Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 27

Chuʼnu listu para ora sanándacabe laanu

Chuʼnu listu para ora sanándacabe laanu

«Irá ni racalaʼdxi sa modo na Cristu Jesús, zazabi nanda cabe laacaʼ» (2 TIM. 3:12).

CANCIÓN sjj 129 Gúninu xhiiñaʼ Dios sin guireʼnu gana

NI ZAZÍʼDINU *

1. ¿Xiñee caquiiñeʼ chuʼnu listu para ora sanándacabe laanu?

GUEELAʼ ante gatiʼ Jesús guníʼ zacananalaʼdxiʼ binni guiráʼ ca ni gaca discípulo stiʼ (Juan 17:14). Dede dxiqué hasta nagasi rizananda binni ca xpinni Cristu (2 Tim. 3:12). Ne yanna ra mayaca guinitilú guidxilayú malu riʼ nánnanu jmaruʼ si zazanándacabe laanu (Mat. 24:9).

2, 3. a) ¿Xi zanda guizaaca pa guidxíbinu? b) ¿Xi chiguidúʼyanu lu artículo riʼ?

2 ¿Ximodo chuʼnu listu dede ca yanna para ora sanándacabe laanu yaʼ? Cadi caquiiñeʼ diʼ guxuíʼlunu xi guiráʼ zanda guizaacanu. Purtiʼ pa gúninu ni, zándaca guidxíbinu ne pur laani gusaana de gúninu ni ná Jiobá ante tídinu ti prueba (Prov. 12:25; 17:22). Guendaridxibi nga tobi de ca trampa jma nadipaʼ ni riquiiñeʼ «binidxabaʼ, enemigu» stinu para gusaba laanu (1 Ped. 5:8, 9). Nga runi, ¿xi caquiiñeʼ gúninu dede ca yanna para guzuhuaa dxiichinu yaʼ?

3 Lu artículo riʼ chiguidúʼyanu xi zanda gúninu para gaca amistad ni nápanu né Jiobá jma naguidxi ne xiñee nabé risaca gúninu ni yanna. Laaca zadúʼyanu xi caquiiñeʼ gúninu para gácanu jma nadxibalú ne xi caquiiñeʼ gúninu ora gacananalaʼdxiʼ binni laanu.

XIMODO ZANDA GACA AMISTAD NI NÁPANU NÉ JIOBÁ JMA NAGUIDXI

4. Né ni ná Hebreos 13:5, 6, ¿xi naquiiñeʼ gánnanu, ne xiñee risácani?

4 Naquiiñeʼ gánnanu guizáʼ nadxii Jiobá laanu ne qué ziuu dxi gusaanabe laanu (biindaʼ Hebreos 13:5, 6). Maʼ raca stale iza, lu ti Torre stiʼ ni rapa gucuá ca diidxaʼ riʼ: «Binni ni jma runibiáʼ Dios nga ni jma zapa confianza laabe ora tidiʼ lu prueba». Dxandíʼ ni ná ca diidxaʼ riʼ. Purtiʼ para ganda  guni huantarnu ora sanándacabe laanu, caquiiñeʼ gannaxhiinu Jiobá ne gápanu confianza laa de guidubi ladxidoʼno, ne cadi lica guiaandaʼ laanu guizáʼ nadxiibe laanu (Mat. 22:36-38; Sant. 5:11).

5. ¿Xi zacané laanu gudiʼnu cuenta nadxii Jiobá laanu?

5 Guidúʼndanu Biblia guiráʼ dxi para chuʼnu jma gaxha de Jiobá (Sant. 4:8). Ora maʼ cadúʼndanu Biblia, guiduʼyaʼ chaahuinu ca cualidad galán stiʼ Jiobá ni riete luni. Ne guidúʼyanu guendarannaxhii stibe lu ca cosa ni riniʼbe ne ni rúnibe (Éx. 34:6). Zándaca raca nagana para caadxi binni guni crecaʼ nadxii Dios laacaʼ purtiʼ guirutiʼ huayannaxhii laacaʼ. Pa nga nga ni rizaacanu, ¿xiñee qué gúninu ti lista guiráʼ dxi ra gucaʼnu ximodo rusihuinni Jiobá nachaʼhuiʼ ne riá laanu yaʼ? (Sal. 78:38, 39; Rom. 8:32). Zanda gucaʼnu stale cosa lu lista ca pa guni meditarnu ca ni maʼ bizaacanu ne ca ni ridúʼndanu lu Biblia. Ra jma gusisácanu guiráʼ ni runi Jiobá pur laanu la? jma nadipaʼ zaca amistad ni nápanu né laa (Sal. 116:1, 2).

6. Né ni ná Salmo 94:17-19, ¿xi zabeendunu pa guni orarnu de guidubi ladxidoʼno?

6 Cadi gusaana de guni orarnu. Bixuiʼlú ti xcuidihuiiniʼ ni caguiidxi bixhoze laa né stale cariñu. Cumu cayuni sentirbe seguru la? cayábibe bixhózebe guiráʼ ni bizaacabe, cásica ca cosa galán zaqueca ca cosa feu. Laanu laaca zuni sentirnu seguru pa guni orarnu Jiobá de guidubi ladxidoʼno guiráʼ dxi (biindaʼ Salmo 94:17-19). Guxhélenu ladxidoʼno nezalú Jiobá ne gábinu laa guiráʼ ni ruchibi ne ni riguu xizaa laanu (Lam. 2:19). Ne óraca, casi riete lu Biblia, zuni sentirnu paz stiʼ Dios (Filip. 4:6, 7). Ra jma guni orarnu Jiobá zacá la? jma gaxha ziuʼnu de laa (Rom. 8:38, 39).

Zácanu jma nadxibalú pa gápanu confianza Jiobá ne Reinu stiʼ.

Gupa Stanley Jones stipa purtiʼ nanna dxandíʼ zaca cumplir ca promesa stiʼ Reinu stiʼ Dios. (Biiyaʼ párrafo 7).

7. ¿Xiñee naquiiñeʼ gánnanu dxandíʼ zaguu Reinu stiʼ Dios ndaayaʼ laanu?

7 Naquiiñeʼ gánnanu dxandíʼ zaca cumplir ca promesa stiʼ Reinu stiʼ Dios (Núm. 23:19). Jma nagueenda zuchibi Binidxabaʼ ne ca xpinni laanu pa huaxiéʼ fe nápanu ca promesa stiʼ Dios (Prov. 24:10; Heb. 2:15). ¿Xi zanda gúninu para iguidxi confianza ni nápanu Reinu stiʼ Dios yaʼ? Naquiiñeʼ cueenu tiempu para guni estudiarnu ca promesa stiʼ Jiobá ne ni guedané Reinu stiʼ ne xiñee nánnanu zaca cumplir cani. Para guiénenu pabiáʼ risácani la? guidúʼyanu ejemplu stiʼ hermanu Stanley Jones, gadxe iza guyuube cárcel pur ca ni runi crebe. * ¿Xi gucané laabe guni huantarbe yaʼ? Laabe guniʼbe: «Ni maʼ biziideʼ de Reinu stiʼ Dios nga bidii stipa naa, purtiʼ nannaʼ dxandíʼ ni ne qué lica ñuneʼ dudar. Nga runi qué ñanda nusábacabe naa». Pa naguidxi fe stinu lu ca promesa stiʼ Dios la? zadxíñanu jma gaxha de Jiobá  ne qué zucueeza guendaridxibi laanu de gúninu ni nabe (Prov. 3:25, 26).

8. Bisiene xi zazaaca pa de ca yanna qué riáʼdxanu ca reunión stinu.

8 Cadi guiáʼdxanu ca reunión stinu. Racanécani laanu guidxíñanu jma gaxha de Jiobá. Pa de ca yanna qué riáʼdxanu ca reunión stinu la? zacanécani laanu para guni huantarnu ora sanándacabe laanu despué (Heb. 10:24, 25). Guidúʼyanu xiñee. Pa de ca yanna rudiʼnu lugar gucueeza xiixa cosahuiiniʼ laanu para cadi chuunu reunión, ¿xi zúninu dxi gaca jma nagana para laanu gaca reunirnu yaʼ? Pa maʼ gudixhe íquenu cadi guiáʼdxanu ca reunión stinu la? qué zanda gucueeza ca enemigu stinu laanu de gaca reunirnu. Nga runi, yanna nga naquiiñeʼ gusisácanu ca reunión stinu. Pa gúninu ni la? zuzúʼbanu stiidxaʼ Dios neca sanándacabe laanu o gabi gobiernu laanu maʼ cadi gaca reunirnu (Hech. 5:29).

Pa guizíʼdinu textu zeeda lu Biblia ne ca canción stiʼ Reinu dede ca yanna zacanécani laanu ora sanándacabe laanu. (Biiyaʼ párrafo 9). *

9. Pa guizíʼdinu textu zeeda lu Biblia, ¿ximodo zacanécani laanu?

9 Guizíʼdinu ca textu ni jma riuuláʼdxinu (Mat. 13:52). Zándaca cadi nayaʼniʼ peʼ xquendabiaaninu, peru zanda iquiiñeʼ Jiobá espíritu santu stiʼ para gusietenalaʼdxiʼ laanu ca textu guizíʼdinu (Juan 14:26). Sicaríʼ guníʼ ti hermanu ni guyuu ndaaniʼ cárcel de Alemania oriental: «Dichapeʼ biziideʼ jma de chupa gayuaa textu purtiʼ gucanécani naa guiníʼ iqueʼ de tema ni zeeda lu Biblia ca dxi guyuaaʼ stubeʼ». Gucané ca textu que laabe para chuʼbe gaxha de Jiobá ne gácabe fiel.

(Biiyaʼ párrafo 10). *

10. ¿Xiñee caquiiñeʼ guizíʼdinu ca canción stiʼ Reinu dede ca yanna?

10 Guizíʼdinu ne guidúʼndanu ca canción stiʼ Reinu para gusisácanu Jiobá. Dxi bieguyoo Pablo ne Silas ndaaniʼ guidxi Filipos, biindacaʼ canción ni biziidicaʼ para gusisácacaʼ Jiobá (Hech. 16:25). Zacagá nga biʼniʼ ca hermanu stinu de Unión Soviética para iguidxi fe sticaʼ dxi biseguyoocabe laacaʼ Siberia. Ti hermana láʼ Mariya Fedun guníʼ: «De guiradu bidúʼndadu guiráʼ ca cánticu ni bizíʼdidu». Laabe guniʼbe guizáʼ guluu ca canción que gana guirácabe ne gucanécani laacabe guni sentírcabe nuucabe jma gaxha de Jiobá. Pa riguidxi fe stinu ora ridúʼndanu ca canción stiʼ Reinu ni zeeda lu cancioneru ne ni nuu lu sitiu de Internet stinu la? guizíʼdinu cani dede ca yanna (biiyaʼ recuadru ni láʼ « Dané naa valor»).

 XI GÚNINU PARA GÁCANU JMA NADXIBALÚ

11, 12. a) Né ni ná 1 Samuel 17:37, 45-47, ¿xiñee guca David nadxibalú? b) ¿Xi ti cosa nabé risaca rizíʼdinu de ni bizaaca David?

11 Caquiiñeʼ gácanu nadxibalú para ganda guni huantarnu ora sanándacabe laanu. ¿Xi zanda gúninu pa runi sentirnu huaxiéʼ nápanu valor yaʼ? Cadi biaʼ stipa napa tuuxa o ca ni zanda guni nga zusihuinni pabiáʼ nadxibalú. Guidúʼyanu xi bizaaca David. Dxi joven laabe la? bicaalube ti gigante láʼ Goliat. Jma nahuiiniʼ David, ne jma huaxiéʼ stipa napa que Goliat. Ne cadi ngasi, laaca cadi nuube listu para tíndebe ne cadi zinebe ti espada. Peru guizáʼ nadxibalube ne gudindenebe gigante que.

12 ¿Xiñee guca David nadxibalú yaʼ? Purtiʼ nánnabe cayacané Jiobá laabe (biindaʼ 1 Samuel 17:37, 45-47). Qué niníʼ íquebe biáʼritiʼ laabe cueʼ Goliat, sínuque guníʼ íquebe biáʼritiʼ Goliat cueʼ Jiobá. Rizíʼdinu ti cosa nabé risaca de ni bizaaca David, zácanu nadxibalú pa gápanu confianza zacané Jiobá laanu ne pa guiníʼ íquenu biáʼritiʼ ca enemigu stinu cueʼ Dios stinu, ni jma napa poder (2 Crón. 20:15; Sal. 16:8). ¿Xi zanda gúninu dede ca yanna ante sanándacabe laanu para gácanu jma nadxibalú yaʼ?

13. ¿Xi caquiiñeʼ gúninu para gácanu jma nadxibalú? Bisiéneni.

13 Ora runi predicarnu ca noticia galán stiʼ Reinu stiʼ Dios rácanu jma nadxibalú. ¿Xiñee yaʼ? Purtiʼ rusiidini laanu gápanu confianza Jiobá ne cadi guidxíbinu binni (Prov. 29:25). Ne cásica riguidxi ladi binni ora runi ejerciciu, zacaca riguidxi guendanadxibalú stinu ora runi predicarnu de yoo pur yoo, lugar ra ridiʼdiʼ stale binni, ratiica nuunu ne ra nuu negocio. Pa guni predicarnu né stale guendanadxibalú yanna la? ziuʼnu listu para gúninu ni neca gábicabe laanu gusaana de gúninu ni (1 Tes. 2:1, 2).

Qué niná Nancy Yuen nusaana de ñuni predicar ca noticia galán. (Biiyaʼ párrafo 14).

14, 15. ¿Xi rizíʼdinu de ni bizaaca hermana Nancy Yuen ne Valentina Garnovskaya?

14 Rizíʼdinu stale de ejemplu stiʼ chupa hermana fiel purtiʼ bisihuínnicaʼ guizáʼ nadxibalucaʼ. Tobi de laacabe nga Nancy Yuen. Nasoobe biaʼ ti metru arondaʼ, peru neca zacá nagana para guchibi tuuxa laabe. * Cumu qué nusaana de ñuni  predicarbe mensaje stiʼ Reinu la? biseguyoocabe laabe ndaaniʼ guidxi China biaʼ gande iza. Ca puliciá ni biʼniʼ interrogar laabe guniʼcaʼ nácabe «binni jma necia» ni nuu ndaaniʼ país que.

Gunna dxiichiʼ Valentina Garnovskaya cayacané Jiobá laa. (Biiyaʼ párrafo 15).

15 Sti hermana ca láʼ Valentina Garnovskaya. Guyuube cárcel Unión Soviética chonna biaje gadxé gadxé tiempu pur gande iza. * Cumu qué lica niníʼ íquebe nusaana de ñuni predicarbe la? guníʼ gobiernu laabe nga «binni jma malu» ni nuu raqué. ¿Xiñee guca ca hermana riʼ nadxibalú yaʼ? Purtiʼ nanna dxíchicabe cayacané Jiobá laacabe.

16. ¿Xii nga ni jma zacané laanu gácanu nadxibalú?

16 Casi maʼ bidúʼyanu, para gácanu nadxibalú cadi caquiiñeʼ gúʼyanu pabiáʼ stipa stinu o ca ni zanda gúninu. Naquiiñeʼ gápanu confianza cayacané Jiobá laanu ne cudxiilube ca guendanagana stinu (Deut. 1:29, 30; Zac. 4:6). Laani nga ni jma zacané laanu gácanu nadxibalú.

XI CAQUIIÑEʼ GÚNINU ORA GACANANALAʼDXIʼ BINNI LAANU

17, 18. Casi ná Juan 15:18-21, ¿xi guníʼ Jesús zazaacanu, ne xiñee?

17 Riuuláʼdxinu guni respetar xcaadxi laanu, peru cadi naquiiñeʼ diʼ guiníʼ íquenu qué risácanu pa qué riuulaʼdxiʼ xcaadxi ni rúninu. Jesús guníʼ: «Dichoso de laatu ora aca nanalaʼdxi cabe laatu, ne qué na cabe idxaaga cabe laatu, ne ulaa cabe diidxa laatu, ne qué lica racalaʼdxi cabe guna diaga cabe lá tu purti xpinni Hombre Biseenda Dios laatu» (Luc. 6:22). ¿Xi gucalaʼdxiʼ Jesús niníʼ né ca diidxaʼ riʼ yaʼ?

18 Cadi caníʼ diʼ Jesús ziuuláʼdxinu sanándacabe laanu, sínuque cusiénebe ni zazaacanu. Nanalaʼdxiʼ binni laanu purtiʼ cadi nácanu parte de guidxilayú riʼ, rinándanu guiráʼ ni bisiidiʼ Jesús ne runi predicarnu mensaje bisaana (biindaʼ Juan 15:18-21). Racaláʼdxinu gusiéchenu ladxidóʼ Jiobá. Ne pa nanalaʼdxiʼ binni laanu purtiʼ nadxiinu Bixhózenu la? maʼ laacaʼ gúʼyacaʼ.

19. ¿Ximodo zanda chinándanu ejemplu stiʼ ca apóstol?

 19 Qué chuʼ dxi guituílunu nácanu testigu stiʼ Jiobá pur ni gabi o ni guni binni laanu (Miq. 4:5). Ti cosa ni zacané laanu para cadi guidxíbinu binni nga guidúʼndanu ejemplu bisaana ca apóstol dxi guyuucaʼ Jerusalén despué de guti Jesús. Nánnacabe pabiáʼ nanalaʼdxiʼ ca xaíque yuʼduʼ stiʼ ca judíu laacabe (Hech. 5:17, 18, 27, 28). Peru neca zacá, riécabe ndaaniʼ templu guiráʼ dxi ne rábicabe binni nácacabe discípulo stiʼ Jesús (Hech. 5:42). Qué nudiicabe lugar nuchibi binni laacabe. Ngaca nga laanu, qué zudiʼnu lugar guchibi binni laanu pa gábinu laacaʼ nácanu testigu stiʼ Jiobá, zanda gúninu ni ra rúninu dxiiñaʼ, ra scuela o neza ra nabézanu (Hech. 4:29; Rom. 1:16).

20. ¿Xiñee guyuu ca apóstol que nayecheʼ neca nanalaʼdxiʼ binni laacaʼ?

20 Guizáʼ nayecheʼ guyuu ca apóstol que purtiʼ nánnacaʼ xiñee nanalaʼdxiʼ binni laacaʼ. Ne para laacabe ti privilegiu nga guniná binni laacabe purtiʼ cayúnicabe ni ná Jiobá (Luc. 6:23; Hech. 5:41). Gudiʼdiʼ si ti tiempu, sicaríʼ bicaa apóstol Pedro: «Pa cayuni tu jneza ne acaná tu la? dichoso de laatu» (1 Ped. 2:19-21; 3:14). Ora riénenu nanalaʼdxiʼ binni laanu purtiʼ rúninu ni jneza la? qué rucueeza diʼ ni laanu de gúninu ni ná Dios.

PA CHUʼNU LISTU DEDE CA YANNA ZACANENI LAANU

21, 22. a) ¿Xi cá íqueluʼ gúniluʼ para chuʼluʼ listu dede ca yanna ante sanándacabe laanu? b) ¿Xi chiguidúʼyanu lu sti artículo ca?

21 Qué gánnanu padxí guzulú sanándacabe laanu o padxí guiníʼ gobiernu maʼ cadi guni predicarnu. Ni zanda gúninu nga chuʼnu listu dede ca yanna ra gúninu amistad ni nápanu né Jiobá jma naguidxi, gúninu stipa para gácanu jma nadxibalú ne guizíʼdinu xi caquiiñeʼ gúninu ora gacananalaʼdxiʼ binni laanu. Pa chuʼnu listu dede ca yanna zacaneni laanu para cadi gusaana de gúninu ni ná Jiobá lu ca dxi ni zeeda ca.

22 Peru ¿xi gúninu pa málasi gabi gobiernu laanu maʼ cadi guni predicarnu yaʼ? Lu sti artículo ca chiguidúʼyanu caadxi principiu ni zacané laanu gúninu ni ná Jiobá ora maʼ sanándacabe laanu.

CANCIÓN sjj 118 «Dané laadu jma fe»

^ párrafo 5 Laanu ca xpinni Dios, qué racaláʼdxinu gacananalaʼdxiʼ binni laanu. Peru zadxiña dxi zazanándacabe laanu. Artículo riʼ zacané laanu gácanu nadxibalú ora sanándacabe laanu.

^ párrafo 7 Biiyaʼ Torre stiʼ ni rapa 15 de febrero de 1966, yaza 116 hasta 126.

^ párrafo 14 Biiyaʼ Torre stiʼ ni rapa 1 de diciembre de 1979, yaza 4 hasta 7. Laaca zanda gúʼyaluʼ videu ni láʼ El nombre de Jehová se dará a conocer, nuuni lu JW Broadcasting® (guyé ra ná ENTREVISTAS Y EXPERIENCIAS. Nuuni lu diidxastiá).

^ párrafo 15 Biiyaʼ Anuario de los testigos de Jehová 2008, yaza 191 ne 192.

^ párrafo 67 NI RIHUINNI LU FOTO RIʼ: Caquiiñeʼ ti hermanu ne xheelaʼ caadxi tarjeta lu adoración en familia para gacanecaʼ ca xiiñicaʼ guiziidicaʼ textu zeeda lu Biblia de memoria.

^ párrafo 70 NI RIHUINNI LU FOTO RIʼ: Cayuundaʼ ti familia canción stiʼ Reinu ndaaniʼ carru laga zecaʼ reunión.