Biiyaʼ guiraʼ ni nuu lu sitiu riʼ

guyé lu índice

 HISTORIA STINNEʼ

Guleenduáʼ stale cosa galán purtiʼ yenandaʼ ejemplu galán stiʼ xcaadxi hermanu

Guleenduáʼ stale cosa galán purtiʼ yenandaʼ ejemplu galán stiʼ xcaadxi hermanu

DXI joven naa, guca nagana para naa chiguneʼ predicar. Ne ra gudiʼdiʼ iza gucuaaʼ caadxi privilegiu ni guníʼ iqueʼ qué zanda guneʼ cumplir. Nga runi, chigüeniáʼ laatu de caadxi hermanu ni guca ti ejemplu galán para naa ne gucanecaʼ naa gudxieeluáʼ ni ruchibi naa ne guiecheʼ pur guiráʼ ca ndaayaʼ ni maʼ gucuaaʼ lu cincuenta y ocho iza de cayuneʼ xhiiñaʼ Jehová de tiempu completu.

Guleʼ ndaaniʼ guidxi Quebec, ti guidxihuiiniʼ ni nuu Canadá, ra riníʼcabe diidxaʼ francés. Bixhozeʼ ne jñaaʼ, Louis ne Zélia, guizáʼ gunnaxhiicaʼ naa. Nabé natuí bixhozeʼ ne riuulaʼdxiʼ guʼndaʼ libru. Ne naa riuuladxeʼ gucaaʼ ne guyuuladxeʼ gacaʼ periodista.

Dxi napaʼ 12 iza, yeganna Rodolphe Soucy ne ti xhamigu laadu, testigu stiʼ Jehová laacabe, runiné bixhozeʼ Rodolphe dxiiñaʼ. Qué gannaʼ xi guiráʼ rusiidiʼ ca Testigu, ne qué racalaʼdxeʼ gannaʼ jma de religión stícabe. Peru guizáʼ bidxagayaaʼ purtiʼ nacháʼhuicabe ne guizáʼ jneza modo ricábicabe ca pregunta stidu né Biblia. Laaca guizáʼ bidxagayaa bixhozeʼ ne jñaaʼ, nga runi gúdxidu laacabe racaláʼdxidu guni estudiardu Biblia.

Tiempu que, riaaʼ ti scuela católica. Ne gatigá gunieniaʼ ca compañeru stinneʼ de ni caziideʼ. Peru ti dxi, ca maestru ni naca sacerdote gúnnacaʼ xidé rinieniáʼ ca compañeru stinneʼ. Tobi de laacabe lugar de niquiiñeʼ Biblia para niníʼ cadi jneza ni canieeʼ, guniʼbe nezalú ca xcompañeruaʼ nacaʼ ti rebelde. Peru ca ni gúdxibe naa que gucaneni naa gudieeʼ cuenta cadi lu Biblia zeeda ca ni rusiidicabe. Ne bieneʼ maʼ cadi naquiiñeʼ chaaʼ scuela que. Nga runi, bichaa bixhozeʼ ne jñaaʼ naa de scuela.

BIZIIDEʼ GUNEʼ PREDICAR NÉ STALE GANA

Qué nusaanaʼ de ñuneʼ estudiar Biblia, peru qué ñuneʼ progresar nagueenda purtiʼ ridxibeʼ guneʼ predicar de yoo pur yoo. Stale binni runi ni ná yuʼduʼ católicu ne nabé feu modo guzanándacabe laadu ora riguni predicardu. Maurice Duplessis, primé ministru stiʼ guidxi Quebec, guyuube tobi si né  yuʼduʼ católicu. Ne gucanebe laacaʼ sanándacaʼ ne guninacaʼ ca Testigu. Nga runi, caquiiñeʼ gácaluʼ nadxibalú para guni predicarluʼ tiempu que.

Ti hermanu ni gucané naa cadi guidxibeʼ nga John Rae, guyebe clase númeru gaʼ stiʼ Escuela de Galaad. Neca nápabe stale experiencia, nabé humilde laabe. Huaxiéʼ biaje bidiibe conseju naa, peru gucané ejemplu stibe naa. Cumu raca nagana para laabe guiniʼbe francés la? gatigá riguneʼ predicar né laabe ne gucaniáʼ laabe guiziidibe idioma ca. Cumu guyuaaʼ gaxha de John la? gucanebe naa quixhe iqueʼ gacaʼ testigu stiʼ Jehová. Guyuaanisaʼ 26 de mayo de 1951, chii iza despué de gunieniaʼ ca Testigu primé biaje.

Ejemplu galán stiʼ hermanu John Rae (A) gucaneni naa (B) cadi guidxibeʼ guneʼ predicar de yoo pur yoo.

Nahuiiniʼ congregación stidu ni nuu guidxi Quebec, ne precursor stale de ca hermanu que. Ejemplu stícabe gucaneni naa para gacaʼ precursor. Tiempu que, ora riguni predicardu de yoo pur yoo Biblia si riquiiñedu. Cumu qué gápadu publicación la? bizíʼdidu iquiiñedu ni jneza. Nga runi, bineʼ stipa para guiziideʼ stale textu de lu Biblia ti guneʼ defender ni runeʼ cré. Peru stale binni qué niná nidúʼndanedu laacaʼ Biblia pa qué gápadu permisu stiʼ yuʼduʼ católicu, binibiáʼcabe permisu que casi imprimátur.

Lu iza 1952, bichaganaʼyaʼ Simone Patry, ti hermana fiel de guidxi Quebec. De raqué yendézadu Montreal, ne ante de ti iza gúpadu ti dxaapahuiiniʼ, gulee ladu laabe Lise. Neca maʼ cadi precursor naa ante guichaganaʼyaʼ, naa ne Simone bínidu stipa cadi gápadu stale cosa para ganda gúnidu jma dxiiñaʼ ndaaniʼ congregación.

Despué de chii iza guníʼ iqueʼ gacaʼ precursor sti biaje. Lu iza 1962, guyaaʼ Escuela del Ministerio del Reino para ancianu, rindaa scuela que ti beeu, ne gúcani Betel ni nuu Canadá. Naa ne hermanu Camille Ouellette gúcadu compañeru de cuartu. Guizáʼ bidxagayaaʼ ora biʼyaʼ runi predicarbe né stale gana, neca nápabe xheelabe ne xiiñibe. Tiempu que, huaxiéʼ si hermanu ne hermana de Quebec precursor laacaʼ neca cusiniisicaʼ ca xiiñicaʼ. Peru ngue nga ni naguixhe ique Camille guni. Tiempu gúcadu compañeru, gucanebe naa guuyaʼ pa zanda guneʼ jma lu xhiiñaʼ Jehová. Gudiʼdiʼ caadxi beeu, bidieeʼ cuenta zanda gacaʼ precursor. Caadxi hermanu guníʼ ique cadi jneza ni cá iqueʼ  guneʼ que, peru gucaʼ precursor, ne nannaʼ dxiicheʼ zaguu Jehová ndaayaʼ stipa stinneʼ pur guneʼ jma lu xhiiñaʼ.

BIBIGUÉTADU GUIDXI QUEBEC CASI PRECURSOR ESPECIAL

Lu iza 1964, naa ne Simone gúcadu precursor especial ndaaniʼ guidxi Quebec, guidxi ra gúledu. Ne raqué gucanedu caadxi iza. Tiempu que, maʼ huaxiéʼ rizanándacabe laadu que dxiqué.

Ti sábadu huadxí, gunaaze puliciá naa ndaaniʼ ti guidxihuiiniʼ láʼ Sainte-Marie ni riaana gaxha de guidxi Quebec. Yené ti puliciá naa cárcel ne guluube naa raqué purtiʼ qué gapaʼ permisu para guneʼ predicar. Despué, yenécabe naa ra nuu juez ni láʼ Baillargeon, ti hombre ni nabé ridxibi binni. Gunabadiidxabe naa tu chigaca representante stinneʼ lu juiciu que. Ora gudxeʼ laabe Glen How * nga abogadu stinneʼ, ti Testigu ni nabé runibiáʼ binni, bidxibi juez que ne guníʼ: «¡Coʼ, laabe coʼ!». Nabé binibiáʼ binni hermanu Glen How purtiʼ gucanebe stale hermanu. Nin qué nindaa, gúdxicabe naa maʼ qué gapaʼ donda ne guleecabe naa de ndaaniʼ cárcel.

Cumu nabé nadipaʼ rucaalúcabe xhiiñadu ndaaniʼ guidxi Quebec la? guca nagana para laadu guidxéladu ti lugar galán para guidagulisaadu. Peru bidxéladu ti lugar huaxiéʼ galán ra riguu binni carru stiʼ para guidagulisaadu ne guizáʼ nananda raqué. Ngue runi biyubi ca hermanu que ti aparatu para guchaa laadu. Ante gápadu reunión, ruzuhuaʼdu gaxha de laani caadxi hora ante ne rinidu experiencia para uguusaadu gana laadu.

Nabé ridxagayaadu modo caroobaʼ xhiiñaʼ Jehová ndaaniʼ guidxi Quebec lu ca últimu iza riʼ. Lu iza 1960, caadxi si congregación nuu gaxha de Quebec, región stiʼ Côte-Nord ne península de Gaspé. Tiempu riʼ, maʼ nuu stale hermanu ca lugar riʼ ne nabé galán ca Yoo stiʼ Reinu ra ridagulisaacabe.

BIʼNIʼ INVITÁRCABE NAA GACAʼ SUPERINTENDENTE VIAJANTE

Lu iza 1977, guyaaʼ ti reunión para superintendente viajante ndaaniʼ guidxi Toronto (Canadá).

Lu iza 1970, biʼniʼ invitárcabe naa gacaʼ superintendente de circuito ne Simone, xheelaʼ, ne lu iza 1973 gucaʼ superintendente de distrito né xheelaʼ. Ca iza que la? biziideʼ stale de ca superintendente viajante ni nanna stale, casi hermanu Laurier Saumur * ne David Splane. * Despué de cada asamblea, naa ne David rudiisaadu conseju laadu para gusíʼdidu jma jneza. Rietenalaʼdxeʼ ti biaje gúdxibe naa: «Léonce, guyuuladxeʼ últimu discursu bidiiluʼ. Nabé galán ni, peru né guiráʼ información biquiiñeluʼ ca, ñanda ñuneʼ chonna discursu». Nabé biquiiñeʼ stale información dxiqué ora rudieeʼ discursu, ngue runi caquiiñeʼ guneʼ stipa para cadi iquiiñeʼ stale información.

Bineʼ servir ndaaniʼ gadxé gadxé guidxi ladu este stiʼ Canadá.

 Ti cosa ni runi ti superintendente de distrito nga riguu gana ca superintendente de circuito. Peru stale hermanu de Quebec runibiaʼcaʼ naa, nga runi ora rigannaʼ ca superintendente de circuito stale hermanu racaláʼdxicaʼ guneʼ predicarniaʼ laacaʼ. Ne riuuladxeʼ guneʼ predicarniaʼ laacabe, peru huaxiéʼ racaniáʼ superintendente de circuito. Ti biaje la? né diidxaʼ nadóʼ gudxi ti superintendente de circuito naa ca diidxaʼ riʼ: «Galán nga chuʼluʼ gaxha de ca hermanu, peru cadi guiaandaʼ lii naa nga beeda gánnaluʼ semana riʼ. Naa laaca caquiiñeʼ tu uguu gana naa». Gucané conseju stibe naa gacaʼ equilibradu.

Lu iza 1976 bizaaca xiixa ni cadi cabezaʼ ne ni guluu naa triste. Gupa Simone, xheelaʼ, ti guendahuará nabé malu ne guti. Guizáʼ galán ca cualidad stibe purtiʼ riuuláʼdxibe gacanebe xcaadxi ne nadxiibe Jehová. Ra bineʼ jma lu xhiiñaʼ Jehová gucaneni naa gudxieeluáʼ yuubaʼ stinneʼ dxi gútibe, ne rudieeʼ xquixe peʼ Jehová purtiʼ gunnaxhii ne gucané naa ca dxi nagana que. Gudiʼdiʼ si tiempu, bichaganaʼyaʼ Carolyn Elliott, ti precursora nabé nayecheʼ ni riníʼ inglés ne ni runi servir ndaaniʼ guidxi Quebec. Nabé riuuláʼdxicabe guidxaagacabe Carolyn ne laa rizaalaʼdxiʼ xcaadxi binni, jmaruʼ si ca ni natuí ne ni runi sentir stubi. Guizáʼ gucanebe naa lu dxiiñaʼ de superintendente viajante.

TI IZA NABÉ RISACA

Lu beeu enero de 1978, gunábacabe naa gacaʼ instructor lu primé Escuela del Servicio de Precursor ndaaniʼ guidxi Quebec. Guyuaaʼ xizaa purtiʼ nacubi información que para naa ne para ca estudiante que. Peru lu scuela que nuu stale precursor ni napa experiencia. Nga runi, neca naa nga instructor que la? biziideʼ stale cosa de laacabe.

Iza queca que la? guca ti Asamblea Internacional ra Estadio Olímpico de Montreal, ni biree láʼ «Fe victoriosa». Laani nga tobi  de ca asamblea jma naroʼbaʼ ni huayaca ndaaniʼ guidxi Quebec, guyé jma de ochenta mil binni. Biʼniʼ asignárcabe naa Departamento de Servicio de Noticias. Gunieniaʼ stale periodista, ne guizáʼ biecheʼ ora biiyaʼ guiráʼ ca cosa galán ni guníʼ ca medio de comunicación de ca Testigu. Jma de gande hora bindaa ca entrevista ni guca lu radiu ne lu televisión, ne biree stale artículo lu periódicu. Nga runi, stale binni gunna jma de Jehová ne xquidxi.

YEGACANEDU TI TERRITORIO NACUBI

Lu iza 1996 bichaa xiixa lu xquendanabaneʼ. Dede dxi guyuaanisaʼ, bineʼ servir ndaaniʼ guidxi Quebec ra riníʼcabe francés. Peru biʼniʼ asignárcabe naa ndaaniʼ guidxi Toronto ra riníʼcabe inglés. Bineʼ sentir qué zanda guneʼ dxiiñaʼ que ne bidxibeʼ gudieeʼ discursu purtiʼ qué rinieeʼ chaahueʼ inglés. Peru caquiiñeʼ gapaʼ jma confianza Jehová ne guneʼ orar laa jma.

Yanna zanda guinieeʼ nabé galán guiropaʼ iza bineʼ servir ndaaniʼ guidxi Toronto. Gupa Carolyn paciencia naa ne gucané naa cadi guidxibeʼ guinieeʼ inglés, ne laaca gucané ne guluu ca hermanu gana naa. Nagueendaca bidxéladu tu gaca xhamígudu.

Viernes huadxí ante de asamblea de circuito, aparte de ca dxiiñaʼ ni raca para asamblea ca, riuuladxeʼ chiguneʼ predicar ti hora. Zándaca guyuu tu gunabadiidxaʼ xiñee runeʼ predicar ti dxi ante gapaʼ asamblea. Peru bidieeʼ cuenta riuaaʼ gana ora rinieniáʼ binni de Stiidxaʼ Dios. Ne yanna laaca zacaca runeʼ sentir cada biaje runeʼ predicar.

Lu iza 1998 biʼniʼ asignárcabe naa ne Carolyn ndaaniʼ guidxi Montreal casi precursor especial. Bidiicabe naa caadxi dxiiñaʼ guneʼ, caadxi de laacani nga guuyaʼ gaca predicar ra ridiʼdiʼ stale binni ne guinieniaʼ ca medio de comunicación para cadi guiníʼ ique binni mal de ca testigu stiʼ Jehová, ne bineʼ dxiiñaʼ riʼ stale iza. Tiempu riʼ, naa ne Carolyn riuuláʼdxidu guni predicardu ca binni de sti guidxi ni deruʼ yendá ndaaniʼ guidxi Canadá, ca ni riuulaʼdxiʼ guiziidiʼ jma de Biblia.

Naa ne Carolyn, xheelaʼ

Ora riníʼ iqueʼ guiráʼ ca ndaayaʼ ni maʼ gucuaaʼ lu sesenta y ocho iza ni napaʼ de guyuaanisaʼ la? rudieeʼ xquixe peʼ Jehová. Nuaaʼ nayecheʼ purtiʼ biziideʼ guneʼ predicar ne gucaniáʼ stale binni gunibiaʼcaʼ Jehová. Despué de bisiniisi xiiñeʼ, Lise, ne xheelaʼ ca xiiñiʼ la? gúcacaʼ precursor regular. Ora ruuyaʼ runi predicar Lise né stale gana la? riecheʼ. Ne rudieeʼ xquixe peʼ ca hermanu ni gucané naa pur ca ejemplu galán sticaʼ, ca conseju bidiicaʼ naa gucanécani naa chuaaʼ jma gaxha de Jehová ne guneʼ cumplir ca asignación bidii organización stiʼ Jehová naa. Maʼ biziideʼ zanda guni cumplirnu ti asignación pa gápanu confianza espíritu santu stiʼ Jehová (Sal. 51:11). Qué zusaanaʼ de gudieeʼ xquixe peʼ Jehová pur privilegiu bidii naa de gusisacaʼ lá (Sal. 54:6).

^ párrafo 16 Zadxélaluʼ historia stiʼ hermanu W. Glen How lu revista ¡Despertad! 22 de abril iza 2000 ni láʼ “La batalla no es de ustedes, sino de Dios”.

^ párrafo 20 Zadxélaluʼ historia stiʼ hermanu Laurier Saumur lu revista La Atalaya 15 de mayo de 1977 ni láʼ «Encontré la causa por la cual luchar».

^ párrafo 20 Hermanu David Splane nga tobi de ca ni nuu lu Grupu ni Zániru stiʼ ca Testigu stiʼ Jehová.