Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 10

Pa gannaxhiinu Jehová zucaani laanu chuʼnísanu

Pa gannaxhiinu Jehová zucaani laanu chuʼnísanu

«¿Xi cucueeza naa de chuaanisaʼ yaʼ?» (HECH. 8:36).

CANCIÓN 37 Zuneʼ ni ná Jiobá de guidubi ladxiduáʼ

NI ZAZÍʼDINU *

1, 2. Casi ná Hechos 8:27-31, 35-38, ¿xiñee guyuunisa hombre ni biʼniʼ dxiiñaʼ para reina stiʼ guidxi Etiopía?

¿RACALÁʼDXILUʼ chuʼnísaluʼ ne gácaluʼ discípulo stiʼ Cristu la? Stale binni riuunisa purtiʼ nadxiicaʼ Jehová ne purtiʼ rudiicaʼ xquixe peʼ laabe pur guiráʼ ni maʼ bíʼnibe pur laacaʼ. Guzéʼtenu ni bizaaca ti hombre ni biʼniʼ dxiiñaʼ para reina stiʼ guidxi Etiopía.

2 Casi peʼ biene hombre riʼ ná Stiidxaʼ Dios caquiiñeʼ chúʼnisa la? guyuunisa (biindaʼ Hechos 8:27-31, 35-38). Ne bíʼnibe ni purtiʼ rusisácabe Stiidxaʼ Dios, purtiʼ laga zebe lu carru stibe ziyuundabe ti relatu ni zeeda lu libru stiʼ Isaías. Ne ora bisiene Felipe laabe ni biʼniʼ Jesús pur laabe la? bidiibe xquixe peʼ Dios. Ne nánnanu nadxiibe Jehová, purtiʼ zeedabe de Jerusalén ra yeguni adorarbe Jehová. Bisaanabe religión stibe ne yanna maʼ nuube ndaaniʼ ti guidxi ni runi ni ná Dios ni dxandíʼ. Ne cumu nadxiibe Jehová, bicaani laabe gúnibe sti cosa nabé risaca, chuʼnísabe ne gácabe discípulo stiʼ Cristu (Mat. 28:19).

3. ¿Xi zanda gucueeza ti binni para cadi chúʼnisa? (Biiyaʼ recuadru ni láʼ « ¿Xi tipu layú zeeda gaca ladxidoʼloʼ?»).

3 Guendarannaxhii ni nápaluʼ Jehová zanda gucaani lii chuʼnísaluʼ. Peru pa gannaxhiiluʼ xcaadxi cosa zanda gucueeza cani lii para cadi chuʼnísaluʼ. Guzéʼtenu ti ejemplu, zándaca nadxiiluʼ familia stiluʼ ne ca xhamíguluʼ ni  cadi Testigu ca ni riníʼ ique maʼ qué zannaxhiiluʼ laacaʼ pa chuʼnísaluʼ (Mat. 10:37). O zándaca raca nagana para lii gusaanaluʼ caadxi costumbre ni nanalaʼdxiʼ Dios (Sal. 97:10). O dede nahuiiniluʼ guyeluʼ ca saa ni zeeda de ca religión falsu ne rietenaláʼdxiluʼ pabiáʼ nayecheʼ guyuuluʼ dxi guyeluʼ cani, ne pur nga raca nagana para lii gusaanaluʼ ca saa ni qué riuulaʼdxiʼ Jehová (1 Cor. 10:20, 21). Nga runi caquiiñeʼ guiníʼ íqueluʼ xi cosa o tu laa jma zannaxhiiluʼ.

GUENDARANNAXHII NI JMA RISACA

4. ¿Xi naquiiñeʼ gucaa lii chuʼnísaluʼ?

4 Nuu stale cosa ni nadxiiluʼ ne rusisácaluʼ, ne cadi malu diʼ gúniluʼ ni. Guzéʼtenu ti ejemplu, zándaca ante guni estudiárneluʼ ca testigu stiʼ Jehová, nabé rusisácaluʼ Biblia ne nadxiiluʼ Jesús. Yanna, ra maʼ runibiaʼluʼ ca Testigu, zándaca riuuláʼdxiluʼ guidxaagaluʼ laacabe. Peru ca ni bizéʼtenu riʼ qué zacanécani lii gaca dedicarluʼ Jehová ne chuʼnísaluʼ. Pa gannaxhiiluʼ Dios la? zucaani lii chuʼnísaluʼ. Ora gannaxhiiluʼ Jehová jma que xcaadxi cosa la? qué zudiiluʼ lugar gucueeza cani lii o gucueeza tuuxa binni lii de gúniluʼ ni nabe. Nga runi, qué racané si guendarannaxhii nápanu Jehová laanu chuʼnísanu, sínuque laaca racaneni laanu cadi gusaana de gúninu ni ná Dios.

5. ¿Xi zazíʼdinu lu artículo riʼ?

5 Jesús guníʼ caquiiñeʼ gannaxhiinu Jehová de guidubi ladxidoʼno, xhiálmanu, xquendabiaaninu ne guiráʼ stipa stinu (Mar. 12:30). ¿Ximodo zanda guiziidiluʼ gannaxhiiluʼ ne guni respetarluʼ Jehová casi guníʼ Jesús yaʼ? Ra guietenaláʼdxiluʼ pabiáʼ nadxiibe lii (1 Juan 4:19). Lu artículo riʼ zazíʼdinu xi cosa caquiiñeʼ gúninu para gannaxhiinu Jehová jma ne chuʼnísanu.

6. Casi ná Romanos 1:20, ¿xi caquiiñeʼ gúniluʼ para guiziidiluʼ jma de Jehová?

6 Biziidiʼ de Jehová ora gúʼyaluʼ guiráʼ ni maʼ bizaʼbe (biindaʼ Romanos 1:20; Apoc. 4:11). Guníʼ ique pabiáʼ nuu xpiaaniʼ Jehová pur modo bizáʼ ca yaga ne ca maniʼ ca. Biʼniʼ investigar ximodo guyáʼ cuerpu stiʼ binni (Sal. 139:14). Ne guníʼ ique pabiáʼ stale energía napa gubidxa purtiʼ zacá bizáʼ Jehová ni, ne cadi guiaandaʼ lii laani nga tobi de ca mil millón beleguí ni bizaʼbe (Is. 40:26). * Ora gúniluʼ ni, zuni respetarluʼ Jehová jma. Ne ora maʼ biéneluʼ pabiáʼ nuu xpiaaniʼ ne napa Jehová poder, zacaneni lii gaca xhamíguluʼ laabe jma. Nga runi, para gannaxhiiluʼ laabe de guidubi ladxidoʼloʼ, caquiiñeʼ guiziidiluʼ jma de laabe.

7. ¿Xidé caquiiñeʼ chuʼluʼ seguru para ganda gannaxhiiluʼ Jehová de guidubi ladxidoʼloʼ?

7 Caquiiñeʼ chuʼluʼ seguru rizaalaʼdxiʼ Jehová lii. ¿Ñee raca nagana para lii guni creluʼ nanna Dios ni bizáʼ guiráʼ ni nuu nabániluʼ ne risácaluʼ para laa la? Pa zacá riníʼ íqueluʼ, cadi guiaandaʼ lii «cadi zitu diʼ» nuu Jehová «de cada tobi de laanu» (Hech. 17:26-28). Cásica gudxi David Salomón, cayuuyaʼ Dios «ximodo nuu ladxidóʼ guiráʼ binni». Ne cayuni prometer Dios lii, pa guyúbiluʼ laa, zudiibe lugar guidxélaluʼ laabe (1 Crón. 28:9). Nga runi, pa cayuni estudiarluʼ Biblia la? cayúniluʼ ni purtiʼ gulídxibe lii  ra nuube, casi ná Jeremías 31:3. Laga jma guiziidiluʼ xi guiráʼ maʼ biʼniʼ Jehová pur lii, jma zannaxhiiluʼ laabe.

8. ¿Ximodo zanda gusihuínniluʼ rudiiluʼ xquixe peʼ Jehová pur nadxii lii?

8 Zusihuínniluʼ rudiiluʼ xquixe peʼ Jehová pur nadxii lii ora runi orarluʼ laa. Zannaxhiiluʼ laabe jma pa gábiluʼ laabe ni naguu xizaa lii ne gudiiluʼ xquixe peʼ laabe pur guiráʼ ni maʼ bíʼnibe pur lii. Ne zaca xhamíguluʼ laabe jma ora gúʼyaluʼ ricábibe ca oración stiluʼ (Sal. 116:1). Ne ziuuluʼ seguru riene Dios lii. Nga runi, para guidxíñaluʼ Jehová jma, caquiiñeʼ guiníʼ íqueluʼ casi laabe ne gánnaluʼ xi racaláʼdxibe gúniluʼ. Ne zánnaluʼ ni pa guni estudiarluʼ Stiidxabe, Biblia.

Guni estudiarluʼ Biblia nga tobi de ca cosa ni zanda gúniluʼ para guidxíñaluʼ Dios ne gánnaluʼ xi racaláʼdxibe. (Biiyaʼ párrafo 9). *

9. ¿Ximodo zanda gusihuínniluʼ rusisácaluʼ Biblia?

9 Biziidiʼ gusisácaluʼ Stiidxaʼ Dios. Biblia si nga riníʼ ni dxandíʼ de Jehová ne ni racaláʼdxibe para lii. ¿Ximodo zanda gusihuínniluʼ rusisácaluʼ ni yaʼ? Ora gúʼndaluʼ ni guiráʼ dxi, gaca prepararluʼ ante gudiicabe lii estudiu ne ora gúniluʼ guiráʼ ni caziidiluʼ (Sal. 119:97, 99; Juan 17:17). ¿Ñee nápaluʼ ti horariu para gúʼndaluʼ Biblia guiráʼ dxi ne rinándaluʼ ni la?

10. ¿Xi ti cosa runi Biblia gadxé?

10 Ti cosa ni runi Biblia gadxé nga purtiʼ zeeda relatu ni guníʼ caadxi binni ni biiyaʼ peʼ Jesús luni. Ne Biblia si nga rusiene ni maʼ bíʼnibe pur lii. Ora guiéneluʼ ni guníʼ ne ni maʼ biʼniʼ Jesús pur lii, ziuuláʼdxiluʼ gácaluʼ xhamígube.

11. ¿Xi zacané lii gannaxhiiluʼ Jehová jma?

11 Biziidiʼ gannaxhiiluʼ Jesús. Pa gúniluʼ ni, zacaneni lii gannaxhiiluʼ Jehová jma purtiʼ rusihuinni Jesús ca cualidad stiʼ Bixhoze (Juan 14:9). Nga runi, laga jma guiziidiluʼ de Jesús, jma ziéneluʼ ximodo nga Jehová ne zannaxhiiluʼ laabe jma. Guníʼ ique ximodo bisihuinni Jesús biá ca binni pobre, ca ni huará ne ca débil. Laaca guníʼ ique guiráʼ ca conseju galán rudiibe lii ne pabiáʼ racanécani lii ora rinándaluʼ cani (Mat. 5:1-11; 7:24-27).

12. Laga jma guiziidiluʼ de Jesús, ¿xi zucaani lii gúniluʼ?

 12 Jma zannaxhiiluʼ Jesús ora guiníʼ íqueluʼ sacrificiu ni bíʼnibe para ganda gaca perdonar ca pecadu stinu (Mat. 20:28). Ora guiéneluʼ bidiibe xquendanabánibe pur lii, zucaani lii gaca arrepentirluʼ ne guyúbiluʼ guni perdonar Jehová lii (Hech. 3:19, 20; 1 Juan 1:9). Ne laga jma gannaxhiiluʼ Jehová ne Jesús, ziuuláʼdxiluʼ chuʼluʼ jma gaxha de ca binni ni runi sentir ni runi sentirluʼ.

13. ¿Xi maʼ bidii Jehová lii?

13 Biziidiʼ gannaxhiiluʼ familia stiʼ Jehová. Zándaca qué ziene familia stiluʼ ni cadi Testigu ne ca ni guca xhamíguluʼ dxiqué xiñee racaláʼdxiluʼ chuʼnísaluʼ, ne zándaca dede gucaalucaʼ lii. Peru zacané Jehová lii, zudiibe lii ti familia espiritual. Nga runi, pa chuʼluʼ gaxha de ca hermanu ne ca hermana de congregación, zannaxhiicaʼ lii ne zacanecaʼ lii ora iquiiñeluʼ ni (Mar. 10:29, 30; Heb. 10:24, 25). Ne zándaca zedandá dxi guiziidiʼ familia stiluʼ de Jehová ne chinándacabe ca norma stiʼ (1 Ped. 2:12).

14. Casi ná 1 Juan 5:3, ¿ximodo huayacané ca norma stiʼ Jehová lii?

14 Biziidiʼ gusisácaluʼ ne chinándaluʼ ca norma stiʼ Dios. Ante gunibiaʼluʼ Jehová, zándaca rúniluʼ ni rábiluʼ jma jneza para lii, peru yanna maʼ bidiiluʼ cuenta jma galán ca norma stiʼ Jehová (Sal. 1:1-3; biindaʼ 1 Juan 5:3). Guníʼ ique ca conseju rudii Jehová hombre ne gunaa ni maʼ bichaganáʼ, ca ni napa xiiñiʼ ne ca xcuidi (Efes. 5:22–6:4). ¿Ñee jma nayecheʼ nabanineluʼ familia stiluʼ yanna ra maʼ rúniluʼ ni ná Jehová la? ¿Ñee jma galán nabániluʼ yanna purtiʼ zinándaluʼ conseju stiʼ Jehová ra ná cuiluʼ tu gaca xhamíguluʼ la? ¿Ñee jma nayecheʼ nabániluʼ la? (Prov. 13:20; 1 Cor. 15:33). Zándaca guiniʼluʼ nayecheʼ nabániluʼ.

15. ¿Xi zanda gacané lii para chinándaluʼ ca principiu ni zeeda lu Biblia?

15 Zándaca nuu biaje qué gánnaluʼ ximodo chinándaluʼ ca principiu stiʼ Biblia ni caziidiluʼ. Nga runi riquiiñeʼ Jehová xquidxi para gudii laanu información ni riree lu Biblia ni zacané lii gánnaluʼ xii nga ni jneza ne ni cadi jneza (Heb. 5:13, 14). Ora gúʼndaluʼ ne guni estudiarluʼ información riʼ, zuuyaluʼ ximodo zacaneni lii lu xiixa guendanagana nápaluʼ, ne zándaca chuuláʼdxiluʼ chuʼluʼ ndaaniʼ xquidxi Jehová.

16. ¿Ximodo maʼ gudixhe chaahuiʼ Jehová xquidxi?

16 Biziidiʼ gannaxhiiluʼ ne gacaneluʼ xquidxi Dios. Maʼ gudixhe chaahuiʼ Jehová xquidxi pur congregación, ne Jesús, Xiiñibe, nga xaíque stiʼ guiráʼ ca congregación ca (Efes. 1:22; 5:23). Ne laaca maʼ gulí Jesús ti grupuhuiiniʼ de ungidu para quixhe chaahuicaʼ dxiiñaʼ ni racaláʼdxibe gaca tiempu riʼ. Ca xpinni Cristu riʼ, ni gulee lá Jesús «mozo ni nuu xpiaaniʼ ne ni runi jneza», runi tendercaʼ responsabilidad sticaʼ jneza, rudiicaʼ laanu alimentu espiritual ne rápacaʼ laanu para chuʼnu jma gaxha de Jehová (Mat. 24:45-47). Ti modo rapa mozo ni nuu xpiaaniʼ laanu nga ribícabe hermanu ni nuu capacitadu para gápacaʼ ca congregación (Is. 32:1, 2; Heb. 13:17; 1 Ped. 5:2, 3). Racaláʼdxicabe gúnicabe intiica cosa pur lii, quixhedxícabe ladxidoʼloʼ ne gacanécabe lii chuʼluʼ jma gaxha de Jehová. Peru ti cosa ni  jma galán rúnicabe nga zanda gacanécabe lii gusiidiluʼ xcaadxi binni de Jehová (Efes. 4:11-13).

17. Casi ná Romanos 10:10, 13, 14, ¿xiñee rinínenu binni de Jehová?

17 Gucané xcaadxi gannaxhii Jehová. Gudxi Jesús ca discípulo stiʼ gusiidicaʼ xcaadxi binni de Dios (Mat. 28:19, 20). Zanda gúninu ni ná mandatu riʼ pa guni obligárcabe laanu. Peru, pa cada dxi gannaxhiiluʼ Jehová jma la? zuni sentirluʼ casi biʼniʼ sentir apóstol Pedro ne Juan, laacaʼ guniʼcaʼ: «Qué zusaanadu de guinidu de ca cosa ni maʼ bidúʼyadu ne ni maʼ binadiágadu» (Hech. 4:20). Neca nuu cosa ni rusiecheʼ laanu la? ni jma rusiecheʼ laanu nga gacanenu tuuxa gannaxhii Jehová. ¿Ñee ruxuíʼluluʼ pabiáʼ biecheʼ Felipe ora gucané hombre de Etiopía que guiziidiʼ ni dxandíʼ rusiidiʼ Stiidxaʼ Dios ne chúʼnisa la? Ora chinándaluʼ ejemplu stiʼ Felipe ne chinándaluʼ mandatu stiʼ Jehová de guni predicarluʼ, zusihuínniluʼ racaláʼdxiluʼ gácaluʼ testigu stiʼ Jehová (biindaʼ Romanos 10:10, 13, 14). Ne zándaca guinabadiidxaluʼ ni gunabadiidxaʼ hombre de Etiopía que: «¿Xi cucueeza naa de chuaanisaʼ yaʼ?» (Hech. 8:36).

18. ¿Xi zacábinu lu sti artículo?

18 Ora quixhe íqueluʼ chuʼnísaluʼ, zacaaluʼ ti decisión ni jma galán lu xquendanabániluʼ. Cumu nabé risaca decisión riʼ la? caquiiñeʼ guiníʼ ique chaahuiluʼ xi guiráʼ nuu luni. Peru ¿xi naquiiñeʼ gánnaluʼ de guendariuunisa? ¿Ne xi caquiiñeʼ gúniluʼ ante ne despué de chuʼnísaluʼ? Zacábinu ca pregunta riʼ lu sti artículo ca.

CANCIÓN 2 Nabé risaca laluʼ, Jiobá

^ párrafo 5 Nuu binni neca nadxii Jehová riníʼ íquecaʼ cadi nuucaʼ listu para chuʼnísacaʼ ne gácacaʼ testigu stiʼ Jehová. Pa zacá cazaacaluʼ, artículo riʼ zuzeeteʼ caadxi cosa ni zanda gúniluʼ para ganda chuʼnísaluʼ.

^ párrafo 60 NI RIHUINNI LU FOTO RIʼ: Ti hermana ni cazíʼ cudii ti tratadu ti baʼdudxaapaʼ.