Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 8

Guyúbinu chuʼnu tobi si ne cadi gápanu envidia

Guyúbinu chuʼnu tobi si ne cadi gápanu envidia

«Gúninu biaʼ gándatiʼ para chuʼnu en paz né binni ne para gacanésaanu» (ROM. 14:19).

CANCIÓN 113 Paz ni napa xquidxi Dios

NI ZAZÍʼDINU *

1. ¿Xi bizaaca familia stiʼ José pur gupa ca bíʼchibe envidia laabe?

GUNNAXHII JACOB guiráʼ ca xiiñiʼ, peru jma gunnaxhiibe José, ti hombrehuiiniʼ de 17 iza. ¿Ximodo biʼniʼ sentir xcaadxi xiiñibe yaʼ? Gúpacaʼ envidia José ne gucananaláʼdxicaʼ laabe. Peru José qué ñuni gastiʼ para ñacananaláʼdxicabe laa. Neca zaqué, bitoocabe laa para cheʼ de esclavu ne gúdxicabe bixhózecabe biiti ti maniʼ xiiñibe ni jma nadxiibe. Cumu gúpacabe envidia la? maʼ qué ñuu familia stícabe tobi si ne bininácabe ladxidóʼ bixhózecabe (Gén. 37:3, 4, 27-34).

2. Casi ná Gálatas 5:19-21, ¿xiñee nabé malu gapa binni envidia?

2 Lu Stiidxaʼ Dios ná envidia * nga tobi de «ca deseu stiʼ xcuerpu binni», zanda guutini laa ne zándaca pur laani maʼ qué ziuu lu Reinu stiʼ Dios (biindaʼ Gálatas 5:19-21). Nabé malu nga gapa binni envidia purtiʼ pur laani maʼ qué raca xhamigu chupa binni, ridíndecaʼ ne ridxiichicaʼ.

3. ¿Xi zadúʼyanu lu artículo riʼ?

3 Ni biʼniʼ ca biʼchiʼ José rusihuínnini zanda gusirá envidia amistad ni napa binni ne laaca qué riuu ti familia tobi si. Neca qué ziuu dxi gúninu ni biʼniʼ ca biʼchiʼ José la? guietenaláʼdxinu binni ruchee laanu ne riguite ladxidoʼno laanu (Jer. 17:9). Nga runi nuu biaje runi sentirnu envidia. Guidúʼyanu caadxi ejemplu ni zeeda lu Biblia ni zaguixhená laanu ne ni zacané laanu gánnanu xi pur riuu envidia  ndaaniʼ ladxidoʼno. Laaca zadúʼyanu xi zanda gúninu para gudxiilunu ni ne para chuʼnu tobi si.

XI PUR RAPA BINNI ENVIDIA

4. ¿Xiñee gupa ca filisteu envidia Isaac?

4 Ora napa binni stale bueltu. Guca Isaac ti hombre ricu, ne gupa ca filisteu envidia laabe pur guiráʼ ni nápabe (Gén. 26:12-14). Dede bichiicaʼ ca bizé stiʼ Isaac ni riquiiñebe para gudiibe nisa gueʼ ca maniʼ stibe (Gén. 26:15, 16, 27). Tiempu riʼ, nuu binni ni naca casi ca filisteu que ne nápacaʼ envidia ca binni ni napa jma cosa que laacaʼ. Qué racaláʼdxisicaʼ gápacaʼ ni napa stobi, sínuque ni racaláʼdxicaʼ nga pa ñanda si qué ñapa sti binni gastiʼ.

5. ¿Xiñee gupa ca xaíque yuʼduʼ envidia Jesús?

5 Ora nadxiicabe tuuxa. Gupa ca xaíque yuʼduʼ envidia Jesús purtiʼ nabé gunnaxhii binni laabe (Mat. 7:28, 29). Dios nga biseendaʼ Jesús lu Guidxilayú para gusiidiʼ ni dxandíʼ. Neca zaqué, guníʼ ca xaíque yuʼduʼ cosa ni cadi dxandíʼ de Jesús para guiníʼ ique binni mal de laabe (Mar. 15:10; Juan 11:47, 48; 12:12, 13, 19). ¿Xi rusiidiʼ relatu riʼ laanu? Rusiidiʼ ni laanu caquiiñeʼ gúninu stipa para cadi gápanu envidia ca hermanu ni napa cualidad galán ne ni nabé nadxii ca hermanu de congregación laacaʼ. Lugar de nga la? gúninu stipa chinándanu ejemplu stícabe (1 Cor. 11:1; 3 Juan 11).

6. ¿Ximodo bisihuinni Diótefres gupa envidia?

6 Ora napa tuuxa privilegiu ndaaniʼ congregación. Bibani Diótefres lu primé siglu, ne gúpabe envidia ca hermanu ni zániru ndaaniʼ congregación. Cumu nuube gácabe «xaíque lade ca hermanu» la? ngue runi guniʼbe mal de apóstol Juan ne xcaadxi hermanu ni zániru ndaaniʼ congregación para cadi guni respetárcabe laacaʼ (3 Juan 9, 10). Neca qué zúninu ni biʼniʼ Diótefres, zanda guzulú gápanu envidia ti hermanu ni gucuaa ti privilegiu ni racaláʼdxinu guicaanu, jmaruʼ si pa riníʼ íquenu jma jneza zúninu ni que laabe.

Zanda guchaaganu ladxidoʼno ti layú, ne zeeda gaca ca cualidad galán ni nápanu casi ti guieʼ ni riniisi luni. Peru zeeda gaca envidia ca casi ti yagahuiiniʼ ni napa venenu. Pa gápanu envidia la? qué zápanu cualidad galán, casi guendarannaxhii, guendariáʼ ne guendanachaʼhuiʼ. (Biiyaʼ párrafo 7).

7. ¿Xi zanda guizaacanu pa gápanu envidia?

7 Zeeda gaca envidia casi ti yagahuiiniʼ ni napa venenu. Ora maʼ gucuaa xcu ni ndaaniʼ ladxidóʼ tuuxa, nagana para gaxha ni. Ne ruzulú rapa tuuxa envidia ora riníʼ ique jma risaca que xcaadxi ne ora ruyubi puru para laasi. Ora rapa binni envidia la? qué rannaxhii, qué riá ne cadi nachaʼhuiʼ né xcaadxi. Caquiiñeʼ gáxhanu envidia ca de ndaaniʼ ladxidoʼno dede ca ora guzulú guiniisi ni. ¿Xi zanda gúninu para gudxiilunu ne guni ganarnu envidia yaʼ?

GÁCANU HUMILDE NE CHUʼNU NAYECHEʼ NÉ NI NÁPANU

¿Xi zanda gúninu para gudxiilunu ne guni ganarnu envidia? Zanda gacané espíritu santu stiʼ Dios laanu para gáxhanu ni de ndaaniʼ ladxidoʼno ne gácanu humilde ne chuʼnu nayecheʼ né ni nápanu. (Biiyaʼ párrafo 8 ne 9).

8. ¿Xi zacané laanu para gudxiilunu ne guni ganarnu envidia?

8 Zanda gudxiilunu ne guni ganarnu envidia pa gácanu humilde ne chuʼnu nayecheʼ né ni nápanu. Zacá qué zudiʼnu lugar guiniisi ni ndaaniʼ ladxidoʼno. Pa gácanu humilde, qué zaníʼ íquenu jma risácanu que xcaadxi ne qué zaníʼ íquenu caquiiñeʼ gudiicabe laanu jma que biaʼ ni ricaa xcaadxi (Gál. 6:3, 4). Binni ni nuu conforme né ni napa ribani nayecheʼ ne qué ruchaaga laa né xcaadxi (1 Tim. 6:7, 8). Binni humilde ne ni nuu nayecheʼ pur ni napa la? riecheʼ ora ricaa sti binni xiixa cosa galán.

9. Casi ná Gálatas 5:16 ne Filipenses 2:3, 4, ¿ximodo zanda gacané espíritu santu laanu?

9 Caquiiñenu espíritu santu stiʼ Jehová  para cadi gápanu envidia ne para gacané ni laanu gácanu humilde ne chuʼnu nayecheʼ né ni nápanu (biindaʼ Gálatas 5:16; Filipenses 2:3, 4). Racané espíritu stiʼ Dios laanu para guidúʼyanu xi riníʼ íquenu ne xi rucaa laanu gúninu xiixa cosa. Zanda gacané Dios laanu para cadi guiníʼ íquenu ne guni sentirnu cosa malu (Sal. 26:2; 51:10). Guidúʼyanu ejemplu stiʼ chupa hombre ni bidxiilú ne biʼniʼ ganar envidia, laacabe nga Moisés ne Pablo.

Cayabi ti joven Moisés ne Josué nuu chupa hombre ra campamentu ne cayúnicaʼ dxiiñaʼ de profeta. Canabaʼ Josué Moisés gucueeza laacabe, peru qué náʼ Moisés gúnini. Ne cayabibe Josué cayéchebe pur ni cayuni ca hombre riʼ. (Biiyaʼ párrafo 10).

10. ¿Xi guendanagana bidxaagalú Moisés? (Biiyaʼ dibuju ni zeeda lu portada).

10 Gupa Moisés stale autoridad luguiáʼ xquidxi Dios, peru qué niníʼ íquebe laasibe zanda gápabe privilegiu riʼ. Guzéʼtenu ni bizaaca ti biaje, guxha Jehová laabe ti parte de espíritu ni bidii laabe ne bidii ni caadxi ancianu de Israel ni nuu gaxha de tienda de reunión que. Gudiʼdiʼ si tiempu, gunna Moisés gucuaa chupa ancianu ni qué ñé ra tienda de reunión que espíritu santu ne bizulú bíʼnicaʼ dxiiñaʼ runi ti profeta. ¿Xi bíʼnibe dxi gunabaʼ Josué laabe gucueezabe ca hombre que yaʼ? Qué ñápabe envidia purtiʼ maʼ caquiiñeʼ Jehová guiropaʼ hombre riʼ, sínuque biéchebe maʼ gucuaacaʼ dxiiñaʼ para gácacaʼ profeta (Núm. 11:24-29). ¿Xi rusiidiʼ ejemplu stiʼ Moisés laanu?

¿Ximodo zanda gaca ca ancianu humilde cásica guca Moisés? (Biiyaʼ párrafo 11 ne 12). *

11. ¿Ximodo zanda chinanda ca ancianu ejemplu stiʼ Moisés?

11 Guzéʼtenu de ti ancianu ni nabé riuulaʼdxiʼ guni ti dxiiñaʼ ndaaniʼ congregación, casi gutiidiʼ Torre sti ni rapa. Gunábacabe laabe gusiidibe sti hermanu para gutiidiʼ estudiu riʼ despué. Pa humilde laabe casi Moisés, qué zaníʼ íquebe cayáxhacabe laabe privilegiu stibe. Sínuque zúnibe ni né stale guendanayecheʼ.

12. ¿Ximodo rusihuinni stale xpinni Dios humilde laacaʼ ne nuucaʼ nayecheʼ né ni nápacaʼ?

12 Guidúʼyanu sti cosa ni cazaaca stale hermanu ni maʼ huaniisi. Nuu de laacabe maʼ xadxí de nácacabe coordinador de cuerpu de ancianu. Peru ora rusaacabe 80 iza rusaanacabe privilegiu riʼ. Ne ca superintendente de circuito ni rusaa 70 iza rusihuínnicaʼ humilde laacaʼ ora rusaanacaʼ privilegiu sticaʼ ne ricaacaʼ sti asignación maʼ gadxé. Ne lu ca últimu iza riʼ, stale betelita maʼ gucuaacaʼ sti asignación fuera de Betel. Ca hermanu ne ca hermana fiel riʼ qué rápacaʼ envidia ca hermanu ni cayuni dxiiñaʼ ni bíʼnicabe dxiqué.

13. ¿Xiñee ñándaca ñapa apóstol Pablo envidia ca 12 apóstol?

13 Apóstol Pablo nga sti ejemplu galán nápanu, gúcabe humilde ne guyuube conforme né ni nápabe. Qué nudiibe lugar ñuu envidia ndaaniʼ ladxidoʼbe. Bíʼnibe stipa guni predicarbe dede ra gándatiʼ, ne cumu humilde laabe, sicaríʼ guniʼbe: «Naa nga ni jma nahuiiniʼ lade ca apóstol, ne qué runeʼ merecer gábicabe naa apóstol» (1 Cor. 15:9, 10). Guyuu ca 12 apóstol que gaxha de Jesús biaʼ dxi biʼniʼ xhiiñaʼ Dios lu Guidxilayú riʼ, peru Pablo guca xpinni Cristu despué de guti ne biasa Jesús de lade gueʼtuʼ. Neca ra gudiʼdiʼ tiempu gúcabe «apóstol ni rié ra nuu binni de xcaadxi guidxi» la? qué ñácabe tobi de ca 12 apóstol (Rom. 11:13; Hech. 1:21-26). Peru neca zaqué, guyuube nayecheʼ né ni nápabe ne qué ñápabe envidia ca 12 apóstol pur guca xhamígucaʼ Jesús.

14. ¿Xi zúninu pa humilde laanu ne nuunu nayecheʼ né ni nápanu?

14 Pa gácanu humilde ne chuʼnu nayecheʼ né ni nápanu, zácanu casi Pablo  ne zuni respetarnu autoridad bidii Jehová xcaadxi hermanu (Hech. 21:20-26). Maʼ gulí Jehová ca ancianu para sanírucaʼ ndaaniʼ congregación. Neca nácacabe binni ruchee, ruuyaʼ Jehová laacabe casi «hombre ni napa gadxé gadxé gracia» (Efes. 4:8, 11). Ora runi respetarnu laacabe, rusihuínninu humilde laanu, ne ora gúninu ni gábicabe laanu la? raca xhamígunu Jehová ne riuʼnu tobi si né ca hermanu stinu.

«GÚNINU BIAʼ GÁNDATIʼ PARA CHUʼNU EN PAZ NÉ BINNI»

15. ¿Xi caquiiñeʼ gúninu para cadi gápanu envidia?

15 Ora nuu envidia lade binni qué riuucaʼ tobi si. Cadi gudiʼnu lugar chuʼ envidia ndaaniʼ ladxidoʼno ne cadi gucaʼnu xcaadxi gapa envidia. Caquiiñeʼ gúninu guiropaʼ cosa risaca riʼ para guzúʼbanu stiidxaʼ Jehová ti «chuʼnu en paz né binni ne para gacanésaanu» (Rom. 14:19). ¿Xi zanda gúninu para gacanenu xcaadxi ti cadi gápacaʼ envidia, ne xi gúninu para chuʼnu tobi si?

16. ¿Xi zanda gúninu para gacanenu xcaadxi cadi gápacaʼ envidia?

16 Zanda gapa binni envidia laanu pur modo laanu ne pur ca ni gúninu. Riuulaʼdxiʼ binni guni presumirnu guiráʼ ni nápanu (1 Juan 2:16). Ne pur laani rapa binni envidia. ¿Xi zanda gúninu para cadi gucaʼnu xcaadxi gapa envidia yaʼ? Cadi gábinu laacabe xi guiráʼ nápanu o xi caníʼ íquenu sinu. Sti cosa ni zanda gúninu  nga cadi guni presumirnu guiráʼ privilegiu nápanu ndaaniʼ congregación. Purtiʼ pa gúninu ni la? zanda gucaʼnu xcaadxi gapa envidia laanu. Peru ora rizaaláʼdxinu xcaadxi binni ne ridúʼyanu ca cosa galán ni rúnicaʼ, racanenu laacaʼ chuʼcaʼ nayecheʼ ne riuʼnu tobi si né ca hermanu de congregación.

17. ¿Xi biʼniʼ ca biʼchiʼ José, ne xiñee?

17 Zanda gudxiilunu ne guni ganarnu envidia. Guzéʼtenu ejemplu stiʼ ca biʼchiʼ José sti biaje. Gudiʼdiʼ si stale iza de ni bíʼnicabe José, bíʼyacabe laa ndaaniʼ guidxi Egipto. Peru qué ñabi José laacabe tu laa, sínuque bitiidiʼ laacabe prueba para guʼyaʼ pa maʼ bichaacabe. Bíʼnibe ti guendaró para laacaʼ, ne gunábabe gudiicabe jma guendaró Benjamín, bíʼchibe ni jma nahuiiniʼ (Gén. 43:33, 34). Peru gastiʼ nin ti prueba ni rusihuinni gupa ca biʼchiʼ José envidia Benjamín. Lugar de nga la? bisihuínnicabe rizaaláʼdxicabe Benjamín ne Jacob, bixhózecabe (Gén. 44:30-34). Gunda bidxiilú ne biʼniʼ ganar ca biʼchiʼ José envidia, ne pur nga guyuu familia stícabe tobi si (Gén. 45:4, 15). Zacaca laanu, pa gáxhanu envidia de ndaaniʼ ladxidoʼno, ziuʼnu tobi si né familia stinu ne ca hermanu de congregación.

18. Casi ná Santiago 3:17, 18, ¿xi zazaaca pa chuʼnu tobi si né ca hermanu stinu?

18 Racalaʼdxiʼ Jehová gudxiilunu ne guni ganarnu envidia ne chuʼnu tobi si né ca hermanu stinu. Para gúninu ni la? caquiiñeʼ gúninu stale stipa, purtiʼ casi maʼ bizíʼdinu lu artículo riʼ, nagueenda ruzulú rapa binni envidia (Sant. 4:5). Ne nabáninu ndaaniʼ ti guidxilayú ra nabé nuu envidia. Peru zanda gudxiilunu ne guni ganarnu ni pa gácanu humilde, gudiʼnu xquixe peʼ ne chuʼnu nayecheʼ né ni nápanu. Ne laaca ziuʼnu tobi si né ca hermanu stinu ne zápanu xcaadxi cualidad galán ni bizíʼdinu lu artículo riʼ (biindaʼ Santiago 3:17, 18).

CANCIÓN 130 Guizíʼdinu gutiidiláʼdxinu

^ párrafo 5 Nuu paz ndaaniʼ xquidxi Jehová. Peru zanda guirá ni pa gudiʼnu lugar chuʼ envidia ládenu. Lu artículo riʼ zadúʼyanu xi rucaa ti binni gapa envidia. Laaca zadúʼyanu xi zanda gúninu para gudxiilunu ni ne chuʼ paz ládenu.

^ párrafo 2 IDEA RISACA: Ora riete diidxaʼ envidia lu Biblia cadi caníʼ si ni gacalaʼdxiʼ tuuxa gapa ni napa xcaadxi, sínuque ni racalaʼdxiʼ nga pa ñanda si qué ñapa xcaadxi binni gastiʼ.

^ párrafo 61 NI RIHUINNI LU IMAGEN RIʼ: Lu ti reunión napa ca ancianu, canábacabe ti hermanu maʼ huaniisi ni rutiidiʼ Torre stiʼ ni rapa, gusiidiʼ ti hermanu jma nahuiiniʼ guni dxiiñaʼ ca. Neca riuulaʼdxiʼ hermanu maʼ huaniisi riʼ dxiiñaʼ ca, de guidubi ladxidoʼbe rúnibe ni canabaʼ ca hermanu riʼ laabe. Rudiibe caadxi conseju hermanu joven riʼ ne riguube gana laa.