Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 24

Gusábanu guiráʼ idea falsu ne guiráʼ ni rucueeza binni para cadi gunibiáʼ Dios

Gusábanu guiráʼ idea falsu ne guiráʼ ni rucueeza binni para cadi gunibiáʼ Dios

«Cusábadu guiráʼ idea falsu ne guiráʼ ni rucueeza binni para cadi gunibiáʼ Dios» (2 COR. 10:5TNM).

CANCIÓN sjj 124 Cadi gusaananu Jiobá

NI ZAZÍʼDINU *

1. ¿Xi gudxi apóstol Pablo ca xpinni Cristu ungidu?

SICARÍʼ gudxi apóstol Pablo ca xpinni Cristu de primé siglu: «Ma cadi chi nanda tu ni na binni guidxilayú» (Rom. 12:2). ¿Xiñee gúdxibe ca hombre ne ca gunaa ni guca ungir né espíritu santu ca diidxaʼ riʼ yaʼ? (Rom. 1:7).

2, 3. a) ¿Xi runi Binidxabaʼ para gucaa laanu gudxiʼdéchenu Jiobá? b) ¿Ximodo zanda cueenu «ca cosa ni zuhuaa dxiichiʼ casi ti torre» lu xquendabiaaninu?

2 Guyuu Pablo xizaa purtiʼ gucuá caadxi idea falsu ne modo riníʼ ique binni guidxilayú caadxi de ca xpinni Cristu (Efes. 4:17-19). Laaca zanda guizaaca tutiica de laanu ni bizaacacabe riʼ. Binidxabaʼ, dios stiʼ guidxilayú riʼ riquiiñeʼ gadxé gadxé trampa para guxheleʼ laanu de Jiobá. Ti cosa ni rúnibe nga ruyúbibe modo gaca ca deseu ni nápanu jma nadipaʼ para guyúbinu gápanu ca cosa ni riuuláʼdxinu o para gácanu tuuxa risaca ndaaniʼ guidxilayú riʼ. Ne laaca riquiiñebe ni maʼ bisiidiʼ familia stinu laanu, cultura o ca ni bisiidicabe laanu ra scuela para guiníʼ íquenu casi laabe.

3 ¿Ximodo zanda cueenu «ca cosa ni zuhuaa dxiichiʼ casi ti torre» lu xquendabiaaninu yaʼ? (2 Cor. 10:4TNM). Guidúʼyanu ni guníʼ Pablo: «Cusábadu guiráʼ idea falsu ne guiráʼ ni rucueeza binni para cadi gunibiáʼ Dios. Ruseguyoodo guiráʼ ni riníʼ ique binni ti guzuubacaʼ stiidxaʼ Cristu» (2 Cor. 10:5TNM). Zanda gacané Jiobá laanu para gucáʼnanu ca idea falsu stiʼ binni guidxilayú. Ne cásica racané ti  medicina para cadi guniná xiixa venenu laanu la? zacaca zanda gacané Stiidxaʼ Dios laanu para gucáʼnanu ca cosa feu nuu lu guidxilayú stiʼ Binidxabaʼ riʼ.

GUCHAʼNU MODO RINÍʼ ÍQUENU

4. ¿Xi bichaʼnu lu xquendanabáninu dxi bizíʼdinu ni dxandíʼ rusiidiʼ Stiidxaʼ Dios?

4 Cadi guiaandaʼ laanu bichaʼnu stale cosa dxi bizíʼdinu ni dxandíʼ rusiidiʼ Stiidxaʼ Dios ne gudixhe íquenu gúninu ni ná Jiobá. Stale de laanu bisaana de gúninu cosa malu (1 Cor. 6:9-11). Rudiʼnu xquíxepeʼ Jiobá de guidubi ladxidoʼno purtiʼ gucané laanu gusaananu ca práctica riʼ.

5. Casi ná Romanos 12:2, ¿xi chupa cosa caquiiñeʼ gúninu?

5 Qué chuʼ dxi guiníʼ íquenu maʼ cadi caquiiñeʼ guchaʼnu modo laanu. Neca maʼ qué rúninu ca pecadu guizáʼ malu bíninu ante chuʼnísanu la? caquiiñeruʼ gúninu stipa para cadi gúninu xiixa ni gucaa laanu guiábanu lúcani sti biaje. ¿Ximodo gúninu ni yaʼ? Sicaríʼ guníʼ Pablo: «Ma cadi chi nanda tu ni na binni guidxilayú, sínuque laudii lugar uchaa Dios laatu ne cuee irá ni ucuá ique tu chiqué» (Rom. 12:2). Nga runi, caquiiñeʼ gúninu chupa cosa. Primé, cadi naquiiñeʼ chinándanu modo riníʼ ique binni guidxilayú. Ne guiropa, naquiiñeʼ guchaʼnu modo riníʼ íquenu.

6. ¿Xi rizíʼdinu de ejemplu bisaana Jesús ni zeeda lu Mateo 12:43-45?

6 Cadi caníʼ diʼ Pablo guchaʼnu ti luguiáʼ si. Ni nabe nga naquiiñeʼ guchaʼnu guidubi nácanu (biiyaʼ recuadru ni láʼ « ¿Zuchaaʼ de guidubi ladxiduáʼ la? o zucaacheʼ tu nacaʼ?»). Naquiiñeʼ guchaʼnu xquendabiaaninu, laani nga ni runi sentirnu, ni riuuláʼdxinu gúninu ne modo laanu. Nga runi, naquiiñeʼ guiníʼ íquenu pregunta riʼ: «¿Ñee ti luguiáʼ si cuchaaʼ para chinandaʼ ejemplu stiʼ Cristu la? o dxandipeʼ cuchaaʼ ni nuu ndaaniʼ iqueʼ ne ndaaniʼ  ladxiduáʼ?». Guizáʼ risaca pregunta riʼ. Lu Mateo 12:43-45, ridxélanu tobi de ca ejemplu bisaana Jesús ni cayabi laanu xi caquiiñeʼ gúninu (biindaʼ ni). Racané ejemplu riʼ laanu guiénenu cadi caquiiñeʼ si cueenu ca cosa feu nuu ndaaniʼ íquenu, sínuque naquiiñeʼ cuʼnu modo riníʼ ique Jiobá ndaaniʼ ni.

NAQUIIÑEʼ GUCHAʼNU STIPA NI RUNIIBI XQUENDABIAANINU

7. ¿Ximodo zanda guchaʼnu modo nácanu pur dentru?

7 ¿Ñee zanda guchaʼnu modo nácanu pur dentru la? Stiidxaʼ Dios ná: «Laguchaa stipa ni runiibi xquendabiaanitu ne laguibani modo racalaʼdxiʼ Dios casi ora ñácutu ti lari nacubi, ni bizaʼbe según ni jneza ne ni dxandíʼ» (Efes. 4:23, 24TNM). Neca ruluíʼ nagana guchaʼnu la? zanda gúninuni. Peru cadi caquiiñeʼ si gusaana de gápanu deseu malu o gusaana de gúninu cosa ni cadi jneza, sínuque caquiiñeʼ guchaʼnu stipa ni runiibi xquendabiaaninu. Ni ná ca diidxaʼ riʼ nga guchaʼnu ca deseu stinu, ni maʼ biaʼnu gúninu ne ni rucaa laanu gúninu xiixa. Peru para ganda gúninu ni la? cadi naquiiñeʼ gusaana de gúninu stipa.

8, 9. ¿Ximodo racané ni bizaaca ti hermanu laanu gánnanu naquiiñeʼ guchaʼnu modo nácanu pur dentru?

8 Guidúʼyanu ni bizaaca ti hermanu ni nabé bidxiichi, guxudxi ne gudinde dxiqué. Dxi bichaabe modo laabe ne biʼniʼ cumplirbe ca requisitu para chuʼnísabe la? bicaani binni xquídxibe gusisaca Jiobá. Peru ti huadxí, despué de guyuunísabe gudíʼdibe lu ti prueba ni cadi cabézabe, guyé ti binnigüeʼ ra lídxibe para tindené laabe. Bicueezabe laabe, peru maʼ qué ñúnibe huantar ora guníʼ hombre que mal de lá Jiobá. Ngue runi bireebe ne gudíñebe laa. ¿Xiñee bíʼnibe nga yaʼ? Purtiʼ neca maʼ gucané Biblia laabe gucueezabe laabe la? caʼruʼ diʼ guchaabe stipa ni runiibi xquendabiaanibe. Ni caninu nga caʼruʼ diʼ guchaabe modo nácabe pur dentru.

9 Neca bizaacabe nga la? qué nireebe gana (Prov. 24:16). Gucané ca ancianu laabe guni progresarbe ne ra gudiʼdiʼ tiempu biʼniʼ cumplirbe ca requisitu para gácabe ancianu. Peru ti huaxhinni laga zuhuaabe fuera de Yoo stiʼ Reinu gudíʼdibe sti prueba cásica primé que, biiyabe nuu ti binnigüeʼ quiñe sti ancianu. ¿Xi bíʼnibe óraque yaʼ? Né diidxaʼ nadóʼ ne respetu guníʼnebe binnigüeʼ que para chuʼdxí ne gucanebe laa chindá ra lidxi. ¿Xiñee bíʼnibe nga yaʼ? Purtiʼ maʼ bichaabe stipa ni runiibi xquendabiaanibe. Bichaabe modo nácabe pur dentru, maʼ nácabe ti binni nadóʼ ne humilde. Né ni bíʼnibe riʼ bisisácabe Jiobá.

10. ¿Xi caquiiñeʼ gúninu para guchaʼnu modo nácanu pur dentru?

10 Cadi casi zeʼ binni nga ruchaa modo laa. Zándaca caquiiñeʼ gúninu stale stipa para guchaʼnu neca tidiʼ stale iza (2 Ped. 1:5). Cadi guiníʼ íquenu tisi maʼ xadxí nácanu xpinni Cristu maʼ cadi caquiiñeʼ guchaʼnu modo laanu. Caquiiñeruʼ gúninu ni nuu lu nanu para guchaʼnu modo nácanu pur dentru. ¿Xi zacané laanu gúninuni yaʼ? Guidúʼyanu caadxi cosa risaca ni caquiiñeʼ gúninu.

XIMODO GUCHAʼNU STIPA NI RUNIIBI XQUENDABIAANINU

11. ¿Ximodo racané oración laanu para guchaʼnu stipa ni runiibi xquendabiaaninu?

11 Primé cosa ni caquiiñeʼ gúninu nga guni orarnu. Naquiiñeʼ guinábanu ni gunabaʼ hombre bicaa salmo ora guníʼ:  «Biʼniʼ ladxiduáʼ nayá Dios, ne guluu ti espíritu cubi luguiaʼyaʼ, ti espíritu ni cadi gusaana naa» (Sal. 51:10). Naquiiñeʼ gudiʼnu cuenta napa xidé guchaʼnu stipa ni runiibi xquendabiaaninu ne guinábanu Jiobá gacané laanu. ¿Xiñee nánnanu dxandipeʼ zacanebe laanu yaʼ? Guidúʼyanu xi biʼniʼ prometerbe ca israelita ni qué ruzuubaʼ diidxaʼ ni bibani ca dxi bibani Ezequiel: «Zudieeʼ laacabe ti ladxidóʼ si, ne zaguaaʼ ti espíritu nacubi dentru de laacabe; [...] ne zudieeʼ laacabe ti ladxidóʼ naguudxi», ni ná ca diidxaʼ riʼ nga zudii Dios laacaʼ ti ladxidóʼ ni guzuubaʼ stiidxabe (Ezeq. 11:19). Guizáʼ riguu ca diidxaʼ riʼ gana laanu. Guyuu Jiobá dispuestu gacané ca israelita que ne laaca nuube dispuestu gacanebe laanu yanna.

12, 13. a) Casi ná Salmo 119:59, ¿xi caquiiñeʼ guiníʼ ique chaahuinu? b) ¿Gunáʼ nga ca pregunta caquiiñeʼ guiníʼ íquenu?

12 Guiropa cosa ni caquiiñeʼ gúninu nga guni meditarnu. Naquiiñeʼ guidúʼndanu Biblia guiráʼ dxi ne cueenu tiempu para guiníʼ ique chaahuinu xi caquiiñeʼ guchaʼnu de ca cosa ni riníʼ íquenu ne ni runi sentirnu (biindaʼ Salmo 119:59; Heb. 4:12; Sant. 1:25). Guiduʼyaʼ chaahuinu pa maʼ gucuá modo riníʼ ique binni guidxilayú laanu. Ne pa zacá ni la? naquiiñeʼ guiduʼyaʼ chaahuinu xii nga rucaa laanu gucheʼnu ne ximodo zanda gucáʼnanu cani.

13 Para ganda gúninuni la? caquiiñeʼ guiníʼ íquenu ca pregunta riʼ: «¿Ñee napaʼ envidia ndaaniʼ ladxiduáʼ la?» (1 Ped. 2:1). «¿Ñee rudxiibaʼ laca naa pur familia stinneʼ, pur guzayaʼ scuela o purtiʼ napaʼ bueltu la?» (Prov. 16:5). «¿Ñee runeʼ menu xcaadxi purtiʼ si qué gápacaʼ ca cosa ni napaʼ o purtiʼ si de gadxé raza laacaʼ la?» (Sant. 2:2-4). «¿Ñee riuuladxeʼ ca cosa nuu ndaaniʼ guidxilayú stiʼ Binidxabaʼ riʼ la?» (1 Juan 2:15-17). «¿Ñee riuuladxeʼ entretenimientu ra rihuinni inmoralidad sexual o ra cadíndecabe la?» (Sal. 97:10; 101:3; Amós 5:15). Zándaca pur modo guicábinu ca pregunta riʼ zahuinni gunáʼ nga ca cosa ni caquiiñeʼ guchaʼnu. Pa gusábanu guiráʼ idea falsu «ni zuhuaa dxiichiʼ casi ti torre» lu xquendabiaaninu la? zusiéchenu ladxidóʼ Bixhózenu ni nuu guibáʼ.

14. ¿Xiñee nabé risaca guyúbinu tu gaca xhamígunu?

14 Guionna cosa ni caquiiñeʼ gúninu nga guyúbinu xhamígunu ni gacané laanu. Nuu tiru sin gudiʼnu cuenta ricá modo riníʼ ique ca binni ridxaaganu laanu (Prov. 13:20). Ra scuela ne ra rúninu dxiiñaʼ nuu binni ni qué racané laanu guiníʼ íquenu casi riníʼ ique Jiobá. Peru ora riuunu reunión ridxélanu binni ni zanda gaca xhamígunu ne zacanecaʼ laanu gusihuínninu guendarannaxhii ne gúninu cosa galán (Heb. 10:24, 25).

GUZUHUAA DXIICHINU LU NI RUNI CRENU

15, 16. ¿Ximodo racalaʼdxiʼ Binidxabaʼ guchaa modo riníʼ íquenu?

15 Cadi guiaandaʼ laanu racalaʼdxiʼ Binidxabaʼ guchaa modo riníʼ íquenu. Riquiiñebe stale cosa ni cadi jneza rusiidiʼ binni para gucaabe laanu guchaʼnu modo riníʼ íquenu.

16 Dede yanna runi Binidxabaʼ tipu pregunta ni bíʼnibe Eva dxi nuu ndaaniʼ jardín guyuu Edén que: «¿Ñee dxandíʼ gudxi Dios laatu cadi...?» (Gén. 3:1). Cumu Binidxabaʼ nga runi mandar guidxilayú riʼ la? runi ca xpínnibe laanu stale pregunta ni zanda gucaa laanu gápanu duda, casi ca ni chiguzéʼtenu riʼ: «¿Ñee dxandíʼ qué riuulaʼdxiʼ Dios guichaganáʼ  hombre ne hombre ne gunaa ne gunaa la? ¿Ñee dxandíʼ qué rudii Dios lugar guni binni navidad o lanibidóʼ la? ¿Ñee dxandíʼ nga qué racalaʼdxiʼ Dios guicatu rini la? ¿Ñee dxandíʼ nga neca nadxii Dios binni qué riná guiníʼnetu tuuxa familia stitu ni nuu expulsadu la?».

17. a) ¿Xi caquiiñeʼ gúninu ora guni tuuxa laanu xiixa pregunta para gucaa laanu gápanu duda? b) Casi ná Colosenses 2:6, 7, ¿xi zabeendunu pa gúninuni?

17 Naquiiñeʼ guzuhuaa dxiichinu lu ni runi crenu. Pa qué guyúbinu respuesta stiʼ ca pregunta nápanu la? zanda gucaacani laanu gápanu duda ne pur ca duda ca zanda zuchaa modo riníʼ íquenu ne chaahuidugá zará fe stinu. Yanna, ¿xi caquiiñeʼ gúninu yaʼ? Stiidxaʼ Dios cayabi laanu guchaʼnu modo riníʼ íquenu para gánnanu racalaʼdxiʼ Dios gúninu «ni nachaʼhui ne ni chuʼlaʼdxiʼ ne ni jneza peʼ» (Rom. 12:2). Pa guni estudiarnu siempre la? zacaneni laanu gánnanu dxandíʼ ni cazíʼdinu. Ne laaca zudiʼnu cuenta jneza ca norma stiʼ Jiobá. Pa gúninu ni la? zuzuhuaʼnu dxiichiʼ lu ni runi crenu cásica ricaa xcu ti yaga ndaaniʼ yú (biindaʼ Colosenses 2:6, 7).

18. ¿Xi zacané laanu gucáʼnanu ca cosa feu nuu lu guidxilayú stiʼ Binidxabaʼ riʼ?

18 Guirutiʼ zanda guzuhuaa dxiichiʼ laanu lu ni runi crenu, laca laanu nga caquiiñeʼ gúninuni. Nga runi, cadi gusaana de guchaʼnu stipa ni runiibi xquendabiaaninu. Guni orarnu Jiobá siempre ne guinábanu laa gudii laanu espíritu stiʼ. Guni meditarnu ne guiduʼyaʼ chaahuinu modo riníʼ íquenu ne xiñee riníʼ íquenu zacá. Guyúbinu gápanu xhamígunu ni gacané laanu, ne chuʼnu lade binni ni gacané laanu guchaʼnu modo riníʼ íquenu. Pa gúninu cani la? zacané cani laanu gucáʼnanu ca cosa feu nuu lu guidxilayú stiʼ Binidxabaʼ riʼ ne zusábanu «guiráʼ idea falsu ne guiráʼ ni rucueeza binni para cadi gunibiáʼ Dios» (2 Cor. 10:5TNM).

CANCIÓN sjj 50 Oración para gudieeʼ naa Jiobá

^ párrafo 5 Zándaca pur familia stinu, cultura o pur ca ni bisiidicabe laanu ra scuela maʼ nápanu modo riníʼ íquenu. Ne zándaca gudiʼnu cuenta feu xpiaʼnu ne maʼ gucuaa xcu ni ndaaniʼ ladxidoʼno. Lu artículo riʼ zadúʼyanu ximodo zanda gusaana de gúninu ca cosa ni cadi jneza ni maʼ biaʼnu gúninu.