Biiyaʼ guiraʼ ni nuu lu sitiu riʼ

guyé lu índice

Gusíʼdinu ni dxandíʼ

Gusíʼdinu ni dxandíʼ

«Dxandíʼ guiráʼ ni zeeda lu stiidxaluʼ» (SAL. 119:160).

DIIDXAʼ RIUUNDAʼ: sjj 29 NE sjj 53

1, 2. a) ¿Xi dxiiñaʼ jma gucuá ique Jesús guni lu xquendanabani, ne xiñee? b) ¿Xi caquiiñeʼ gúninu para guninenu Dios dxiiñaʼ tobi si?

GUCA Jesucristu ti carpinteru ne laaca gúcabe ti maestru ni biʼniʼ predicar ca diidxaʼ nacubi ne galán (Mar. 6:3; Rom. 15:8). Bíʼnibe guiropaʼ dxiiñaʼ riʼ jnézapeʼ. Biziidibe iquiiñebe ca herramienta ni riquiiñeʼ ti carpinteru para guzaʼbe stale cosa de yaga. Ne laaca biquiiñebe guiráʼ ni nánnabe de lu Stiidxaʼ Dios para gusiidibe binni guiénecaʼ guiráʼ ni dxandíʼ rusiidiʼ Stiidxaʼ Dios (Mat. 7:28; Luc. 24:32, 45). Dxi napa Jesús 30 iza, bisaana dxiiñaʼ de carpinteru para guni predicar stiidxaʼ Reinu. Gúnnabe ngue nga dxiiñaʼ ni jma risaca naquiiñeʼ gúnibe, ngue runi guniʼbe biseendaʼ Dios laabe lu Guidxilayú riʼ para gúnibe dxiiñaʼ riʼ (Mat. 20:28; Luc. 3:23; 4:43). Ni jma gucuá íquebe gúnibe lu xquendanabánibe nga guni predicarbe Stiidxaʼ Dios ne gucaláʼdxibe laaca zaqueca ñuni xcaadxi binni (Mat. 9:35-38).

2 Cadi carpinteru guiranu, peru nácanu ministru ni rusiidiʼ stiidxaʼ Dios. Guizáʼ risaca dxiiñaʼ riʼ, dede Dios runi ni. Ne Biblia peʼ ná tobi si rúninenu Dios dxiiñaʼ (1 Cor. 3:9; 2 Cor. 6:4). Nánnanu dxandíʼ guiráʼ ni rusiidiʼ stiidxaʼ Dios (Sal. 119:159, 160). Nga runi caquiiñeʼ guizíʼdinu iquiiñenu stiidxabe jneza ora guni predicarnu (biindaʼ 2 Timoteo 2:15). Cumu Biblia nga herramienta jma risaca ni riquiiñenu para gusíʼdinu ni dxandíʼ de Jiobá, Jesús ne de  Reinu la? caquiiñeʼ guiziidiʼ chaahuinu iquiiñenu ni jma jneza. Para ganda cueendunu ni galán la? maʼ gulee xquidxi Jiobá xcaadxi herramienta ni caquiiñeʼ gunibiáʼ chaahuinu, ne laacani nga ni runibiaʼnu casi kit de enseñanza.

3. a) ¿Xi jma naquiiñeʼ guicá íquenu gúninu yanna ra mayaca guinitilú guidxilayú riʼ yaʼ? b) Casi ná Hechos 13:48, ¿tuu nga cani naquiiñeʼ guyúbinu?

3 Zándaca guinabadiidxanu xiñee lani kit de enseñanza ne cadi kit de predicación. Purtiʼ ora runi predicarnu la? rudiʼnu ti mensaje. Peru ora rusíʼdinu la? rusiénenu binni mensaje ni rudiʼnu ti guiénecabe ni ne gucaa ni laacabe gúnicabe ni caziidicabe. Cumu maʼ huaxiéʼ tiempu riaadxaʼ para guinitilú guidxilayú riʼ la? jma naquiiñeʼ guicá íquenu guzulunu gudiʼnu cursu de lu Biblia ne gusíʼdinu binni ni dxandíʼ. Nga runi naquiiñeʼ gúninu stipa pur guyúbinu ca binni ni nuu listu para guicaa guendanabani ni qué zaluxe ne gacanenu laacaʼ gácacaʼ xpinni Jiobá (biindaʼ Hechos 13:44-47). Hechos 13:48 ná: «Ora binadiaga ca binni de xcaadxi guidxi, biéchecaʼ ne bisisácacaʼ stiidxaʼ Jiobá, guiráʼ cani nachaʼhuiʼ ladxidóʼ ni maʼ nuu para guicaa guendanabani ni qué zaluxe, biʼniʼ crecaʼ», Traducción del Nuevo Mundo.

4. ¿Ximodo zanda guidxélanu ca binni ni «maʼ nuu para guicaa guendanabani ni qué zaluxe»?

4 ¿Ximodo zanda guidxélanu ca binni ni «maʼ nuu para guicaa guendanabani ni qué zaluxe» yaʼ? Ti modo zanda gúninu ni nga guni predicarnu cásica bíʼnicabe ni lu primé siglu. Nga runi caquiiñeʼ chinándanu mandatu ni bidii Jesús laanu riʼ: «Intiica guidxi o guidxihuiiniʼ chuʼtu, laguyubi tu laa runi merecer guicaa ca diidxaʼ zinetu» (Mat. 10:11TNM). Nanna dxíchinu qué zaná ca binni ni cadi nayá ladxidóʼ, ca orgulloso ne cani qué riuulaʼdxiʼ guiziidiʼ de Dios guicaacaʼ mensaje ni zinenu. Nga runi ruyúbinu ca binni humilde, cani nayá ladxidóʼ, ne cani canayubi guiziidiʼ ni dxandíʼ. Guzéʼtenu ti ejemplu. Dxi biʼniʼ Jesús dxiiñaʼ de carpinteru la? nuunu seguru ruyúbibe yaga ni zanda iquiiñebe para ganda guzaʼbe mueble, puertaʼ ne ayubu. Ne ora maʼ bidxélabe ni la? riquiiñebe ca herramienta ni nápabe para guzaʼbe ca cosa riʼ. Zacagá nga naquiiñeʼ gúninu: primeru naquiiñeʼ guyúbinu binni ni nachaʼhuiʼ ladxidóʼ ne ora maʼ bidxélanu laacabe la? iquiiñenu ca herramienta ni nápanu para gacanenu laacabe gácacabe discípulo stiʼ Cristu (Mat. 28:19, 20).

5. Bisiene né ti ejemplu ximodo zanda iquiiñenu cada tobi de ca herramienta ni nuu lu kit de enseñanza ni nápanu (biiyaʼ foto ni zeeda ra ruzulú tema riʼ).

5 Maca nuu paraa zanda iquiiñenu cada herramienta. Guininu de ca herramienta ni zándaca biquiiñeʼ Jesús dxi biʼniʼ dxiiñaʼ de carpinteru. * Biquiiñebe herramienta para cuʼ biabe yaga, guni marcarbe ni, ugabe, quiidebe, gudiibe forma, ne laaca biquiiñebe herramienta para guni nivelarbe, quixeʼ chaahuibe o para guquiidibe yaga. Laaca zacaca zanda iquiiñenu cada tobi de ca herramienta ni nuu lu kit de enseñanza ni nápanu purtiʼ maca nuu paraa iquiiñenu cani. Ne cumu guiráʼ ni risaca la? guidúʼyanu ximodo zanda iquiiñenu cada tobi de laacani.

HERRAMIENTA PARA GACA PRESENTARNU

6, 7. a) ¿Ximodo huaquiiñeluʼ tarjeta de contactu? b) ¿Xi para riquiiñeʼ ca invitación ni riquiiñenu para guni invitarnu binni reunión?

6 Tarjeta de contactu. Nahuiiniʼ ca herramienta riʼ peru zanda iquiiñenu cani para gaca presentarnu nezalú binni ne gábinu laacaʼ chuʼcaʼ lu sitiu de Internet stinu. Luni zanda guidxélacabe stale información stinu ne zanda guinábacabe ti cursu de lu Biblia. Hasta nagasi la? jma de tapa mil binni maʼ gunabaʼ ti cursu de lu Biblia lu jw.org. ¡Ne cada dxi stale binni rinabaʼ ni! ¿Xiñee qué sánenu caadxi  tarjeta de contactu yaʼ? Zacá zanda guni predicarnu binni ora tiica si.

7 Invitación. Ca invitación ni riquiiñenu para guni invitarnu binni reunión riquiiñeʼ cani para chupa cosa. Sicaríʼ ruzeeteʼ ni: «Runi invitardu lii guinábaluʼ guʼndané ca testigu stiʼ Jiobá lii Biblia». Despué ruzeeteʼ ni zanda guni estudiarluʼ Biblia lu ca reunión ni rápadu o cheʼ tuuxa chiganna lii ra lídxiluʼ. Nga runi qué riquiiñesinu herramienta riʼ para gaca presentarnu, sínuque laaca riquiiñenu ni para guni invitarnu «cani nanna caquiiñeʼ Dios» para guni estudiarcaʼ Biblia né laanu (Mat. 5:3TNM). Guiráʼ binni zanda cheʼ ca reunión stinu neca cadi cacaacaʼ ti cursu de lu Biblia. Pa cheluʼ la? zuuyaluʼ xi guiráʼ zanda guiziidiluʼ de lu Biblia.

8. ¿Xiñee risaca nga cheʼ binni reunión neca ti biaje si? Bizeeteʼ ti ejemplu.

8 Nabé risaca nga cadi gusaana de guni invitarnu binni cheʼ reunión neca ti biaje si. ¿Xiñee yaʼ? Purtiʼ zacá zudiicabe cuenta maʼ gadxé laanu de ca religión falsu, laanu ca testigu stiʼ Jiobá rusíʼdinu ni dxandíʼ de lu Biblia ne racanenu binni gunibiaʼcaʼ Dios (Is. 65:13). Ngapeʼ nga ni bizaaca Ray ne Linda, ti guendaxheelaʼ de Estados Unidos. Runi crécabe Dios ne siempre guníʼ íquecabe caquiiñeʼ chécabe yuʼduʼ para guni biáʼcabe laabe jma. Ngue runi gudixhe íquecabe chécabe ndaaniʼ guiráʼ yuʼduʼ ni nuu ndaaniʼ xquídxicabe. Neca stale religión ne stale yuʼduʼ nuu raqué la? guníʼ íquecabe caquiiñeʼ gapa religión ca chupa cosa para ganda guiaanacabe raqué. Primé, naquiiñeʼ guiziidicabe xiixa ora chécabe ra yuʼduʼ que. Ne guiropa, ca binni ni rié ra yuʼduʼ ca naquiiñeʼ gácucabe lari jneza casi racu ti xpinni Dios. Ora bireecabe de ndaaniʼ últimu yuʼduʼ ni zeeda lu lista ni bíʼnicabe la? biguetaʼ Ray ra lidxi ne Linda zé dxiiñaʼ. Neza zé Ray, gudíʼdibe gaxha de ti Yoo stiʼ Reinu ne guníʼ íquebe: «¿Xiñee qué chuaaʼ ne guuyaʼ xi runi ca binni riʼ yaʼ?». Guizáʼ guyuuláʼdxibe guiráʼ ni binadiágabe. Guiráʼ hermanu que gúcacaʼ nachaʼhuiʼ né laabe ne guiracaʼ nácucaʼ lari jneza. Gurí Ray lu primé fila ne guizáʼ guyuulaʼdxiʼ guiráʼ ni biziidiʼ. Bizaaca ni cásipeʼ guníʼ apóstol Pablo rizaaca ora rié tuuxa primé biaje reunión ne riníʼ: «Dxandí nuu né Dios laatu» (1 Cor. 14:23-25). Dede dxi que, qué nusaana Ray de ñé reunión guiráʼ domingu ne despué laaca guyebe ca reunión ni raca ndaaniʼ semana. Despué laaca yené Linda laabe. Ne neca maʼ nápacabe jma de 70 iza gucuaacabe ti cursu de lu Biblia ne guyuunísacabe.

HERRAMIENTA PARA GUZULÚ GUINÍNENU BINNI

9, 10. a) ¿Xiñee cadi nagana para iquiiñenu ca tratadu ca yaʼ? b) Bisiene ximodo zanda iquiiñenu tratadu Xii nga Reinu stiʼ Dios.

9 Tratadu. Nápanu xhono tratadu, cadi nagana para iquiiñenu cani ne nabé galán cani para guzulú guinínenu binni. Dede dxi biree cani lu iza 2013, maʼ guca imprimir biaʼ gaayuʼ mil millón de laaca ni. Ne ni jma galán nga ora maʼ bizíʼdinu iquiiñenu tobi de laacani la? maʼ zanda iquiiñenu xcaadxi ca purtiʼ tobi si modo guiráʼ cani. ¿Ximodo zanda iquiiñenu cani para guzulú guinínenu binni yaʼ?

10 Guiníʼ íquenu chiguiquiiñenu tratadu ni láʼ Xii nga Reinu stiʼ Dios. Zanda guluiʼluʼ binni primé yaza stini ne gaʼbuʼ laa: «¿Ñee huanabadiidxaluʼ xii nga Reinu stiʼ Dios la? ¿Gunáʼ de ca guionnaʼ respuesta riʼ rábiluʼ biaʼsi yaʼ?». Sin gábinu laabe pa biaʼsi o pa cadi biaʼsi bicábibe la? zanda guluinu laabe sti yaza stini, ne guluinu laabe sección ni láʼ «Xiná Biblia» ne guidúʼndanenu laabe Daniel 2:44 ne Isaías 9:6 ni cá lu tratadu riʼ. Ne pa ganda la? guinínerunu laabe. Ne últimu la? guluinu laabe pregunta ni cá deche tratadu ca ni láʼ «Guníʼ ique»: «Ximodo zabani binni dxi maʼ guni mandar Reinu stiʼ Dios». Zacá zanda gusaananu ti pregunta para guicábinu sti biaje chigánnanu laabe. Ora guinínenu binni ca sti biaje la? zanda iquiiñenu ndaa 7 sti folletu  Ca diidxaʼ sicarú ni zeeda de Dios, ne laani nga tobi de ca herramienta ni riquiiñenu para guzulú gudiʼnu cursu binni de lu Biblia.

HERRAMIENTA PARA GACANENU BINNI CHUULAʼDXIʼ GUIZIIDIʼ

11. ¿Xi para raca ca revista stinu, ne xi naquiiñeʼ gánnanu de laacani?

11 Revista. Torre stiʼ ni rapa ne ¡Despertad! nga ca revista ni jma raca traducir ne ni jma raca imprimir lu guidubi Guidxilayú. Cumu lu guidubi Guidxilayú nga ruundaʼ binni cani la? ca tema ni reeda lu portada stícani raca cani para gucaa cani binni chuuláʼdxicaʼ gúʼndacaʼ ca revista riʼ. Iquiiñenu cani para gacanenu binni guiene xii nga ni jma risaca tiempu nabáninu riʼ. Peru para ganda gusaananu cani lu náʼ binni ni caquiiñeʼ ni la? caquiiñeʼ gánnanu tu para guca cada revista.

12. a) ¿Tu para riree revista ¡Despertad!, ne xi propósitu napa ni? b) ¿Xi experiencia huayápaluʼ ora biquiiñeluʼ herramienta riʼ?

12 Riree revista ¡Despertad! para ca binni ni nanna caadxi de lu Biblia o cani qué licapeʼ ganna gastiʼ. Zándaca qué runibiáʼ binni ni rusiidiʼ Biblia, qué runi confiárcabe ca religión o qué gánnacabe pa zanda gacané ca conseju ni zeeda lu Biblia laacabe. Tobi de ca propósitu stiʼ revista riʼ nga gacané ni binni ganna dxandíʼ nuu Dios (Rom. 1:20; Heb. 11:6). Laaca racané ni binni guni cré naca Biblia Stiidxaʼ Dios (1 Tes. 2:13). Tema stiʼ guionnaʼ portada stiʼ revista riʼ para lu iza 2018 nga «El camino de la felicidad», «12 claves para una familia feliz» ne «Ayuda para quienes están de duelo».

13. a) ¿Tu para riree revista Torre stiʼ ni rapa para guiráʼ binni (o edición para el público)? b) ¿Xi experiencia galán huayápaluʼ ora biquiiñeluʼ herramienta riʼ?

13 Revista Torre stiʼ ni rapa ni riree para guiráʼ binni (o edición para el público) rusiene cani rusiidiʼ Biblia ne riree ni para ca binni ni napa respetu Dios ne Stiidxabe. Zándaca nánnacabe caadxi de lu Biblia peru qué riene chaahuicabe ni rusiidiʼ ni (Rom. 10:2; 1 Tim. 2:3, 4). Guionnaʼ tema para portada stiʼ revista riʼ lu iza 2018 nga: «¿Ñee zándaruʼ gacané Biblia laanu la?», «¿Xi futuro cabeza laanu?» ne «¿Ñee rizaalaʼdxiʼ Dios lii la?».

HERRAMIENTA NI ZUCAA BINNI GUNI XIIXA

14. a) ¿Xi para guidapaʼ videu ni nuu lu kit de enseñanza ni nápanu? b) ¿Xi experiencia galán huayápaluʼ ora biquiiñeluʼ ca videu riʼ?

14 Videu. Tiempu bibani Jesús puru herramienta manual nga gupa ca carpinteru que, peru tiempu riʼ maʼ nápacabe stale herramienta eléctrica, casi sierra mecánica, taladru, lijadora ne clavadora. Zacagá nga rizaaca né ca publicación stinu, stale de laacani raca imprimir cani ne laaca nápanu stale videu guizáʼ galán. Tapa de laacani ni zeeda lu kit de enseñanza ni nápanu nga: Xiñee naquiiñeʼ guʼndanécabe lii Biblia, Ximodo ridúʼndanedu binni Biblia, Ximodo raca ca guendaridagulisaa stidu ne ¿Tuu nga ca testigu stiʼ Jiobá? Ca videu ni rindaa menu de chupa minutu la? zanda iquiiñenu cani ora chigánnanu binni primé biaje. Ne cani rindaa jma tiempu la? zanda iquiiñenu cani para gúninu revisita. Ca herramienta riʼ zanda gucaa cani binni chuulaʼdxiʼ guicaa ti cursu de lu Biblia ne cheʼ ca reunión stinu.

15. Bizeeteʼ ti ejemplu ni rusihuinni pabiáʼ racané ca videu stinu tuuxa binni lu stiidxaʼ.

15 Guidúʼyanu pabiáʼ racané ca videu riʼ binni. Ra canayuni predicar ti hermana bidxélabe ti gunaa de Micronesia ne biluiʼbe laa videu ni láʼ Xiñee naquiiñeʼ guʼndanécabe lii Biblia lu diidxaʼ yapés, primé diidxaʼ ni riníʼ gunaa que. Ora bizulú videu que la? bicaa gunaa que ti ridxi ne ná: «¡Biaa, caniʼbe stiidxaʼ! Señor ni caníʼ lu videu ca caniʼbe módopeʼ riníʼ ca binni de lu isla ra guleʼ. ¡Caniʼbe stiidxaʼ!». Despué guniʼbe zuundabe ne zuuyabe guiráʼ información ni nuu lu sitiu jw.org lu diidxaʼ yapés  (bichaaga ni né Hechos 2:8, 11). Yanna guininu ni bizaaca sti hermana de Estados Unidos, biseendabe enlace ra nuu videu riʼ ra nuu ti sobrínube lu stiidxaʼ. Biiyaʼ si sobrínube videu riʼ, sicaríʼ bicabi laabe lu ti correu electrónicu: «Ni jma guyuuladxeʼ nga parte ra cusiene naaze dxiichiʼ ti binni qué iquiiñeʼ guidxilayú riʼ. Nga runi gunabaʼ ti cursu de lu Biblia». Sobrínube riʼ nabeza ti lugar ra rucueeza gobiernu dxiiñaʼ stiʼ ca Testigu.

CA HERRAMIENTA NI RIQUIIÑENU PARA GUSÍʼDINU NI DXANDÍʼ

16. Bisiene xi para guca cada tobi de ca folletu riʼ: a) Bicaadiaga Dios ne qué ziuu dxi gátiluʼ. b) Ca diidxaʼ sicarú ni zeeda de Dios. c) Tuu nga cani cayuni ni na Jiobá ca dxi riʼ.

16 Folletu. Pa qué ganna ti binni guʼndaʼ o gastiʼ publicación lu stiidxaʼ, ¿ximodo zanda gusíʼdinu laabe ni dxandíʼ yaʼ? Nápanu ti herramienta para gacanenu laabe, laani nga folletu Bicaadiaga Dios ne qué ziuu dxi gátiluʼ. * Sti herramienta para guzulú gudiʼnu cursu de lu Biblia nga folletu Ca diidxaʼ sicarú ni zeeda de Dios. Zanda guluinu binni ca 14 tema ni zeeda lu últimu yaza stini, guinabadiidxanu laabe gunáʼ ni jma riuuláʼdxibe gánnabe ne guzulú guni estudiárnenu laabe tema ca. ¿Ñee huayúninu ndiʼ ora rúninu revisita la? Guionna folletu ni zeeda lu kit de enseñanza ni nápanu nga folletu Tuu nga cani cayuni ni na Jiobá ca dxi riʼ. Guca folletu riʼ para gacané ni binni chuʼ ndaaniʼ organización stiʼ Jiobá. Para gánnanu ximodo iquiiñenu ni la? zanda guidúʼndanu Xhiiñaʼ Dios ne modo nabáninu, ni biree lu beeu marzo iza 2017.

17. a) ¿Xi para riquiiñeʼ ca libru ni runi estudiárnenu binni? b) ¿Xi naquiiñeʼ guni guiráʼ cani riuunisa ne xiñee?

17 Libru. Pa guzulú gudiʼnu estudiu né ti folletu la? zanda guchaʼnu ni ora tiica si ne maʼ guidúʼndanenu binni libru Xipeʼ ndiʼ cusiidiʼ Biblia. Zacané herramienta riʼ ca binni ni cudiʼnu estudiu para guiziidicaʼ jma de cani rusiidiʼ Biblia. Pa guiluxe guidúʼndanenu binni libru riʼ ne guidúʼyanu caniisibe en sentidu espiritual la? zanda guzulunu guidúʼndanu libru Cadi guixélenu de Dios ni nadxii laanu. Zacané libru riʼ laabe para gánnabe ximodo guni aplicarbe ca principiu zeeda lu Biblia lu xquendanabánibe. * Cadi guiaandaʼ laanu, naquiiñeʼ guiluxe guidúʼndanenu laabe guiropaʼ libru riʼ neca maʼ guyuunísabe. Pa gúninu ni la? zacanenu laabe guzuhuaa dxiichibe lu ni dxandíʼ (biindaʼ Colosenses 2:6, 7).

18. a) Casi ná 1 Timoteo 4:16, ¿xi naquiiñeʼ guninu ne xi zabeendunu pa gúninu ni? b) ¿Xi naquiiñeʼ guicá íquenu gúninu ora iquiiñenu kit de enseñanza ni nápanu?

18 Laanu, ca testigu stiʼ Jiobá naquiiñeʼ chitídxinu binni mensaje stiʼ Dios para ganda guicaacaʼ guendanabani ni qué zaluxe (Col. 1:5; biindaʼ 1 Timoteo 4:16). Para ganda gúninu ni la? maʼ nápanu kit de enseñanza ra zeeda guiráʼ ni zanda iquiiñenu (biiyaʼ recuadru ni láʼ « kit de enseñanza»). Gúninu stipa pur iquiiñenu ni jneza. Cada publicador naquiiñeʼ guʼyaʼ xi herramienta iquiiñeʼ ne pora zanda guni ni. Peru cadi guiaandaʼ laanu cadi quísisinu publicación ora guni predicarnu, ne cadi naquiiñeʼ gusaananenu cani binni ni qué riuulaʼdxiʼ guiziidiʼ. Ni jma guicá íquenu nga guidxélanu ca binni ni «maʼ nuu para guicaa guendanabani ni qué zaluxe» cani naca humilde ne cani canayubi ganna jma de stiidxaʼ Dios para gácacaʼ discípulo stiʼ Cristu (Hech. 13:48TNM; Mat. 28:19, 20).

^ párrafo 5 Biiyaʼ tema ni láʼ «El oficio de carpintero» ne recuadru ni láʼ «La caja de herramientas», ni zeeda lu revista La Atalaya 1 de agosto iza 2010.

^ párrafo 16 Para ca binni ni qué ganna guʼndaʼ la? nuu folletu Bicaadiaga Dios, purtiʼ né ni stale dibuju.

^ párrafo 17 Ora maʼ gápanu libru ¿Qué nos enseña la Biblia? ne Continúe en el amor de Dios. Lu diidxaʼ stinu la? maʼ laaca ni iquiiñenu.