Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 23

«Gaca santificar laluʼ»

«Gaca santificar laluʼ»

«Jehová, qué ziuu dxi guinitilú laluʼ» (SAL. 135:13).

CANCIÓN 10 ¡Gusisácanu Jiobá, Dios stinu!

NI ZAZÍʼDINU *

1, 2. Laanu, ca testigu stiʼ Jehová, ¿xi tema nabé riuuláʼdxinu guininu?

SOBERANÍA o modo runi mandar Dios ne gaca santificar o guiá labe nácacani chupa cosa nabé risaca para laanu. Laanu, ca testigu stiʼ Jehová nabé riuuláʼdxinu guininu de ca tema riʼ. Peru ¿ñee chupa cosa gadxé ni la? Coʼ.

2 Guiranu maʼ bizíʼdinu naquiiñeʼ guiá lá Dios ne gusihuínninu modo runi mandarbe nga jma jneza. Ne naquiiñeʼ guni respetarnu ne gusisácanu guiropaʼ cosa riʼ.

3. ¿Xiruʼ riníʼ lá Jehová?

3 Lá Jehová, laaca caniʼni de guirá xixé ni rúnibe dede né modo runi mandarbe. Nga runi ora rininu ni jma risaca nga guiá lá Dios la? laaca caninu caquiiñeʼ gusihuínninu modo runi mandarbe nga jma jneza. Purtiʼ lá Jehová rugaandani dede né modo runi mandarbe guiráʼ ni nuu lu universu (biiyaʼ cuadru ni láʼ « Cosa ni nuu lu asuntu riʼ»).

4. a) ¿Xi rusiidiʼ Salmo 135:13 laanu de lá Dios? b) ¿Xi pregunta zacábinu lu artículo riʼ?

4 Nabé especial lá Jehová (biindaʼ Salmo 135:13). ¿Xi cosa runi lá Dios especial? ¿Padxí guníʼcabe mal de labe primé biaje? ¿Xi runi Dios para guni santificar lá? ¿Ne ximodo zanda guni defendernu labe? Zacábinu ca pregunta riʼ lu artículo riʼ.

NABÉ RISACA LÁ DIOS

5. Ora guininu gaca santificar lá Dios, ¿xi zándaca guinabadiidxaʼ tuuxa?

5 Tobi de ca cosa ni jma risaca guníʼ Jesús naquiiñeʼ guinábanu lu ca oración stinu nga «gaca santificar» lá Dios  (Mat. 6:9). ¿Xi riníʼ gaca santificar xiixa yaʼ? Riniʼni gaca ni santo o nayá. Peru zándaca chuʼ tu guinabadiidxaʼ: «¿Cadi xa santo o nayá lá Jehová? ¿Xiñee caquiiñeʼ gaca santificarni yaʼ?». Para gánnanu ni la? caquiiñeʼ guiníʼ íquenu xi guiráʼ cosa rugaanda ora riníʼcabe lá tuuxa.

6. ¿Xiñee nabé risaca lá binni?

6 Cadi lú guiʼchiʼ si nga ricá lá binni ne cadi para guiníʼ si tuuxa ni. Sicaríʼ ná Biblia: «Mejor nga guiníʼcabe ni galán de tuuxa que gapa stale cosa risaca» (Prov. 22:1; Ecl. 7:1). ¿Xiñee nabé risaca ni yaʼ? Purtiʼ ora riníʼcabe lá tuuxa la? maca nánnanu ximodo naca binni ca. Nga runi ni jma risaca nga cadi modo ricá diʼ lá tuuxa o modo riníʼ binni ni, sínuque ni riníʼ ique binni ora guʼyaʼ ni ne ora gunadiaga ni.

7. ¿Ximodo huayuni atacar binni lá Dios?

7 Ora riníʼ binni xiixa ni cadi dxandíʼ de Jehová la? cayuni atacarcaʼ o cayuni biidicaʼ labe. Primé biaje guníʼcabe mal de lá Dios nga ndaaniʼ jardín de Edén. Guidúʼyanu xi rusiidiʼ ni bizaaca que laanu.

PRIMÉ BIAJE BIʼNIʼ ATACÁRCABE LÁ JEHOVÁ

8. a) ¿Xii maca nanna Adán ne Eva? b) ¿Xi zándaca guinabadiidxanu?

8 Maca nanna Adán ne Eva Jehová nga lá Dios, laaca nánnacabe xcaadxi cosa ni dxandíʼ risaca de laabe, nánnacabe laabe nga bizaʼbe guiráʼ xixé ni nuu, laabe bidiibe laacaʼ guendanabani ne ti Paraísu sicarú ra guibánicaʼ ne laabe nga bicheelabe laacaʼ (Gén. 1:26-28; 2:18). Peru ¿ñee guníʼ iquerúcabe guiráʼ ni biʼniʼ Dios pur laacabe la? ¿Ñee biʼnirúcabe stipa pur gannaxhiicabe laabe jma ra zidiʼdiʼ dxi ne bidiicabe xquixe peʼ laabe la? Dxi bitiidiʼ enemigu stiʼ Dios laacabe lu prueba nga bihuinni pa zacá ni.

9. Casi ná Génesis 2:16, 17 ne 3:1-5, ¿xi gudxi Jehová Adán ne Eva, ne ximodo bichaa Binidxabaʼ ni dxandíʼ?

9 (Biindaʼ Génesis 2:16, 17; 3:1-5). Biquiiñeʼ Binidxabaʼ ti beendaʼ para guinabadiidxaʼ Eva: «¿Ñee dxandíʼ gudxi Dios laatu qué zanda goto cuananaxhi stiʼ guiráʼ yaga nuu ndaaniʼ jardín riʼ la?». Nabé mañoso modo biʼniʼ Binidxabaʼ pregunta riʼ purtiʼ cusiguiibe ne casi ñaca nusábabe venenu luni. Ni guníʼ Dios nga  zanda gó Adán ne Eva cuananaxhi stiʼ guiráʼ yaga que, peru tobi si cadi naquiiñeʼ gócabe. Nuuruʼ stale clase yaga cuananaxhi raqué ni ñanda ñócabe (Gén. 2:9). Rihuinni dxíchica bidii Jehová laacabe stale cosa. Peru gudxi laacabe nuu ti yaga raqué ne qué zanda diʼ gócabe cuananaxhi stiʼ. Ngue runi, ora biʼniʼ Binidxabaʼ pregunta riʼ bichaabe ni dxandíʼ ne casi ñaca niniʼbe qué rudii Dios ni caquiiñeʼ binni. Zándaca guníʼ ique Eva qué náʼ Dios gudii laa xiixa ni galán.

10. ¿Ximodo bisihuinni Binidxabaʼ caníʼ mal de Dios ne xi bizaaca?

10 Óraque la? caníʼ íqueruʼ Eva Jehová nga ni runi mandar laa. Ne zacá ni purtiʼ ora bicábibe Binidxabaʼ la? bizeetebe guiráʼ ni bisiene Dios laacabe. Dede gudxi Eva Binidxabaʼ cadi lica naquiiñeʼ cánacabe yaga que. Nánnabe maca gudxi Dios laacabe pa qué guzuubacabe diidxaʼ, záticabe. Ngue runi maʼ qué niquiiñeruʼ Binidxabaʼ maña para niguite laabe, tobi si tiru gudxi laabe: «Cadi dxandíʼ diʼ zátitu» (Gén. 3:2-4). Pur ni guníʼ Binidxabaʼ bisihuinni caníʼ mal de lá Dios para guniná laabe purtiʼ ni cayábibe Eva nga cusiguii Jehová. Zacá nga beeda gaca Binidxabaʼ diablu, tobi ni riníʼ mal de tuuxa para guniná laa. Zaqué nga gudxite Binidxabaʼ laabe ne biʼniʼ crebe laa (1 Tim. 2:14). Jma biʼniʼ crebe Binidxabaʼ que Jehová ne ngue bicaa laabe guicaabe decisión jma feu: maʼ qué nuzuubabe stiidxaʼ Dios ne gudobe cuananaxhi ni gudxi Dios laabe cadi gobe. Despué, laaca bidiibe ni Adán (Gén. 3:6).

11. ¿Xi jma jneza ñuni Adán ne Eva?

11 Guiníʼ íquenu xi ñanda nicabi Eva Binidxabaʼ. Ñanda ñábibe laa ca diidxaʼ riʼ: «Qué runebiaʼyaʼ lii, peru runebiaʼyaʼ Bixhozeʼ Jehová. Nadxieeʼ laa ne napaʼ confianza laa. Maʼ bidiibe naa ne Adán guiráʼ xixé ni nápadu. ¿Paraa bireeluʼ para guiniʼluʼ mal de laabe pue? ¡Biree de luaʼ!». Nanna pabiáʼ ñecheʼ Jehová pa nusihuinni xiiñiʼ nadxii laa ne qué zusaana laabe yaʼ (Prov. 27:11). Peru nin laabe ne nin Adán cadi dxandíʼ nadxiicaʼ Jehová ne qué nusihuínnicaʼ qué zusaanacaʼ laabe. Ngue runi qué ñuni defendércabe lá Bixhózecabe.

12. ¿Xi bicaa Binidxabaʼ Eva guiníʼ ique, ne xi qué ñuni Adán ne Eva?

12 Casi maʼ bidúʼyanu, bizulú Binidxabaʼ bicaa binni guiníʼ ique mal de Dios dxi bicaabe Eva guiníʼ ique pa dxandíʼ nachaʼhuiʼ Bixhoze. Despué, maʼ qué ñuni defender Adán ne Eva lá Jehová. Ne pur nga la? biʼniʼ crécabe ni ná Binidxabaʼ né bicaalúcabe Bixhózecabe. Ca dxi stinu riʼ, zaqueca caadxi trampa caquiiñeʼ Binidxabaʼ. Cayuni atacarbe lá Dios ora riniʼbe mal de laa ne cucaabe guiráʼ ca ni runi cré ca guendarusiguii stibe cadi gudiicaʼ lugar guni mandar Jehová laacaʼ.

 CAYUNI SANTIFICAR JEHOVÁ LÁ

13. ¿Ximodo cusiene Ezequiel 36:23 xii nga mensaje stiʼ Biblia?

13 ¿Ñee bidii Jehová lugar guiníʼcabe mal de laa sin ñuni gastiʼ la? Coʼ. Lu guidubi naca Biblia cusiene xi biʼniʼ Jehová para gusihuinni cadi dxandíʼ ni guníʼ Binidxabaʼ ndaaniʼ jardín de Edén que (Gén. 3:15). Zacá nga laani, zanda guininu ne chupa chonna si diidxaʼ ndiʼ nga mensaje principal stiʼ Biblia: cayuni santificar Jehová lá pur mediu de Reinu ni nuu lu ná Xiiñiʼ ne zudxiguetaʼ paz ne justicia lu Guidxilayú. Lu Biblia zeeda información ni zanda gacané laanu guiénenu ximodo cayuni santificar Jehová lá (biindaʼ Ezequiel 36:23).

14. ¿Ximodo huayuni santificar Jehová lá pur ca cosa huayuni dede dxi bicaalúcabe laa ndaaniʼ jardín de Edén?

14 Maʼ biraruʼ ni maʼ biʼniʼ Binidxabaʼ para cadi guni Jehová ni maʼ gudixhe ique peru gastiʼ qué huayanda guni. Rabi Biblia laanu modo runi Jehová xiixa ne rusihuínnini gástiruʼ stobi casi laabe. Nabé racaná ladxidóʼ Jehová purtiʼ cucaalú Binidxabaʼ ne ca xpinni laabe (Sal. 78:40). Peru jneza guiráʼ ni huayuni Jehová, rusihuinni nuu xpiaaniʼ ne napa paciencia. Laaca stale modo maʼ bisihuinni guizáʼ napa poder. Ne jmaruʼ si rihuinni guendarannaxhii stibe lu guiráʼ ni huayúnibe (1 Juan 4:8). Qué huayuu dxi gusaana Jehová de guni dxiiñaʼ para gaca santificar lá.

Cadi dxandíʼ guiráʼ ni gudxi Binidxabaʼ Eva de Jehová ne lu guiráʼ ca iza ni maʼ gudiʼdiʼ ca caníʼrube mal de Dios para guninabe laa. (Biiyaʼ párrafo 9, 10 ne 15). *

15. ¿Ximodo caniʼruʼ Binidxabaʼ mal de lá Jehová para guninabe laa ca dxi stinu riʼ ne xi cucaani binni guni?

15 Ca dxi stinu riʼ, caniʼruʼ Binidxabaʼ mal de lá Jehová para guninabe laa. Rucaabe binni guiníʼ ique qué gapa Dios poder, qué runi ni jneza, cadi nuu xpiaaniʼ ne cadi nadxii binni. Guzéʼtenu ti ejemplu, racaláʼdxibe gucaabe binni guni cré cadi dxandíʼ nuu Jehová. Ne pa nuu tuuxa runi cré Dios la? racaláʼdxibe gucaabe laa guiníʼ ique cadi jneza ca ley stiʼ Dios o qué rudii lugar guni binni stale cosa. Dede rucaabe binni guiníʼ ique naca Jehová ti Dios ni ruzaaquiʼ binni ndaaniʼ infiernu. Né ca ni guni cré ca cosa feu ni rusiidibe  dede maʼ qué rinacaʼ guni mandar Jehová laacaʼ. Ne cumu caʼruʼ guinitilú Binidxabaʼ la? zanírube mal de Jehová para guninabe laa ne laaca zacaláʼdxibe guxhélebe lii de laa. Peru ¿ ñee zudiiluʼ lugar gúnibe ni la?

XI ZANDA GÚNINU LU ASUNTU RISACA RIʼ

16. ¿Ximodo zanda gúninu ni qué ñuni Adán ne Eva?

16 Cudii Jehová lugar gacané binni gaca santificar lá, neca nácacaʼ binni ruchee. Nga runi cada tobi de laanu zanda guni ni qué ñuni Adán ne Eva. Neca nabézanu lade binni ni qué gapa respetu ne riníʼ mal de lá Jehová zanda guni defendernu ni dxandíʼ: naca Jehová santo, runi ni jneza, nachaʼhuiʼ ne nadxii binni (Is. 29:23). Zanda gusihuínninu racaláʼdxinu guni mandar Dios laanu ne gábinu binni laasibe nga jma jneza modo runi mandarbe ne laasibe zedanebe paz ne zacanebe chuʼ guiráʼ ni bizaʼbe nayecheʼ (Sal. 37:9, 37; 146:5, 6, 10).

17. ¿Xi biʼniʼ Jesús para bisiidiʼ binni lá Bixhoze?

17 Ora runi defendernu lá Jehová laaca zinándanu ejemplu stiʼ Jesús (Juan 17:26). Cadi guníʼ si Jesús tu láʼ Bixhoze para gacané binni gunibiáʼ laabe, sínuque laaca bisiidibe ximodo peʼ Jehová. Guzéʼtenu ti ejemplu, dxi bisiidiʼ ca fariseu naca Jehová ti Dios ni rinabaʼ binni stale cosa, ni qué ruchaa ni maʼ gudixhe guni, malu laa ne qué riá, gucané Jesús binni guʼyaʼ naca Bixhózebe ti Dios ni riuu razón, napa paciencia, tobi ni nadxii binni ne riá. Laaca gucanebe binni gunibiáʼ Jehová purtiʼ biaʼsi peʼ modo bisihuínnibe ca cualidad stiʼ Bixhózebe lu xquendanabánibe (Juan 14:9).

18. ¿Ximodo zanda gusihuínninu cadi dxandíʼ guiráʼ ni riníʼ ca xhenemigu Jehová de laa?

18 Casi biʼniʼ Jesús, laanu laaca zanda gusíʼdinu binni modo naca Jehová ne gábinu laacaʼ nadxiibe binni ne nacháʼhuibe. Zacá zusihuínninu cadi dxandíʼ guiráʼ ni riníʼ ca xhenemígube de laabe. Runi santificarnu lá Jehová ne racanenu binni guʼyaʼ ni casi xiixa ni naca santo. Neca binni ruchee laanu, zanda gúninu stipa pur gácanu casi Jehová (Efes. 5:1, 2). Pur ca diidxaʼ ni guininu ne ni gúninu zudii binni  cuenta ximodo peʼ nga Jehová ne zacanenu gaca santificar labe. Racanenu guiá lá Jehová ora racanenu binni gusaana ca idea cadi jneza ni nápacabe de Dios. * Ne neca binni ruchee laanu laaca runi santificarnu lá Jehová ora rúninu stipa cadi guchéʼnenu laa (Job 27:5).

Racaláʼdxinu gacanenu ca binni ni ricaa estudiu guiénecaʼ nachaʼhuiʼ Jehová ne nadxii binni. (Biiyaʼ párrafo 18 ne 19). *

19. Casi ná Isaías 63:7, ¿xii nga ni jma naquiiñeʼ gúninu ora rudiʼnu estudiu?

19 Nuuruʼ sti cosa ni zanda gúninu para guni santificarnu lá Jehová. Ora rudiʼnu estudiu, gatigá rábinu binni Dios nga runi mandar guiráʼ xixé ni nuu. Dxandíʼ, Jehová nga napa derechu guni mandar guiráʼ xixé ni nuu lu universu. Yanna, neca risaca nga guininu de ca ley stiʼ Jehová ni jma racaláʼdxinu nga gacanenu binni gannaxhii Bixhózenu ne cadi gucheenecaʼ laabe. Nga runi, caquiiñeʼ guluinu binni pabiáʼ sicarú ca cualidad stiʼ Jehová ne guiénecaʼ tu clase de binni nácabe ora gunadiágacabe labe (biindaʼ Isaías 63:7). Pa gúninu nga la? zacanenu binni gannaxhii Jehová ne zuzuubacaʼ stiidxabe purtiʼ qué racaláʼdxicaʼ gucheenecaʼ laabe.

20. ¿Xi pregunta zacábinu lu sti artículo ca?

20 Yanna ra maʼ bizíʼdinu xi guiráʼ riníʼ gaca santificar lá Jehová, ¿ximodo zanda chuʼnu seguru cusisaca conducta stinu ne ni rusíʼdinu lá Dios ne ximodo zanda gacaneni binni guidxiña laabe? Lu sti artículo ca zacábinu pregunta riʼ.

CANCIÓN 2 Nabé risaca laluʼ, Jiobá

^ párrafo 5 ¿Xi guendanagana cadxaagalú guiráʼ binni ne ca ángel? ¿Xiñee nabé risaca ni ne ximodo zanda gacanenu para gacachaahuiʼ ni yaʼ? Ora guicábinu ca pregunta riʼ ne xcaadxi la? zacaneni laanu jma gaca xhamígunu Jehová.

^ párrafo 18 Nuu biaje, huasiene ca publicación stinu cadi caquiiñeʼ diʼ gaca vindicar o guiá lá Jehová purtiʼ guirutiʼ huaníʼ qué gápabe derechu guiree labe zacá. Peru lu reunión anual ni guca lu iza 2017 bisiene chaahuicabe ni. Sicaríʼ guníʼ presidente stiʼ reunión que: «Cadi cuchéʼdinu pa guinábanu lu oración stinu gaca vindicar o guiá lá Jehová purtiʼ caquiiñeʼ guihuinni cadi dxandíʼ guiráʼ ni huaníʼcabe de laabe» (biiyaʼ programa de enero de 2018 lu jw.org®, lu sección BIBLIOTECA > JW BROADCASTING®).

^ párrafo 62 NI RIHUINNI LU FOTO RIʼ: Guníʼ Binidxabaʼ mal de Jehová para guninabe laa ora gúdxibe Eva rusiguii Dios. Lu guiráʼ ca iza ni maʼ gudiʼdiʼ ca, rucaabe binni guiníʼ ique malu Dios ne cadi laa bizáʼ binni.

^ párrafo 64 NI RIHUINNI LU FOTO RIʼ: Cusiene ti hermanu ximodo naca Jehová ra cudii estudiu.