Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 15

Chinándanu ejemplu stiʼ Jesús ne qué ziuu dxi guirá paz stinu

Chinándanu ejemplu stiʼ Jesús ne qué ziuu dxi guirá paz stinu

«Zudii Dios laatu paz stiʼ dede guirutiʼ zanda guiene ximodo ni, ne zápani ladxidoʼto» (FILIP. 4:7TNM).

CANCIÓN sjj 113 Paz ni napa xquidxi Dios

NI ZAZÍʼDINU *

1, 2. ¿Xiñee nabé guyuu Jesús xizaa últimu dxi bibani lu Guidxilayú riʼ?

ÚLTIMU dxi bibani Jesús lu Guidxilayú riʼ, nabé guyuu xizaa. ¿Xiñee yaʼ? Purtiʼ nánnabe maʼ cadi candaa zuniná ca enemigu stibe laabe dede ra guuticaʼ laabe. Peru nuu sti cosa ni jma naguu xizaa laabe. Racaláʼdxibe gúnibe ni riuulaʼdxiʼ Bixhózebe purtiʼ guizáʼ nadxiibe laa. Ne nánnabe pa gácabe fiel lu ca guendanagana cadíʼdibe la? zuni vindicarbe o zuni defenderbe lá Dios. Laaca nadxiibe binni ne nánnabe zanda guibáninu para siempre pa gácabe fiel dede ra gátibe.

2 Neca nabé nuu Jesús xizaa, qué nirá diʼ paz stiʼ. Ne chupa chonna dxi ante maca gúdxibe ca apóstol stibe ca diidxaʼ riʼ: «Zudieeʼ laatu paz stinneʼ» (Juan 14:27TNM). Nápabe «paz» stiʼ Dios, laani nga tranquilidad napa tuuxa ni runi disfrutar de ti relación risaca né Jiobá. Ngue nga paz ni napa Jesús lu xquendabiaaniʼ ne ndaaniʼ ladxidóʼ (Filip. 4:6, 7TNM).

3. ¿Xi zazíʼdinu lu artículo riʼ?

3 Nin tobi de laanu qué zadxaagalú guiráʼ guendanagana ni biʼniʼ huantar Jesús. Peru guiráʼ ca xpínnibe zadxaagalunu guendanagana (Mat. 16:24, 25; Juan 15:20). Ne cásica laabe, laaca ziuu ora ziuʼnu xizaa. ¿Xi zanda gúninu para cadi chuʼ xhaatanu xizaa ne gunítinu paz stinu yaʼ? Zazíʼdinu chonna cosa ni biʼniʼ Jesús lu ministeriu stiʼ ne laaca zazíʼdinu ximodo zanda chinándanu ejemplu stibe ora guidxaagalunu guendanagana.

 QUÉ NUSAANA JESÚS DE ÑUNI ORAR

Racané oración laanu para cadi guirá paz stinu. (Biiyaʼ párrafo 4 hasta 7).

4. Ne ni ná 1 Tesalonicenses 5:17, bizeeteʼ caadxi ejemplu ni rusihuinni biʼniʼ orar Jesús stale biaje últimu dxi bibani lu Guidxilayú riʼ.

4 (Biindaʼ 1 Tesalonicenses 5:17). Últimu dxi bibani Jesús, biʼniʼ orarbe stale biaje. Dxi bisiidibe ca discípulo stibe guietenaláʼdxicaʼ guendaguti stibe la? bíʼnibe ti oración ante gutiidibe pan que ne laaca bíʼnibe stobi ante gutiidibe vinu (1 Cor. 11:23-25). Laaca biʼniʼ orárnebe laacaʼ ante guireecabe de lugar ra cayuni celebrárcabe saa Pascua (Juan 17:1-26). Ora yendácabe lu dani Olivo la? qué nusaanabe de ñuni orarbe (Mat. 26:36-39, 42, 44). Ne laaca bíʼnibe ti oración Bixhózebe ante gátibe (Luc. 23:46). Casi maʼ bidúʼyanu, nabé biʼniʼ orar Jesús Jiobá pur guiráʼ ni gudiʼdiʼ últimu dxi bibani lu Guidxilayú riʼ.

5. ¿Xiñee qué ñapa ca apóstol que valor?

5 Ti razón pur biʼniʼ huantar Jesús nga purtiʼ qué nusaana de ñuni orar para guinabaʼ Bixhoze gacané laa. Peru cumu qué ñuni ca apóstol que ni biʼniʼ Jesús la? qué ñápacaʼ valor ora bidxaagalucaʼ prueba (Mat. 26:40, 41, 43, 45, 56). ¿Xi rizíʼdinu de Jesús yaʼ? Ni rizíʼdinu nga zácanu fiel pa qué gusaana de guni orarnu Jiobá cásica bíʼnibe ni. Peru, ¿xi caquiiñeʼ guinábanu ora guni orarnu yaʼ?

6. ¿Xiñee zacané fe stinu laanu para cadi guirá paz stinu?

6 Zanda guinábanu Jiobá gacané laanu gápanu jma fe (Luc. 17:5; Juan 14:1). Caquiiñenu ni purtiʼ zutiidiʼ Binidxabaʼ prueba guiráʼ ca xpinni Jesús (Luc. 22:31). Zacané fe stinu laanu para cadi guirá paz stinu neca ruluíʼ cadi cará ca problema stinu. ¿Xiñee yaʼ? Purtiʼ ora maʼ bíninu  guiráʼ ni nuu lu nanu para guni chaahuinu cani la? zucaa fe stinu laanu gusaananu ca problema stinu lu náʼ Jiobá. Purtiʼ nánnanu laasibe nga nánnabe xi gúnibe né ca problema cadxaagalunu, ne nga zacané laanu chuʼ xquendabiaaninu ne ladxidoʼno en paz (1 Ped. 5:6, 7).

7. ¿Xi rizíʼdinu de ni guníʼ Robert?

7 Pa guni orarnu zacané ni laanu cadi guirá paz ni nuu ndaaniʼ ladxidoʼno intiica si guizaacanu. Guidúʼyanu ni bizaaca Robert, ti ancianu fiel ni napa jma de 80 iza. Laabe guniʼbe xi zanda gúninu para cadi guirá paz stinu, sicaríʼ guniʼbe: «Biaʼ dxi huabaneʼ la? huayacané conseju ni zeeda lu Filipenses 4:6, 7 naa gudxieeluáʼ ca guendanagana stinneʼ. Huayapaʼ problema económicu, ne bisaana de gaca ancianu ti tiempu». Ne laaca bizeetebe: «Ora runeʼ sentir nuaaʼ xizaa la? nagueendaca runeʼ orar Jiobá. Maʼ bidieeʼ cuenta mientra jma guneʼ orar, jma napaʼ paz».

BIʼNIʼ PREDICAR JESÚS NÉ STALE GANA

Racané predicación laanu para cadi guirá paz stinu. (Biiyaʼ párrafo 8 hasta 10).

8. Né ni ná Juan 8:29, ¿xi sti cosa gucané Jesús para cadi guirá paz ni nuu ndaaniʼ ladxidóʼ?

8 (Biindaʼ Juan 8:29). Qué nirá paz ni nuu ndaaniʼ ladxidóʼ Jesús neca guzanándacabe laa. ¿Xiñee yaʼ? Purtiʼ nánnabe cusiéchebe Bixhózebe. Bizuubabe diidxaʼ dede ora gudíʼdibe ra jma nagana. Cumu nadxiibe Jiobá la? ni jma gucuá íquebe nga guni servirbe laa. Ante gueeda Jesús lu Guidxilayú riʼ, gúcabe obrero maestro stiʼ Dios (Prov. 8:30). Ne dxi beedabe  lu Guidxilayú riʼ bisiidibe ni dxandíʼ de Bixhózebe né stale gana (Mat. 6:9; Juan 5:17). Guizáʼ bisiecheʼ dxiiñaʼ riʼ laabe (Juan 4:34-36).

9. Ora rúninu jma lu predicación, ¿ximodo racané ni laanu cadi guirá paz ni nuu ndaaniʼ ladxidoʼno?

9 Rinándanu ejemplu stiʼ Jesús ora ruzúʼbanu stiidxaʼ Jiobá ne ora qué rusaananu de gúninu «xhiiña Señor biaʼ ra ganda tiʼ» (1 Cor. 15:58). Xpinni Cristu ni qué riaanadxí de guni predicar maʼ gadxé modo ruuyaʼ ca problema stiʼ (Hech. 18:5). Ti razón nga purtiʼ cadi cadxaagalunu ca problema nadipaʼ ni cadxaagalú ca binni ni runi predicarnu. Peru ora ridúʼyanu ribánicaʼ jma galán ne riuucaʼ nayecheʼ ora ruzulú rannaxhiicaʼ ne rúnicaʼ ni ná Jiobá la? jma rápanu confianza zapa Dios laanu. Ne racané ni laanu cadi guirá paz ni nuu ndaaniʼ ladxidoʼno. Ne ngapeʼ nga ni bizaaca ti hermana ni napa depresión ne runi sentir qué iquiiñeʼ para gastiʼ. Laabe guniʼbe: «Ora runeʼ predicar, racané ni naa guneʼ controlar ca sentimientu stinneʼ ne chuaaʼ nayecheʼ. Ne runeʼ sentir zacá purtiʼ nuaaʼ jma gaxha de Jiobá».

10. ¿Xi rizíʼdinu de ni guníʼ Brenda?

10 Guzéʼtenu ejemplu sti ti hermana láʼ Brenda. Laabe ne xiiñibe nápacabe ti guendahuará ni láʼ esclerosis múltiple. Zuba Brenda lu ti silla de rueda ne huaxiéʼ stipa napa. Ora randa la? runi predicarbe de yoo pur yoo, peru jma rúnibe ni pur carta. Laabe guniʼbe: «Ora bieneʼ ne bineʼ aceptar qué ziandaʼ laga nabaneʼ ndaaniʼ sistema riʼ la? jma gucuá iqueʼ guneʼ predicar. Rusiaandaʼ guiráʼ ni riguu xizaa naa ora runeʼ predicar. Racané ni naa guicá iqueʼ gacaniáʼ binni de lu territorio ni rinieniáʼ ne rusietenalaʼdxiʼ ni naa esperanza galán ni napaʼ».

BIDII JESÚS LUGAR GACANÉ CA XHAMIGU LAA

Racané ca buen amigu laanu para cadi guirá paz stinu. (Biiyaʼ párrafo 11 hasta 15).

11-13. a) ¿Ximodo bisihuinni ca apóstol ne ca xcaadxi discípulo dxandíʼ xhamígucaʼ Jesús? b) ¿Ximodo gucané ca xhamigu Jesús laa?

11 Biaʼ tiempu bindaa ministeriu stiʼ Jesús bidxaagalú stale guendanagana. Peru bisihuinni ca apóstol fiel que dxandíʼ xhamígucaʼ laabe, gúcacaʼ casi ca binni riete lu Proverbios 18:24 ra ná: «Nuu xhamigu binni ni jma rannaxhii laa que ti biʼchiʼ». Guizáʼ bisisaca Jesús laacabe. Ne cadi guiaandaʼ laanu para tiempu que nin tobi de ca bíʼchibe ne ca bizáʼnabe qué runi crecaʼ laabe (Juan 7:3-5). Dede guyuu ti tiempu guníʼ ique familia stibe maʼ zeʼ xpiaanibe (Mar. 3:21). Peru gadxé modo guca ca apóstol stibe. Ngue runi gueelaʼ ante gati Jesús, gúdxibe laacaʼ ca diidxaʼ riʼ: «Laatu huayuu né tu naa lu irá ni nagana huadideʼ» (Luc. 22:28).

12 Guyuu biaje biʼniʼ decepcionar ca apóstol que laabe. Peru qué ñuuyabe puru si ra cucheecaʼ, sínuque biiyabe pabiáʼ fe nápacaʼ laabe (Mat. 26:40; Mar. 10:13, 14; Juan 6:66-69). Últimu gueelaʼ guyuube né ca hombre leal que, gúdxibe laacaʼ ca diidxaʼ riʼ: «Xhamigua laatu purti ma gudxe laatu irá ni gudxi Bixhoze naa» (Juan 15:15). Nga runi zanda chuʼnu seguru guizáʼ biʼniʼ animar ca xhamigu Jesús laa. Ne guizáʼ biéchebe purtiʼ gucanecaʼ laabe lu ministeriu stibe (Luc. 10:17, 21).

13 Aparte de ca apóstol que la? gupa Jesús xcaadxi xhamigu ne xhamiga ni gucané laa de gadxé gadxé modo biaʼ tiempu bindaa ministeriu stiʼ. Nuu de laacaʼ biʼniʼ invitarcaʼ laabe ti guendaró ra lídxicaʼ (Luc. 10:38-42; Juan 12:1, 2). Xcaadxi biʼniʼ viajar né laabe ne biquiiñecaʼ ni nápacaʼ para cadi guiaadxaʼ laabe gastiʼ (Luc. 8:3). ¿Xiñee gupa Jesús buen amigu yaʼ?  Purtiʼ laapebe gúcabe ti buen amigu. Bíʼnibe stale cosa pur laacaʼ ne qué ninábabe laacaʼ gastiʼ pur laani. Neca perfectu laabe ne imperfectu ca xhamígube la? bidiibe xquíxepeʼ laacaʼ purtiʼ gucanecaʼ laabe. Ne seguru gucanecaʼ laabe para cadi guirá paz stibe.

14, 15. a) ¿Ximodo zanda gácanu ti buen amigu? b) ¿Ximodo zacané ca xhamígunu laanu?

14 Ti buen amigu zacané laanu gácanu leal Jiobá. Ne ti modo galán para gápanu ti buen amigu nga gácanu ti buen amigu (Mat. 7:12). Guzéʼtenu ti ejemplu, Biblia ná gúninu jma pur xcaadxi, jmaruʼ si né ni caquiiñeʼ tu gacané laa (Efes. 4:28). Guiníʼ íquenu ca hermanu de congregación stinu ni caquiiñeʼ tu gacané laa. ¿Ñee nuu tuuxa publicador ni qué randa guiree de ra lidxi la? Pa zacá ni, zanda chisinu ca cosa ni caquiiñebe. O zanda gudiʼnu ti guendaró ti familia ni huaxiéʼ napa bueltu. Ne pa nánnanu iquiiñenu sitiu jw.org® ne aplicación JW Library® la? zanda gacanenu ca hermanu de congregación stinu gaca beneficiarcaʼ de guiráʼ ni nuu lúcani. Pa guyúbinu gacanenu xcaadxi la? jma nayecheʼ zuni sentirnu (Hech. 20:35).

15 Zacané ca xhamígunu laanu ora guidxaagalunu guendanagana ne laaca zacanecaʼ laanu para cadi guiráʼ paz stinu. Cásica bicaadiaga Elihú Job ora guca desahogar la? zacaca zapa ca xhamígunu paciencia laanu ne zucaadiágacaʼ laanu ora gábinu laacaʼ ni naguu xizaa laanu (Job 32:4). Cadi naquiiñeʼ cuézanu guicaacabe decisión pur laanu, peru pa gucaʼdiáganu conseju ni zeeda de lu Biblia  ni gudiicabe laanu la? zácanu binni nuu xpiaaniʼ (Prov. 15:22). Ne ora tídinu ra nagana la? gácanu casi rey David, purtiʼ qué nudii lugar nucueeza orgullo stiʼ laa, sínuque bidii lugar gacané ca xhamigu laa (2 Sam. 17:27-29). Ne reeda gaca ca clase amigu riʼ ti regalu stiʼ Jiobá (Sant. 1:17).

XI ZANDA GÚNINU PARA CADI GUIRÁ PAZ STINU

16. Casi ná Filipenses 4:6, 7, ¿gunáʼ nga ti modo zanda gápanu paz?

16 Biblia ná: «Cadi chuʼtu xizaa. Lu intiica ni cadíʼditu lagabi Dios xi caquiiñetu, laguni orar, laguni rogar ne lagudii xquixe peʼ laa; óraque zudii Dios laatu paz stiʼ dede guirutiʼ zanda guiene ximodo ni, ne zápani ladxidoʼto ne xquendabiaanitu pur Cristu Jesús», Filipenses 4:6, 7TNM. ¿Xiñee cayabi Jiobá laanu «pur Cristu Jesús» zanda gápanu paz stiʼ yaʼ? Purtiʼ para qué chuʼ dxi guirá paz ndaaniʼ ladxidoʼno ne lu xquendabiaaninu la? naquiiñeʼ guiénenu pabiáʼ risaca dxiiñaʼ cayuni Jesús para gaca cumplir propósitu stiʼ Dios ne gápanu fe laa. Guzéʼtenu ti ejemplu, ratadxí ladxidoʼno gánnanu raca perdonar ca pecadu stinu pur gútibe pur laanu (1 Juan 2:12). Ne rápanu esperanza purtiʼ nánnanu Jesús nga Rey stiʼ Reinu stiʼ Dios ne zabeebe guiráʼ yuubaʼ ni redané Binidxabaʼ ne ca xpinni luguianu (Is. 65:17; 1 Juan 3:8; Apoc. 21:3, 4). Ne rápanu jma valor purtiʼ nánnanu cayacané Jesús laanu para guni cumplirnu né dxiiñaʼ bisaananebe laanu lu ca últimu dxi riʼ (Mat. 28:19, 20). ¿Cadi dxandíʼ rápanu paz lu xquendabiaaninu ora ránnanu riguixhedxí Jesús ladxidoʼno, rudii esperanza ne valor laanu la?

17. a) ¿Xi zanda guni ti xpinni Cristu para cadi guirá paz ni nuu ndaaniʼ ladxidóʼ? b) Casi ná Juan 16:33, ¿xi zúninu?

17 ¿Xi zanda gúninu para cadi guirá paz ni nuu lu xquendabiaaninu ora guidxaagalunu guendanagana yaʼ? Zanda chinándanu ejemplu stiʼ Jesús. Primé, cadi gusaana de guni orarnu. Guiropa, guzúʼbanu stiidxaʼ Jiobá ne guni predicarnu né stale gana neca cadxaagalunu guendanagana. Ne guionna, gudiʼnu lugar gacané ca xhamígunu laanu. Zapa paz stiʼ Dios xquendabiaaninu ne ladxidoʼno. Ne cásica biʼniʼ Jesús, zudxíʼlunu intiica prueba (biindaʼ Juan 16:33).

CANCIÓN sjj 41 Bicaadiaga oración stinneʼ

^ párrafo 5 Guiranu nápanu problema ni zanda gusirá paz stinu. Lu artículo riʼ, zazíʼdinu chonna cosa ni biʼniʼ Jesús para cadi guirá paz stiʼ ne laaca zazíʼdinu ximodo zanda chinándanu ejemplu stibe ora tídinu ra jma nagana.