Biiyaʼ guiraʼ ni nuu lu sitiu riʼ

guyé lu índice

«Lagudii xquixe peʼ pur guiráʼ cosa»

«Lagudii xquixe peʼ pur guiráʼ cosa»

«¿ÑEE nacaʼ ti binni ni rudii xquixe peʼ la?». Guiranu caquiiñeʼ guiníʼ íquenu pregunta riʼ. Maca gucuá lu Biblia, tiempu riʼ ziuu stale binni ni qué zudii xquixe peʼ (2 Tim. 3:2). Zándaca runibiaʼnu binni ni ribeza gudiicabe laacaʼ xiixa o gúnicabe xiixa pur laacaʼ ne riníʼ íquecaʼ cadi caquiiñeʼ gudiicaʼ xquixe peʼ. Guirutiʼ riuulaʼdxiʼ binni zacá.

Peru cayabi Jehová ca xpinni gácacaʼ «agradecidu» ne gudiicaʼ «xquixe peʼ pur guiráʼ cosa» (Col. 3:15; 1 Tes. 5:18). Laaca ribeendunu ni galán ora rudiʼnu xquixe peʼ. ¿Xiñee yaʼ? Guidúʼyanu chupa chonna razón.

ORA RUDIʼNU XQUIXE PEʼ RACANÉ NI LAANU GUNI SENTIRNU GALÁN

Ti razón risaca nápanu para gudiʼnu xquixe peʼ nga racané ni laanu guni sentirnu galán. Cásica ni rudii xquixe peʼ ne zaqueca ni ricaani runi sentircaʼ galán. ¿Ximodo yaʼ? Guiníʼ íquenu ndiʼ. Pa nuu tuuxa dispuestu guni xiixa pur laanu, rúnibe ni purtiʼ riníʼ íquebe caquiiñenu ni ne rizaaláʼdxibe laanu. Nga racané laanu guni sentirnu galán. Nanna dxíchinu nga nga ni bizaaca Rut. Ora biiyaʼ Rut pabiáʼ nachaʼhuiʼ Boaz né laa la? biecheʼ ne biʼniʼ sentir nuu tu rizaalaʼdxiʼ laa (Rut 2:10-13).

Dios nga ni jma caquiiñeʼ gudiʼnu xquixe peʼ. Nga runi, nuu biaje riníʼ íquenu xi guirá cosa galán maʼ bidiibe ne cudiirube laanu (Deut. 8:17, 18; Hech. 14:17). Peru cadi ti ratu si guiníʼ íquenu nachaʼhuiʼ Dios né laanu. Sínuque caquiiñeʼ cueenu tiempu para guiníʼ ique chaahuinu pabiáʼ nachaʼhuiʼ Jehová né laanu ne familia stinu. Zacá jma zudiʼnu xquixe peʼ Jehová ne ziuʼnu jma seguru nadxiibe laanu ne rusisácabe laanu stale (1 Juan 4:9).

Caquiiñeʼ gudiʼnu xquixe peʼ Jehová purtiʼ nachaʼhuiʼ, peru laaca caquiiñeʼ guiníʼ ique chaahuinu pabiáʼ riuuláʼdxibe gudiibe ne xi guiráʼ ndaayaʼ maʼ bidiibe laanu (Sal. 100:4, 5). «Ora rudiʼnu xquixe peʼ sti binni racanenu chuʼ nayecheʼ».

PA GUDIʼNU XQUIXE PEʼ JMA ZACA XHAMÍGUNU TUUXA BINNI

Sti razón galán nápanu para gudiʼnu xquixe peʼ nga purtiʼ jma raca xhamígunu tuuxa binni. Guiranu caquiiñenu gusisácacabe laanu. Ora de guidubi ladxidoʼno gudiʼnu xquixe peʼ tuuxa ni biʼniʼ xiixa pur laanu, jma raca xhamígunu laa (Rom. 16:3, 4). Ne ca binni ni rudii xquixe peʼ zándaca jma chuuláʼdxicaʼ gacanecaʼ sti binni. Cumu ruuyacabe ni runi xcaadxi pur laacabe la? rucaani laacabe gácacabe nachaʼhuiʼ né xcaadxi binni. Ne ra gacanenu sti binni, riuʼnu jma nayecheʼ. Casi ná Jesús, «jma nayecheʼ riuu binni ora rudii que ora ricaa» (Hech. 20:35).

Sicaríʼ guníʼ Robert Emmons, ti profesor de ti Universidad de California: «Para gudiʼnu xquixe peʼ, caquiiñeʼ gánnanu cásica riquiiñenu de sti binni zacaca zaquiiñecabe de laanu; nga runi nuu biaje zúninu xiixa pur xcaadxi ne nuu biaje laacabe zúnicabe xiixa pur laanu». Zacá ni, para ganda guibáninu ne chuʼnu nayecheʼ la? caquiiñenu de sti binni. Guzéʼtenu ti ejemplu, zándaca iquiiñenu de sti binni para gápanu ni guidoʼno o iquiiñenu de ti doctor para guʼyaʼ laanu (1 Cor. 12:21). Ca binni ni rudii xquixe peʼ rudiicaʼ cuenta ni runi sti binni pur laacaʼ. Yanna laanu yaʼ, ¿ñee nápanu costumbre gudiʼnu xquíxepeʼ la?

ORA RUDIʼNU XQUIXE PEʼ RACANÉ NI LAANU GÁCANU BINNI POSITIVU

Sti razón risaca nápanu para gudiʼnu xquixe peʼ nga racané ni laanu gácanu positivu o guiníʼ íquenu cosa ni gacané laanu.  Racané xquendabiaaninu laanu guiníʼ íquenu cosa galán ne gucáʼnanu cosa ni cadi jneza. Ca binni ni rudii xquixe peʼ riníʼ íquecaʼ cosa ni gacané laacaʼ ne qué riuupecaʼ xizaa de ca guendanagana sticaʼ. Laga jma gácanu binni ni rudii xquixe peʼ, qué zaca nagana para laanu guidúʼyanu ca cosa galán ni runi xcaadxi binni ne zacané ni laanu jma gudiʼnu xquixe peʼ. Pa gúninu ni maʼ bizéʼtenu riʼ lu xquendanabáninu la? zacané ni laanu guibáninu «nayecheʼ purtiʼ xpinni Señor» laanu, casi guníʼ apóstol Pablo (Filip. 4:4).

Pa rudiʼnu xquixe peʼ qué zaníʼ íquenu cosa ni cuee gana laanu. Qué zanda gudii binni xquixe peʼ pa laaca napa envidia, nuu triste ne cadxiichi. Ne ca binni ni rudii xquixe peʼ qué ricá íquecaʼ gápacaʼ jma cosa material, rusisácacaʼ ni nápacaʼ ne qué ruyúbicaʼ gápacaʼ jma (Filip. 4:12).

GUINÍʼ ÍQUENU XI GUIRÁʼ COSA GALÁN NÁPANU

Laanu ca xpinni Cristu, nánnanu racalaʼdxiʼ Binidxabaʼ cuee gana laanu ne chuʼnu triste pur ca guendanagana ni ridxaagalunu lu ca últimu dxi riʼ. Racaláʼdxibe guiníʼ íquenu cosa ni cuee gana laanu ne gaca quejarnu pur intiica cosa. Pa zacá laanu la? zaca nagana para binni gucaadiaga laanu ora guni predicarnu laacaʼ. Peru pa nácanu ti binni ni rudii xquixe peʼ la? zusihuínninu nápanu ca cualidad ni rudii espíritu stiʼ Dios, zabáninu jma nayecheʼ ne jma naguidxi zaca fe stinu (Gál. 5:22, 23).

Laanu ca xpinni Dios, zándaca riníʼ íquenu jneza guiráʼ ni maʼ bizéʼtenu riʼ. Peru raca nagana para laanu gudiʼnu xquixe peʼ ne guiníʼ íquenu cosa ni gacané laanu. Cadi guireʼnu gana. Zanda gápanu cualidad riʼ ne cadi gusaana de gácanu binni ni rudii xquixe peʼ. Para ganda gúninu ni, caquiiñeʼ cueenu tiempu guiráʼ dxi ne guiníʼ íquenu paraa guiráʼ zanda gudiʼnu xquixe peʼ. Ra jma gudiʼnu xquixe peʼ qué zaca nagana para laanu gúninu ni de guidubi ladxidoʼno. Ne zabáninu jma nayecheʼ que ca binni ni riníʼ ique puru si ca guendanagana ni nápacaʼ. Pa guiníʼ íquenu ca cosa sicarú ni rudii Dios ne ni rudii xcaadxi binni laanu la? zaguucani gana laanu ne zusiecheʼ ca ni laanu. Dede zanda gucaʼnu chupa o chonna cosa xi pur gudiʼnu xquixe peʼ guiráʼ dxi.

Maʼ bidii ca científicu cuenta ora napa binni costumbre gudii xquixe peʼ la? racané ni guni cerebru sticaʼ dxiiñaʼ jma jneza ne qué raca nagana para laacaʼ guibánicaʼ jma galán. Binni ni rudii xquixe peʼ jma nayecheʼ ribani. Guiníʼ íquenu xi guiráʼ cosa galán nápanu, chuʼnu nayecheʼ né guiráʼ cosa galán ni guizaacanu ne gudiʼnu xquixe peʼ. Nga runi, chinándanu conseju ni zeeda lu Biblia, ra ná: «Lagudii xquixe peʼ Jehová purtiʼ nacháʼhuibe», «lagudii xquixe peʼ pur guiráʼ cosa» (1 Crón. 16:34; 1 Tes. 5:18).