Biiyaʼ guiraʼ ni nuu lu sitiu riʼ

guyé lu índice

 CONSEJU NI RACANÉ LAANU DEDE YANNA

Cadi chuʼluʼ xizaa

Cadi chuʼluʼ xizaa

CONSEJU ZEEDA LU BIBLIA: «Cadi cuʼ xa ique tu ximodo ibanitu» (Mateo 6:25).

Xi riníʼ ni. Guníʼ Jesús ca diidxaʼ riʼ lu ti libana bidii lu ti dani. Ti diccionariu ni rusiene de Biblia na diidxaʼ ni biquiiñeʼ para «cuʼ xa ique tu» lu griegu riniʼni «ni runi sentir ti binni ora qué gapa bueltu, qué gapa ni gó ne pur xcaadxi cosa ni riguu xizaa laa lu xquendanabani». Stale biaje ni riguu xizaa laanu nga ni chiguizaaca despué. Gastiʼ naca nga chuʼnu xizaa pur cani caquiiñeʼ binnilídxinu ne chuʼnu xizaa pur chuʼ ca binni ni nadxiinu galán (Filipenses 2:20). Peru ora guníʼ Jesús: «Cadi chuʼ tu xizaa», caniʼbe cadi guiníʼ ique xhaatanu xi chiguizaaca sti dxi dede gucaani laanu chuʼnu triste (Mateo 6:31, 34).

Risaca conseju riʼ la? Jneza ni guníʼ Jesús ca. Nuu libru ni rusiene de tema riʼ na ora qué rusaana binni de guiníʼ ique cani riguu xizaa laa qué ribani nayecheʼ. Nácabe ora nuu binni zacá laaca «raca huará de úlcera, raca huará ladxidóʼ ne rapa asma».

Bizeeteʼ Jesús xi razón nápanu para cadi chuʼ xhaatanu xizaa: zunitisinu tiempu. Laabe guniʼbe: «Neca ñuu tu xizaa ne nuyubi tu modo nibani tu xcaadxi, ñee ñanda nibani tu jma que biaʼ dxi nexhe ibani tu la?» (Mateo 6:27). Neca chuʼ xhaatanu xizaa pur ca cosa ca qué zuni chaahuiʼ diʼ cani xquendanabáninu ninca qué zabáninu jma xadxí. Ne nuu biaje cadi modo caníʼ íquenu riree ca cosa ca. Ti hombre ni nanna de tema riʼ guníʼ: «Runítinu tiempu ora maʼ caníʼ íquenu de ni chigácaruʼ, purtiʼ huaxiéʼ si biaje rireeni modo rábinu».

Xi gúninu para cadi chuʼ xhaatanu xizaa yaʼ. Primé ni guʼnuʼ nga gupa confianza Dios. Pa ruyaanaʼ Dios ca manihuiiniʼ ni ripapa ne ruzuchaahuiʼ ca guieʼ, ñee cadi laaca zápabe cani runi adorar laabe la? (Mateo 6:25, 26, 28-30). Cadi guiníʼ íqueluʼ ni chiguizaacaruʼ: bibani dxi nuuluʼ. Jesús guníʼ: «Nga runi cadi chuʼ tu xizaa de ni chi gaca ixíʼ, purti ixí ru nga guʼya tu xi gacaʼ». Cada dxi napa guendanagana stiʼ (Mateo 6:34).

Pa chinándanu conseju stiʼ Jesús riʼ, qué zaca huaranu ne zaguixhe dxí Dios ladxidoʼno (Filipenses 4:6, 7).