Biiyaʼ guiraʼ ni nuu lu sitiu riʼ

guyé lu índice

 HISTORIA STINNEʼ

Ti herencia risaca ni gucané naa guiniiseʼ en sentidu espiritual

Ti herencia risaca ni gucané naa guiniiseʼ en sentidu espiritual

BIÁʼSIPEʼ galaa gueelaʼ, naa ne xcaadxi hermanu zuhuaʼdu ruaa guiiguʼ Níger, ti guiiguʼ xilaga biaʼ ti kilómetru arondaʼ ne guizáʼ reciu cuxooñeʼ nisa stini. Bizaaca ni canieeʼ riʼ tiempu cayaca guerra civil ndaaniʼ guidxi Nigeria, ngue runi ora gudídidu guiiguʼ que guluʼdu xquendanabánidu ra naxoo. Peru caquiiñeʼ gúnidu ni. Ne bínidu ni chupa chonna biaje. Peru ante guinieeʼ xiñee bineʼ ndiʼ la? chigüeniáʼ laatu de bixhozeʼ ne jñaaʼ.

John Mills nga lá bixhozeʼ, ne guyuunísabe lu iza 1913 ndaaniʼ guidxi Nueva York dxi nápabe 25 iza. Hermanu Russell bidii discursu dxi guyuunísabe. Peru gudiʼdiʼ si ti tiempu yendeza bixhozeʼ lu isla stiʼ Trinidad y Tobago, ne raqué bichaganabe Constance Farmer, tobi de ca estudiante de la Biblia ni guizáʼ nadxii Dios ne ungidu guirópacabe. Raqué gucanebe xhamígube William Brown * guluíʼ binni «Foto-Drama de la Creación», ne bíʼnibe ni hasta lu iza 1923, dxi biʼniʼ asignárcabe hermanu Brown ne xheelaʼ chiguni servircaʼ África Occidental. Biaana bixhozeʼ ne jñaaʼ lu isla stiʼ Trinidad y Tobago.

GUNNAXHII BIXHOZEʼ NE JÑAAʼ LAADU

Gupa jñaaʼ ne bixhozeʼ gaʼ xiiñiʼ. Primé que biree lá Rutherford, pur hermanu ni naca presidente stiʼ Sociedad Watch Tower. Despué guleʼ, 30 de diciembre iza 1922. Gulee lácabe naa Woodworth (de cariñu gúdxicabe naa Worth) pur hermanu Clayton Woodworth, director stiʼ The Golden Age (ni yanna runibiaʼnu casi revista ni láʼ ¡Gutaná!). Guiradu guyuudu scuela biaʼ caquiiñeʼ si, peru jma guluucabe gana laadu gápadu meta espiritual. Gupa jñaaʼ ti habilidad guizáʼ galán, ora ruundanebe laadu ti textu de lu Biblia rucaabe laadu guni meditardu ni ná ni. Ne bixhozeʼ la? guizáʼ riuulaʼdxiʼ güiné laadu ca historia zeeda lu Biblia, ne rúnibe stale gestu para gucaabe laadu guxuíʼludu ni cayaca lu historia ca.

Guizáʼ gucané guiráʼ ni bíʼnicabe laadu. Chonna de gaayuʼ xiiñicabe hombre guyuudu Scuela stiʼ Galaad ne chonna de ca bizaʼnaʼ gúcacaʼ precursora stale iza lu isla stiʼ Trinidad y Tobago. Pur guiráʼ ni bisiidiʼ bixhozeʼ ne jñaaʼ laadu ne pur ejemplu sticaʼ gucanecaʼ laadu guiniisidu en sentidu espiritual ne zacá beeda gácadu casi ti yagahuiiniʼ ni bizuhuaacabe «ra lidxi Jiobá» casi ná Salmo 92:13.  Ánimo bisihuínnicabe gucané ni laadu casi ñaca nibeedu guieʼ «lu patiu stiʼ Dios stinu».

Tiempu que, raca reunir ca precursor que ra lidxeʼ para guireecaʼ predicación ne gatigá ruzeetecaʼ de ti hermanu láʼ George Young, ti misioneru de Canadá ni yeganna Trinidad y Tobago. Ne bixhozeʼ ne jñaaʼ nabé ruzeetecaʼ de ca compañeru gúpacaʼ dxiqué, casi hermanu Brown ne xheelaʼ, para tiempu que nuu ca hermanu riʼ África Occidental. Guiráʼ ndiʼ gucané naa guneʼ predicar dxi napa chii iza.

CA PRIMÉ COSA BIDXAAGALUÁʼ DXI BINEʼ SERVIR JIOBÁ

Tiempu que nabé bizeeteʼ ca revista stinu ca cosa ni cadi jneza ni runi ca religión falsu, ni runi ca empresa ni rachelú gapa jma ne ca gobiernu corrupto. Cumu bidxiichi ca xaíque yuʼduʼ la? lu iza 1936 bicaa xaíque yuʼduʼ que sustituto stiʼ gobernador de Trinidad y Tobago guni prohibir ca publicación stiʼ Watch Tower. Bicáʼchidu ca publicación que, peru gúndaruʼ biquiiñedu cani dede ra birá cani. Bínidu marcha de información ne desfile lu bicicleta ra yenedu tratadu ne letreru. Ne laaca guyé ti grupu de hermanu de Tunapuna lu marcha que, ziyuni predicarcaʼ lu ti carru ni nuu ti bocina ique, ne yendadu dede ca lugar jma zitu ni nuu lu isla que. Cumu guizáʼ galán ambiente espiritual que, gucané ni naa chuaanisaʼ dxi napaʼ 16 iza.

Zuhuaa ti grupu de hermanu de Tunapuna cueʼ ti carru dxiʼbaʼ ti bocina ique.

Herencia espiritual ni bidii familia stinneʼ naa ne guiráʼ ni gudídidu bicaa ni naa gapaʼ deseu de gacaʼ misioneru. Lu iza 1944 guyaaʼ lu isla stiʼ Aruba para guneʼ predicarniaʼ hermanu Edmund Cummings, para dxiqué náparuaʼ gana gacaʼ misioneru. Guizáʼ biéchedu stale purtiʼ guyé chii binni dxi guca Conmemoración raqué lu iza 1945. Sti iza que guyuu primé congregación raqué.

Naa ne Oris gúpadu stale experiencia guizáʼ galán.

Ti tiempu despué bineʼ predicar ti baʼdudxaapaʼ runeniáʼ dxiiñaʼ ni láʼ Oris Williams. Guizáʼ biʼniʼ defenderbe ca doctrina ni bisiidicabe laabe. Peru ra biʼniʼ estudiarbe Biblia, biziidibe xipeʼ rusiidiʼ Stiidxaʼ Dios ne guyuunísabe 5 de enero iza 1947. Ra gudiʼdiʼ tiempu guca enamorardu ne bichaganadu. Lu beeu noviembre iza 1950 gúcabe precursora. Gúpadu stale experiencia guizáʼ galán.

GUIZÁʼ EMOCIONANTE NI BIDXAGALUDU DXI BIʼNIʼ SERVIRDU DIOS GUIDXI NIGERIA

Lu iza 1955 biʼniʼ invitárcabe laadu Scuela stiʼ Galaad, ngue runi bisaanadu dxiiñaʼ stidu, bitoʼdo lídxidu ne bireʼdu de Aruba. Guyuudu clase 27 de Scuela stiʼ Galaad ne guca graduardu 29 de julio iza 1956 ne de raqué biʼniʼ asignárcabe laadu Nigeria.

Familia Betel de Lagos (Nigeria) iza 1957.

Ti tiempu despué bietenalaʼdxiʼ Oris guiráʼ ni gudídidu que ne guníʼ: «Espíritu stiʼ Jiobá nga racané ca misioneru para gudxiilucaʼ ca guendanagana sticaʼ. Xheelaʼ la? maca xadxí napa gana gaca misioneru, peru naa la? coʼ. Ni jma gucuá iqueʼ nga gapaʼ xiiñeʼ ne gapaʼ ti lidxeʼ. Peru bichaa ni cá iqueʼ guneʼ ora bieneʼ pabiáʼ caquiiñeʼ ganna binni ca diidxaʼ stiʼ Reinu. Ngue runi dxi guca graduardu jma gucuaa iqueʼ gacaʼ misionera. Ora chichíbadu lu barcu ni láʼ Queen Mary, bidxiña Worth Thornton laadu, hermanu ni biʼniʼ dxiiñaʼ ra oficina stiʼ hermanu Knorr ne gudxi laadu sicarú chuudu ne laaca gudxi laadu chiguni servirdu Betel. Guyuaaʼ triste purtiʼ cadi ngue diʼ nga ni cabezaʼ. Peru nin qué nindaa gucaʼ adaptar asignación bidiicabe naa ne guizáʼ guyuuladxeʼ ni. Dxi maʼ nuaaʼ Betel la? gadxé gadxé dxiiñaʼ bineʼ. Tobi de ca dxiiñaʼ ni jma bineʼ disfrutar nga dxi bineʼ de recepcionista. Riuuladxeʼ güeniáʼ binni diidxaʼ ne pur dxiiñaʼ que randa rueniáʼ ca hermanu de Nigeria diidxaʼ. Stale de laacabe rindácabe Betel názecabe yú, maʼ bidxágacabe ne candaanacabe. Guizáʼ riuuladxeʼ gacaniáʼ ca hermanu que purtiʼ zaqué nga cudieeʼ ti servicio sagradu Jiobá, ngue runi guizáʼ rusiecheʼ dxiiñaʼ que naa». Ya, guiráʼ asignación ni gucuaadu gucané ni laadu guiniisidu en sentidu espiritual.

Lu iza 1961 lu isla stiʼ Trinidad y Tobago, lu ti reunión familiar guniʼné hermanu Brown laadu caadxi de ca experiencia galán ni gupa dxi biʼniʼ servir África. Ne óraque gudxeʼ laabe pabiáʼ maʼ biroobaʼ xhiiñaʼ Dios ndaaniʼ guidxi Nigeria. Gudixhenáʼ hermanu Brown xayanneʼ ne gúdxibe bixhozeʼ: «Johnny, qué ñuu dxi ñeluʼ África, peru Woodworth huaxa maʼ guyé». Óraque ná bixhozeʼ: «Galán dxiiñaʼ cayúniluʼ Worth, galán dxiiñaʼ cayúniluʼ». Ánimo ni bidii ca binni ni zeeda gaca casi ti  gigante en sentidu espiritual naa jmaruʼ si bicaa ni naa guneʼ jma lu xhiiñaʼ Jiobá.

William Brown (ni binibiáʼcabe casi Brown el de la Biblia) ne xheelabe Antonia nabé guluucabe gana laadu.

Lu iza 1962 gupaʼ privilegiu chaaʼ clase 37 de Scuela stiʼ Galaad ra gucuaaʼ capacitación chii beeu. Hermanu Wilfred Gooch ni naca superintendente de sucursal ndaaniʼ guidxi Nigeria, guyé clase 38 ne biʼniʼ asignárcabe laabe Inglaterra, ngue runi biʼniʼ asignárcabe naa lugar stibe. Yenandaʼ ejemplu stiʼ hermanu Brown, ngue runi bineʼ viajar stale lugar, ne zaqué gunda binebiaʼyaʼ stale hermanu de guidxi que ne gunnaxhieeʼ laacaʼ. Neca qué gápacabe stale cosa material ni napa xcaadxi guidxi ni jma napa bueltu, peru guizáʼ nayecheʼ nabánicabe ne ndiʼ rusihuinni cadi caquiiñeʼ gapa binni stale bueltu o stale cosa material para guibani nayecheʼ. Neca zaqué circunstancia stícabe la? guizáʼ ridxagayaaʼ ora ruuyaʼ laacabe ra reunión nayácabe ne zuchaahuicabe. Stale de laacabe riécabe asamblea lu camión o lu bolekajas, * ti tipu carru ni zuxeleʼ ni nabé común lugar que. Ca tipu carru riʼ cá jma frase cueʼ cani casi: «Caquiiñeʼ stale gotahuiiniʼ nisa para gaca ti océano».

¡Dxandíʼ ni ná ca diidxaʼ riʼ! Purtiʼ risaca stipa ni runi cada tobi de laanu ne cada tobi rudii biaʼ zanda gudii. Lu iza 1974 beeda gaca Nigeria guiropa país ni napa 100,000 publicador despué de Estados Unidos. Bihuinni dxíchica caroobaʼ dxiiñaʼ que.

Tiempu caroobaʼ dxiiñaʼ que, bizulú guerra civil ndaaniʼ guidxi Nigeria, ne guca ni lu iza 1967 hasta 1970. Ca hermanu de Biafra ni nabeza ruaa guiiguʼ Níger ladu oriente, maʼ qué ñápacaʼ contactu né sucursal biaʼ chupa chonna beeu. Qué niguiidxinadu, napa xidé chinedu alimentu espiritual ra nuucabe. Nga runi casi bizeeteʼ ra bizulunu que, gudídidu guiiguʼ que chupa chonna biaje, biʼniʼ orardu ne gúpadu stale confianza zacané Jiobá laadu.

Ora rietenalaʼdxeʼ cani bizaaca que ruluíʼ neegueʼ bizaaca cani. Nabé guyuu peligru: soldadu ni rucuaagu pur intiica cosa, guendahuará... Cada biaje tiididu ndaaniʼ guiiguʼ que riguʼdu xquendanabánidu ra naxoo. Guizáʼ nagana para tiididu raqué pur ca soldadu federal ni cayapa raqué purtiʼ runi sospecharcaʼ de intiica cosa. Peru jma nagana para tiididu lu territorio stiʼ Biafra. Ti gueelaʼ, bireeʼ de guidxi Asaba ne gudideʼ guiiguʼ que lu ti canuá para chaaʼ Onitsha ne laaca guyaaʼ Enugu para cuaaʼ gana ca superintendente ni nuu raqué. Sti biaje guyaaʼ yenduaaʼ gana ca ancianu de Aba, lugar que nuu prohibidu gucaaguí binni biaaniʼ huaxhinni. Dxi nuudu ndaaniʼ guidxi Port Harcourt, nagueendaca bínidu ti oración para guilúxedu ti reunión, purtiʼ maʼ gudiʼdiʼ ca soldadu federal lade ca soldadu stiʼ Biafra, cani nuu fuera de guidxi Port Harcourt.

Gucané ca reunión que ca hermanu para gusietenalaʼdxiʼ ni laacaʼ nadxii ne cayapa Jiobá laacaʼ, ne para guicaacaʼ conseju ni gacané laacaʼ gácacaʼ neutral ne chuʼcaʼ tobi si. Guca ca hermanu de Nigeria fiel neca gudíʼdicaʼ ra nagana. Qué ñacananaláʼdxisaa ca hermanu casi runi ca xcaadxi tribu, sínuque bisihuínnicaʼ guendarannaxhii ne guyuucaʼ tobi si. Ti privilegiu naroʼbaʼ gupaʼ purtiʼ guyuaaʼ gaxha de laacabe dxi gudíʼdicabe ca prueba que.

Lu iza 1969, guca hermanu Milton Henschel presidente stiʼ Asamblea Internacional ni biree lá “Paz en la Tierra” ni guca ndaaniʼ Estadio de los Yankees (Nueva York). Naa gucaʼ ayudante stiʼ hermanu que ne biziideʼ stale cosa de laabe. Galán experiencia que purtiʼ lu iza 1970 guca sti Asamblea Internacional ni biree lá “Hombres de Buena Voluntad” ndaaniʼ guidxi Lagos (Nigeria). Cadi fácil para gaca ti asamblea despué de biluxe ti guerra, gunda guca ni purtiʼ gucané Jiobá laadu. Guyé 121,128 binni ne guca ni lu 17 idioma, ti cosa ni qué huayuu dxi gaca. Yendá hermanu Knorr, hermanu Henschel ne xcaadxi hermanu lu caadxi avión ni guca rentar ni biree de Estados Unidos ne Inglaterra, biiyacabe ra guyuunisa 3,775 binni, ti cosa ni qué huahuinni dede lu Pentecostés iza 33. Qué huayuu dxi guneʼ dxiiñaʼ biaʼ bineʼ dxi guca organizar asamblea que. Guizáʼ nagueenda bidale publicador tiempu que.

Lu asamblea Internacional “Hombres de Buena Voluntad” ra guyé 121,128 binni ne guca ni lu 17 idioma, tobi de ca idioma que nga ibo.

Lu jma de treinta iza gulezaʼ ndaaniʼ guidxi Nigeria, guyuu biaje bineʼ servir de superintendente viajante ne superintendente de zona ndaaniʼ guidxi África Occidental. Nabé bidii ca misioneru que xquíxepeʼ naa ora riguaaʼ gana cada tobi de laacaʼ.  Guizáʼ riuuladxeʼ gusietenalaʼdxeʼ laacabe qué huasiaandaʼ Jiobá laacabe. Dxiiñaʼ que bisiidiʼ ni naa caquiiñeʼ guizaaláʼdxinu ca hermanu para guni servircaʼ Jiobá ne para chuʼ organización stiʼ Dios tobi si ne nadipaʼ.

Gunda bidxíʼludu ca guendahuará ne ca guendanagana stiʼ guerra civil que purtiʼ gucané Jiobá laadu. Siempre bíʼyadu ndaayaʼ stiʼ Jiobá. Oris guníʼ:

«Stale biaje guca huaradu de malaria (paludismo). Ti biaje maʼ cadi cudii Worth cuenta ora yendánedu laa ra hospital de Lagos. Gúdxicabe naa zándaca qué zalabe, peru biándabe. Ora bibánibe guníʼnebe señor Nwambiwe de Reinu stiʼ Dios, enfermeru ni cayuni tender laabe. Despué yegánnadu Nwambiwe para gusíʼdidu laa jma de Biblia. Gúcabe Testigu ne beeda gácabe ancianu de congregación ndaaniʼ guidxi Aba. Naa laaca gucaniáʼ caadxi binni, dede né caadxi musulmán para gúnicaʼ xhiiñaʼ Jiobá né stale gana. Guizáʼ biʼniʼ disfrutardu ra binibiaʼdu ne gunnaxhiidu ca hermanu de Nigeria, cultura, costumbre ne idioma sticaʼ».

Ndiʼ nga stiʼ cosa ni bizíʼdidu: para gápadu éxito ora chiguni servirdu sti guidxi la? naquiiñeʼ gannaxhiidu ca hermanu neca de gadxé gadxé cultura laacaʼ.

XCAADXI ASIGNACIÓN

Lu iza 1987, bichaacabe laadu de asignación. Bisaanadu de guni servirdu Betel ni nuu Nigeria para chiguni predicardu lu ti isla sicarú ni nuu lu caribe ni láʼ Santa Lucía. Guizáʼ galán asignación que peru bidxaagaludu caadxi guendanagana. Ca hombre de África la? richaganacaʼ stale gunaa, peru ca binni de Santa Lucía la? ribezanésicaʼ pareja sticaʼ sin guichaganacaʼ. Nabé gucané poder ni napa Stiidxaʼ Dios stale de ca estudiante stidu para bichaacaʼ.

Gunnaxhieeʼ Oris de guidubi ladxiduáʼ sesenta y ocho iza biaʼ tiempu bindaa guendaxheelaʼ stidu.

Ra zidiʼdiʼ ca iza ca la? zixiéʼ stipa stidu. Nga runi, pur nachaʼhuiʼ Grupu ni Zaniruʼ, lu iza 2005 biʼniʼ asignárcabe laadu Brooklyn (Nueva York). Ne lu iza 2015 guti Oris, ne qué zanda gusieneʼ pabiáʼ naná yuubaʼ bisaanabe. Guiráʼ dxi rudieeʼ xquíxepeʼ Jiobá pur laabe. Gúcabe ti buena compañera ne ti gunaa cariñosa. Gunnaxhieeʼ laabe de guidubi ladxiduáʼ sesenta y ocho iza biaʼ tiempu bindaa guendaxheelaʼ stidu. Bidiʼdu cuenta para chuʼdu nayecheʼ lu guendaxheelaʼ stidu ne ndaaniʼ congregación, naquiiñeʼ guni respetardu autoridad, guni perdonardu, gácadu humilde ne gusihuínnidu ca cualidad ni rudii espíritu.

Ora guca decepcionardu ne ora guca desanimardu la? gunábadu Jiobá cuʼ ndaayaʼ ca sacrificiu stidu. Qué nusaana de ñuni moldearbe laadu ne bidúʼyadu modo guca chaahuiʼ ca guendanagana stidu. Ne maʼ cadi candaa zadúʼyanu gaca guiráʼ cosa galán (Is. 60:17; 2 Cor. 13:11).

Lu isla stiʼ Trinidad y Tobago, guluu Jiobá ndaayaʼ dxiiñaʼ biʼniʼ bixhozeʼ ne jñaaʼ ne xcaadxi hermanu. Según ca informe jma nacubi maʼ nuu 9,892 testigu stiʼ Jiobá lugar ca. Lu isla stiʼ Aruba, stale hermanu gucané para guca fortalecer primé congregación ra bineʼ servir. Ne yanna maʼ nuu 14 congregación ni cayuni xhiiñaʼ Dios né stale ganna lu isla riʼ. Ne ndaaniʼ guidxi Nigeria, maʼ nuu 381,398 publicador. Ne lu isla stiʼ Santa Lucía maʼ nuu 783 binni ni cayuni apoyar Reinu stiʼ Jiobá.

Maʼ napaʼ jma de 90 iza. Salmo 92:14 ná ca binni ni zeeda gaca casi yagahuiiniʼ ra lidxi Jiobá «neca maʼ bióʼxhocaʼ, zacaruʼ guieʼ lucaʼ». Nuaaʼ nayecheʼ pur ca iza de serviciu ni maʼ bidieeʼ Jiobá. Herencia espiritual bisaananécabe naa maʼ bidii ni stipa naa para guneʼ servir Jiobá de guidubi ladxiduáʼ. Amor leal stibe maʼ gucané ni naa gacaʼ casi ti yagahuiiniʼ ni cabee guieʼ lu patiu stibe (Sal. 92:13).

^ párrafo 5 Biindaʼ historia stiʼ hermanu William Brown, ni láʼ «Lo llamaban Brown el de la Biblia», ni zeeda lu Anuario 2014, yaza 100 ne 101.

^ párrafo 18 Biindaʼ revista ¡Despertad! 22 de junio iza 1972, yaza 24 hasta 26.