Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 28

Cadi gusaana de gúninu ni ná Jiobá ora gucueeza gobiernu dxiiñaʼ stinu

Cadi gusaana de gúninu ni ná Jiobá ora gucueeza gobiernu dxiiñaʼ stinu

«Qué zanda usaana du de güi du ni biduʼya du ne ni bina diaga du» (HECH. 4:19, 20).

CANCIÓN sjj 122 ¡Guzuhuaʼnu dxiichiʼ ne cadi guiree cueʼnu!

NI ZAZÍʼDINU *

1, 2. a) ¿Xiñee cadi naquiiñeʼ guidxagayaanu ora gucueeza gobiernu dxiiñaʼ stinu? b) ¿Xi chiguidúʼyanu lu artículo riʼ?

LU IZA 2018, jma de 223,000 publicador nabeza ndaaniʼ ca guidxi ra bicueeza gobiernu dxiiñaʼ stinu. Qué ridxagayaanu gánnanu ndiʼ, purtiʼ casi bidúʼyanu lu artículo gudiʼdiʼ que zazanándacabe ca ni dxandíʼ xpinni Cristu (2 Tim. 3:12). Zándaca málasi gucueeza gobiernu laanu de gúninu ni ná Jiobá ratiica si nabézanu.

2 Pa gucueeza gobiernu dxiiñaʼ stinu la? zándaca guiníʼ íquenu ca pregunta riʼ: «Ora sanándacabe laanu, ¿ñee riníʼ nga maʼ qué riuulaʼdxiʼ Dios ni rúninu la? ¿Ñee maʼ qué zuni adorarnu Jiobá la? ¿Ñee naquiiñeʼ chindezaʼ sti ladu ra ganda guneʼ ni ná Jiobá la?». Lu artículo riʼ zacábinu ca pregunta ca. Laaca zadúʼyanu ximodo gúninu ni ná Jiobá ora gucueeza gobiernu dxiiñaʼ stinu ne gunáʼ nga ca trampa ni naquiiñeʼ gucáʼnanu.

ORA SANÁNDACABE LAANU, ¿ÑEE RINÍʼ NGA MAʼ QUÉ RIUULAʼDXIʼ DIOS NI RÚNINU LA?

3. Casi ná 2 Corintios 11:23-27, ¿xi guendanagana bidxaagalú apóstol Pablo, ne xi rusiidiʼ ejemplu stibe laanu?

3 Pa gucueeza gobiernu dxiiñaʼ stinu la? zándaca guiníʼ íquenu maʼ qué riuulaʼdxiʼ Dios ni rúninu. Peru cadi zacá diʼ ni. Guiníʼ íquenu ni bizaaca apóstol Pablo. Dxandipeʼ guyuulaʼdxiʼ Jiobá guiráʼ ni bíʼnibe. Bicaabe 14 carta ni zeeda lu ca Escrituras Griegas Cristianas ne gúcabe apóstol ni rié ra nuu binni de xcaadxi guidxi. Peru neca zacá guizáʼ feu modo guzananda binni laabe  (biindaʼ 2 Corintios 11:23-27). Rusiidiʼ ejemplu stiʼ Pablo laanu rudii Jiobá lugar sanándacabe ca xpinni ni ruzuubaʼ stiidxaʼ.

4. ¿Xiñee nanalaʼdxiʼ binni laanu?

4 Bisiene Jesús xiñee zucaalú binni laanu. Laabe guniʼbe zacananalaʼdxiʼ binni laanu purtiʼ cadi nácanu parte de guidxilayú riʼ (Juan 15:18, 19). Ora sanándacabe laanu, qué riníʼ diʼ ni maʼ qué riuulaʼdxiʼ Dios ni rúninu, sínuque rusihuínnini cayúninu ni jneza.

ORA SANÁNDACABE LAANU, ¿ÑEE MAʼ QUÉ ZUNI ADORARNU JIOBÁ LA?

5. ¿Ñee zanda gucueeza binni laanu de gúninu ni ná Jiobá la? Bizeeteʼ ti ejemplu.

5 Qué zanda diʼ gucueeza binni laanu de gúninu ni ná Dios stinu, ni jma napa poder. Maʼ gucalaʼdxiʼ stale de ca enemigu stiʼ Jiobá nucueezacaʼ laanu peru qué huayanda gúnicabe ni. Guxuíʼlunu ni bizaaca lu Segunda Guerra Mundial. Guizáʼ feu modo guzananda ca gobiernu stiʼ stale guidxi ca xpinni Dios. Cadi ca nazi de Alemania si bicueeza dxiiñaʼ stinu, laaca bicueeza gobiernu de Australia, Canadá ne xcaadxi país dxiiñaʼ stinu. Neca zacá guluu Jiobá ndaayaʼ ca xpinni. Dxi bizulú guerra que lu iza 1939, nuu 72,475 publicador lu guidubi naca guidxilayú. Peru caadxi informe ná, ra maʼ ziluxe guerra que lu iza 1945 maʼ nácacabe jma de 156,299 publicador.

6. ¿Xi zabeendunu pa que guidxíbinu ora gucaalúcabe laanu? Bizeeteʼ ti ejemplu.

6 Lugar de guidxíbinu ora gucaalúcabe laanu, zanda gucaani laanu gúninu jma lu xhiiñaʼ Jiobá. Guidúʼyanu xi bizaaca ti guendaxheelaʼ ni napa ti xiiñihuiiniʼ ne nabeza ti lugar ra bicueeza gobiernu xhiiñanu. Qué nidxíbicabe ne gúcacabe precursor regular. Dede bisaana hermana riʼ ti dxiiñaʼ ra riaxa galán. Ne hermanu riʼ guníʼ biyubi binni ganna xi rusiidiʼ ca Testigu. Ne pur laani gúpacabe stale estudiu. Guleendú stale binni cosa galán ora bicueeza gobiernu dxiiñaʼ stinu lugar que. Ti ancianu ni nabeza país riʼ guníʼ bizulú guyé stale de ca ni maʼ bisaana de guni ni ná Jiobá reunión ne biʼniʼ predicarcaʼ sti biaje.

7. a) ¿Xi rusiidiʼ Levítico 26:36, 37 laanu? b) ¿Xi zúniluʼ pa gucueeza gobiernu dxiiñaʼ stinu?

7 Racalaʼdxiʼ ca enemigu stinu guidxíbinu ne maʼ cadi gúninu ni ná Jiobá ora  rucueezacaʼ dxiiñaʼ stinu. Zándaca guiníʼcabe cosa ni cadi dxandíʼ de laanu, guseendacabe puliciá para gudxieenáʼ ra lídxinu, gucaacabe laanu chuunu nezalú autoridad o dede guseguyoocaʼ caadxi de laanu. Ribézacabe guidxíbinu ora guseguyoocabe caadxi de ca hermanu stinu. Pa gudiʼnu lugar guchíbicabe laanu la? zándaca laca laanu gucueezanu laanu de gúninu ni ná Jiobá. Peru qué racaláʼdxinu gácanu casi ca binni ni riete lu Levítico 26:36, 37 (biindaʼ ni). Cadi guidxíbinu ora sanándacabe laanu, purtiʼ pa gúninu ni la? zusaana de gúninu ni ná Jiobá o zaxélenu de laa. Nápanu confianza laabe ne qué zudiʼnu lugar guchibi intiica si cosa laanu (Is. 28:16). Rinábanu Jiobá gabi laanu xi gúninu. Cumu nánnanu racanebe laanu la? qué zanda diʼ gucueeza nin ti gobiernu ni jma nadipaʼ laanu de gácanu fiel Dios stinu (Heb. 13:6).

ORA SANÁNDACABE LAANU, ¿ÑEE NAQUIIÑEʼ CHINDÉZANU STI LADU LA?

8, 9. a) ¿Xi caquiiñeʼ cuí ca xaíque de familia o cada tobi de laanu? b) ¿Xi zacané laanu cuinu gúninu ni jneza?

8 Pa málasi gucueeza gobiernu dxiiñaʼ stinu, zándaca guiníʼ íquenu pa caquiiñeʼ chindézanu sti país ra ganda gúninu ni ná Jiobá. Cada tobi naquiiñeʼ cuí xi guni. Ni zanda gacané caadxi hermanu nga gúʼndacaʼ ni biʼniʼ ca hermanu de primé siglu ora guzanándacabe laaca. Despué de bichácabe guié Esteban, guyé ca discípulo de Jerusalén gadxé gadxé lugar de Judea ne Samaria, ne laaca guyecaʼ Fenicia, Chipre ne Antioquía (Mat. 10:23; Hech. 8:1; 11:19). Peru zándaca gudii ca xpinni Dios de tiempu riʼ cuenta gulí apóstol Pablo guiaana lugar ra bizulú guzanándacabe ca xpinni Cristu. Ne bíʼnibe ni para ganda guni predicarbe ca noticia galán ne cuʼbe gana ca hermanu ni nabeza ndaaniʼ ca guidxi que (Hech. 14:19-23).

9 ¿Xi rizíʼdinu de ca ejemplu riʼ yaʼ? Cada xaíque de familia naquiiñeʼ cuí xi guni. Peru ante gúnibe ni naquiiñeʼ guni orarbe Jiobá ne guʼyaʼ chaahuibe xi caquiiñeʼ familia stibe, ne guiníʼ íquebe xi zándaca guizaaca familia stibe pa chindézacabe sti ladu. Cadi guiaandaʼ laanu cada xpinni Cristu «zuaʼ donda stiʼ» (Gál. 6:5). Nga runi, cadi naquiiñeʼ guni juzgarnu tuuxa pur ni guni.

XIMODO GÚNINU NI NÁ JIOBÁ ORA GUCUEEZA GOBIERNU DXIIÑAʼ STINU

10. ¿Xi instrucción zudii sucursal ne ca ancianu laanu?

10 ¿Ximodo gúninu ni ná Jiobá ora gucueeza gobiernu dxiiñaʼ stinu yaʼ? Zudii sucursal instrucción ne conseju ca ancianu para gánnacaʼ ximodo guicaanu ca información ni caquiiñenu, ximodo gaca ca reunión stinu ne ximodo guni predicarnu. Peru ¿pa qué ganda guiniʼné sucursal ca ancianu yaʼ? Zudii ca ancianu laanu instrucción ni zeeda lu Biblia ne lu ca publicación stinu para cadi gusaana de gúninu ni ná Dios (Mat. 28:19, 20; Hech. 5:29; Heb. 10:24, 25).

11. ¿Xiñee nanna dxíchinu zudii Jiobá guiráʼ ni iquiiñenu para gaca fe stinu jma naguidxi, ne xi zanda gúninu para gápanu cani?

11 Cayuni prometer Jiobá zudii guiráʼ ni caquiiñenu para gaca fe stinu jma naguidxi (Is. 65:13, 14; Luc. 12:42-44). Nga runi nanna dxíchinu zuni organización stibe guiráʼ ni ganda para guicaanu guiráʼ ni caquiiñenu para cadi gusaana de gúninu ni ná Jiobá. Peru laaca naquiiñeʼ gúninu xiixa. Ora guzulú sanándacabe laanu, guyúbinu ti lugar ra gucáʼchinu Biblia ne xcaadxi publicación nápanu.  Naquiiñeʼ gápanu cuidadu para cadi gusaananu ca publicación ni nápanu lu guiʼchiʼ ne lu formatu electrónicu ratiica si, purtiʼ guizáʼ risaca cani. Guiranu naquiiñeʼ guyúbinu xi gúninu para cadi guiráʼ fe stinu.

Zanda gápanu ca reunión stinu sin guidxíbinu purtiʼ cayacané Jiobá laanu. (Biiyaʼ párrafo 12). *

12. ¿Xi zanda guni ca ancianu para gápanu ca reunión stinu sin gudii binni cuenta?

12 ¿Xi zazaaca né ca reunión rápanu guiráʼ semana yaʼ? Zuyubi ca ancianu modo gápanu ca reunión riʼ sin gudii binni cuenta. Zándaca gábicabe laanu gaca reunirnu pur grupuhuiiniʼ ne laaca zándaca gábicabe laanu guchaʼnu lugar ne hora gúninu ni. Peru ¿xi zanda gúninu para cadi chuʼ xquendanabani xcaadxi ra naxoo yaʼ? Zanda guininu chaahuiʼ ora chindanu ne ora guireʼnu lugar ra gaca reunirnu ne cadi gácunu lari ni gusihuinni ziuunu reunión.

Qué zusaana de guni predicarnu neca gucueeza gobiernu dxiiñaʼ stinu. (Biiyaʼ párrafo 13). *

13. ¿Xi zanda guizíʼdinu de ni bizaaca ca hermanu de Unión Soviética?

13 ¿Ñee zusaana de guni predicarnu la? Gadxé gadxé ni zazaaca cada lugar. Peru cumu nadxiinu Jiobá ne riuuláʼdxinu guininu de Reinu stiʼ la? zuyúbinu modo guni predicarnu (Luc. 8:1; Hech. 4:29). Ti historiadora ni láʼ Emily Baran guníʼ ni biʼniʼ ca testigu stiʼ Jiobá de Unión Soviética: «Ora gudxi gobiernu ca Testigu gusaana de guni predicarcaʼ, bizulú guníʼnecaʼ ca vecinu sticaʼ, ca ni runinecaʼ dxiiñaʼ ne ca xhamígucaʼ de ni runi crecaʼ. Ne ora guluucabe laacaʼ cárcel pur biʼniʼ predicarcaʼ, bizulú guníʼnecaʼ ca ni nuu ra cárcel que». Qué nusaana ca hermanu de Unión Soviética de ñuni predicarcaʼ neca gudxi gobiernu laacaʼ cadi gúnicani. Zanda chinándanu ejemplu stiʼ ca hermanu riʼ pa málasi gabi gobiernu laanu cadi guni predicarnu ra nabézanu.

CA TRAMPA NI NAQUIIÑEʼ GUCÁʼNANU

Caquiiñeʼ gánnanu pora cadi naquiiñeʼ guininu. (Biiyaʼ párrafo 14). *

14. Pa chinándanu ni ná Salmo 39:1, ¿xi qué zúninu?

14 Gápanu cuidadu né ni rininu. Ora gucueeza gobiernu dxiiñaʼ stinu, naquiiñeʼ gánnanu nuu «tiempu para cadi guininu» (Ecl. 3:7). Cadi casi ziuunu gundaa ruaanu xiixa información, casi lá ca hermanu stinu, lugar ra raca reunirnu, ximodo runi predicarnu ne ximodo ricaanu ca publicación stinu. Cadi naquiiñeʼ gudiʼnu información riʼ gobiernu, nin ca xhamígunu o familia stinu ni nabeza país ra nabézanu o sti país. Purtiʼ pa gúninu ni zándaca chuʼ xquendanabani ca hermanu stinu ra naxoo (biindaʼ Salmo 39:1).

15. ¿Xi zacalaʼdxiʼ Binidxabaʼ guni, ne xi zanda gúninu para cadi guiábanu lu trampa riʼ?

15 Cadi gudiʼnu lugar guxheleʼ ca guendanagana gápanu laanu. Nanna Binidxabaʼ rixiá ti familia ora nuudinde (Mar. 3:24, 25). Nga runi nuube guchiabe laanu.  Ne ribézabe chuʼdindenenu ca hermanu stinu lugar de chuʼdindenenu laabe.

16. ¿Xi ejemplu galán bisaana hermana Gertrud Poetzinger?

16 Dede ca xpinni Cristu ni maʼ napa stale iza de cayuni ni ná Jiobá naquiiñeʼ gápacaʼ laacaʼ para cadi guiábacaʼ lu trampa riʼ. Guidúʼyanu ni bizaaca Gertrud Poetzinger ne Elfriede Löhr. Ungida guiropaʼ hermana riʼ ne guyuucaʼ ndaaniʼ ti campu de concentración stiʼ ca nazi né xcaadxi hermana. Bizulú gupa Gertrud envidia Elfriede purtiʼ guizáʼ galán modo rudii discursu ni riguu gana xcaadxi hermana ndaaniʼ campu de concentración que. Peru gudiʼdiʼ si tiempu bituílube ne gunábabe Jiobá gacané laabe. Laabe bicaabe: «Naquiiñeʼ gudiʼnu cuenta nuu hermanu runi caadxi cosa ni laanu qué gánnanu gúninu o nápacaʼ xcaadxi responsabilidad que laanu». ¿Xi bíʼnibe para gusaana de guni sentirbe envidia yaʼ? Biiyabe modo naca Elfriede ne ca cualidad galán napa. Zacá guca xhamígacabe sti biaje. Qué ñáticabe ndaaniʼ campu de concentración que ne qué nusaana de ñúnicabe ni ná Jiobá dede dxi biluxe xhiiñacabe ndaaniʼ Guidxilayú riʼ. Pa gúninu stipa pur guni chaahuinu ca guendanagana gápanu né ca hermanu stinu la? qué zudiʼnu lugar guxheleʼ Binidxabaʼ laanu de laacabe (Col. 3:13, 14).

17. ¿Xiñee naquiiñeʼ chinándanu ca instrucción gudiicabe laanu?

17 Chinándanu ca instrucción gudiicabe laanu. Pa chinándanu ni gabi ca hermanu ni napa responsabilidad laanu la? qué zápanu guendanagana (1 Ped. 5:5). Guidúʼyanu ti ejemplu. Ndaaniʼ ti país ra maʼ bicueeza gobiernu dxiiñaʼ stinu, gúdxicabe ca hermanu cadi gusaanacaʼ publicación ora maʼ canayuni predicarcaʼ. Peru qué ñuni ti precursor ni gúdxicabe laa. ¿Xi bizaaca yaʼ? Ti dxi biluxe biʼniʼ predicarbe de manera informal, biʼniʼ interrogar puliciá laabe ne xcaadxi hermanu. Zándaca guzanándacaʼ laacabe ne bitópacaʼ guiráʼ publicación bisaananécabe binni. ¿Xi rizíʼdinu de ni bizaaca hermanu riʼ yaʼ? Naquiiñeʼ chinándanu ca instrucción gudiicabe laanu neca ruluíʼ jma galán ñúninu ni modo rábinu. Zaguu Jiobá ndaayaʼ laanu pa gacanenu ca hermanu ni maʼ gulí para gabi laanu xi gúninu (Heb. 13:7, 17).

18. ¿Xiñee cadi naquiiñeʼ quíxhenu regla ni cadi caquiiñeʼ?

18 Cadi quíxhenu regla ni cadi caquiiñeʼ. Pa guni ca ancianu ndiʼ la? zaca nagana para xcaadxi guni ni ná Jiobá.  Hermanu Juraj Kaminský bisiene xi bizaaca dxi bicueeza gobiernu dxiiñaʼ stinu ra guyuu guidxi Checoslovaquia dxiqué: «Dxi gunaazecabe caadxi hermanu ni napa responsabilidad ne stale ancianu, bizulú gudixhe caadxi hermanu ni runi dirigir ca congregación ne ca circuito regla ni naquiiñeʼ chinanda ca publicador. Bíʼnicaʼ stale lista de ca cosa ni zanda ne ni qué zanda gúnicabe». Qué nudii diʼ Jiobá laanu derechu para cuinu xi naquiiñeʼ guni xcaadxi. Ca ni riguixhe ca tipu regla riʼ qué rápacaʼ ca hermanu, sínuque racaláʼdxicaʼ quíxhecaʼ ni guni crécabe (2 Cor. 1:24).

QUÉ CHUʼ DXI GUSAANA DE GÚNINU NI NÁ JIOBÁ

19. Né ni ná 2 Crónicas 32:7, 8, ¿xiñee naquiiñeʼ gápanu confianza Jiobá neca cucaalú Binidxabaʼ laanu?

19 Binidxabaʼ, enemigu stinu, qué zusaana de sananda ca xpinni Jiobá ni naca fiel (1 Ped. 5:8; Apoc. 2:10). Zacalaʼdxiʼ Binidxabaʼ ne ca xpinni gucueezacaʼ dxiiñaʼ stinu. Peru cadi naquiiñeʼ guidxíbinu (Deut. 7:21). Nuu Jiobá né laanu ne qué zusaana de gacané laanu neca gucueezacabe dxiiñaʼ stinu (biindaʼ 2 Crónicas 32:7, 8).

20. Né ni maʼ bizíʼdinu lu artículo riʼ, ¿xi maʼ gudixhe íqueluʼ gúniluʼ?

20 Chinándanu ejemplu stiʼ ca hermanu de primé siglu, ora gúdxicaʼ ca binni ni runi mandar ca diidxaʼ riʼ: «Laguuya si laatu pa jneza nezalú Dios uzuʼba du stiidxa tu ne cadi uzuʼba du stiidxa Dios. Purti qué zanda usaana du de güi du ni biduʼya du ne ni bina diaga du» (Hech. 4:19, 20).

CANCIÓN sjj 73 Bidii laadu stipa ne valor

^ párrafo 5 ¿Xi gúninu pa gucueeza gobiernu dxiiñaʼ stinu? Lu artículo riʼ zadxélanu caadxi conseju ni zacané laanu para gánnanu xi gúninu ne xi cadi naquiiñeʼ gúninu para cadi guixélenu de Jiobá.

^ párrafo 59 NI RIHUINNI LU FOTO RIʼ: Lu ca foto ca rihuinni caadxi Testigu ni cayuni servir ca lugar ra maʼ bicueeza gobiernu dxiiñaʼ stinu.

^ párrafo 61 NI RIHUINNI LU FOTO RIʼ: Qué zusaana de guni predicarnu neca gucueeza gobiernu dxiiñaʼ stinu.

^ párrafo 63 NI RIHUINNI LU FOTO RIʼ: Caquiiñeʼ gánnanu pora cadi naquiiñeʼ guininu.