Biiyaʼ guiraʼ ni nuu lu sitiu riʼ

guyé lu índice

Guendanadóʼ: ti cualidad ni racané laanu

Guendanadóʼ: ti cualidad ni racané laanu

Ti hermana láʼ Sara * guníʼ: «Nacaʼ ti binni natuí ne stale biaje ridxibeʼ guneʼ xiixa. Nga runi qué riuuladxeʼ guidxaagaʼ binni nabé naduxhuʼ. Peru runeʼ sentir galán ora nuaaʼ ra nuu ti binni nadóʼ ne humilde. Ora nuaaʼ ra nuu clase binni riʼ la? qué raca nagana para naa guinieeʼ ni runeʼ sentir ne de ca guendanagana stinneʼ. Nga runi, ca binni nadóʼ ne humilde nga ca ni jma xhamiguaʼ».

Ni guníʼ Sara riʼ rusihuínnini riuulaʼdxiʼ binni guidxaaga ti binni nadóʼ. Ne Jehová riuulaʼdxiʼ ca binni naca zacá. Nga runi, lu Biblia cayábibe laanu: «Lagaca nadóʼ» (Col. 3:12). ¿Xii nga guendanadóʼ yaʼ? ¿Ximodo bisihuinni Jesús cualidad riʼ? ¿Ne ximodo zanda gacané cualidad riʼ laanu guibáninu jma nayecheʼ?

¿XII NGA GUENDANADÓʼ?

Guendanadóʼ nga ti cualidad ni napa ti binni ni nuudxí ladxidóʼ. Ca binni ni nadóʼ rácacaʼ nachaʼhuiʼ ne racanecaʼ xcaadxi, rudxiilucaʼ guiráʼ ca guendanagana sticaʼ né calma ne rucueezacaʼ laca laacaʼ.

Ti binni nadóʼ randa rucueeza laca laa. Diidxaʼ griegu ni biquiiñecabe para guca traducir diidxaʼ «guendanadóʼ» biquiiñecabe ni ora caníʼcabe de ti caballu ni maʼ bisidóʼcabe. Peru neca maʼ bidóʼ ti caballu, ne náparuʼ stipa, riziidiʼ gucueeza stipa stiʼ. Ngaca rizaaca né ti binni nadóʼ, riziidiʼ gucueeza laca laa ne nachaʼhuiʼ né xcaadxi.

Zándaca guiníʼ íquenu cadi nácanu ti binni nadóʼ. Ne cumu nabézanu lade binni ni qué gapa paciencia ne naduxhuʼ la? raca nagana para laanu gápanu cualidad riʼ (Rom. 7:19). Dxandíʼ nga caquiiñeʼ gúninu stale stipa para gácanu nadóʼ, peru racané espíritu santu stiʼ Jehová laanu para ganda gácanu nadóʼ (Gál. 5:22, 23). Yanna, ¿xiñee caquiiñeʼ gúninu stipa para gápanu cualidad riʼ yaʼ?

Riuulaʼdxiʼ binni guidxaaga ca ni nadóʼ. Casi guníʼ Sara ra bizulunu tema riʼ, runi sentirnu galán ora nuunu ra nuu binni ni nadóʼ. Nabé binibiáʼcabe Jesús purtiʼ guca ti binni nadóʼ ne nachaʼhuiʼ (2 Cor. 10:1). Ngue runi, dede ca xcuidihuiiniʼ ni qué runibiáʼ peʼ laabe biyúbicaʼ chuʼcaʼ gaxha de laabe (Mar. 10:13-16).

Gácanu nadóʼ zacané ni laanu ne laaca zacané ni xcaadxi. Pa gácanu nadóʼ, qué zareʼnu gana ne qué zadxiichinu nagueenda (Prov. 16:32). Laaca qué zaninu xiixa ni guniná ti binni, jmaruʼ si  tuuxa ni nadxiinu ne despué gaca arrepentirnu pur laani. Nga runi, pa gácanu nadóʼ, dede ca ni nuu gaxha de laanu zanda cueenducaʼ ni galán. Purtiʼ pa gucueezanu laanu ne qué guidxiichinu la? qué zuninanu guirutiʼ.

CHINÁNDANU EJEMPLU STIʼ TI BINNI NI GUCA NADÓʼ

Neca gupa Jesús stale responsabilidad ne guizáʼ guyuu xhiiñaʼ, nabé guca nadóʼ. Tiempu stiʼ Jesús, nabé nagana guca xpida binni ne gúpacaʼ stale problema. Ngue runi caquiiñecaʼ tu gacané laacaʼ. Nanna dxíchinu nabé guluu ca diidxaʼ stiʼ Jesús gana laacabe, sicaríʼ guniʼbe: «Latáʼ ra nuaaʼ, [...] purtiʼ nacaʼ ti binni nadóʼ ne dxandíʼ humilde naa» (Mat. 11:28, 29).

¿Ximodo zanda gácanu nadóʼ cásica guca Jesús yaʼ? Primeru caquiiñeʼ guni estudiarnu Stiidxaʼ Dios para guizíʼdinu ximodo biʼniʼ tratarbe binni ne ximodo bidxiilube ca guendanagana gúpabe. Ne ora gaca nagana para laanu gusihuínninu nácanu ti binni nadóʼ, gúninu stipa pur gácanu casi Jesús (1 Ped. 2:21). Guidúʼyanu chonna cosa ni gucané Jesús para guca ti binni nadóʼ.

Dxandíʼ guca Jesús humilde. Laapebe guniʼbe nácabe «ti binni nadóʼ ne dxandíʼ humilde» (Mat. 11:29). Nabé ruzeeteʼ Biblia guiropaʼ cualidad riʼ juntu, purtiʼ gaca tobi nadóʼ ne humilde casi ngueca cani (Efes. 4:1-3). ¿Xiñee yaʼ?

Pa gácanu humilde cadi casi ziuunu zadxiichinu ne qué zácanu sentir pur intiica si cosa. ¿Xi biʼniʼ Jesús ora guníʼ binni nácabe «ti hombre nalá ne reʼ xhaataʼ vinu» yaʼ? Bisihuínnibe cadi dxandíʼ ni guníʼ binni pur ca ni bíʼnibe ne bicábibe laacaʼ né diidxaʼ nadóʼ «rihuinni nuu xpiaaniʼ ti binni pur ni runi» (Mat. 11:19).

Pa tuuxa guiníʼ mal de raza stinu, guidxi gúlenu, pa hombre o gunaa laanu la? gúninu stipa guicábinu né diidxaʼ nadóʼ. Sicaríʼ guníʼ Peter, ti ancianu de Sudáfrica: «Ora riníʼ tuuxa xiixa ni qué riuuladxeʼ, riníʼ iqueʼ xi ñuni Jesús pa ñaca ni laa». Ne laaca guniʼbe: «Maʼ biziideʼ cadi guidxiicheʼ pur intiica si cosa».

Gunna Jesús cadi perfectu binni. Biʼniʼ ca discípulo stiʼ Jesús stipa pur gúnicaʼ ni jneza, peru cumu binni ruchee laacaʼ la? guyuu biaje guca ni nagana para laacaʼ. Guzéʼtenu ti ejemplu, gueelaʼ ante gati Jesús, gunábabe Pedro, Santiago ne Juan gatanacaʼ peru qué ñúnicaʼ ni. Biene Jesús xiñee gúsicabe, ngue runi guníʼ «neca racalaʼdxiʼ binni guni ni jneza, peru débil cuerpu stiʼ» (Mat. 26:40, 41). Cumu nánnabe binni ruchee ca apóstol stibe la? qué nidxiichinebe laacaʼ.

Guidúʼyanu ni bizaaca ti hermana láʼ Mandy. Dxiqué la? gúcabe ti binni ni racalaʼdxiʼ gaca xiixa modo ná, peru yanna rúnibe stipa gácabe nadóʼ cásica guca Jesús. Sicaríʼ guniʼbe: «Runeʼ stipa guietenalaʼdxeʼ binni ruchee guiráʼ binni ne ruuyaʼ ca cosa galán ni runi cada binni, cásica runi Jehová ni». Yenanda Mandy ejemplu stiʼ Jesús ne biabe binni purtiʼ nánnabe nácacaʼ binni ruchee. Nga runi, pa chinándanu ejemplu stiʼ Jesús, qué zaca nagana para laanu gácanu nadóʼ né xcaadxi.

Bisaana Jesús guiráʼ ni lu náʼ Dios. Dxi guyuube ndaaniʼ Guidxilayú gupa xidé biʼniʼ huantarbe stale cosa ni cadi jneza. Guníʼ binni cadi jneza ni cayúnibe, bicaanacaʼ ne bininacaʼ laabe. Peru neca zacá, gúcabe nadóʼ ne «gúpabe confianza Juez ni runi juzgar jneza» (1 Ped. 2:23). Nanna Jesús zapa Bixhozeʼ ni nuu guibáʼ laa ne laa maʼ nanna pora guni castigar ca ni binni tratar laabe mal.

Pa gúnicabe laanu xiixa ni cadi jneza ne guidxiichinu, zándaca tidisunu ne lugar de guni chaahuinu guendanagana ca laga zúninu ni jma naroʼbaʼ. Nga runi, rusietenalaʼdxiʼ Stiidxaʼ Dios laanu ca diidxaʼ riʼ: «Ora cadxiichi binni la? qué zanda guni ni riuulaʼdxiʼ Dios» (Sant. 1:20). Dede né ora nápanu razón para guidxiichinu, zándaca gúninu xiixa ni cadi jneza purtiʼ binni ruchee laanu.

Ti hermana de Alemania láʼ Cathy guníʼ ique pa qué gaca denfender tuuxa la? guirutiʼ zuni ni pur laa. Peru bichaabe dxi biziidibe gápabe confianza Jehová. Sicaríʼ guniʼbe: «Yanna riʼ maʼ qué ruyubeʼ piaʼ modo gacaʼ defender. Ne maʼ qué raca nagana para naa gacaʼ ti binni nadóʼ, purtiʼ nannaʼ cayuuyaʼ Jehová guiráʼ ni». Nga runi, pa chuʼ dxi gúnicabe  laanu xiixa ni cadi jneza la? ni zacané laanu gácanu binni nadóʼ nga gápanu confianza Dios cásica biʼniʼ Jesús ni.

«DICHOSO CA NI NADÓʼ»

¿Ximodo racané guendanadóʼ laanu ora cadxaagalunu gadxé gadxé guendanagana?

Jesús guníʼ ti cosa ni zacané laanu guibáninu nayecheʼ nga gácanu binni nadóʼ. Laabe guniʼbe: «Dichoso ca ni nadóʼ» (Mat. 5:5). Guidúʼyanu ximodo racané cualidad riʼ laanu lu xquendanabáninu.

Racané ni ca guendaxheelaʼ chuʼcaʼ galán. Sicaríʼ guníʼ ti hermanu de Australia láʼ Robert: «Huayabeʼ xheelaʼ stale diidxaʼ ni runiná ni qué racalaʼdxeʼ guinieeʼ. Peru ora maʼ guníʼ tuuxa xiixa diidxaʼ ora cadxiichi la? maʼ qué zanda guni gastiʼ. Runeʼ sentir mal ora rudieeʼ cuenta maʼ binenaʼyaʼ laabe».

Ora rininu, «guiranu rucheʼnu stale biaje». Ne ca cosa ni riníʼ binni sin guiníʼ ique redané ni stale guendanagana lu ti guendaxheelaʼ (Sant. 3:2). Peru para cadi guidxiichinu nagueenda ne gucueezanu ni rininu, caquiiñeʼ gácanu nadóʼ (Prov. 17:27).

Biʼniʼ Robert stipa para cadi guidxiichi nagueenda ne gucueeza laca laa. ¿Xi guleendube yaʼ? Sicaríʼ guniʼbe: «Ora cadi nuaaʼ de acuerdu né xheelaʼ la? runeʼ stipa gucaadiaʼgaʼ chaahueʼ laabe, guinieeʼ né diidxaʼ nadóʼ ne cadi guidxiicheʼ nagueenda. Yanna maʼ nabánidu galán».

Racané ni laanu gaca llevarnu galán né xcaadxi. Ca ni ridxiichi nagueenda huaxiéʼ rápacaʼ xhamígucaʼ. Peru ca binni ni nadóʼ rúnicaʼ stipa para chuʼcaʼ «tobi si» né xcaadxi (Efes. 4:2, 3). Sicaríʼ guníʼ Cathy, hermana ni maca bizéʼtenu que: «Cumu nacaʼ ti binni nadóʼ, riuuladxeʼ guidxaagaʼ xcaadxi binni, neca nuu tu laa nagana para guidxaagacabe laa».

Riguixhedxí ni ladxidoʼno. Biblia ná racané «guendabiaaniʼ ni zeeda de guibáʼ» binni para gaca nadóʼ ne gapa guendariuudxi (Sant. 3:13, 17). Ti binni nadóʼ «nuudxí ladxidóʼ» (Prov. 14:30). Martin, ti hermanu ni cayuni stipa para gaca nadóʼ guníʼ: «Maʼ qué ridxiicheʼ nagueenda ne maʼ qué ruyubeʼ gaca ca cosa ca modo rabeʼ, ne yanna runeʼ sentir nuudxí ladxiduáʼ ne nuaaʼ nayecheʼ».

Nabé risaca gúninu stipa para gácanu ti binni nadóʼ. Ti hermanu guníʼ: «Dede yanna nuu tiru rindaabiʼ rini stinneʼ». Peru qué rinabaʼ si Jehová laanu gácanu nadóʼ, sínuque laaca racanebe laanu gusihuínninu cualidad riʼ (Is. 41:10; 1 Tim. 6:11). Laa zunduuxeʼ entrenamientu stinu ne zuni laanu nadipaʼ (1 Ped. 5:10). Ne ra tidiʼ tiempu zanda gusihuínninu guendanachaʼhuiʼ ne guendanadóʼ stiʼ Cristu, cásica biʼniʼ apóstol Pablo (2 Cor. 10:1).

^ párrafo 2 Maʼ bidxaa lá caadxi binni.