Biiyaʼ guiraʼ ni nuu lu sitiu riʼ

guyé lu índice

Cadi gusaana de gannaxhiinu ne cuʼnu gana ca hermanu stinu

Cadi gusaana de gannaxhiinu ne cuʼnu gana ca hermanu stinu

«Tuuxa ni nadxii binni la? riguu gana stobi» (1 COR. 8:1TNM).

DIIDXAʼ RIUUNDAʼ: sjj 109 NE sjj 121

1. ¿Xi ti tema nabé risaca guniʼné Jesús ca discípulo stiʼ últimu gueelaʼ guyuu lu Guidxilayú?

ÚLTIMU gueelaʼ guyuu Jesús né ca discípulo stiʼ, biaʼ treinta biaje bizeetebe gannaxhiicaʼ. Gúdxibe ca discípulo stibe caquiiñeʼ gannaxhiisaacaʼ (Juan 15:12, 17). Pa gannaxhiisaacabe la? zahuinni laacabe nga cani dxandíʼ xpinni Cristu (Juan 13:34, 35). Clase guendarannaxhii ni guníʼ Jesús riʼ cadi xiixa ni runi sentir si tuuxa ni, sínuque rihuínnini ora runi tuuxa xiixa pur stobi sin cueza guicaa xiixa. Jesús guníʼ: «Iruti zanda ganaxhii jma que biaʼ nadxii tobi ni udii xpida pur ca xhamigu. Laatu nga xhamigua pa guni tu ni rabeʼ» (Juan 15:13, 14).

2. a) ¿Ximodo runibiáʼcabe ca xpinni Dios tiempu riʼ? b) ¿Xi pregunta zacábinu lu tema riʼ?

2 Tiempu riʼ, runibiáʼ binni ca xpinni Dios purtiʼ dxandíʼ nadxiisaacaʼ ne nuucaʼ tobi si ne qué rúnicaʼ ni para guicaacaʼ xiixa (1 Juan 3:10, 11). Rúninu stipa pur gannaxhiisaanu gastiʼ naca ximodo biniisinu, xi tribu ne xi idioma laanu. Peru zándaca guiníʼ íquenu: «¿Xiñee caquiiñeʼ gannaxhiisaanu tiempu riʼ yaʼ? ¿Ximodo rudii Jiobá ne Jesús stipa laanu yaʼ?  Ne ¿ximodo zanda chinándanu ejemplu stiʼ Jesús ne gusihuínninu nadxiinu tuuxa ra cuʼnu gana laa?» (1 Cor. 8:1).

XIÑEE CAQUIIÑEʼ GÁNNAXHIISAANU TIEMPU RIʼ

3. ¿Xi runi stale binni lu ca tiempu nabé nagana riʼ?

3 Lu ca últimu dxi riʼ «puru si guendanagana ne yuubaʼ» nga nabáninenu, nga runi stale binni racaná ladxidóʼ ne nuu xizaa ( 2 Tim. 3:1-5; Sal. 90:10). Stale tu laa dede maʼ qué racalaʼdxiʼ guibani. Nga runi lu ti iza jma de 800,000 binni ruuti laca laa, zanda guininu rati ti binni cada 40 segundu. Triste guininu ni, peru stale hermanu huayuni sentir zacá ne pur nga huyuuticaʼ laca laacaʼ.

4. ¿Tuu nga ca xpinni Dios de dxiqué ni gunabaʼ gatiʼ?

4 Tiempu gucuá Biblia, stale xpinni Dios de dxiqué guizáʼ guyuucaʼ xizaa dede gunábacaʼ gáticaʼ. Casi Job la? tantu cayacanabe dede guniʼbe maʼ bireebe gana modo nabánibe ne pur ngue gunábabe gátibe (Job 7:16; 14:13). Yanna guzéʼtenu de Jonás, bidii Jiobá laabe ti dxiiñaʼ, peru cumu qué niree ni modo cabézabe la? guizáʼ guyuube triste dede guniʼbe: «Yanna, Jiobá, rinabaʼ lii guutiluʼ naa, purtiʼ jma galán gateʼ que guibaneʼ» (Jon. 4:3). Profeta Elías laaca guizáʼ biʼniʼ sentir mal dede gunábabe Dios gudii lugar gátibe. Elías guníʼ: «¡Maʼ biáʼcatiʼ! Biiti naa yanna Jiobá. Qué risacadiáʼ jma que ca bixhozegolaʼ» (1 Rey. 19:4). Peru para Jiobá la? risácacabe ne pa ñanda qué ñáticabe. Qué ñuni juzgar Jiobá laacabe pur ni cayuni sentírcabe, sínuque guluu gana laacabe né guendarannaxhii ne gucané laacabe para maʼ cadi guni sentírcabe zaqué ne cadi gusaana de gúnicabe ni ná.

5. Tiempu riʼ, ¿xiñee caquiiñeʼ ca hermanu stinu gannaxhiinu laacaʼ?

5 Stale de ca hermanu stinu cayúnicaʼ stipa pur gudxiilucaʼ ca guendanagana sticaʼ, pur nga caquiiñecabe cariñu stinu ne tu quixhedxí ladxidóʼcabe. Caadxi de ca hermanu rizananda binni laacaʼ ne runi búrlacabe laacaʼ. Xcaadxi la? caquiiñeʼ guni huantarcaʼ pur riníʼ ca compañeru runinecaʼ dxiiñaʼ mal de laacaʼ. O zándaca nuu tu maʼ bidxaaga pur runi dxiiñaʼ extra o purtiʼ runi estresar dxiiñaʼ sticaʼ laacaʼ. Ne nuu hermanu ridxaagalú guendanagana naroʼbaʼ ndaaniʼ familia stiʼ, purtiʼ zándaca nabé runi criticar xheelaʼ ni cadi Testigu laa. Pur guiráʼ ndiʼ ne xcaadxi guendanagana la? stale hermanu runi sentir maʼ bidxaaga en sentidu físicu ne emocional. ¿Tu laa zanda gacané ca hermanu riʼ para cadi guireecaʼ gana yaʼ?

GUENDARANAXHII STIʼ JIOBÁ RIGUU NI GANA LAANU

6. ¿Ximodo riguu Jiobá gana ca xpinni?

6 ¿Ximodo riguu Dios gana ca xpinni yaʼ? Ti modo rúnibe ni nga ora rábibe laanu qué zusaana de gannaxhiibe laanu. Nanna dxiichinu biʼniʼ sentir guidxi Israel nayecheʼ ora binadiaga ca diidxaʼ guníʼ Jiobá riʼ: «Guizáʼ risácaluʼ para naa ne nadxieeʼ lii». Ne laaca guniʼbe: «Cadi guidxíbiluʼ, purtiʼ naa qué zusaana lii» (Is. 43:4, 5). Zanda chuʼluʼ seguru nadxii Dios lii ne guizáʼ risácaluʼ para laabe. * Maʼ biʼniʼ prometer Jiobá xquidxi: «Casi tobi ni napa stale poder zulá lii. Guizáʼ ziechenebe lii» (Sof. 3:16, 17).

7. ¿Xiñee zanda guininu nadxii Jiobá laanu cásica nadxii ti gunaa xiiñiʼ? (Biiyaʼ dibuju ni zeeda ra ruzulú tema riʼ).

7 Intiica prueba guidxaagalú ca xpinni  Dios, laa maʼ biʼniʼ prometer zacané laacabe ne zaguixhedxí ladxidóʼcabe. Libru stiʼ Isaías ná: «Zugadxicabe laatu, zucaa tiʼxhicabe laatu ne zucuícabe laatu lu ñeecabe para xhubinácabe laatu. Cásica riguixhedxí ti gunaa ladxidóʼ xiiñiʼ, zacá qué zusaana de quixhedxieeʼ ladxidoʼto» (Is. 66:12, 13). Ora ridúʼndanu textu riʼ rusiecheʼ ni ladxidoʼno purtiʼ rucaa ni laanu guxuíʼlunu ti gunaa ni nuá xiiñiʼ ne caguitené laabe. Ne ejemplu riʼ rusihuinni Jiobá pabiáʼ nadxii ca xpinni. Qué chuʼ dxi guiníʼ íqueluʼ qué risácaluʼ para Jiobá (Jer. 31:3).

8, 9. ¿Ximodo rudii Jesús stipa laanu pur nadxii laanu?

8 Laanu, ca xpinni Cristu nápanu sti razón para guininu dxandíʼ nadxii Jiobá laanu. Juan 3:16 ná: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe». Ne Jesús bisihuinni pabiáʼ nadxii laanu ra bidii xquendanabani pur laanu. Stiidxaʼ Dios cayabi laanu nin ca guendanagana rápanu ne nin cani riguu xizaa laanu qué zuxheleʼ cani «laanu de Cristu ni nadxii laanu» (Rom. 8:35, 38, 39). ¿Cadi dxandíʼ rucaa guendarannaxhii ni napa Jiobá ne Jesús laanu gudxíʼlunu ca guendanagana stinu la?

9 Ora guidxaagalunu guendanagana ni gusidxaga laanu en sentidu físicu, emocional o espiritual la? cadi guiaandaʼ laanu pur nadxii Cristu laanu zudii stipa laanu para guni huantarnu (biindaʼ 2 Corintios 5:14, 15). Guendarannaxhii riʼ rucaa ni laanu cadi guireʼnu gana guibáninu ne cadi gusaana de guni servirnu Jiobá. Laaca zanda gacané ni laanu cadi guireʼnu gana ora guizaaca ti desastre natural, ora sanándacabe laanu, ora gápanu ansiedad ne ora qué guizaaca xiixa ni cabézanu.

CAQUIIÑEʼ GANNAXHIINU CA HERMANU STINU

Pa guni estudiarnu ejemplu stiʼ Jesús zacané ni laanu quixhedxinu ladxidóʼ xcaadxi. (Biiyaʼ párrafo 10 ne 11).

10, 11. ¿Tuu nga naquiiñeʼ quixhedxí ladxidóʼ ca hermanu ni nuu desanimadu? Bisiene ni.

10 Sti modo riquiiñeʼ Jiobá para gudii stipa laanu nga congregación. Ora rannaxhiinu ca hermanu stinu, rusihuínninu nadxiinu Dios. Nga runi, rúninu biaʼ gándatiʼ pur gacanenu ca hermanu riʼ gánnacaʼ nabé risácacaʼ ne nadxii Jiobá laacaʼ (1 Juan 4:19-21). Sicaríʼ gudxi apóstol Pablo ca xpinni Cristu: «Lauguusaa gana laatu ne lagacanesaa,  cásica modo cayúnitu ni» (1 Tes. 5:11TNM). Nga runi, de guiranu caquiiñeʼ guni animarnu ne quixhedxinu ladxidóʼ ca hermanu stinu cásica runi Jiobá ne Jesús, ne cadi ca ancianu si nga naquiiñeʼ guni ni (biindaʼ Romanos 15:1, 2).

11 Ca hermanu ni napa xiixa guendahuará emocional zándaca caquiiñeʼ checaʼ ra nuu ti doctor ni gacané laacaʼ (Luc. 5:31). Ca ancianu ne guiráʼ ca xpinni Cristu cadi doctor laanu para gusiándanu ti hermanu ni napa guendahuará emocional, peru nuu xi zanda gúninu para gacanenu laacabe. Tobi de laani nga gúninu ni ná mandatu riʼ: «Laquixhedxí ladxidóʼ cani nuu deprimidu, lagacané cani caʼruʼ guzuhuaa chaahuiʼ lu neza stiʼ Dios, ne lagapa paciencia guiráʼ binni» (1 Tes. 5:14TNM). Nabé risaca guiénenu, gannaxhiinu ne gápanu paciencia ca hermanu ni nuu desanimadu, ne gábinu laacabe diidxaʼ ni quixhedxí ladxidóʼcabe. Gunabadiidxaʼ laaca lii: «¿Ñee ruuyacabe naa casi ti binni ni runi animar ne ni riguixhedxí ladxidóʼ xcaadxi la? ¿Xi zacané naa para gannaʼ ximodo gacaniáʼ ca hermanu stinneʼ yaʼ?».

12. Bizeeteʼ ti ejemplu ni rusihuinni ximodo gucané guendarannaxhii ni gupa ca hermanu de ti congregación ti hermana.

12 Pa gannaxhiinu ca hermanu ni napa ti guendahuará emocional, ¿ximodo zanda gacané ni laacabe yaʼ? Ti hermana de Europa guníʼ: «Nuu biaje riníʼ iqueʼ guteʼ laca naa. Peru nuu tu racané naa. Huayacané ca hermanu de congregación stinneʼ naa para cadi guteʼ laca naa. Né stale cariñu riguu ca hermanu gana naa. Caadxi si de laacabe nanna napaʼ depresión, peru de guirácabe nuucabe dispuestu gacanécabe naa ora tiica si. Nuu ti guendaxheelaʼ ni rapa naa casi ñaca xiiñicaʼ naa. Nuucabe dispuestu gacanécabe naa ora tiica si, pa ridxí o huaxhinni». Dxandíʼ, cadi guiráʼ zanda gacané biaʼ runi xcaadxi ni. Peru pa gusihuínninu nuunu dispuestu gacanenu ca hermanu ni napa ti guendahuará emocional la? zacané ni laacabe. *

XIMODO CUʼNU GANA CA HERMANU NÉ GUENDARANNAXHII

13. ¿Xi caquiiñeʼ gúninu para cuʼnu gana ca hermanu stinu?

13 Gánnanu gucaʼdiáganu (Sant. 1:19). Ora rucaʼdiáganu ne riénenu tuuxa rusihuínninu nadxiinu laa. ¿Ximodo zanda uguʼnu gana cani nuu desanimadu yaʼ? Gúninu stipa pur guiníʼ íquenu xi ñuni sentirnu pa ñuʼnu lugar stiʼ hermanu riʼ ne zanda gúninu laabe pregunta ni gacané laanu guiénenu xi cayuni sentirbe. Modo guidúʼyadxinu laabe naquiiñeʼ gusihuinni ni rizaaláʼdxinu ne nadxiinu laabe. Ne pa gusiene hermanu riʼ laanu xi cazaaca la? caquiiñeʼ gápanu paciencia ne gucaʼdiáganu laabe. Zanda gánnanu xi cayuni sentirbe pa gucaʼdiáganu laabe né paciencia. Ne zápabe confianza laanu ne ziuube dispuestu gucaadiágabe ni gábinu laabe. Ora dxandíʼ rizaaláʼdxinu xcaadxi la? zanda gacanenu laacaʼ gatadxí ladxidoʼcaʼ.

14. ¿Xiñee cadi naquiiñeʼ guni criticarnu binni?

14 Cadi guni críticarnu. Pa guni sentir ti binni ni nuu deprimidu cayuni criticarnu laa la? jmaruʼ si zacaná ladxidóʼ. Ne neca nuunu gacanenu laa, jma zacá nagana para laanu quixhedxinu ladxidóʼ. Biblia ná: «Binni ni riníʼ sin guiníʼ ique  runiná stiidxaʼ casi ra ridaabi ti espada, peru diidxaʼ ni riníʼ binni nuu xpiaaniʼ zeeda gaca casi remediu» (Prov. 12:18). Qué racaláʼdxinu guninanu tuuxa pur ni guininu, peru pa guininu xiixa sin guiníʼ íquenu la? zándaca guninanu laa. Nga runi, para cuʼnu gana xcaadxi né guendarannaxhii la? caquiiñeʼ gúninu stipa pur guiénenu ni cazaaca (Mat. 7:12).

15. ¿Gunáʼ nga ca herramienta ni zanda iquiiñenu para quixhedxinu ladxidóʼ ca hermanu stinu?

15 Iquiiñenu Stiidxaʼ Dios (biindaʼ Romanos 15:4, 5). Zanda quixhedxí Biblia ladxidoʼno, purtiʼ zeeda ni de Dios ni racané laanu guni huantarnu ne ni riguixhedxí ladxidoʼno. Para ganda iquiiñenu Biblia la? nápanu BIBLIOTECA NI NUU LU INTERNET Watchtower ne folletu Ca tema ni huabee ca testigu stiʼ Jiobá, zanda gacané cani laanu guidxélanu textu ne publicación ni zanda iquiiñenu para quixhedxinu ladxidóʼ ca hermanu stinu.

16. ¿Gunáʼ nga ca cualidad ni caquiiñeʼ gápanu para guni animarnu tuuxa ni nuu deprimidu?

16 Gácanu nadóʼ ne gápanu cariñu. Jiobá nga Bixhózenu ni riáʼ laanu, purtiʼ «laabe nga Dios stinu ne riguixhe dxí be ladxidóʼ no» (biindaʼ 2 Corintios 1:3-6; Luc. 1:78; Rom. 15:13). Bisaana Pablo ti ejemplu galán para laanu purtiʼ laa bisihuinni ca cualidad ni napa Jiobá. Laabe bicaabe: «Sínuque uca du nadóʼ ne laatu, casi runi ti gunaa ne ca xiiñiʼ, rusiniisi laacaʼ. Pa ñanda la? cadi stiidxa Dios si nudíʼ du laatu, sínuque ne xpida pe du, tantu nadxii du laatu» (1 Tes. 2:7, 8). Pa gápanu cariñu ca hermanu stinu cásica runi Jiobá ni la? zanda iquiiñeʼ Jiobá laanu para guicabi oración stiʼ tuuxa ni cayacaná.

17. ¿Ximodo naquiiñeʼ guidúʼyanu ca hermanu stinu para cuʼnu gana laacaʼ?

17 Cadi cuézanu gaca ca hermanu stinu perfectu. Pa cuézanu gaca ca hermanu stinu perfectu ne cadi gucheecaʼ la? zándaca guniná ni laanu (Ecl. 7:21, 22). Cadi guiaandaʼ laanu riene Jiobá laanu. Pa chinándanu ejemplu stibe la? ziuʼnu listu para guni huantarnu ni guni xcaadxi laanu purtiʼ imperfectu laacaʼ (Efes. 4:2, 32). Cadi guininu xiixa ni gucaa ca hermanu guiníʼ íquecaʼ qué risaca ni rúnicaʼ o guchaaganu ni rúnicaʼ né ni runi xcaadxi purtiʼ zaguu ni laacabe triste. Lugar de nga la? guni felicitarnu laacabe pur ni rúnicabe. Pa gúninu ni la? zaguu ni gana laacabe ne zacané ni laacabe gúnicabe ni ná Jiobá né guendanayecheʼ (Gál. 6:4).

18. ¿Xiñee cadi naquiiñeʼ gusaana de gannaxhiinu ne cuʼnu gana ca hermanu stinu?

18 Para Jiobá la? nabé risaca guiráʼ ca xpinni. Ne laaca risácacabe para Jesús, purtiʼ laa bidii xquendanabani pur laacabe (Gál. 2:20TNM). Nadxiinu ca hermanu stinu ne racaláʼdxinu gápanu laacaʼ né stale cariñu. Para ganda quixhedxinu ladxidóʼ xcaadxi la? naquiiñeʼ «gúninu biaʼ gándatiʼ para chuʼnu en paz né binni ne para gacanésaanu» (Rom. 14:19TNM). Guizáʼ maʼ racaláʼdxinu guibáninu ndaaniʼ Paraísu ra guirutiʼ zaca desanimar. Maʼ qué ziuu guendahuará, guerra, guendaguti, guirutiʼ zazananda laanu, maʼ qué zapa binni problema ndaaniʼ familia stiʼ ne guirutiʼ ziuu triste pur qué gaca xiixa ni cabeza. Tiidiʼ si ti mil iza ca, guiráʼ binni guidxilayú zaca perfectu. Ca binni guidxilayú ni tiidiʼ lu prueba final, zácacaʼ xiiñiʼ Dios ne zácacaʼ libre casi ca xiiñiʼ Dios (Rom. 8:21). Nga runi, cadi gusaana de gannaxhiinu ne cuʼnu gana ca hermanu stinu, purtiʼ pa gúninu ni la? zacanenu laacaʼ chuʼcaʼ ndaaniʼ guidxilayú cubi ni maʼ biʼniʼ prometer Dios laanu.

^ párrafo 6 Biiyaʼ capítulo 24 stiʼ libru Acerquémonos a Jehová.

^ párrafo 12 Lu revista ¡Despertad! laaca zadxélaluʼ información ni zacané lii gánnaluʼ xi gúniluʼ ora guiníʼ íqueluʼ guutiluʼ laca lii, zeeda ni lu ca tema riʼ: “¿Vale la pena vivir? Tres razones para no darse por vencido” yaza 6, 7, 8 ne 9 (abril 2014), “Cuando se pierden las ganas de vivir” (enero 2012) ne “Merece la pena vivir” yaza 3 ne 4, 5 hasta 7 ne 8 hasta 12 (22 de octubre 2001).