Biiyaʼ guiraʼ ni nuu lu sitiu riʼ

guyé lu índice

Joseph Rutherford ne xcaadxi hermanu dxi yegánnacabe ca hermanu de Europa.

1920: raca ti gayuaa iza

1920: raca ti gayuaa iza

LU IZA 1920, napa xquidxi Jehová stale gana para gúnicaʼ dxiiñaʼ ni cabeza laacaʼ. Gulícabe ca diidxaʼ riʼ para textu stiʼ iza 1920: «Stipa stinneʼ ne canción stinneʼ nga JAH» (Sal. 118:14, Reina-Valera, 1909).

Guluu ndaayaʼ Jehová ca hermanu ni biʼniʼ predicar né stale gana. Lu iza que, nuu 225 colportor o precursor, peru despué gúcacabe 350. Ne jma de xhono mil trabajador de clase o publicador de congregación biseendacaʼ informe sticaʼ ra oficina central. Biʼniʼ Jehová xiixa para gusihuinni cayuulaʼdxiʼ ni cayúnicabe.

BIʼNIʼ PREDICARCAʼ NÉ STALE GANA

Joseph Rutherford, ni runi dirigir dxiiñaʼ stiʼ ca Binni Ruundaʼ Biblia, bidii ti discursu 21 de marzo de 1920 ni biree lá «Millón binni ni nabani yanna maʼ qué záticaʼ». Biʼniʼ ca Binni Ruundaʼ Biblia guiráʼ ni nuu lu nacaʼ para guni invitarcaʼ binni ni riuulaʼdxiʼ guiziidiʼ. Biʼniʼ rentárcabe tobi de ca teatru jma naroʼbaʼ ni nuu ndaaniʼ guidxi Nueva York ne gudiizicaʼ biaʼ 320,000 invitación.

Ti anunciu ni biree lu periódicu stiʼ discursu ni láʼ «Millón binni ni nabani yanna maʼ qué záticaʼ».

Stale binni ni guca invitar guyé. Jma de gaayuʼ mil binni guyé, bidxá auditorio que, ne biaana gadxe mil binni fuera. Revista riʼ ni biree lu diidxaʼ inglés guníʼ «ndiʼ nga tobi de ca reunión stiʼ ca Binni Ruundaʼ Biblia ni nuu lu guidubi Guidxilayú ra guyé stale binni».

Stale binni binibiáʼ ca Binni Ruundaʼ Biblia purtiʼ guniʼcaʼ «millón binni ni nabani yanna maʼ qué záticaʼ». Para tiempu que, caʼruʼ guiene chaahuicabe cayaadxaruʼ gaca predicar mensaje stiʼ Reinu. Neca zacá, nápacabe stale gana para gúnicabe dxiiñaʼ riʼ. Sicaríʼ guníʼ Ida Olmstead, ti gunaa ni bizulú guyé reunión lu iza 1902: «Nánnadu zacaa binni stale ndaayaʼ, nga runi siempre gunínedu binni de Reinu riʼ ratiica si guidxéladu laacabe».

BIʼNIʼ IMPRIMIRCAʼ PUBLICACIÓN STICAʼ

Para gapa ca hermanu guendaró espiritual la? bizulú biʼniʼ imprimir ca hermanu ni nuu Betel ca publicación sticaʼ. Guzíʼcabe ti equipu ni caquiiñecabe ne biʼniʼ instalárcabe ni lu ti edificiu ni biʼniʼ alquilárcabe, guyuu ni avenida Myrtle, númeru 35 ndaaniʼ guidxi Brooklyn (Nueva York), caadxi cuadra de ra nuu Betel.

Bizulú biʼniʼ servir Leo Pelle ne Walter Kessler Betel lu enero de 1920. Walter guníʼ: «Ora yendadu raqué, biiyadxí hermanu ni nuu encargadu de imprenta que laadu ne guníʼ: “Cayaadxaʼ ti hora arondaʼ para chidoʼno”. Ngue runi gúdxibe laadu cúbadu caadxi caja ni nuu ndaaniʼ sótano stiʼ edificiu que».

 Leo bizeeteʼ xi bíʼnicabe sti dxi que, laa guníʼ: «Bisiadu ca pader stiʼ ca cuartu ni nuu lu primé pisu stiʼ edificiu que. Guizáʼ nabiidiʼ raqué, peru bínidu dxiiñaʼ que né stale gana purtiʼ para Señor ni».

Prensa plana ni biʼniʼ imprimir The Watch Tower.

Chupa chonna semana despué maʼ cayuni imprimir caadxi voluntariu revista The Watch Tower (lu diidxastiá biree lani La Torre del Vigía). Lu prensa ni nuu lu guiropa pisu que guca imprimir 60,000 copia stiʼ revista 1 de febrero de 1920. Ne ndaaniʼ sótano stiʼ edificiu que biʼniʼ instalar ca hermanu que ti máquina para guni imprimircaʼ ne gulee lácabe ni Acorazado. Laaca biʼniʼ imprimírcabe revista The Golden Age, ni runibiaʼnu yanna casi ¡Gutaná! Primé revista ni guca imprimir raqué nga 14 de abril de 1920. Rihuinni dxichi guluu Jehová ndaayaʼ dxiiñaʼ nadipaʼ ni biʼniʼ ca hermanu que.

«Bínidu dxiiñaʼ que né stale gana purtiʼ para Señor ni»

«CHUʼNU EN PAZ»

Ca xpinni Jehová ni guca leal bíʼnirucaʼ xhiiñabe ne guyuucaʼ tobi si né ca hermanu sticaʼ. Peru caadxi de ca Binni Ruundaʼ Biblia bixélecaʼ de xquidxi Dios lu iza 1917 hasta 1919, caadxi iza nabé nagana. ¿Ximodo gucané xquidxi Dios laacabe yaʼ?

Lu revista The Watch Tower ni biree 1 de abril de 1920, beeda ti tema ni láʼ «Chuʼnu en paz», raqué zeeda ca diidxaʼ riʼ: «Nanna dxíchidu [...] ca ni napa espíritu stiʼ Señor [...] nuucaʼ dispuestu gusiaandacaʼ ca cosa ni maʼ guca, [...] chuʼcaʼ en paz ne gúnicaʼ dxiiñaʼ juntu casi ti cuerpu si».

Gucané ca diidxaʼ riʼ stale hermanu. Ti guendaxheelaʼ guníʼ: «Bidiʼdu cuenta cadi jneza ni bínidu, biaanadu jma de ti iza sin ñuni [predicardu] mientra xcaadxi cayúnini. [...] Qué ziuuruʼ dxi guixéledu». Despué de biguetaʼ ca hermanu riʼ ndaaniʼ xquidxi Dios, bidiicaʼ cuenta nuu stale dxiiñaʼ ni gúnicaʼ.

GUDIIZICABE «ZG»

Bizulú ca Binni Ruundaʼ Biblia ti campaña 21 de junio de 1920 ne gudiizicaʼ «ZG», laani nga libru The Finished Mystery (El misterio  terminado). * Guluu chaahuicabe stale de ca libru riʼ dxi guca prohibir ni lu iza 1918.

Guca invitar ca trabajador de clase ne ca colportor guni participarcaʼ lu campaña riʼ. Sicaríʼ bizeeteʼ ti publicación: «Guiráʼ ni nuu ndaaniʼ congregación, ca ni maʼ guyuunisa ni zanda guni participar naquiiñeʼ guni ni né stale gana. Ndiʼ nga ni naquiiñeʼ guiníʼ de guiráʼ: “Ni runeʼ nga riguiizeʼ ZG”». Edmund Hooper guníʼ ndiʼ nga primé biaje guni predicar stale hermanu de yoo pur yoo. Ne laaca guniʼbe: «Bidiʼdu cuenta zaroobaʼ dxiiñaʼ riʼ ne zindá ni ca lugar ra qué lica niníʼ íquedu».

BIZULÚ GUCA XHIIÑAʼ DIOS STI BIAJE EUROPA

Yeganna hermanu Rutherford ca Binni Ruundaʼ Biblia de xcaadxi guidxi, ca ni qué ñanda niniʼnécabe tiempu guca Primera Guerra Mundial, guluu hermanu riʼ gana laacabe ne gudixhe chaahuiʼ modo gaca predicar raqué sti biaje. Nga runi, 12 de agosto de 1920, laabe ne xtapa hermanu bíʼnicabe ti viaje Gran Bretaña, Europa continental ne Oriente Medio.

Hermanu Rutherford dxi guyé Egipto.

Ca Binni Ruundaʼ Biblia de Gran Bretaña bíʼnicaʼ 3 asamblea ne 12 reunión. Zándaca guyé biaʼ 50,000 binni. Sicaríʼ guníʼ revista riʼ de ni guca raqué: «Gutadxí ladxidóʼ ca hermanu ne guyuucaʼ gana. Jmaruʼ si gunnaxhiicaʼ ne bíʼnicaʼ xhiiñaʼ Dios. Ne maʼ qué ñuucabe triste, sínuque guyuucabe nayecheʼ». Ndaaniʼ guidxi París, bidii hermanu Rutherford discursu ni láʼ «Millón binni ni nabani yanna maʼ qué záticaʼ», discursu ni maca bidiibe. Bidxá tipa auditorio que. Ora bilúxebe discursu que, chonna gayuaa binni gunabaʼ jma información.

Ti cartel ra cá bidii hermanu Royal Albert Hall discursu ndaaniʼ guidxi Londres.

Ne caadxi semana despué guyé caadxi hermanu Atenas, El Cairo ne Jerusalén. Para gaca tender ca binni ni nuu ca lugar riʼ, bixeleʼ Rutherford ti almacén de publicación ndaaniʼ guidxi Ramala, gaxha de guidxi Jerusalén. Despué biguétabe Europa ne bíʼnibe Oficina de Europa Central, raqué laaca guca imprimir publicación.

GUNÍʼCABE CAYACA TI INJUSTICIA

Lu septiembre de 1920, biree revista númeru 27 stiʼ The Golden Age, ne galán ni ná  revista riʼ purtiʼ guniʼni guzananda gobiernu ca Binni Ruundaʼ Biblia lu iza 1918. Máquina ni gulee lácabe Acorazado, biʼniʼ imprimir ni jma de tapa millón de revista riʼ.

Foto ni guleecabe Emma Martin ra cárcel.

Ca binni ni biʼndaʼ revista riʼ biindacaʼ ni bizaaca Emma Martin, ti colportora de San Bernardino (California, Estados Unidos). Laabe ne xhonna hermanu, Edward Hamm, Edward Sonnenburg ne Ernest Stevens, guyécabe ti reunión stiʼ ca Binni Ruundaʼ Biblia 17 de marzo de 1918.

Tobi de ca hombre ni nuu ra reunión, guyé peru cadi para guiziidiʼ de Biblia. Despué guniʼbe: «Guyaaʼ reunión purtiʼ biseendaʼ ti binni de gobiernu naa raqué para guyubeʼ prueba». Ne bidxélabe ni, libru ni láʼ El misterio terminado. Caadxi dxi despué, gunaazecabe hermana Martin ne guionnaʼ hermanu que. Guníʼ gobiernu biʼniʼ violárcabe Ley de Espionaje purtiʼ gudiizicabe ti libru ni nuu prohibidu.

Guni gobiernu napa ca hermanu riʼ donda ne napa xidé guieguyoocabe chonna iza ndaaniʼ cárcel. Últimu biaje gunda gunábacabe chécabe nezalú juez nga 17 de mayo de 1920, ne dede dxi que bideguyoocabe. Peru bizaaca xiixa ni cadi cabézacabe.

Lu ti asamblea ni guca ndaaniʼ guidxi San Francisco (California) 20 de junio de 1920, guníʼ hermanu Rutherford ni bizaaca ca hermanu riʼ. Qué ñuulaʼdxiʼ ca ni guyé asamblea que modo biʼniʼ tratar gobiernu ca hermanu riʼ, ngue runi biseendacabe ti telegrama ra nuu presidente de Estados Unidos. Sicaríʼ ná telegrama que: «Rábidu ti injusticia nga ni cayúnitu [...] señora Martin [...] pur ley de [...] espionaje. [...] Cadi jneza ni biʼniʼ [...] ca agente federal purtiʼ biquiiñecaʼ autoridad sticaʼ para [...] quíxhecaʼ ti trampa [...] señora Martin [...] ne despué biyúbicaʼ modo guseguyoocaʼ laabe».

Sti dxi que, guníʼ presidente Woodrow Wilson naquiiñeʼ guiree hermana Martin ne hermanu Hamm, Sonnenburg ne Stevens de ndaaniʼ cárcel. Dxi que nga biluxe injusticia ni bíʼnicabe ca hermanu riʼ.

Ra maʼ ziluxe iza 1920, guizáʼ biecheʼ ca Binni Ruundaʼ Biblia. Ziroobaʼ dxiiñaʼ ni raca ra oficina central ne ca ni dxandíʼ xpinni Cristu cayuni predicarcaʼ Reinu stiʼ Dios si nga zabee ca guendanagana napa binni (Mat. 24:14). Lu iza 1921 nga ti iza jma galán para guni predicárcabe.

^ párrafo 18 El misterio terminado nga volumen 7 stiʼ Estudios de las Escrituras. «ZG» nga ti edición de pasta naguudxi, guca imprimir ni né fecha 1 de marzo de 1918 cásica raca imprimir revista The Watch Tower. «Z» nga primé letra stiʼ Zionʼs Watch Tower, ne «G» nga letra númeru gadxé stiʼ abecedariu, purtiʼ volumen 7 ni.