Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 7

Nadxiinu Bixhózenu, Jehová, de guidubi ladxidoʼno

Nadxiinu Bixhózenu, Jehová, de guidubi ladxidoʼno

«Rannaxhiinu purtiʼ laabe gunnaxhiibe laanu primé» (1 JUAN 4:19).

CANCIÓN 3 Rudiiluʼ naa stipa, confianza ne valor

NI ZAZÍʼDINU *

1, 2. ¿Xiñee bidii Jehová lugar gácanu parte de familia stiʼ, ne ximodo bíʼnibe ni?

MAʼ BIʼNIʼ invitar Jehová laanu para chuʼnu lade ca xpinni ni runi adorar laa. Ládecabe nuu binni ni maʼ bidii laa Jehová ne ni napa fe sacrificiu ni biʼniʼ Xiiñibe. Nácanu ti familia ni nuu nayecheʼ. Nabáninu galán tiempu riʼ, ne laaca riéchenu purtiʼ nápanu ti esperanza de guibáninu sin gátinu, zanda gácani guibáʼ la? o dxi gaca Guidxilayú riʼ ti Paraísu.

2 Pur nadxii Jehová laanu, bíʼnibe ti sacrificiu naroʼbaʼ para ganda gácanu parte de familia stibe (Juan 3:16). Biblia ná «gudíxecabe ti preciu» pur laanu (1 Cor. 6:20). Cumu guti Jesús pur laanu la? zanda chuʼnu gaxha de Dios. Nápanu privilegiu gábinu Jehová, Dios ni jma risaca lu universu, Bixhózenu. Ne casi bizíʼdinu lu artículo gudíʼdica laabe nga Bixhózenu ne gástiruʼ stobi casi laabe.

3. Ora guiníʼ íquenu guiráʼ ni maʼ biʼniʼ Jehová, ¿xi zándaca guinabadiidxanu? (Laaca zanda gúʼyaluʼ recuadru ni láʼ « ¿Ñee ruuyaʼ Jehová naa la?»).

3 Zándaca guinabadiidxanu ni gunabadiidxaʼ ti hombre ni bicaa Biblia ora guníʼ: «¿Xi quixeniáʼ Jiobá pur guiráʼ ni galán biʼniʼ pur naa yaʼ?» (Sal. 116:12). Qué gápanu ni quíxenu Jehová, Bixhózenu ni nuu guibáʼ. Peru cumu nadxiibe laanu la? nga rucaa laanu gannaxhiinu laabe. Sicaríʼ bicaa apóstol Juan: «Rannaxhiinu purtiʼ laabe gunnaxhiibe laanu primé» (1 Juan 4:19). Yanna, ¿ximodo zanda  guluinu Bixhózenu Jehová nadxiinu laa yaʼ?

CADI GUIXÉLENU DE JEHOVÁ

Rusihuínninu pabiáʼ nadxiinu Jehová, Bixhózenu ni nuu guibáʼ ora qué rixélenu de laa, ora runi orarnu, ora ruzúʼbanu stiidxabe ne ora racanenu xcaadxi gannaxhii laabe. (Biiyaʼ párrafo 4 hasta 14).

4. Casi ná Santiago 4:8, ¿xiñee naquiiñeʼ gúninu stipa para guidxíñanu Jehová?

4 Racalaʼdxiʼ Jehová guidxíñanu laa ne cadi gusaana de guni orarnu laa (biindaʼ Santiago 4:8). Rinábabe laanu cadi gusaana de guni orarnu ne nuube listu para gucaadiágabe laanu (Rom. 12:12). Cadi guiníʼ íquenu qué zucaadiágabe laanu purtiʼ nuu xhiiñabe o maʼ bidxágabe. Yanna, ¿xi gúninu para gucaʼdiáganu laabe yaʼ? Ni zanda gúninu nga guidúʼndanu Stiidxabe, Biblia, ne ca publicación ni racané laanu para guiénenu ni. Laaca rucaʼdiáganu laabe ora riuunu reunión. Guzéʼtenu ti ejemplu, ora riniʼné ti padre ca xiiñiʼ la? racaneni laacaʼ chuʼcaʼ tobi si, zacaca nga ora guni orarnu Jehová, racaneni laanu chuʼnu jma gaxha de laabe.

(Biiyaʼ párrafo 5).

5. ¿Xi zanda gúninu para chuulaʼdxiʼ Jehová ca oración stinu?

5 Guníʼ ique ximodo nga ca oración rúniluʼ Dios. Racaláʼdxibe guxhélenu ladxidoʼno ora guni orarnu laabe (Sal. 62:8). Nga runi, galán guiníʼ íquenu ndiʼ: «¿Ñee ngueca ca ngueca rinieeʼ ora runeʼ orar la? o rinieeʼ ca ni nuu ndaaniʼ ladxiduáʼ?». Nadxiinu Jehová de guidubi ladxidoʼno ne racaláʼdxinu chuʼnu gaxha de laa. Para ganda gúninu ni bizéʼtenu riʼ, caquiiñeʼ guni orarnu laabe guiráʼ dxi. Guxhélenu ladxidoʼno, gábinu laabe ni rusiecheʼ ne ni riguu xizaa laanu. Cadi guiaandaʼ laanu zanda guidxíñanu Jehová para gacané laanu.

6. ¿Xi caquiiñeʼ gúninu para chuʼnu jma gaxha de Jehová?

6 Para chuʼnu jma gaxha de Jehová, laaca caquiiñeʼ gácanu binni ni rudii xquixe peʼ. Nga runi, biaʼsi ridúʼyanu ca diidxaʼ ni bizeeteʼ ti salmista ora guníʼ: «¡Biaa guiráʼ cosa maʼ bíʼniluʼ Jehová, Dios stinneʼ! Stale cosa sicarú maʼ bíʼniluʼ para laadu ne riníʼ íqueluʼ stale cosa para laadu —guirutiʼ zanda guchaagadu lii—. Pa ñacalaʼdxeʼ nusieneʼ ne ninieeʼ de laacani, qué ñanda ñuneʼ ni, purtiʼ nabé stale cani para guzeeteʼ de laacani» (Sal. 40:5). Qué rudíʼsinu xquixe peʼ Jehová, sínuque rusihuínninu ni pur ni rininu ne ni rúninu. Ndiʼ rusihuinni maʼ gadxé laanu de ca binni de tiempu riʼ, purtiʼ nabáninu lade binni ni qué rudii xquixe peʼ Dios pur guiráʼ ni rúnibe pur laacaʼ. Ti cosa ni rusihuinni nabáninu «lu ca últimu dxi» nga cadi «agradecidu» binni (2 Tim. 3:1, 2). Qué chuʼ dxi gácanu casi laacabe.

7. ¿Xi racalaʼdxiʼ Jehová gúninu, ne xiñee?

7 Qué racalaʼdxiʼ ca padre tinde ca xiiñiʼ, sínuque racaláʼdxicaʼ chúʼcabe tobi si. Ne laaca ngaca racalaʼdxiʼ Jehová para ca xiiñiʼ. Ne ora rannaxhiisaanu rusihuínninu dxandíʼ xpinni Cristu laanu (Juan 13:35). Sicaríʼ bicaa ti xpinni Dios: «¡Laguuyaʼ pabiáʼ galán ne sicarú nga chuʼ ca hermanu tobi si!» (Sal. 133:1). ¿Cadi dxandíʼ runi sentirnu casi salmista riʼ la? Ora rannaxhiinu ca hermanu stinu, laaca rusihuínninu nadxiinu Jehová (1 Juan 4:20). Riéchenu stale gácanu parte de ti familia de hermanu ni nabé «nachaʼhuiʼ», ni rannaxhii ne ni riá binni (Efes. 4:32).

GUSIHUÍNNINU NADXIINU JEHOVÁ ORA GUZÚʼBANU DIIDXAʼ

(Biiyaʼ párrafo 8).

8. Casi ná 1 Juan 5:3, ¿gunáʼ nga razón ni jma risaca nápanu para guzúʼbanu stiidxaʼ Jehová?

8 Racalaʼdxiʼ Jehová guzuubaʼ xiiñiʼ binni stiidxaʼ bixhoze ne jñaa, ne laaca racaláʼdxibe guzúʼbanu stiidxabe (Efes. 6:1). Ne caquiiñeʼ gúninu ni bizéʼtenu riʼ,  purtiʼ laabe bizaʼbe laanu, pur laabe nabáninu ne laabe nga Bixhózenu ni jma nuu xpiaaniʼ. Peru razón ni jma risaca nápanu para guzúʼbanu stiidxabe nga purtiʼ nadxiinu laabe (biindaʼ 1 Juan 5:3). Neca nápanu stale razón para guzúʼbanu stiidxabe la? qué rucaabe laanu gúninu ni. Rudiibe lugar laanu cuinu xi gúninu, ne riéchebe ora riguixhe íquenu guzúʼbanu stiidxabe.

9, 10. ¿Xiñee risaca gunibiaʼnu ca ley stiʼ Dios ne guibáninu modo nácani?

9 Racalaʼdxiʼ ca padre cadi guizaaca ca xiiñicaʼ gastiʼ. Nga runi, riguixhecabe regla para gápacabe ca xiiñicabe. Ca xcuidihuiiniʼ ni ruzuubaʼ diidxaʼ, rusihuínnicaʼ nápacaʼ confianza ne runi respetarcaʼ bixhózecaʼ. Peru ni jma risaca nga gunibiaʼnu ca ley stiʼ Jehová ne gúninu ni nácani. Zacá rusihuínninu nadxiinu Jehová ne runi respetarnu laa. Ne zabeendunu stale cosa galán lu xquendanabáninu (Is. 48:17, 18). Peru ca binni ni rucaanáʼ Dios ne qué rinanda ni rusiidibe runinacaʼ laca laacaʼ (Gál. 6:7, 8).

10 Pa guibáninu modo riuulaʼdxiʼ Jehová la? zápabe laanu, zaguixhedxibe ladxidoʼno ne ziuʼnu jma gaxha de laabe. Nánnabe xii nga ni jma galán para laanu. Sicaríʼ guníʼ ti hermana de Estados Unidos ni láʼ Aurora: «Ribeendú binni cosa galán ora ruzuubaʼ stiidxaʼ Jehová». Ne nanna dxíchinu dxandíʼ rizaaca ni guníʼ hermana riʼ. Nga runi, guníʼ ique ndiʼ: «¿Xi  maʼ guleenduáʼ pur rinandaʼ ca conseju sicarú ni rudii Jehová naa yaʼ?».

11. ¿Ximodo racané oración laanu?

11 Ora runi orarnu la? racaneni laanu gácanu nadxibalú dede né ora gácani nagana para laanu. Nuu biaje raca nagana para laanu guzúʼbanu stiidxaʼ Jehová purtiʼ binni ruchee laanu, peru caquiiñeʼ gúninu stipa para guzúʼbanu stiidxabe. Ti salmista gunabaʼ Dios: «Gucané naa gapaʼ deseu para guzuubaʼ stiidxaluʼ» (Sal. 51:12). Denise, ti precursora regular guníʼ: «Ora raca nagana para naa chinandaʼ xiixa mandatu stiʼ Jehová la? rinabaʼ laabe gudiibe stipa naa para guneʼ ni jneza». Cadi guiaandaʼ laanu, siempre ricabi Jehová ca oración stinu (Luc. 11:9-13).

GACANENU XCAADXI GANNAXHIICAʼ JEHOVÁ

12. Casi ná Efesios 5:1, ¿xi caquiiñeʼ gúninu?

12 (Biindaʼ Efesios 5:1). Cumu «maʼ xiiñiʼ» Jehová laanu la? rúninu stipa para chinándanu ejemplu stiʼ. Rúninu stipa gápanu ca cualidad ni nápabe, nga runi rannaxhiinu, runi perdonarnu ne nácanu amable né xcaadxi. Ora guʼyaʼ xcaadxi binni ni qué runi ni ná Jehová pabiáʼ galán conducta stinu la? zándaca gucaa ni laacaʼ chuuláʼdxicaʼ guiziidicaʼ jma de laabe (1 Ped. 2:12). Caquiiñeʼ guni tratar ca padre ca xiiñicaʼ modo runi tratar Jehová laanu. Pa gúnicabe ni, zándaca gacalaʼdxiʼ ca xiiñicabe gaca xhamígucaʼ Jehová.

(Biiyaʼ párrafo 13).

13. ¿Xi caquiiñeʼ guietenaláʼdxinu para cadi guituí lunu ne guinínenu binni de Jehová?

 13 Runi sentir ca xcuidihuiiniʼ orgulloso de bixhózecaʼ ne riéchecaʼ ora riniʼcaʼ de laacabe. Zacaca nga laanu, runi sentirnu orgulloso de Bixhózenu ni nuu guibáʼ ne racaláʼdxinu gunibiáʼ xcaadxi binni laabe. Runi sentirnu casi biʼniʼ sentir rey David, laa bicaa: «Zanieeʼ de Jehová né orgullo» (Sal. 34:2). Peru zándaca nuu de laanu natuí ne ridxibi guiniʼné xcaadxi binni de laabe. ¿Xi zacané laanu cadi gácanu zacá yaʼ? Guietenaláʼdxinu pabiáʼ ziecheʼ Jehová ora gúninu ni ná ne guiráʼ ni zabeendú binni ni gunibiáʼ laabe. Zacanebe laanu gácanu nadxibalú. Cásica gucanebe ca hermanu ni bibani lu primé siglu, laaca zacanebe laanu (1 Tes. 2:2).

14. ¿Xi razón nápanu para guni predicarnu ne gacanenu binni gaca discípulo stiʼ Cristu?

14 Biaʼca risaca guiráʼ binni para Jehová, ne riéchebe ora ruuyabe rannaxhiinu xcaadxi binni, gastiʼ naca padé laacaʼ (Hech. 10:34, 35). Runi predicarnu ca noticia galán stiʼ Dios purtiʼ nadxiinu binni (Mat. 28:19, 20). ¿Xi ribeendú binni ora runi predicarnu laacaʼ yaʼ? Ribánicaʼ jma galán ne rápacaʼ esperanza de guibánicaʼ sin gáticaʼ lu ca dxi ni zeeda ca (1 Tim. 4:16).

PA GANNAXHIINU JEHOVÁ ZABÁNINU NAYECHEʼ

15, 16. ¿Xi razón nápanu para chuʼnu nayecheʼ?

15 Jehová nga Bixhózenu ni nadxii laanu ne racaláʼdxibe guibani familia stibe nayecheʼ (Is. 65:14). Tiempu riʼ, neca cadxaagalunu guendanagana, nápanu stale razón para chuʼnu nayecheʼ. Ne nanna dxíchinu nadxii Jehová laanu de guidubi ladxidóʼ. Laaca runibiáʼ chaahuinu ni rusiidiʼ Stiidxaʼ Dios, Biblia (Jer. 15:16). Ne nácanu parte de ti familia risaca ni nadxii Jehová, ni rinanda ca ley stibe ne ni nadxiisaa (Sal. 106:4, 5).

16 Laaca zanda chuʼnu nayecheʼ purtiʼ zabáninu jma galán lu ca dxi ni zeeda ca. Nanna dxíchinu mayaca gunitilú Jehová ca binni malu ne ora gueedanebe Reinu stibe zúnibe Guidxilayú riʼ ti Paraísu. Laaca nápanu esperanza zabani ca ni maʼ guti ne ziuucaʼ tobi si né ca familia sticaʼ (Juan 5:28, 29). ¿Guizáʼ galán esperanza riʼ njaʼ? Ne ni jma risaca nga maʼ cadi candaa guiráʼ binni nabeza lu Guidxilayú ne guiráʼ ca ni nuu guibáʼ zusisácacaʼ Jehová, zaguucaʼ naróʼ stibe ne zuni adorarcaʼ laasibe.

CANCIÓN 12 Nandxoʼloʼ Jiobá, Dios stidu

^ párrafo 5 Nánnanu guizáʼ nadxii Bixhózenu Jehová laanu ne maʼ gulibe laanu para gácanu parte de xquídxibe. Laanu laaca nadxiinu laabe. ¿Ximodo zanda guluinu Jehová nadxiinu laa yaʼ? Lu artículo riʼ zadúʼyanu ximodo zanda gúninu ni.