Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 13

Gannaxhiisaanu de guidubi ladxidoʼno

Gannaxhiisaanu de guidubi ladxidoʼno

«Lagannaxhiisaa de guidubi ladxidoʼto» (1 PED. 1:22).

CANCIÓN 109 Gannaxhiinu de guidubi ladxidoʼno

NI ZAZÍʼDINU *

Últimu gueelaʼ guyuu Jesús né ca apóstol stiʼ, bisiénebe laacaʼ pabiáʼ risaca gannaxhiisaacaʼ (Biiyaʼ párrafo 1 ne 2).

1. ¿Xi mandatu bidii Jesús ca discípulo stiʼ? (Biiyaʼ dibuju ni zeeda lu portada).

GUEELAʼ ante gati Jesús, gúdxibe ca diidxaʼ riʼ ca discípulo stibe: «Cudieeʼ laatu ti mandamientu nacubi: [...] cásica huayannaxhieeʼ laatu, zacaca naquiiñeʼ gannaxhiisaatu». Ne laaca gúdxibe laacaʼ: «Sicaríʼ nga zanna binni nácatu discípulo stinneʼ: pa nadxiisaatu» (Juan 13:34, 35).

2. ¿Xiñee nabé risaca gannaxhiisaanu?

2 Jesús guníʼ zanna binni tuu nga ca discípulo stiʼ pa gusihuínnicaʼ nadxiicaʼ cásica gunnaxhiibe laacaʼ. Guca cumplir ni guniʼbe lu primé siglu ne laaca cayaca cumplir ni yanna. Nga runi nabé risaca gannaxhiisaanu neca chuʼ ora gaca ni nagana para laanu.

3. ¿Xi zazíʼdinu lu artículo riʼ?

3 Cumu binni ruchee laanu la? nuu biaje raca nagana para laanu gannaxhiisaanu de guidubi ladxidoʼno. Neca zacá, caquiiñeʼ gúninu stipa pur chinándanu ejemplu stiʼ Cristu. Lu artículo riʼ zazíʼdinu pa gannaxhiisaanu zacaneni laanu chuʼnu tobi si né ca hermanu stinu, guni tratarnu laacabe igual ne guidxaagalunu laacabe ra lídxinu. Laga cayuni estudiarluʼ artículo riʼ, guníʼ ique pregunta riʼ: «¿Xi zanda guiziideʼ de ca hermanu ni qué nusaana de nusihuinni guendarannaxhii neca cadxagalucaʼ guendanagana?».

CHUʼNU TOBI SI NÉ CA HERMANU STINU

4. Casi ná Mateo 5:23, 24, ¿xiñee caquiiñeʼ guni chaahuinu xiixa guendanagana nápanu né tuuxa hermanu?

4 Jesús bisiidiʼ laanu nabé risaca guni chaahuinu xiixa guendanagana ni nápanu né ti hermanu ni cadxiichiné laanu (biindaʼ Mateo 5:23, 24). Guniʼbe caquiiñeʼ gaca llevarnu  bien né xcaadxi binni pa racaláʼdxinu chuulaʼdxiʼ Dios ni rúninu. Riecheʼ Jehová ora rúninu stipa pur chuʼnu tobi si né ca hermanu stinu. Qué ziuuláʼdxibe modo cayuni adorarnu laabe pa guidaʼnu xiana ne qué nanu guni chaahuinu xiixa guendanagana nápanu né tuuxa (1 Juan 4:20).

5. ¿Xiñee guca nagana para ti hermanu lá Mark guni chaahuiʼ guendanagana ni gupa né sti hermanu?

5 Zándaca nuu biaje gaca nagana para laanu guni chaahuinu xiixa guendanagana. ¿Xiñee yaʼ? Guidúʼyanu ni bizaaca ti hermanu láʼ Mark. * Gucanabe dxi biʼniʼ criticar ti hermanu laabe ne guníʼ mal de laabe nezalú xcaadxi hermanu de congregación. ¿Xi biʼniʼ Mark yaʼ? Laabe guniʼbe: «Bidxiicheʼ ne gunieniaʼ laabe naduxhuʼ». Peru despué guca arrepentirbe ne biyúbibe guni perdonar hermanu que laabe ne guni chaahuicabe guendanagana que. Peru qué ñuni perdonar hermanu que laabe. Despué la? sicaríʼ guníʼ ique Mark: «¿Xiñee cuyubeʼ guneʼ chaahueʼ guendanagana riʼ pa qué nabe yaʼ?». Peru guluu ti superintendente de circuito gana laabe para cadi gusaanabe de gúnibe stipa para guni chaahuibe guendanagana que. ¿Xi biʼniʼ Mark yaʼ?

6. a) ¿Xi biʼniʼ Mark para ganda gaca chaahuiʼ guendanagana ni napané sti hermanu? b) ¿Ximodo yenanda Mark ni ná Colosenses 3:13, 14?

6 Biiyaʼ Mark paraa caquiiñeʼ guchaa ne bidii cuenta nuu biaje raca nagana para laa gaca humilde ne nuu biaje riníʼ ique jma risaca que xcaadxi. Bidiibe cuenta caquiiñeʼ guchaabe (Col. 3:8, 9, 12). Yeguiníʼnebe hermanu que sti biaje ne gúcabe humilde ora gunábabe perdón laa. Laaca bicaabe caadxi carta ra cayabibe hermanu que guni perdonar laabe ne gusiaandaʼ ni bíʼnibe laa. Dede bidiibe laa caadxi regaluhuiiniʼ ni guníʼ íquebe ziuulaʼdxiʼ. Peru nin né zaqué, bidxiichineruʼ hermanu que laabe. Neca zacá, dede yanna cayúniruʼ Mark stipa para chinanda mandatu ni  bidii Jesús de gannaxhiinu ca hermanu stinu ne guni perdonarnu laacaʼ (biindaʼ Colosenses 3:13, 14). Dede né ora qué naʼ tuuxa guni chaahuinenu laa xiixa guendanagana, guendarannaxhii ni napa ca xpinni Cristu zacaneni laanu guni perdonarnu laa ne guni orarnu para ganda gaca chaahuiʼ guendanagana ca (Mat. 18:21, 22; Gál. 6:9).

Pa cadxiichiné tuuxa laanu, zándaca caquiiñeʼ gúninu caadxi cosa para guni chaahuinu guendanagana ca. (Biiyaʼ párrafo 7 ne 8). *

7. a) ¿Xi biʼniʼ mandar Jesús laanu gúninu? b) ¿Xi guendanagana bidxaagalú hermana Lara?

7 Jesús biʼniʼ mandar laanu guni tratarnu xcaadxi casi racaláʼdxinu guni tratárcabe laanu. Ne laaca guniʼbe cadi gannaxhiisinu ca ni nadxii laanu (Luc. 6:31-33). ¿Xi ñúninu pa málasi ñuu tuuxa hermanu de congregación stinu qué niná nidxaaga laanu ne qué nudii náʼ laanu? Nánnanu qué rizaaca peʼ ni bizéʼtenu riʼ, peru nga peʼ nga ni bizaaca hermana Lara. Sicaríʼ guniʼbe: «Qué riná ti hermana gudii náʼ naa, ne qué ganna diaʼ xiñee. Bidxibeʼ ne guca nagana para naa chaaʼ reunión». Sicaríʼ guníʼ ique Lara: «Cadi bineʼ diaʼ laabe xiixa. Ne xcaadxi hermanu de congregación laaca riníʼ íquecaʼ nabé nayaahui hermana ca».

8. a) ¿Xi biʼniʼ Lara para biʼniʼ chaahuiʼ guendanagana ni napané sti hermana? b) ¿Xi rizíʼdinu de ni bizaaca Lara?

8 Biʼniʼ Lara caadxi cosa para chuʼ tobi si né hermana ca. Biʼniʼ orarbe Jehová ne gudixhe íquebe guiníʼnebe hermana que. Guníʼcabe diidxaʼ de ni gúcacabe, gudiidxicabe ne biʼniʼ chaahuicabe guendanagana stícabe. Ruluíʼ maʼ guca chaahuini. Peru sicaríʼ guníʼ Lara: «Gudiʼdiʼ si tiempu, biguetaʼ biʼniʼ tratar hermana que naa modo ca rúnini dxiqué. Bireeʼ gana». Guníʼ ique Lara zabani nayecheʼ pa guchaa hermana que modo laa. Peru ra gudiʼdiʼ tiempu bidiibe cuenta ni jma jneza gúnibe nga cadi gusaana de guni tratarbe hermana ca né guendarannaxhii ne guni perdonarbe laa de guidubi ladxidoʼbe (Efes. 4:32–5:2). Laaca bietenaláʼdxibe «qué rugabaʼ» ti xpinni Cristu ni dxandíʼ nadxii «panda biaje guninácabe laa» ne «runi soportar guiráʼ cosa, runi cré guiráʼ cosa, ribeza guiráʼ  cosa, runi huantar guiráʼ cosa» (1 Cor. 13:5, 7). Nga gucané laabe gatadxí xquendabiaanibe. Ra gudiʼdiʼ tiempu guca hermana que amable sti biaje né Lara. Pa ruyúbinu chuʼnu tobi si né ca hermanu stinu ne cadi gusaana de gannaxhiinu laacaʼ la? zanda chuʼnu seguru ziuu Jehová, «Dios ni rannaxhii ne ni riguixhedxí» ladxidóʼ binni gaxha de laanu (2 Cor. 13:11).

GUNI TRATARNU XCAADXI IGUAL

9. Casi ná Hechos 10:34, 35, ¿xiñee caquiiñeʼ guni tratarnu xcaadxi igual?

9 Biaʼca risaca guiráʼ binni nezalú Jehová (biindaʼ Hechos 10:34, 35). Ora runi tratarnu ca hermanu stinu cásica runi Jehová ni, rusihuínninu laaca xiiñiʼ Dios laanu. Ne laaca rinándanu mandatu ni ná gannaxhiinu prójimo stinu cásica nadxiinu laanu ne riuʼnu tobi si né ca hermanu stinu (Rom. 12:9, 10; Sant. 2:8, 9).

10, 11. ¿Xi biʼniʼ ti hermana para guchaa modo riníʼ ique?

10 Zándaca gaca nagana para caadxi de laanu guni tratarnu guiráʼ binni igual. Guiníʼ íquenu ni bizaaca ti hermana láʼ Ruth. Dxi joven laabe, gúpabe ti guendanagana né ti binni de sti país. ¿Ximodo bininá ngue laabe yaʼ? Sicaríʼ guniʼbe: «Qué racalaʼdxeʼ gannaʼ gastiʼ de ca binni de país ca. Guníʼ iqueʼ zacá guiráʼ ca binni de lugar que, dede né ca hermanu». ¿Xi gucané laabe para cadi guiníʼ íquebe zacá yaʼ?

11 Bidii Ruth cuenta caquiiñeʼ guchaa modo riníʼ ique. Biindabe caadxi experiencia ne informe ni zeeda lu Anuario ni caníʼ de país que. Sicaríʼ guniʼbe: «Bineʼ stipa pur guiníʼ iqueʼ cosa galán de ca binni de lugar que. Bidieeʼ cuenta runi ca hermanu que ni ná Jehová de guidubi ladxidoʼcaʼ. Ne bieneʼ laaca hermanu stinneʼ laacabe». Chaahuiʼ chaahuiʼ bidiibe cuenta caquiiñeʼ gúnibe xiixa. Laabe guniʼbe: «Ora runebiaʼyaʼ ca hermanu de país ca, runeʼ stipa gacaʼ nachaʼhuiʼ né laacaʼ ne guinieniáʼ laacaʼ. Zacá gunda binebiaʼyaʼ chaahueʼ laacabe». ¿Xi guleendú Ruth pur ni biʼniʼ yaʼ? Sicaríʼ guniʼbe: «Ra gudiʼdiʼ tiempu bichaa modo riníʼ iqueʼ».

Pa nadxiinu «guiráʼ ca hermanu» stinu de guidubi ladxidoʼno la? zuni tratarnu laacabe igual. (Biiyaʼ párrafo 12 ne 13). *

12. ¿Xi guendanagana bidxaagalú ti hermana láʼ Sarah?

12 Zándaca nuu tu laa runi menu xcaadxi ne qué rudii cuenta. Guzéʼtenu ti ejemplu, ti hermana láʼ Sarah guníʼ ique runi tratar guiráʼ ca hermanu igual purtiʼ qué runi juzgar binni pur raza stiʼ, pa napa o pa qué gapa bueltu o pur ca responsabilidad ni napa ndaaniʼ xquidxi Dios. Peru sicaríʼ guniʼbe: «Bidieeʼ cuenta qué ridxaagaʼ guiráʼ ca hermanu». ¿Xiñee yaʼ? Purtiʼ guiráʼ ca familia stibe guyécabe universidad, nga runi jma ridxaagabe binni ni guyé universidad. Ti biaje gúdxibe ti xhamígube: «Ca hermanu si ni guyé universidad nga ridxaagaʼ ne ca ni qué ñé qué ridxaagaʼ laacaʼ». Rihuinni dxichi caquiiñeʼ guchaa Sarah modo riníʼ ique. ¿Ximodo gunda bíʼnibe ni yaʼ?

13. ¿Xi rizíʼdinu de ni biʼniʼ Sarah para guchaa modo laa?

13 Gucané ti superintendente de circuito Sarah para guʼyaʼ paraa caquiiñeʼ guchaa. Sicaríʼ guníʼ Sarah: «Biʼniʼ felicitarbe naa pur dxiiñaʼ cayuneʼ ndaaniʼ xquidxi Dios, pur ca comentariu galán ni rudieeʼ ne pur ni nannaʼ de lu Biblia. De racá, gúdxibe naa laga ziziidiʼ binni jma de Jehová laaca caquiiñeʼ gapa cualidad galán, casi gaca humilde, guiá xcaadxi ne gudii cuenta nuu cosa ni qué zanda guni». Bisisaca Sarah ni gudxi superintendente de circuito que laa. Laabe guniʼbe: «Bidieeʼ cuenta ni jma risaca nga gácaluʼ amable ne gusihuínniluʼ guendarannaxhii». Ngue runi, bichaa modo ruuyabe ca hermanu. Sicaríʼ  guniʼbe: «Bineʼ stipa guuyaʼ ca cualidad galán ni nápacabe, ni runi laacabe ti binni risaca para Jehová». ¿Yanna laanu yaʼ? Laaca qué racaláʼdxinu guni crenu jma risácanu que xcaadxi pur modo bisiniisicabe laanu. Pa nadxiinu «guiráʼ ca hermanu» stinu de guidubi ladxidoʼno la? zuni tratarnu laacabe igual (1 Ped. 2:17).

GUIDXAAGALUNU CA HERMANU STINU RA LÍDXINU

14. Casi ná Hebreos 13:16, ¿ximodo runi sentir Jehová ora ridxaagalunu binni ra lídxinu?

14 Guizáʼ rusisaca Jehová guidxaagalunu binni ra lídxinu (biindaʼ Hebreos 13:16). Ne nácani parte de adoración rudiʼnu Jehová, jmaruʼ si ora racanenu ca ni caquiiñeʼ tu gacané laacaʼ (Sant. 1:27; 2:14-17). Nga runi, zeeda conseju riʼ lu Biblia: «Laguidxaagalú binni ra lídxitu» (Rom. 12:13). Ora ridxaagalunu ca hermanu stinu ra lídxinu, rusihuínninu dxandíʼ nadxiinu laacabe ne xhamígunu laacabe. Riecheʼ Jehová ora rudiʼnu ca hermanu stinu xiixa ni gocaʼ ne ni guecaʼ, o cueenu tiempu para laacabe ne guidúʼyanu xi caquiiñecabe (1 Ped. 4:8-10). Peru nuu cosa ni zándaca gucueeza laanu para cadi guidxaagalunu ca hermanu stinu ra lídxinu.

«Dxiqué, qué riuuladxeʼ guidxagaluáʼ binni ra lidxeʼ, peru bichaa modo riníʼ iqueʼ ne yanna jma riuaaʼ nayecheʼ» (Biiyaʼ párrafo 16). *

15, 16. a) ¿Xiñee nuu tu laa qué rinagá guidxaagalú binni ra lidxi? b) ¿Xi gucané Edit guidxaagalú ca hermanu ra lidxi?

15 Zándaca nuu tu laa qué rinagá guidxaagalú binni ra lidxi pur modo nabani yanna o pur modo guca dxiqué. Nga peʼ nga ni bizaaca ti hermana viuda ni láʼ Edit. Ante gácabe Testigu, huaxiéʼ ridxaagabe binni. Guníʼ íquebe jma galán nabani xcaadxi que laabe para guidxaagalucaʼ binni ra lídxicaʼ.

16 Despué de guca Edit Testigu, bichaa modo riníʼ ique ne biʼniʼ stipa pur guidxaagalú ca hermanu ra lidxi. Sicaríʼ guniʼbe: «Dxi cabí Yoo stiʼ Reinu stidu, gunabadiidxaʼ ti ancianu naa pa zanda guneʼ hospedar ti guendaxheelaʼ ni chigacané ra cabí Yoo stiʼ Reinu chupa semana. Óraque guníʼ iqueʼ ni biʼniʼ xa viuda de Sarepta que ne ximodo  guluu Jehová ndaayaʼ laabe» (1 Rey. 17:12-16). Ngue runi, gúdxibe ancianu que zanda guni hospedarbe guendaxheelaʼ que. ¿Xi ndaayaʼ gucuaabe yaʼ? Sicaríʼ guniʼbe: «Guyuaaʼ nayecheʼ purtiʼ cadi chupa semana si biaanacabe ra lidxeʼ, sínuque biaanacabe chupa beeu. Ngue runi guizáʼ guca xhamígudu». Laaca napa Edit jma xhamigu ndaaniʼ congregación. Tiempu riʼ maʼ precursora laabe ne riuuláʼdxibe guni invitarbe ca hermanu ni rireenebe predicación ra lídxibe ne runi invitarbe laacaʼ xiixa. Laabe guniʼbe: «Riuaaʼ nayecheʼ ora rudieeʼ de ni napaʼ. Ne ni dxandíʼ nga ricaaʼ stale ndaayaʼ pur laani» (Heb. 13:1, 2).

17. ¿Xi bidii Luke ne xheelaʼ cuenta?

17 Zándaca ridxaagalunu ca hermanu ra lídxinu, peru ¿xiruʼ zanda gúninu yaʼ? Guzéʼtenu ni runi Luke ne xheelaʼ, nabé ridxaagalucaʼ ca hermanu ra lídxicaʼ. Runi invitárcabe bixhózecabe ne jñaacabe ne xcaadxi familia stícabe ra lídxicabe, ca xhamígucabe ni jma ridxaagacabe ne superintendente de circuito ne xheelaʼ. Peru Luke guníʼ: «Bidiʼdu cuenta runi invitardu ca hermanu si ni jma ridxaagadu». ¿Xi bíʼnicabe para guidxaagalúcabe xcaadxi hermanu ra lídxicabe yaʼ?

18. ¿Xi biʼniʼ Luke ne xheelaʼ para guidxaagalucaʼ xcaadxi hermanu ra lídxicaʼ?

18 Jesús guníʼ ca diidxaʼ riʼ: «Pa gannaxhiitu ca ni nadxii si laatu, ¿xi premiu nuu para laatu yaʼ?» (Mat. 5:45-47). Ora guníʼ ique Luke ne xheelaʼ ca diidxaʼ riʼ, biénecaʼ xi riníʼ guidxaagalú binni xcaadxi ra lidxi o gácacaʼ hospitalario. Bidiicabe cuenta caquiiñeʼ chinándacabe ejemplu stiʼ Jehová, purtiʼ laa nabé nachaʼhuiʼ né guiráʼ. Nga runi gudixhe íquecabe guni invitárcabe ca hermanu ni qué huayuni invitárcabe ra lídxicabe. Sicaríʼ guníʼ Luke: «Guiradu riuʼdu nayecheʼ purtiʼ riuʼdu tobi si, rigúʼsaadu gana laadu ne riuʼdu jma gaxha de Jehová ne de ca hermanu stidu».

19. ¿Ximodo rusihuínninu nácanu discípulo stiʼ Jesús, ne xi maʼ gudixhe íquenu gúninu?

19 Lu artículo riʼ maʼ bizíʼdinu pa gannaxhiisaanu de guidubi ladxidoʼno ziuʼnu tobi né ca hermanu stinu, zuni tratarnu laacabe igual ne zadxaagalunu laacabe ra lídxinu. Cadi gudiʼnu lugar gucueeza xiixa laanu para gannaxhiinu ca hermanu stinu de guidubi ladxidoʼno. Pa gúninu ni la? ziuʼnu nayecheʼ ne zusihuínninu dxandíʼ nácanu discípulo stiʼ Jesús (Juan 13:17, 35).

CANCIÓN 88 Bisiidiʼ naa ca neza stiluʼ

^ párrafo 5 Jesús guníʼ guendarannaxhii nga ni zusihuinni tuu nga ca ni dxandíʼ xpinni Cristu. Guendarannaxhii ni runi sentirnu pur ca hermanu stinu rucaa ni laanu chuʼnu tobi si, guni tratarnu laacabe igual ne guidxaagalunu laacabe ra lídxinu o gácanu hospitalariu. Peru nuu biaje raca nagana guni tobi ca ni bizéʼtenu riʼ. Lu artículo riʼ zadxélanu caadxi conseju ni zacané laanu gannaxhiisaanu de guidubi ladxidoʼno.

^ párrafo 5 Lu ca artículo riʼ bidxaa lá caadxi binni.

^ párrafo 57 NI RIHUINNI LU CA FOTO CA: Rihuinni maʼ chupa chonna biaje guyé hermana riʼ ra nuu sti hermana para guni chaahuicaʼ guendanagana sticaʼ, peru qué ganda guni chaahuibe ni. Peru cumu cadi careebe gana la? cayúnirube stipa pur gusihuínnibe guendarannaxhii, ne despué maʼ nuucabe tobi si.

^ párrafo 59 NI RIHUINNI LU FOTO RIʼ: Ti hermanu maʼ nagolaʼ runi sentir maʼ huaxiéʼ rizaalaʼdxiʼ ca hermanu de congregación laa.

^ párrafo 61 NI RIHUINNI LU FOTO RIʼ: Cadxaagalú ti hermana xcaadxi hermanu ra lidxi neca guníʼ ique qué zanda gúnini, ne rihuinni nuube nayecheʼ pur laani.