Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 23

Gápanu laanu para cadi guicá modo riníʼ ique binni laanu

Gápanu laanu para cadi guicá modo riníʼ ique binni laanu

«Laguuya gá laatu né cani canayuíʼ ni biree de xquenda biaani binni. Cadi dxandí ni, sínuque binni guidxilayú gudixhe ni» (COL. 2:8).

CANCIÓN sjj 96 Naca libru stiʼ Dios ti tesoro

NI ZAZÍʼDINU *

1. Casi ná Colosenses 2:4, 8, ¿xi racalaʼdxiʼ Binidxabaʼ guni né xquendabiaaninu?

RACALAʼDXIʼ Binidxabaʼ gudxiʼdéchenu Jiobá. Ne para gúnibe ni ruyúbibe guchaabe modo riníʼ íquenu. Racaláʼdxibe guni controlarbe xquendabiaaninu para guiníʼ íquenu modo riníʼ íquebe. Riquiiñebe ca deseu stinu para quítebe laanu ne gucaabe laanu chinándanu laabe (biindaʼ Colosenses 2:4, 8).

2, 3. a) ¿Xiñee naquiiñeʼ gúninu ni ná Colosenses 2:8? b) ¿Xi chiguidúʼyanu lu artículo riʼ?

2 ¿Ñee zanda quiteʼ Binidxabaʼ laanu la? Zanda pue. Qué nucaa diʼ Pablo ca diidxaʼ zeeda lu Colosenses 2:8 para ca binni ni cadi naca xpinni Cristu, sínuque bicaabeni para ca xpinni Cristu ni guca ungir né espíritu santu (Col. 1:2, 5). Gucalaʼdxiʼ Binidxabaʼ nuchaa modo riníʼ íquecabe ne ngaca nga racalaʼdxiʼ Binidxabaʼ guni né laanu yanna (1 Cor. 10:12). ¿Xiñee yaʼ? Purtiʼ gulá Binidxabaʼ ndaaniʼ Guidxilayú riʼ ne racalaʼdxiʼ guxheleʼ laanu de Dios (Apoc. 12:9, 12, 17). Ne tiempu nabáninu riʼ ca binni malu ne ca ni canausiguii «ze dxi jma rusi zinitilú caʼ» (2 Tim. 3:1, 13).

3 Lu artículo riʼ chiguidúʼyanu ximodo racalaʼdxiʼ Binidxabaʼ guchaa modo riníʼ íquenu ora riquiiñeʼ caadxi cosa ni cadi jneza rusiidiʼ binni. Guidúʼyanu chonna de ca  trampa riquiiñebe (Efes. 6:11). Lu sti artículo ca chiguidúʼyanu xi zacané laanu cueenu modo riníʼ ique Binidxabaʼ ndaaniʼ íquenu. Peru primeru chiguidúʼyanu ximodo gudxite Binidxabaʼ ca israelita despué de biuucaʼ ndaaniʼ Tierra Prometida ne xi zanda guizíʼdinu de ni bizaacacabe.

GUDXITE BINIDXABAʼ LAACABE PARA GUSISÁCACABE BIDÓʼ

4-6. Casi ná Deuteronomio 11:10-15, ¿xiñee bichaa ca israelita que modo bíʼnicaʼ dxiiñaʼ lu layú dxi guyuucaʼ ndaaniʼ Tierra Prometida?

4 Cumu guizáʼ nexhená Binidxabaʼ la? biyubi modo quiteʼ ca israelita que para gusisácacaʼ bidóʼ. Nánnabe caquiiñeʼ guyubi ca israelita que guendaró, ngue runi biquiiñebeni para quítebe laacaʼ. Dxi guyuu ca israelita que ndaaniʼ Tierra Prometida gupa xidé biziidicaʼ gúnicaʼ dxiiñaʼ lu layú. Purtiʼ dxi nuucabe Egipto bizeecabe ca layú que né nisa stiʼ guiiguʼ Nilo. Peru dxi guyuucabe ndaaniʼ Tierra Prometida gastiʼ guiiguʼ ra cueecabe nisa para guzeecabe ca layú stícabe, sínuque gupa ne nisaguié nga ruzee cani (biindaʼ Deuteronomio 11:10-15; Is. 18:4, 5). Nga runi, naquiiñeʼ guiziidicabe gúnicabe dxiiñaʼ lu layú. Nagana gúcani para laacabe purtiʼ ca israelita ni nanna guni dxiiñaʼ lu layú que gúticaʼ lu desiertu.

¿Xi biʼniʼ Binidxabaʼ para bichaa modo riníʼ ique ca israelita ni runi dxiiñaʼ lu layú? (Biiyaʼ párrafo 4 hasta 6). *

5 Gudxi Jiobá ca israelita maʼ bichaa modo nabánicaʼ. Ne despué gudixhenabe laacaʼ né caadxi diidxaʼ ni ruluíʼ qué zaquiiñecaʼ ora gúnicaʼ dxiiñaʼ lu layú. Sicaríʼ guniʼbe: «Lagapa laatu para cadi quite ladxidoʼto laatu, ne dxandipeʼ guixéletu ne guni adorartu xcaadxi dios ne guzuxíbitu xañeecaʼ» (Deut. 11:16, 17). ¿Xiñee gudixhená Jiobá laacabe para cadi guni  adorárcabe dios falsu laga cusiene laacabe ximodo naquiiñeʼ gúnicabe dxiiñaʼ lu layú yaʼ?

6 Nanna Jiobá zuni sentir ca israelita que caquiiñeʼ guiziidicaʼ modo gúnicaʼ dxiiñaʼ lu layú cásica runi ca guidxi nuu gaxha de laacaʼ, ca ni qué runi adorar Jiobá. Purtiʼ jma nanna ca cananeu que gúnicaʼ dxiiñaʼ lu layú que ca xpinni Dios ne ñanda niziidicabe stale de laacaʼ. Peru nuu ti peligru, runi adorar ca cananeu que Baal, ne runi crecaʼ stiʼ Baal guibáʼ, purtiʼ nácabe laa rusaba nisaguié. Qué racalaʼdxiʼ diʼ Jiobá chinanda ca israelita ni runi cré ca cananeu. Peru biʼniʼ adorarcabe Baal stale biaje (Núm. 25:3, 5; Juec. 2:13; 1 Rey. 18:18). Guidúʼyanu xi biʼniʼ Binidxabaʼ para gudxite guidxi Israel.

BIQUIIÑEʼ BINIDXABAʼ CHONNA TRAMPA PARA GUDXITE CA ISRAELITA

7. ¿Xi biʼniʼ Binidxabaʼ para guʼyaʼ pa napa ca israelita que fe Jiobá dxi nuucaʼ ndaaniʼ Tierra Prometida?

7 Primé trampa biquiiñeʼ Binidxabaʼ nga deseu ni napa ca israelita que de guiaba nisaguié para guzeecaʼ ca layú sticaʼ. Ra maʼ ziluxe beeu abril hasta septiembre huaxiéʼ riaba nisaguié ndaaniʼ Tierra Prometida. Ne pa guiaba nisaguié ra ruzulú beeu octubre la? galán ziasa ca cosecha stícabe. Ca guidxi nuu gaxha de guidxi Israel nacaʼ naquiiñeʼ gúnicaʼ caadxi ritual para gusaba ca dios falsu sticaʼ nisaguié. Bicaa Binidxabaʼ ca israelita que guiníʼ íquecaʼ caquiiñeʼ chinándacaʼ ca costumbre ni maʼ bizéʼtenu riʼ para gudii ca layú sticaʼ. Biaba ca israelita ni qué ñapa fe Jiobá lu trampa riʼ ne bíʼnicaʼ caadxi ritual para guni adorarcaʼ Baal.

8. ¿Xi sti trampa biquiiñeʼ Binidxabaʼ? Bisiene ximodo biquiiñebeni.

8 Guiropa trampa biquiiñeʼ Binidxabaʼ nga ca deseu sexual stiʼ ca israelita. Lu ca ritual runi ca binni de guidxi nuu gaxha de laacabe que runi cometercaʼ pecadu sexual nayuudxuʼ, ne raca prostituir gunaa ne hombre ndaaniʼ ca templu que. Qué rudiisicabe lugar gaca tuuxa muxeʼ o gunaa nguiuʼ o guni practicar xcaadxi tipu pecadu sexual, sínuque normal ruuyacabe cani (Deut. 23:17, 18; 1 Rey. 14:24). Rúnicabeni purtiʼ para laacabe jma galán zudii ca cosecha stícabe. Guizáʼ guyuulaʼdxiʼ stale israelita ca ritual que ne bizulú biʼniʼ adorarcaʼ dios falsu. Bidiicabe lugar gudxite Binidxabaʼ laacabe.

9. Né ni ná Oseas 2:16, 17, ¿ximodo bicaa Binidxabaʼ ca israelita gusiaandacaʼ lá Jiobá?

9 Guionna trampa biquiiñeʼ Binidxabaʼ nga bicaabe ca israelita gusiaandacaʼ lá Jiobá. Ca dxi bibani profeta Jeremías, bisihuinni Jiobá biyubi stale profeta falsu modo gusiaandaʼ ca israelita que labe ne biquiiñecaʼ lá Baal (Jer. 23:27). Bisaana de iquiiñeʼ ca israelita que lá Dios ne bizulú biquiiñecaʼ lá Baal ni riníʼ «xpixuaanaʼ». Ne zacá maʼ qué ñánnacabe tuu nga Jiobá ne tuu nga Baal, biguuchacabe ca ritual rúnicabe para guni adorárcabe ca dios falsu que né ni maca rúnicabe para guni adorárcabe Jiobá (biindaʼ Oseas 2:16, 17).

CA TRAMPA RIQUIIÑEʼ BINIDXABAʼ YANNA

10. ¿Gunáʼ nga ca trampa riquiiñeʼ binidxabaʼ yanna?

10 Dede yanna riquiiñeʼ Binidxabaʼ ca trampa biquiiñeʼ dxiqué. Randa riguítebe binni purtiʼ riquiiñebe ca deseu sticaʼ, ca deseu sexual nápacaʼ ne rucaabe binni  gusiaandaʼ lá Jiobá. Chiguininu de trampa bizéʼtenu últimu riʼ.

11. ¿Ximodo rucaa Binidxabaʼ binni gusiaandaʼ lá Jiobá?

11 Rucaa Binidxabaʼ binni gusiaandaʼ lá Jiobá. Guti si ca apóstol stiʼ Jesús, stale de ca ni ná naca xpinni Cristu bizulú bisiidicaʼ cosa ni cadi jneza (Hech. 20:29, 30; 2 Tes. 2:3). Pur ni bisiidiʼ ca apóstata riʼ bizulú bisiaandaʼ binni lá Jiobá. Maʼ qué niquiiñeʼ ca apóstata que lá Jiobá lu Biblia ne bichaacabeni pur «Señor» o xcaadxi título. Ne pur nga raca nagana para ca binni ruundaʼ Biblia gánnacaʼ pora caníʼ Biblia de Jiobá ora riete diidxaʼ «Señor» luni (1 Cor. 8:5). Biquiiñecabe diidxaʼ «Señor» para guiníʼcabe de Jiobá ne de Jesús, peru pur laani raca nagana guiene binni gadxé Jiobá ne Jesús ne jma risaca Jiobá que laabe (Juan 17:3). Ne pur laani bizulú biʼniʼ cré binni trinidad, ti creencia ni cadi zeeda lu Biblia. Stale binni riníʼ ique qué zanda gunibiaʼnu Dios ne guirutiʼ zanda ganna tu labe. ¡Guizáʼ feu guendarusiguii riʼ! (Hech. 17:27).

¿Ximodo huaquiiñeʼ Binidxabaʼ religión falsu para gucaa binni guni ni ná ca deseu sexual stiʼ? (Biiyaʼ párrafo 12). *

12. a) ¿Xi maʼ bicaa religión falsu binni guni? b) Casi ná Romanos 1:28-31, ¿xi maʼ guleendúcabe pur laani?

12 Riquiiñeʼ Binidxabaʼ ca deseu sexual stiʼ binni. Tiempu bibani ca israelita, biquiiñeʼ Binidxabaʼ religión falsu para gusaba binni lu inmoralidad sexual. Ne ngaca nga rúnibe yanna. Rudii ca xaíque stiʼ religión falsu lugar guni practicar ca xpinni pecadu sexual ne ruyúbicaʼ modo para guʼyaʼ binni normal cani. Nga runi, stale de cani ná cayuni ni ná Dios maʼ qué rinándacaʼ ca norma moral stibe. ¿Xi huabeendúcabe pur laani yaʼ? Bizeeteʼ apóstol Pablo ni lu carta ni bicaa ra nuu ca hermanu de Roma (biindaʼ Romanos 1:28-31). Lade ca «enda qué iquiiñeʼ» riʼ zeeda guiráʼ clase pecadu sexual, ne ládeni zeeda gaca tuuxa muxeʼ o gunaa nguiuʼ (Rom. 1:24-27, 32; Apoc. 2:20). Nga runi, guizáʼ risaca chinándanu ca ni rusiidiʼ Biblia.

13. ¿Xi sti trampa riquiiñeʼ Binidxabaʼ?

13 Riquiiñeʼ Binidxabaʼ ca deseu ni napa binni. Normal nga guyubi binni ni caquiiñeʼ ne ni caquiiñeʼ familia stiʼ para  guibani. Ne racaláʼdxinu chuʼnu listu para laani (1 Tim. 5:8). ¿Ximodo rúninu ni yaʼ? Ni rúninu nga riuunu scuela ne runi estudiarnu stale. Peru naquiiñeʼ gápanu stale cuidadu. Ndaaniʼ scuela stiʼ stale país, qué rusiidisicabe ca estudiante stícabe cosa ni zaquiiñecaʼ lu xquendanabánicaʼ, sínuque laaca rusiidicabe laacaʼ ni biree de xquendabiaaniʼ binni. Rucaacabe laaca guni dudarcaʼ pa dxandíʼ nuu Dios ne gucaanacaʼ guiráʼ ni rusiidiʼ Biblia. Ne rusiidicabe laacaʼ bizulú guendanabani pur evolución (Rom. 1:21-23). Gadxé si cani rusiidicabe riʼ de ni rusiidiʼ Dios (1 Cor. 1:19-21; 3:18-20).

14. ¿Xi rucaa modo riníʼ ique binni xcaadxi guni?

14 Modo riníʼ ique binni guidxilayú rusihuínnini qué rinándacaʼ ca norma stiʼ Dios. Qué rucaani binni gusihuinni ca cualidad stiʼ espíritu stiʼ Dios, sínuque rucaani laacaʼ gúnicaʼ ni ná íquecaʼ (Gál. 5:19-23). Rucaacani binni gudxiibaʼ laca laa, guiníʼ ique jma risaca que xcaadxi ne pur laani guizáʼ rannaxhiicaʼ laca laacaʼ (2 Tim. 3:2-4). Peru Jiobá racalaʼdxiʼ gácanu humilde ne nadóʼ (2 Sam. 22:28). ¿Xi maʼ bizaaca caadxi xpinni Cristu ni guyé universidad yaʼ? Maʼ gucuá modo riníʼ ique binni laacaʼ. Guidúʼyanu ti ejemplu.

¿Ximodo zanda quiteʼ modo riníʼ ique binni guidxilayú laanu? (Biiyaʼ párrafo 14 hasta 16). *

15, 16. ¿Xi rizíʼdinu de ni bizaaca ti hermana?

15 Ti hermana ni ziné jma de quince iza lu serviciu de tiempu completu guníʼ: «Neca maʼ guyuaanisaʼ ne maʼ biindaʼ ne binadiaʼgaʼ de ca peligru ridiʼdiʼ tuuxa ora rié universidad la? qué nulabeʼ cani, guníʼ iqueʼ cadi para naa ca conseju que». ¿Xi guendanagana gúpabe yaʼ? Laabe guniʼbe:  «Dxi canazayaʼ universidad, guizáʼ guxha ni tiempu ne stipa stinneʼ dede maʼ qué randa runeʼ orar Jiobá casi dxiqué, ne cumu guizáʼ ridxagaʼ la? maʼ huaxiéʼ riuuladxeʼ guiniéʼ de Biblia ora maʼ cayuneʼ predicar ne maʼ qué racaʼ preparar jneza para ca reunión. Bidieeʼ cuenta guizáʼ cá iqueʼ scuela ne maʼ caxeleʼ de Jiobá. Peru bieneʼ caquiiñeʼ gusaanaʼ ca ni cayuneʼ que. Ne zaqué bíneni».

16 ¿Ximodo bichaa ni biziidibe ra universidad xquendabiaanibe yaʼ? Laabe guniʼbe: «Dede rituiluaʼ purtiʼ bicaacani naa guuyadxiéʼ puru si ra cuchee xcaadxi, jmaruʼ si ra cuchee ca hermanu, gulezaʼ ñúnicaʼ jma de ni rúnicaʼ ne bixeleʼ de laacaʼ. Nabé nagana guca para naa guchaaʼ. Né ni bizaacaʼ riʼ bidieeʼ cuenta guizáʼ racaná binni ora qué rinanda ca conseju rudii Bixhózenu ni nuu guibáʼ laanu ra riquiiñeʼ organización stiʼ. Jma runibiáʼ Jiobá naa que laca naa. ¡Pa nuzuubaʼ diidxaʼ, qué ñapaʼ guiráʼ guendanagana riʼ!».

17. a) ¿Xi cadi caquiiñeʼ gudiʼnu lugar guicá laanu? b) ¿Xi chiguizíʼdinu lu sti artículo ca?

17 Qué chuʼ dxi gudiʼnu lugar guicá guiráʼ «ni biree de xquenda biaani binni» ni nuu lu guidxilayú stiʼ Binidxabaʼ riʼ laanu. Gápanu laanu de ca trampa riquiiñebe (1 Cor. 3:18; 2 Cor. 2:11). Cadi gudiʼnu lugar gucaabe laanu gusiáʼndanu Jiobá ne modo racalaʼdxiʼ gúninu ni ná. Chinándanu ca norma moral stiʼ Jiobá. Cadi gudiʼnu lugar quiteʼ Binidxabaʼ laanu para maʼ cadi chinándanu ca conseju stiʼ Dios. Nga runi, ¿xi zanda gúninu pa gudiʼnu cuenta maʼ cacá modo riníʼ ique binni guidxilayú laanu yaʼ? Lu sti artículo ca zazíʼdinu ximodo zanda gacané Stiidxaʼ Dios laanu para gucáʼnanu xiixa idea o costumbre «ni zuhuaa dxiichiʼ casi ti torre» (2 Cor. 10:4, 5TNM).

CANCIÓN sjj 49 Gusiéchenu ladxidóʼ Jiobá

^ párrafo 5 Guizáʼ nanna Binidxabaʼ quiteʼ binni. Maʼ bicaabe stale binni guni cré guirutiʼ runi mandar laacaʼ, peru laapebe cayuni mandarbe laacaʼ. Lu artículo riʼ chiguidúʼyanu xi trampa riquiiñebe para quítebe binni.

^ párrafo 48 NI RIHUINNI LU FOTO RIʼ: Cucaa ca cananeu ca israelita guni adorarcaʼ Baal juntu ne guni practicarcaʼ inmoralidad sexual.

^ párrafo 51 NI RIHUINNI LU FOTO RIʼ: Letreru stiʼ ti yuʼduʼ ni cusihuinni rudiicaʼ lugar chuʼ muxeʼ o gunaa nguiuʼ ládecaʼ.

^ párrafo 53 NI RIHUINNI LU FOTO RIʼ: Nuu ti baʼdudxaapaʼ ra universidad. Cusiidiʼ ti maestra laacabe zanda guni chaahuiʼ ciencia ne tecnología guiráʼ guendanagana napa binni, ne guizáʼ cayuuláʼdxicabe ni. De racá rihuinni nuube ra Yoo stiʼ Reinu peru cadi cayuuláʼdxibe ni cayete luni.