Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 34

Xi zanda gúninu para guiaʼnu ti asignación nacubi

Xi zanda gúninu para guiaʼnu ti asignación nacubi

«Jneza runi Dios, ne qué zusiaanda irá enda nachaʼhui ni huayuni tu ca xpinni purti nadxii tu laa» (HEB. 6:10).

CANCIÓN sjj 38 Jiobá cayapa lii

NI ZAZÍʼDINU *

1-3. ¿Xiñee rusaana caadxi hermanu asignación sticaʼ?

BISAANA Robert ne Mary de gácacaʼ misioneru dxi maʼ nápacaʼ 21 iza de cayúnicaʼ dxiiñaʼ riʼ purtiʼ guca huará jñaacaʼ ne bixhózecaʼ. Sicaríʼ guníʼcabe: «Riuuláʼdxidu gápadu laacabe. Peru guizáʼ nagana guca para laadu gusaanadu lugar ra cayúnidu xhiiñaʼ Dios, purtiʼ maʼ xadxí de nuudu raqué».

2 Sicaríʼ guníʼ ti guendaxheelaʼ ni láʼ William ne Terrie: «Dxi gúnnadu maʼ qué zanda guibiguétadu lugar ra cayacanedu purtiʼ guca huaradu, guizáʼ bidúʼnadu. Purtiʼ ni jma gucaláʼdxidu nga ñúnidu xhiiñaʼ Jiobá ndaaniʼ sti guidxi ni riaana zitu, peru maʼ qué ñanda ñúnidu ni».

3 Sicaríʼ guníʼ ti hermanu láʼ Alexéi: «Guiradu ca ni rúnidu dxiiñaʼ Betel gúnnadu nuu ca enemigu stidu guseegucaʼ ni. Guizáʼ nagana guca para laadu guireʼdu de raqué dxi biseeguʼ ca enemigu stidu ni».

4. ¿Xi chiguicábinu lu artículo riʼ?

4 Cadi ca hermanu si ni maʼ bizéʼtenu riʼ nga maʼ bichaa xiixa lu xquendanabánicaʼ. Laaca maʼ bidxaagalú stale betelita ne ca ni napa sti asignación * guendanagana ni bizéʼtenu riʼ. Zándaca gaca nagana para ca hermanu riʼ gusaanacaʼ lugar ra cayacanecaʼ purtiʼ guizáʼ riuuláʼdxicaʼ gúnicaʼ ni. ¿Xi zanda gacané laacabe? ¿Ne xi zanda gúninu para gacanenu laacabe yaʼ? Respuesta stiʼ ca pregunta riʼ zacanécani laanu gánnanu xi gúninu ora guchaa xiixa lu xquendanabáninu.

 XI ZACANÉ LAANU ORA GUCHAA XIIXA LU XQUENDANABÁNINU

¿Xiñee raca nagana para caadxi hermanu gusaanacaʼ asignación sticaʼ? (Biiyaʼ párrafo 5). *

5. ¿Xi guiráʼ zanda guizaaca ora guchaacabe laanu de asignación?

5 Pa cayúninu dxiiñaʼ Betel o cayacanenu sti lugar la? rannaxhiinu guiráʼ ca hermanu ne riaʼnu lugar ra nuunu. Nga runi, riuubaʼ ladxidoʼno ora caquiiñeʼ gusaananu lugar ra cayacanenu. Guizáʼ ribánanu ca hermanu ni binibiaʼnu lugar ca ne riuʼnu xizaa pur laacabe, jmaruʼ si pa bireʼnu de raqué purtiʼ cucueezacabe dxiiñaʼ stinu (Mat. 10:23; 2 Cor. 11:28, 29). Ne nuu biaje cadi fácil diʼ raca para laanu chigacanenu sti lugar purtiʼ nagana para guiaʼnu sti cultura. Ne zanda guni sentirnu zacá neca guibiguétanu lugar ra maca nabézanu. Sicaríʼ guníʼ Robert ne Mary: «Ora biguétadu ra lídxidu ne biʼniʼ predicardu lu stiidxadu la? biʼniʼ sentirdu de sti ladu laadu, purtiʼ maʼ xadxí de cayuni servirdu sti guidxi». Ne zándaca tídinu ra nagana purtiʼ huaxiéʼ bueltu nápanu. Nga runi, zándaca chuʼnu xizaa ne guireʼnu gana ora guchaacabe laanu de asignación. Peru ¿xi zacané laanu ora tídinu lu guendanagana riʼ yaʼ?

Nabé risaca guidxíñanu Jiobá ne gápanu confianza laa. (Biiyaʼ párrafo 6 ne 7). *

6. ¿Xi zanda gúninu para cadi guixélenu de Jiobá?

6 Cadi guixélenu de Jiobá (Sant. 4:8). ¿Ximodo zanda gúninu ni yaʼ? Ra gápanu confianza laabe, purtiʼ laabe nga «ni rucaadiaga oración» (Sal. 65:2). Ne Salmo 62:8 ná: «Laguiníʼ guiráʼ ni nuu ndaaniʼ ladxidoʼto nezalube». Zanda guni Jiobá jma de ni guinábanu laa o jma de ni guxuíʼlunu gúnibe (Efes. 3:20). Qué rúnisibe ni rinábanu laabe lu oración. Para guni chaahuibe ca guendanagana stinu la? zanda gúnibe stale cosa ni qué lica nidiʼdiʼ ndaaniʼ íquenu.

7. a) ¿Xi zacané laanu para cadi guixélenu de Jiobá? b) Casi ná Hebreos 6:10-12, ¿xi zabeendú ca ni qué rusaana de guni ni ná Jiobá?

7 Sti cosa ni zacané laanu para cadi guixélenu de Jiobá nga guidúʼndanu Biblia guiráʼ dxi ne guiníʼ íquenu ni cá luni. Sicaríʼ guníʼ ti hermanu ni guca misioneru: «Cadi naquiiñeʼ gusaana de gápanu adoración en familia ne naquiiñeʼ gaca prepararnu para ca reunión ni rápanu guiráʼ semana, cásica bíninu ni ante guchaacabe laanu de asignación». Laaca naquiiñeʼ guireʼnu predicación né congregación cubi stinu. Qué rusiaandaʼ Jiobá ca xpinni  ni runi ni ná, neca maʼ qué zanda gúnicaʼ ni cásica bíʼnicaʼ ni dxiqué (biindaʼ Hebreos 6:10-12).

8. ¿Ximodo racané 1 Juan 2:15-17 laanu para guibáninu né ni caquiiñesinu?

8 Guibáninu né ni caquiiñesinu. Ndaaniʼ guidxilayú riʼ, stale binni ruyubi gapa stale cosa risaca. Peru cadi naquiiñeʼ gudiʼnu lugar guxheleʼ ca cosa riʼ laanu de Jiobá (Mat. 13:22). Cadi gulábinu ca xhamígunu, familia stinu ne xcaadxi binni ora gábicaʼ laanu guyúbinu gápanu stale cosa risaca ndaaniʼ guidxilayú riʼ (biindaʼ 1 Juan 2:15-17). Gápanu confianza Jiobá purtiʼ«zacané be laanu ora caquiʼñe nu tu acané laanu», zuquídxibe fe stinu, zaguixhedxibe ladxidoʼno ne zudiibe laanu ni caquiiñenu para guibáninu (Heb. 4:16; 13:5, 6).

9. a) Casi ná Proverbios 22:3, 7, ¿xiñee nabé risaca cadi guzáʼbinu binni, ne xi zanda gacané laanu gúninu ni jneza?

9 Cadi guzáʼbinu binni (biindaʼ Proverbios 22:3, 7). Zanda guniti binni stale bueltu ora ridxaa de yoo, ne pur laani quiʼñeʼ bueltu ne guzaabi stiʼ binni. Nga runi, cadi naquiiñeʼ cueenu cosa ni cadi caquiiñenu a crédito. Ora gaca huará ti familia stinu, zándaca chuʼnu xizaa purtiʼ qué gánnanu pabiáʼ bueltu quíʼñenu. Ora tídinu lu ca guendanagana riʼ naquiiñeʼ guni orarnu ne guinábanu Jiobá gacané laanu gúninu ni jneza. Zudiibe paz stibe laanu ne zatadxí ladxidoʼno ne xquendabiaaninu ne zacá maʼ zaníʼ ique chaahuinu ante gúninu xiixa (Filip. 4:6, 7; 1 Ped. 5:7).

10. ¿Xi zacané laanu gápanu xcaadxi xhamígunu?

10 Gaca llevarnu ca xhamígunu ne familia stinu. Gábinu ca xhamígunu ni cayuni sentirnu ne ni cazaacanu, jmaruʼ si né ca ni huadiʼdiʼ guendanagana ni cadídinu. Nga zacané laanu guni sentirnu jma galán (Ecl. 4:9, 10). Neca nápanu xhamígunu ra biʼniʼ servirnu dxiqué la? caquiiñeʼ guyúbinu xcaadxi xhamígunu yanna. Ne para nga la? caquiiñeʼ gaca xhamígunu xcaadxi hermanu. Gábinu laacaʼ ximodo huaguu Jiobá ndaayaʼ laanu ne zacá zuuyacabe pabiáʼ nayecheʼ cayúninu ni ná. Neca cadi guiráʼ ca hermanu ziene pabiáʼ nayecheʼ nuunu pur cayúninu jma lu xhiiñaʼ Jiobá la? ziuu xcaadxi hermanu ni ziuulaʼdxiʼ gaca xhamígunu pur ni cayúninu. Peru cadi nisi de laanu guininu ne cadi guiníʼ íquenu cosa ni cuee gana laanu.

11. ¿Xi naquiiñeʼ gúninu para cadi gusaana de chuʼnu nayecheʼ lu xquendaxheelanu?

11 Pa bisaananu lugar ra cayacanenu purtiʼ guca huará xheelanu la? cadi guininu laabe nápabe donda. Ne pa laanu nga guca huaranu la? cadi guiníʼ íquenu laanu  nápanu donda. Cadi guiaandaʼ laatu «tobi si» nga laatu ne gúdxitu Jiobá zapalisaatu neca guidxaagalutu intiica guendanagana (Mat. 19:5, 6). Ne pa bisaananu asignación stinu purtiʼ guca xiiñiʼ xheelanu, gábinu xiiñinu laa nga jma risaca que laani. Gatigá gábinu laabe nácabe regalu jma sicarú ni maʼ bidii Jiobá laanu (Sal. 127:3-5). Laaca risaca gábinu laabe guiráʼ ni bizaacanu lugar ra gucanenu, purtiʼ pa gúninu ni la? zanda gucaani laabe guicá íquebe gúnibe jma lu xhiiñaʼ Jiobá, cásica bíninu ni.

XIMODO ZANDA GACANÉ XCAADXI HERMANU

12. a) ¿Ximodo zanda gacanenu ca hermanu ni cayuni jma lu xhiiñaʼ Dios para cadi gusaanacaʼ asignación sticaʼ? b) ¿Xi zanda gúninu para gacanenu ca hermanu ni chindá ndaaniʼ congregación stinu?

12 Racané stale xpinni Cristu ca hermanu ni cayuni jma lu xhiiñaʼ Dios para cadi gusaanacaʼ asignación sticaʼ. Guzéʼtenu ti ejemplu. Riguucabe gana laacaʼ para cadi gusaana de gúnicaʼ jma lu xhiiñaʼ Dios, rudiicabe bueltu laacaʼ ne xcaadxi cosa ni caquiiñecaʼ, o rápacabe familia sticaʼ. Guizáʼ risaca ni runi ca hermanu riʼ (Gál. 6:2). Pa chindá ti hermanu ni cayuni jma lu xhiiñaʼ Dios ndaaniʼ congregación stinu, cadi guiníʼ íquenu biseendacabe laabe purtiʼ qué ñanda ñúnibe xhiiñabe jneza o bíʼnibe xiixa cosa malu. * Lugar de nga la? gacanenu laabe. Guidxaagalunu laabe né stale guendanayecheʼ ne guni felicitarnu laabe pur guiráʼ ni maʼ bíʼnibe. Neca maʼ huarabe ne maʼ qué ganda gúnibe stale ndaaniʼ xquidxi Dios casi  dxiqué la? gúninu stipa pur gunibiaʼnu laabe jma. Guizíʼdinu de laabe, guiráʼ ni nánnabe ne guiráʼ ni maʼ bizaacabe.

13. ¿Ximodo zanda gacanenu ti hermanu ni chindá ndaaniʼ congregación stinu?

13 Zándaca caquiiñeʼ hermanu ni chindá ndaaniʼ congregación stinu paraa cueza, ximodo guni viajar, guidxela dxiiñaʼ o xcaadxi cosa ni caquiiñeʼ. Ne laaca zanda gusiénenu laabe paraa naquiiñeʼ quíxebe impuestu o paraa guidxélabe ti doctor. Peru ni jma caquiiñeʼ hermanu riʼ nga gúninu stipa pur guiénenu laa. Zándaca huarabe o huará ti familia stibe. O zándaca naná nuu ladxidoʼbe purtiʼ guti ti familia stibe. * Ne neca qué gábibe ni laanu, zándaca nuube triste purtiʼ cabánabe ca xhamígube. Caquiiñeʼ tidiʼ tiempu para chuʼ ca hermanu riʼ galán.

14. ¿Ximodo gucané caadxi publicador ti hermana guiaa ti territorio nacubi?

14 Pa guni predicarnenu laabe ne gácanu ti ejemplu galán para laabe la? zacanenu laabe guiaabe congregación cubi ra yendabe. Sicaríʼ guníʼ ti hermana ni biʼniʼ servir stale iza ndaaniʼ sti guidxi: «Ra bineʼ servir dxiqué, guiráʼ dxi rudieeʼ estudiu. Peru lugar ra yendayaʼ que, guca nagana para naa guundaniáʼ binni ti textu de lu Biblia o guluéʼ laacabe ti videu. Peru ca hermanu ne ca hermana ni nuu ndaaniʼ congregación nacubi que runi invitarcaʼ naa chigúnidu revisita ne estudiu. Ora ruuyaʼ pabiáʼ nayecheʼ ne nadxibalú ca hermanu ne pabiáʼ riuulaʼdxiʼ ca estudiante stícabe guiziidicaʼ la? gucaneni naa guiníʼ ique cosa ni cuʼ gana naa. Biziideʼ guzuluáʼ guinieniáʼ binni lugar que. Ne pur guiráʼ nga guyuaaʼ nayecheʼ sti biaje».

CADI GUSAANANU DE GÚNINU XHIIÑAʼ JIOBÁ

Guyúbinu modo para gúninu jma lu xhiiñaʼ Dios neza ra nabézanu. (Biiyaʼ párrafo 15 ne 16). *

15. ¿Ximodo zanda chuʼnu nayecheʼ lu asignación cubi stinu?

15 Zanda chuʼnu nayecheʼ lu asignación cubi ni gucuaanu. Cadi guireʼnu gana ne  cadi guiníʼ íquenu bichaacabe laanu de asignación purtiʼ qué ñúninu xhiiñanu jneza. Guiduʼyaʼ chaahuinu ximodo cayacané Jiobá laanu ne cadi gusaana de guni predicarnu. Chinándanu ejemplu stiʼ ca hermanu de primé siglu que, «ziyuni predicarcaʼ ca noticia galán ni cá lu Stiidxaʼ Dios neza zecaʼ» (Hech. 8:1, 4TNM). Pa qué gusaana de guni predicarnu la? zándaca zabeendunu stale cosa galán. Guzéʼtenu ti ejemplu. Guládxicabe caadxi precursor de ti país ne yendézacaʼ ti lugar ra caquiiñeʼ hermanu ni gacané lu diidxaʼ ni riniʼcaʼ. Ne pur ni bíʼnicabe riʼ, qué nindaa guyuu caadxi grupu lugar que.

16. ¿Xi zacané laanu chuuláʼdxinu gúninu xhiiñaʼ Jiobá lugar ra chindanu?

16 Gudxi Nehemías ca judíu que cadi gusaana de chuʼcaʼ nayecheʼ purtiʼ Jiobá nga stipa sticaʼ (Neh. 8:10). Ratiica si nuunu la? caquiiñeʼ chuʼnu nayecheʼ purtiʼ cayúninu ni ná Jiobá ne cadi pur lugar ra cayúninu ni nabe. Nga runi, cadi gusaananu Jiobá ne gápanu confianza zacanebe laanu, zudiibe laanu guendabiaaniʼ ne zuluiʼbe laanu xi gúninu. Cadi guiaandaʼ laanu gunnaxhiinu asignación ni gúpanu que purtiʼ gudixhe íquenu gacanenu ca hermanu stinu. Ne laaca zacané Jiobá laanu chuuláʼdxinu gúninu xhiiñaʼ lugar ra chindanu pa gúninu ni de guidubi ladxidoʼno (Ecl. 7:10).

17. ¿Xi cadi naquiiñeʼ guiaandaʼ laanu de asignación ni nápanu yanna?

17 Cadi guiaandaʼ laanu zedandá ti dxi zusaananu asignación ni nápanu yanna, peru qué ziuu dxi gusaana de gúninu ni ná Jiobá. Dxi guibáninu ndaaniʼ guidxilayú cubi ca, zándaca qué zúninu ni cayúninu pur Jiobá yanna. Alexéi, hermanu ni bizéʼtenu ra bizulú artículo riʼ riníʼ ique cayacané asignación stiʼ laa para ca dxi ni zeeda ca. Sicaríʼ guniʼbe: «Nannaʼ dxandíʼ nuu Jiobá ne zaca guidxilayú riʼ ti paraísu, peru bineʼ sentir cadi nuaaʼ gaxha de Jiobá ne candaa para gaca guidxilayú riʼ ti paraísu. Peru yanna riʼ runeʼ sentir nuaaʼ jma gaxha de Jiobá ne nuaaʼ seguru zaca guidxilayú riʼ ti paraísu» (Hech. 2:25). Ratiica si cayacanenu, cadi gusaana de gúninu ni ná Jiobá. Qué zusaanabe laanu, ne zacanebe laanu guibáninu nayecheʼ ratiica si nuunu purtiʼ cayúninu ni nabe (Is. 41:13).

CANCIÓN sjj 90 Cúʼsaanu gana laanu

^ párrafo 5 Nuu biaje rusaana caadxi siervo de tiempo completo o ca ni runi jma lu xhiiñaʼ Dios asignación sticaʼ o ricaacaʼ stobi nacubi. Lu artículo riʼ zazíʼdinu xi guendanagana ridxaagalúcabe ne xi zanda gacané laacabe guiaacabe lugar ra chindácabe. Laaca zadúʼyanu xi zanda guni ca hermanu para cuʼcaʼ gana ne gacanecaʼ laacabe. Ne zadúʼyanu caadxi principiu zeeda lu Biblia ni zacané laanu gánnanu xi gúninu pa guchaa xiixa lu xquendanabáninu.

^ párrafo 4 Ora maʼ ziniisi ca hermanu la? rusaanacaʼ dxiiñaʼ ni cayúnicaʼ lu náʼ xcaadxi hermanu jma nahuiiniʼ. Biindaʼ tema ni láʼ «Hermanu ni maʼ huaniisi, rusisaca Jiobá laatu purtiʼ nácatu leal», ni biree lu revista Torre stiʼ ni rapa septiembre de 2018 ne artículo ni láʼ «Cadi gunítinu paz ni nuu ndaaniʼ ladxidoʼno neca guchaa modo nabáninu», ni biree lu Torre stiʼ ni rapa octubre de 2018.

^ párrafo 12 Nagueendaca naquiiñeʼ gucaa ca ancianu de congregación ra biʼniʼ servir hermanu riʼ ti carta de presentación para ganda guni servirbe casi precursor, ancianu o siervu ministerial.

^ párrafo 13 Biindaʼ serie ni láʼ «Ayuda para quienes están de duelo», ni biree lu revista ¡Despertad! de 2018 número 3, yaza 3, 4, 6, 14 ne 16.

^ párrafo 57 NI RIHUINNI LU FOTO RIʼ: Cusaana ti guendaxheelaʼ ni naca misioneru lugar ra cayuni servircaʼ ne cayuunacaʼ ora cayaca despedircaʼ de ca hermanu.

^ párrafo 59 NI RIHUINNI LU FOTO RIʼ: Maʼ nuu guendaxheelaʼ riʼ ndaaniʼ xquidxi, cayuni orárcabe Jiobá para gacané laacabe guiaacabe modo nabánicabe yanna.

^ párrafo 61 NI RIHUINNI LU FOTO RIʼ: Cumu cayacané Jiobá guendaxheelaʼ riʼ la? gunda bizulucaʼ servicio de tiempo completo sti biaje ndaaniʼ xquídxicaʼ. Ne caníʼnecaʼ ti hombre lu diidxaʼ ni biziidicaʼ ra gucanecaʼ dxiqué.