Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 4

«Espíritu ca nga rabi espíritu stinu xiiñiʼ Dios laanu»

«Espíritu ca nga rabi espíritu stinu xiiñiʼ Dios laanu»

«Espíritu ca nga rabi espíritu stinu xiiñiʼ Dios laanu» (ROM. 8:16).

CANCIÓN 25 Ti guidxi risaca para Dios

NI ZAZÍʼDINU *

Lu saa Pentecostés, bisaba Jehová espíritu santu luguiáʼ ti grupu de 120 discípulo. (Biiyaʼ párrafo 1 ne 2).

1, 2. ¿Xi ti cosa nabé risaca bizaaca lu Pentecostés stiʼ iza 33?

LU PENTECOSTÉS stiʼ iza 33. Ndaaniʼ guidxi Jerusalén dagulisaa biaʼ 120 discípulo ndaaniʼ ti cuartu lu guiropa pisu stiʼ ti yoo, ti domingu siadóʼ (Hech. 1:13-15; 2:1). Caadxi dxi ante, gudxi Jesús laacabe guiaanacabe ndaaniʼ guidxi que purtiʼ zacaacabe ti cosa nabé risaca (Hech. 1:4, 5). ¿Xi bizaaca yaʼ?

2 Málasi binadiaga ca discípulo que «ti ruidu de guibáʼ, casi ora rundubi ti bi reciu, ne biuu ni ndaaniʼ yoo» que. Despué, «biiyacabe bihuinni caadxi belehuiiniʼ [casi ludxi bele]» galaa íquecabe, ne «bidxá guirácabe de espíritu santu» (Hech. 2:2-4; nota). Guendaridxagayaa ni guca que, bisaba Jehová espíritu santu luguiáʼ ca discípulo que (Hech. 1:8). Laacabe nga ca primé ni guca ungir né espíritu santu * ne ni gucuaa privilegiu de guni mandarné Jesús guibáʼ.

¿XI RIZAACA ORA RUNI UNGIR DIOS TUUXA NÉ ESPÍRITU SANTU?

3. ¿Xiñee gunna dxichi ca xpinni Cristu ni bibani dxiqué maʼ biʼniʼ ungir Dios laacaʼ né espíritu santu?

3 Pa ñaca lii nga tobi de ca discípulo ni bibani tiempu que, qué ñuu dxi ñaandaʼ lii ni bizaaca dxi que. Bizuhuaa  xiixa casi ludxi bele galaa íqueluʼ ne bizulú guniʼluʼ sti diidxaʼ (Hech. 2:5-12). Ñanna dxiichiluʼ maʼ gucuaaluʼ espíritu santu. Peru ¿ñee ti modo si runi ungir Jehová guiráʼ ca ungidu la? Coʼ. ¿Ximodo nánnanu ni yaʼ? Guidúʼyanu.

4. ¿Ñee juntu guca ungir guiráʼ ca xpinni Cristu ni bibani lu primé siglu la? Bisiene ni.

4 Guidúʼyanu yanna pora nga runi ungir Jehová tuuxa né espíritu santu. Cadi 120 xpinni Cristu si nga guca ungir né espíritu santu lu Pentecostés stiʼ iza 33. Laaca dxi ca gucuaa 3,000 binni espíritu santu ni maca biʼniʼ prometer Jesús. Laacabe la? guca ungírcabe ora guyuunísacabe (Hech. 2:37, 38, 41). Peru gudiʼdiʼ si caadxi iza, cadi guiráʼ ca ungidu guniʼné Dios laacaʼ para checaʼ guibáʼ ora guyuunísacaʼ. Ca samaritanu la? guca ungircaʼ ti tiempu despué de guyuunísacaʼ (Hech. 8:14-17). Cornelio si ne familia stiʼ nga riete guca ungircaʼ ante chuʼnísacaʼ (Hech. 10:44-48).

5. Casi ná 2 Corintios 1:21, 22, ¿xi rizaaca ora raca ungir tuuxa né espíritu santu?

5 Guidúʼyanu xi rizaaca ora raca ungir tuuxa né espíritu santu. Primé la? zándaca gaca nagana para caadxi ungidu guni aceptarcaʼ maʼ gulí Jehová laacaʼ ne guinabadiidxacaʼ: «¿Xiñee gulí Dios naa?». Ne xcaadxi la? zándaca maʼ gadxé modo ricaacaʼ ni. Modo tiica si gúʼyacabe ni, apóstol Pablo bisiene ximodo runi sentir guiráʼ ca ungidu: «Despué de biʼniʼ cretu, biquiiñeʼ Cristu espíritu santu ni biʼniʼ prometer Dios para guni sellar * laatu. Ne zeeda gaca espíritu riʼ ti garantía ni cayabi laanu zacaanu herencia» (Efes. 1:13, 14). Ne riquiiñeʼ Jehová espíritu santu para chuʼ binni ca seguru maʼ gulibe laa. Nga runi naca espíritu santu «ti garantía» ni rudii Dios ca ungidu para chuʼcaʼ seguru zabánicaʼ guibáʼ  lu ca dxi ni zeeda ca, ne cadi lu Guidxilayú riʼ (biindaʼ 2 Corintios 1:21, 22).

6. ¿Xi caquiiñeʼ guni ti ungidu para cheʼ guibáʼ?

6 Pa guca ungir ti xpinni Cristu né espíritu santu, ¿ñee ti garantía nga ziebe guibáʼ la? Coʼ. Ni riniʼni nga maʼ gulí Dios laabe para chebe guibáʼ. Peru caquiiñeʼ guietenaláʼdxibe ca diidxaʼ risaca riʼ: «Hermanu caʼ, laguni stipa para cadi gucheenetu Dios ti chuʼtu lade ca binni ni maʼ guníʼnebe ne ni maʼ gulibe, ne pa qué gusaana de gápatu ca cualidad riʼ la? qué ziuu dxi guirá fe stitu» (2 Ped. 1:10). Nga runi, neca maʼ gulí o maʼ guniʼné Dios tuuxa para cheʼ guibáʼ la? ziebe guibáʼ pa gácabe fiel (Filip. 3:12-14; Heb. 3:1; Apoc. 2:10).

¿XIMODO NANNA TUUXA PA UNGIDU LAA?

7. ¿Ximodo nanna ca ungidu maʼ gulí Dios laacaʼ?

7 Yanna, ¿ximodo nanna tuuxa maʼ guniʼné Dios laa para cheʼ guibáʼ yaʼ? Zanda guidxélanu respuesta riʼ lu ca diidxaʼ bicaa Pablo ra nuu ca hermanu de Roma ni gulí Dios para gaca «xpínnibe». Sicaríʼ gudxi Pablo laacabe: «Cadi zácaxatu gucuaatu ti espíritu para gácatu esclavu ne guidxíbitu sti biaje, sínuque gucuaatu ti espíritu para guni adoptar Dios laatu casi xiiñiʼ, espíritu ni rucaa laanu gábinu laabe: “¡Abba, Bixhozeʼ!”. Ne espíritu ca nga rabi espíritu stinu xiiñiʼ Dios laanu» (Rom. 1:7; 8:15, 16). Nga runi, riquiiñeʼ Dios espíritu santu stiʼ para gacané ca ungidu chuʼcaʼ seguru maʼ gulí Dios laacaʼ (1 Tes. 2:12).

8. Casi ná 1 Juan 2:20, 27, ¿xiñee nánnanu cadi caquiiñeʼ chuʼ tu gabi ca ungidu maʼ gulí Dios laacaʼ?

8 Racané Jehová ca ungidu chuʼcaʼ seguru maʼ gucuaacaʼ invitación para checaʼ guibáʼ (biindaʼ 1 Juan 2:20, 27). Cásica xcaadxi xpinni Cristu, ca ungidu laaca caquiiñecaʼ gusiidiʼ Jehová laacaʼ ndaaniʼ congregación. Peru cadi caquiiñeʼ chuʼ tu gabi laacabe nácacabe ungidu. Purtiʼ riquiiñeʼ Jehová espíritu santu stiʼ, stipa ni jma nadipaʼ ni nuu lu universu, para gabi laacabe nácacabe ungidu.

«NAQUIIÑEʼ GÁLETU STI BIAJE»

9. Casi ná Efesios 1:18, ¿xi rizaaca ti binni ora runi ungir Dios laa?

9 Zándaca raca nagana para stale xpinni Dios de tiempu riʼ guiénecaʼ xi rizaaca ora runi ungir Jehová ti binni. ¿Xiñee yaʼ? Purtiʼ cadi ungidu laacabe. Bizáʼ Dios binni para guibani ndaaniʼ Guidxilayú riʼ ne cadi guibáʼ (Gén. 1:28; Sal. 37:29). Peru maʼ gulibe caadxi binni para guibánicaʼ guibáʼ. Nga runi, ora runi ungir Jehová laacabe la? ridxaa esperanza stícabe ne modo riníʼ íquecabe ne maʼ rápacabe deseu de guibánicabe guibáʼ (biindaʼ Efesios 1:18).

10. ¿Xi riníʼ gale binni «sti biaje»? (Laaca zanda gúʼyaluʼ ni ná nota).

10 Ora raca ungir ti xpinni Cristu né espíritu santu la? casi ñaca rale «sti biaje». * Jesús laaca guníʼ nagana nga gusiéneluʼ ti binni ni cadi ungidu xi runi sentir ti binni ni rale «sti biaje» o «ni maʼ gule de espíritu» (Juan 3:3-8).

11. ¿Xi rizaaca ora raca ungir ti xpinni Cristu?

11 ¿Xi rizaaca ora raca ungir ti xpinni Cristu? Ruchaa modo riníʼ íquebe, purtiʼ ante gaca ungirbe, rusisácabe de guidubi ladxidoʼbe esperanza de guibánibe lu  Guidxilayú riʼ sin gátibe. Cabézabe né stale gana dxi cuee Jehová guiráʼ ca cosa malu ne guni Guidxilayú riʼ ti Paraísu. Zándaca ruxuíʼlube guidxaagalube ti familia o ti xhamígube ni guiasa de lade gueʼtuʼ. Peru, despué de maʼ guca ungirbe la? ruchaa modo riníʼ íquebe. ¿Xiñee yaʼ? Cadi purtiʼ maʼ qué racaláʼdxibe guibánibe ndaaniʼ Guidxilayú riʼ. Laaca cadi purtiʼ nápabe estrés o guendanagana, ne cadi purtiʼ maʼ cadi cayuuláʼdxibe guibánibe ndaaniʼ Guidxilayú riʼ sin gátibe. Sínuque purtiʼ maʼ biquiiñeʼ Jehová espíritu santu stiʼ para guchaa modo riníʼ íquebe ne gudii laabe ti esperanza nacubi.

12. Casi ná 1 Pedro 1:3, 4, ¿xi runi sentir ti xpinni Cristu ni maʼ guca ungir ora riníʼ ique ni cabeza laa?

12 Ti xpinni Cristu ni maʼ guca ungir zándaca runi sentir qué runi merecer guicaa privilegiu risaca riʼ, peru nanna dxíchibe maʼ gulí Jehová laabe. Ne ora riníʼ íquebe ni cabeza laabe la? riuube nayecheʼ ne rudiibe xquixe peʼ Dios (biindaʼ 1 Pedro 1:3, 4).

13. ¿Xi riníʼ ique ca ungidu de guendanabani ni nápacaʼ lu Guidxilayú riʼ?

13 ¿Ñee riníʼ ndiʼ racalaʼdxiʼ ca ungidu gáticaʼ la? Apóstol Pablo bicabi pregunta riʼ. Sicaríʼ guniʼbe despué de bichaagabe cuerpu stiʼ ca ungidu né ti yoo de lari: «Laga nuurunu ndaaniʼ yoo riʼ la? cacaaláʼdxinu, casi ñaca nuanu xiixa ni nanaa, cadi purtiʼ racaláʼdxinu guireʼnu ndaaniʼ yoo riʼ, sínuque racaláʼdxinu chuʼnu ndaaniʼ stobi que ti guicaanu guendanabani ne maʼ qué ziuuruʼ dxi gátinu» (2 Cor. 5:4). Nga runi, qué riníʼ ca diidxaʼ riʼ maʼ qué racalaʼdxiʼ ca ungidu guibánicaʼ ne maʼ racaláʼdxicaʼ gáticaʼ. Lugar de nga la? nabánicabe nayecheʼ ne racaláʼdxicabe gúnicabe ni ná Jehová guiráʼ dxi né familia stícabe ne ca xhamígucabe. Neca zacá, intiica si cayúnicabe, qué rusiaandacabe esperanza sicarú ni nápacabe (1 Cor. 15:53; 2 Ped. 1:4; 1 Juan 3:2, 3; Apoc. 20:6).

¿ÑEE UNGIDU LII LA?

14. Pa runi tuuxa ni ná Jehová de guidubi ladxidóʼ, ¿ñee riníʼ nga ungidu laabe la?

14 Zándaca guinabadiidxaluʼ pa maʼ biʼniʼ ungir Jehová lii né espíritu santu. Pa zacá ni, nabé risaca guiníʼ íqueluʼ ca pregunta riʼ: ¿ñee runi sentirluʼ nápaluʼ gana gúniluʼ ni ná Jehová la?, ¿ñee runi predicarluʼ né stale gana la?, ¿ñee riuuláʼdxiluʼ gúʼndaluʼ Biblia ne guiziidiluʼ «dede ca cosa ni jma nagana» la?, ¿ñee riníʼ íqueluʼ maʼ guluu Jehová ndaayaʼ stipa ni rúniluʼ ora runi predicarluʼ la?, ¿ñee rudiiluʼ cuenta caquiiñeʼ gacaneluʼ xcaadxi para gaca xhamígucaʼ Jehová jma la?, ¿ñee maʼ bíʼyaluʼ modo huayacané Jehová lii lu xquendanabániluʼ la? (1 Cor. 2:10). Pa bicábiluʼ rúniluʼ ca ni bizéʼtenu riʼ, ¿ñee riníʼ ndiʼ maʼ guniʼné Dios lii para cheluʼ guibáʼ la? Coʼ, purtiʼ guiráʼ ca xpinni Jehová, pa nácacaʼ ungidu o coʼ, zanda guni sentircaʼ ni runi sentirluʼ. Laaca zanda iquiiñeʼ Jehová espíritu santu stiʼ para gudii stipa ca xpinni, intiica si esperanza nápacaʼ. Peru pa cadi nuuluʼ seguru pa maʼ biʼniʼ ungir Dios lii né espíritu santu la? nga rusihuinni cadi ungidu lii. Ca ni maʼ gulí Dios para cheʼ guibáʼ la? qué rinabadiidxacaʼ pa ungidu laacaʼ, ¡nuucaʼ seguru nácacaʼ ungidu!

Biquiiñeʼ Jehová espíritu santu stiʼ para gudii Abrahán, Sara, David ne Juan Bautista stipa ti gúnicaʼ cosa nabé galán, peru qué niquiiñeʼ Jehová ni para nibí laacabe para chécabe guibáʼ. (Biiyaʼ párrafo 15 ne 16). *

15. ¿Ximodo nánnanu cadi guiráʼ tu ricaa espíritu santu zié guibáʼ?

15 Lu Biblia zeeda stale ejemplu stiʼ  caadxi hombre ni guca fiel ne gucuaacaʼ espíritu santu peru qué ñápacaʼ esperanza de checaʼ guibáʼ. David nga tobi de laacabe, biluíʼ espíritu santu laabe xi gúnibe (1 Sam. 16:13). Gucané espíritu santu laabe guiénebe dede ca cosa ni jma nagana ni caníʼ de Jehová ne gucané ni laabe gucaabe caadxi parte stiʼ Biblia (Mar. 12:36). Neca zaqué, apóstol Pedro guníʼ «qué ñe diʼ David guibáʼ» (Hech. 2:34). Juan Bautista nga sti hombre ni gucuaa «espíritu santu» (Luc. 1:13-16). Ne Jesús peʼ guníʼ: «Qué huayuu dxi gale tuuxa jma risaca que Juan Bautista». Neca zaqué, guniʼbe qué zuni mandar Juan lu Reinu stiʼ Dios ni nuu guibáʼ (Mat. 11:10, 11). Biquiiñeʼ Jehová espíritu santu para gudii poder ca hombre riʼ ti gúnicaʼ cosa nabé galán, peru qué niquiiñebe ni para cuibe laacaʼ para checaʼ guibáʼ. ¿Ñee riníʼ ndiʼ qué ñácacabe fiel Jehová para guni mandarcabe guibáʼ la? Coʼ, ni riniʼni nga zusibani Dios laacabe dxi gaca Guidxilayú riʼ ti Paraísu (Juan 5:28, 29; Hech. 24:15).

16. ¿Paraa racalaʼdxiʼ stale de ca xpinni Dios guibani?

16 Tiempu riʼ, stale de ca xpinni Dios ni nabani lu Guidxilayú riʼ qué gápacaʼ esperanza de checaʼ guibáʼ ne racaláʼdxicaʼ guibánicaʼ lu Guidxilayú ora maʼ guni mandar Reinu stiʼ Dios, cásica Abrahán, Sara, David, Juan Bautista ne stale hombre ne gunaa ni bibani tiempu gucuá Biblia (Heb. 11:10).

17. ¿Xi pregunta zacábinu lu sti artículo ca?

17 Nabániruʼ xcaadxi de ca ungidu lu Guidxilayú riʼ. Nga runi zándaca guiníʼ íquenu ca pregunta riʼ (Apoc. 12:17). Peru ¿ximodo naquiiñeʼ guʼyaʼ ca ungidu laca laacaʼ? ¿Ximodo naquiiñeʼ guni tratarnu tuuxa de congregación stinu ni guzulú gó pan ne gueʼ vinu lu Conmemoración? ¿Ñee caquiiñeʼ chuʼnu xizaa pa guiráʼ iza cadale ca hermanu ni ná ungidu laa la? Lu sti artículo ca zacábinu ca pregunta riʼ.

^ párrafo 5 Dede lu Pentecostés ni guca lu iza 33, maʼ bidii Jehová caadxi xpinni Cristu privilegiu nabé risaca para guni mandárnecaʼ Jesús guibáʼ. Peru ¿ximodo nánnacabe maʼ gulí Dios laacabe para guicaacabe privilegiu nabé risaca riʼ yaʼ? ¿Xi rizaaca ora ricaacabe invitación riʼ yaʼ? Lu artículo riʼ zacábinu ca pregunta risaca riʼ, lu revista Torre stiʼ ni rapa enero de 2016 laaca riete xcaadxi de tema riʼ.

^ párrafo 2 IDEA RISACA: Gaca ungir tuuxa né espíritu santu. Riquiiñeʼ Jehová espíritu santu para chuʼ tuuxa seguru maʼ gulibe laa para guni mandarné Jesús guibáʼ. Ne riquiiñebe espíritu riʼ para gudiibe laa «ti garantía» de xiixa ni zacaa despué (Efes. 1:13, 14). Nga runi zanda guiníʼ ca xpinni Cristu riʼ rudii espíritu santu «testimonio» laacaʼ o rábini laacaʼ zabánicaʼ guibáʼ (Rom. 8:16; nota).

^ párrafo 5 IDEA RISACA: Ca ungidu ni gaca fiel zacácabe ti sellu ni qué ziuu dxi guixá ante gáticabe o ante guzulú gran tribulación (Efes. 4:30; Apoc. 7:2-4; biiyaʼ tema ni láʼ «Ni rinabadiidxaʼ cani ruundaʼ» ni biree lu Torre stiʼ ni rapa abril de 2016).

^ párrafo 10 Pa racaláʼdxiluʼ gánnaluʼ jma de tema riʼ, biiyaʼ revista La Atalaya 1 de abril de 2009, yaza 3 ne 4; 5; 5 ne 6; 7 ne 8; 8 ne 9; 10 ne 11; 11 ne 12.

CANCIÓN 27 Dxi gusihuinni Dios ca xiiñiʼ ni gulí

^ párrafo 57 NI RIHUINNI LU FOTO RIʼ: Pa nuseguyoocabe laanu pur ca ni runi crenu o cayuni predicarnu ne cusíʼdinu ni dxandíʼ sin gucueezacabe laanu, zanda cuézanu né stale confianza dxi guibáninu lu Guidxilayú riʼ ora guni mandar Reinu stiʼ Dios.