Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 14

¿Ñee cayuni cumplirnu né guiráʼ ni nuu lu ministeriu stinu la?

¿Ñee cayuni cumplirnu né guiráʼ ni nuu lu ministeriu stinu la?

«Biʼniʼ predicar ca noticia galán ne biʼniʼ guiráʼ dxiiñaʼ stiʼ Dios ni maʼ gucuaaluʼ» (2 TIM. 4:5TNM).

CANCIÓN sjj 57 Rinínenu guiráʼ binni

NI ZAZÍʼDINU *

Despué de biasa Jesús de lade gueʼtuʼ, bidagulisaanebe ca ni zinanda laabe ne biʼniʼ mandarbe laacaʼ gusiidicaʼ binni para gaca discípulo stibe. (Biiyaʼ párrafo 1).

1. Laanu ca xpinni Dios, ¿xii nga ni jma racaláʼdxinu gúninu, ne xiñee? (Biiyaʼ dibuju ni zeeda lu portada).

BIDII JESÚS mandatu riʼ ca xpinni: «Laché irá xixé guidxi, lachiusiidi irá xixe binni sa nanda naa» (Mat. 28:19). Guiranu ca xpinni Dios racaláʼdxinu guizíʼdinu guni cumplirnu né guiráʼ dxiiñaʼ ni maʼ gucuaanu (2 Tim. 4:5). Purtiʼ laani nga ni jma risaca ne caquiiñeʼ gúninu ni nagueenda. Peru, zándaca gaca nagana para laanu gúninu dxiiñaʼ riʼ biaʼ tiempu ñuuláʼdxinu.

2. ¿Xiñee zándaca gaca nagana para laanu guni cumplirnu né ministeriu stinu?

2 Nuu xcaadxi dxiiñaʼ caquiiñeʼ gúninu ni ribee tiempu ne rusirá stipa stinu. Zándaca caquiiñeʼ gúninu dxiiñaʼ guidubi dxi para gudiʼnu ni caquiiñeʼ familia stinu. O zándaca nápanu xcaadxi responsabilidad familiar o nápanu ti guendahuará casi depresión o nápanu xiixa guendanagana purtiʼ maʼ huaniisinu. ¿Xi zanda gúninu para gudxiilunu ca tipu guendanagana riʼ sin gusaana de guni cumplirnu né guiráʼ ni nuu lu ministeriu stinu yaʼ?

3. ¿Xi cusiene ca diidxaʼ ni zeeda lu Mateo 13:23 laanu?

3 Cadi naquiiñeʼ gaca desanimarnu pa pur circunstancia stinu qué ganda gúninu jma tiempu lu serviciu ni rudiʼnu Jiobá. Nanna Jesús cadi guiranu zanda guni producirnu biaʼca fruto stiʼ Reinu, ni ná ca diidxaʼ riʼ nga nánnabe qué zanda gudiʼnu biaʼca stipa ne tiempu rudii xcaadxi ora guni predicarnu (biindaʼ Mateo 13:23). Rusisaca Jiobá guiráʼ ni rúninu para gúninu ni ná, jmaruʼ si ora rúninu ni de guidubi ladxidoʼno (Heb. 6:10-12). Ne laaca zándaca guiníʼ íquenu pur circunstancia stinu zándaruʼ gúninu jma lu xhiiñaʼ  Jiobá. Lu artículo riʼ zadúʼyanu xi zanda gúninu para gaca ministeriu stinu ni jma risaca lu xquendanabáninu, para guibáninu né ni caquiiñesinu ne para gusíʼdinu ne guni predicarnu jma jneza. Peru ante guidúʼyanu ca ni bizéʼtenu riʼ la? guidúʼyanu xi riníʼ guni cumplirnu né guiráʼ ni nuu lu ministeriu stinu.

4. ¿Xi riníʼ guni cumplirnu né guiráʼ ni nuu lu ministeriu stinu?

4 Guni cumplirnu né guiráʼ ni nuu lu ministeriu stinu riníʼ ni guni participarnu lu predicación ne gusíʼdinu binni ne guiráʼ stipa stinu. Ruuyaʼ Jiobá pabiáʼ tiempu runi predicarnu, peru ni jma risaca para laabe nga xi pur rúninu ni. Pa rúninu ni purtiʼ nadxiinu laabe ne binni la? zuni cumplirnu né ministeriu cristianu * stinu de guidubi ladxidoʼno (Mar. 12:30, 31; Col. 3:23). Ndiʼ riníʼ iquiiñenu guiráʼ stipa stinu ora gúninu dxiiñaʼ riʼ. Nga runi, pa rusisácanu guni predicarnu la? zúninu stipa pur chinenu ca noticia galán stiʼ Dios ra nuu de guiráʼ binni.

5, 6. ¿Xi zanda gúninu para gaca ministeriu stinu ni jma risaca lu xquendanabáninu neca qué gápanu stale tiempu? Bizeeteʼ ti ejemplu.

5 Guxuíʼlunu ti joven ni guizáʼ riuulaʼdxiʼ guxhidxi guitarra, ne ruxhidxi ni cada gapa oportunidad. Despué runi contratarcabe laabe para guxhídxibe ra ti cafetería ca fin de semana. Peru, cumu qué rugaanda xpuéltube la? laaca rúnibe dxiiñaʼ de cajeru ti lugar ra ridoo guendaró de lunes a viernes. Neca jma stale tiempu nuube ra ridoo guendaró la? ni jma riuuláʼdxibe gúnibe nga guxhídxibe guitarra. Racaláʼdxibe guxhídxibe jma galán ne gaca ni xhiiñabe. Nga runi, ora gápabe ti oportunidad la? ruxhídxibe guitarra stibe neca ti ratuhuiiniʼ.

6 Zacaca zanda guizaacanu, zándaca qué ganda guni predicarnu biaʼ tiempu ñuuláʼdxinu ñúninu ni. Peru ni jma riuuláʼdxinu nga guni predicarnu. Nga runi rúninu stipa para chindá mensaje stiʼ Reinu ndaaniʼ ladxidóʼ binni cada biaje guinínenu laacaʼ. Peru cumu stale cosa rúninu la? zándaca guinabadiidxanu laca laanu xi zanda  gúninu para gaca ministeriu stinu ni jma risaca lu xquendanabáninu.

XI ZANDA GÚNINU PARA GACA MINISTERIU STINU NI JMA RISACA LU XQUENDANABÁNINU

7, 8. ¿Ximodo zanda chinándanu ejemplu stiʼ Jesús ora guni predicarnu?

7 Modo biʼniʼ cumplir Jesús né ministeriu stiʼ naca ni ti ejemplu guizáʼ galán para laanu. Ni jma bisaca para laabe nga guiniʼbe de Reinu stiʼ Dios (Juan 4:34, 35). Guzabe gayuaa kilómetru para gunda biʼniʼ predicarbe de guiráʼ binni guidxélabe. Qué nunítibe oportunidad de niníʼnebe binni ra lidxi ne ra nuu stale binni. Bíʼnibe stipa pur gaca ministeriu stibe ni jma risaca lu xquendanabánibe.

8 Zanda chinándanu ejemplu stiʼ Jesús ora rininu de Reinu stiʼ Dios ora tiica si ne ra tiica si nuunu. Nuunu dispuestu guni sacrificarnu ca cosa ni riuuláʼdxinu para guni cumplirnu dxiiñaʼ de guni predicarnu (Mar. 6:31-34; 1 Ped. 2:21). Zanda gaca stale hermanu de ra congregación precursor especial, regular o precursor auxiliar. Stale de laacaʼ maʼ biziidicaʼ sti diidxaʼ o maʼ yendézacaʼ sti lugar para chiguni predicarcaʼ ra jma caquiiñeʼ. Ne ca publicador rúnicaʼ stale lu predicación ne rúnicaʼ biaʼ gándatiʼ para ganda guni predicarcaʼ. Intiica si cosa cayúninu, qué rinabaʼ diʼ Jiobá laanu gúninu ni qué zanda gúninu. Racaláʼdxibe guni disfrutarnu de serviciu stinu ora guni predicarnu ca noticia galán ni rusiidibe, purtiʼ laabe nga «ti Dios ni nayecheʼ» (1 Tim. 1:11; Deut. 30:11).

9. a) ¿Xi biʼniʼ Pablo para bisihuinni jma risaca predicación lu xquendanabani neca caquiiñeʼ guni dxiiñaʼ? b) Casi ná Hechos 28:16, 30, 31, ¿xi biʼniʼ Pablo para biʼniʼ cumplir né ministeriu stiʼ?

9 Apóstol Pablo bisaana sti ejemplu galán. Dxi nuube ndaaniʼ guidxi Corinto, dxi cayúnibe guiropa viaje misional stibe la? bíʼnibe dxiiñaʼ, bizaʼbe tienda de campaña purtiʼ qué gápabe stale bueltu. Peru qué ñaca dxiiñaʼ que ni jma risaca lu xquendanabánibe. Bíʼnibe dxiiñaʼ riʼ para gápabe ni guibaninebe ne zacá ganda guni predicarbe ca noticia galán ca binni de Corinto sin cuézabe gudiicaʼ laabe bueltu (2 Cor. 11:7). Neca naquiiñeʼ guni Pablo dxiiñaʼ la? biʼniʼ cumplir né ministeriu stiʼ, ne biʼniʼ predicar guiráʼ ca sábadu. Ora bichaa circunstancia stibe la? gunda biʼniʼ predicarbe jma, ngue runi «jma pe qué ñaana dxí [...] de ñuiʼ stiidxa Dios. Idubi dxi cayabi be ca judíu Jesús nga Cristu ni cabeza ca que» (Hech. 18:3-5; 2 Cor. 11:9). Gudiʼdiʼ si tiempu, dxi deguyoo Pablo Roma chupa iza ndaaniʼ lidxi la? biʼniʼ predicar ca binni yeganna laa ne bicaa carta (biindaʼ Hechos 28:16, 30, 31). Qué nudiibe lugar gastiʼ nucueeza laabe ñuni cumplirbe né serviciu rudiibe Dios. Laabe bicaabe: «Dios bisaana dxiiña ri ladxi ná du [...]. Nga runi qué riréʼ du gana» (2 Cor. 4:1). Cásica Pablo, laaca zanda gaca obra stiʼ Reinu ni jma risaca lu xquendanabáninu neca naquiiñeʼ gúninu dxiiñaʼ.

Nuu stale modo para guni cumplirnu né guiráʼ ni nuu lu ministeriu stinu. (Biiyaʼ párrafo 10 ne 11).

10, 11. ¿Ximodo zanda guni cumplirnu né guiráʼ ni nuu lu ministeriu stinu neca huaranu?

10 ¿Xi zanda gúninu pa pur maʼ huaniisinu o pur ti guendahuará malu qué ganda guni predicarnu de yoo pur yoo casi ñuuláʼdxinu ñúninu ni yaʼ? Pa zacá rizaacanu la? nuu xcaadxi modo zanda guni predicarnu. Ca xpinni Cristu de primé siglu biʼniʼ predicarcaʼ ra tiica si nuucaʼ. Qué nuníticaʼ tiempu ne biʼniʼ predicarcaʼ ra tiica si nuu binni, de yoo pur yoo, ra nuu stale binni ne de manera informal (Hech. 17:17; 20:20). Yanna, ¿pa maʼ qué randa rizanu xadxí yaʼ? Zanda chitinu ra ti lugar ra ridiʼdiʼ stale binni ne guinínenu laacaʼ. Laaca zanda guni predicarnu  pur teléfono, pur carta ne de manera informal. Neca nuu ni rucueeza stale publicador, runi sentircaʼ nayecheʼ ne galán ora runi predicarcaʼ de xcaadxi modo.

11 Nga runi, zanda guni cumplirnu né guiráʼ ni nuu lu ministeriu stinu neca huaranu. Guzéʼtenu ejemplu stiʼ apóstol Pablo sti biaje. Laabe guniʼbe: «Napaʼ stipa para guneʼ intiica cosa purtiʼ rudii Dios poder naa» (Filip. 4:13TNM). Gucané poder stiʼ Dios laabe dxi guca huarabe lu tobi de ca biaje bíʼnibe. Sicaríʼ gúdxibe ca hermanu de Galacia: «Pur gucaʼ huaraʼyaʼ nga gunda bineʼ predicar ca noticia galán ra nuutu primé biaje» (Gál. 4:13TNM). Cásica biʼniʼ Pablo, neca huaranu zanda guininu de Reinu stiʼ Dios né ca doctor, ca enfermeru ne xcaadxi binni ni runi dxiiñaʼ ra hospital. Stale de ca binni ni maʼ bizéʼtenu riʼ cayúnicaʼ dxiiñaʼ ora runi predicarnu neza ra lídxicaʼ.

XIMODO ZANDA GUIBÁNINU NÉ NI CAQUIIÑESINU

12. ¿Xi riníʼ diidxaʼ gúʼyanu puru si ni jneza o gaca guié lunu sencillu?

12 Sicaríʼ guníʼ Jesús: «Guié lú binni nga lámpara stiʼ xcuerpu. Pa ruuyaluʼ puru si ni jneza [o sencillu guié luluʼ] la? zuzaaniʼ guidubi cuerpu stiluʼ» (Mat. 6:22TNM). ¿Xi riníʼ ca diidxaʼ riʼ yaʼ? Riníʼ ni caquiiñeʼ guibáninu né ni caquiiñesinu, ni nuunu guininu raríʼ nga guyadxinu ti lugar si o gápanu ti meta sin gucueeza gastiʼ laanu para ugaandanu ni. Ne ngapeʼ nga ni biʼniʼ Jesús, bisaanabe ti ejemplu galán para laanu purtiʼ guca centrarbe lu ministeriu stibe ne bisiidibe ca discípulo stibe guni cumplircaʼ né serviciu rudiicaʼ Jiobá ne Reinu stiʼ. Para chinándanu ejemplu stiʼ Jesús ne guyúbinu «Reinu ne justicia stiʼ Dios» primé la? naquiiñeʼ gusihuínninu  lu xquendanabáninu jma risaca para laanu guni predicarnu (Mat. 6:33).

13. ¿Xi zacané laanu gúʼyanu puru si ni jneza o gaca guié lunu sencillu ora guni cumplirnu né ministeriu stinu?

13 Ti cosa ni zacané laanu gúʼyanu puru si ni jneza o gaca guié lunu sencillu ora guni cumplirnu né ministeriu stinu nga guibáninu né ni caquiiñesinu purtiʼ zacá zápanu jma tiempu para gacanenu xcaadxi binni gunibiáʼ ne gannaxhii Jiobá. * Guzéʼtenu ti ejemplu, ¿ñee zanda guchaʼnu hora rúninu dxiiñaʼ ne zacá guni predicarnu jma ndaaniʼ semana la? ¿Ñee zanda niquiiñenu jma huaxiéʼ tiempu para gaca divertirnu la?

14. ¿Xi biʼniʼ ti guendaxheelaʼ para gunda gupa jma tiempu para guni predicar?

14 Guidúʼyanu ni biʼniʼ ti ancianu láʼ Elías ne xheelaʼ. Laabe guniʼbe: «Qué ñanda ñácadu precursor dxiqué, peru bidiʼdu cuenta caquiiñeʼ gúnidu xiixa. Nga runi bichaʼdu caadxi cosahuiiniʼ para ganda guni predicardu jma. Tobi de laacani nga maʼ qué ñúnidu stale gastu, laaca gudixheʼ íquedu maʼ cadi iquiiñedu stale tiempu para gaca divertirdu, purtiʼ bidiʼdu cuenta cunítidu stale tiempu lúcani, ne gunábadu jefe stidu gúnidu dxiiñaʼ huadxiéʼ tiempu. Ne pur bínidu guiráʼ ni bizéʼtedu riʼ la? gunda biʼniʼ predicardu ca huadxí, gúpadu jma cursu de lu Biblia ne biʼniʼ predicardu chupa biaje ndaaniʼ semana lu ti beeu. Guizáʼ guyuuláʼdxidu ni bínidu ca».

XIMODO GUSÍʼDINU JMA JNEZA

Pa gúninu ca ni rizíʼdinu ra reunión ni rápanu ndaaniʼ semana zacanécani laanu guni cumplirnu né guiráʼ ni nuu lu ministeriu stinu. (Biiyaʼ párrafo 15 ne 16). *

15, 16. Né ni ná 1 Timoteo 4:13, 15, ¿xi zanda gúninu para guni predicarnu ne gusíʼdinu jma jneza? (Biindaʼ recuadru ni láʼ « Ca meta ni zacané laanu guni cumplirnu né guiráʼ ni nuu lu ministeriu stinu»).

15 Sti modo para guni cumplirnu né guiráʼ  ni nuu lu ministeriu stinu nga gápanu jma habilidad para gusíʼdinu jma jneza. Nuu tiru rinábacabe stale binni profesional guicaacaʼ xiixa capacitación para guiziidicaʼ jma ne gácacaʼ jma hábil lu xhiiñacaʼ. Laanu laaca naquiiñeʼ gúninu stipa pur guizíʼdinu xcaadxi cosa para ganda gusíʼdinu jma jneza (Prov. 1:5; biindaʼ 1 Timoteo 4:13, 15).

16 ¿Xi zanda gúninu para gusíʼdinu jma jneza yaʼ? Ti modo nga quíxhenu stale atención ca ni rizíʼdinu guiráʼ semana lu reunión Xhiiñaʼ Dios ne Modo nabáninu. Lu reunión riʼ rizíʼdinu ximodo guni predicarnu jma jneza. Guzéʼtenu ti ejemplu, ora gudii hermanu ni naca presidente stiʼ reunión conseju ca ni bitiidiʼ ti discursu la? quíxhenu stale atención ca sugerencia ni gudiibe purtiʼ laaca zacané cani laanu guni mejorarnu. Nagueendaca gúninu ni ná conseju ca sti biaje guinínenu binni de Stiidxaʼ Dios. Sti cosa ni zanda gúninu nga guinábanu superintendente de grupu stinu gacané laanu o guinábanu laabe guni predicárnebe laanu. Laaca zanda guiréʼnenu xcaadxi publicador ni napa experiencia, ti precursor o superintendente de circuito para guizíʼdinu jma de laacaʼ. Pa gúninu ca ni bizéʼtenu riʼ, zacanécani laanu guizíʼdinu iquiiñenu kit de enseñanza nápanu jma jneza. Ne jma zuni disfrutarnu ora guni predicarnu ne ora gusíʼdinu.

17. ¿Xi zabeendunu pa guni cumplirnu né ministeriu stinu?

17 Ti privilegiu naroʼbaʼ nápanu purtiʼ tobi si rúninenu Dios dxiiñaʼ (1 Cor. 3:9). Ora nánnanu xii nga «ni dxandí risaca» ne raca concentrarnu lu ministeriu stinu la? nayecheʼ runi servirnu Jiobá (Filip. 1:10; Sal. 100:2). Laanu ca xpinni Dios, nánnanu zudii Jiobá stipa ni caquiiñenu para guni cumplirnu né ministeriu stinu neca cadxaagalunu guendanagana (2 Cor. 4:1, 7; 6:4). Pa pur circunstacia stinu runi predicarnu stale o huaxiéʼ la? ni jma rusiecheʼ laanu nga guni servirnu Jiobá de guidubi ladxidoʼno (Gál. 6:4). Ora runi cumplirnu né guiráʼ ni nuu lu ministeriu stinu la? rusihuínninu nadxiinu Jiobá ne binni. ¿Xi zabeendunu pa gúninu ni yaʼ? Biblia ná: «Pa chi nanda lu irá ni cayabe lii ri la? zalá luʼ ne laca zulá lu cani cusiidi luʼ» (1 Tim. 4:16).

CANCIÓN sjj 58 Ruyúbinu cani nachaʼhuiʼ

^ párrafo 5 Biʼniʼ mandar Jesús laanu guni predicarnu ca noticia galán stiʼ Reinu ne gacanenu binni gaca discípulo. Lu artículo riʼ zazíʼdinu ximodo zanda guni cumplirnu né guiráʼ ni nuu lu ministeriu stinu dede né ora gaca nagana para laanu gúninu ni. Laaca zazíʼdinu ximodo gusíʼdinu jma jneza ne guni disfrutarnu jma ora guni predicarnu.

^ párrafo 4 IDEA RISACA: Ora caninu de ministeriu cristianu la? caninu de gadxé gadxé faceta de predicación ne enseñanza, construcción ne mantenimientu stiʼ ca edificiu ni riquiiñenu para guni adorarnu Dios, ne ca labor de socorro (Hech. 11:29; 2 Cor. 5:18, 19).

^ párrafo 13 Biindaʼ gadxe cosa ni zacané lii lu recuadru ni láʼ «Ximodo zanda guibáninu né ni caquiiñesinu» ni biree lu revista Torre stiʼ ni rapa lu beeu julio de 2016, yaza 10.

^ párrafo 62 NI RIHUINNI LU CA FOTO CA: Culuíʼ ti hermana ximodo zanda gusaananu ti revista lu reunión ni raca ndaaniʼ semana. Despué rucaabe ndaaniʼ folletu Gusíʼdinu jma jneza conseju ni bidii presidente de reunión laabe. Ne fin de semana la? caguíxhebe en práctica ni biziidibe.