Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 19

¿Tuu nga «rey del norte» lu tiempu ra mayaca gueeda fin?

¿Tuu nga «rey del norte» lu tiempu ra mayaca gueeda fin?

«Lu tiempu ra mayaca gueeda fin, zadindené rey del sur [...] rey del norte» (DAN. 11:40).

CANCIÓN 150 Biyubi Dios para gulá lii

NI ZAZÍʼDINU *

1. ¿Xi zanda gánnanu ora guidúʼndanu ca profecía ni zeeda lu Biblia?

¿ÑEE zanda gánnanu xi chiguizaaca xquidxi Jehová lu ca dxi ni zeeda ca la? Zanda. Racané ca profecía zeeda lu Biblia laanu gánnanu xi guiráʼ cosa chiguizaaca maʼ cadi candaa ne zuninácani xquidxi Dios. Ne nuu ti profecía ni caníʼ xi chiguni caadxi de ca gobiernu jma nadipaʼ nuu lu Guidxilayú riʼ. Zeeda ni lu Daniel capítulo 11 ni caníʼ zadinde chupa rey: rey del norte ne rey del sur. Maʼ guca cumplir casi guiráʼ ni riete lu profecía riʼ, nga runi zanda chuʼnu seguru laaca zaca cumplir sti ndaa de laani.

2. Casi ná Génesis 3:15 ne Apocalipsis 11:7 ne 12:17, ¿xi caquiiñeʼ gánnanu ora guni estudiarnu profecía stiʼ Daniel?

2 Para guiénenu profecía ni zeeda lu capítulo 11 stiʼ Daniel, naquiiñeʼ gánnanu caniʼni de ca gobernante ne ca gobiernu ni huacaalú xquidxi Jehová. Neca huaxiéʼ xpinni Dios nuu lu guidubi Guidxilayú la? nabé rizananda ca gobiernu laacaʼ. ¿Xiñee yaʼ? Purtiʼ ni racalaʼdxiʼ Binidxabaʼ ne ca xpinni nga gunitilucaʼ ca binni ni runi ni ná Jehová ne ni ná Jesús (biindaʼ Génesis 3:15; Apocalipsis 11:7; 12:17). Naquiiñeʼ chuʼ profecía stiʼ Daniel de acuerdu né xcaadxi profecía ni zeeda lu Biblia. Ne  naquiiñeʼ guni estudiarnu xcaadxi parte de lu Biblia para guiene chaahuinu profecía stiʼ Daniel.

3. ¿Xi chiguni estudiarnu lu artículo riʼ ne lu stobi ca?

3 Lu artículo riʼ, zuni estudiarnu Daniel 11:25-39. Ne zadúʼyanu tuu nga guca rey del norte ne rey del sur dede iza 1870 hasta 1991, ne laaca zadúʼyanu xiñee jneza nga guchaʼnu modo riénenu ti parte de profecía riʼ. Lu sti artículo ca zuni estudiarnu Daniel 11:40-12:1 ne ziénenu xi rusiidiʼ parte de profecía ca laanu de ni cazaaca dede lu ca iza stiʼ 1990 hasta dxi gueeda Armagedón. Ora guni estudiarnu guiropaʼ artículo riʼ, nabé risaca guidúʼyanu gráfica ni láʼ «Ca rey ni nuudinde lu tiempu ra mayaca gueeda fin». Peru primeru caquiiñeʼ gánnanu tuu nga guiropaʼ rey ni riete lu profecía riʼ.

XIMODO GÁNNANU TUU NGA REY DEL NORTE NE REY DEL SUR

4. ¿Xi chonna cosa racané laanu gánnanu tuu nga rey del norte ne rey del sur?

4 Dxiqué la? ca rey ni biʼniʼ gobernar ladu guiáʼ ne ladu gueteʼ de guidxi Israel nga gucuaa título de «rey del norte» ne «rey del sur». ¿Ximodo nánnanu ni yaʼ? Pur mensaje bidii ti ángel Daniel: «Maʼ bendaʼ para gusieneʼ lii xi chiguizaaca xquídxiluʼ ra maʼ ziluxe ca últimu dxi» (Dan. 10:14). Guca ruʼ guidxi Israel xquidxi Dios hasta lu Pentecostés stiʼ iza 33. Peru dede lu iza ca la? bisiene Jehová ca discípulo stiʼ Jesús ni guzuubaʼ diidxaʼ nga ca ni gueeda gaca xquídxibe. Nga runi, casi guiráʼ ni zeeda lu profecía stiʼ Daniel capítulo 11 cadi caníʼ diʼ ni de guidxi Israel ni guyuu dxiqué, sínuque caniʼni de ca xpinni Cristu (Hech. 2:1-4; Rom. 9:6-8; Gál. 6:15, 16). Ra gudiʼdiʼ tiempu gadxé gadxé gobernante ne gobiernu beeda gaca rey del norte ne rey del sur. Ne nuu chonna cosa ni huayuni ca gobernante riʼ. Primé, huazanándacabe xquidxi Jehová. Guiropa, pur modo huayuni tratárcabe xquidxi Dios, rusihuínnicabe nanaláʼdxicabe Dios ni dxandíʼ. Ne guionna, huadindesaa guiropaʼ rey riʼ.

5. ¿Ñee guyuu ti rey del norte ne rey del sur entre guiropa siglu hasta ra maʼ ziluxe siglu diecinueve la? Bisiene ni.

5 Ti tiempu despué de bizulú guiropa siglu de ca dxi stinu, bizulú guyuu stale cristianu falsu ndaaniʼ congregación stiʼ Dios. Bisiidicabe cosa ni cadi dxandíʼ ne maʼ qué nusiidicabe ni ná Stiidxaʼ Dios. Dede tiempu que hasta ra maʼ ziluxe siglu diecinueve, qué ñapa diʼ Dios ti grupu de xpinni lu Guidxilayú riʼ. Bizulú bidale binni ni cadi dxandíʼ xpinni Cristu casi rindani guixi malu, ne pur nga maʼ qué ñanna binni tuu nga ca ni dxandíʼ xpinni Cristu (Mat. 13:36-43). ¿Xiñee risaca ni bizéʼtenu riʼ yaʼ? Purtiʼ rusihuinni ni ti cosa: ora riete de rey del norte ne rey del sur cadi caníʼ diʼ ni de ca gobernante o ca gobiernu ni guyuu entre guiropa siglu hasta ra maʼ ziluxe siglu diecinueve. Purtiʼ lu ca iza ni bizéʼtenu riʼ qué ñapa diʼ Dios ti grupu organizadu de xpinni lu Guidxilayú riʼ para nucaalúcabe. * Peru bihuinni rey del norte  ne rey del sur ra maʼ ziluxe siglu diecinueve. ¿Ximodo nánnanu ni yaʼ?

6. ¿Padxí ne ximodo maʼ bihuinni tuu nga xquidxi Dios sti biaje?

6 Bizulú gupa Dios ti grupu organizadu de xpinni lu Guidxilayú lu iza 1870 hasta ca dxi stinu riʼ. Lu iza que nga bizáʼ Charles Russell ne ca xcompañeru ti grupu para guni estudiarcaʼ Biblia. Casi maca biete lu ti profecía, grupu riʼ nga guca mensajeru ni bixheleʼ neza ante chuʼ Reinu mesiánicu (Mal. 3:1). Dede dxi que maʼ bihuinni tuu nga xquidxi Dios sti biaje. ¿Ñee guyuu xiixa potencia mundial ni ñanda nizananda ca xpinni Dios tiempu que la? Guidúʼyanu ni.

¿TUU NGA REY DEL SUR?

7. ¿Tuu nga guca rey del sur ti tiempu de cayaca Primera Guerra Mundial?

7 Lu iza 1870, napa Gran Bretaña ti ejércitu nabé nadipaʼ ne gúcani imperiu ni jma napa poder lu Guidxilayú. Guníʼ Daniel de ti cachu nahuiiniʼ ni binduuxeʼ xhonna cachu, laani nga Gran Bretaña, ne xhonna cachu ca nga Francia, España ne Países Bajos (Dan. 7:7, 8). Guca Gran Bretaña rey del sur ti tiempu de cayaca Primera Guerra Mundial. Ne para tiempu que, naca Estados Unidos guidxi ni jma napa bueltu lu guidubi Guidxilayú ne bizulú guyuu tobi si né Gran Bretaña.

8. ¿Tuu nga rey del sur lu ca últimu dxi riʼ?

8 Lu Primera Guerra Mundial, guca Estados Unidos ne Gran Bretaña tobi si para tíndecaʼ ne gúcacaʼ nadipaʼ. Zacá nga biasa ti potencia mundial de chupa guidxi, Gran Bretaña ne Estados Unidos,  ti colonia yooxhoʼ stini. Casi maca guníʼ Daniel, bitagulisaa rey riʼ «ti ejércitu guizáʼ naroʼbaʼ ne nadipaʼ» (Dan. 11:25). Lu ca últimu dxi riʼ, Gran Bretaña ne Estados Unidos nga rey del sur. * Peru ¿tu beeda gaca rey del norte yaʼ?

BIHUINNI TUU NGA REY DEL NORTE

9. a) ¿Padxí bihuinni tuu nga rey del norte? b) ¿Ximodo guca cumplir ca diidxaʼ ni zeeda lu Daniel 11:25?

9 Lu iza 1871, ti iza despué de bizáʼ Russell ne ca xcompañeru ti grupu para guni estudiarcaʼ Biblia, bihuinni tuu nga rey del norte. ¿Tuu laabe yaʼ? Alemania. Lu iza ca nga gucané Otto von Bismarck para guca fundar Imperiu alemán. Guca rey Guillermo I de Prusia emperador ne laa gulí Bismarck para gaca canciller stiʼ. * Ne qué nindaa, beeda gaca Alemania ti potencia, biʼniʼ controlar ni caadxi guidxi de África ne ni riaana lu Pacífico, ne bicaalú potencia riʼ Gran Bretaña (biindaʼ Daniel 11:25). Bicaalisaa Imperio alemán ti ejércitu naroʼbaʼ casi ni napa Gran Bretaña, ne biquiiñeʼ poder ni napa para gucaalú ca enemigu stiʼ lu Primera Guerra Mundial.

10. ¿Ximodo guca cumplir Daniel 11:25b, 26?

10 Despué, bisiene Daniel xi zazaaca Imperiu alemán ne ejércitu naroʼbaʼ stiʼ. Guniʼbe ziaba rey del norte. ¿Xiñee yaʼ? Profecía ca ná: «Zuyúbicaʼ modo guninacaʼ laabe. Ne ca ni ró guendaró stibe zusábacaʼ laabe» (Dan. 11:25b, 26a). Lu ca dxi stiʼ Daniel que, lade ca ni ró ca guendaró stiʼ rey que nga nuu ca funcionariu ni ribí ca rey para gúnicaʼ dxiiñaʼ sticaʼ (Dan. 1:5). ¿Tudé nga caníʼ profecía riʼ yaʼ? Caniʼni de ca funcionariu ni napa ti puestu risaca lu Imperiu alemán —ládecabe nuu ca general ne ca militar stiʼ emperador que— ca ni gucané para guiaba Imperiu que. * Guníʼ profecía riʼ ziaba Imperio alemán o rey del norte, ne laaca guniʼni xi zazaaca ora tinde ni né rey del sur. Ndiʼ nga ni guníʼ profecía ca chiguizaaca rey del norte: «Zanitilú ejércitu stibe ne stale tu zati» (Dan. 11:26b). Casi maca biete lu profecía que, binduuxecabe ejércitu alemán lu Primera Guerra Mundial, ne guti stale binni. Ndiʼ nga guerra ra jma stale binni guti tiempu que.

11. Casi ná Daniel 11:27-30, ¿xi biʼniʼ rey del norte ne rey del sur?

11 Lu Daniel 11:27, 28 riete xi chiguni rey del norte ne rey del sur ante guzulú Primera Guerra Mundial, sicaríʼ ná ni: «Zabícabe ruaa ti mexaʼ si ne zusiguiisaacabe». Ne nga peʼ nga ni bizaaca. Cásica Alemania ne Gran Bretaña gúnicaʼ racaláʼdxicaʼ chuʼ paz, peru cadi dxandíʼ diʼ ni, purtiʼ bizulú gudíndecaʼ lu iza 1914. Laaca bizeeteʼ profecía riʼ zapa rey del norte bueltu ne stale cosa risaca. Lu ca iza ante de 1914, beeda gaca Alemania guiropa país jma ricu lu guidubi Guidxilayú. Nga runi, casi maca biete lu Daniel 11:29 ne primé ndaa stiʼ versículo 30, bicaalú Alemania rey del sur, peru qué ñuni ganar.

 BICAALÚ GUIROPAʼ REY RIʼ XQUIDXI DIOS

12. ¿Xi biʼniʼ rey del norte ne rey del sur lu Primera Guerra Mundial?

12 Dede lu iza 1914, jma nadipaʼ modo gudindesaa guiropaʼ rey riʼ ne laaca jma nadipaʼ modo bicaalucaʼ xquidxi Dios. Guzéʼtenu ti ejemplu, lu Primera Guerra Mundial, guzananda gobiernu stiʼ Alemania ne Gran Bretaña ca xpinni Dios purtiʼ qué ninacaʼ ñecaʼ lu guerra. Ne biseguyoo gobiernu stiʼ Estados Unidos ca hermanu ni runi dirigir predicación. Ra bíʼnicabe ndiʼ guca cumplir profecía ni zeeda lu Apocalipsis 11:7-10.

13. ¿Xi biʼniʼ rey del norte dede lu ca iza stiʼ 1930 ne lu Segunda Guerra Mundial?

13 Despué, dede lu ca iza stiʼ 1930 ne jmaruʼ si lu Segunda Guerra Mundial, nabé nadipaʼ modo bicaalú rey del norte xquidxi Dios ne qué ñabe laacaʼ. Dxi bizulú biʼniʼ mandar ca nazi, biʼniʼ prohibir Hitler ne ca xpinni dxiiñaʼ stinu. Biiticabe stale xpinni Jehová ne biseendacabe stale de laacaʼ lu ca campu de concentración. Ne maca guníʼ Daniel zúnicabe ni. Purtiʼ guniʼbe zucueeza rey del norte ca sacrificiu ni raca para Dios ne qué zuni respetar santuariu stibe, ndiʼ raca significar zuni prohibir rey riʼ dxiiñaʼ de gaca predicar (Dan. 11:30b, 31a). Hitler, xaíque stiʼ Alemania, biʼniʼ jurar zunduuxe xquidxi Dios ni nuu ndaaniʼ guidxi Alemania.

BIHUINNI STI REY DEL NORTE

14. ¿Tuu nga beeda gaca rey del norte despué de Segunda Guerra Mundial, ne ximodo nánnanu ni?

14 Despué de Segunda Guerra Mundial, guxha gobiernu stiʼ Unión Soviética Alemania stale guidxi ne maʼ laa biʼniʼ mandar ndaanicani. Cásica biʼniʼ gobiernu nazi que, Unión Soviética laaca guzananda tutiica ni biʼniʼ adorar Dios ni dxandíʼ ne gusihuinni jma risaca guzuubaʼ stiidxaʼ Dios que guzuubaʼ stiidxaʼ gobiernu, ne zacá nga beeda gaca rey del norte.

15. ¿Xi biʼniʼ rey del norte despué de biluxe Segunda Guerra Mundial?

15 Ti tiempu despué de biluxe Segunda Guerra Mundial, bicaalú rey del norte que —Unión Soviética ne ca guidxi nuuné laa tobi si— xquidxi Dios. Modo guzananda rey riʼ ca xpinni Dios ruchaaga Apocalipsis 12:15-17 ni «casi ti guiiguʼ», purtiʼ bicueezabe predicación ne guládxibe stale xpinni Dios ne biseendabe laacaʼ Siberia. Ne lu ca últimu dxi riʼ, jma rizananda rey del norte xquidxi Dios, peru qué huayanda diʼ gucueezabe dxiiñaʼ sticaʼ. *

16. ¿Ximodo biʼniʼ cumplir Unión Soviética ca diidxaʼ ni zeeda lu Daniel 11:37-39?

16 (Biindaʼ Daniel 11:37-39). Casi ná profecía riʼ, ¿ximodo nga qué ñuni respetar rey del norte «Dios stiʼ» bixhoze ne jñaa? Gucalaʼdxiʼ Unión Soviética nucueeza poder ni napa ca organización religiosa para gunduuxeʼ guiráʼ xixé religión. Nga runi, lu iza 1918 maca biʼniʼ mandar gobiernu soviético gusiidicabe ra scuela cadi guni cré binni Dios. Peru ¿ximodo bisisácabe «dios ni rapa ca muru» yaʼ? Biquiiñebe stale bueltu stibe para gúnibe ejércitu stibe jma nadipaʼ ne bíʼnibe stale bomba nuclear para gunibiáʼ jma gobiernu laabe. Ra gudiʼdiʼ tiempu,  gupa rey del norte ne rey del sur stale guiibaʼ para ganda guuticabe stale millón de binni.

RUNI CHUPA ENEMIGU DXIIÑAʼ JUNTU

17. ¿Xii nga «cosa yuudxuʼ ne ni runitilú»?

17 Maʼ huayuni rey del norte ne rey del sur dxiiñaʼ para uguucaʼ ti «cosa yuudxuʼ ne ni runitilú» (Dan. 11:31). «Cosa yuudxuʼ ne ni runitilú» riʼ nga Organización de las Naciones Unidas.

18. ¿Xiñee ná profecía stiʼ Daniel Organización de las Naciones Unidas nga «cosa yuudxuʼ ne ni runitilú»?

18 Lu profecía stiʼ Daniel ná Organización de las Naciones Unidas nga «cosa yuudxuʼ ne ni runitilú» purtiʼ runi prometer guni xiixa ni Reinu si stiʼ Dios zanda guni: guedané paz lu guidubi Guidxilayú. Ne laaca ná profecía riʼ «runitilú» ni purtiʼ laani nga tobi de ca ni jma chiguni dxiiñaʼ para guinitilú guiráʼ ca religión falsu (biiyaʼ gráfica ni láʼ «Ca rey ni nuudinde lu tiempu ra mayaca gueeda fin»).

¿XIÑEE RISACA GÁNNANU GUIRÁʼ NI MAʼ BIZÉʼTENU RIʼ?

19, 20. a) ¿Xiñee risaca gánnanu guiráʼ ni maʼ bizéʼtenu riʼ? b) ¿Xi pregunta chiguicábinu lu sti artículo ca?

19 Nabé risaca guidúʼndanu guiráʼ ni bizaaca riʼ purtiʼ rusihuínnicani guca cumplir parte de profecía stiʼ Daniel ni caníʼ de rey del norte ne rey del sur dede lu iza 1870 hasta 1991. Nga runi zanda guni crenu zaca cumplir sti parte ni cayaadxaʼ stiʼ profecía riʼ.

20 Peru biaba Unión Soviética lu iza 1991. Yanna, ¿tuu nga rey del norte tiempu riʼ yaʼ? Lu sti artículo ca zacábinu pregunta riʼ.

CANCIÓN 128 «Biʼniʼ huantar de dxi gueeda fin»

^ párrafo 5 Nápanu prueba ni rusihuinni cayaca cumplir profecía stiʼ Daniel ni caníʼ de «rey del norte» ne «rey del sur» tiempu riʼ. ¿Ximodo nánnanu ni yaʼ? ¿Ne xiñee risaca guiénenu guiráʼ ni riete lu profecía riʼ?

^ párrafo 5 Nga runi, maʼ cadi jneza guininu guca emperador romano Aureliano (270-275 d. J.) «rey del norte» ne laaca qué ñaca reina Zenobia (267-272 d. J.) «rey del sur». Raríʼ nga cadxaa ni bisiene capítulo 13 ne 14 stiʼ libru Prestemos atención a las profecías de Daniel.

^ párrafo 9 Lu iza 1890, biʼniʼ obligar emperador Guillermo II canciller Bismarck gusaana puestu stiʼ.

^ párrafo 10 Biʼniʼ ca funcionariu riʼ stale cosa para guiaba imperiu que nagueendaca. Caadxi de ca cosa ni bíʼnicabe nga maʼ qué ñacanécabe emperador que, gúdxicabe xcaadxi binni cosa ni cadi naquiiñeʼ guiníʼcabe de guerra que ne bicaacabe emperador que gusaana puestu stiʼ.

^ párrafo 15 Casi ná Daniel 11:34, maʼ qué nizananda rey del norte ca xpinni Cristu ti tiempu. Ne bizaaca ni bizéʼtenu riʼ dxi biaba Unión Soviética lu iza 1991.