LAGA zizá chupa baʼdudxaapaʼ ndaaniʼ ti lugar ra nuu stale negocio, ni nuu ndaaniʼ guidxi Baguio (Filipinas). Biiyacaʼ zuhuaa ti exhibidor, peru qué ninacaʼ nidxíñacaʼ. Cueʼ exhibidor que zuhuaa ti hermana láʼ Helen, biiyadxibe ne bixídxinebe laacaʼ. Qué nidxiña ca baʼdudxaapaʼ que laabe, peru guizáʼ bidxagayaacaʼ purtiʼ bixidxiné Helen laacaʼ.

Qué nindaa, laga dxíʼbacabe ndaaniʼ autobús ni ziné laacabe ra lídxicabe, biiyacabe letreru stiʼ jw.org ni cá cueʼ ti Yoo stiʼ Reinu. Bedasilú laacabe ngueca letreru cá lu exhibidor que, para biétecabe ndaaniʼ autobús que ne biiyacabe xi dxi ne pora rapa ca congregación que reunión.

Guyé ca baʼdudxaapaʼ riʼ reunión ne casi biuucabe ndaaniʼ Yoo stiʼ Reinu que, nagueendaca binibiáʼcabe Helen. Sicaríʼ guníʼ Helen: «Ora biiyaʼ zeeda dxíñacabe ra nuaaʼ, bidxibeʼ, purtiʼ guníʼ iqueʼ nuu xi bineʼ laacabe». Peru bisiene ca baʼdudxaapaʼ riʼ Helen xiñee guyecaʼ reunión.

Guyuulaʼdxiʼ ca baʼdudxaapaʼ riʼ guiráʼ ni biete lu reunión ne pabiáʼ galán bidxaagalú ca hermanu ne hermana laacabe. Laaca gucanécabe guiá Yoo stiʼ Reinu biluxe si reunión que. Tobi de ca baʼdudxaapaʼ que maʼ cadi nabeza ndaaniʼ guidxi que, peru sti baʼdudxaapaʼ que la? rié guiráʼ reunión ne maʼ cayuundanécabe laa Biblia... ¡bizaaca guiráʼ ndiʼ purtiʼ bixidxiné Helen laacabe!