Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 25

Gápanu confianza Jiobá ora nuunu triste

Gápanu confianza Jiobá ora nuunu triste

«Ti gunaa ni nuu yuubaʼ ladxidóʼ nga naa» (1 SAM. 1:15).

CANCIÓN sjj 30 Xhamiguaʼ, Bixhozeʼ ne Dios stinneʼ

NI ZAZÍʼDINU *

1. ¿Xiñee naquiiñeʼ chinándanu ni ná ca diidxaʼ guníʼ Jesús?

ORA bisiene Jesús profecía ni caníʼ de ca últimu dxi riʼ, guníʼ: «Laguuyaʼ chaahuiʼ ximodo nuutu ti cadi guidxá tipa ladxidoʼto tantu [...] nuutu xizaa pur ca cosa ni caquiiñetu» (Luc. 21:34TNM). ¿Xiñee naquiiñeʼ chinanda ca xpinni Cristu ni ná ca diidxaʼ riʼ yaʼ? Purtiʼ tiempu riʼ laaca cadídinu guendanagana ne cayacananu cásica cayacaná xcaadxi binni.

2. ¿Xi guendanagana cadxaagalú caadxi de ca hermanu stinu?

2 Nuu biaje riuʼnu xizaa pur guiráʼ guendanagana nápanu. Guidúʼyanu caadxi ejemplu. Ti hermanu láʼ John, * napa ti guendahuará láʼ esclerosis múltiple, guizáʼ gucanabe dxi bisaana xheelabe laabe despué de diecinueve iza de bichaganácabe. Ne despué, guiropaʼ baʼdudxaapaʼ stibe bixélecaʼ de Jiobá. Sti guendaxheelaʼ, Bob ne Linda bidxaagalucaʼ stale guendanagana. Guirópacabe biníticabe dxiiñaʼ stícabe ne despué laaca biníticabe lídxicabe. Ne cadi ngasi, gúdxicabe Linda huará corazón stiʼ ne zanda guutini laa ne laaca nápabe artritis ne guizáʼ runinani laabe.

3. Casi ná Filipenses 4:6, 7, ¿xi nanna dxíchinu de Jiobá?

3 Nanna dxíchinu riene Jiobá laanu ora cayacananu, purtiʼ laa bizáʼ laanu ne nadxii laanu. Racaláʼdxibe gacanebe laanu né ca guendanagana cadídinu (biindaʼ Filipenses 4:6, 7). Lu Stiidxabe ridxélanu stale ejemplu stiʼ ca xpínnibe ni rusihuinni ximodo biʼniʼ huantarcaʼ ca guendanagana  bidxaagalucaʼ ne cayábini laanu ximodo gucané Jiobá laacaʼ. Guidúʼyanu caadxi ejemplu.

ELÍAS TI HOMBRE NI NAPA SENTIMIENTU CÁSICA LAANU

4. ¿Gunáʼ nga ca guendanagana bidxaagalú Elías, ne xi gúnnabe zuni Jiobá pur laabe?

4 Biʼniʼ Elías ni ná Jiobá neca nagana tiempu bibani ne bidxaagalú stale guendanagana. Acab, tobi de ca rey ni qué nuzuubaʼ diidxaʼ stiʼ guidxi Israel, bichaganáʼ Jezabel, ti gunaa guizáʼ mala ni runi adorar dios falsu láʼ Baal. Guirópacabe bicaacabe binni guni adorar Baal ne biiticabe stale profeta stiʼ Jiobá. Peru gunda bixooñeʼ Elías de laacabe. Ne laaca bilabe dxi biuu ti guendarindaana purtiʼ gúpabe confianza Jiobá (1 Rey. 17:2-4, 14-16). Laaca biyúbibe Jiobá dxi bicaalube ca profeta ne cani runi adorar Baal, ne guluube gana ca israelita para gúnicaʼ ni ná Dios ni dxandíʼ (1 Rey. 18:21-24, 36-38). Biiyaʼ Elías dxandíʼ cayapa ne cayacané Jiobá laa ora cadiʼdiʼ ca guendanagana que.

Biseendaʼ Jiobá ti ángel para gacané Elías guibiguetaʼ stipa stiʼ. (Biiyaʼ párrafo 5 ne 6). *

5, 6. Casi ná 1 Reyes 19:1-4, ¿ximodo biʼniʼ sentir Elías, ne xi biʼniʼ Jiobá para bisihuinni nadxii laabe?

5 (Biindaʼ 1 Reyes 19:1-4). Guizáʼ bidxibi Elías ora gudxi reina Jezabel zuuti laa. Ngue runi, bixooñebe Beer-seba. Guizáʼ guyuube triste dede gunábabe gátibe. ¿Xiñee biʼniʼ sentirbe zacá yaʼ? Purtiʼ nácabe ti hombre imperfectu ni napa sentimientu cásica laanu (Sant. 5:17). Zándaca guyuube triste purtiʼ nápabe stale guendanagana ne maʼ bidxágabe.  Ne laaca zándaca guníʼ íquebe qué risaca guiráʼ ni bíʼnibe para guisaca lá Jiobá purtiʼ cadi cuchaa ca binni de guidxi Israel ne maʼ laasibe cayúnibe ni ná Jiobá (1 Rey. 18:3, 4, 13; 19:10, 14). Zándaca guidxagayaanu modo biʼniʼ sentir profeta fiel riʼ, peru biene Jiobá ni cayuni sentirbe.

6 Qué nidindené diʼ Jiobá Elías pur modo cayuni sentir que, sínuque gucanebe laa guibiguetaʼ stipa stiʼ (1 Rey. 19:5-7). Ne despué gulídxebe laa né stale cariñu ra biluiʼbe laa poder stibe. Laaca gúdxibe laa nuuruʼ gadxe mil israelita ni cadi cayuni adorar Baal (1 Rey. 19:11-18). Né cani biʼniʼ Jiobá riʼ bisihuinni guizáʼ nadxii laabe.

XIMODO ZACANÉ JIOBÁ LAANU

7. ¿Xiñee ratadxí ladxidoʼno ora guiníʼ íquenu modo gucané Jiobá Elías?

7 ¿Ñee cadídinu lu xiixa guendanagana ni naguu xizaa laanu la? Ora gánnanu biene Jiobá modo biʼniʼ sentir Elías riguuni gana laanu. Ne ratadxí ladxidoʼno gánnanu riene Jiobá ni runi sentirnu ora nápanu guendanagana ne nuunu triste. Nánnabe xi zanda ne xi qué zanda gúninu, ne laaca nánnabe xi riníʼ íquenu ne xi runi sentirnu (Sal. 103:14; 139:3, 4). Pa guinínenu Jiobá casi biʼniʼ Elías la? zacanebe laanu gudxíʼlunu ca guendanagana ni naguu xizaa laanu (Sal. 55:22).

8. ¿Ximodo zacané Jiobá laanu gudxíʼlunu ca guendanagana stinu?

8 Zándaca gucaa ca guendanagana cadídinu laanu guiníʼ íquenu cosa ni cuee gana laanu. Pa guizaacanu ni bizéʼtenu riʼ la? zacané Jiobá laanu. ¿Ximodo yaʼ? Cayuni invitarbe laanu gábinu laabe xi naguu xizaa laanu ne cayábibe laanu zacábibe laanu (Sal. 5:3; 1 Ped. 5:7). Nga runi, cadi gusaana de gábinu laabe ca guendanagana cadídinu. Neca qué zaníʼnebe laanu cásica guníʼnebe Elías la? zaquiiñebe Stiidxabe ne organización stibe para guiníʼnebe laanu. Zaguixhedxí ca ejemplu zeeda lu Biblia ladxidoʼno ne zudiicani esperanza laanu. Ne laaca zaguu ca hermanu stinu gana laanu (Rom. 15:4; Heb. 10:24, 25).

9. Pa nápanu ti xhamígunu ni nápanu confianza, ¿ximodo zanda gacanebe laanu?

9 Gudxi Jiobá Elías gudii Eliseo caadxi de ca dxiiñaʼ cayuni. Ne ra biʼniʼ Jiobá ni, bidii laabe ti xhamígube para gacané laabe ora chuʼbe triste. Ngaca nga yanna, pa nápanu ti xhamígunu ni nápanu confianza, zanda gacané laanu ora cadídinu xiixa guendanagana (2 Rey. 2:2; Prov. 17:17). Peru pa riníʼ íquenu qué gápanu tu gábinu ca guendanagana cadídinu la? guinábanu Jiobá gacané laanu guidxélanu ti hermanu ni nadxii Jiobá ni cuʼ gana laanu ora caquiiñenuni.

10. a) ¿Ximodo racané ni bizaaca Elías laanu? b) ¿Ximodo racané ca promesa zeeda lu Isaías 40:28, 29 laanu?

10 Gucané Jiobá Elías para cadi chuʼ triste ti cadi gusaana de guni ni nabe pur stale iza. Ni bizaaca profeta riʼ racaneni laanu gánnanu laaca zacané Jiobá laanu. Zándaca nápanu stale guendanagana ni cayuniná ne ni cabee gana laanu. Peru pa gápanu confianza Jiobá la? zudiibe stipa laanu para cadi gusaana de gúninu ni nabe (biindaʼ Isaías 40:28, 29).

GUPA ANA, DAVID NE TI HOMBRE BICAA SALMO CONFIANZA JIOBÁ

11-13. ¿Xi bizaaca chonna xpinni Dios ni bibani dxiqué?

11 Ndaaniʼ Biblia ridxélanu ejemplu stiʼ xcaadxi binni ni gucaná. Tobi de laacabe nga Ana, biʼniʼ huantarbe ora bisituícabe  lube purtiʼ qué gápabe xiiñibe ne laaca biʼniʼ huantarbe guiráʼ burla stiʼ gunaa ni bichaganáʼ Elqaná, xheelabe (1 Sam. 1:2, 6). Guizáʼ guyuube triste, biinabe ne dede bidxii ladxidoʼbe (1 Sam. 1:7, 10).

12 Laaca gudiʼdiʼ rey David lu stale guendanagana. Guidúʼyanu caadxi de laacani. Guizáʼ feu modo biʼniʼ sentirbe purtiʼ bicheebe stale biaje (Sal. 40:12). Gupa xidé bidxiilube xiiñibe Absalón dxi bicaalú laabe, ni gutiʼ pur ni biʼniʼ (2 Sam. 15:13, 14; 18:33). Ne laaca bidxiideche tobi de ca xhamígube laabe (2 Sam. 16:23-17:2; Sal. 55:12-14). Stale de ca salmo bicaabe rusihuínnicani guizáʼ bireebe gana, peru laaca rusihuínnicani guizáʼ gúpabe confianza Jiobá (Sal. 38:5-10; 94:17-19).

¿Xi gucané ti hombre bicaa salmo guni ni ná Jiobá né stale guendanayecheʼ sti biaje? (Biiyaʼ párrafo 13 hasta 15). *

13 Gudiʼdiʼ si tiempu, tobi de ca hombre bicaa salmo ni zándaca zá de ti levita láʼ Asaf, ne biʼniʼ servir ndaaniʼ santuariu nandxóʼ stiʼ Dios laaca guizáʼ guyuu triste. Gucaláʼdxibe ñápabe ca cosa ni napa ca binni malu, ne pur laani maʼ qué ñuube nayecheʼ né cani nápabe. Ne dede guníʼ íquebe qué risaca ca ndaayaʼ rudii Dios ca xpinni (Sal. 73:2-5, 7, 12-14, 16, 17, 21).

14, 15. ¿Xi rizíʼdinu de guionnaʼ ejemplu zeeda lu Biblia ni bidúʼndanu riʼ?

14 Biyubi guionnaʼ xpinni Dios riʼ Jiobá para gacanebe laacaʼ. Bíʼnicabe oración ne gúdxicabe Jiobá guiráʼ ni cazaacacabe. Bisiénecabe Jiobá xi guiráʼ naguu xizaa laacabe ne bíʼnicabe ni de guidubi ladxidóʼcabe. Ne qué nusaanacabe de ñécabe lugar ra raca adorar Jiobá (1 Sam. 1:9, 10; Sal. 55:22; 73:17; 122:1).

15 Cumu riá Dios stinu binni la? bicabi oración stiʼ guiónnacabe. Gudixhedxibe ladxidóʼ Ana (1 Sam. 1:18). Ne David  bicaa ca diidxaʼ riʼ: «Stale guendanagana ridxaagalú binni runi ni jneza, peru ribee Jiobá laabe de laacani» (Sal. 34:19). Ne hombre ni bicaa salmo que, biʼniʼ sentir gunaazeʼ Jiobá náʼ «ladu derechu», ne laaca bidii Jiobá laa conseju né stale guendarannaxhii. Sicaríʼ biindabe: «Naa la? guizáʼ galán runeʼ sentir chuaaʼ gaxha de Dios. Runeʼ cré zanda gapa Jiobá, Señor ni jma nandxóʼ, naa» (Sal. 73:23, 24, 28). ¿Xi rizíʼdinu de ca ejemplu riʼ yaʼ? Nuu biaje zuni sentirnu triste pur ca yuubaʼ cadídinu. Peru pa guiníʼ íquenu ximodo huayacané Jiobá xcaadxi xpinni, guni orarnu ne guzúʼbanu stiidxaʼ la? zanda gudxíʼlunu ca guendanagana cadídinu (Sal. 143:1, 4-8).

GÁPANU CONFIANZA JIOBÁ NE ZIENI LAANU GALÁN

Gucalaʼdxiʼ ti hermana nixeleʼ de Jiobá ne de ca hermanu stiʼ, peru dxi biyúbibe modo gacanebe xcaadxi ni cadiʼdiʼ lu guendanagana, bichaa modo cayuni sentirbe. (Biiyaʼ párrafo 16 ne 17).

16, 17. a) ¿Xiñee cadi caquiiñeʼ guixélenu de Jiobá ne de ca hermanu stinu? b) ¿Ximodo zanda guibiguetaʼ stipa stinu?

16 Sti cosa ni rizíʼdinu de guionnaʼ ejemplu riʼ nga cadi caquiiñeʼ guixélenu de Jiobá ninca de ca xpinni (Prov. 18:1). Ti hermana láʼ Nancy guizáʼ gucaná dxi bisaana xheelaʼ laa. Laabe guniʼbe: «Stale dxi pa ñanda si qué ñuuyaʼ ne qué ninieniáʼ tuuxa. Peru laga zixeleʼ de binni, jma triste bineʼ sentir». Peru dxi biyúbibe modo gacanebe  xcaadxi ni cadiʼdiʼ lu guendanagana, bichaa modo cayuni sentirbe. Nabe: «Ora maʼ cayábicabe naa ni cayuni sentírcabe rucaadiaʼgaʼ laacabe. Ora runeʼ sentir ni cayuni sentírcabe, bidieeʼ cuenta maʼ qué riníʼ iqueʼ ni cazaacaʼ».

17 Pa qué guiáʼdxanu ca reunión rápanu la? zabiguetaʼ stipa stinu. Ne ora rúninuni racané Jiobá laanu ne riguixhedxibe ladxidoʼno (Sal. 86:17). Lu ca reunión ca racané Jiobá laanu ora riquiiñeʼ espíritu santu stiʼ, ca xpinni ne Stiidxaʼ. Laaca zanda cuʼnu gana xcaadxi ne cuʼcaʼ gana laanu (Rom. 1:11, 12). Ti hermana láʼ Sofía guníʼ: «Guizáʼ gucané Jiobá ne ca hermanu stinneʼ naa para cadi guireeʼ gana. Ne para naa guizáʼ risaca ca reunión rápanu. Maʼ bidieeʼ cuenta, ora runeʼ predicar stale ne runeʼ stale cosa ndaaniʼ congregación la? randa rudxieeluáʼ ca guendanagana stinneʼ ne ca ni riguu xizaa naa».

18. ¿Xi cadi naquiiñeʼ guiaandaʼ laanu ora nuunu triste?

18 Ora chuʼnu triste, cadi guiaandaʼ laanu cadi cayuni prometer si Jiobá zunitilú guiráʼ ni cayuniná laanu, sínuque dede yanna cayacanebe laanu gudxíʼlunu cani. Rudiibe laanu stipa para cadi chuʼnu triste ne gudxíʼlunu ca guendanagana nápanu (Filip. 2:13).

19. ¿Xi rusiidiʼ Romanos 8:37-39 laanu?

19 (Biindaʼ Romanos 8:37-39). Cayabi apóstol Pablo laanu gastiʼ zanda guxheleʼ laanu de Jiobá, Dios ni nadxii laanu. Peru ¿ximodo zanda gacanenu ca hermanu ni cadiʼdiʼ lu guendanagana yaʼ? Lu sti artículo ca chiguidúʼyanu ximodo zanda guianu ne gacanenu laacabe cásica runi Jiobá ni.

CANCIÓN sjj 44 Jiobá, gundisaʼ naa

^ párrafo 5 Ora riúʼxhaatanu xizaa racananu ne guizáʼ feu modo runi sentir. ¿Ximodo zanda gacané Jiobá laanu yaʼ? Lu artículo riʼ chiguidúʼyanu ximodo gucanebe Elías. Laaca zadúʼyanu chonna ejemplu zeeda lu Biblia ni zusiidiʼ laanu xi caquiiñeʼ gúninu para gacané Jiobá laanu.

^ párrafo 2 Lu artículo riʼ bidxaa lá chupa chonna binni.

^ párrafo 53 NI RIHUINNI LU FOTO RIʼ: Chaahuidugá cucuaaniʼ ti ángel stiʼ Jiobá Elías ne cudiibe laa pan ne nisa.

^ párrafo 55 NI RIHUINNI LU FOTO RIʼ: Nayecheʼ cayuundaʼ ti hombre ni zándaca zá de Asaf ne cucaa ti salmo né chupa levita.