1. ¿Xi mandatu bidii Jesús lu Mateo 28:18-20?

BIASA si Jesús de lade gueʼtuʼ, guyé ra nuu ca discípulo stiʼ dxi dagulisaacaʼ Galilea. Nápabe ti cosa risaca gábibe laacaʼ. ¿Xii ni yaʼ? Zanda guidúʼndanu ni lu Mateo 28:18-20 (biindaʼ ni).

2. ¿Xi chonna pregunta chiguicábinu lu artículo riʼ?

² Guiranu ni rúninu ni ná Dios tiempu riʼ laaca naquiiñeʼ chinándanu mandatu ni bidii Jesús laanu de gacanenu binni gaca discípulo. Nga runi, guidúʼyanu chonna pregunta ni zacané laanu guiníʼ íquenu pabiáʼ risaca dxiiñaʼ bidii Jesús laanu. Primé, ¿xiruʼ naquiiñeʼ gúninu aparte de gusíʼdinu tuuxa ca norma stiʼ Dios? Guiropa, ¿ximodo zanda gacané ca hermanu de congregación ti estudiante guni progresar? Guionna, ¿ximodo zanda gacanenu ca hermanu inactivu guni predicarcaʼ sti biaje?

3. ¿Xi biʼniʼ mandar Jesús laanu gúninu?

³ Guníʼ Jesús naquiiñeʼ gusíʼdinu binni ni biʼniʼ mandarbe. Nabé risaca gánnanu cadi guníʼ si Jesús «lagusiidiʼ laacaʼ guiráʼ ni maʼ bineʼ mandar laatu», sínuque guniʼbe «lagusiidiʼ laacaʼ gúnicaʼ guiráʼ ni maʼ bineʼ mandar laatu».  Pa racaláʼdxinu gúninu ni guníʼ Jesús, caquiiñeʼ gusíʼdinu estudiante stinu xi guni, peru laaca naquiiñeʼ gacanenu laabe gánnabe ximodo gúnibe ni (Hech. 8:31). ¿Xiñee yaʼ?

4. Bizeeteʼ ti ejemplu para gusiéneluʼ ximodo zanda gusíʼdinu ti binni guni ni biʼniʼ mandar Cristu.

⁴ ¿Ximodo zanda gusíʼdinu ti binni guni ni biʼniʼ mandar Cristu? Guzéʼtenu ti ejemplu. ¿Xi runi tuuxa ni cusiidiʼ ti binni gusá carru para chinanda ca ley de tránsito? Zándaca primeru zabi laabe ximodo gusabe ti carru. Peru pa racaláʼdxibe chinanda binni ca ley de tránsito la? naquiiñeʼ gúnibe sti cosa. Naquiiñeʼ chinebe binni ca lu carretera para guni ni maʼ bisiidibe laa. ¿Xi rusiidiʼ ndiʼ laanu yaʼ?

5. a) Casi ná Juan 14:15 ne 1 Juan 2:3, ¿xi naquiiñeʼ gusíʼdinu estudiante stinu? b) Bizeeteʼ caadxi modo zanda gúninu ni.

⁵ Ora rudiʼnu estudiu ti binni rusíʼdinu laa xi racalaʼdxiʼ Dios gúninu. Peru cadi ngasi, laaca naquiiñeʼ gusíʼdinu laabe ximodo gúnibe ni caziidibe lu xquendanabánibe (biindaʼ Juan 14:15; 1 Juan 2:3). Né ejemplu stinu zanda gusíʼdinu laabe ximodo chinándabe ca principiu zeeda lu Biblia ra scuela, ra dxiiñaʼ ne ora cuibe xiixa entretenimientu. Laaca zanda güínenu laabe xiixa experiencia para gúʼyabe ximodo gupa ca conseju zeeda lu Biblia laanu o ximodo gucaneni laanu guicaanu ti decisión galán. Ne ora guni orarnu né estudiante stinu guinábanu Jehová gacané laabe né espíritu santu stiʼ (Juan 16:13).

6. ¿Xiruʼ naquiiñeʼ gúninu para gusíʼdinu xcaadxi gúnicaʼ ni biʼniʼ mandar Jesús?

⁶ ¿Xiruʼ naquiiñeʼ gúninu para gusíʼdinu xcaadxi gúnicaʼ ni biʼniʼ mandar Jesús? Naquiiñeʼ gacanenu estudiante stinu chuulaʼdxiʼ gacané binni gaca discípulo. Nuu estudiante nabé ridxibi ora riníʼ ique chiguni predicar. Nga runi naquiiñeʼ gacanenu laacabe né paciencia para guiénecabe ni rusiidiʼ Biblia ti gaca fe stícabe jma naguidxi ne chuuláʼdxicabe guni predicárcabe. ¿Xi zanda gúninu para gacanenu laacabe chuuláʼdxicabe guni predicárcabe ca noticia galán yaʼ?

7. ¿Xi zanda gúninu para gacanenu estudiante stinu chuulaʼdxiʼ guni predicar?

⁷ Zándaca naquiiñeʼ gúninu estudiante stinu ca pregunta riʼ: «¿Ximodo maʼ bichaa xquendanabániluʼ dede dxi caziidiluʼ de Jehová? ¿Ñee rábiluʼ caquiiñeʼ gunibiáʼ xcaadxi binni de Reinu stiʼ Dios la? ¿Xi zanda gúniluʼ para gacaneluʼ laacabe?» (Prov. 3:27; Mat. 9:37, 38). Guluinu laabe ca tratadu ni nápanu ne guinabadiidxanu laabe gunáʼ de laacani rábibe ziuulaʼdxiʼ familia stibe, ca xhamígube o ca compañeru stibe. Gudiʼnu laabe chupa chonna tratadu ni chuuláʼdxibe ne guni ensayarnenu laabe para guiziidibe ximodo guni ofrecerbe cani. Ne ora gácabe publicador ni caʼruʼ chúʼnisa zacanérunu laabe (Ecl. 4:9, 10; Luc. 6:40).

8. ¿Xiñee nabé risaca gannaxhii estudiante stinu Dios ne prójimo stiʼ? (Laaca zanda gúʼyaluʼ recuadru ni láʼ « Ximodo zanda gacanenu estudiante stinu gannaxhii Dios jma»).

⁸ Cadi guiaandaʼ laanu guníʼ Jesús gusíʼdinu xcaadxi guni guiráʼ ni biʼniʼ mandarbe. Lade cani nuu guiropaʼ mandamientu jma risaca, gannaxhiinu Dios ne prójimo stinu (Mat. 22:37-39). Pa gusíʼdinu estudiante stinu guni ni ná ca  mandamientu riʼ, zacanenu laabe para guni predicarbe. Normal nga guidxibi ca estudiante guni predicarcaʼ, peru zanda gábinu laacabe zacané Jehová laacabe para cadi guidxíbicabe binni (Sal. 18:1-3; Prov. 29:25). Lu artículo riʼ zeeda ti recuadru ni cusiene ximodo zanda gacanenu estudiante stinu gannaxhii Dios jma. Laaca zanda gacané ca hermanu de congregación ca estudiante ti gannaxhiicaʼ Dios ne binni jma. Guidúʼyanu ximodo zanda gúnibe ni.

9. ¿Ximodo riziidiʼ ti binni gusá carru?

⁹ Guininu sti biaje de ti binni ni caziidiʼ gusá carru. Laga zigusabe carru, cadi cayunadiágasibe ni cayabi binni ni cusiidiʼ laabe, sínuque laaca caziidibe ora ruuyabe ni runi xcaadxi binni ni zigusá carru. Guzéʼtenu ti ejemplu, zándaca guinabaʼ binni ni cusiidiʼ laabe ca gúʼyabe ximodo cudii sti conductor lugar tidiʼ sti carru ante que laa. O zándaca gabi laabe gúʼyabe ximodo rindeteʼ sti conductor biaaniʼ carru stiʼ para cadi guniná lú sti binni ni zeeda frente de laa. Ca ni bizéʼtenu riʼ zanda gacaneni binni ni caziidiʼ gusá carru.

10. ¿Xi zacané ti estudiante guni progresar?

¹⁰ Ngaca rizaaca ne ti estudiante ni deruʼ caziidiʼ, caziidibe de maestru stibe peru laaca zanda guiziidibe de ejemplu galán stiʼ xcaadxi xpinni Jehová. Nga runi nabé risaca cadi guiaadxabe reunión para guni progresarbe. Ni gunadiágabe ra reunión zacaneni laabe guiziidibe jma, gaca fe stibe jma naguidxi ne gannaxhiibe Dios jma (Hech. 15:30-32). Ne cadi ngasi, laaca zanda guni presentar maestru stibe laabe xcaadxi hermanu ne hermana ni gudiʼdiʼ lu ca guendanagana ni cadíʼdibe. ¿Xi ejemplu galán zanda guʼyaʼ estudiante ca ra reunión yaʼ? Guidúʼyanu caadxi de laacani.

11. ¿Xi zanda guizaaca ndaaniʼ congregación ne ximodo zanda gacaneni ti estudiante?

¹¹ Ti estudiante ni cusiniisi ca xiiñiʼ stubi ruuyaʼ ti hermana ra reunión ni cusiniisi ca xiiñiʼ stubi. Guizáʼ ridxagayaabe pabiáʼ stipa runi hermana ca para cadi guiaadxaʼ reunión né ca xiiñiʼ. Sti estudiante ni cayuni stipa para maʼ cadi cubaʼ gueza runibiáʼ ti publicador ni gudiʼdiʼ laaca ra cadíʼdibe. Hermanu riʼ gudxi laabe guendarannaxhii ni runi sentir pur Jehová nga ni bicaa laa chinanda ca principiu ni zeeda lu Biblia ne gusaana viciu que (2 Cor. 7:1; Filip. 4:13). Despué de guniʼné hermanu riʼ laabe historia stiʼ ne gudxi laabe laaca zanda gusaanabe viciu ca la? guizáʼ guyuu estudiante riʼ gana. Últimu la? ti baʼdudxaapaʼ ni cacaa estudiu ruuyaʼ ti hermana joven biaʼca laa nabé nayecheʼ nuu purtiʼ Testigu laa. Nga rucaa laabe guinabadiidxabe xiñee nayecheʼ nuu hermana riʼ.

12. ¿Xiñee zanda guininu de guiranu zanda gacanenu para guni progresar ti estudiante?

¹² Ora runibiáʼ estudiante stinu xcaadxi hermanu ruuyabe ximodo nga rinanda tuuxa mandatu ni bidii Jesús de gannaxhiinu Dios ne gannaxhiinu prójimo stinu (Juan 13:35; 1 Tim. 4:12). Laaca zanda guiziidiʼ estudiante riʼ de ejemplu stiʼ ca hermanu ni cadiʼdiʼ lu ca guendanagana ni cadíʼdibe. Zacá rudiibe cuenta zanda guchaabe para gácabe discípulo stiʼ Cristu (Deut. 30:11). Casi maʼ bidúʼyanu ca, de guiranu zanda gacanenu para guni progresar ti estudiante (Mat. 5:16). Nga runi, cada tobi naquiiñeʼ guinabadiidxaʼ: «¿Xi cayuneʼ para gacaniáʼ ca estudiante ni rié reunión?».

13, 14. ¿Ximodo biʼniʼ tratar Jesús ca apóstol stiʼ dxi nuucaʼ triste?

¹³ Racaláʼdxinu gacanenu ca hermanu inactivu guibiguetaʼ gúnicaʼ dxiiñaʼ ni bidii Cristu laanu, gacanenu binni gaca discípulo. Para gánnanu ximodo gúninu ni guietenaláʼdxinu ximodo biʼniʼ tratar Jesús ca apóstol stiʼ dxi nuucaʼ triste.

¹⁴ Dxi mayaca gatiʼ Jesús, bisaana ca apóstol stiʼ laa (Mar. 14:50; Juan 16:32). ¿Ximodo biʼniʼ tratar Jesús laacabe dxi nuucabe triste yaʼ? Guidúʼyanu xi bíʼnibe despué de biásabe de lade gueʼtuʼ. Biseendabe caadxi gunaa xpínnibe chitídxicaʼ ca apóstol maʼ biásabe de lade gueʼtuʼ. Gúdxibe laacaʼ: «Cadi guidxíbitu. Laché, lagabi ca bicheʼ checaʼ Galilea; raqué zuuyacaʼ naa» (Mat. 28:10a). Neca bisaana ca apóstol que Jesús, qué nucaanabe laacaʼ, sínuque gúdxibe laacaʼ bíchecaʼ. Yenanda Jesús ejemplu stiʼ Jehová purtiʼ biabe ne biʼniʼ perdonarbe ca discípulo stibe (2 Rey. 13:23).

15. ¿Xi runi sentirnu pur ca hermanu ni maʼ qué runi predicar?

¹⁵ Laaca riuʼnu xizaa pur ca hermanu ni maʼ qué runi predicar. ¿Xiñee yaʼ? Purtiʼ hermanu ruʼ stinu laacabe ne nadxiinu laacabe. Qué rusiáʼndanu guiráʼ ni bíʼnicabe pur Jehová dxiqué ne nuu de laacaʼ biʼniʼ cani pur stale iza (Heb. 6:10). Guizáʼ ribánanu laacabe (Luc. 15:4-7). ¿Ximodo zanda chinándanu ejemplu stiʼ Jesús ne guizaaláʼdxinu ca hermanu stinu ni nuu inactivu yaʼ?

16. ¿Xi zanda gúninu para gusihuínninu rizaaláʼdxinu ca hermanu inactivu?

¹⁶ Guni invitarnu laacabe reunión. Tobi de ca cosa ni biʼniʼ Jesús dxi nuu ca apóstol stiʼ triste nga biʼniʼ invitarbe laacaʼ ti reunión (Mat. 28:10b; 1 Cor. 15:6). Tiempu riʼ, laaca zanda guni invitarnu ca hermanu inactivu checaʼ reunión. Peru zándaca caquiiñeʼ guni invitarnu laacabe stale biaje para chécabe. Nanna dxíchinu guizáʼ biecheʼ Jesús dxi gucuaa ca discípulo stiʼ invitación ni bíʼnibe laacaʼ, laanu laaca zanda guni sentirnu zacá (Mat. 28:16; bichaaga ni né Lucas 15:6).

17. ¿Xi naquiiñeʼ gúninu pa cheʼ ti hermanu inactivu reunión?

¹⁷ Guidxaagalunu laacabe galán. Ora biʼyaʼ Jesús ca apóstol stiʼ, bidxíñabe ne guníʼnebe laacaʼ para guni sentircaʼ galán (Mat. 28:18). ¿Xi gúninu pa gúʼyanu ziyuu ti hermanu inactivu ra Yoo stiʼ Reinu? Naquiiñeʼ guidxíñanu laabe ne guidxaagalunu laabe galán. Zándaca qué zadxélanu xi gábinu laabe peru zanda gábinu laabe cayéchenu guyebe reunión.

18. ¿Ximodo zanda uguʼnu gana ne gacanenu ca hermanu inactivu gápacaʼ confianza?

¹⁸ Uguʼnu gana laacabe ne gacanenu laacabe gápacabe confianza. Zándaca nabé guyuu ca discípulo stiʼ Jesús xizaa ora gúnnacaʼ napa xidé guni predicarcaʼ lu guidubi Guidxilayú. Peru gudixhedxí Jesús ladxidoʼcaʼ ora gúdxibe laacaʼ: «Qué ziuu dxi guixeleʼ de laatu» (Mat. 28:20). Ne pur ngue la? qué nusaanacaʼ de nusiidicaʼ ne biʼniʼ predicarcaʼ ca noticia galán stiʼ Cristu sin guiaanadxicaʼ (Hech. 5:42). Laaca naquiiñeʼ uguʼnu gana ca publicador inactivu ne gacanenu laacaʼ gápacaʼ confianza, zándaca guidxíbibe ora guiníʼ íquebe guni predicarbe sti biaje. Zanda gábinu laabe cadi stúbibe zuni predicarbe dede zanda guni invitarnu  laabe guireenebe laanu predicación ora rábibe maʼ zanda. Nuunu seguru zudiibe xquixe peʼ laanu. Pa guidúʼyanu laacabe ne guni tratarnu laacabe casi ca hermanu stinu la? nanna dxíchinu ziecheʼ congregación stinu ora guni predicárcabe sti biaje.

19. ¿Xii nga ni jma racaláʼdxinu ne xiñee?

¹⁹ ¿Padxí guiaanadxinu de gacanenu binni gaca discípulo? Dede ra guiluxe sistema (Mat. 28:20; biiyaʼ glosario, «ra guiluxe sistema»). ¿Ñee zuni cumplirnu né mandatu bidii Jesús laanu la? Maʼ gudixhe íquenu gúninu ni. Iquiiñenu tiempu stinu, stipa stinu ne guiráʼ ni nápanu para gacanenu «ca ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» (Hech. 13:48). Zacá rinándanu ejemplu stiʼ Jesús ora guníʼ: «Guendaró stinneʼ nga guneʼ ni ná ni biseendaʼ naa ne guiluxe xhiiñaʼ» (Juan 4:34; 17:4). Ni jma racaláʼdxinu nga gundúʼxenu dxiiñaʼ ni maʼ gucuaanu (Juan 20:21). Ne racaláʼdxinu guiráʼ ca hermanu stinu dede ca inactivu guninecaʼ laanu dxiiñaʼ riʼ dede ora gueeda fin (Mat. 24:13).

20. Casi ná Filipenses 4:13, ¿xiñee zanda guni cumplirnu ne dxiiñaʼ ni bidii Jesús laanu?

²⁰ Naquiiñeʼ guietenaláʼdxinu cadi fácil dxiiñaʼ bidii Jesús laanu. Peru cadi stúbinu nuunu purtiʼ biʼniʼ prometerbe ziuube gaxha de laanu. Rúninu ni ná mandatu ni bidii Jesús laanu ne cayacanenu binni gaca discípulo purtiʼ rúninenu Dios dxiiñaʼ casi discípulo stiʼ Cristu (1 Cor. 3:9; 2 Cor. 2:17). Nga runi zanda gúninu dxiiñaʼ riʼ. Guizáʼ galán guni cumplirnu né privilegiu riʼ ne gacanenu xcaadxi gúnini (biindaʼ Filipenses 4:13).