Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 6

Gácanu binni de integridad

Gácanu binni de integridad

«¡Qué zusaanaʼ integridad stinneʼ dede ra gateʼ!» (JOB 27:5).

CANCIÓN sjj 34 Qué lica zucheeniáʼ lii

NI ZAZÍʼDINU *

1. ¿Ximodo bisihuinni guionnaʼ Testigu ni bizéʼtenu lu párrafo riʼ leal laacaʼ né Jiobá?

GUXUÍʼLUNU guionnaʼ ejemplu riʼ. Nuu ti baʼdudxaapaʼ ra scuela ne canabaʼ maestru stiʼ laa ne ca compañeru stiʼ guni participarcaʼ lu ti celebración ni nánnabe qué riuulaʼdxiʼ Dios. Nga runi né respetu rábibe maestru stibe qué zuni participarbe. Canayuni predicar ti joven ora bidii cuenta sti yoo que nga ra lidxi ti compañeru de clase ni runi burla ca testigu stiʼ Jiobá. Neca tímidu laabe riebe ne ruxhidxinabe ra puertaʼ que. Nuu ti padre de familia ra dxiiñaʼ ne canabaʼ jefe stiʼ laa guni ti cosa ni ná ley cadi jneza. Neca nánnabe zanda gunítibe dxiiñaʼ stibe, rusiénebe jefe stibe honradu laabe ne rúnibe ni ná ley purtiʼ nga nga ni ribeza Dios guni ca xpinni (Rom. 13:1-4; Heb. 13:18).

2. ¿Gunáʼ nga ca pregunta ni zacábinu lu artículo riʼ, ne xiñee?

2 ¿Xi cualidad zanda guininu rusihuinni guionnaʼ Testigu ni cuzéʼtenu lu ejemplu riʼ yaʼ? Ñándaca nuzéʼtenu caadxi, casi valor ne honradez. Peru nuu tobi ni jma rihuinni ne rucaa ni laacabe gúnicabe ni cayúnicabe, laani nga integridad. Guirácabe rúnicabe stipa para cadi gucheenécabe Jiobá ne gúnicabe ni ná ca norma stiʼ. Nuunu seguru riecheʼ ladxidóʼ Jiobá pur cada tobi de laacabe. Laanu laca racaláʼdxinu gusiéchenu ladxidóʼ Bixhózenu ni nuu guibáʼ. Nga runi, guicábinu ca pregunta riʼ: ¿Xi riníʼ gaca tuuxa ti binni íntegro? ¿Xiñee risaca gácanu íntegro? ¿Ne ximodo zanda gúninu deseu stinu de gácanu íntegro jma nadipaʼ ca dxi nagana riʼ?

XI RINÍʼ GACA TUUXA TI BINNI ÍNTEGRO

3. a) ¿Xi riníʼ gaca tuuxa ti binni íntegro? b) ¿Gunáʼ nga ca ejemplu ni zacané laanu guiénenu xi riníʼ gaca tuuxa ti binni íntegro?

3 Gaca tuuxa ti binni íntegro nga gannaxhii Jiobá ne  qué chuʼ dxi gusaana de guni adorar laabe ne guni ni riuuláʼdxibe siempre. Lu Biblia, diidxaʼ hebreu ni raca traducir «integridad» riquiiñeʼ ni ora caníʼcabe de ti cosa completu, enteru o nazaaca. Guzéʼtenu ti ejemplu. Ley que ná ora chigudii ca israelita ti maniʼ para sacrificiu, naquiiñeʼ gudiicaʼ tobi ni nazaaca (Lev. 22:21, 22). * Qué zanda diʼ gudii ca xpinni Dios que ti maniʼ ni cayaadxaʼ ti chú ñee, ti diaga, ti guielú, o tobi ni huará. Para Jiobá la? nabé risaca gaca maniʼ que completu ne nazaaca (Mal. 1:6-9). ¿Xiñee racalaʼdxiʼ Jiobá gaca guiráʼ ni gudiʼnu laa completu yaʼ? Guzéʼtenu ti ejemplu ni zacané laanu guiénenu ni. Ora rizinu ti cuananaxhi, qué racaláʼdxinu guicaanu tobi ni maʼ napa huecu o ni cayaadxaʼ ti pedazu. Racaláʼdxinu guicaanu tobi enteru ne nazaaca. Zacaca nga rizaaca né guendarannaxhii ne lealtad ni nápanu Jiobá. Racaláʼdxibe gaca ni completu o íntegro.

4. a) Bisiene xiñee cadi caquiiñeʼ gácanu perfectu para gácanu íntegro. b) Casi ná Salmo 103:12-14, ¿xi qué ribeza Jiobá de laanu?

4 Cumu nánnanu imperfectu laanu ne rucheʼnu stale biaje la? zándaca guinabadiidxanu laca laanu: «¿Ñee naquiiñeʼ gácanu perfectu para gácanu ti binni íntegro la?». Coʼ. Guidúʼyanu chupa razón. Primé, purtiʼ cadi ra cuchéʼsinu cayuuyaʼ Jiobá. Stiidxabe ná: «Pa ra cuchee si binni nga ñuuyaluʼ la? Jah, Jiobá, ¿tuu nga nuzuhuaa nezaluluʼ yaʼ?» (Sal. 130:3). Nánnabe imperfectu laanu ne rucheʼnu, ne runi perdonarbe laanu de guidubi ladxidoʼbe (Sal. 86:5). Guiropa, purtiʼ nanna Jiobá xi zanda ne xi qué zanda gúninu ne qué ribézabe gudiʼnu jma de ni qué zanda (biindaʼ Salmo 103:12-14). Yanna, ¿ximodo zanda gácanu ti binni completu o íntegro nezalube yaʼ?

5. ¿Xiñee zanda guininu guendarannaxhii nga ni jma caquiiñenu para gácanu binni íntegro?

5 Ni jma caquiiñenu para gácanu ti binni íntegro nga guendarannaxhii. Guendarannaxhii ne lealtad ni nápanu Jiobá, Bixhózenu ni nuu guibáʼ, naquiiñeʼ gaca cani completu. Pa qué guiete lu guendarannaxhii stinu ora tiidinu prueba la? zahuinni nácanu binni íntegro (1 Crón. 28:9; Mat. 22:37). Guiníʼ íquenu lu ejemplu stiʼ guionnaʼ Testigu zeeda lu primé párrafo que. Nánnanu qué racalaʼdxiʼ baʼdudxaapaʼ que gaca aburrir ra scuela, qué naʼ joven que gusituícabe lú ora maʼ cayuni predicar ne qué racalaʼdxiʼ padre de familia que guniti dxiiñaʼ stiʼ. Yanna, ¿xiñee rúnicabe ni cayúnicabe ca yaʼ? Purtiʼ nánnacabe jneza ca norma stiʼ Jiobá ne ni jma racaláʼdxicabe nga gusiéchecabe Bixhózecabe ni nuu guibáʼ. Cumu nadxiicabe Jiobá la? rucaa ndiʼ laacabe gúʼyacabe xi riníʼ íquebe primeru ante guicaacabe ti decisión. Zacá rusihuínnicabe binni íntegro laacabe.

XIÑEE NABÉ RISACA GÁCANU BINNI ÍNTEGRO

6. a) ¿Xiñee nabé risaca gaca cada tobi de laanu binni íntegro? b) ¿Ximodo bisihuinni Adán ne Eva cadi binni íntegro laacaʼ?

6 ¿Xiñee nabé risaca gaca cada tobi de laanu binni íntegro yaʼ? Purtiʼ maʼ biʼniʼ desafiar Binidxabaʼ Jiobá ne cada tobi de laanu. Ndaaniʼ jardín de Edén que, beeda gaca ángel rebelde riʼ Binidxabaʼ, ni riníʼ «tobi ni rucaalú». Biʼniʼ biidibe lá sicarú napa Jiobá ora bicaabe binni guiníʼ ique naca Jiobá ti gobernante malu, egoísta ne cadi jneza guiráʼ ni runi. Triste guininu ni peru guyuu Adán ne Eva pur Binidxabaʼ ne bidxiidéchecaʼ Dios (Gén. 3: 1-6).  Dxi nabánicabe ndaaniʼ jardín de Edén que, gúpacabe stale oportunidad para ñúnicabe guendarannaxhii ni nápacabe Jiobá jma naguidxi. Peru ora bidxiideche Binidxabaʼ Jiobá, bisihuinni Adán ne Eva cadi completu o íntegro guendarannaxhii ni runi sentircaʼ pur Jiobá. Gudiʼdiʼ si stale tiempu, ca dxi nabani Job, guluu Binidxabaʼ sti duda: ¿Ñee ziuu binni ni gaca leal né Jiobá pur nadxiicaʼ laabe la? Laaca zanda guininu ni sicaríʼ, ¿ñee zanda gaca binni íntegro la?

7. Casi ná Job 1:8-11, ¿ximodo biiyaʼ Jiobá integridad stiʼ Job, ne ximodo biiyaʼ Binidxabaʼ ni?

7 Laaca tiempu guyuu ca israelita que Egipto nga bibani Job. Ca dxi que guirútiruʼ ñaca íntegro cásica laabe. Dxandíʼ, imperfectu laabe ne bicheebe, cásica guiranu. Peru gunnaxhii Dios laabe pur integridad stibe. Zándaca maca biʼniʼ desafiar Binidxabaʼ Jiobá ora guníʼ qué zanda gaca binni íntegro. Ngue runi gudxi Dios laabe guyadxibe Job. Modo nabani Job bisihuinni rusiguii Binidxabaʼ. Óraque nga gunabaʼ Binidxabaʼ Jiobá gudii lugar gutiidiʼ integridad stiʼ Job prueba. Cumu napa Jiobá confianza Job, xhamigu la? bidii lugar gutiidiʼ Binidxabaʼ integridad stibe prueba (biindaʼ Job 1:8-11).

8. ¿Ximodo bicaalú Binidxabaʼ Job?

8 Nabé malu Binidxabaʼ ne ruuti binni. Gúxhabe guiráʼ ni napa Job: xpueltu, ca siervu stiʼ ne reputación sicarú stiʼ. Ne laaca biitibe chii xiiñiʼ Job, cani guizáʼ nadxii. Ne de raqué bicaabe Job ti guendahuará nabé feu ni gundisaʼ guiʼdxuʼ guidubi ladi. Tantu nuu xheelaʼ Job xizaa ne qué guidxela xi guni pur yuubaʼ cadíʼdibe que dede  gudxi laabe gusaanabe Dios, cúʼdibe laa ne gátibe. Gunabaʼ Job ñati, peru qué nusaana de ñaca íntegro. Óraque bicaalú Binidxabaʼ Job de sti modo. Biquiiñebe chonna xhamigu Job, ni yeganna laa chupa chonna dxi peru qué niguixhedxicaʼ ladxidoʼbe. Lugar de nga la? laga gúdxicaʼ laabe jma diidxaʼ ne guizáʼ feu modo biʼniʼ criticarcaʼ laabe. Guniʼcaʼ Dios ngue cutiidiʼ laabe guiráʼ ca yuubaʼ que ne qué rizaalaʼdxiʼ pa gácabe íntegro o pa coʼ. Dede bicaacaʼ laabe guiníʼ íquebe nácabe ti binni malu ne runi merecerbe guiráʼ ni cadíʼdibe que (Job 1:13-22; 2:7-11; 15:4, 5; 22:3-6; 25:4-6).

9. ¿Xi qué niná Job ñuni neca cadiʼdiʼ lu stale guendanagana?

9 ¿Xi biʼniʼ Job ora cadiʼdiʼ guiráʼ guendanagana que yaʼ? Cumu cadi perfectu laabe la? bidxiichibe ne gudindenebe ca hombre ni ná zitixhedxí ladxidoʼbe que ne guniʼbe caadxi cosa sin niníʼ íquebe, peru despué bidiibe cuenta cadi jneza ni. Guniʼbe jma jneza ni rúnibe que ni runi Dios (Job 6:3; 13:4, 5; 32:2; 34:5). Peru dede né ora cadíʼdibe ra jma nagana, qué ninabe nudxiidéchebe Jiobá. Qué ñuni crebe ni guníʼ cani ná xhamigu laabe, purtiʼ cadi dxandíʼ ni. Ne guniʼbe: «¡Qué chuʼ dxi guiníʼ íquetu zanieeʼ rúnitu ni jneza! ¡Qué zusaanaʼ integridad stinneʼ dede ora gateʼ!» (Job 27:5). Né ca diidxaʼ risaca riʼ bisihuínnibe qué zusaana de gácabe ti binni íntegro neca guizaaca intiica cosa. Qué lica nireebe gana, ne laanu laaca zanda gúninu zacaca.

10. ¿Xi relación napa cada tobi de laanu né duda gundisaʼ Binidxabaʼ luguiáʼ Job?

10 ¿Xi relación napa cada tobi de laanu né duda ni gundisaʼ Binidxabaʼ luguiáʼ Job que yaʼ? Laabe nabe cadi dxandíʼ nadxiinu Jiobá, ne zusaana de guni servirnu laa pur gulanu xquendanabáninu ne cadi dxandíʼ diʼ binni íntegro laanu (Job 2:4, 5; Apoc. 12:10). ¿Ximodo runi sentirnu pur nga yaʼ? ¿Cadi dxandíʼ runiná ni laanu la? Peru guiníʼ íquenu ndiʼ: guizáʼ napa Jiobá confianza laanu dede rudii lugar gutiidiʼ Binidxabaʼ laanu prueba para gudii laanu oportunidad de gusihuínninu nácanu binni íntegro ne rusiguii Binidxabaʼ. Ne cadi ngasi, maʼ biʼniʼ prometer Dios zacané laanu gácanu íntegro (Heb. 13:6). ¡Aque naroʼbaʼ ndaayaʼ nga gánnanu napa Rey stiʼ universu confianza laanu! ¿Xiñee risaca gácanu íntegro yaʼ? Purtiʼ zacá zusihuínninu cadi dxandíʼ cani maʼ guníʼ Binidxabaʼ, zuni defendernu lá Jiobá ne zaninu jneza modo runi mandar Bixhózenu ni nuu guibáʼ. Yanna, ¿xi zanda gúninu para gaca deseu ni nápanu de gácanu íntegro jma naguidxi yaʼ?

XI ZANDA GÚNINU PARA GÁCANU BINNI ÍNTEGRO CA DXI RIʼ

11. ¿Xi zanda guizíʼdinu de ejemplu stiʼ Job?

11 Jma maʼ nadipaʼ modo cucaalú Binidxabaʼ ca xpinni Dios lu ca últimu dxi nagana riʼ (2 Tim. 3:1). Nga runi, ¿xi zanda gúninu para gaca deseu ni nápanu de gácanu íntegro jma naguidxi ca dxi riʼ yaʼ? Guidúʼyanu xi sti cosa zanda guizíʼdinu de ejemplu stiʼ Job. Stale iza ante tiidibe ca prueba que, maca bisihuínnibe nácabe ti binni íntegro xcaadxi biaje. Guidúʼyanu chonna cosa ni bíʼnibe ne ximodo zanda chinándanu ejemplu stibe.

¿Gunáʼ nga caadxi cosa ni zacané laanu gúninu deseu stinu de gácanu íntegro jma nadipaʼ? (Biiyaʼ párrafo 12). *

12. a) Casi ná Job 26:7, 8, 14, ¿xi bicaa Job guidxagayaa ne guni respetar Jiobá? b) ¿Xi zacané laanu guidxagayaanu guiráʼ ni bizáʼ Dios?

12 Bíʼnibe guendarannaxhii ni nápabe Dios jma naguidxi ora bidxagayaabe guiráʼ ni bizáʼ. Gulee Job tiempu para guiníʼ ique guiráʼ ca cosa galán ni bizáʼ Jiobá (biindaʼ Job 26:7, 8, 14). Neca bidiibe  cuenta huaxiéʼ runibiaʼbe guiráʼ ni maʼ bizáʼ Dios, guizáʼ bidxagayaabe ora guníʼ íquebe ximodo guyáʼ Guidxilayú, guibáʼ, ca za ne ca rayu. Laaca guizáʼ bisisácabe guiráʼ ni rusiidiʼ Jiobá laabe, nga runi guniʼbe: «Huayapaʼ ca conseju stibe» (Job 23:12). Cumu ridxagayaabe guiráʼ ni bizáʼ Jiobá ne runi respetarbe laa la? bicaa cani laabe gannaxhiibe laa jma ne chuuláʼdxibe gúnibe ni riuulaʼdxiʼ Jiobá. Ne gucané ndiʼ laabe para gúnibe deseu ni nápabe de gácabe íntegro jma naguidxi. Cásica Job, laanu laaca naquiiñeʼ cueenu tiempu para guiníʼ íquenu guiráʼ cosa galán ni maʼ bizáʼ Jiobá. Yanna riʼ, jma maʼ runibiáʼ binni de laacani que ca dxi bibani Job. Ne laaca maʼ nápanu guidubi Biblia, ni racané laanu gunibiáʼ chaahuinu Dios. Guiráʼ ni guizíʼdinu zacané cani laanu guidxagayaanu cani bizáʼ Jiobá ne guni respetarnu laa. Ne ndiʼ zucaa laanu gannaxhiinu laabe ne guzúʼbanu stiidxabe, ne zuni ni deseu stinu de gácanu íntegro jma naguidxi (Job 28:28).

Para gúninu deseu stinu de gácanu íntegro jma nadipaʼ la? naquiiñeʼ gucáʼnanu pornografía. (Biiyaʼ párrafo 13). *

13, 14. a) Casi ná Job 31:1, ¿pora bisihuinni Job ruzuubaʼ diidxaʼ? b) ¿Ximodo zanda chinándanu ejemplu stibe?

13 Bíʼnibe stipa pur guzuubabe diidxaʼ lu guiráʼ ni gúnibe. Nanna Job naquiiñeʼ guzuubaʼ stiidxaʼ Jiobá para gaca ti binni íntegro. Ne cada biaje guzúʼbanu diidxaʼ la? raca deseu stinu de gácanu íntegro jma naguidxi. Biʼniʼ Job stipa pur guzuubaʼ stiidxaʼ Dios lu guiráʼ ni guni. Ti ejemplu de laani nga nabé gúpabe stale cuidadu ora biʼniʼ tratarbe ca gunaa (biindaʼ Job 31:1). Cumu maʼ bichaganabe la? nánnabe cadi jneza diʼ gudiibe atención ni maʼ cadi naquiiñeʼ gudiibe sti gunaa ni cadi xheelabe. Ca dxi riʼ, nabáninu ndaaniʼ ti guidxilayú ni nabé runi tentar laanu né stale práctica sexual. Yanna, ¿ñee zúninu cásica biʼniʼ Job ne qué zudiʼnu atención ni cadi naquiiñeʼ gudiʼnu sti binni ni cadi xheelanu la? Ra tiica si nuunu, ¿ñee zuuyadxinu ora guihuinni intiica imagen sexual o ni napa pornografía la?  (Mat. 5:28). Pa gusihuínninu autodominio guiráʼ dxi, zacané ni laanu gácanu íntegro.

Para gúninu deseu stinu de gácanu íntegro jma nadipaʼ la? naquiiñeʼ gácanu equilibradu né ca cosa material. (Biiyaʼ párrafo 14). *

14 Bisihuinni Job ruzuubaʼ diidxaʼ pur modo biʼyaʼ ca cosa material. Laabe guniʼbe ñanda ñuni castigar ca juez laabe pa ñápabe confianza ca cosa material stibe (Job 31:24, 25, 28). Yanna riʼ, nabé materialista binni. Pa gácanu equilibradu né bueltu ne ca cosa material ca casi ná Biblia la? zacané ni laanu guquídxinu deseu stinu de gácanu binni de integridad (Prov. 30:8, 9; Mat. 6:19-21).

Para gúninu deseu stinu de gácanu íntegro jma nadipaʼ la? cadi naquiiñeʼ guiaandaʼ laanu esperanza nápanu. (Biiyaʼ párrafo 15). *

15. a) ¿Xi gucané Job para cadi gusaana de gaca íntegro? b) ¿Xiñee naquiiñeʼ guietenaláʼdxinu esperanza ni chigudii Dios laanu?

15 Jma gucuá íquebe ca ndaayaʼ ni chigudii Dios laabe. Gunna dxichi Job rizaalaʼdxiʼ Dios pa íntegro laa o coʼ (Job 31:6). Neca cadíʼdibe prueba que la? gúpabe confianza zaguu ndaayaʼ Jiobá laabe, ne gucané ni laabe cadi gusaana de gácabe íntegro. Cumu guyuulaʼdxiʼ Jiobá cani biʼniʼ Job la? bidii laabe ti recompensa guizáʼ galán neca imperfectu laabe (Job 42:12-17; Sant. 5:11). Ne maʼ cadi candaa zacaabe stale ndaayaʼ jma galán. ¿Laanu yaʼ? ¿Ñee laaca nápanu esperanza zaguu ndaayaʼ Jiobá laanu pa gácanu íntegro la? Caʼruʼ diʼ guchaa Dios stinu (Mal. 3:6). Pa guietenaláʼdxinu rusisaca Jiobá gácanu íntegro la? zacané ni para cadi gusiáʼndanu esperanza ni maʼ bidii Dios laanu de guibáninu jma galán lu ca dxi ni zeeda ca (1 Tes. 5:8, 9).

16. ¿Xi naquiiñeʼ chuʼnu decididu gúninu?

16 Naquiiñeʼ chuʼnu decididu cadi lica gusaana de gácanu íntegro. Nuu biaje zándaca runi sentirnu laasinu nuunu decididu cadi gusaana de gácanu íntegro. Peru cadi stúbinu nuunu. Lu guidubi guidxilayú, nuu millón de hermanu ni cayuni stipa pur gaca íntegro. Ne laaca zunibiaʼnu ca hombre ne ca gunaa ni guca íntegro dxiqué neca guyuu xquendanabánicaʼ ra naxoo (Heb. 11:36-38; 12:1). Chinándanu ejemplu stiʼ Job ne guininu ca diidxaʼ guniʼbe: «¡Qué zusaanaʼ integridad stinneʼ dede ra gateʼ!». Nga runi, pa gácanu íntegro zusisácanu Jiobá para siempre.

CANCIÓN sjj 124 Cadi gusaananu Jiobá

^ párrafo 5 ¿Xi riníʼ gaca tuuxa ti binni íntegro? ¿Xiñee risaca para Jiobá gusihuinni ca xpinni nápacaʼ integridad? ¿Ne xiñee risaca gusihuinni cada tobi de laanu cualidad riʼ? Zacané artículo riʼ laanu guidxélanu respuesta ni rudii Biblia ca pregunta riʼ. Ne laaca zacané ni laanu guquídxinu deseu stinu de gácanu binni de integridad guiráʼ dxi. Pa gúninu ni la? zacaanu stale ndaayaʼ.

^ párrafo 3 Lu hebreu, diidxaʼ ni riquiiñecabe para guiníʼcabe nazaaca ti maniʼ, casi ngueca nga ni riquiiñecabe para guiníʼcabe naca tuuxa ti binni íntegro.

^ párrafo 50 NI RIHUINNI LU FOTO RIʼ: Rihuinni Job dxi naca joven cusiidiʼ caadxi de ca xiiñiʼ de ca cosa galán ni bizáʼ Jiobá.

^ párrafo 52 NI RIHUINNI LU FOTO RIʼ: Qué naʼ ti hermanu guʼyaʼ ca imagen napa pornografía ni culuíʼ ca xcompañeru de dxiiñaʼ laa.

^ párrafo 54 NI RIHUINNI LU FOTO RIʼ: Qué naʼ ti hermanu siʼ ti televisión naroʼbaʼ ne caru ni cadi caquiiñeʼ ne ni qué zanda quixe.

^ párrafo 56 NI RIHUINNI LU FOTO RIʼ: Cabee ti hermanu tiempu para guni orar ne caníʼ ique pabiáʼ galán dxi guni Dios Guidxilayú riʼ ti paraísu.