Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 31

Cadi guireʼnu gana

Cadi guireʼnu gana

«Qué riréʼ du gana» (2 COR. 4:16).

CANCIÓN sjj 128 Biʼniʼ huantar de dxi gueeda fin

NI ZAZÍʼDINU *

1. ¿Xi naquiiñeʼ gúninu para guicaanu guendanabani ni qué zaluxe?

LAANU ca xpinni Cristu zeeda gácanu casi ti binni ni zeʼ lu ti carrera ne premiu ca nga guendanabani ni qué zaluxe. Pa deruʼ bizulunu o pa maʼ zinenu stale iza ndaaniʼ xquidxi Dios la? cadi naquiiñeʼ gusaana de guxóʼñenu dede ra chindanu lu meta. Ca conseju bidii apóstol Pablo ca xpinni Cristu de Filipos zanda gacanécani laanu para guicaanu guendanabani ni qué zaluxe. Caadxi de ca xpinni Cristu ni bibani lu primé siglu que, maʼ zinecaʼ stale iza de cayúnicaʼ ni ná Jiobá dxi gucuaacaʼ carta ni biseendaʼ Pablo. Neca jneza cayúnicabe ni ná Jiobá la? bisietenalaʼdxiʼ Pablo laacabe caquiiñeʼ guni huantárcabe. Ni racaláʼdxibe nga chinándacaʼ ejemplu stibe para ganda chindacaʼ lu meta (Filip. 3:14).

2. ¿Xiñee bidii Pablo conseju ca hermanu de Filipos?

2 Bidii Pablo conseju ca hermanu de Filipos ora peʼ caquiiñecani. Purtiʼ guizáʼ bicaalú binni laacabe dxi nacubi gúcacabe ti congregación. Yendá Pablo ne Silas ndaaniʼ guidxi Filipos dxi mayaca guzulú iza 50, purtiʼ gudxi Dios laacabe chécabe Macedonia (Hech. 16:9). Raqué binibiáʼcabe ti gunaa láʼ Lidia. Bixhele Jiobá ladxidóʼ gunaa riʼ para gucaadiaga ca noticia galán (Hech. 16:14). Ti tiempu despué, laabe ne familia stibe guyuunísacabe. Peru qué ñaanadxí Binidxabaʼ de nucaalú ca xpinni Cristu. Guxubiyú caadxi hombre Pablo ne Silas, yenecaʼ laacabe nezalú ca gobernante stiʼ guidxi que ne guniʼcaʼ canayúnicabe yaya ndaaniʼ guidxi que. Ne pur nga gudíñecabe Pablo ne Silas, biseguyoocabe laacaʼ ne gúdxicabe laacaʼ guireecaʼ de ndaaniʼ guidxi que (Hech. 16:16-40). ¿Ñee bireecabe gana la? Coʼ. ¿Xi guca xa de ca hermanu nabeza ndaaniʼ guidxi que yaʼ? Guizáʼ galán ni bíʼnicabe, biʼniʼ huantárcabe stale. Guizáʼ guluu ejemplu stiʼ Pablo ne Silas gana laacabe.

3. ¿Xi gudixhe ique Pablo guni, ne xi chiguicábinu lu artículo riʼ?

3 Qué niree Pablo gana ne gudixhe ique cadi gusaana de  guni ni ná Jiobá dede ra gatiʼ (2 Cor. 4:16). ¿Xi rusiidiʼ ejemplu stibe laanu? ¿Xi zanda guizíʼdinu de ca hermanu stinu ni cayuni huantar neca cadiʼdiʼ ra nagana? ¿Ne ximodo racané esperanza ni nápanu laanu para cadi guireʼnu gana?

XI RUSIIDIʼ EJEMPLU STIʼ PABLO LAANU

4. ¿Xi biʼniʼ Pablo neca cadiʼdiʼ ra nagana?

4 Guidúʼyanu xi guendanagana cadiʼdiʼ Pablo tiempu bicaa carta ra nuu ca hermanu de Filipos ne xi bíʼnibe para bicaabe ni. Deguyoobe ra lídxibe ndaaniʼ guidxi Roma, nga runi qué ñanda niguni predicarbe. Neca zacá, qué nusaana de ñuni predicarbe ca binni ni riganna laabe ne bicaabe carta ra nuu ca congregación ni nuu zitu. Yanna riʼ, stale hermanu laaca qué randa rireecaʼ de ndaaniʼ lídxicaʼ purtiʼ maʼ huaniisicaʼ o huaracaʼ, peru neca zacá, rúnicaʼ stipa para guni predicarcaʼ guiráʼ ca binni ni rié ra lídxicaʼ. Laaca rucaacaʼ carta ra nuu ca binni ni qué ridxélanu ora maʼ canayuni predicarnu.

5. Casi ná Filipenses 3:12-14, ¿xi gucané Pablo para cadi gusaana de guni ni ná Dios?

5 Qué nudii Pablo lugar nucueeza xiixa laa de guni ni ná Jiobá, nin guiráʼ ni guleendube ndaaniʼ guidxilayú riʼ nin ca cosa ni cadi jneza ni bíʼnibe ante gunibiaʼbe Dios. Sicaríʼ guniʼbe: «Rusiaandaʼ guiráʼ ni maʼ bisaanaʼ ne runeʼ stipa para ugaandaʼ guiráʼ ni nuu neza ra ziaaʼ» o guiluxeʼ carrera stinneʼ (biindaʼ Filipenses 3:12-14TNM). Guzéʼtenu caadxi cosa ni ñándaca nucueeza Pablo de ñuni ni ná Dios. Primé, guiráʼ cosa ni guleendube dxi guyuube ndaaniʼ religión stiʼ ca judíu. Laapebe guniʼbe nácacani «casi guixi» para laabe (Filip. 3:3-8). Guiropa, ñándaca niníʼ íquebe qué zanda gúnibe ni ná Dios purtiʼ guzanándabe ca xpinni Cristu. Peru qué nudiibe lugar nucueeza ndiʼ laabe. Ne guionna, guirá ni bíʼnibe lu xhiiñaʼ Cristu. Guleendú Pablo stale cosa galán neca biseguyoocabe laa, gudíñecabe laa, bichácabe guié laa, bilaahuabe, biaanabe sin gobe ne guyuu ora qué ñápabe lari gácube. Peru neca bizaacabe guiráʼ ndiʼ la? qué ñuu dxi niníʼ íquebe maʼ cadi naquiiñeʼ gúnibe jma lu xhiiñaʼ Dios (2 Cor. 11:23-27). Neca guleendú Pablo stale cosa lu xhiiñaʼ Jiobá ne gudiʼdiʼ ra nagana, jma gucuá ique guni ni ná Dios sin guiree gana. Ne laanu laaca naquiiñeʼ gúninu cásica biʼniʼ Pablo.

6. ¿Gunáʼ nga ca cosa ni caquiiñeʼ gusiáʼndanu?

6 ¿Xi zanda gúninu para gusiáʼndanu guiráʼ ca ni maʼ bisaananu cásica biʼniʼ Pablo yaʼ? Zándaca nuu tu laa riníʼ ique qué zanda guni ni ná Dios pur ca cosa ni cadi jneza biʼniʼ dxiqué. Pa zacá riníʼ íqueluʼ la? biʼniʼ investigar xiñee guti Cristu pur lii. Ra guni estudiarluʼ, guiníʼ íqueluʼ ne guni orarluʼ de tema riʼ, zacaneni lii guiéneluʼ zanda gúniluʼ ni ná Dios. Dede zándaca gacaneni lii guiéneluʼ ne gudiiluʼ cuenta maʼ biʼniʼ perdonar Jiobá lii. Guidúʼyanu sti cosa ni zanda guizíʼdinu de ejemplu stiʼ Pablo. Nuu hermanu maʼ bisaana ti dxiiñaʼ ra biaxa galán para ganda guni jma lu xhiiñaʼ Reinu. Nga runi, pa lii nga tobi de ca hermanu ni bizéʼtenu riʼ ne maʼ bisiaandaluʼ guiráʼ ni maʼ bisaanaluʼ la? maʼ cadi naquiiñeʼ guiníʼ íqueluʼ xi guiráʼ cosa ñanda ñápaluʼ (Núm. 11:4-6; Ecl. 7:10). Lade ca cosa ni maʼ bisaananu laaca nuu ca ni maʼ guleendunu lu xhiiñaʼ Jiobá o ca prueba ni maʼ gudídinu. Ya, ora riníʼ íquenu xi guiráʼ maʼ biʼniʼ Jiobá pur laanu la? ridxíñanu jma gaxha de laabe. Peru cadi naquiiñeʼ guiníʼ íquenu maʼ bíninu stale lu xhiiñaʼ Jiobá (1 Cor. 15:58).

Para guicaanu guendanabani ni qué zaluxe, caquiiñeʼ guxóʼñenu sin gudxiguetalunu ne guicá íquenu chindanu lu meta. (Biiyaʼ párrafo 7).

7. Casi ná 1 Corintios 9:24-27, ¿xi naquiiñeʼ guni tuuxa ni ziguxooñeʼ lu ti carrera para guni ganar? Bizeeteʼ ti ejemplu.

 7 Gudxi Jesús ca discípulo stiʼ gúnicaʼ «stale stipa», ne apóstol Pablo biene xii ngue nuube guiniʼbe (Luc. 13:23, 24). Nánnabe caquiiñeʼ gúnibe stale stipa cásica biʼniʼ Cristu dede ra gátibe. Nga runi, bichaagabe xquendanabani ca xpinni Cristu casi ora zeʼ tuuxa lu ti carrera (biindaʼ 1 Corintios 9:24-27). Ni jma ricá ique ca ni zeʼ lu ti carrera nga chindacaʼ lu meta ne rúnicaʼ stipa para cadi guuyadxicaʼ sti ladu laga ziguxooñecaʼ. Guzéʼtenu ti ejemplu. Ora zeʼ tuuxa lu ti carrera ni raca ndaaniʼ guidxi la? zándaca tidiʼ gaxha de negocio o xcaadxi cosa ni gucaa laa gudxiguetaʼ lú. Peru nin tobi de laacabe qué zuzuhuaadxí para guʼyaʼ xi cadoo ndaaniʼ ca tienda. ¿Xiñee coʼ yaʼ? Purtiʼ ni jma cá íquecabe nga guni ganárcabe. Zacaca nga laanu, laga ziuunu lu carrera para guicaanu guendanabani, cadi naquiiñeʼ guiaanadxinu ne guidúʼyadxinu sti ladu. Pa qué gusaana de guyadxinu ra cá íquenu chindanu ne gúninu stale stipa cásica biʼniʼ Pablo la? zuni ganarnu ne zacaanu premiu.

CADI GUIREʼNU GANA NECA TÍDINU RA NAGANA

8. ¿Xi chonna cosa chiguzéʼtenu?

8 Guzéʼtenu chonna cosa ni zándaca cuee gana laanu. Primé, ora ruluíʼ candaa para gaca cumplir ca promesa ni cabézanu. Guiropa, ora maʼ ziniisinu ne maʼ cará stipa stinu. Ne guionna, ora ruluíʼ cadi cará ca prueba cadídinu. Guidúʼyanu xi huayuni caadxi xpinni Dios ne xi zanda guizíʼdinu de laacabe (Filip. 3:17).

9. ¿Xi zándaca guizaacanu pa guidúʼyanu candaa para gaca cumplir ca promesa stiʼ Dios?

9 Ca promesa ni candaa para gaca cumplir. Guiranu nga racaláʼdxinu gaca cumplir ca promesa stiʼ Dios. Guzéʼtenu ti ejemplu. Ora gunabaʼ profeta Habacuc Jiobá cuee guiráʼ guendaquéiquiiñeʼ nuu ndaaniʼ guidxi Judá la? gudxi Jiobá laabe gatanabe (Hab. 2:3). Ne laanu laaca zanda guireʼnu gana pa guidúʼyanu candaa  para gaca cumplir ca promesa stiʼ Dios (Prov. 13:12). Nga peʼ nga ni bizaaca ra bizulú siglo veinte. Tiempu que la? stale xpinni Cristu cabézacaʼ checaʼ guibáʼ lu iza 1914. ¿Xi biʼniʼ ca xpinni Cristu riʼ dxi qué nizaaca ni cabézacaʼ yaʼ?

Neca qué ñe Royal ne Pearl Spatz guibáʼ lu iza 1914, qué ñuu dxi nusaana de ñúnicaʼ xhiiñaʼ Jiobá. (Biiyaʼ párrafo 10).

10. ¿Xi biʼniʼ ti guendaxheelaʼ ora qué ñaca ni cabézacaʼ?

10 Guzéʼtenu ni bizaaca ti guendaxheelaʼ, Royal ne Pearl Spatz. Guyuunisa hermanu Spatz lu iza 1908, dxi napa gande iza. Gunna dxíchibe maʼ cadi candaa zacaabe premiu stibe. Ne lu iza 1911, dxi gúdxibe Pearl pa zachaganáʼ laabe, sicaríʼ guniʼbe: «Maʼ nánnaluʼ xi chiguizaaca lu iza 1914. Pa zachagananu la? jma galán gúninu ni yanna». ¿Ñee bisaana guendaxheelaʼ riʼ de guni ni ná Jiobá dxi qué ñecaʼ guibáʼ lu iza 1914 la? Coʼ, purtiʼ ni jma gucuá íquecabe nga gúnicabe ni ná Jiobá ne qué nicá íquecabe premiu chicaacabe. Gudixhe íquecaʼ guxooñecaʼ lu carrera ne guni huantarcaʼ dede ra chindacaʼ lu meta. Ne bíʼnicabe ni. Qué ñuu dxi nusaana de ñúnicabe ni ná Jiobá dede dxi gúticabe. Ne laanu laaca racaláʼdxinu guihuinni Jiobá si nga napa derechu para guni mandar, ne guni guiráʼ ni maʼ gudixhe ique. Ne nánnanu zazaaca guiráʼ ndiʼ dxi maʼ gudíxhebe gúnibe ni. Laga cabézanu guedandá dxi ca la? gúninu ni ná Jiobá ne cadi gudiʼnu lugar cueecabe gana laanu ora guidúʼyanu candaa para gaca cumplir ca promesa stiʼ Dios.

Neca maʼ huaniisi hermanu Arthur Secord (ni rihuinni ladu bigaʼ) qué nusaana de nicá ique guni jma lu xhiiñaʼ Jiobá. (Biiyaʼ párrafo 11).

11, 12. ¿Xiñee zanda gúninu xhiiñaʼ Jiobá neca maʼ qué ganda gúninu ni cásica bíninu ni dxiqué? Bizeeteʼ ti ejemplu.

11 Ora maʼ ziniisinu ne maʼ cará stipa stinu. Para ganda guxooñeʼ tuuxa lu ti carrera la? caquiiñeʼ gapa stale stipa. Peru laanu neca maʼ cará stipa stinu zanda gápanu fe Jiobá ne gúninu ni ná. Tiempu riʼ, nuu stale hermanu ni maʼ qué gapa stale stipa casi dxiqué, peru cayúnicaʼ stipa para gúnicaʼ jma lu xhiiñaʼ Dios (2 Cor. 4:16). Guidúʼyanu ejemplu stiʼ hermanu Arthur Secord. * Dxi nápabe 88 iza ne maʼ zinebe 55 iza de cayúnibe dxiiñaʼ Betel, né stale cariñu gudxi ti enfermera ni rapa laabe ca diidxaʼ riʼ: «Hermanu Secord, guizáʼ maʼ bíʼniluʼ stale lu xhiiñaʼ Jiobá». Peru hermanu riʼ qué nicá ique guiráʼ ni maʼ biʼniʼ lu xhiiñaʼ Jiobá. Biiyadxí hermanu riʼ laabe ne dede cuxidxihuiiniʼ gudxi laabe: «Dxandíʼ ni naluʼ ca. Peru ni jma risaca nga cadi guchéʼnenu Jiobá yanna».

12 ¿Ñee maʼ xadxí de cayúninu xhiiñaʼ Jiobá ne yanna maʼ huaranu ne maʼ qué ganda gúninu biaʼ bíninu dxiqué la? Pa zacá ni, cadi guireʼnu gana. Nanna  dxíchinu rusisacaʼ Jiobá guiráʼ ni bíninu dxiqué (Heb. 6:10). Ne tiempu riʼ, cadi guiaandaʼ laanu cadi biaʼ rúninu nga ni zusihuinni pabiáʼ nadxiinu Jiobá. Rusihuínninu nadxiinu laabe ora rúninu ni nabe né stale guendanayecheʼ ne ora rúninu xhiiñabe biaʼ gándatiʼ (Col. 3:23). Riene Jiobá laanu ne qué rinábabe laanu gúninu biaʼ maʼ qué zanda gúninu (Mar. 12:43, 44).

Neca gudiʼdiʼ Anatoly ne Lidiya Melnik stale guendanagana, qué nusaanacaʼ Jiobá. (Biiyaʼ párrafo 13).

13. ¿Xi bizaaca Anatoly ne Lidiya, ne ximodo racané ejemplu stícabe laanu para cadi gusaana de gúninu ni ná Jiobá neca guidxaagalunu stale guendanagana?

13 Ora ruluíʼ cadi cará ca prueba cadídinu. Maʼ biʼniʼ huantar caadxi xpinni Jiobá stale prueba ne huazanándacabe laacaʼ pur stale iza. Guidúʼyanu xi bizaaca hermanu Anatoly Melnik, * de guidxi Moldavia. Dxi nápabe 12 iza gunaaze autoridad bixhózebe, biseguyoocabe laa ne yenécabe laa Siberia, ti guidxi ni riaana 7 mil kilómetru de ra nabeza familia stiʼ. Ti iza despué, laaca gunaaze autoridad Anatoly, jñaa ne ca bixhozebiidaʼ ndaaniʼ guidxi Siberia. Ra gudiʼdiʼ tiempu gunda guyécabe reunión, peru caquiiñeʼ sácabe 30 kilómetru lu hielu, ne guizáʼ nananda lugar que. Ti tiempu despué la? biseguyoocabe hermanu Anatoly chonna iza, guyuube zitu de xheelabe, Lidiya, ne baʼduhuiiniʼ de ti iza stícabe. Neca stale iza bidxaagalú Anatoly ne familia stiʼ guendanagana la? qué nusaanacabe Jiobá. Yanna riʼ, maʼ napa Anatoly 82 iza ne nácabe tobi de ca hermanu ni nuu lu comité de sucursal ni nuu Asia central. Cásica biʼniʼ Anatoly ne Lidiya, gúninu biaʼ gándatiʼ lu xhiiñaʼ Jiobá ne cadi guireʼnu gana cásica bíninu ni dxiqué (Gál. 6:9).

GUICÁ ÍQUENU NI CHIGUDII DIOS LAANU

14. ¿Xi nanna Pablo cadi naquiiñeʼ guni?

14 Gunna dxiichiʼ Pablo zaluxe carrera ra ziguxooñeʼ ne zindá lu meta. Cumu ungidu laabe la? cabézabe chebe guibáʼ. Peru nánnabe cadi caquiiñeʼ gusaana de gúnibe stipa para ugaandabe ni (Filip. 3:14). Ne cumu qué racaláʼdxibe gusaana de guni ca hermanu de Filipos ni ná Jiobá la? biquiiñebe ti ejemplu para gacanebe laacaʼ.

15. ¿Xi ejemplu biquiiñeʼ Pablo para guluu gana ca hermanu ungidu ti ugaandacaʼ ni chigudii Dios laacaʼ?

15 Bisietenalaʼdxiʼ Pablo ca hermanu de Filipos zabánicaʼ guibáʼ (Filip. 3:20). ¿Xiñee  cadi naquiiñeʼ gusiaandacabe ni bisietenalaʼdxiʼ Pablo laacabe yaʼ? Purtiʼ tiempu que, nabé risaca para binni gaca de Roma. * Ne cumu cabeza ca hermanu ungidu guibánicaʼ guibáʼ ra cayuni mandar ti gobiernu jma galán la? cadi tan risaca para laacaʼ gácacaʼ de Roma. Nga runi, guluu Pablo gana ca hermanu de Filipos né ca diidxaʼ riʼ: «Lasá jneza casi na stiidxa Cristu» (Filip. 1:27). Yanna riʼ, laaca naca ca hermanu ungidu ti ejemplu galán para laanu purtiʼ ricá íquecaʼ ugaandacaʼ ni chigudii Dios laacaʼ, guibánicaʼ guibáʼ sin chuʼ dxi gáticaʼ.

16. Casi ná Filipenses 4:6, 7, ¿xi naquiiñeʼ gúninu pa cabézanu guibáninu guibáʼ o ndaaniʼ Guidxilayú riʼ?

16 Pa cabézanu guibáninu guibáʼ o ndaaniʼ Guidxilayú riʼ, cadi naquiiñeʼ gusaana de gúninu stipa para chindanu lu meta. Intiica si guizaacanu, cadi guyadxinu ca cosa ni maʼ bisaananu ni ñándaca nucaa laanu nixélenu de Jiobá (Filip. 3:16). Zándaca maʼ xadxí de cabézanu gaca cumplir ca promesa stiʼ Jiobá o maʼ huaniisinu ne maʼ qué gápanu stale stipa casi dxiqué. Ne zándaca maʼ biʼniʼ huantarnu stale guendanagana o maʼ xadxí de canazanándacabe laanu. Intiica si guizaacanu, cadi chuʼnu xizaa, gábinu Jiobá guiráʼ ni cazaacanu ne guinábanu laabe gacanebe laanu. Laasibe nga zanda quixhedxibe ladxidoʼno (biindaʼ Filipenses 4:6, 7).

17. ¿Xi chiguizíʼdinu lu sti artículo ca?

17 Cásica riguixhe ique tuuxa ni zeʼ lu ti carrera chindá lu meta la? laanu laaca naquiiñeʼ quixhe íquenu chindanu lu meta ne guicanu guendanabani ni qué zaluxe. Gúninu biaʼ gándatiʼ lu xhiiñaʼ Dios ne cadi gusaana de gúninu stale stipa para guicaanu guiráʼ ca ndaayaʼ ni chigudii Dios laanu. ¿Xi naquiiñeʼ gúninu para ugaandanu guiráʼ ni chigudii Dios laanu yaʼ? Sti artículo ca zacané laanu gánnanu gunáʼ nga ca cosa ni jma risaca (Filip. 1:9, 10).

CANCIÓN sjj 79 Bidii stipa laacabe

^ párrafo 5 Biaʼ tiica si iza nápanu ndaaniʼ xquidxi Jiobá, racaláʼdxinu guiniisinu jma lu stiidxabe ne gúninu stipa para gúninu ni nabe modo riuuláʼdxibe. Bicaa apóstol Pablo ti carta ra nuu ca hermanu de Filipos para cadi guireecaʼ gana. Laaca racané carta riʼ laanu para guni huantarnu lu carrera ni ziuunu ti ugaandanu guendanabani ni qué zaluxe. Lu artículo riʼ zadúʼyanu ximodo zanda chinándanu ca conseju ni bidiibe.

^ párrafo 11 Biree historia stiʼ hermanu Secord lu revista La Atalaya 1 de noviembre de 1965, ni láʼ «Mi participación en adelantar la adoración correcta».

^ párrafo 13 Biree historia stiʼ hermanu Anatoly Melnik lu revista ¡Despertad! 22 de octubre de 2004, ni láʼ «Me enseñaron desde niño a amar a Dios».

^ párrafo 15 Cumu ti colonia stiʼ guidxi Roma nga Filipos la? napa ca binni de Filipos que caadxi derechu ni napa ca binni de Roma. Nga runi, biene ca hermanu ungidu de Filipos ni gudxi Pablo laacaʼ.