Biiyaʼ guiraʼ ni nuu lu sitiu riʼ

guyé lu índice

 HISTORIA STINNEʼ

Huaguu Jiobá ndaayaʼ naa jma que biaʼ guníʼ iqueʼ

Huaguu Jiobá ndaayaʼ naa jma que biaʼ guníʼ iqueʼ

NANNAʼ caquiiñeʼ gacaʼ precursor, peru guníʼ iqueʼ pa dxandíʼ galán nga gacaʼ precursor. Guyuuladxeʼ dxiiñaʼ stinneʼ. Raqué naa ruuyaʼ guseendacabe guendaró de Alemania hasta xcaadxi lugar zitu ra qué runibiaʼdu de África, casi Dar es-Salam, Elisabethville ne Asmara. Qué lica niníʼ iqueʼ pa ñuu dxi ñuneʼ ni ná Jiobá de tiempu completu raqué ne stáleruʼ lugar de África.

Ora bisaanaʼ ca duda stinneʼ bizuluáʼ de precursor, casi ñaca nixeleʼ ti puertaʼ para naa ne gucuaaʼ stale ndaayaʼ jma que biaʼ guníʼ iqueʼ (Efes. 3:20). ¿Xi bizaaca yaʼ? Chiguinieniáʼ laatu historia stinneʼ.

Guleʼ iza 1939 guidxi Berlín (Alemania), chupa chonna beeu despué de bizulú Segunda Guerra Mundial. Ra maʼ zilúxeni, lu iza 1945, bilaacabe bomba dede lu avión guidxi Berlín. Caadxi de ca bomba que biaba cani ndaaniʼ calle stidu. Peru familia stinneʼ ne naa gunda yendadu lugar ra qué runiná ca bomba que. Para chuʼdu jma seguru, guyuudu Erfurt, ra gule jñaaʼ.

Naa, bixhozeʼ, jñaaʼ ne bizanaʼ guidxi Alemania (gaxha de 1950).

Qué nidxaga jñaa de nuyubi niziidiʼ ni dxandíʼ. Biindabe stale libru stiʼ ca filósofo ne guyebe lade stale religión, peru gastiʼ qué nucuudxi laabe. Biaʼ lu iza 1948, chupa testigu stiʼ Jiobá yegánnacaʼ laadu. Guluu jñaaʼ laacabe ndaaniʼ yoo ne biʼniʼ laacabe stale pregunta. Menu de ti hora, gúdxibe naa ne ti bizanaʼ ni jma nahuiiniʼ: «Maʼ bidxelaʼ ni dxandíʼ». Qué nindaa, naa, jñaaʼ ne bizanaʼ guyuudu reunión ndaaniʼ guidxi Erfurt.

Lu iza 1950, biguétadu Berlín ne bizulú guyuudu congregación Berlín-Kreuzberg. Ora yendézadu sti lugar de guidxi que, guyuudu congregación Berlín-Tempelhof. Despué guyuunisa jñaaʼ. Peru naa la? napaʼ ca duda stinneʼ. ¿Xiñee yaʼ?

XIMODO BISAANAʼ CA DUDA STINNEʼ NE GUENDARITUILÚ

Nagana guca para naa guneʼ jma lu xhiiñaʼ Jiobá purtiʼ gucaʼ ti binni natuí. Neca riguneʼ predicar, chupa iza qué ninieniáʼ nin ti binni lu predicación. Peru bidxaa guiráʼ ni ora bidxaagaʼ ca hermanu ne ca hermana ni bisihuinni valor ne lealtad sticaʼ Jiobá. Nuu de laacaʼ guyuucaʼ lu campu de concentración nazi o bideguyoocaʼ Alemania oriental. Ne xcaadxi hermanu nagaʼchiʼ yenecaʼ ca publicación que guidxi que, neca nánnacaʼ zanda gueeda igaacaʼ ne guideguyoocaʼ. Bidxagayaaʼ  ejemplu stícabe. Guníʼ iqueʼ, pa laacabe qué nidxíbicabe ñáticabe ne nigaacabe pur Jiobá ne pur ca hermanu la? naa caquiiñeʼ guneʼ stipa para cadi gacapiáʼ natuí.

Ora guyaaʼ lu ti campaña especial para guneʼ predicar lu iza 1955, maʼ qué ñacapiáʼ natuí. Lu ti carta ni biree lu Informador, * hermanu Nathan Knorr guníʼ, ngue nga tobi de ca campaña ni jma naroʼbaʼ biʼniʼ xquidxi Dios. Guniʼbe, guiráʼ ca publicador caquiiñeʼ cheʼ, «purtiʼ ngue nga beeu jma galán para guni predicardu». Ne zaqué gúcani. Despué, bidieeʼ naa Jiobá ne lu iza 1956 guyuaanisaʼ ne guyuunisa bixhozeʼ ne bizanaʼ. Peru qué nindaa gupa xidé gucuaaʼ sti decisión risaca.

Raca stale iza, gunnaʼ ni jma galán guneʼ lu xquendanabaneʼ nga gacaʼ precursor. Peru rabeʼ neca despué gacaʼ ni. Guníʼ iqueʼ, primeru guneʼ estudiar para gapaʼ ti negocio naroʼbaʼ Berlín ne guseendacabe mercancía de sti guidxi ra nuaaʼ ne guseendaʼ cani sti ladu. Despué, guníʼ iqueʼ caquiiñeʼ guneʼ dxiiñaʼ que ti tiempu para guiziideʼ jma de laa. Ngue runi lu iza 1961 gucuaaʼ ti dxiiñaʼ guidxi Hamburgo, tobi de ca puertu jma naroʼbaʼ stiʼ Alemania. Laga jma cayuneʼ dxiiñaʼ que la? jmaruʼ si qué niníʼ iqueʼ ñacaʼ precursor. ¿Xi guneʼ yaʼ?

Rudieeʼ xquíxepeʼ Jiobá purtiʼ biseendabe caadxi hermanu nachaʼhuiʼ para gacané naa guieneʼ caquiiñeʼ gúninu xhiiñaʼ Jiobá primé. Stale de ca xhamiguaʼ gúcacaʼ precursor ne gudíxhecaʼ ti ejemplu sicarú para naa. Ne hermanu Erich Mundt, ni guyuu lu ti campu de concentración, guluu gana naa para gapaʼ confianza Jiobá. Laabe guniʼbe, lu campu que, ca hermanu ni gupa confianza laca laa, chaahuiʼ chaahuiʼ birá stipa sticaʼ. Peru cani gupa confianza Jiobá la? guca fe sticaʼ naguidxi ne beeda gácacaʼ casi pilar ndaaniʼ ca congregación que.

Dxi bizuluáʼ de precursor (1963).

Ne hermanu Martin Poetzinger, ni guyuu lu Grupu ni Zániru, qué nusaana de nuguu gana ca hermanu ne rábibe laacaʼ: «Ti cosa ni jma risaca nápanu nga gácanu nadxibalú». Despué de guníʼ iqueʼ lu ca diidxaʼ que, bisaanaʼ dxiiñaʼ que ne bizuluáʼ de precursor lu beeu junio de 1963. Ngue nga ni jma galán bineʼ lu xquendanabaneʼ. Chupa beeu despué, ante guyubeʼ sti dxiiñaʼ, biʼniʼ invitárcabe naa casi precursor especial. Ne xhupa xhonna iza despué, gucuaaʼ ti invitación para chaaʼ clase 44 stiʼ Escuela de Galaad. Jiobá bidii naa jma que biaʼ guníʼ iqueʼ.

BIZIIDEʼ TI LECCIÓN GUIZÁʼ RISACA GALAAD

Tobi de ca cosa ni jma risaca ni biziideʼ de hermanu Nathan Knorr ne Lyman Swingle nga cadi gusaanadu asignación stidu nagueendaca. Guluucabe gana laadu guni huantardu neca tídidu ra nagana. Hermanu Knorr guníʼ: «¿Xii nga ni jma icá íquetu yaʼ? ¿Pa nabiidiʼ ra chetu, pa nuu manichuga raqué o pa pobre ca binni que la? ¿O zuuyadxitu ca yaga gaʼ que, ca yaga guieʼ ne pabiáʼ nayecheʼ ca binni que la? Laguiziidiʼ gannaxhiitu binni». Ti dxi, ora cusiene hermanu Swingle laadu xiñee stale hermanu nagueenda riree gana, bíʼnibe stipa para gucueezabe de gúʼnabe. Gupa xidé bicueezabe discursu stibe dede ora guleza de gúʼnabe. Yendá ngue dede ndaaniʼ ladxiduáʼ, ne gudixheʼ iqueʼ cadi gunenaʼyaʼ ladxidóʼ Cristu nin ca bíʼchibe ni ruzuubaʼ diidxaʼ (Mat. 25:40).

Naa, Claude ne Heinrich, dxi nácadu misioneru guidxi Lubumbashi (República del Congo, 1967).

Ora gucuaadu asignación stidu, chonna betelita gunabadiidxacaʼ chupa chonna de laadu paraa chuudu. Ora caadxi de laadu guníʼ paraa cheʼ la? ca betelita que gúdxicaʼ laacabe galán ra chécabe. Peru ora guniéʼ chaaʼ República del Congo, qué niniʼcaʼ gastiʼ, oraqueruʼ nacaʼ: «Congo la? Jiobá gapa lii». Ca dxi que, rieete lu noticia nuu guerra raqué, cayuuticabe binni ne ca cosa malu runi ca soldadu ni nuu guidxi que. Peru bietenalaʼdxeʼ cani biziideʼ. Despué de bilúxedu scuela que, lu beeu septiembre de iza 1967, naa né ca compañeru stinneʼ Heinrich Dehnbostel ne Claude Lindsay guyuudu capital stiʼ guidxi Kinsasa.

 TI ASIGNACIÓN NI BISIIDIʼ LAADU STALE CASI MISIONERU

Ora yendadu Kinsasa, bizíʼdidu francés chonna beeu. Despué guyuudu ladu gueteʼ stiʼ guidxi que hasta Lubumbashi (dxiqué biree lani Elisabethville), gaxha de ra dxaagani Zambia. Yendézadu ndaaniʼ yoo ra riaana ca misioneru ni nuu galahuiʼ guidxi que.

Cumu jma stale lugar de guidxi ca qué huayaca predicar la? biéchedu stale gácadu de ca primé ni yené ni dxandíʼ ra nuu ca binni que. Qué nindaa, gúpadu stale estudiu jma que biaʼ ñanda ñuni tenderdu. Laaca biʼniʼ predicardu cani runi xhiiñaʼ gobiernu ne ca puliciá. Stale de laacaʼ runi respetarcaʼ Stiidxaʼ Dios ne predicación stidu. Cumu jma nga riníʼ ca binni que suajili la? ngue runi Claude Lindsay ne naa bizíʼdidu idioma que. Qué nindaa biseendacabe laadu ti congregación ra riníʼcabe diidxaʼ suajili.

Galán modo bibánidu raqué, peru laaca gúpadu caadxi guendanagana. Stale biaje biʼniʼ huantardu ora rugaaniʼ ca soldadu ni naxudxi que donda laadu neca qué ñúnidu gastiʼ o ca puliciá duxhuʼ que. Ti biaje, ti grupu de puliciá ni nanda guiibaʼ yechuucaʼ ne bicueezacaʼ reunión stidu ndaaniʼ yoo ra riaana ca misioneru ne yenecaʼ laadu ra cuartel. Raqué bicuicaʼ laadu hasta las diez de la noche ne óraque bidiicaʼ lugar chuudu.

Lu iza 1969, biseendacabe naa de superintendente viajante. Lu circuito que nga gunnaʼ xii nga sabana africana. Guca tocar naa sayaʼ zitu lade neza naxhii ne dxaʼ beñe. Ndaaniʼ ti guidxihuiiniʼ ra guyaaʼ, rasi ti bere ne ca berehuiiniʼ stiʼ xaʼnaʼ cama stinneʼ. Qué ziuu dxi  gusiaandaʼ ruidu runi culeca que ora maʼ zirá gueelaʼ. Peru laaca qué zusiaandaʼ ca gueelaʼ ribínedu ca hermanu que gaxha de ti bele para guinidu de cani dxandíʼ zeeda lu Biblia.

Tobi de ca guendanagana ni guyuu nga tratu gupanécabe cani ná hermanu laacaʼ purtiʼ runi apoyarcaʼ movimientu Kitawala. * Cani ná hermanu laacaʼ riʼ guyuucaʼ ndaaniʼ ca congregación que ne gúpacaʼ dxiiñaʼ ndaaniʼ cani. Ne stale de laacaʼ beeda gácacaʼ «casi guié ni gaʼchiʼ» ne qué ñanda nusiguiicaʼ ca hermanu ni ruzuubaʼ diidxaʼ (Jud. 12). Ra gudiʼdiʼ iza, gulee Jiobá cani ná hermanu laacaʼ riʼ ndaaniʼ ca congregación que ne despué jma stale binni guyuu ndaaniʼ xquidxi Dios.

Lu iza 1971, biseendacabe naa ra sucursal ni nuu Kinsasa. Raqué gupaʼ stale dxiiñaʼ, bineʼ tender correu ra sucursal, ca pedidu stiʼ ca publicación ne ca dxiiñaʼ ni raca Departamentu de Serviciu. Betel biziideʼ modo quixheʼ chaahueʼ dxiiñaʼ stidu ndaaniʼ ti guidxi guizáʼ naroʼbaʼ, ra nuu caadxi cosa ni jma riquiiñeʼ binni, peru cadi galán rúnicaʼ dxiiñaʼ. Nuu biaje rindaa ca correu ni reeda pur avión chupa chonna beeu para guiuu ra nuu ca congregación que. Rindétecabe ca publicación que lu helicóptero ne rinécabe cani lu barcu, peru rindaa ca barcu que chupa chonna semana, purtiʼ raagaʼ cani lade caadxi yagahuiiniʼ ni láʼ jacinto. Peru neca zaqué, raca ca dxiiñaʼ que neca guyuu xcaadxi guendanagana.

Bidxagayaaʼ ximodo gudixhe chaahuicabe modo gaca ca asamblea naroʼbaʼ que ne caadxi si bueltu. Bíʼnicabe plataforma de yaga, ra biquiiñecabe bandaga naroʼbaʼ casi diaga elefante para ca pared que ne ruzeechucabe cani para cuícabe lúcani. Biquiiñecabe bambú para gúnicabe base stiʼ edificiu que ne biquiiñecabe caadxi vara ni zeeda gaca casi ubaguí para bíʼnicabe ique cani ne mexaʼ. Cumu qué gápacabe clavu la? biquiiñecabe bandadiʼ. Guizáʼ bidxagayaaʼ cani biʼniʼ ca hermanu que ne modo biʼniʼ chaahuicabe ca guendanagana stícabe. Gunnaxhieeʼ laacabe stale. Guizáʼ bibanaʼ laacabe ora guyaaʼ sti asignación.

BINEʼ SERVIR GUIDXI KENIA

Lu iza 1974, yenécabe naa ra sucursal ni nuu Nairobi (Kenia). Nuu stale ni gaca, purtiʼ sucursal que ruuyaʼ gaca predicar chii guidxi ni nuu gaxha de laa, peru nuu de ca guidxi que biʼniʼ prohibircaʼ guni predicárcabe laacaʼ. Gatigá ruseendacabe naa ca guidxi que, jmaruʼ si Etiopía. Raqué guzanándacabe ca hermanu stinu ne biʼniʼ huantarcaʼ ca guendananá que. Stale de laacaʼ bininácabe ne biseguyoocabe; dede biiticabe caadxi de laacaʼ. Peru gúcacabe fiel né Jiobá purtiʼ guyuucabe gaxha de laa ne guyuucabe tobi si.

Lu iza 1980, bizaaca ti cosa sicarú lu xquendanabaneʼ: bichaganaʼyaʼ Gail Matheson, de Canadá. Tobi si guyuudu clase de Galaad ne guca comunicardu pur carta. Laabe guyuube de misionera Bolivia. Biguetaʼ biiyadu despué de doce iza, Nueva York, qué nindaa bichaganadu guidxi Kenia. Rudieeʼ xquíxepeʼ Gail purtiʼ ruuyabe ca cosa ca casi ruuyaʼ Jiobá cani ne nuube nayecheʼ né cani nápabe. Dede yanna cayacanebe naa ne nácabe ti compañera ni nadxieeʼ.

Lu iza 1986, bizulú bineʼ servir de superintendente viajante ne tiempu queca gucaʼ tobi de cani nuu lu Comité de Sucursal. Naa ne Gail yegánnadu ca congregación ni nuu ca guidxi ni runi supervisar sucursal de Kenia.

Cudieeʼ ti discursu lu ti asamblea guidxi Asmara (1992).

Nabé galán runeʼ sentir ora rietenalaʼdxeʼ modo biʼniʼ preparar ca hermanu de Asmara, (Eritrea) que asamblea sticaʼ lu iza 1992, ca dxi caʼruʼ gaca prohibir predicación raqué. Triste guininu ni, peru bidxéladu ti graneru jma feu dentru de laa que fuera. Ne dxi guca asamblea que dede bidxagayaaʼ modo biʼniʼ chaahuiʼ ca hermanu que ni para guni adorarcaʼ  Jiobá. Stale familia yené lari sicarú para guzuchaahuiʼ lugar que ti guihuinni ni galán. Nabé nayecheʼ gudídidu asamblea que, guyé 1,279 binni.

Ca dxi yegánnadu ca congregación que, gadxé gadxé lugar riaanadu ne ndiʼ redané ni caadxi guendanagana. Biaanadu dede ndaaniʼ ti mansión ni nuu cueʼ nisadóʼ, ti lugar sicarú. Ne nuu biaje riaanadu ndaaniʼ ti yoo de lámina ni nuu lu terrenu stiʼ ca hombre ni runi dxiiñaʼ raqué, ne bañu sticaʼ riaana zitu, jma de 100 metru. Peru ra tiica guni servirdu, ni jma rietenaláʼdxidu nga pabiáʼ guyuu xhiiñadu ora runi predicarnedu ca precursor ne ca publicador que. Ora bidxaʼdu de asignación, gupa xidé bisaanadu guiráʼ ca xhamígudu, ne nannaʼ zabánadu laacaʼ stale.

GUCUAADU STALE NDAAYAʼ DXI GUYUʼDU ETIOPÍA

Iza 1987 ne 1992, bidii gobiernu derechu laadu guni predicardu ndaaniʼ stale guidxi ra runi tender sucursal stiʼ Kenia. Nga runi, bixeleʼ caadxi sucursal ni runi tender guidxi ca ne sucursal stiʼ ti guidxi roʼ. Lu iza 1993, biseendacabe laadu ra oficina ni nuu Adís Abeba (Etiopía). Ndaaniʼ guidxi riʼ nagaʼchiʼ biʼniʼ predicardu pur stale iza, peru yanna maʼ guca legalizar ni.

Ndaaniʼ ti guidxihuiiniʼ de Etiopía dxi canazayaʼ de superintendente de distrito (1996).

Maʼ guluu ndaayaʼ Jiobá predicación riʼ Etiopía. Stale hermanu maʼ naca precursor. Dede iza 2012, guiráʼ iza, jma de 20% de ca publicador maʼ gúcacaʼ precursor regular. Ne laaca maʼ huayacané ca scuela ni napa xquidxi Dios ca publicador para guiziidicaʼ, ne maʼ gurí jma de 120 Yoo stiʼ Reinu. Lu iza 2004, yebíʼ familia Betel ra nuu caadxi instalación cubi. Laaca luni nuu ti Salón de Asamblea ni huayacané guiráʼ ca hermanu que.

Lu ca iza riʼ, naa ne Gail maʼ bínidu stale amistad né ca hermanu de Etiopía. Modo nacháʼhuicabe ne modo rannaxhiicabe runiibi ni ladxidoʼdo. Triste guinidu ni, cadi xadxí biseendacabe laadu sucursal de Europa central pur guendahuará. Racá rápacabe laadu ne stale guendarannaxhii, peru nabé ribánadu ca hermanu stidu de Etiopía.

JIOBÁ BISINIISI NI

Maʼ biiyadu ximodo cusiniisi Jiobá xhiiñaʼ Reinu (1 Cor. 3:6, 9). Casi dxi bineʼ predicar primé biaje caadxi mineru de Ruanda, ti lugar ra nabé runibiáʼcabe purtiʼ nuu stale cobre, ndaaniʼ guidxi (Congo), gastiʼ nin ti publicador Ruanda, peru yanna nuu jma de 30,000 hermanu guidxi ca. Lu iza 1967, República del Congo gupa biaʼ 6,000 publicador, peru yanna nuu jma de 230,000, ne lu iza 2018 guyé jma de 1,000,000 binni Conmemoración. Ndaaniʼ guiráʼ guidxi biʼniʼ supervisar sucursal stiʼ Kenia, guyuu jma de 100,000 publicador.

Raca jma de cincuenta iza, biquiiñeʼ Jiobá caadxi hermanu para gacané naa guzuluáʼ serviciu de tiempu completu. Neca natuiruʼ luáʼ la? maʼ biziideʼ gapaʼ confianza Jiobá. Modo bibaneʼ África gucané ni naa gapaʼ paciencia ne chuaaʼ nayecheʼ né ni napaʼ. Naa ne Gail nabé bidxagayaadu modo ridxaagalú ca hermanu que binni, modo rudxiilucaʼ ca guendanagana sticaʼ ne pabiáʼ nápacaʼ confianza Jiobá. Rudieeʼ xquíxepeʼ laabe pur gúcabe nachaʼhuiʼ né naa neca qué runeʼ merecer ni. Dxandipeʼ, huaguu Jiobá ndaayaʼ naa jma que biaʼ guníʼ iqueʼ (Sal. 37:4).

^ párrafo 11 Despué, biree lani Xhiiñaʼ Reinu ni Rúninu. Ne lugar de laani guyuu Ni chigaca lu reunión xhiiñaʼ Dios ne modo nabáninu.

^ párrafo 23 Diidxaʼ Kitawala ca zeedani de diidxaʼ suajili ne riníʼ ni «ganináʼ o guni mandar». Movimientu riʼ runi apoyarni política: para maʼ cadi guni mandárcabe guidxi Belga. Ca grupu ni nuu lu movimientu riʼ ricaacaʼ, ruundacaʼ ne riguiizicaʼ ca publicación stiʼ ca testigu stiʼ Jiobá. Peru laacaʼ rutiixhicaʼ modo rusiidiʼ Biblia para guni apoyarcaʼ política, ca costumbre ni zeeda de espíritu malu ne chúʼnecaʼ ni cadi xheelacaʼ.