa ni gudixhedxí ladxidóʼ xcaadxi (Job 42:11). Guizáʼ riecheʼ Jiobá ora ruuyaʼ cayacané ca hermana tuuxa ni cayacaná. Ne nuu tiru, rinabadiidxaʼ ca ancianu ti hermana ni maʼ huaniisi pa zanda gacané tuuxa hermana ni cayacaná. *

XI ZANDA GÚNINU PARA QUIXHEDXINU LADXIDÓʼ XCAADXI

12. ¿Xi caquiiñeʼ gúninu ora gacanenu ti hermanu?

12 Ora maʼ cayacanenu tuuxa hermanu, caquiiñeʼ gápanu stale cuidadu para cadi guinabadiidxanu laa xiixa ni qué racalaʼdxiʼ guiníʼ (1 Tes. 4:11). Peru ¿xi zanda gúninu para gacanenu ca ni caquiiñeʼ ne racalaʼdxiʼ quixhedxícabe ladxidoʼcaʼ yaʼ? Guidúʼyanu gaayuʼ conseju zeeda lu Biblia ni zacané laanu gúninuni.

13. a) ¿Casi ná 1 Reyes 19:5-8, ¿xi biʼniʼ ti ángel stiʼ Jiobá pur Elías? b) ¿Ximodo zanda chinándanu ejemplu stiʼ ángel ca?

13 Guyúbinu modo gacanenu. Dxi yegucaachilú profeta Elías purtiʼ nuu xquendanabani ra naxoo la? guizáʼ guca desanimar dede gunabaʼ gatiʼ. Peru biseendaʼ Jiobá ti ángel napa poder para guni animar laabe. Bidii ángel riʼ laabe guendaró nandáʼ ne gudxi laabe góbeni (biindaʼ 1 Reyes 19:5-8). Guizáʼ risaca ni rusiidiʼ relatu riʼ laanu, nuu tiru neca ti cosahuiiniʼ si gúninu guizáʼ zacaneni hermanu ni cayacaná ca. Ne ora guni invitarnu laabe ti guendaró, gudiʼnu laabe ti regaluhuiiniʼ o ti nota ra gucaʼnu caadxi diidxaʼ ni biree de ndaaniʼ ladxidoʼno la? zuni sentirbe dxandíʼ nadxiinu ne rizaaláʼdxinu laabe. Pa qué randa rininu o qué runi sentirnu galán ora maʼ caninu de tema riʼ, zanda gúninu ca cosahuiiniʼ riʼ.

14. ¿Xi sti cosa rizíʼdinu de relatu stiʼ Elías?

14 Gúninu xiixa para guni sentir ca ni maʼ biʼniʼ sufrir abuso galán ne seguru. Guzéʼtenu ejemplu stiʼ Elías sti biaje. Biʼniʼ Jiobá ti milagru para gudii stipa laabe ti ganda guni huantarbe guidubi neza dede chindabe lu dani Horeb, ra biʼniʼ Jiobá ti pactu né xquidxi raca stale siglu. Ne zándaca ora yendabe lu dani riʼ biʼniʼ sentirbe maʼ bilabe de ca binni ni nuu guuti laabe. ¿Xi sti cosa rizíʼdinu de relatu riʼ yaʼ? Primé ni caquiiñeʼ gúninu pa racaláʼdxinu gacanenu ca ni maʼ biʼniʼ sufrir abuso nga gacanenu laacaʼ guni sentircaʼ seguru. Naquiiñeʼ ganna ca ancianu gadxé gadxé modo runi sentir binni. Nuu hermana riuulaʼdxiʼ güinécabe laa diidxaʼ ra lidxi laga cayéʼ ti taza café purtiʼ runi sentir galán ne segura, ne nuu tu laa zándaca jma riuulaʼdxiʼ guiniʼnécabe laa ra Yoo stiʼ Reinu.

Pa gucaʼdiáganu né paciencia ca binni ni cayacaná, guni orarnenu laacaʼ de guidubi ladxidoʼno ne guyúbinu diidxaʼ gábinu laacaʼ la? zacanenu guianda ca herida sticaʼ. (Biiyaʼ párrafo 15 hasta 20). *

15, 16. ¿Ximodo rusihuinni tuuxa nanna gucaadiaga?

15 Guizíʼdinu gucaʼdiáganu. Rudii Biblia laanu conseju galán riʼ: «Lachuu para ucaa diaga tu, peru cadi nisi undaa ruaa si tu xiixa» (Sant. 1:19). ¿Ñee nánnanu gucaʼdiáganu la? Zándaca guiníʼ íquenu ni caquiiñeʼ si gúninu nga gúʼyadxinu lú ni caniʼné laanu ca, gucaʼdiáganu laa ne cadi guininu gastiʼ. Peru cadi ngasi nga laani. Guidúʼyanu ximodo bicaadiaga Jiobá Elías. Ora gúdxibe Dios xi guiráʼ naguu xizaa laabe la? bicaadiaga chaahuiʼ Dios laabe. Bidii Dios cuenta cadxibi profeta stiʼ, cayuni sentir nuu stubi ne caníʼ ique qué risaca guiráʼ ni biʼniʼ. Né cariñu gucané Jiobá laabe para maʼ cadi chuʼbe xizaa. Zacá bisihuinni Jiobá bicaadiaga ni gudxi profeta stiʼ laa (1 Rey. 19:9-11, 15-18).

16 Ora maʼ cucaʼdiáganu tuuxa ni biʼniʼ sufrir abuso sexual, ¿ximodo zanda  gusihuínninu nadxiinu ne rianu laabe yaʼ? Pa gábinu laabe neca caadxi diidxaʼ ni guiree de ndaaniʼ ladxidoʼno la? zusihuínninu nadxiinu laabe. Zanda gábinu laabe ca diidxaʼ riʼ: «Nuaaʼ triste pur ni bizaacaluʼ ca. Cadi naquiiñeʼ gúnicabe nga ti xcuidihuiiniʼ». Ne pa cayuni sentirnu cadi cayene chaahuinu laabe la? zanda guinábanu laabe gusiene chaahuibe ni laanu o gábinu laabe: «Ora gúdxiluʼ ndiʼ naa, sicaríʼ bieneʼ..., ¿ñee biaʼsi la?». Ora gábinu laabe ca diidxaʼ riʼ, zudiibe cuenta dxandíʼ cucaadiaga chaahuinu ne rizaaláʼdxinu laabe (1 Cor. 13:4, 7).

17. ¿Xiñee caquiiñeʼ gápanu paciencia ne cadi casi ziuunu gundaa ruaanu xiixa diidxaʼ?

17 Naquiiñeʼ gápanu cuidadu cadi casi ziuunu gundaa ruaanu xiixa diidxaʼ. Ne ora maʼ caníʼ binni ni cayuínenu diidxaʼ ca la? cadi gucueezanu laa para gudiʼnu conseju o para gábinu laa cadi jneza ni caníʼ. Naquiiñeʼ gápanu paciencia laabe. Gudxi Elías Jiobá xi guiráʼ naguu xizaa laa. Ne despué de gucané Jiobá laabe iguidxi fe stibe la? biguetaʼ gúdxibe Jiobá ca diidxaʼ ni maca gúdxibe laa que (1 Rey. 19:9, 10, 13, 14). Ejemplu stiʼ Elías riʼ, rusiidiʼ ni laanu caquiiñeʼ guiénenu nuu binni ni cayacaná ne caquiiñeʼ guiniʼcaʼ ni cayuni sentircaʼ stale biaje. ¿Xi gúninu yaʼ? Caquiiñeʼ gucaʼdiáganu laacabe né paciencia, cásica runi Jiobá. Cadi gábinu laacabe xi caquiiñeʼ gúnicabe, sínuque gusihuínninu nápanu cariñu ne rianu laacabe (1 Ped. 3:8).

18. ¿Xi tipu oración zanda quixhedxí ladxidóʼ ca ni cayacaná, ne xiñee?

18 Guni orarnenu ca ni cayacaná ne gúninu ni de guidubi ladxidoʼno. Zándaca qué ganda guni orar tuuxa ni nuu deprimidu, purtiʼ runi sentir qué zanda guiniʼné Jiobá. Pa racaláʼdxinu gacanenu binni riʼ la? guni orarnenu laa ne guzéʼtenu lá lu oración gúninu. Gábinu Jiobá guizáʼ nadxiinu laabe ne zaqueca nadxii ca hermanu de congregación laabe. Ne guinábanu Jiobá quixhedxí ladxidóʼ dendxuhuiiniʼ stiʼ ni  cayacaná. Zanda quixhedxí tipu oración riʼ ladxidóʼ binni ni cayacaná ca (Sant. 5:16).

19. ¿Xi zacané laanu gaca prepararnu para quixhedxinu ladxidóʼ tuuxa?

19 Guyúbinu diidxaʼ ni gusianda ne quixhedxí ladxidóʼ ca ni cayacaná. Naquiiñeʼ guiníʼ ique chaahuinu ante guininu xiixa. Purtiʼ pa casi ziuunu guininu xiixa la? zándaca guninanu tuuxa, peru pa guininu né diidxaʼ nadóʼ la? zusiándanu ca herida stiʼ tuuxa ni cayacaná (Prov. 12:18). Nga runi, guinábanu Jiobá gacané laanu guininu diidxaʼ ni quixhedxí ladxidóʼ ne gusianda ca herida stiʼ binni ni cayacaná ca. Ca diidxaʼ ni jma racané nga ca ni zeeda ndaaniʼ Biblia purtiʼ zeedacani de Jiobá (Heb. 4:12).

20. Pur guiráʼ ni maʼ gudiʼdiʼ ca binni ni biʼniʼ sufrir abuso dxiqué, ¿xi riníʼ íquecaʼ ne xi racaláʼdxinu gusietenaláʼdxinu laacaʼ?

20 Stale de ca ni biʼniʼ sufrir abuso dxiqué, zándaca riníʼ íquecaʼ qué risácacaʼ, nabiidicaʼ ne guirutiʼ tu nadxii laacaʼ. Ne zándaca runi sentircaʼ cadi naquiiñeʼ guni tratar xcaadxi laacaʼ né cariñu. Guizáʼ feu nga guiníʼ íquecabe zacá. Nga runi, iquiiñenu Biblia para gusietenaláʼdxinu ca binni ni cayacaná risácacaʼ para Jiobá (biiyaʼ recuadru ni láʼ « Textu zeeda lu Biblia ni zanda quixhedxí ladxidóʼ ca ni cayacaná»). Guidúʼyanu ni bizaaca profeta Daniel dxi biʼniʼ sentir maʼ qué gapa stipa ne nuu deprimidu. Biseendaʼ Dios ti ángel ra nuube para cuʼ gana laabe purtiʼ racalaʼdxiʼ gánnabe risácabe ne nadxii laabe (Dan. 10:2, 11, 19). Ngaca nga yanna, nadxii ne rusisaca Jiobá ca hermanu stinu ni cayacaná.

21. a) ¿Xi zazaaca ca ni runi cometer xiixa abuso ne qué gaca arrepentir? b) ¿Xi caquiiñeʼ gúninu?

21 Ora riguixhedxinu ladxidóʼ xcaadxi binni, rusietenaláʼdxinu laacaʼ naca Jiobá ti Dios ni nadxii binni. Ne qué guiaandaʼ laanu gábinu laacaʼ nácabe ti Dios de justicia. Ne nanna Jiobá ora runi abusárcabe de tuuxa, ruuyabe guiráʼ ni rizaaca ne laapebe zuni castigarbe ca ni runi cometer xiixa abuso ne qué gaca arrepentir (Núm. 14:18). Nga runi, gúninu guiráʼ ni nuu lu nanu para gusihuínninu nadxiinu ca binni ni maʼ biʼniʼ sufrir abuso sexual. Guizáʼ ratadxí ladxidoʼno gánnanu zusianda Jiobá ca binni ni maʼ bininá Binidxabaʼ ne ca xpinni. Ne maʼ cadi candaa maʼ guirutiʼ zietenalaʼdxiʼ ca yuubaʼ riʼ (Is. 65:17).

CANCIÓN sjj 109 Gannaxhiinu de guidubi ladxidoʼno

^ párrafo 5 Ca binni ni biʼniʼ sufrir abuso sexual dxi nahuiiniʼ zándaca dede yanna cayacanacaʼ neca maʼ gudiʼdiʼ stale iza. Zacané artículo riʼ laanu guiénenu xiñee runi sentírcabe zacá. Laaca zazíʼdinu tu zanda quixhedxí ladxidóʼcabe ne laaca zadxélanu caadxi conseju ni zacané laanu gúninu ni.

^ párrafo 11 Ora maʼ biʼniʼ sufrir tuuxa abuso, laa nga naquiiñeʼ guʼyaʼ pa zuyubi tuuxa especialista gacané laa o coʼ.

^ párrafo 76 NI RIHUINNI LU FOTO RIʼ: Caguixhedxí ti hermana ni maʼ huaniisi ladxidóʼ ti hermana ni cayacaná.

^ párrafo 78 NI RIHUINNI LU FOTO RIʼ: Caniʼné chupa ancianu ti hermana ni cayacaná, ne laa biʼniʼ invitar ti hermana ni maʼ huaniisi.